ហ្វូងមនុស្សជាច្រើនបានប្រមូលផ្ដុំគ្នានៅទីក្រុងការ៉ាកាស ដោយកាន់ទង់ជាតិវេណេស៊ុយអេឡាធំៗ និងថ្កោលទោសការវាយប្រហារថ្មីៗពីយោធាសហរដ្ឋអាមេរិកនៅក្នុងតំបន់ការ៉ាបៀន ដោយហៅវាថាជាការគំរាមកំហែងដោយផ្ទាល់ដល់ប្រទេសពួកគេ។

អ្នកគាំទ្ររដ្ឋាភិបាល ប៉ូលិស ទាហាន បានចូលរួមក្នុងការដង្ហែក្បួននេះ ដើម្បីបង្ហាញថា ប្រជាជនវេណេស៊ុយអេឡារួបរួមគ្នាប្រឆាំងនឹងការជ្រៀតជ្រែកពីបរទេស។ លើសពីនេះរដ្ឋមន្ត្រីក្រសួងមហាផ្ទៃ លោក Diosdado Cabello បានចោទប្រកាន់សហរដ្ឋអាមេរិកថាចង់យកធនធានធម្មជាតិរបស់ប្រទេសវេណេស៊ុយអេឡា។

គួរបញ្ជាក់ថាបាតុកម្មនេះបានកើតឡើងបន្ទាប់ពីសហរដ្ឋអាមេរិកបានដាក់ក្រុម Cartel de los Soles ដែលអាមេរិកថាមានទំនាក់ទំនងជាមួយប្រធានាធិបតី Maduro និងមន្ត្រីជាន់ខ្ពស់ថាជាអង្គការភេរវកម្ម។ សហរដ្ឋអាមេរិកក៏បានបញ្ជូននាវាផ្ទុកយន្តហោះ USS Gerald R. Ford ទៅកាន់តំបន់នេះធ្វើប្រតិបត្តិការប្រឆាំងគ្រឿងញៀនផងដែរ។

ជាការឆ្លើយតប ប្រធានាធិបតី Maduro បានកោះហៅកងទ័ពនិងកងកម្លាំងសន្តិសុខចំនួន ៤.5 លាននាក់ ហើយបាននិយាយថា ប្រទេសវេណេស៊ុយអេឡាបានត្រៀមខ្លួនរួចជាស្រេចដើម្បីការពារខ្លួនពី «ការវាយប្រហារណាមួយ»៕

អត្ថបទ៖ ប៊ុន សុភាព

The post ប្រជាជនវេណេស៊ុយអេឡា ប្រមូលផ្ដុំគ្នាធ្វើបាតុកម្មប្រឆាំងនឹង«ការគំរាមកំហែង»របស់អាមេរិក appeared first on Kampuchea Thmey Daily.

រដ្ឋមន្ត្រីក្រសួងទំនាក់ទំនងម៉ាឡេស៊ី លោក Fahmi Fadzil បាននិយាយថា កុមារនឹងមិនត្រូវបានអនុញ្ញាតឱ្យបង្កើតគណនីប្រព័ន្ធផ្សព្វផ្សាយសង្គមទេ ហើយការផ្ទៀងផ្ទាត់អាយុអាចតម្រូវឱ្យមានលិខិតឆ្លងដែន ឬអត្តសញ្ញាណប័ណ្ណផ្សេងទៀត។ រដ្ឋាភិបាលម៉ាឡេស៊ី មានបំណងអនុវត្តវិធានការនេះនៅឆ្នាំក្រោយ។ ប្រទេសនេះក៏តម្រូវឱ្យមានអាជ្ញាប័ណ្ណប្រព័ន្ធផ្សព្វផ្សាយសង្គម និងវេទិកាផ្ញើសារសំខាន់ៗរួចហើយ ដោយមានច្បាប់ត្រួតពិនិត្យអាយុ និងសុវត្ថិភាពខ្លឹមសារទៀតផង។

គួរបញ្ជាក់ថា ការផ្លាស់ប្តូរនេះធ្វើឡើងបន្ទាប់ពីមានការសម្រេចចិត្តថ្មីៗរបស់ប្រទេសអូស្ត្រាលីក្នុងការបិទគណនីប្រព័ន្ធផ្សព្វផ្សាយសង្គមចំពោះកុមារអាយុក្រោម ១៦ ឆ្នាំចាប់ពីថ្ងៃទី ១០ ខែធ្នូ៕

អត្ថបទ៖ ប៊ុន សុភាព

The post ម៉ាឡេស៊ី គ្រោងហាមឃាត់កុមារអាយុក្រោម​១៦​ឆ្នាំ​ពី​ការ​ប្រើប្រព័ន្ធផ្សព្វផ្សាយសង្គម appeared first on Kampuchea Thmey Daily.

