ក្រោមការបញ្ជានិងដឹកនាំផ្ទាល់ពីលោក អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ និង ប្រធានគណៈបញ្ជាការឯកភាពខេត្ត ដោយមានការសម្របសម្រួលនីតិវិធីពីលោក ទេព ឃុនឆ័យ ព្រះរាជអាជ្ញារង នៃអយ្យការអមសាលាដំបូងខេត្ត បានចុះត្រួតពិនិត្យទីតាំងចំនួន២កន្លែង ស្ថិតនៅភូមិសាមគ្គីមានជ័យ សង្កាត់អូជ្រៅ ក្រុងប៉ោយប៉ែត រកឃើញជនបរទេស៦៣នាក់ ស្រី២២នាក់ ២សញ្ជាតិ ថៃ៥១នាក់ស្រី២១នាក់ និងឥណ្ឌូនេស៊ី១២នាក់ស្រី១នាក់ ដូចខាងក្រោម៖​

ទីតាំងទី១ (លី ឡុង) អគារកម្ពស់៤ជាន់ ៤៣បន្ទប់ រកឃើញសម្ភារសង្ស័យមួយចំនួន បានដកហូតរក្សាទុកនៅស្នងការដ្ឋាននគរបាលខេត្ត និងរកឃើញជនជាតិថៃ​ ចំនួន៥១នាក់ ស្រី២១នាក់ បញ្ជូនទៅមណ្ឌលកងវ៉ាខេត្ត ៤៩នាក់ ស្រី១៩នាក់ និងបញ្ជូនទៅអធិការដ្ឋាននគរបាលក្រុង២នាក់ស្រី និងបិទទិតាំងជាបណ្ដោះអាសន្ន និង ទីតាំងទី២ (ធ ចាន់ធា) ផ្ទះកម្ពស់២ជាន់ ២៣បន្ទប់ រកឃើញសម្ភារសង្ស័យមួយចំនួន។

ក្រោយប្រតិបត្តិការអាជ្ញាធរខេត្តបានបញ្ជូន ជនជាតិឥណ្ឌូនេស៊ី១២នាក់ស្រី១នាក់ ទៅមណ្ឌលកងវ៉ាខេត្ត នោងសម្ភារពាក់ព័ន្ធដកហូតរក្សាទុកនៅស្នងការដ្ឋាននគរបាលខេត្តដោយឡែកទីតាំងខាងលើត្រូវបានបិទជាបណ្ដោះអាសន្ន៕

The post ជនជាតិថៃ និងឥណ្ឌូនេស៊ីជាង៦០នាក់ ត្រូវអាជ្ញាធរខេត្តបន្ទាយមានជ័យ ឃាត់ខ្លួនពាក់ព័ន្ធនឹងបទល្មើសOnline scams appeared first on Kampuchea Thmey Daily.

ប្រតិបត្តិការនេះកាលពីថ្ងៃទី ១៥ ខែមិថុនា ឆ្នាំ ២០២៦ ក្រោមការដឹកនាំដោយ លោក ថេង សុថុល អភិបាលខណ្ឌ ៧ មករា បានបន្តការចុះត្រួតពិនិត្យអគារជួលស្នាក់នៅដ៏ធំ ១ កន្លែង ស្ថិតក្នុងសង្កាត់វាលវង់ ខណ្ឌ ៧ មករា ស្របតាមអនុក្រឹត្យលេខ ០៣ របស់ប្រមុខរាជរដ្ឋាភិបាលកម្ពុជា ក្នុងការបោសសម្អាត Online Scams។

លោក ថេង សុថុល បានឲ្យដឹងថា ក្រោមការអនុវត្តតាមបទបញ្ជាដឹកនាំរបស់ លោក ឃួង ស្រេង អភិបាលរាជធានីភ្នំពេញ គណៈបញ្ជាការឯកភាពខណ្ឌ តែងតែចុះត្រួតពិនិត្យជាប្រចាំ ទៅតាមបណ្តាទីតាំងផ្តល់ការស្នាក់នៅតូចធំនានាទាំងអស់ ក្នុងមូលដ្ឋាន ដើម្បីទប់ស្កាត់ និង បោសសម្អាតដាច់ខាតលើឧក្រិដ្ឋកម្មឆបោកតាមប្រព័ន្ធបច្ចេកវិទ្យានេះ ដោយមិនអនុញ្ញាតឲ្យក្រុមឧក្រិដ្ឋជន យកប្រទេសកម្ពុជាជាជម្រកសម្រាប់ប្រព្រឹត្តបទល្មើស Online Scams នេះនោះឡើយ។

