ពិធីនេះប្រព្រឹត្តទៅក្រោមអធិបតីភាព នាយឧត្តមសេនីយ៍ ម៉ៅ សុផាន់ និង អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការ កងទ័ពជើងគោក និង ឯកឧត្តម បាវីតលុង វ៉ាន់ឡាល់វ៉ាវណា (Bawitlung Vanlalvawna) ឯកអគ្គរដ្ឋទូតឥណ្ឌាប្រចាំកម្ពុជា នៅមជ្ឈមណ្ឌលហ្វឹកហ្វឺនកងទ័ពជើងគោក។
ក្នុងឱកាសនោះ ភាគីទាំងពីរបានវាយតម្លៃខ្ពស់ចំពោះកិច្ចសហប្រតិបត្តិការយោធារវាងកម្ពុជា-ឥណ្ឌាដែលកាន់តែរឹងមាំ ។

ក្នុងឱកាសនោះ នាយឧត្តមសេនីយ៍ ម៉ៅ សុផាន់ បានសម្តែងនូវអំណរគុណចំពោះរដ្ឋាភិបាលឥណ្ឌា កងទ័ពឥណ្ឌា និងស្ថានទូតឥណ្ឌាប្រចាំកម្ពុជា ចំពោះការគាំទ្រដ៏មានអត្ថន័យនេះ ដែលបានឆ្លុះបញ្ចាំងអំពីមិត្តភាព និងកិច្ចសហប្រតិបត្តិការដ៏រឹងមាំរវាងកងទ័ពទាំងពីរ។ ឯកឧត្តម ក៏បានសម្តែងការពេញចិត្តចំពោះការរីកចម្រើននៃកិច្ចសហប្រតិបត្តិការការពារជាតិ រួមមាន ការរៀបចំវគ្គបណ្តុះបណ្តាល និងការរៀបចំសមយុទ្ធទ្វេភាគី CINBAX II ដែលកំពុងប្រព្រឹត្តទៅនៅកម្ពុជា។

ជាមួយគ្នានេះ ឯកអគ្គរដ្ឋទូតឥណ្ឌា បានលើកឡើងថា ប្រព័ន្ធហ្វឹកហ្វឺននេះ ត្រូវបានប្រគល់ជូនកងទ័ពជើងគោកកម្ពុជា កាលពីខែកុម្ភៈ ឆ្នាំ២០២៥ ហើយការដាក់ឱ្យដំណើរការនៅថ្ងៃនេះ គឺជាសក្ខីភាពនៃកិច្ចសហប្រតិបត្តិការជាក់ស្តែងរវាងកងទ័ពទាំងពីរ។ ឯកឧត្តម ជឿជាក់ថាប្រព័ន្ធហ្វឹកហ្វឺនទំនើបនេះ នឹងចូលរួមយ៉ាងសំខាន់ក្នុងការលើកកម្ពស់សមត្ថភាពហ្វឹកហ្វឺន វិជ្ជាជីវៈ និងការត្រៀមខ្លួនប្រតិបត្តិការរបស់កងទ័ពជើងគោកកម្ពុជា៕

The post ប្រព័ន្ធហ្វឹកហ្វឺនអាវុធជាអំណោយរបស់ឥណ្ឌា នឹងរួមចំណែកលើកកម្ពស់សមត្ថភាពកងទ័ពជើងគោកកម្ពុជា appeared first on Kampuchea Thmey Daily.

មន្ត្រីរដ្ឋបាលជាន់​ខ្ពស់ម្នាក់ប្រាប់​សារព័ត៌មាន​ The Independent ល្ងាច​ថ្ងៃពុធ​ថា៖ « លោក ប្រធានាធិបតី ត្រាំ​ និង លោក ​រដ្ឋមន្ត្រី​សង្គ្រាម​​អាមេរិក លោ​​ក​ Pete​ ​Hegseth យល់ស្រប ​ជ្រើ​សយក​ថ្នាក់​ដឹក​នាំថ្មី​ជា​មេបញ្ជាការ​កងទ័ពជើងទឹក។ រដ្ឋមន្ត្រី Hegseth បាន​ជូនដំណឹង​ដល់លោក John Phelan ​អំពីព័ត៌មាន​នេះ ​មុនពេល​ផ្សព្វផ្សាយ​រឿង​នេះ​ជាសាធារណៈ»។

