កម្ពុជាបានរកចំណូលប្រមាណ​៨៣១លានដុល្លារពីការនាំចេញទៅកាន់ទីផ្សារ អន្តរជាតិ ក្នុងឆ្នាំ២០២៤ ធ្លាក់ចុះជិត៦០%ធៀបនឹងឆ្នាំ២០២៣ដែលទឹកប្រាក់ជាង២ពាន់លានដុល្លារ ដែលការធ្លាក់ចុះយ៉ាងគំហុកនេះ ដោយសារតែវិធានការពន្ធរបស់រដ្ឋាភិបាលសហរដ្ឋ​អាមេរិកដែលរឹតបន្តឹងលើការនាំចូលឧបករណ៍បន្ទះសូឡា។

ក្រសួងពាណិជ្ជកម្មអាមេរិកកាលពីនៅថ្ងៃ​ទី១ ខែតុលា​ ​ឆ្នាំ២០២៤ បានប្រកាសអំពី​ការកំណត់ពន្ធនាំចូល​លើឧបករណ៍ដំឡើងបន្ទះសូឡាពីប្រទេសកម្ពុជា វៀតណាម ម៉ាឡេស៊ី និងថៃ ដោយ​​គណៈកម្មាធិការពាណិជ្ជកម្មផលិតថាមពលព្រះអាទិត្យរបស់អាមេរិកបានចោទប្រកាន់ក្រុមហ៊ុនចិនដែលមានរោងចក្រនៅក្នុងប្រទេសអាស៊ីអាគ្នេយ៍ទាំងបួនថាបានធ្វើការនាំចេញបន្ទះសូឡាទៅជន់ពន្លិចទីផ្សារសហរដ្ឋអាមេរិកដោយមានតម្លៃទាបជាងតម្លៃផលិតកម្មរបស់ពួកគេ និងទទួលបានប្រាក់ឧបត្ថម្ភមិនយុត្តិធម៌ដែលធ្វើឱ្យផលិតផលអាមេរិកមិនមានការប្រកួតប្រជែង។

​យោងតាមរបាយការណ៍ដែលបានបង្ហោះនៅលើគេហទំព័ររបស់ក្រសួងពាណិជ្ជកម្ម ទីភ្នាក់ងារនេះបានគណនាអត្រាប្រឆាំងនឹងការឧបត្ថម្ភធនទូទៅចំនួន ៩,១៣ ភាគរយសម្រាប់ការនាំចូលពីប្រទេសម៉ាឡេស៊ី; អត្រា ៨,២៥ ភាគរយសម្រាប់ការនាំចូលពីប្រទេសកម្ពុជា; អត្រា ២៣,០៦ ភាគរយសម្រាប់ការនាំចូលពីប្រទេសថៃ និង អត្រា២,៨៥ ភាគរយសម្រាប់ការនាំចូលពីប្រទេសវៀតណាម។ ​​

អ្នកជំនាញសេដ្ឋកិច្ចនៃអង្គភាពស្រាវជ្រាវម៉ាក្រូសេដ្ឋកិច្ចអាស៊ាន+៣ (AMRO) ដែលមានមូលដ្ឋាន​នៅសិង្ហបុរីធ្លាប់បានលើកឡើងថា ផលិតកម្មបន្ទះសូឡានៅកម្ពុជា និងប្រទេសអាស៊ាន៣ផ្សេងទៀតរួមមាន ម៉ាឡេស៊ី ថៃ និងវៀតណាម អាចនឹងប្រឈម​នឹងការបិទទ្វារ​នាពេលខាងមុខ បន្ទាប់ពីរដ្ឋាភិបាលអាមេរិកកាលពីខែមិថុនាបានលុបចោលការ​លើកលែងពន្ធនាំចូលដល់ប្រទេសបួននៅអាស៊ានដែលរួមមានកម្ពុជា។

