Kyal Sin ដែលត្រូវបានគេស្គាល់ថា Angel បានស្លាប់កាលពីថ្ងៃពុធ ដោយការបាញ់ចំក្បាលនៅពេលក្រុមបាតុករ រងការវាយប្រហារពីកងកម្លាំងសន្តិសុខ ដែលព្យាយាមបញ្ចប់បាតុកម្មប្រឆាំងរដ្ឋប្រហារថ្ងៃទី១ខែកុម្ភៈ។

Kyal Sin គឺជាម្នាក់ក្នុងចំណោមមនុស្ស៣៨នាក់ ដែលត្រូវបានសម្លាប់។

ការគាស់សាកសពរបស់ Kyal Sin បានបង្កឲ្យមានការខឹងសម្បាថ្មីទៀតពីគូប្រជែងរដ្ឋប្រហារ។ ពួកគេបានចោទប្រកាន់យោធាថា ព្យាយាមលាក់បាំងការពិតដែលថា នាងត្រូវបានសម្លាប់ដោយកងកម្លាំងរបស់ពួកគេ។

ទូរទស្សន៍រដ្ឋបានផ្សាយថា ប៉ូលិស ចៅក្រមនិងវេជ្ជបណ្ឌិតបានគាស់សាកសព និងធ្វើការវះកាត់ដើម្បីស៊ើបអង្កេត។

ពួកគេបានរកឃើញស្នាមរបួសធ្លុះ នៅផ្នែកខាងក្រោយនៃក្បាលនិងសំណទំហំ ១.២សង់ទីម៉ែត្រគុណ ០.៧សង់ទីម៉ែត្រនៅក្នុងខួរក្បាលហើយនិយាយថា វាខុសពីគ្រាប់កាំភ្លើងដែលប្រើដោយប៉ូលិស។

ទូរទស្សន៍រដ្ឋរាយការណ៍ថា ប៉ូលិសបានប្រឈមមុខជាមួយក្រុមអ្នកតវ៉ា ហើយគ្រាប់ដែលសម្លាប់ Kyal Sin អាចត្រូវបានបាញ់ចេញពីកាំភ្លើងគ្រាប់.38។ ដូច្នេះវាអាចត្រូវបានសន្និដ្ឋានថា អ្នកដែលមិនចង់បានស្ថេរភាព បានធ្វើឃាតនាង។

ស្របពេលជាមួយគ្នានោះ នៅលើបណ្តាញសង្គម ក្រុមអ្នកប្រឆាំងរដ្ឋប្រហារបានពណ៌នាពីការគាស់សាកសពនេះថា ជាការប្រមាថបន្ថែមទៀតចំពោះ Kyal Sin និងក្រុមគ្រួសាររបស់នាងជាមួយចេតនាផ្តល់ព័ត៌មានមិនពិត អំពីអ្វីដែលបានកើតឡើង។

អ្នកនាំពាក្យយោធាមិនបានឆ្លើយតបចំពោះការហៅទូរស័ព្ទ សុំការអត្ថាធិប្បាយទេ។

ទូរទស្សន៍រដ្ឋផ្សាយថា អាជ្ញាធរបានស្នើសុំការអនុញ្ញាតពីក្រុមគ្រួសារដើម្បីគាស់សាកសព ប៉ុន្តែមិនបាននិយាយថា តើការស្នើសុំនេះ វាត្រូវបានអនុញ្ញាតដែរឬអត់នោះទេ។ Reuters ក៏មិនអាចទាក់ទងក្រុមគ្រួសារបានដែរ៕

ប្រែសម្រួលដោយ៖ Vann Vann

ប្រភព៖ CNA

ចុចអាន៖ មីយ៉ាន់ម៉ាស្នើឥណ្ឌាប្រគល់ប៉ូលិសដែលភៀសខ្លួនឆ្លងកាត់ព្រំដែនត្រឡប់មកវិញ

ចុចអាន៖ អង្រួនពិភពលោក! Kyal Sin ជានិមិត្តរូបនៃការតវ៉ាប្រឆាំងរដ្ឋប្រហារ បន្ទាប់ពីត្រូវកងទ័ពមីយ៉ាន់ម៉ាបាញ់សម្លាប់

The post កាន់តែផ្ទុះកំហឹង អាជ្ញាធរមីយ៉ាន់ម៉ាគាស់សាកសព Kyal Sin មកវិញព្រោះមិនអស់ចិត្ត appeared first on Kampuchea Thmey Daily.