លោកបន្តថា ក្នុងរង្វង់ប្រតិបត្តិការនេះ កម្លាំងគណៈបញ្ជាការឯកភាព បានចុះឆែកតាមបន្ទប់រកឃើញជនជាតិវៀតណាម ចំនួន ៦ នាក់ រួមទាំងទូរស័ព្ទ ៨ គ្រឿង និង កុំព្យូទ័រ ៣ គ្រឿង។ ចំពោះកុំព្យូទ័រ ត្រូវបានជនសង្ស័យកាច់បំបាក់បំផ្លាញភស្តុតាង។

បច្ចុប្បន្ន នគរបាល បានបញ្ជូនជនបរទេសទាំង ៦ នាក់ ទៅកាន់អធិការដ្ឋាននគរបាលខណ្ឌ ៧ មករា ដើម្បីកសាងសំណុំរឿងចាត់ការតាមផ្លូវច្បាប់៕
អត្ថបទ ៖ រដ្ឋា

The post ត្រួតពិនិត្យទីតាំងខុនដូ ១ កន្លែង រកឃើញជនជាតិវៀតណាម ៦ នាក់ ពាក់ព័ន្ធ Online Scams នៅខណ្ឌ ៧ មករា appeared first on Kampuchea Thmey Daily.

កណ្តាល៖ នៅថ្ងៃទី១២ និងទី១៣ ខែមិថុនា ឆ្នាំ២០២៦ លោក ឧត្តមសេនីយ៍ទោ ហ៊ុន គឹមជាតិ ប្រធាននាយកដ្ឋានកណ្តាលនគរបាលយុត្តិធម៌ ដឹកនាំកម្លាំងជំនាញនគរបាលសេដ្ឋកិច្ច សហការជាមួយមន្ត្រីពាក់ព័ន្ធ និងមន្ត្រីខេត្តកណ្តាល ក្រោមការសម្របសម្រួលពីព្រះរាជអាជ្ញារងខេត្ត បានចុះត្រួតពិនិត្យទីតាំងសង្ស័យពាក់ព័ន្ធនឹងការនាំចូល និងស្តុកទុកសាច់បង្កក។

ប្រតិបត្តិការនេះបានធ្វើឡើងចំនួន ៤ទីតាំង ក្នុងភូមិសាស្ត្រខេត្តកណ្តាល ដោយរកឃើញសាច់បង្កកចម្រុះសរុបប្រមាណ ៦៨,៧៧៧គីឡូក្រាម រួមមាន៖

នៅថ្ងៃទី១២ ខែមិថុនា ឆ្នាំ២០២៦ កម្លាំងជំនាញបានចុះពិនិត្យទីតាំងចំនួន ២កន្លែង៖

១. ឃ្លាំងស្តុកសាច់បង្កកមួយកន្លែង ស្ថិតនៅភូមិជ្រោយអំពិល ឃុំឬស្សីជ្រោយ ស្រុកមុខកំពូល រកឃើញសាច់បង្កកចម្រុះចំនួន ៨,២០០គីឡូក្រាម។

២. ឃ្លាំងស្តុកសាច់បង្កកមួយទៀត ស្ថិតនៅភូមិព្រែកឫស្សី ឃុំឬស្សីជ្រោយ ស្រុកមុខកំពូល រកឃើញសាច់បង្កកចម្រុះចំនួន ៨,៤៩០គីឡូក្រាម។

