សិក្ខាកាមយោធាកម្ពុជាម្នាក់ទៀត បានបញ្ចប់ការសិក្សាវគ្គនាយទាហានជើងទឹក នៅអូស្ត្រាលី

នៅថ្ងៃទី១២ ខែមិថុនា ឆ្នាំ២០២៥នេះ សិក្ខាកាមយោធាកម្ពុជាម្នាក់ទៀតហើយ បានទទួលសញ្ញាបត្របញ្ចប់ការសិក្សាវគ្គនាយទាហានជើងទឹក នៃមហាវិទ្យាល័យកងទ័ពជើងទឹក ប្រទេសអូស្ត្រាលី។

តាមការបញ្ជាក់របស់កងទ័ពជើងទឹក លោកអនុនាវីត្រី កែវ ចាន់ប៊ីលី ជាសិក្ខាកាមទី២ តំណាងឱ្យកងទ័ពជើងទឹកកម្ពុជា បន្ទាប់ពីអនុនាវីទោ ទៀ សុធីរដ្ឋា ដែលបានទទួលសញ្ញាបត្របញ្ចប់ការសិក្សាវគ្គនាយទាហានចូលថ្មី នៃមហាវិទ្យាល័យកងទ័ពជើងទឹកអូស្ត្រាលី នៅ HMAS Creswell Jervis Bay NSW ប្រទេសអូស្ត្រាលី។ បន្ទាប់ពីបញ្ចប់វគ្គនាយទាហានចូលថ្មីនេះ លោកអនុនាវីត្រី កែវ ចាន់ប៊ីលី នឹងបន្តចូលសិក្សាវគ្គនាយទាហានប្រយុទ្ធលម្ហសមុទ្រ និងការអនុវត្តផ្ទាល់លើនាវា(Maritime warfare officer course) នៅថ្ងៃទី៣ ខែកក្កដា ឆ្នាំ២០២៥ខាងមុខនេះ នៅ HMAS Waston, Waston Bay, NSW ប្រទេសអូស្ត្រាលី។

លោកស្រីឧត្តមនាវីត្រី ទៀ លក្ខិណា ប្រធានក្រុមការងារយេនឌ័រកងទ័ពជើងទឹក ដែលជាម្តាយរបស់លោកអនុនាវីត្រី កែវ ចាន់ប៊ីលី បានសម្ដែងក្ដីសប្បាយរីករាយ តាមរយៈសំណេររៀបរាប់បែបនេះថា៖ «ថ្ងៃនេះបានមកជួបកូនប្រុសម្ដាយហើយ មានសេចក្ដីសុខបំផុត ពេលបានមកដល់ ជូនពរកូនប្រុសបានទទួលសញ្ញាប័ត្របញ្ចប់ការសិក្សាវគ្គនាយទាហានកងទ័ពជើងទឹកអូស្រ្តាលី នៅមហាវិឡាល័យកងទ័ពជើងទឹកអូស្រ្តាលី HMAS Creswell»៕