FIFA Days Archives - Kampuchea Thmey Daily

កម្ពុជា ប៉ះ តាហ្ស៊ីគីស្ថាន យប់នេះ ជាការប្រកួតដើម្បីកីឡាករវ័យក្មេងបង្កើនសមត្ថភាព

chean virakbot — Thu, 05 Jun 2025 01:39:07 +0000

ដូចអ្នកគាំទ្រដឹងស្រាប់ហើយ ក្រុមការងារគ្រូបង្វឹកបានជ្រើសរើសកីឡាករអាយុក្រោម២៣ឆ្នាំចំនួន១៦នាក់ក្នុងចំណោម បញ្ជីឈ្មោះ២៣នាក់ដែលត្រូវប្រកួតជាមួយ តាហ្ស៊ីគីស្ថាន វេលាម៉ោង៧យប់ ថ្ងៃទី៥ ខែមិថុនា ឆ្នាំ២០២៥ នៅពហុកីឡដ្ឋានជាតិអូឡាំពិក។

លោក Koji Gyotoku គ្រូបង្វឹកកម្ពុជាបានថ្លែងក្នុងសន្និសីទសារព័ត៌មានថា ការប្រកួតនេះលោកបានសម្រេចផ្តល់ឱកាសឲ្យកីឡាករវ័យក្មេងបង្ហាញសមត្ថភាព ដូច្នេះលោកសង្ឃឹមពួកគេខិតខំប្រឹងប្រែងឲ្យអស់ពីលទ្ធភាពដើម្បីបំពេញចិត្តតាមអ្វីដែលលោកបានផ្តល់ឲ្យពួកគេ។

គោលបំណងសំខាន់នៃការជ្រើសរើសកីឡាករវ័យក្មេងភាគច្រើន គឺជាការត្រៀមខ្លួនរបស់លោក Koji Gyotoku សម្រាប់ការប្រកួតពានរង្វាន់អន្តរជាតិចំនួន៣នៅពេលខាងមុខ។ ទី១ ក្រុម U23 កម្ពុជា ត្រូវចូលរួមប្រកួតពាន ASEN U23 Championship ឆ្នាំ២០២៥ នាពាក់កណ្តាលខែនេះ នៅឥណ្ឌូណេស៊ី ទី២ចូលរួមប្រកួតពាន AFC U23 Asian Cup វគ្គជម្រុះក្នុងពូល G ខែកញ្ញា ដែលកម្ពុជាទទួលធ្វើម្ចាស់ផ្ទះ និងទី៣ កីឡាស៊ីហ្គេម ខែធ្នូ នៅថៃ។

ការប្រើមធ្យោបាយបែបនេះគឺល្អសម្រាប់កីឡាករវ័យក្មេងដែលនឹងទទួលបានបទពិសោធថ្មីក្នុងការប្រកួតកម្រិតអន្តរជាតិជាមួយក្រុមខ្លាំង។ ទោះបីជាយ៉ាងណា មិនសូវជាល្អប្រសើរសម្រាប់ក្រុមជម្រើសជាតិក្រុមធំឡើយ ដោយសារត្រូវការពិន្ទុ និងបង្កើនតារាងចំណាត់ថ្នាក់ FIFA ឲ្យកាន់តែល្អប្រសើរ។ កម្ពុជាគួរតែកីឡាករជម្រើសដៃទី១ និងក្រុមយុវជនឲ្យដាច់ស្រឡះពីគ្នាដើម្បីឲ្យពួកគេបានហ្វឹកហាត់ ក៏ដូចជាលេងនៅលើទីលានយូរអង្វែង និងយល់ចិត្តគ្នាច្រើន។

បច្ចុប្បន្ន ក្រុមកម្ពុជា ស្ថិតនៅចំណាត់ថ្នាក់លេខ១៨១ ខណៈ តាហ្ស៊ីគីស្ថាន ស្ថិតនៅលេខ១០៤ ដែលខ្ពស់ជាងកម្ពុជាឆ្ងាយ។ កម្ពុជាមិនធ្លាប់មានប្រវត្តិឈ្នះពានអន្តរជាតិទេ ប៉ុន្តែធ្លាប់ទទួលលេខ៤ក្នុង AFC Asian Cup ឆ្នាំ១៩៧២។ ចំណែក តាហ្ស៊ីគីស្ថាន ដែលកីឡាករមានកាយសម្បទាធំល្អ ធ្លាប់ឈ្នះពានអន្តរជាតិចំនួន៣គឺ AFC Challenge Cup ឆ្នាំ២០០៦, ពានស្តេចថៃ King’s Cup ឆ្នាំ២០២២ និង ពានមិត្តភាពអន្តរជាតិ Merdeka នៅម៉ាឡេស៊ី ឆ្នាំ២០២៣។