បើយោងតាមរបាយការណ៍រួមគ្នាមួយរបស់អ្នកជំនាញសេដ្ឋកិច្ចនៃស្ថាប័ននេះ គឺលោក ទេព វណ្ណសុភាឧត្តម និងអ្នកនាង យ៉ាង ជុនយូ ​ នៅក្នុងឆ្នាំ ២០២២ ការនាំចេញបន្ទះសូឡារបស់កម្ពុជាបានកើនឡើង ២,៨ ដងធៀបនឹងឆ្នាំ២០២១ ដែលសម្រេចបានទឹកប្រាក់នៃការនាំចេញរហូតដល់ ១ ពាន់លានដុល្លារ។ ចំពោះចំណែក​នៃការនាំចេញបន្ទះសូឡាធៀបទៅនឹងការនាំចេញសរុប​បានកើនឡើងដល់ ៤,៦ ភាគរយកើនពី ១,៤ ភាគរយ។ ក្នុងអំឡុងពេលដូចគ្នា ការនាំចូលបន្ទះសូឡារបស់កម្ពុជាបានកើនឡើងយ៉ាងឆាប់រហ័សផងដែរ ដោយមានអត្រាទ្វេរដងដែលមានទឹកប្រាក់រហូតដល ២៧២លានដុល្លារ ប៉ុន្តែបរិមាណនេះគឺទាបជាងការនាំចេញ​បន្ទះសូឡាសរុប។

អ្នកជំនាញទាំងពីរនេះបានលើកឡើងថា គំរូពាណិជ្ជកម្មនេះបង្ហាញថា មួយផ្នែកធំនៃការនាំចេញបន្ទះសូឡារបស់កម្ពុជាអាចត្រូវបានតំឡើងក្នុងស្រុកជាជាងការនាំចូល និងនាំចេញឡើងវិញ។ និន្នាការកើនឡើងនៃការនាំចេញបានបន្តរហូតដល់ឆ្នាំ ២០២៣ដោយតម្លៃនៃការនាំចេញឈានដល់ទឹកប្រាក់ចំនួន ២,១ ពាន់លានដុល្លារ ដែលកើនឡើងទ្វេដងធៀបនឹងឆ្នាំមុន។

អ្នកទាំងពីរបានគូសបញ្ជាក់ថា ការនាំចេញបន្ទះសូឡាទៅកាន់សហរដ្ឋអាមេរិកពីប្រទេសអាស៊ានទាំងបួននេះបានកើនឡើងយ៉ាងខ្លាំងក្នុងឆ្នាំ ២០២៣ ដែលមានកំណើនស្មើនឹង ៧៥ ភាគរយនៃការនាំចូលបន្ទះសូឡាសរុបរបស់សហរដ្ឋអាមេរិក។ ​

«កម្ពុជាជាប្រទេសមួយដែលមានការនាំចេញដ៏លេចធ្លោជាង ដែលការនាំចេញបន្ទះសូឡារបស់ខ្លួនទៅកាន់សហរដ្ឋអាមេរិកក្នុងឆ្នាំ ២០២៣ មានចំនួនជាង ៩០ ភាគរយនៃការនាំចេញបន្ទះសូឡាសរុបទៅកាន់ប្រទេសផ្សេងៗទៀត»។ នេះបើយោងតាមអ្នកជំនាញទាំងពីរ។

គួរកត់សម្គាល់ថាជាង ៩០ ភាគរយនៃការនាំចូលបន្ទះសូឡារបស់កម្ពុជាបាននាំចូលមកពីប្រទេសចិនទាំងនៅក្នុងឆ្នាំ ២០២២និង ២០២៣ ។ អត្រាចំណែកទីផ្សារដ៏ធំនេះបង្ហាញពីការផ្លាស់ប្តូរការនាំចេញរបស់ចិនតាមរយៈប្រទេសកម្ពុជាដើម្បីចៀសវាងការរឹតបន្តឹងពាណិជ្ជកម្ម ឬឆ្លុះបញ្ចាំងពីការវិនិយោគដ៏ច្រើនរបស់ចិននៅក្នុងឧស្សាហកម្មផលិតបន្ទះសូឡានៅកម្ពុជា​ដែលជាប្រទេសទទួលបានការអនុគ្រោះពន្ធនាំចូលពីសហរដ្ឋអាមេរិក។ នេះបើយោងតាមអ្នកជំនាញទាំងពីរ។