នៅ​ថ្ងៃពុធ ដដែល ​អ្នកនាំពាក្យក្រសួងការពារជាតិ ​លោក Sean Parnell សរសេរនៅលើ​បណ្តាញ​សង្គម​ X ថា៖ « លោក Phelan នឹងចាកចេញ​ចូល​ជា​ធរមាន​ភ្លាមៗ​​​»។ ដោយ​លោក​​មិនបានផ្តល់ការពន្យល់​សម្រាប់​ការចាកចេញនោះ​ទេ​។

លោក Sean Parnell បន្ថែម​ថា​៖ « យើង​សូមថ្លែងអំណរ​គុណ​យ៉ាង​ជ្រាលជ្រៅ​ដល់​លោក​រដ្ឋ​មន្ត្រី Phelan ចំពោះ​ការបម្រើការងារក្នុង​ក្រសួង និងកងទ័ពជើងទឹក​សហរដ្ឋអាមេរិក។ យើង​សូមជូនពរលោក​មាន​សំណាង​ល្អក្នុងកិច្ចខិតខំប្រឹងប្រែងនាពេលអនាគត»។

របាយការណ៍ជាច្រើនបង្ហាញ​ថា លោក Phelan ជាអតីតអ្នក​ហិរញ្ញ​វត្ថុ ​និង​ជាអ្នកបរិច្ចាគដ៏លេចធ្លោសម្រាប់យុទ្ធនាការ​របស់​រដ្ឋ​បាល​ លោក ត្រាំ​ ត្រូវបាន​បណ្តេញចេញ ខណៈភាពតានតឹង​កាន់តែកើនឡើងរវាង​លោកនិងមន្ត្រីជាន់ខ្ពស់របស់មន្ទីរបញ្ចកោណ។

ប្រភព​មួយ​ប្រាប់​សារព័ត៌មាន Axios ថា​៖ « លោក Phelan មិនយល់​ ​ថាគាត់​មិន​មែន​​​ជាចៅហ្វាយនោះ​ទេ។ ការងាររបស់គាត់គឺធ្វើ​តាម​បញ្ជា​ដែល​ផ្តល់​ឱ្យ​ តែគាត់​​មិន​ធ្វើតាមបញ្ជាដែលគិត​ថាគួរតែ​ធ្វើ​នោះ​ទេ។ គាត់​មិន​ចុះ​សម្រុងជា​មួយ​រដ្ឋមន្ត្រីក្រសួងការពារជាតិ លោក Pete Hegseth »។

យ៉ាង​ណា​ជុំ​វិញ​ពី​បញ្ហា​នេះ អ្នកអត្ថាធិប្បាយមួយចំនួននៅលើបណ្តាញសង្គមចង្អុលបង្ហាញថា ការ​ចាក​ចេញរបស់លោក Phelan កើតឡើងនៅពេលវេលា​ដ៏គ្រោះថ្នាក់មួយ​។

លោក Dan Pfeiffer អតីត​ទីប្រឹក្សាជាន់ខ្ពស់រដ្ឋ​បាល​ លោក​ Obama សរសេរ​នៅ​លើ​បណ្តាញ​សង្គម​ X ថា៖ « ពេលវេលា​​នេះ​ចម្លែក​ សម្រាប់​​រដ្ឋ​​មន្ត្រីកងទ័ពជើង​ទឹកចាកចេញ»។

ចំណែក លោកស្រី Sarah Longwell ទីប្រឹក្សានយោបាយម្នាក់​ និយាយ​ថា៖ « យើងកំពុងស្ថិត​នៅ​ចំកណ្តាលនៃការប្រឈមមុខដាក់គ្នា​​រវាងកងទ័ពជើងទឹក​ជា​មួយប្រទេសដែល​យើង​គំរាមកំហែង​បំផ្លាញ! ដូច្នេះវាហាក់ដូចជាពេលវេលាចម្លែក​សម្រាប់រដ្ឋមន្ត្រីកងទ័ព​ជើងទឹកចាកចេញភ្លាមៗ»៕

ប្រែសម្រួល៖ ណឺ មិនា

The post ​ក្រសួង​​​​សង្គ្រាមអាមេរិក​បណ្តេញ​​មេទ័ព​ជើង​ទឹក​ពី​ដំណែង​ភ្លាម​ៗ ខណៈសង្គ្រាម​អ៊ីរ៉ង់​មិនទាន់ចប់​​ appeared first on Kampuchea Thmey Daily.