ដោយពាក់អាវយឺតពណ៌ខ្មៅជាមួយពាក្យថា “Everything will be OK”, នាងអាចត្រូវបានគេឮក្នុងវីដេអូអំឡុងការប្រមូលផ្តុំប្រឆាំងរដ្ឋប្រហារ ដោយនាងបានស្រែកថា “យើងនឹងមិនរត់ទេ!”។  មិនយូរប៉ុន្មាននាងត្រូវបានសម្លាប់ ដោយគ្រាប់កាំភ្លើងបាញ់ចំក្បាល។

យោងតាមការបូកសរុបរបស់អង្គការសហប្រជាជាតិបានឲ្យដឹងថា Kyal Sin គឺជាម្នាក់ក្នុងចំណោមមនុស្ស៣៨នាក់ ដែលត្រូវបានសម្លាប់កាលពីថ្ងៃពុធ។ អ្នកនាំពាក្យយោធា មិនបានឆ្លើយតបនឹងសំណើសុំការអត្ថាធិប្បាយជុំវិញការសម្លាប់នេះទេ។

Kyal Sin ដែលក៏ត្រូវបានគេស្គាល់ឈ្មោះមួយទៀតថា Angel ឬឈ្មោះជាភាសាចិនរបស់នាងគឺ Deng Jia Xi បានក្លាយជានិមិត្តរូបនៃការតស៊ូប្រឆាំងនឹងកងទ័ព ដែលបានប្រើអំពើហិង្សាកាន់តែខ្លាំងដើម្បីបង្ក្រាបចលនាបាតុកម្ម។

ឃ្លានៅលើអាវរបស់នាង បានបង្កភាពល្បីល្បាញយ៉ាងឆាប់រហ័សនៅលើបណ្តាញសង្គម ក្នុងចំណោមអ្នកប្រឆាំងរដ្ឋប្រហារ។

កាលពីថ្ងៃព្រហស្បតិ៍ រូបថតរបស់ Kyal Sin ក៏ត្រូវបានបង្ហាញនៅក្នុងបាតុកម្មទូទាំងប្រទេសដែលមានប្រជាជនចំនួន៥៤លាននាក់មួយនេះផងដែរ។

អ្នកកាន់ទុក្ខរាប់រយនាក់ បានប្រមូលផ្តុំគ្នានៅក្នុងប្រទេសមីយ៉ាន់ម៉ា ដើម្បីចូលរួមពិធីបុណ្យសពរបស់នាង។

កាលពីថ្ងៃព្រហស្បតិ៍ ក្រុមអ្នកកាន់ទុក្ខដែលភាគច្រើនមានវ័យក្មេងដូចនាង បានមកមើលមឈូសរបស់នាងនិងច្រៀងចម្រៀងតវ៉ា ដោយលើកម្រាមដៃបីជាសញ្ញាតស៊ូហើយបានស្រែកពាក្យស្លោកប្រឆាំងរដ្ឋប្រហារយោធាថ្ងៃទី១ខែកុម្ភៈ៕

ប្រែសម្រួលដោយ៖ Vann Vann

ប្រភព៖ Advocate, LA Times

The post អង្រួនពិភពលោក! Kyal Sin ជានិមិត្តរូបនៃការតវ៉ាប្រឆាំងរដ្ឋប្រហារ បន្ទាប់ពីត្រូវកងទ័ពមីយ៉ាន់ម៉ាបាញ់សម្លាប់ appeared first on Kampuchea Thmey Daily.