នៅថ្ងៃទី១៣ ខែមិថុនា ឆ្នាំ២០២៦ កម្លាំងជំនាញបន្តចុះពិនិត្យទីតាំងចំនួន ២កន្លែង៖

១. ឃ្លាំងស្តុកសាច់បង្កក ស្ថិតនៅភូមិឬស្សី សង្កាត់ឬស្សី ក្រុងតាខ្មៅ រកឃើញសាច់បង្កកចម្រុះចំនួន ១៣,១០០គីឡូក្រាម។

២. ឃ្លាំងរបស់ក្រុមហ៊ុន ស៊ាង មី អ៊ិនធើណេសិនណល សឹបផ្លាយឆេន អ៊ឹមផត អ៊ិចផត ស្ថិតនៅភូមិស្រុកធំ ឃុំជើងកើប ស្រុកកណ្តាលស្ទឹង រកឃើញសាច់បង្កកចម្រុះចំនួន ៣៨,៩៨៧គីឡូក្រាម ដែលជាទំនិញនាំចូលពីប្រទេសចិន។

ក្រោយបញ្ចប់ការត្រួតពិនិត្យ ក្រុមការងារបានសម្រេចបិទសៀលទីតាំងទាំង ៤ ជាបណ្តោះអាសន្ន ដើម្បីបន្តនីតិវិធីតាមច្បាប់ និងធ្វើការស្រាវជ្រាវបន្ថែមលើប្រភព និងភាពស្របច្បាប់នៃទំនិញទាំងនោះ៕

The post អាជ្ញាធរចុះត្រួតពិនិត្យឃ្លាំងសាច់បង្កក ៤ទីតាំងនៅខេត្តកណ្តាល រកឃើញសាច់បង្កកជិត ៧០ តោន និងបិទសៀលបណ្តោះអាសន្ន appeared first on Kampuchea Thmey Daily.

យោងតាមបញ្ជាដឹកនាំរបស់ លោកនាយឧត្ដមសេនីយ៍ ស ថេត អគ្គស្នងការនគរបាលជាតិ និងតាមការចង្អុលណែនាំពី លោកឧត្ដមសេនីយ៍ឯក អគ្គស្នងការរងនគរបាលជាតិ កាលពីថ្ងៃទី១១ ខែឧសភា ឆ្នាំ២០២៦ នាយកដ្ឋានប្រឆាំងបទល្មើសបច្ចេកវិទ្យា បានបើកការស្រាវជ្រាវ ពាក់ព័ន្ធនឹងករណី ជនសង្ស័យលួចចូលគ្រប់គ្រងគណនី WhatsApp និងក្លែងបន្លំគណនីធនាគារ ធ្វើសកម្មភាពឆបោកមិត្តភក្កិដែលក្នុងគ្រុបអស់ទឹកប្រាក់សរុបចំនួន ២៥៣,៩៩៩.៨៩ ដុល្លារអាមេរិក ព្រមទាំងពាក់ព័ន្ធករណីទិញ-លក់ គណនីធនាគារថែមទៀតផង។ តាមរយ:ការស្រាវជ្រាវ កម្លាំងជំនញ បានរកឃើញថាជនសង្ស័យពាក់ពន្ធ័ការលក់គណនីធនាគារ ជាង២០គណនី ទៅឱ្យបណ្ដាញក្រុមជនឆបោក និងឃាត់ខ្លួនបានជនសង្ស័យចំនួន០៦នាក់ ជនជាតិវៀតណាម១នាក់ (ប្រុស) និងជនជាតិខ្មែរ៥នាក់ (ស្រី២នាក់)។

បច្ចុប្បន្ន ជនសង្ស័យទាំង៦នាក់ នាយកដ្ឋាន បានកសាងសំណុំរឿងបញ្ជូនទៅកាន់អយ្យការអមសាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់ និងត្រូវបានចៅក្រម នៃសាលាដំបូងរាជធានីភ្នំពេញ សម្រេចឃុំខ្លួនជាបណ្ដោះនៅមណ្ឌលអប់រំកែប្រែទី១ ព្រៃស ពីបទ «ឆបោកតាមប្រពន្ធ័បច្ចេកវិទ្យា» បទល្មើសព្រហ្មទណ្ឌដែលមានចែង និងផ្តន្ទាទោសតាមបញ្ញត្តិមាត្រា៥ នៃច្បាប់ស្ដីពីការប្រឆាំងការឆបោកតាមប្រពន្ធ័បច្ចេកវិទ្យា។