បើយោងតាមសារព័ត៌មាន NBC News ដែលផ្សាយកាលពី​ថ្ងៃ​សុក្រ ទី​១៣ ខែមីនា ឆ្នាំ​២០២៦ សមាជិក​កងទ័ព​ក្នុង​មួយ​​ក្រុមៗ​ ដែល​ជា​អង្គភាពបេសកកម្ម​ជើង​ទឹក​ ឬ​ហៅ​ថា​ ARG/MEU ​បាន​ត្រៀមលក្ខណៈ​រួច​រាល់​ហើយសម្រាប់​ប្រតិបត្តិការណ៍​ក្នុង​ទឹក​។

គួរ​បញ្ជាក់​ថា ​ក្នុង​ក្រុម​ទាំង​អស់ មាន​ទាហាន​ជើង​ទឹក​ ២៥០០នាក់ និង​នាវិក ២៥០០នាក់​។

កងទាហាន​ជើង​ទឹក​ MEU ជា​ក្រុម​ទាហាន​ដែល​បណ្តុះ​បណ្តាល​សម្រាប់​ឆ្លើយតបនឹង​វិបត្តិ ដូចជាការជម្លៀសចេញ​ពីតំបន់គ្រោះថ្នាក់ និងការ​ការពារ​ស្ថានទូត។

ពួកគេក៏ត្រូវបានបណ្តុះបណ្តាលឱ្យ​ក្លាយ​ជាអ្នក​ដំបូងគេដែល​ទៅដល់​សមរភូមិផងដែរ​ ដើម្បី​បង្កើតតំបន់សម្រាប់​កងកម្លាំងផ្សេងទៀត​ដូចជា ​ការបើក​ប្រតិបត្តិករ​ពិសេស និងការអនុវត្តបេសកកម្ម។

នាវិកមក​ពីក្រុម Tripoli Amphibious Ready Group មានទាំង​នាវាចម្បាំង USS San Diego, USS Tripoli និង USS New Orleans។

មិនតែ​ប៉ុណ្ណោះ​នាវា​​ទាំង​នោះ​ទើបតែបាន​ប្រតិបត្តិការ​ក្នុង​សមុទ្រ​ហ្វីលីពីនកាលពីពេលថ្មីៗ​នេះ ប៉ុន្តែបច្ចុប្បន្ន​​កំពុង​ធ្វើដំណើរឆ្ពោះ​​ទៅទិសខាងលិចវិញ​។

មន្ត្រីអាមេរិកម្នាក់​នៅ​មជ្ឈមណ្ឌលបញ្ជាការកណ្តាល (CENTCOM) បានបញ្ជាក់ថា មជ្ឈមណ្ឌលបញ្ជាការកណ្តាលនេះ បាន​ស្នើសុំកងកម្លាំងបន្ថែម ព្រោះផ្នែកមួយ​នៃផែនការ​សម្រាប់​សង្គ្រាមនៅ​អុីរ៉ង់ ​គឺ​ត្រូវការកងកម្លាំង​ជើង​ទឹក​ ដើម្បី​ផ្តល់​ជម្រើស​សម្រាប់​ប្រតិបត្តិការ​។

យ៉ាងណា​អ្នក​​សារព័ត៌មាន​មិន​អាច​សុំ​ការអត្ថាធិប្បាយ​អំពីការដាក់​ពង្រាយ​កង​កម្លាំង​ទាំង​នោះ​បានឡើយ។

មន្ត្រី​មន្ទីរបញ្ចកោណម្នាក់ឆ្លើយ​​ថា៖ «ដោយសារ​តែសន្តិសុខ​ប្រតិបត្តិការ យើង​មិន​ពិភាក្សា​ពីដំណើរ​ការ​​ពេល​ខាង​មុខ​ ឬសម្មតិកម្មទេ»៕

ប្រែសម្រួល៖ ណឺ មិនា

The post អាមេរិក​​ដាក់​ពង្រាយ​ទាហានជើងទឹក-នាវិក​ ៥០០០នាក់ និង​​​​​នាវាចម្បាំងទៅ​មជ្ឈិម​បូព៌ា appeared first on Kampuchea Thmey Daily.