ក្រោយទីក្រុងហ្សាកាតាក្លាយជាទីក្រុងមានប្រជាជនច្រើនជាងគេ រដ្ឋធានីដាការបស់ប្រទេសបង់ក្លាដែស ឥឡូវនេះគឺជាទីក្រុងធំជាងគេទីពីរ ដែលមានប្រជាជនចំនួន ៣៦,៦ លាននាក់ ហើយត្រូវបានគេព្យាករថានឹងក្លាយជាទីក្រុងធំជាងគេបំផុតរបស់ពិភពលោកនៅឆ្នាំ ២០៥០។ ចំណែកទីក្រុងតូក្យូបានធ្លាក់ចុះមកចំណាត់ថ្នាក់ទីបី ជាមួយនឹងចំនួនប្រជាជនមានស្ថេរភាព ៣៣,៤ លាននាក់។

របាយការណ៍ឆ្នាំ ២០២៥ របស់អង្គការសហប្រជាជាតិបង្ហាញថា ទីក្រុងនានាកំពុងរីកចម្រើនយ៉ាងឆាប់រហ័សនៅជុំវិញពិភពលោក។ ចំនួនទីក្រុងធំៗ ដែលមានប្រជាជនជាង ១០ លាននាក់ បានកើនឡើងដល់ ៣៣ កើនឡើងពីត្រឹមតែ ៨ ក្នុងឆ្នាំ ១៩៧៥។ ទីក្រុងធំៗបំផុតរបស់ពិភពលោកភាគច្រើនស្ថិតនៅក្នុងទ្វីបអាស៊ី។ ក្នុងចំណោមទីក្រុងធំៗទាំងដប់ មានប្រាំបួនទីក្រុង រួមមានញូវដេលី សៀងហៃ ក្វាងចូវ ម៉ានីល កូលកាតា និងសេអ៊ូល ស្ថិតនៅក្នុងទ្វីបអាស៊ី លើកលែងតែទីក្រុងគែរក្នុងប្រទេសអេហ្ស៊ីបមួយប៉ុណ្ណោះ ដែលមិនស្ថិតនៅក្នុងទ្វីបអាស៊ី។

ចំនួនប្រជាជនទីក្រុងដាកា ប្រទេសបង់ក្លាដែសកំពុងកើនឡើងយ៉ាងឆាប់រហ័ស ដោយសារតែមនុស្សកំពុងផ្លាស់ប្តូរទីលំនៅពីតំបន់ជនបទ និងដោយសារតែបញ្ហាអាកាសធាតុដូចជាទឹកជំនន់ និងកម្រិតទឹកសមុទ្រកើនឡើង។ ទីក្រុងហ្សាកាតាក៏ប្រឈមនឹងហានិភ័យស្រដៀងគ្នាដែរ ដោយមួយភាគបួននៃទីក្រុងប្រឈមនឹងហានិភ័យលិចទឹកនៅឆ្នាំ ២០៥០។ ទោះបីជាប្រទេសឥណ្ឌូណេស៊ីកំពុងសាងសង់រដ្ឋធានីថ្មីនៅ Nusantara ក៏ដោយ ក៏ចំនួនប្រជាជនទីក្រុងហ្សាកាតានៅតែត្រូវបានគេរំពឹងថានឹងបន្តកើនឡើង៕

អត្ថបទ៖ ប៊ុន សុភាព

The post របាយការណ៍UN៖ ទីក្រុងហ្សាកាតាក្លាយជាទីក្រុងមានប្រជាជនច្រើនជាងគេបំផុតរបស់ពិភព​លោក appeared first on Kampuchea Thmey Daily.