កម្ពុជា និង តាហ្ស៊ីគីស្ថាន មិនសូវធ្លាប់បានជួបគ្នាទេក្នុងប្រវត្តិសាស្ត្រ ដោយធ្លាប់បានជួបម្តងក្នុងជំនួបមិត្តភាពកាលពីឆ្នាំ២០១១ កម្ពុជាបានចាញ់ដោយលទ្ធផល ០-៣។

៥ប្រកួតចុងក្រោយរបស់ កម្ពុជា

ចាញ់ អារូបា ១-២
ចាញ់ វៀតណាម ១-២
ចាញ់ ថៃ ២-៣
ឈ្នះ ទីម័រខាងកើត ២-១
ចាញ់ សិង្ហបុរី ១-២

៥ប្រកួតចុងក្រោយរបស់ តាហ្ស៊ីគីស្ថាន

ឈ្នះ ទីម័រខាងកើត ១-០
ចាញ់ បេឡារុស្ស ០-៥
ឈ្នះ ស្រីលង្កា ៣-១ឈ្នះ នេប៉ាល់ ៤-០
ចាញ់ ហ្វីលីពីន ០-៣

អត្ថបទ៖ វីរបុត្រ

The post កម្ពុជា ប៉ះ តាហ្ស៊ីគីស្ថាន យប់នេះ ជាការប្រកួតដើម្បីកីឡាករវ័យក្មេងបង្កើនសមត្ថភាព appeared first on Kampuchea Thmey Daily.

លីគចាប់ផ្តើមសម្រាក ក្រុមជម្រើសជាតិត្រៀមប្រកួតអន្តរជាតិ

chean virakbot — Mon, 10 Mar 2025 03:34:55 +0000

ជម្រើសជើងឯកជាតិ ខេមបូឌានព្រីមៀរលីគ ត្រូវសម្រាកចាប់ពីសប្តាហ៍នេះដើម្បីឲ្យក្រុមបាល់ទាត់ជម្រើសជាតិកម្ពុជាត្រៀមខ្លួនប្រកួតមិត្តភាពអន្តរជាតិ នៅថ្ងៃ FIFA Days ស្របតាមគោលពេលវេលាកំណត់របស់សហព័ន្ធកីឡាបាល់ទាត់អន្តរជាតិ (FIFA)។

សហព័ន្ធកីឡាបាល់ទាត់អន្តរជាតិបានកំណត់ថ្ងៃ FIFA Days ចាប់ពីថ្ងៃទី១៧ ដល់ទី២៥ ខែមីនា ឆ្នាំ២០២៥។ នេះជាពេលវេលាសម្រាប់ក្រុមបាល់ទាត់ជម្រើសជាតិទាំងអស់ទាំងពិភពលោកត្រូវប្រកួតមិត្តភាពអន្តរជាតិ និងពានរង្វាន់អន្តរជាតិផ្លូវការរបស់សហព័ន្ធកីឡាបាល់ទាត់អន្តរជាតិ។

ក្រុមបាល់ទាត់ជម្រើសជាតិកម្ពុជា មិនមានការប្រកួតពានរង្វាន់ផ្លូវការទេ ប៉ុន្តែមានការប្រកួតមិត្តភាពអន្តរជាតិចំនួន២ប្រកួត។ សហព័ន្ធកីឡាបាល់ទាត់កម្ពុជា និងក្រុមការងារគ្រូបង្វឹកជម្រើសជាតិកម្ពុជាទំនងជាចេញបញ្ជីឈ្មោះក្រុមជម្រើសជាតិកម្ពុជាក្នុងសប្តាហ៍នេះដើម្បីហ្វឹកហាត់ត្រៀមការប្រកួតមិត្តភាពអន្តរជាតិ បន្ទាប់ពីលីគបាល់ទាត់កំពូលកម្ពុជាបានឈប់សម្រាកចាប់ពីថ្ងៃទី១០ ខែមីនា ឆ្នាំ២០២៥។