តាមការបញ្ជាក់របស់កងទ័ពជើងទឹក លោកអនុនាវីត្រី កែវ ចាន់ប៊ីលី ជាសិក្ខាកាមទី២ តំណាងឱ្យកងទ័ពជើងទឹកកម្ពុជា បន្ទាប់ពីអនុនាវីទោ ទៀ សុធីរដ្ឋា ដែលបានទទួលសញ្ញាបត្របញ្ចប់ការសិក្សាវគ្គនាយទាហានចូលថ្មី នៃមហាវិទ្យាល័យកងទ័ពជើងទឹកអូស្ត្រាលី នៅ HMAS Creswell Jervis Bay NSW ប្រទេសអូស្ត្រាលី។ បន្ទាប់ពីបញ្ចប់វគ្គនាយទាហានចូលថ្មីនេះ លោកអនុនាវីត្រី កែវ ចាន់ប៊ីលី នឹងបន្តចូលសិក្សាវគ្គនាយទាហានប្រយុទ្ធលម្ហសមុទ្រ និងការអនុវត្តផ្ទាល់លើនាវា(Maritime warfare officer course) នៅថ្ងៃទី៣ ខែកក្កដា ឆ្នាំ២០២៥ខាងមុខនេះ នៅ HMAS Waston, Waston Bay, NSW ប្រទេសអូស្ត្រាលី។

លោកស្រីឧត្តមនាវីត្រី ទៀ លក្ខិណា ប្រធានក្រុមការងារយេនឌ័រកងទ័ពជើងទឹក ដែលជាម្តាយរបស់លោកអនុនាវីត្រី កែវ ចាន់ប៊ីលី បានសម្ដែងក្ដីសប្បាយរីករាយ តាមរយៈសំណេររៀបរាប់បែបនេះថា៖ «ថ្ងៃនេះបានមកជួបកូនប្រុសម្ដាយហើយ មានសេចក្ដីសុខបំផុត ពេលបានមកដល់ ជូនពរកូនប្រុសបានទទួលសញ្ញាប័ត្របញ្ចប់ការសិក្សាវគ្គនាយទាហានកងទ័ពជើងទឹកអូស្រ្តាលី នៅមហាវិឡាល័យកងទ័ពជើងទឹកអូស្រ្តាលី HMAS Creswell»៕

The post សិក្ខាកាមយោធាកម្ពុជាម្នាក់ទៀត បានបញ្ចប់ការសិក្សាវគ្គនាយទាហានជើងទឹក នៅអូស្ត្រាលី appeared first on Kampuchea Thmey Daily.

នាវារបស់ជប៉ុននេះ គឺជានាវាបរទេសទី១ហើយដែលត្រូវបានអនុញ្ញាតឱ្យចូលចតនៅមូលដ្ឋានសមុទ្ររាម បន្ទាប់ពីមូលដ្ឋាននេះ ត្រូវបានធ្វើទំនើបកម្ម និងត្រូវបានសម្ពោធដាក់ឱ្យប្រើប្រាស់ជាផ្លូវការកាលពីដើមខែមេសា ឆ្នាំ២០២៥នេះ។

ចំពោះលក្ខណៈបច្ចេកទេសនាវាទី ១ មាន ឈ្មោះ JS BUNGO (MST-464) មានបណ្តោយ ១៤១ ម៉ែត្រទទឹង  ២២ ម៉ែត្រ ជម្រៅទឹក ៥,៤ ម៉ែត្រ ទម្ងន់ផ្ទុក ៥៧០០ តោន ផ្ទុកនាវិកចំនួន ១៣៥ នាក់  ដែលមានមេបញ្ជាការនាវាលោក វរនាវីទោ TANAKA KOUJI ។