បើតាមប្រព័ន្ធផ្សព្វផ្សាយក្នុងស្រុកថៃ ស្ត្រីជនជាតិចិនពីរនាក់ត្រូវបានអនុញ្ញាតឱ្យចូលទៅក្នុងពន្ធនាគារ ហើយបន្ទាប់មកត្រូវបានគេរកឃើញថាមានស្រ្តីម្នាក់នៅជាមួយអ្នកទោសម្នាក់នៅក្នុងបន្ទប់ពិសេសមួយ។ បន្ទប់នោះមានសាឡុង តុ និងទូទឹកកក ដែលជារបស់របរអ្នកទោសធម្មតាមិនត្រូវបានអនុញ្ញាតឱ្យមានប្រើនោះទេ។

លើសពីនេះក្រុមអ្នកស៊ើបអង្កេតបានរកឃើញវត្ថុហាមឃាត់ដូចជាស្រោមអនាម័យ គ្រឿងស្រវឹង និងថ្នាំជក់នៅក្នុងពន្ធនាគារ។ វីដេអូកាមេរ៉ាសុវត្ថិភាពមួយចំនួនត្រូវបានលុបចោល ប៉ុន្តែមានវីដេអូមួយមានបង្ហាញស្ត្រីទាំងពីរនាក់កំពុងចូលទៅក្នុងពន្ធនាគារ។ ឥឡូវនេះស្រ្តីទាំងពីរកំពុងត្រូវបានធ្វើតេស្ត ក្នុងករណីសង្ស័យទាក់ទង់នឹងការរកស៊ីផ្លូវភេទ។

បុគ្គលិកពន្ធនាគារប្រហែល ២០ នាក់ផ្សេងទៀតក៏ត្រូវបានសង្ស័យថាបានបំពានច្បាប់ដែរ ហើយអ្នកទោសមួយចំនួនដែលជាប់ពាក់ព័ន្ធនឹងករណីនេះត្រូវបានផ្ទេរទៅពន្ធនាគារមួយផ្សេងទៀត។ ទោះយ៉ាងណាស្ត្រីទាំងពីរនាក់និយាយថាពួកគេមិនពាក់ព័ន្ធនឹងការរកស៊ីផ្លូវភេទទេ។

គួរបញ្ជាក់ថាករណីនេះបានធ្វើឱ្យមនុស្សមានការព្រួយបារម្ភម្តងទៀតអំពីអំពើពុករលួយនៅក្នុងប្រព័ន្ធយុត្តិធម៌របស់ប្រទេសថៃ ដែលធ្លាប់មានបញ្ហាស្រដៀងគ្នានេះកាលពីអតីតកាលមកហើយ៕

អត្ថបទ៖ ប៊ុន សុភាព

The post ​​​ថៃ​​ព្យួរតំណែង​​ប្រធានពន្ធនាគារដែលល្បី​ផ្តល់សេវាកម្មផ្លូវភេទដល់អ្នកទោសចិន appeared first on Kampuchea Thmey Daily.

នៅក្នុងចំណោមរដ្ឋទាំង១០ គឺរដ្ឋKelantan នៅតែជារដ្ឋរងផលប៉ះពាល់ខ្លាំងបំផុត ដោយបានផ្តល់ជម្រកដល់ប្រជាជនជាង ៩,៧០០ នាក់នៅក្នុងមជ្ឈមណ្ឌលសង្គ្រោះចំនួន ៤០ បន្ទាប់មកគឺរដ្ឋ Selangor និង Perak។

រដ្ឋាភិបាលម៉ាឡេស៊ីបានបញ្ជូនក្រុមជួយសង្គ្រោះនិងឧបករណ៍ជាង ១០០,០០០ ដើម្បីជួយប្រជាជននៅតំបន់ដែលរងគ្រោះដោយទឹកជំនន់។ ទោះបីមានទឹកជំនន់ការប្រឡងនៅសាលារៀននឹងនៅតែបន្ត ពីព្រោះអាជ្ញាធរមានផែនការបម្រុងទុក ដើម្បីរក្សាសុវត្ថិភាពសិស្ស។

