ការសម្រេចចិត្តរបស់ Rivan Nurmulki បានកើតឡើងតាំងពីពេលរូបគេកំពុងហ្វឹកហាត់នៅប្រទេស ចិន ត្រៀមព្រឹត្តិការណ៍កីឡា ស៊ីហ្គេម លើកទី ៣៣ នៅ ថៃ មកម្ល៉េះ។ ស្មាត់កម្ពស់ ២ ម៉ែត្ររបស់ក្រុម Diamond Food VC រូបនេះ បានជាប់ជាកីឡាកររកបានពិន្ទុច្រើនជាងគេ ក្នុងកីឡាបាល់ទះបុរសប្រចាំកីឡាស៊ីហ្គេម លើកទី ៣៣ ពោលគឺរកបានពិន្ទុសរុបចំនួន ៩០ ពិន្ទុ។ ទោះបីជាយ៉ាងណា ឥណ្ឌូណេស៊ី បានត្រឹម​មេដាយប្រាក់ប៉ុណ្ណោះ បន្ទាប់ពីចាញ់ម្ចាស់ផ្ទះ ថៃ នៅវគ្គផ្តាច់ព្រ័ត្រក្នុងលទ្ធផល ២ សិតទល់ ៣។

យ៉ាងណាមិញ បើក្រឡេកទៅមើលអំពីសមិទ្ធផលរួមរបស់ Rivan ជាមួយក្រុមជម្រើសជាតិ ឥណ្ឌូណេស៊ី គឺពិតជាមានច្រើនមែនទែន រហូតត្រូវបានអ្នកគាំទ្រចាត់ទុកជាវិរបុរសរបស់ក្រុមរហស្សនាម “Merah Putih”។ កីឡាករវ័យ ៣០ ឆ្នាំ បានចាប់ផ្តើមអាជីពជាកីឡាករបាល់ទះនៅឆ្នាំ ២០១៣ ប៉ុន្តែរូបគេត្រូវបាន ឥណ្ឌូណេស៊ី កោះហៅចូលក្រុមជម្រើសជាតិដំបូងនៅឆ្នាំ ២០១៥។

អំឡុងពេលលេងឱ្យជម្រើសជាតិ ឥណ្ឌូណេស៊ី ពីឆ្នាំ ២០១៥ ដល់ ២០២៥ កីឡាករបានសាងស្នាដៃជាច្រើន ដូចជាឈ្នះមេដាយមាស ៣ លើកនៅព្រឹត្តិការណ៍ស៊ីហ្គេម (២០១៩, ២០២១ និង ២០២៣) រួមជាមួយមេដាយប្រាក់ ២ លើក (២០១៧, ២០២៥) និងមេដាយសំរឹទ្ធ ១ លើកនៅឆ្នាំ ២០១៥។ ទន្ទឹមនឹងនេះ Rivan បានជួយឱ្យ ឥណ្ឌូណេស៊ី ឈ្នះមេដាយមាស ១ លើកក្នុងពានរង្វាន់ SEA V. League ក្នុងឆ្នាំ ២០២៥។

កីឡាករ Rivan ត្រូវបានគេចាត់ទុកជាកីឡាករដ៏ជោគជ័យបំផុតម្នាក់នៅក្នុងតំបន់អាស៊ាន។ ក្រៅអំពីភាពជោគជ័យជាមួយក្រុមជម្រើសជាតិ រូបគេក៏ជោគជ័យផងដែរជាមួយក្លិបអាជីព។ កីឡាករធ្លាប់ប្រឡូកអាជីពទាំងនៅក្នុងស្រុក និងក្រៅស្រុក ដោយ​ធ្លាប់លេងនៅក្លិប Surabaya Samator (ឥណ្ឌូណេស៊ី), Nakhon Ratchasima (ថៃ), VC Nagano (ជប៉ុន), Jakarta STIN BIN (ឥណ្ឌូណេស៊ី),​ Wolfdogs Nagoya (ជប៉ុន), Eka Mandiri Salatiga (ជប៉ុន) និងចុងក្រោយនេះលេងនៅក្លិប Diamond Food VC (ថៃ)៕

អត្ថបទ៖ សេម កុសល

The post កីឡាករ Rivan ប្រកាស​ចូលនិវត្តន៍​ពី​ជម្រើស​ជាតិ​ឥណ្ឌូណេស៊ី ក្រោយ​សាង​ស្នាដៃជាច្រើន appeared first on Kampuchea Thmey Daily.

