ក្នុង​សេចក្តីជូនដំណឹង​របស់​អាជ្ញាធរអគ្គិសនីកម្ពុជា​បាន​បញ្ជាក់ថា ក្នុងក្របខណ្ឌនៃបទប្បញ្ញត្តិស្តីពីការដំឡើង និងការប្រើប្រាស់ប្រព័ន្ធថាមពលពន្លឺព្រះអាទិត្យលើដំបូលនៅកម្ពុជា អាជ្ញាធរអគ្គិសនីកម្ពុជាបានរៀបចំរួចរាល់នូវគេហទំព័រច្រកចេញចូលតែមួយ (Web Portal) សម្រាប់សាធារណជនទូទៅដែលមានបំណងដំឡើង និងប្រើប្រាស់ប្រព័ន្ធថាមពលពន្លឺ ព្រះអាទិត្យលើដំបូល អាចទទួលបានព័ត៌មាន ឯកសារពាក់ព័ន្ធនានា និងអាចបំពេញបែបបទស្នើសុំ ដំឡើង និងប្រើប្រាស់ប្រព័ន្ធថាមពលពន្លឺព្រះអាទិត្យលើដំបូលតាមរយៈអនឡាញ។

ក្នុង​សេចក្តីជូនដំណឹង​បាន​បញ្ជាក់​ទៀត​ថា ចាប់ពីថ្ងៃជូនដំណឹងនេះតទៅ ការបំពេញបែបបទស្នើសុំដំឡើង និងប្រើប្រាស់ប្រព័ន្ធថាមពលពន្លឺព្រះអាទិត្យលើដំបូល ត្រូវអនុវត្តតាមប្រព័ន្ធឌីជីថលគឺតាមគេហទំព័រច្រកចេញចូលតែមួយ ដែលមានអាសយដ្ឋាន rts.eac.gov.kh ឬ QR កូដដូចមានភ្ជាប់មកជាមួយឯកសារ​ក្នុង​សេចក្តី​ជូនដំណឹង​នេះ។

កន្លងទៅ អាជ្ញាធរអគ្គិសនីកម្ពុជា បានក្រើនរំលឹកដល់​ប្រជាពលរដ្ឋ​ឲ្យ​ទៅធ្វើស្វ័យប្រកាសចំពោះការ​ដំឡើង​​ប្រព័ន្ធថាមពលពន្លឺព្រះអាទិត្យលើដំបូលផ្ទះ។

យ៉ាងណាមិញ​ មន្រ្តី​អគ្គិសនីកម្ពុជា​បាន​បញ្ជាក់ថា ចំពោះការប្រើប្រាស់ប្រព័ន្ធថាមពលពន្លឺព្រះអាទិត្យដាច់ដោយឡែកដូចជា ការដាក់អំពូលសូឡាតាមរបងផ្ទះ តាមទីសារធារណៈ, ម៉ូទ័របូមទឹក, ឆ្នាំដាំបាយ មិនត្រូវធ្វើស្វ័យប្រកាសនោះទេប៉ុន្ដែសម្រាប់អ្នកដែលដំឡើងថាមពលពន្លឺព្រះអាទិត្យភ្ជាប់នឹងប្រព័ន្ធបណ្ដាញក្នុងផ្ទះ និងបណ្ដាញប្រើប្រាស់ដែលមានភ្ជាប់​នឹងប្រព័ន្ធផ្គត់ផ្គង់អគ្គិសនីរបស់ជាតិ ទើបតម្រូវឲ្យធ្វើស្វ័យប្រកាស។

មន្រ្តី​អគ្គិសនីកម្ពុជា​បាន​ពន្យល់ហេតុផល​ ដែល​ចាំបាច់តម្រូវឲ្យអ្នកប្រើប្រាស់អគ្គិសនីទាំងអស់ដែលបានដំឡើង និងប្រើប្រាស់ប្រព័ន្ធថាមពលពន្លឺព្រះអាទិត្យលើដំបូលមកដាក់ពាក្យស្វ័យប្រកាស ដើម្បីគ្រប់គ្រងទិន្នន័យនៃប្រភពអគ្គិសនី និងដើម្បី​សុវត្ថិភាព​ក្នុងការ​ប្រើប្រាស់​៕