នាយករដ្ឋមន្ត្រី អាន់វ៉ា អ៊ីប្រាហ៊ីម បាននិយាយថា លោកពេញចិត្តនឹងការឆ្លើយតបទៅនឹងគ្រោះមហន្តរាយ ហើយបានប្រាប់ភ្នាក់ងារទាំងអស់ឱ្យបន្តជួយតាមដែលអាចធ្វើទៅបាន។ ចំណែកមន្ត្រីអាកាសធាតុព្រមានថា ភ្លៀងធ្លាក់ខ្លាំង និងខ្យល់បក់ខ្លាំងនឹងនៅតែបន្តកើតមាន។

គួរបញ្ជាក់ថា ប្រទេសជាច្រើននៅអាស៊ីអាគ្នេយ៍កំពុងរងគ្រោះខ្លាំងដោយសារគ្រោះធម្មជាតិជាពិសេស ប្រទេសវៀតណាមនិងប្រទេសថៃ មានអ្នកស្លាប់រាប់សិបនាក់ និងខាតបង់ប្រាប់រាប់លានដុល្លារ៕

អត្ថបទ៖ ប៊ុន សុភាព

The post ម៉ាឡេស៊ី ជម្លៀសមនុស្ស១៨០០០នាក់ ខណៈទឹកជំនន់វាយប្រហាររដ្ឋចំនួន១០ appeared first on Kampuchea Thmey Daily.

ការសម្រេចចិត្តនេះធ្វើឡើងដោយរដ្ឋមន្ត្រីក្រសួងសន្តិសុខមាតុភូមិអាមេរិក (DHS)បន្ទាប់ពីការពិនិត្យឡើងវិញសន្និដ្ឋានថា មីយ៉ាន់ម៉ាលែងបំពេញលក្ខខណ្ឌដែលតម្រូវតាមការកំណត់ TPS ទៀតហើយ។

កម្មវិធី TPS ត្រូវបានផ្តល់ជូនពលរដ្ឋមីយ៉ាន់ម៉ាជាលើកដំបូងនៅឆ្នាំ ២០២១ ក្រោមការដឹកនាំរបស់លោកប្រធានាធិបតីបៃដិន ហើយត្រូវបានពង្រីកពីរដង។ វាអនុញ្ញាតឱ្យប្រជាជនមកពីប្រទេសមីយ៉ាន់ម៉ាដែលនៅសហរដ្ឋអាមេរិករួចហើយស្នាក់នៅ និងធ្វើការដោយស្របច្បាប់ ពីព្រោះប្រទេសរបស់ពួកគេមានគ្រោះថ្នាក់ពេកមិនអាចវិលត្រឡប់ទៅទីនោះវិញបាន។ កម្មវិធីនេះត្រូវបានកំណត់ឱ្យផុតកំណត់នៅថ្ងៃទី ២៥ ខែវិច្ឆិកា ហើយឥឡូវនេះវានឹងបញ្ចប់ជាផ្លូវការ ៦០ ថ្ងៃបន្ទាប់ពីរដ្ឋាភិបាលបានចេញផ្សាយការជូនដំណឹងចុងក្រោយ។

ការបញ្ចប់កម្មវិធី TPS គឺជាផ្នែកមួយនៃគោលដៅទូលំទូលាយរបស់លោកប្រធានាធិបតី ត្រាំ ដើម្បីកាត់បន្ថយអន្តោប្រវេសន៍ និងលុបចោលការការពារសម្រាប់សញ្ជាតិជាច្រើន។ រដ្ឋបាលរបស់លោកក៏បានព្យាយាមបញ្ចប់កម្មវិធី TPS ឬការលើកលែងទោសមនុស្សធម៌សម្រាប់ប្រជាជនមកពីប្រទេសហៃទី អាហ្វហ្គានីស្ថាន វេណេស៊ុយអេឡា សូម៉ាលី និងប្រទេសដទៃទៀត។ ការសម្រេចចិត្តជាច្រើនទាំងនេះត្រូវបានជំទាស់នៅក្នុងតុលាការ ប៉ុន្តែតុលាការកំពូលភាគច្រើនគាំទ្ររដ្ឋបាល។

