លោក ឃុន ឃា អាយុ៤៤ឆ្នាំប្រជាពលរដ្ឋមកពីខេត្តព្រៃវែងបាននិយាយថា បាតុកម្មនេះជាអំពើបោកប្រាស់ ញុះញង់របស់ក្រុមជ្រុលនិយម ប៉ះពាល់ដល់សន្តិសុខប្រទេសកូរ៉េ និងអាប់ឱនដល់កិត្តិយសជាតិ។

លោកថា៖ «ខ្ញុំមិនគាំទ្របាតុកម្មទេ បើយើងជាពលរដ្ឋខ្មែរ ហើយទៅធ្វើការងារនៅប្រទេសកូរ៉េ យើងធ្វើបាតុកម្មនៅលើទឹកដីគេ គឺធ្វើឱ្យខូចសណ្ដាប់ធ្នាប់ប្រទេសគេ ប៉ះសន្ដិសុខស្រុកគេ គឺអាប់ឱនកិត្តិយសជាតិយើង។ បើយើងបានការងារល្អធ្វើហើយ នាំគ្នាខំប្រឹងធ្វើការងារទៅ កុំនាំគ្នាទៅធ្វើបាតុកម្ម»។

លោក វ័ន សុភ័ក្ដ្រ អាយុ៣៩ឆ្នាំប្រជាពលរដ្ឋមកពីខេត្តកណ្ដាលបានជំរុញឱ្យជាពលរដ្ឋ និងពលករខ្មែរនៅកូរ៉េ គួរតែបញ្ឈប់ការធ្វើបាតុកម្ម ព្រោះក្រុមអ្នកធ្វើបាតុកម្មនោះមិនបានឆ្លុះបញ្ចាំងពីឆន្ទៈពលរដ្ឋខ្មែរចង់បាននោះទេ។ លោក និងពលរដ្ឋដទៃទៀតមិនពេញចិត្តនឹងសកម្មភាពធ្វើបាតុកម្មនោះទេ ព្រោះមិនចង់ឃើញអស្ថិរភាពនយោបាយកើតឡើងនៅក្នុងសង្គមកម្ពុជា។

លោកថា៖ «ខ្ញុំមិនគាំទ្របាតុកម្មទេ ព្រោះបាតុកម្មនៅលើស្រុកទេសគេបែបនេះ ធ្វើឱ្យប្រទេសជាតិយើងបាត់បង់កិត្តិយស ហើយបរទេសនឹងមើលមកយើងថា ជាតិខ្មែរមិនសាមគ្គីគ្នា គឺបាតុកម្មប្រឆាំងតែជាមួយរាជរដ្ឋាភិបាលខ្លួនឯង និងបង្កបញ្ហាផ្សេងៗនៅក្នុងសង្គមជាតិ»។

ពលរដ្ឋជាច្រើននាក់ផ្សេងទៀតក៏បានបញ្ចេញយោបល់ស្រដៀងៗគ្នានោះផងដែរក្នុងន័យ​ មិនគាំទ្រចំពោះបាតុកម្មដែលធ្វើឡើងនេះ និងជារឿងដែលមិនបានផ្ដល់ប្រយោជន៍ជូនជាតិនោះទេ។ ​

ចំណែកអ្នកស្រី សឿន ណារិន អាយុ៣៣ឆ្នាំ ប្រជាពលរដ្ឋមកពីខេត្តតាកែវបាននិយាយថា៖ «ខ្ញុំមិនចូលចិត្តបាតុកម្មទេ ព្រោះវាជាកត្តាដែលរារាំងដល់ដំណើរការអភិវឌ្ឍប្រទេសជាតិយើង បើយើងមួយថ្ងៃៗគិតតែពីធ្វើបាតុកម្ម គឺយើងគ្មានពេលវេលាធ្វើការងារ គ្មានការអភិវឌ្ឍសមត្ថភាព និងគ្មានការងារល្អសមរម្យសម្រាប់រកលុយកាក់ចិញ្ចឹមជីវិតនោះទេ»។