The post អគ្គិសនី​កម្ពុជា​ដាក់ឱ្យប្រើប្រាស់ច្រកចេញចូលតែមួយ សម្រួល​ពលរដ្ឋ​ស្នើសុំដំឡើងថាមពលពន្លឺព្រះអាទិត្យលើដំបូល appeared first on Kampuchea Thmey Daily.

បន្ទាប់ពីទទួលបានព័ត៌មានជាបន្តបន្ទាប់ពីអគ្គសនីកម្ពុជា (EDC) និងអ្នកកាន់អជ្ញាបណ្ណផ្គត់ផ្គង់អគ្គិសនីឯកជន ថានៅតាមតំបន់មួយចំនួន មានករណីឆបោកអ្នកប្រើប្រាស់អគ្គិសនីតាមទូរស័ព្ទ តាមបណ្តាញទំនាក់ទំនងសង្គម ឬតាមមធ្យោបាយនានា ក្នុងការបង់ប្រាក់។
មធ្យោបាយនៃការឆបោកនោះ គឺរួមមានជាការឲ្យបង់ថ្លៃប្រើប្រាស់អគ្គិសនីប្រចាំខែ ថ្លៃប្តូរនាឡិកាស្ទង់ ប្តូរឌីស្យុងទ័រ ប្តូរបរិក្ខារអគ្គិសនីមួយចំនួន ដើម្បីចៀសវាងការផ្អាកកាផ្គត់ផ្គង់ ឬការកាត់ផ្តាច់ចរន្តអគ្គសនីជាដើម។

ពាក់ព័ន្ធនឹងបញ្ហានេះ អាជ្ញាធរអគ្គិសនី​សង្កត់ធ្ងន់ថា ប្រសិនបើមានបុគ្គលមិនស្គាល់អត្តសញ្ញាណណា ដែលបានទំនាក់ទំនងទៅ​ឲ្យបង់ប្រាក់ យោងតាមហេតុផលខាងលើនេះ សូមកុំបង់ប្រាក់​ឬផ្ទេរប្រាក់ឲ្យជននោះឲ្យសោះ ហើយត្រូវជូនដំណឹង​ដល់​អគ្គិសនីកម្ពុជា ឬអ្នកកាន់អាជ្ញាបណ្ណអគ្គិសនីឯកជន ដែលទទួលបន្ទុកផ្គត់ផ្គង់អគ្គសនីនៅតាមតំបន់របស់ខ្លួន ដើម្បីមានវិធានការទៅតាមផ្លូវច្បាប់។

អាជ្ញាធរអគ្គិសនីកម្ពុជាក៏បានសង្កត់ធ្ងន់ថា រាល់ការបង់ប្រាក់ថ្លៃប្រើប្រាស់អគ្គិសនី ឬសេវាផ្សេងៗ លុះត្រាតែមានវិក្កយបត្រ និងបង្កាន់ដៃ​ទទួលប្រាក់​ត្រឹមត្រូវរបស់អគ្គិសនីកម្ពុជា ឬរបស់អ្នកកាន់អាជ្ញាបណ្ណអគ្គិស​នីឯកជន។ បើមិនមានឯកសារទាំងនោះទេ សូមបងប្អូនប្រជាពលរដ្ឋ កុំបង់ប្រាក់ឲ្យសោះ៕

The post មានជនខិលខូច ឆបោកអ្នកប្រើប្រាស់អគ្គិសនីឲ្យផ្ទេរប្រាក់ថ្លៃប្រើប្រចាំខែ ឬសេវាផ្សេង appeared first on Kampuchea Thmey Daily.