បើតាមអ្នកជំនាញ និងអ្នកប្រាជ្ញផ្នែកច្បាប់និយាយថា ប្រទេសមីយ៉ាន់ម៉ានៅតែមិនមានសុវត្ថិភាពខ្លាំង។ ប្រទេសនេះជាប់គាំងនៅក្នុងសង្គ្រាមស៊ីវិលដ៏ហិង្សាបន្ទាប់ពីរដ្ឋប្រហារយោធាឆ្នាំ ២០២១ ជាមួយនឹងការវាយប្រហារតាមអាកាស ការប្រយុទ្ធគ្នារវាងកងទ័ព និងក្រុមឧទ្ទាម និងវិបត្តិមនុស្សធម៌ធ្ងន់ធ្ងរ។ អង្គការសហប្រជាជាតិនិយាយថា ប្រជាជនមីយ៉ាន់ម៉ាជាង ១,៥ លាននាក់ឥឡូវនេះជាជនភៀសខ្លួន ឬអ្នកស្វែងរកសិទ្ធិជ្រកកោន រួមទាំងជនជាតិរ៉ូហ៊ីងយ៉ាជាច្រើនដែលគ្មានសញ្ជាតិ។

ទោះយ៉ាងណារដ្ឋាភិបាលសហរដ្ឋអាមេរិកទទួលស្គាល់ថាប្រទេសមីយ៉ាន់ម៉ានៅតែមានបញ្ហាមនុស្សធម៌ធំៗ ប៉ុន្តែអះអាងថាការកែលម្អខ្លះនៃស្ថិរភាពបង្ហាញថាការបញ្ចប់ TPS គឺជាហេតុផលត្រឹមត្រូវ។

ការសម្រេចចិត្តនេះក៏កើតឡើងចំពេលមានសោកនាដកម្មថ្មីៗនៅតែបន្ត ខណៈថ្មីៗនេះទូកមួយគ្រឿងដែលដឹកជនភៀសខ្លួនរ៉ូហ៊ីងយ៉ាបានលិចនៅឆ្នេរសមុទ្រមីយ៉ាន់ម៉ា សម្លាប់មនុស្សយ៉ាងហោចណាស់ ២៧ នាក់៕

អត្ថបទ៖ ប៊ុន សុភាព

The post រដ្ឋបាលត្រាំ ដកសិទ្ធិការពារពីប្រជាជនមីយ៉ាន់ម៉ារស់នៅអាមេរិក appeared first on Kampuchea Thmey Daily.

មន្ត្រីសហរដ្ឋអាមេរិកបានប្រាប់ Axios ថា ការរៀបចំផែនការជំនួបតាមទូរស័ព្ទរវាងលោក ត្រាំ និងលោក Maduro នេះបង្ហាញពីការផ្លាស់ប្តូរយុទ្ធសាស្ត្រ ហើយវាទំនងជាមានន័យថា សហរដ្ឋអាមេរិកមិនមានបំណងបើកការវាយប្រហារយោធាលើប្រទេសវេណេស៊ុយអេឡានៅពេលនេះទេ។ ផ្ទុយទៅវិញ ទីក្រុងវ៉ាស៊ីនតោននឹងបន្តកំណត់គោលដៅលើនាវារត់ពន្ធគ្រឿងញៀន ដែលជាផ្នែកមួយនៃយុទ្ធនាការយោធានៅទូទាំងអាមេរិកឡាទីនដោយប្រ់ើប្រាស់កងទ័ពជើងទឹក នាវាចម្បាំង យន្តហោះចម្បាំង យន្តហោះទម្លាក់គ្រាប់បែក នាវាមុជទឹក និងយន្តហោះគ្មានមនុស្សបើក។

មន្ត្រីអាមេរិកម្នាក់បាននិយាយថា នៅពេលនេះមិនទាន់មានផែនការណាមួយដើម្បីចាប់ខ្លួន ឬវាយប្រហារលោក Maduro នៅឡើយទេ ប៉ុន្តែសហរដ្ឋអាមេរិកនឹងបន្តកំណត់គោលដៅប្រតិបត្តិការរត់ពន្ធគ្រឿងញៀន។ ចំណែកមន្ត្រីម្នាក់ទៀតបាននិយាយថា ជំនួបតាមទូរស័ព្ទរវាងលោក ត្រាំ និងលោក Maduro មិនទាន់មានកាលបរិច្ឆេទនៅឡើយទេ ហើយកំពុងរៀបចំ។

បើទោះបីជាមានភាពតានតឹងកើនឡើងក៏ដោយ លោក Maduro បាននិយាយថា ប្រទេសវេណេស៊ុយអេឡាបានត្រៀមខ្លួនរួចជាស្រេចសម្រាប់ការសន្ទនា «ទល់មុខគ្នា» ជាមួយសហរដ្ឋអាមេរិក៕

អត្ថបទ៖ ប៊ុន សុភាព

The post ត្រាំ គ្រោងធ្វើជំនួបតាមទូរស័ព្ទជាមួយប្រធានាធិបតីវេណេស៊ុយអេឡា appeared first on Kampuchea Thmey Daily.