ជាមួយគ្នាផងដែរ នាយកដ្ឋាន សូមក្រើនរំលឹកដល់សាធារណជនទាំងអស់ សូមប្រុងប្រយ័ត្នខ្ពស់ និងជៀសវាងដាច់ខាតនូវការផ្តល់ឬជួលគណនីធនាគារ លេខទូរស័ព្ទ និងឯកសារអត្តសញ្ញាណផ្ទាល់ខ្លួនឱ្យអ្នកដទៃប្រើប្រាស់ ដែលអាចប្រឈម នឹង ហានិភ័យផ្សេងៗ និងឈានដល់ការទទួលខុសត្រូវចំពោះមុខច្បាប់ជាធរមាន ក្នុងករណីមានបទល្មើសកើតឡើង៕

The post លួចចូល WhatsApp ឆបោកលុយក្នុងគ្រុបអស់ជាង ២៥ម៉ឺនដុល្លារ ត្រូវសមត្ថកិច្ចស្រាវជ្រាវឃាត់ខ្លួន៦នាក់បញ្ជូនទៅតុលាការ appeared first on Kampuchea Thmey Daily.

ប្រតិបត្តិការនេះបានធ្វើឡើងកាលពីថ្ងៃទី១៤ ខែមិថុនា ឆ្នាំ២០២៦ វេលាម៉ោង ១០:៣០នាទីព្រឹក នៅចំណុចភូមិស្រឡៅជ្រុំ ឃុំសិរីមានជ័យ ស្រុកសំពៅលូន ខេត្តបាត់ដំបង ដោយមានការសហការគ្នារវាងលោកវរសេនីយ៍ទោ ទឹម វិឆ័យ អធិការនគរបាលស្រុកសំពៅលូន និងលោកវរសេនីយ៍ឯក ម៉ង់ ស៊ី មេបញ្ជាការវរសេនាតូចនគរបាលការពារព្រំដែនគោកលេខ ៨១៧។

ជនសង្ស័យដែលត្រូវបានឃាត់ខ្លួនមានឈ្មោះ រិត ផលរ៉ា ភេទប្រុស អាយុ ២៦ឆ្នាំ មានទីលំនៅភូមិពោធិ៍ជ្រៃ ឃុំសិរីមានជ័យ ស្រុកសំពៅលូន ខេត្តបាត់ដំបង។ ដោយការបើកកិច្ចប្រតិបត្តិការបង្រ្កាបនេះ ធ្វើឡើងបន្ទាប់ពីមានការផ្សព្វផ្សាយនៅលើបណ្តាញសង្គមកាលពីថ្ងៃទី១៣ ខែមិថុនា ឆ្នាំ២០២៦ ដោយឃើញករណីមេខ្យល់នាំពលករចំនួន ៨នាក់ ឆ្លងដែនដោយខុសច្បាប់។

នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពនាំពលករឆ្លងដែនដោយខុសច្បាប់ប្រាកដមែន ដោយធ្វើសកម្មភាពនៅចំណុចភូមិចំបក់ ឃុំជ្រៃសីមា ស្រុកសំពៅលូន (ដែលជាចំណុចដាច់ស្រយាល ឆ្ងាយពីគោលដៅយាមល្បាតរបស់សមត្ថកិច្ច)។ ដោយឡែក បក្ខពួកម្នាក់ទៀតដែលបានចូលរួមធ្វើសកម្មភាពដែរនោះ បាននិងកំពុងរត់គេចខ្លួន ប៉ុន្តែសមត្ថកិច្ចបានកំណត់អត្តសញ្ញាណច្បាស់លាស់រួចរាល់ហើយ និងកំពុងបន្តស្វែងរកចាប់ខ្លួន។

បច្ចុប្បន្ន ជនសង្ស័យត្រូវបានសមត្ថកិច្ចរៀបចំកសាងសំណុំរឿង បញ្ជូនទៅកាន់ការិយាល័យជំនាញ ដើម្បីអនុវត្តបន្តតាមនីតិវិធីច្បាប់៕

អត្ថបទ៖ សោ និយមរ័ត្ន

The post នគរបាលស្រុកសំពៅលូន ឃាត់ខ្លួនមេខ្យល់ម្នាក់ដែលសកម្មក្នុងការនាំពលករឆ្លងដែនខុសច្បាប់ទៅប្រទេសថៃ appeared first on Kampuchea Thmey Daily.