បន្ទាប់ពីកំណើនដ៏ខ្ពស់ក្នុងរយៈពេលខ្លីក្នុងឆ្នាំ ២០២២-២០៣ ការនាំចេញបន្ទះសូឡារបស់កម្ពុជាបានឈានទៅដល់ចំណុចរបត់មួយនៅឆ្នាំ ២០២៤​ ដោយប្រឈមមុខនឹងបញ្ហាសំខាន់ៗមួយចំនួន។ ក្តីបារម្ភចម្បងមួយគឺថា ការនាំចេញបន្ទះសូឡាទៅកាន់សហរដ្ឋអាមេរិក នឹងត្រូវប្រឈមមុខនឹងការបង់ពន្ធនាំចូលចន្លោះពី ៥០% ទៅ ២៥០% បន្ទាប់ពីការផុតកំណត់នៃការលើកលែងពន្ធរបស់សហរដ្ឋអាមេរិកក្នុងខែមិថុនា ឆ្នាំ ២០២៤កន្លងទៅនេះ។ នេះបើយោងតាមរបាយការណ៍នេះ។

អ្នកជំនាញទាំងពីរនេះបានគូសបញ្ជាក់ថា៖«រោងចក្រផលិតបន្ទះសូឡាមួយចំនួនបានបញ្ឈប់ការផលិតនៅមុនខែមិថុនា ដោយលើកឡើងថាពួកគេ«កំពុងធ្វើការកែលម្អបរិក្ខារ»ឬ «ការថែទាំ» ។ អ្នកខ្លះកំពុងពិចារណាបិទរោងចក្ររបស់ពួកគេនៅអាស៊ីអាគ្នេយ៍ ដោយបង្ហាញពីភាពងាយរងគ្រោះរបស់វិស័យនេះ។ ជាលទ្ធផល ការនាំចេញរបស់កម្ពុជាបានជួបប្រទះនឹងការធ្លាក់ចុះយ៉ាងខ្លាំងនៅប៉ុន្មានខែដើម​ឆ្នាំ ២០២៤នេះ ជាមួយនឹងការធ្លាក់ចុះស្រដៀងគ្នានេះក៏ឃើញកើតមាននៅក្នុងប្រទេសម៉ាឡេស៊ី ថៃ និងវៀតណាមផងដែរ»៕

The post ​ចំណូលពីការនាំចេញបន្ទះសូឡាពីកម្ពុជាធ្លាក់ចុះជិត៦០% ក្នុងឆ្នាំ២០២៤ appeared first on Kampuchea Thmey Daily.

ការ​ចេញ​សេចក្តី​ថ្លែង​ការ​ណ៍​​នេះ​ ​ក្រោយ​ការ​ចាប់ខ្លួន​និង​​​ផ្តន្ទាទោស​​​លោកស្រី Linda Sun ​ដែល​ជា​ជន​ជាតិ​អាមេរិក​​​​ដើម​កំណើត​​​ចិន​​​ដែល​រង​ការ​ចោទ​ថា​​ បាន​ធ្វើ​ជា​​​ភ្នាក់ងារ​​​​សម្ងាត់​ខុសច្បាប់​ឱ្យ​រដ្ឋាភិបាលចិន​ក្នុងឋានៈខ្លួន​ជា​មន្ត្រី​សាធារណៈ និ​ងជាជំនួយ​ការ​របស់​អភិបាល​រដ្ឋ​ញូវយ៉ក។​

ក្នុង​ករណី​​លោកស្រី Linda Sun សមាគម FAPA បានចាត់​ទុក​សាធារណៈរដ្ឋប្រជាមានិតចិន (PRC) ជ្រៀតចូលនយោបាយដែលកំពុងដំណើរការ និងកិច្ចខិតខំប្រឹងប្រែងចារកម្មនៅក្នុងស្ថាប័នរដ្ឋាភិបាលសហរដ្ឋអាមេរិក។