អ្នកស្រី អ៊ួន សៅនី អាយុ ២៤ឆ្នាំប្រជាពលរដ្ឋរស់នៅភ្នំពេញបាននិយាយថា៖ «បាតុកម្ម គឺមិនមែនជាដំណោះស្រាយសម្រាប់ប្រទេសជាតិនោះទេ ហើយវាក៏មិនអាចធ្វើឱ្យប្រទេសជាតិរីកចំរើនដែរ។ ក្នុងនាមយើងជាយុវជន ខិតខំប្រឹងប្រែងធ្វើការងារ ពង្រឹងសមត្ថភាព ហើយមានពេលវេលាសម្រាកឱ្យបានច្រើន ដើម្បីមានកម្លាំងប្រកបការងារផ្សេងៗទៀត»។

ចំណែកលោក ផល ចិត្រា អាយុ ៤៥ឆ្នាំ ប្រជាជនមកពីខេត្តព្រែវែងបាននិយាយថា៖ «ខ្ញុំក៏អត់គាំទ្រសកម្មភាពបាតុកម្មដែរ ព្រោះបាតុកម្មរបស់ក្រុមប្រឆាំងជ្រុលនិយមនៅក្រៅប្រទេស ធ្វើឡើងដើម្បីតែអុចអាល បោកប្រាស់ បំភ្លៃការពិតពីកម្ពុជា ធ្វើឱ្យមានការស្អប់ខ្ពើមភាន់ច្រឡំមកលើការដឹកនាំដ៏ត្រឹមត្រូវរបស់រាជរដ្ឋាភិបាលក្នុងការកសាងអភិវឌ្ឍប្រទេសជាតិ»។

អ្នកស្រី សាន ស្រីអូន អាយុ ២៣ឆ្នាំ ប្រជាពលរដ្ឋរស់នៅភ្នំពេញបាននិយាយថា៖ «ខ្ញុំមិនគាំទ្របាតុកម្មទេ គឺស្អប់ខ្ពើមការធ្វើបាតុកម្ម ព្រោះទម្រាំតែយើងបានដើរមកដល់ចំណុចនេះ គឺមានការខិតខំប្រឹងប្រែងយ៉ាងខ្លាំងពីថ្នាក់ដឹកនាំយើង ជាពិសេសសម្ដេចតេជោ ហ៊ុន សែន និងសម្ដេចបវរធិបតី ហ៊ុន ម៉ាណែត ដើម្បីកសាងប្រទេសជាតិយើងឱ្យរីកចំរើន»។

គួររំឭកផងដែរថា បាតុកម្មនៅក្រៅប្រទេសដឹកនាំដោយទណ្ឌិតរត់ចោលស្រុក គឺដើម្បីបម្រើតែប្រយោជន៍បក្ខពួកខ្លួន បំបែកបំបាក់សាមគ្គីជាតិខ្មែរទាំងក្នុង និងក្រៅប្រទេសមានបំណងផ្តួលរំលំរដ្ឋាភិបាលស្របច្បាប់។ នេះជាចេតនាចង់បំផ្លាញកម្ពុជា ពោលគឺពួកប្រឆាំងជ្រុលនិយមធ្វើនយោបាយចងគំនុំ និងមិនដែលធ្វើសកម្មភាពណាមួយ ដើម្បីប្រយោជន៍ជាតិឡើយ ក្រៅតែពីបំផ្លាញផលប្រយោជន៍ជាតិខ្មែរ។

ពួកគេមានបំណងបំផ្លាញសេចក្តីសុខរបស់ប្រជាជនខ្មែរដែលកំពុងតែរស់នៅក្នុងសុខសន្តិភាព និងការអភិវឌ្ឍន៍។ ដូចនេះពលរដ្ឋខ្មែរនៅក្នុងស្រុកបានថ្កោលលទោសចំពោះការបាតុកម្មក្រៅប្រទេសរបស់ក្រុមប្រឆាំងជ្រុលនិយម ដែលចង់បំផ្លាញផលប្រយោជន៍ជាតិ និងបំផ្លាញសេចក្តីសុខរបស់ប្រជាពលរដ្ឋខ្មែរជាង ១៧លាននាក់៕

The post ពលរដ្ឋមួយចំនួនចាត់ទុកការធ្វើបាតុកម្មនៅកូរ៉េជាការបំផ្លាញក្ដីសុខពលរដ្ឋ និងកិត្តិយសប្រទេសកម្ពុជា appeared first on Kampuchea Thmey Daily.