ដោយអនុវត្តតាមបទបញ្ជាដ៏ម៉ឺងម៉ាត់ពី លោកនាយឧត្តមសេនីយ៍ ស ថេត អគ្គស្នងការនគរបាលជាតិ និងលោក ប៉េង ពោធិ៍សា អភិបាល នៃគណៈអភិបាលខេត្តស្វាយរៀង ព្រមទាំងដឹកនាំបញ្ជាផ្ទាល់ពីលោកឧត្ដមសេនីយ៍ទោ ពេជ្រ វីរៈ ស្នងការនគរបាលខេត្តស្វាយរៀង ស្តីពីការអនុវត្តយុទ្ធនាការបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scams) នៅទូទាំងខេត្តស្វាយរៀង។ កាលពីថ្ងៃទី១៤ ខែមិថុនា ឆ្នាំ២០២៦ លោកវរសេនីយ៍ទោ ជិន សុភឿន អធិការនគរបាលស្រុកចន្ទ្រា បានដឹកនាំកម្លាំង សហការជាមួយគណៈបញ្ជាការឯកភាពរដ្ឋបាលស្រុកចន្ទ្រា ដោយមានការសម្របសម្រួលនីតិវិធីពី លោក ខាំ សុផារី ព្រះរាជអាជ្ញា នៃអយ្យការអមសាលាដំបូងខេត្ត

ចុះធ្វើរដ្ឋបាល ស្រាវជ្រាវ និងបង្រ្កាបទីតាំងសង្ស័យលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) នៅចំណុចបន្ទប់ជួល ស្ថិតក្នុងភូមិចេក ឃុំសំរោង ស្រុកចន្ទ្រា ដោយឃាត់ខ្លួនមនុស្សក្នុងរង្វង់ប្រតិបត្តិការចំនួន ១០នាក់ ស្រី ០២នាក់ ជាជនជាតិវៀតណាម។ ក្នុងនោះដកហូតបានសម្ភារពាក់ព័ន្ធនឹងបទល្មើសរួមមាន ៖ កំព្យូទ័រលើតុ All-In-One ,កុំព្យូទ័រយួរដៃ , ទូរស័ព្ទដៃ និងសម្ភារប្រើប្រាស់មួយចំនួនទៀត។

បច្ចុប្បន្នជនសង្ស័យរួមទាំងវត្ថុតាង ត្រូវបានសមត្ថកិច្ចជំនាញ កំពុងកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមនីតិវិធីច្បាប់ រីឯទីតាំងប្រព្រឹត្តិបទល្មើសក្រុមការងារបានបិទបណ្ដោះអាសន្ន(Seal Off)៕

The post គណៈបញ្ជាការឯកភាពរដ្ឋបាលស្រុកចន្ទ្រា បង្រ្កាបទីតាំងសង្ស័យ លួចលាក់ប្រព្រឹត្តបទល្មើសOnline Scams appeared first on Kampuchea Thmey Daily.

គម្រោងដំឡើងភ្លើងសូឡានេះ ត្រូវបានអនុវត្តចាប់ពីចំណុចព្រំប្រទល់ស្រុកសំរោង រហូតតាមបណ្តោយផ្លូវជាតិលេខ២ក្នុងមូលដ្ឋានស្រុកបាទី ដើម្បីធានាឱ្យមានពន្លឺគ្រប់គ្រាន់សម្រាប់ការធ្វើដំណើររបស់ប្រជាពលរដ្ឋ និងអ្នកធ្វើដំណើរឆ្លងកាត់ ជាពិសេសនៅពេលយប់ ដែលជាពេលងាយប្រឈមនឹងគ្រោះថ្នាក់ចរាចរណ៍ និងបញ្ហាអសន្តិសុខផ្សេងៗ។