ក្រុមបាល់ទាត់ជម្រើសជាតិកម្ពុជា នឹងធ្វើដំណើរទៅប្រកួតជាមួយក្រុមជើងឯកអាស៊ានគឺ វៀតណាម នៅថ្ងៃទី១៩ ខែមីនា ឆ្នាំ២០២៥ នៅប្រទេសវៀតណាម ក្នុងជំនួបមិត្តភាពអន្តរជាតិ ហើយបន្ទាប់មកបើកទ្វារពហុកីឡដ្ឋានជាតិអូឡាំពិកទទួលក្រុមជម្រើសជាតិកោះអារូប៉ា នៅថ្ងៃទី២៥ ខែមីនា ឆ្នាំ២០២៥។

អ្វីដែលអ្នកគាំទ្រទន្ទឹងរង់ចាំគឺកីឡាករណាខ្លះដែលត្រូវបានក្រុមការងារគ្រូបង្វឹកជម្រើសជាតិកម្ពុជាកោះហៅចូលជំរំហ្វឹកហាត់ ហើយថាតើធ្វើបានល្អកម្រិតណានៅពេលជួបក្រុមខ្លាំង វៀតណាម ដែលជាក្រុមជើងឯកអាស៊ានប្រចាំឆ្នាំ២០២៤-២៥៕

អត្ថបទ៖ វីរបុត្រ

The post លីគចាប់ផ្តើមសម្រាក ក្រុមជម្រើសជាតិត្រៀមប្រកួតអន្តរជាតិ appeared first on Kampuchea Thmey Daily.

យប់នេះ កម្ពុជា ប៉ះ ហ្គីយ៉ាន ក្នុងព្រឹត្តិការណ៍ FIFA Series

Pha Rothana — Tue, 26 Mar 2024 01:54:48 +0000

ក្រុមបាល់ទាត់ជម្រើសជាតិកម្ពុជា ត្រូវជួប ក្រុមជម្រើសជាតិហ្គីយ៉ាន មកពីទ្វីបអាមេរិកខាងត្បូង ក្នុងព្រឹត្តិការណ៍មិត្តភាពអន្តរជាតិ FIFA Series វេលាម៉ោង២យប់ជ្រៅ ថ្ងៃទី២៦ ខែមីនា ឆ្នាំ២០២៤ នៅប្រទេសអារ៉ាប៊ីសាអ៊៊ូឌីត ផ្សាយបន្តផ្ទាល់ដោយ BTV News។

ស្ថិតនៅចំណាត់ថ្នាក់លេខខ១៧៩ កម្ពុជាបន្តធ្វើការធ្ងន់ទៀតនៅពេលតទល់នឹងហ្គីយ៉ាន ដែលចំណាត់ថ្នាក់លេខ១៥៧ក្នុងតារាងចំណាត់ថ្នាក់បាល់ទាត់ពិភពលោក។ ការប្រកួត៤លើកចុងក្រោយ តាំងពីខែតុលា ឆ្នាំ២០២៣ កម្ពុជាធ្វើមិនល្អសោះ ដោយមិនអាចរកគ្រាប់បាល់សូម្បីតែ១គ្រាប់ និងមិនទាន់រកបានជ័យជម្នះឡើយ។ នេះជាបញ្ហាធំបង្ហាញថា កម្ពុជាកំពុងខ្វះខ្សែប្រយុទ្ធដែលមានគុណភាពបញ្ចប់ទី។

ការប្រកួតទី២នៅប្រទេសអារ៉ាប៊ីសាអ៊ូឌីតនេះ លោក Felix Dalmás ទំនងជាផ្លាស់ប្ដូរយុទ្ធសាស្រ្ដខ្លះៗ ដើម្បីរកគ្រាប់បាល់ ក៏ដូចជាជ័យជម្នះជូនអ្នកគាំទ្រ។

ការប្រកួត៥លើកចុងក្រោយ ក្រុមជម្រើសជាតិហ្គីយ៉ាន ធ្វើបានយ៉ាងល្អ ដោយឈ្នះ៤ និងចាញ់១ ហើយស៊ុតបញ្ចូលទីបាន១៥គ្រាប់ និងរបូតគ្រាប់បាល់តែ៥គ្រាប់ប៉ុណ្ណោះ។ មុនប៉ះកម្ពុជា ហ្គីយ៉ាន ទើបតែចាញ់ជម្រើសជាតិកាប់វែរ ១-០ ក្នុងព្រឹត្តិការណ៍ FIFA Series ដែរ។ កំណត់ត្រាដ៏ល្អរបស់ហ្គីយ៉ាន គឺឈរលេខ១ក្នុងពូល D វគ្គជម្រុះពានរង្វាន់ CONCACAF Nations League B ក្រោយប្រកូត៥លើក ឈ្នះទាំង៥ មាន១៥ពិន្ទុ ហើយទទួលបានកៅអីឡើងទៅលេងនៅពានរង្វាន់ CONCACAF Nations League A។