​រដ្ឋអាជ្ញា​​ក្រុង​ញូវយ៉ក​​​កាល​ពីថ្ងៃ​ព្រហស្បតិ៍​ បាន​ចោទ​ប្រកាន់​​​ ជន​ជាតិ​អាមេរិក​ដើមកំណើត​​​ចិន​ អ្នកស្រី Linda Sun ​​​បទ​​​​ដើរតួនាទី​ធ្វើ​​​ជា​ភ្នាក់ងារ​ខុសច្បាប់​​សម្រាប់​រដ្ឋាភិបាល​​​ចិន​ ដែល​បង្ក​ឱ្យ​មាន​ក្តី​បារម្ភ​ថា ​​រដ្ឋាភិបាល​ចិ​​ន​​​​បង្កើន​កិច្ច​ខិតខំ​ដើម្បី​​មាន​ឥទ្ធិពល​​​​លើ​រដ្ឋាភិបាល​សហរដ្ឋ​អាមេរិក។

ការសម្រេចចិត្តរបស់រដ្ឋអាជ្ញាញូវយ៉កក្នុងការចោទប្រកាន់អតីតជំនួយការរបស់អភិបាលក្រុងញូវយ៉កក្នុងសប្តាហ៍នេះ បន្ទាប់​​ពី​រក​ឃើញ​ថា លោកស្រី  Linda Sun បាន​កាន់​កាប់​តួនាទីជាច្រើននៅក្នុងរដ្ឋាភិបាលរដ្ឋញូវយ៉ក រួមទាំងអនុប្រធានបុគ្គលិកសម្រាប់អភិបាល​ក្រុងញូវយ៉ក លោកស្រី​ Kathy Hochul។

ក្នុង​តួនាទី​​​ដ៏សំខាន់​នោះ​ លោកស្រីត្រូវបានចោទប្រកាន់ពីបទជំរុញផលប្រយោជន៍របស់ចិននៅក្នុងមុខងារសាធារណៈរបស់​រដ្ឋ រួមទាំងការចោទប្រកាន់ដែល​ថា​លោកស្រី​បានរារាំងអ្នកតំណាងមកពីកោះតៃវ៉ាន់ពីការជួបអភិបាល​រដ្ឋ​ជាថ្នូរនឹងផលប្រយោជន៍ហិរញ្ញវត្ថុដែលមានតម្លៃរាប់លានដុល្លារ។

ប្រឈ​ម​ការ​ចោទ​នោះ នៅ​មិន​ទាន់​មាន​ប្រតិកម្ម​ពី​សំណាក់រដ្ឋាភិបាល​ក្រុងប៉េកាំង​​នៅឡើយ​រហូតដល់​ពេល​នេះ​៕

​ដោយ​ រ៉ាន់ រើយ​

The post ការ​ស៊ើប​អង្កេត​​ត្រូវ​ធ្វើ​នៅ​គ្រប់កម្រិត​​​អាជ្ញាធរ​​អាមេរិក​ ក្រោយ​ចាប់​ភ្នាក់ងារ​សម្ងាត់ចិន​ appeared first on Kampuchea Thmey Daily.

រដ្ឋមន្ត្រីក្រសួងវិនិយោគ ពាណិជ្ជកម្ម និងឧស្សាហកម្ម​ម៉ាឡេស៊ី​ លោក​ Tengku Datuk Seri Zafrul Abdul Aziz បាននិយាយ​ក្នុង​សន្និសីទ​មួយ​កាល​ពី​ថ្ងៃ​អង្គារ​ ថា នៅទូទាំងពិភពលោក វិនិយោគិនក្នុងឧស្សាហកម្មដូចជារថយន្តអគ្គិសនី (EVs) និងថាមពលពន្លឺព្រះអាទិត្យ គឺផ្តោតលើការធានាខ្សែសង្វាក់ផ្គត់ផ្គង់ដ៏រសើប។