លោក សាយ វណ្ណៈ បានមានប្រសាសន៍ថា ការដំឡើងបង្គោលភ្លើងបំភ្លឺផ្លូវនេះ គឺជាការឆ្លើយតបទៅនឹងសំណូមពរ និងតម្រូវការជាក់ស្តែងរបស់ប្រជាពលរដ្ឋ ស្របតាមគោលនយោបាយអភិវឌ្ឍន៍មូលដ្ឋានរបស់រដ្ឋបាលខេត្ត និងរដ្ឋបាលស្រុក ដែលតែងតែយកចិត្តទុកដាក់លើសុខុមាលភាព និងសុវត្ថិភាពរបស់ប្រជាពលរដ្ឋជាចម្បង។

អភិបាលស្រុកបាទី បានបញ្ជាក់ថា បង្គោលភ្លើងសូឡាទាំងនេះ មិនត្រឹមតែជួយបង្កើនភាពងាយស្រួលក្នុងការធ្វើដំណើរប៉ុណ្ណោះទេ ប៉ុន្តែថែមទាំងរួមចំណែកកាត់បន្ថយគ្រោះថ្នាក់ចរាចរណ៍ ពង្រឹងសន្តិសុខ សណ្តាប់ធ្នាប់សាធារណៈ និងទប់ស្កាត់សកម្មភាពអវិជ្ជមានដែលអាចកើតមាននៅតាមដងផ្លូវនាពេលរាត្រីផងដែរ។ លើសពីនេះ គម្រោងប្រើប្រាស់ភ្លើងសូឡា ក៏ជាផ្នែកមួយនៃការលើកកម្ពស់ការប្រើប្រាស់ថាមពលស្អាត និងថាមពលកកើតឡើងវិញ ដែលមានលក្ខណៈសន្សំសំចៃ ប្រកបដោយនិរន្តរភាព និងមិនប៉ះពាល់ដល់បរិស្ថាន ស្របតាមទិសដៅអភិវឌ្ឍបៃតងរបស់រាជរដ្ឋាភិបាលកម្ពុជា។

លោកអភិបាលស្រុក ក៏បានអំពាវនាវដល់ប្រជាពលរដ្ឋទាំងអស់ ចូលរួមថែរក្សា និងការពារសមិទ្ធផលសាធារណៈទាំងនេះឱ្យបានគង់វង្ស ជៀសវាងការបំផ្លាញ ឬធ្វើឱ្យខូចខាត ដើម្បីបម្រើផលប្រយោជន៍រួមរបស់សហគមន៍ និងកូនចៅជំនាន់ក្រោយ។

បច្ចុប្បន្ន ក្រុមការងារបច្ចេកទេសកំពុងបន្តដំណើរការដំឡើងបង្គោលភ្លើងសូឡាយ៉ាងមមាញឹក ដើម្បីឱ្យការបំភ្លឺតាមបណ្តោយផ្លូវជាតិលេខ២ ក្នុងភូមិសាស្ត្រស្រុកបាទី អាចដំណើរការបានពេញលេញនាពេលឆាប់ៗខាងមុខ។ ការអនុវត្តគម្រោងនេះ ត្រូវបានរំពឹងថា នឹងជួយលើកកម្ពស់សោភ័ណភាពទីប្រជុំជន បង្កើនទំនុកចិត្តដល់អ្នកធ្វើដំណើរ និងរួមចំណែកជំរុញការអភិវឌ្ឍសេដ្ឋកិច្ច-សង្គមរបស់ស្រុកបាទីឱ្យកាន់តែរីកចម្រើន៕

អត្ថបទ៖ វីរៈ

The post អាជ្ញាធរស្រុកបាទី ចាប់ផ្ដើមដំឡើងអំពូលភ្លើងសូឡាតាមបណ្ដោយផ្លូវជាតិលេខ២ ដើម្បីបង្កើនសុវត្ថិភាព និងសោភ័ណភាពមូលដ្ឋាន appeared first on Kampuchea Thmey Daily.