ក្រោយបញ្ចប់ព្រឹត្តិការណ៍មិត្តភាពអន្តរជាតិនេះ ហ្គីយ៉ាន មានកាតព្វកិច្ចក្នុងវគ្គជម្រុះជុំទី២ ពានរង្វាន់បាល់ទាត់ពិភពលោក ក្នុងតំបន់អាមេរិកខាងត្បូង ខណៈកម្ពុជាគ្មានកម្មវិធីប្រកួតទេ ក្រោយធ្លាក់ជម្រុះ World Cup តាំងពីជុំទី១៕

អត្ថបទ៖ ផា រតនា

The post យប់នេះ កម្ពុជា ប៉ះ ហ្គីយ៉ាន ក្នុងព្រឹត្តិការណ៍ FIFA Series appeared first on Kampuchea Thmey Daily.

យប់នេះ កម្ពុជាប៉ះក្រុមខ្លាំង គីណេអេក្វាទ័រ ក្នុងជំនួប FIFA Series

Pha Rothana — Fri, 22 Mar 2024 01:05:36 +0000

ក្រុមគោព្រៃកម្ពុជាត្រូវជួប ក្រុមគីណេអេក្វាទ័រ មកពីទ្វីបអាហ្វ្រិក ក្នុងព្រឹត្តិការណ៍ FIFA Series នៅវេលាម៉ោង២ យប់ជ្រៅ ថ្ងៃទី២៣ ខែមីនា ឆ្នាំ២០២៤ នៅទឹកដីប្រទេសអារ៉ាប៊ីសាអ៊ូឌីត ក្នុងកីឡដ្ឋាន Prince Abdullah Al-Faisal។

នេះជាការជួបគ្នាលើកដំបូងក្នុងប្រវត្តិសាស្រ្ដរបស់ក្រុមទាំង២ ខណៈក្រុមជម្រើសជាតិកម្ពុជា ជាក្រុមស្ថិតក្នុងតំបន់អាសុី ហើយក្រុមគីណេអេក្វាទ័រ ស្ថិតនៅតំបន់អាហ្វ្រិក។ ការប្រកួត៥លើកចុងក្រោយ របស់ពួកគេគឺឈ្នះ២ ស្មើ២ និងចាញ់១ ក្នុងនោះយកឈ្នះក្រុមខ្លាំងអៃវ៉ារីខូសត៍ ៤-០ និងស្មើគ្នាជាមួយក្រុមនីហ្សេរីយា ១-១ ក្នុងការប្រកួតវគ្គសន្សំពិន្ទុ ពានរង្វាន់ Africa Cup of Nation។

សម្រាប់ក្រុមជម្រើសជាតិកម្ពុជា ៥ប្រកួតចុងក្រោយ ឈ្នះ១ ស្មើ២ និងចាញ់២ ខណៈការប្រកួតចុងក្រោយចាញ់ក្រុមខ្លាំងកាតារ ៣-០ ក្នុងការប្រកួតមិត្តភាពបិទទ្វារ។ ការប្រកួតនេះជាឱកាសល្អចំពោះកម្ពុជាដើម្បីពង្រឹងសមត្ថភាព ដកស្រងបទពិសោធ បន្ទាប់ពីអស់ឱកាសពីវគ្គជម្រុះជើងឯកពិភពលោកតាំងពីជុំទី១។

ក្នុងជំនួបជាមួយកម្ពុជា ក្រុមណេអេក្វាទ័រ មិនបានកោះហៅកីឡាករសំខាន់ៗដើម្បីចូលរួមទេ ពោលគឺលោកគ្រូបង្វឹកក្រុមណេអេក្វាទ័រ Juan Micha បានជ្រើសរើសកីឡាករយុវជនមកជំនួសវិញ ដើម្បីផ្ដល់ឱកាសឲ្យពួកគេបានបង្ហាញសមត្ថភាព។

ក្រុមជម្រើសជាតិកម្ពុជាវិញ ទោះបីជាការប្រកួតនេះជាមិត្តភាពអន្ដរជាតិ ប៉ុន្តែលោក Felix Dalmás ជាគ្រូបង្វឹកបានកោះហៅកីឡាករឆ្នើមៗក្នុងលីគកំពូលកម្ពុជាសម្រាប់ព្រឹត្តិការណ៍ FIFA Series ។

