​​យោង​សេចក្តីរាយការណ៍​ពីតំបន់​អឺរ៉ុប ប្រទេស​អេស្តូនី ឡេតូនី​ លីទុយអានី និង​ប្រទេស​ប៉ូឡូញ បានយល់ព្រមដកខ្លួនចេញពីអនុសញ្ញាអូតាវ៉ា ដែលជាសន្ធិសញ្ញាអន្តរជាតិហាមប្រាមការមីនប្រឆាំងមនុស្ស ដើម្បីឆ្លើយតបនឹងការព្រួយបារម្ភកាន់តែខ្លាំងឡើងលើការគំរាមកំហែងផ្នែកយោធាដែលកំពុងកើនឡើងរបស់រុស្ស៊ីចំពោះរដ្ឋសមាជិកណាតូដែលជាប់ព្រំដែន។

​ការ​ប្រកាស​ដក​ខ្លួន​នេះ បាន​​កើតឡើងភ្លាមៗ បន្ទាប់ពីរដ្ឋមន្ត្រីការពារជាតិនៃរដ្ឋបាល់ទិក និងប៉ូឡូញបានផ្តល់អនុសាសន៍ជា​ឯកច្ឆ័ន្ទឱ្យដកខ្លួនចេញពីអនុសញ្ញាអូតាវ៉ា។ ការ​​ដកខ្លួន​​​ពីអនុសញ្ញា​ត្រូវ​ប្រើពេល​​៦​ខែ​​ដើម្បីចូលជាធរមាន បន្ទាប់​ពីការ​ដាក់​ពាក្យ​​​របស់​ប្រទេសហត្ថលេខី​។​

នៅក្នុងសេចក្តីថ្លែងការណ៍រួមមួយដែលបានចេញផ្សាយកាលពីថ្ងៃអង្គារ រដ្ឋមន្ត្រីការពារជាតិ​រដ្ឋបាល់​​ទិក បាននិយាយថាពួកគេ«​ជឿថានៅក្នុងបរិយាកាសសន្តិសុខបច្ចុប្បន្ន វាជារឿងសំខាន់បំផុតក្នុងការផ្តល់នូវភាពបត់បែនរបស់កងកម្លាំងការពារជាតិរបស់យើង និងសេរីភាពនៃជម្រើសក្នុងការប្រើប្រាស់ប្រព័ន្ធអាវុធថ្មីៗ និង​ដំណោះស្រាយដើម្បី​ពង្រឹងការការពារ​ផ្នែកខាងកើតដែលងាយរងគ្រោះរបស់សម្ព័ន្ធមិត្ត»​។

រហូតមកដល់ពេលនេះ គ្មានប្រទេសណាមួយបានដកខ្លួនជាផ្លូវការចេញពីអនុសញ្ញាអូតាវ៉ា ​​ដែល​គេស្គាល់​ថា «សន្ធិសញ្ញាហាមប្រាមមីន»​។

អនុសញ្ញាអូតាវ៉ាត្រូវបានអនុម័តនៅឆ្នាំ១៩៩៧ ហើយចូលជាធរមាននៅឆ្នាំ​១៩៩៩ ដែលរហូត​ដល់​ពេល​នេះ​​​មាន​​ប្រទេសចំនួន១៦៤​​​ ជាភាគី​​ហត្ថលេខី​​នៃសន្ធិសញ្ញានេះ។ ក៏ប៉ុន្តែ​​ប្រទេស​​មហាអំណាច​ប្រជែង​ឥទ្ធិពល​​និង​ភូមិសាស្រ្ត​នយោបាយ​ ​រួមមាន សហរដ្ឋអាមេរិក រុស្ស៊ី ចិន ឥណ្ឌា និងប៉ាគីស្ថាន​ មិនបាន​ចូលជាសមាជិក​​របស់​អនុសញ្ញា​នេះ​ម្តង​ណា​​ឡើយ។

សារ​ព័ត៌មាន Euro News ​បាន​ផ្សាយ​ថា នាយករដ្ឋមន្ត្រី​​​ឡេតូនី លោកស្រី​ Evika Silina បាន​និយាយថា សេចក្តីព្រាងច្បាប់មួយនឹងត្រូវដាក់ជូនសភា ដែលត្រូវធ្វើការសម្រេចចិត្តចុងក្រោយនៅសប្តាហ៍ក្រោយ។

​លោកស្រី Silina បាននិយាយថា៖«ការសម្រេចចិត្តនេះនឹងផ្តល់ឱ្យកងកម្លាំងប្រដាប់អាវុធជាតិរបស់យើងនូវសមត្ថភាពបន្ថែម​នៅពេលដែលពួកគេអាចទិញនិងអ្វី” ។

នាយករដ្ឋមន្ត្រីបានបន្ថែមថា៖«ឡេតូនី​​ក៏​បាន​ពិចារណា​អំពីលទ្ធភាពដែលយើងអាចផលិតបាន ព្រោះនេះក៏ជាប់ទាក់ទងជាមួយ​យុទ្ធ​សាស្ត្រឧស្សាហកម្ម​យោធារបស់យើងដែលបានអនុម័តនាពេលបច្ចុប្បន្ននេះ»​។

ប្រទេស​ជាច្រើន​​នៅ​តំបន់​អឺរ៉ុប​ខាងកើត​​ជាប់​ព្រំដែន​​​​​​ប្រទេសរុស្ស៊ី​បាន​ប្រុង​​ប្រៀប​​​ការពារ​ខ្លួន​​ខ្លាំងជាងមុន បន្ទាប់​ពីរុស្ស៊ី​​បាន​លើក​ទ័ព​ឈ្លាន​ពាន​​​ចូល​ប្រទេស​អ៊ុយក្រែន​កាល​​​ពី​ដើមឆ្នាំ​២០២២ និង​បានអូសបន្លាយ​ពេលវេលា​ជាង​៣ឆ្នាំ​។ ប្រទេសមហាអំណាច​អឺរ៉ុប​ខាងលិច​ បាន​​បង្កើន​ការ​ជួយ​​ជ្រុមជ្រែង​​​ដល់​ប្រទេសអ៊ុយក្រែន​​ក្នុងការ​ទប់​ស្កាត់​ការ​​​​ឈាន​ទៅមុខ​​របស់​យោធារុស្ស៊ី​​៕

ដោយ រ៉ាន់ រើយ​

The post ប្រទេស៤នៅបាល់​ទិក​ប្រកាស​​​​​​​​​​ដកខ្លួន​​​ពី​អនុសញ្ញា​ហាមឃាត់​មីន ត្រៀមខ្លួន​ទប់​​ទល់​ការឈ្លាន​ពាន​របស់រុស្ស៊ី​​​ appeared first on Kampuchea Thmey Daily.