ឥណ្ឌូណេស៊ី​ ជាប្រទេស ដែលមានភាពរីកចម្រើនខ្លាំងបំផុតមួយលើវិស័យកីឡាបាល់ទះក្នុងតំបន់ អាស៊ាន។ បើនិយាយអំពីកីឡាកររបស់ពួកគេវិញ ក៏មានធនធានល្អៗច្រើនផងដែរ ក្នុង​នោះ​មាន​កីឡាករជា​ច្រើន​ចេញ​ទៅ​លេង​នៅ​ក្រៅ​ប្រទេស។ ជា​ពិសេស កីឡាករ Rivan Nurmulki ជា​កីឡាករម្នាក់​ទទួលបានការចាប់អារម្មណ៍ខ្លាំងជាមួយនឹងសមត្ថភាពវាយផ្តាច់បាល់ដ៏អស្ចារ្យ រហូតទទួលបានឱកាសទៅលេងនៅក្លិបក្នុងប្រទេស ជប៉ុន។

អ្នកលេងតួនាទីស្មាត់កម្ពស់ ២ ម៉ែត្រ រូបនេះ បានចាប់ផ្តើមអាជីពបាល់ទះ​នៅក្នុងឆ្នាំ ២០១៣ ដែលពេលនោះ លេងឱ្យក្លិប Surabaya Samator ក្នុងប្រទេសកំណើត។ រយៈ​ពេល ៦ ​​ឆ្នាំ​ក្រោយមក​ រូបគេ​បាន​ចេញ​ទៅលេងនៅក្រៅប្រទេសលើកដំបូង ជាមួយក្រុម Nakhon Ratchasima របស់ ថៃ បានរយៈពេល ១ រដូវ​កាល។

បន្ទាប់ពីបង្ហាញសមត្ថភាពល្អនៅទីនោះ Rivan Nurmulki ទទួលបានឱកាសទៅលេងនៅលីគកំពូលបាល់ទះជប៉ុនលើកដំបូង ជាមួយក្រុម VC Nagano នៅឆ្នាំ ២០២០ ។ ការ​លេង​រយៈ​ពេល ២ ឆ្នាំ​នៅ​ជប៉ុន​ រូបគេក៏បានត្រឡប់មកឥណ្ឌូណេស៊ី​ ដោយចូលរួមជាមួយក្រុម Surabaya Samator នៅឆ្នាំ ២០២៣ និង​ផ្លាស់​ទៅ​ក្រុម Jakarta STIN BIN នៅឆ្នាំ ២០២៤ ។

ទោះ​បី​ជា​យ៉ាងណា កីឡាករ​ Rivan Nurmulki បានឱកាសទៅលេងនៅលីគជប៉ុនម្តងទៀត ដោយចូលរួមជាមួយក្រុម Wolfdogs Nagoya គឺរដូវកាល ២០២៤-២០២៥។ ក្នុងនោះអ្នកវាយផ្តាច់សញ្ជាតិ ឥណ្ឌូណេស៊ី​ វ័យ ២៩ ឆ្នាំរូបនេះ បានជួយឱ្យក្រុម Wolfdogs Nagoya បញ្ចប់រដូវកាល ដោយឈរនៅលេខរៀងទី ៤ ក្នុងលីគកំពូលបាល់ទះជប៉ុន និងដណ្តើមបានចំណាត់ថ្នាក់លេខ ៣ ក្នុងពាន Japanese Emperor’s Cup All Japan Championship។

ងាកមកចាប់អារម្មណ៍ជាមួយសមិទ្ធផលក្នុងក្រុមជម្រើសជាតិវិញ កីឡាករ​ Rivan Nurmulki ជា​កម្លាំង​ដ៏​សំខាន់​ក្នុង​ការ​ជួយ​ក្រុម​ជម្រើស​ជាតិ​​ឥណ្ឌូណេស៊ី​ ឈ្នះមេដាយមាស កីឡា​ស៊ីហ្គេម ៣ លើកជាប់​ គឺនៅឆ្នាំ ២០១៩ នៅហ្វីលីពីន, ឆ្នាំ​ ២០២១ នៅ​វៀតណាម​ និងចុងក្រោយឆ្នាំ ២០២៣ នៅកម្ពុជា។ ជាមួយគ្នានេះ រូបគេធ្លាប់បានឈ្នះមេដាយប្រាក់កីឡា​ស៊ីហ្គេម​ ១ លើកនៅឆ្នាំ ២០២៧ និង មេដាយសំរឹទ្ធ ១ លើកនៅឆ្នាំ ២០១៥ ព្រម​ទាំង​បាន​ជួយ​ក្រុម​ជម្រើស​ជាតិ​ឥណ្ឌូណេស៊ី​ឈ្នះមេដាយ​មាស SEA V. League ពីរ​លើក​គឺ​ឆ្នាំ២០២៣ និង​នៅ​ឆ្នាំ​២០២៤។ រូប​គេ​បាន​ឈ្នះ​ជើង​ឯក​លីគ​បាល់ទះ​ឥណ្ឌូណេស៊ី ចំនួន ៤ លើក ជា​មួយ​ក្លិប Surabaya Samator និង​ជើង​ឯក​លីគ​ថៃ ១ លើកជា​មួយក្លិប Nakhon Ratchasima៕

អត្ថបទ៖ សេម កុសល

The post ឈ្នះ​មេដាយ​មាសស៊ីហ្គេម​ ៣​ លើក​ជាប់​គ្នា​ Rivan Nurmulki បាន​ទៅលេងលីគ​បាល់ទះ​ជប៉ុន​លើក​ទី២ appeared first on Kampuchea Thmey Daily.