ការប្រកួតបន្ទាប់ ក្រុមគោព្រៃកម្ពុជា ត្រូវជួបជាមួយក្រុម ហ្គីយ៉ាន មកពីទ្វីបអាមេរិកខាងត្បូង ២៦ ខែមីនា ឆ្នាំ២០២៤៕

អត្ថបទ៖ ផា រតនា

The post យប់នេះ កម្ពុជាប៉ះក្រុមខ្លាំង គីណេអេក្វាទ័រ ក្នុងជំនួប FIFA Series appeared first on Kampuchea Thmey Daily.

កម្ពុជាជួបហុងកុង លើកទី៩យប់នេះដើម្បីបង្កើតប្រវត្តិសាស្ត្រថ្មី

chean virakbot — Wed, 06 Sep 2023 23:42:21 +0000

ក្រុមបាល់ទាត់ជម្រើសជាតិកម្ពុជាត្រូវប្រឹងប្រែងដើម្បីបង្កើតប្រវត្តិសាស្ត្រថ្មី នៅពេលជួបក្រុមហុងកុង វេលាម៉ោង៦ល្ងាចនេះ ក្នុងជំនួបមិត្តភាពអន្តរជាតិ FIFA Days នៅពហុកីឡដ្ឋានជាតិអូឡាំពិក។

ក្រុមទាំងពីរមានប្រវត្តិជួបគ្នា៨លើកមកគិតចាប់តាំងពីឆ្នាំ១៩៥៧មក ប៉ុន្តែកម្ពុជាមិនធ្លាប់ឈ្នះហុងកុងឡើយពោលគឺស្មើ១ដង និងចាញ់៧ដង។ ជំនួបចុងក្រោយបំផុត កម្ពុជាបានចាញ់ហុងកុងដោយលទ្ធផល ៣-០ វគ្គជម្រុះជើងឯកអាស៊ី AFC Asian Cup ឆ្នាំ២០២២ នៅប្រទេសឥណ្ឌា។

សំដីគ្រូបង្វឹក

លោក Jorn Andersen គ្រូបង្វឹកសញ្ជាតិអាល្លឺម៉ង់របស់ហុងកុងបាននិយាយថា ក្រុមរបស់លោកត្រូវតែត្រៀមខ្លួនរួចរាល់ និងព្យាយាមធ្វើឲ្យបានល្អបំផុតតាមអ្វីដែលអាចធ្វើបាន។ «កម្ពុជាមានគ្រូបង្វឹកថ្មី កីឡាករថ្មីច្រើន របៀបលេង និងប្រព័ន្ធលេងរបស់ក្រុមក៏ប្លែក ដូច្នេះយើងនឹងឃើញជាក់ស្តែងនៅលើទីលានថ្ងៃស្អែក។ ជួបគ្នាចុងក្រោយ យើងដឹងពីចំណុចខ្លាំង និងខ្សោយ ប៉ុន្តែដោយសារមានគ្រូបង្វឹកថ្មី យើងមិនទាន់សម្រេចយ៉ាងណាទេ។ អ្វីៗនឹងឃើញនៅថ្ងៃស្អែក»។

លោក Felix Dalmas គ្រូបង្វឹកសញ្ជាតិអាហ្សង់ទីនរបស់កម្ពុជាបានលើកឡើងថា នេះជាលើកទី២ដែលលោកបានដឹកនាំក្រុមជម្រើសជាតិកម្ពុជាឈុតធំ។ លោកទើបតែចាប់ប្រមូលផ្តុំហ្វឹកហាត់បាន៦ថ្ងៃប៉ុណ្ណោះ។ «យើងគិតថា ក្រុមយើងក្រុមកំពុងឆ្ពោះទៅមុខតាមអ្វីដែលយើងចង់់បាន ល្អប្រសើរពីមួយថ្ងៃទៅមួយថ្ងៃ។ វាជារឿងល្អដែលយើងត្រូវប្រកួតជាមួយហុងកុងដែលជាក្រុមខ្លាំង ហើយយើងត្រូវមានការគោរព។ យើងត្រូវតែហ៊ានប្រកួតជាមួយក្រុមខ្លាំងៗ»។