លោក​ថ្លែង​យ៉ាង​ដូច្នេះ​ថា​៖ «ការងើប​​ឡើង​នៃការ​ប្រកួត​ប្រជែង​ក្នុង​ខ្សែសង្វាក់ផ្គត់ផ្គង់​ និងកិច្ចខិតខំប្រឹងប្រែងកាត់​បន្ថយ​ទំនាក់​ទំនង​ពាណិជ្ជកម្ម​រវាង​គ្នា​និង​គ្នា​របស់​អាមេរិក និងចិន​ បានផ្លាស់ប្តូរសក្ដានុពលនៃពាណិជ្ជកម្ម និងការវិនិយោគអន្តរជាតិ»។

លោក​ Tengku Zafrul បាននិយាយថា ការយល់ដឹងច្បាស់​ពីការបែងចែក​ក្នុងប្រព័ន្ធអេកូឡូស៊ីបច្ចេកវិទ្យាសកល គឺជាកត្តាសំខាន់​ ដើម្បី​ឱ្យ​ម៉ាឡេស៊ី​ក្លាយ​ជាគោលដៅវិនិយោគ ជាពិសេស​លើ​វិស័យ​បន្ទះ​ឈីប»។ ​

មន្រ្តី​ដដែល​បន្ត​ថា​៖ «​គំនិតផ្តួចផ្តើម «ផលិត​នៅ​ចិន​២០២៥» របស់​ប្រទេស​ចិន​ ​ចង់​មាន​ភាព​លេចធ្លោ​ក្នុងបច្ចេកវិទ្យាសំខាន់ៗដូចជា បញ្ញាសិប្បនិម្មិត ​មនុស្សយន្ត ថាមពលកកើត​ឡើង​វិញ​ រថយន្ត​អគ្គិសនី​ អវកាស និងជីវបច្ចេកវិទ្យា។ ជាការឆ្លើយតប សហរដ្ឋអាមេរិកបានដាក់កម្រិតលើការនាំចេញដ៏សំខាន់ និងការវិនិយោគច្នៃប្រឌិតក្នុងស្រុក តាមរយៈគំនិតផ្តួចផ្តើមដូចជាច្បាប់បន្ទះ​ឈីប​ ជា​ដើម​»។ ​

ដោយ​សារ​តែ​ការ​ប្រកួត​ប្រជែង​អាមេរិក​ និង​ចិន​ លោក​ Tengku Zafrul បាន​លើក​ឡើង​ថា​ ​អ្នកវិនិយោគជាច្រើនកំពុងស្វែងរកការធ្វើពិពិធកម្មនៅទូទាំងតំបន់ និងវិស័យនានា ​ដើម្បី​ជា​វិធានការកាត់បន្ថយហានិភ័យ ដើម្បី​កុំ​ឱ្យ​ខ្សែ​សង្វាក់​​ផ្គត់​ផ្គង់​របស់​ខ្លួន​ពឹង​ផ្អែក​លើ​ប្រទេស​ទាំ​ង២​ខ្លាំង​​ពេក​។

ខណៈ​ «សង្រ្គាម​ត្រជាក់​នៃ​បច្ចេកវិទ្យា​» បន្ត​តាន​តឹង​លើ​បន្ទះ​ឈីប​ វិស័យ​បន្ទះ​ឈីប​របស់​ម៉ាឡេស៊ីដែល​មាន​អាយុកាល​ជាង​ ៥០ ឆ្នាំ​​ បាន​ធ្វើ​ឱ្យ​ប្រទេស​របស់​ខ្លួន​​ក្លា​យ​ជា​ទិស​ដៅ​ដ៏​លេច​ធ្លោ​ ដែល​ការណ៍​នេះ​ហើយ​ទើប​រដ្ឋាភិបាល​បង្កើត​យុទ្ធសាស្រ្ត​បន្ទះ​ឈីប​ជាតិ​ ដើម្បី​ជំរុញ​ខ្សែ​ចង្វាក់​ផ្គត់ផ្គង់​៕

The post ម៉ាឡេស៊ី​ចាប់ប្រយោជន៍​ពី​ភាព​តាន​តឹង​ពាណិជ្ជកម្ម​អាមេរិក​-ចិន​ ជា​ពិសេស​វិស័យ​បច្ចេកវិទ្យា​ appeared first on Kampuchea Thmey Daily.