ចំពោះនាវាទី​២ ឈ្មោះ JS ETAJIMA (MSO-306) ដែលមានបណ្តោយ  ៦៧ ម៉ែត្រ ទទឹង ១១ ម៉ែត្រជម្រៅទឹក  ២,៧ ម៉ែត្រ ទម្ងន់ផ្ទុក  ៦៩០ តោន មាននាវិកចំនួន ៥៣ នាក់ ដែលមានមេបញ្ជាការនាវាលោក វរនាវីត្រី ODA TAKAYUKI ។

ការចូលចតលើកនេះ ដឹកនាំប្រតិភូដោយលោក វរនាវីឯក SHINSUKE AMANO មេបញ្ជាការកងពលធំបោសសំអាតមីនលេខ ៣៕

The post មកដឹងលម្អិត ពីលក្ខណៈបច្ចេកទេសនាវាជប៉ុនចតនៅកម្ពុជា ដែលមានទម្ងន់ផ្ទុករាប់ពាន់តោន appeared first on Kampuchea Thmey Daily.

តាមរបាយការណ៍របស់លោកឧត្តមនាវីឯក ទៀ សុខា មេបញ្ជាការកងទ័ពជើងទឹក និងជាអគ្គលេខាធិការនៃគណ:កម្មាធិការជាតិសន្តិសុខលម្ហសមុទ្រ បានគូសបញ្ជាក់ថា កងទ័ពជើងទឹក បានចូលរួមយ៉ាងសកម្មក្នុងការបំពេញភារកិច្ចការពារអធិបតេយ្យ បូណភាពទឹកដី កោះ ឆ្នេរ ព្រមទាំងបណ្តាភូមិសាស្រ្តដទៃទៀត​ប្រកបដោយប្រសិទ្ធភាព ក្នុងស្មារតីទទួលខុសត្រូវខ្ពស់ និងរួមចំណែកក្នុងការធានានៅ​ស្ថេរភាព សុវត្តិភាព និងសន្តិសុខ ដែលជាមូលដ្ឋានចម្បងក្នុងការធានាឱ្យមានការអភិវឌ្ឍប្រទេសជាតិលើគ្រប់វិស័យ។

លោកនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានថ្លែងកោតសរសើរ​ចំពោះនាយនាវី នាយនាវីរង និងពលនាវិក នៃកងទ័ពជើងទឹក ឈរជើងនៅតាមបណ្តាកោះទាំងអស់ ដែលបានលះបង់កម្លាំងកាយចិត្តបំពេញភារកិច្ចការពារអធិបតេយ្យ បូរណភាពទឹកដី កោះ ឆ្នេរ រួមទាំងការទប់ស្កាត់ និងបង្រ្កាបបទល្មើសនានា សំដៅធានាបាននូវសន្តិសុខ សុវត្ថិភាពលើផ្ទៃសមុទ្រ។

នាយឧត្តមសេនីយ៍ ប្រមុខការពារជាតិ បានផ្តាំដល់កងទ័ពជើងទឹកទាំងអស់ ត្រវប្រកាន់គោលជំហររឹងមាំលើកិច្ចការពារទឹកដី ដោយគោរពឱ្យបាននូវរាល់បទបញ្ជា ច្បាប់ មានសាមគ្គីភាព និងជឿជាក់លើការដឹកនាំរបស់សម្តេចធិបតី ហ៊ុន ម៉ាណែត ជានាយករដ្ឋមន្ត្រី ក្នុងការដឹកនាំប្រទេសជាតិ។

ឈរនៅចំពោះមុខកងកម្លាំង លោកនាយឧត្តមសេនីយ៍ ក៏បានលើកឡើងអំពីគុណតម្លៃសន្តិភាព ដែលកម្ពុជាទទួលបានរហូតមកដល់ពេលនេះ មានតម្លៃ មិនអាចកាត់ថ្លៃបាន ហើយបានធ្វើឱ្យប្រទេសជាតិ មានការអភិវឌ្ឍរីកចម្រើនយ៉ាងឆាប់រហ័ស។ ក្នុងន័យនេះ លោក ជំរុញឱ្យកងទ័ពជើងទឹកត្រូវការពារសន្តិភាពនេះឱ្យបានគង់វង្ស៕

The post រដ្ឋមន្ត្រីការពារជាតិ ផ្ដាំកងទ័ពជើងទឹកបន្តការពារសន្តិសុខផ្ទៃសមុទ្រឱ្យកាន់សកម្ម appeared first on Kampuchea Thmey Daily.