សំដីកីឡាករ

កីឡាករ Chan Siu Kwan Philip ខ្សែបម្រើកណ្តាលហុងកុងបាននិយាយថា ក្រុមកម្ពុជាមានកីឡាករមាឌតូច ទាប ប៉ុន្តែពួកគេមានបច្ចេកទេសល្អ ល្បឿនលឿន បម្រើក៏ល្អ ហើយក៏ការពារបានល្អដែរ។ ជាពិសេសពួកគេលេងដោយគ្រប់គ្រងបាល់បានល្អ។ «ក្រុមរបស់យើងនឹងខំប្រឹងប្រែងលេងឲ្យអស់ពីសមត្ថភាពដើម្បីឲ្យអ្នកគាំទ្រពេញចិត្ត និងទទួលបានលទ្ធផលល្អ»។

កីឡាករ ជួន ចាន់ចាវ ខ្សែការពាររបស់កម្ពុជាបាននិយាយថា ៖«សម្រាប់ខ្ញុំក្នុងនាមជាកីឡាករ ការប្រកួតថ្ងៃស្អែកជាការប្រកួតមួយដ៏ធំ ការប្រកួតដ៏ពិបាក ប៉ុន្តែខ្ញុំជឿជាក់លើមិត្តរួមក្រុម និងគ្រូបង្វឹកដែលយើងអាចធ្វើបាន ពីព្រោះមើលតាមការប្រកួតកន្លងមក យើងអត់ដែលឈ្នះហុងកុងទេ។ អីចឹងខ្ញុំគិតថា ដល់ពេលដែលយើងត្រូវធ្វើអ្វីមួយថ្មី។ ធ្វើអ្វីមួយដើម្បីកែប្រែលទ្ធផល។ និយាយមែនទែនទៅ ខ្ញុំចង់ឈ្នះការប្រកួតនេះ»។

ប្រវត្តិជួបគ្នាទាំង៨លើកចុង

ហុងកុង ៦-២ កម្ពុជា ក្នុងពាន Merdeka ឆ្នាំ១៩៥៧
ហុងកុង ៤-១ កម្ពុជា ក្នុងពាន AFC Asin Cup ឆ្នាំ១៩៩៩
កម្ពុជា ០-១ ហុងកុង ក្នុងពាន AFC Asin Cup ឆ្នាំ១៩៩៩
ហុងកុង ៤-២ កម្ពុជា ក្នុងជំនួបមិត្តភាពអន្តរជាតិ ឆ្នាំ២០១៦
កម្ពុជា ០-២ ហុងកុង ក្នុងជំនួបមិត្តភាពអន្តរជាតិ ឆ្នាំ២០១
កម្ពុជា ១-១ ហុងកុង ជម្រុះជើងឯកពិភពលោក ឆ្នាំ២០១៩
ហុងកុង ២-០ កម្ពុជា ជម្រុះជើងឯកពិភពលោក ឆ្នាំ២០១៩
កម្ពុជា ០-៣ ហុងកុង ជម្រុះ AFC Asian Cup ឆ្នាំ២០២២

អត្ថបទ៖ ផា រតនា

The post កម្ពុជាជួបហុងកុង លើកទី៩យប់នេះដើម្បីបង្កើតប្រវត្តិសាស្ត្រថ្មី appeared first on Kampuchea Thmey Daily.

FIFA Days Archives - Kampuchea Thmey Daily

កម្ពុជា ​ប៉ះ តាហ្ស៊ីគីស្ថាន យប់​នេះ​ ជា​ការ​ប្រកួត​ដើម្បី​កីឡាករ​វ័យ​ក្មេង​បង្កើន​សមត្ថភាព

លីគចាប់​ផ្តើម​សម្រាក ក្រុម​ជម្រើស​ជាតិ​ត្រៀម​ប្រកួតអន្តរជាតិ

យប់នេះ កម្ពុជា ប៉ះ ហ្គីយ៉ាន ក្នុងព្រឹត្តិការណ៍ FIFA Series

យប់នេះ កម្ពុជាប៉ះក្រុមខ្លាំង គីណេអេក្វាទ័រ ក្នុងជំនួប FIFA Series

កម្ពុជាជួបហុងកុង លើកទី៩យប់នេះដើម្បីបង្កើតប្រវត្តិសាស្ត្រថ្មី

កម្ពុជា ប៉ះ តាហ្ស៊ីគីស្ថាន យប់នេះ ជាការប្រកួតដើម្បីកីឡាករវ័យក្មេងបង្កើនសមត្ថភាព

លីគចាប់ផ្តើមសម្រាក ក្រុមជម្រើសជាតិត្រៀមប្រកួតអន្តរជាតិ