លោកស្រីបានបន្តថា នៅថ្ងៃទី១៣ ខែមិថុនា ឆ្នាំ២០២៦ ក្រោមការដឹកនាំ និងបញ្ជាផ្ទាល់របស់ លោក ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ រដ្ឋបាលខណ្ឌទាំង១៤ សហការជាមួយកម្លាំងចម្រុះមកពីស្នងការដ្ឋាននគរបាលរាជធានីភ្នំពេញ អគ្គនាយកដ្ឋាន ក.ប.ប ដោយមានការសម្របសម្រួលផ្លូវច្បាប់ពីព្រះរាជអាជ្ញារងអមសាលាដំបូងរាជធានីភ្នំពេញ បានចុះត្រួតពិនិត្យទីតាំងឃ្លាំងតូច ធំ ក្នុងមូលដ្ឋានសរុបចំនួន ១៨កន្លែង ដែលសង្ស័យមាននាំចូល ស្តុកទុក ចរាចរ និងចែកចាយផលិតផលបង្កកមានប្រភពពីប្រទេសថៃ។

ក្នុងប្រតិបតិការទាំង១៨ទីតាំងនេះ សមត្ថកិច្ចចម្រុះបានរកឃើញទីតាំង ចំនួន២មានជាប់ពាក់ព័ន្ធនឹងទំនិញនាំចូលខុសច្បាប់ពីប្រទេសថៃ គឺទី១ ទីតាំងឃ្លាំងស្តុកទំនិញនាំចូលស្ថិតនៅ ភូមិត្រពាំងចក  សង្កាត់ព្រៃវែង ខណ្ឌដង្កោ រាជធានីភ្នំពេញ របស់ក្រុមហ៊ុន អេសខេអេសខេឯ.ក ដោយ ក្រុមការងារ ចម្រុះបានរកឃេីញទំនិញនាំចូលមកពីប្រទេសថៃ ចាប់ពីដើមខែកុម្ភ: ឆ្នាំ២០២៦ ពោលគឺ ក្រោយការបិទព្រំដែនគោក ។ ទំនិញ ទាំងនោះ មានចំនួន ៦១មុខ ជាប្រភេទកាហ្វេ ទឹកសេរ៉ូ ម៉្សៅទឹកដោះគោ។

ចំពោះទីតាំង ទី២ គឺឃ្លាំង ស្ថិតនៅផ្ទះលេខ១០២ ផ្លូវ៧៩BT ភូមិចំរើនផល សង្កាត់បឹងទំពន់ទី១ ខណ្ឌមានជ័យ ក្រុមការងារ ចម្រុះបាន ពិនិត្យរកឃើញផលិតផល ប្រភេទសាច់បង្កករួមមាន ៖ ដៃមឹក និង ជេីងទាដែលបាននាំចូលពីប្រទេស ថៃ។

ជាលទ្ធផលសម្រាប់ប្រតិបតិ្តការថ្ងៃទី១៣ ខែមិថុនានេះ សមត្ថកិច្ចសម្រេចបិទឃ្លុំទីតាំងឃ្លាំងទាំង២ខាងលើនេះជាបណ្តោះអាសន្ន និងបានសម្រេចឱ្យនាំខ្លួនម្ចាស់និងអ្នកគ្រប់គ្រងឃ្លាំងក្នុងខណ្ឌដង្កោ ចំនួន ២នាក់ និងឃ្លាំងក្នុងខណ្ឌមានជ័យចំនួន ១នាក់ ទៅធ្វើការសាកសួរបន្ថែមនៅការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលរាជធានីភ្នំពេញតាមនីតិវិធីច្បាប់៕

ដោយ៖ ស្រីរ័ត្ន

The post អាជ្ញាធរចុះពិនិត្យទីតាំងផលិផលបង្កក និងទំនិញនាំចូលពីថៃ ១០៧ទីតាំង បិទបណ្តោះអាសន្ន ១២ទីតាំង នៅភ្នំពេញ appeared first on Kampuchea Thmey Daily.