ក្នុងព្រះរាជក្រឹត្យឡាយព្រះហស្ថលេខាថ្ងៃទី១៣ ខែកុម្ភៈ ឆ្នាំ២០២៥ សម្ដេចព្រះនរោត្តម សីហមុនី ត្រាស់បង្គាប់តែងតាំងតាមសេចក្ដីក្រាបបង្គំថ្វាយរបស់សម្ដេចធិបតី ហ៊ុន ម៉ាណែត និងបញ្ជាឱ្យអនុវត្តព្រះរាជក្រឹត្យនេះចាប់ពីថ្ងៃឡាយព្រះហស្ថលេខាតទៅ។

ការតែងតាំងលោក ទៀ សុខា នេះគឺបន្ទាប់ពីឪពុកលោកដែលជាអតីតមេបញ្ជាការទ័ពជើងទឹកលោក ទៀ វិញ ត្រូវបានព្រះមហាក្សត្រសម្រេចតែងតាំងជារដ្ឋលេខាធិការក្រសួងការពារជាតិកាលពីថ្ងៃទី៨ ខែកម្ភៈ។ មុនត្រូវបានតែងតាំងជាមេបញ្ជាការទ័ពជើងទឹក លោក ទៀ សុខា បានកាន់តួនាទីជាមេបញ្ជាការរង និងជាអគ្គលេខាធិការរងនៃគណៈកម្មការជាតិសន្ដិសុខលម្ហសមុទ្រ៕

អត្ថបទដោយ ហ៊ុន សិរីវឌ្ឍន៍

The post លោក ទៀ សុខា ឡើងជាមេទ័ពជើងទឹកបន្តពីឪពុក appeared first on Kampuchea Thmey Daily.

លោកនាយឧត្តមសេនីយ៍ ទៀ សីហា ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ លើកឡើងថា រាជរដ្ឋាភិបាលកម្ពុជា នីតិកាលទី៧នេះ បានបន្តជំរុញការកែទម្រង់កងយោធពលខេមរភូមិន្ទ ធ្វើយ៉ាងណាលើកកម្ពស់ការកសាងបណ្តុះបណ្តាលធនធានមនុស្ស និងការអភិវឌ្ឍសមត្ថភាពកងទ័ពប្រកបដោយវិជ្ជាជីវៈ និងស្មារតីទទួលខុសត្រូវខ្ពស់។

ចំពោះកងទ័ពជើងទឹក នាយឧត្តមសេនីយ៍ ទៀ សីហា បានបញ្ជាក់ថា ការកំណែទម្រង់ និងការធ្វើទំនើបកម្ម ត្រូវតែធ្វើទន្ទឹមគ្នា ព្រោះថាលក្ខណពិសេសរបស់កងទ័ពជើងទឹក គឺតម្រូវការផ្នែកសម្ភារៈគ្រឿងបំពាក់ និងយុទ្ធោបករណ៍មានគ្រប់កម្រិត គ្រប់ផ្នែក និងមិនអាចខ្វះបានក្នុងការបំពេញភារៈកិច្ចរបស់ខ្លួន។ ការគូសបញ្ជាក់របស់លោកនាយឧត្តមសេនីយ៍ ឧបនាយករដ្ឋមន្ត្រី រដ្ឋមន្ត្រីការពារជាតិ បានធ្វើឡើងក្នុងគ្រាអញ្ជើញជាអធិបតីភាពក្នុងពិធីបិទសន្និបាតការងារប្រចាំឆ្នាំរបស់កងទ័ពជើងទឹក កាលពីរសៀលថ្ងៃទី២២ ខែមករា ឆ្នាំ២០២៥ នៅទីបញ្ជាការដ្ឋានកងទ័ពជើងទឹក។

