ម៉ាឡេស៊ី គ្រោងហាមឃាត់កុមារអាយុក្រោម​១៦​ឆ្នាំ​ពី​ការ​ប្រើប្រព័ន្ធផ្សព្វផ្សាយសង្គម

ប្រទេសម៉ាឡេស៊ីមានគម្រោងហាមប្រាមកុមារអាយុក្រោម ១៦ ឆ្នាំពីការប្រើប្រាស់ប្រព័ន្ធផ្សព្វផ្សាយសង្គម ដោយមានគោលបំណងការពារយុវជនពីហានិភ័យតាមអ៊ីនធឺណិត។ នេះបើយោងតាមការចេញផ្សាយរបស់ទូរទស្សន៍ជាតិជប៉ុន NHK នៅថ្ងៃទី២៦ខែវិច្ឆិកា។

រដ្ឋមន្ត្រីក្រសួងទំនាក់ទំនងម៉ាឡេស៊ី លោក Fahmi Fadzil បាននិយាយថា កុមារនឹងមិនត្រូវបានអនុញ្ញាតឱ្យបង្កើតគណនីប្រព័ន្ធផ្សព្វផ្សាយសង្គមទេ ហើយការផ្ទៀងផ្ទាត់អាយុអាចតម្រូវឱ្យមានលិខិតឆ្លងដែន ឬអត្តសញ្ញាណប័ណ្ណផ្សេងទៀត។ រដ្ឋាភិបាលម៉ាឡេស៊ី មានបំណងអនុវត្តវិធានការនេះនៅឆ្នាំក្រោយ។ ប្រទេសនេះក៏តម្រូវឱ្យមានអាជ្ញាប័ណ្ណប្រព័ន្ធផ្សព្វផ្សាយសង្គម និងវេទិកាផ្ញើសារសំខាន់ៗរួចហើយ ដោយមានច្បាប់ត្រួតពិនិត្យអាយុ និងសុវត្ថិភាពខ្លឹមសារទៀតផង។

គួរបញ្ជាក់ថា ការផ្លាស់ប្តូរនេះធ្វើឡើងបន្ទាប់ពីមានការសម្រេចចិត្តថ្មីៗរបស់ប្រទេសអូស្ត្រាលីក្នុងការបិទគណនីប្រព័ន្ធផ្សព្វផ្សាយសង្គមចំពោះកុមារអាយុក្រោម ១៦ ឆ្នាំចាប់ពីថ្ងៃទី ១០ ខែធ្នូ៕

អត្ថបទ៖ ប៊ុន សុភាព