កាលពីដើមខែនេះ លោកស្រី Takaichi បានប្រាប់សភាថា ការវាយប្រហាររបស់ចិនលើតៃវ៉ាន់អាចនាំឱ្យមានការឆ្លើយតបខាងយោធារបស់ជប៉ុន ដែលជំរុញឱ្យប្រទេសចិនថ្កោលទោសការអត្ថាធិប្បាយនេះ និងធ្វើពហិការការធ្វើដំណើរលើប្រទេសជប៉ុន។ ប្រទេសចិនទទូចថាតៃវ៉ាន់គឺជាផ្នែកមួយនៃទឹកដីរបស់ខ្លួន ខណៈដែលតៃវ៉ាន់បដិសេធការអះអាងរបស់ទីក្រុងប៉េកាំង។

ជំនួបតាមទូរស័ព្ទនេះបានកើតឡើងត្រឹមតែមួយថ្ងៃបន្ទាប់ពីប្រធានាធិបតីចិន ស៊ី ជីនពីង បានប្រាប់លោក ត្រាំ ថា ការនាំតៃវ៉ាន់មកស្ថិតនៅក្រោមការគ្រប់គ្រងរបស់ចិន គឺជាគោលដៅសំខាន់សម្រាប់ទីក្រុងប៉េកាំង។ បន្ទាប់ពីការសន្ទនាតាមទូរស័ព្ទនោះ លោក ត្រាំ បាននិយាយអំពីវឌ្ឍនភាពនៅក្នុងកិច្ចចរចាពាណិជ្ជកម្មរវាងសហរដ្ឋអាមេរិក និងចិន ប៉ុន្តែមិនបានលើកឡើងពីតៃវ៉ាន់នោះទេ។

លោកស្រី Takaichi បាននិយាយថា លោក ត្រាំ បានពិពណ៌នាដោយសង្ខេបអំពីទំនាក់ទំនងរវាងសហរដ្ឋអាមេរិក និងចិនកំពុងដំណើរការ ហើយបានរំលឹកលោកស្រីថាទំនាក់ទំនងរវាងប្រទេសជប៉ុននិងអាមេរិកគឺជាមិត្តល្អនឹងគ្នា។ ប៉ុន្តែសេតវិមានមិនទាន់បានចេញផ្សាយព័ត៌មានលម្អិតអំពីការសន្ទនារបស់ពួកគេនៅឡើយទេ។

បើតាមលោក Cho Jung-tai នាយករដ្ឋមន្ត្រីតៃវ៉ាន់បានឆ្លើយតបយ៉ាងម៉ឺងម៉ាត់ថា ប្រជាជន ២៣លាននាក់នៃកោះនេះនឹងមិនទទួលយកការ «វិលត្រឡប់» ទៅប្រទេសចិនវិញឡើយ។ ចំណែកអ្នកនាំពាក្យជាន់ខ្ពស់របស់រដ្ឋាភិបាលជប៉ុន លោក Minoru Kihara បានសង្កត់ធ្ងន់ថា ទំនាក់ទំនងស្ថិរភាពរវាងសហរដ្ឋអាមេរិក និងចិនគឺមានសារៈសំខាន់សម្រាប់សន្តិសុខពិភពលោក និងតំបន់ ប៉ុន្តែបានបដិសេធមិនឆ្លើយតបដោយផ្ទាល់ទៅនឹងការអត្ថាធិប្បាយរបស់លោក ស៊ី ជីនពីង ឡើយ៕

អត្ថបទ៖ ប៊ុន សុភាព

The post នាយករដ្ឋមន្ត្រីជប៉ុនធ្វើជំនួបតាមទូរស័ព្ទជាមួយ ត្រាំ ចំពេលភាពតានតឹងជាមួយចិនកើនឡើង appeared first on Kampuchea Thmey Daily.