លោកនាយឧត្ដមសេនីយ៍ ទៀ សីហា ក៏បានផ្ដាំដល់កងទ័ពជើងទឹកយកចិត្តទុកដាក់លើការងារគ្រប់គ្រង ថែទាំ ជួសជុលលក្ខណៈបច្ចេកទេសរបស់នាវា អូប័រ រថយន្ត និងគ្រឿងបំពាក់ដទៃទៀត សំដៅធានាបម្រើសកម្មភាពល្បាត សកម្មភាពហ្វឹកហ្វឺន សកម្មភាពដឹកជញ្ជូន និងសកម្មភាពសង្គ្រោះផ្សេងៗឱ្យបានទាន់ពេលវេលា។

ភ្ជាប់នឹងការណែនាំខាងលើ ប្រមុខការពារជាតិកម្ពុជា បានកោតសរសើរ និងវាយតម្លៃខ្ពស់ចំពោះកងទ័ពជើងទឹក ដែលសម្រេចបានស្នាដៃជាច្រើន ពិសេសបានចូលរួមចំណែកយ៉ាងសកម្មក្នុងការការពារសន្តិសុខ សហការពង្រឹងការអនុវត្តច្បាប់ បង្ក្រាបបទល្មើសនានាលើផ្ទៃសមុទ្រ និងតាមតំបន់ជាប់សមុទ្រ ដូចជា ការនេសាទខុសច្បាប់ ការជួញដូរ ផលិត ដឹកជញ្ជូន ចែកចាយគ្រឿងញៀនខុសច្បាប់ សកម្មភាពល្មើសសេចក្ដីសម្រេចរបស់អង្គការសហប្រជាជាតិ អំពើជួញដូរមនុស្ស បទល្មើសធនធានធម្មជាតិ ជាដើម។

ពីវេទិកានេះ នាយឧត្តមសេនីយ៍ ទៀ សីហា ក៏មិនភ្លេចលើកឡើងពីគុណតម្លៃនៃសុខសន្តិភាព ដែលថ្នាក់ដឹកនាំជំនាន់មុនរកបានយ៉ាងលំបាក។ នាយឧត្តមសេនីយ៍ បញ្ជាក់ថា ក្រោមម្លប់សន្តិភាព កម្ពុជានៅតែបានអាចចូលរួមបានក្នុងដំណើរអភិវឌ្ឍន៍សេដ្ឋកិច្ចជាតិ និងរក្សាបានយ៉ាងរឹងមាំស្ថិរភាពនយោបាយ សន្តិសុខសណ្ដាប់ធ្នាប់សាធារណៈ និងសុវត្ថិភាពសង្គម ទោះបីត្រូវប្រឈមនឹងសភាពការណ៍អន្តរជាតិ និងសភាពការណ៍ក្នុងប្រទេស ដែលបណ្ដាលមកពីការប៉ុនប៉ងញុះញង់ ក្នុងគោលបំណងផ្តួលរំលំរាជរដ្ឋាភិបាលស្របច្បាប់ តាមរយៈការធ្វើបដិវត្តន៍ពណ៌ ពីសំណាក់ក្រុមនិន្នាការជ្រុលនិយម ក្នុង និងក្រៅប្រទេសខ្លះក៏ដោយ។

លោក បានអះអាងថា ឧបាយកលទាំងនោះ ត្រូវបានបរាជ័យទាំងស្រុង ដោយសារប្រជាពល មន្ត្រីរាជការ និងកងកម្លាំងប្រដាប់អាវុធ ជាពិសេសកងយោធពលខេមរភូមិន្ទ  បានការគាំទ្រយ៉ាងពេញទំហឹងចំពោះការដឹកនាំដ៏ត្រឹមត្រូវរបស់រាជរដ្ឋាភិបាល និងបានថ្កោលទោសប្រឆាំងដាច់ខាតរាល់អំពើទុច្ចរិត និងខុសច្បាប់របស់ពួកអ្នកនយោបាយជ្រុលនិយមទាំងនោះ៕

ដោយ៖ ធឿន វ៉ាន់សុង

The post ប្រមុខការពារជាតិ ថា ការធ្វើទំនើបកម្មលើគ្រឿងយុទ្ធោបករណ៍ ជាតម្រូវការចាំបាច់របស់ទ័ពជើងទឹក appeared first on Kampuchea Thmey Daily.