តើបាតុកម្មរបស់ក្រុមជ្រុលនិយមមួយក្ដាប់តូចនៅកូរ៉េដែលរៀបចំដោយអតីតបក្សប្រឆាំង អាចតំណាងឱ្យឆន្ទៈពលរដ្ឋខ្មែរនៅកូរ៉េដែរឬទេ?

លោក ថុង ម៉េងដាវីត អ្នកវិភាគភូមិសាស្ត្រនយោបាយ និងសន្ដិសុខបានថ្លែងថា «ខ្ញុំគិតថា មិនអាចទេ ព្រោះប្រជាពលរដ្ឋខ្មែរសរុបប្រមាណជាង ៦ម៉ឺននាក់ដែលកំពុងធ្វើការងារ ស្នាក់នៅ និងសិក្សានៅកូរ៉េ ប៉ុន្ដែបើយើងក្រឡេចមើលសកម្មភាពអ្នកចូលរួមបាតុកម្មកន្លងមក គឺប្រហែលជាខ្ទង់ជាង ១០០នាក់ទេ ហើយក្នុងចំណោមនោះភាគច្រើន គឺជារចនាសម្ព័ន្ធដឹកនាំរបស់ក្រុមប្រឆាំងតែប៉ុណ្ណោះ»។

លោក​បន្ត​ថា «ចំណែកប្រជាពលរដ្ឋខ្មែរដ៏ច្រើនលើសលុបមិនបានចូលរួមបាតុកម្មទេ ព្រោះពួកគេជឿជាក់លើដំណោះស្រាយរបស់រាជរដ្ឋាភិបាល ហើយខ្លះទៀតមិនចាប់អារម្មណ៍នឹងបាតុកម្មនោះទៅទៀត។ ដូច្នេះខ្ញុំអាចនិយាយបានថា បាតុកម្មនៅកូរ៉េ មិនអាចយកមកធ្វើជាតំណាងពលរដ្ឋខ្មែរដ៏ច្រើនលើសលុបនៅកូរ៉េបានទេ ហើយក៏មិនឆ្លុះបញ្ចាំងពីឆន្ទៈរបស់ពលរដ្ឋខ្មែរដែរ»។

អ្នកវិភាគរូបនេះបន្តថា បាតុកម្មនៅកូរ៉េដែលរៀបចំដោយក្រុមជ្រុលនិយមនោះ គឺជាលេសនយោបាយសុទ្ធសាធ ប៉ុន្ដែពួកគេប្រើរូបភាពទាមទារឱុ្យរាជរដ្ឋាភិបាលប្ដឹងថៃទៅតុលាការអន្តរជាតិ IJC ដើម្បីតវ៉ាទាមទារកោះគុតមកវិញ។ បាតុកម្មនេះ គឺ​ជា​សេណារ៉េយូ​របស់​ពួក​គេ​ដែលតាំងខ្លួនជាអ្នកស្នេហាទឹកដី ស្រលាញ់ជាតិ និងស្អប់អំពើអយុត្តិធម៌ផ្សេងៗ ប៉ុន្ដែបង្កប់ដោយល្បិចកលសម្រាប់អូសទាញពលរដ្ឋឱ្យចូលរួមបាតុកម្ម។

ចំណែកលោក សំ សឿន អ្នកឃ្លាំមើល​ការ​អភិវឌ្ឍន៍សង្គម និងនយោបាយបានថ្លែងថា «ខ្ញុំគិតថា បាតុកម្មរបស់ក្រុមជ្រុលនិយមនៅកូរ៉េនេះ មិនបានឆ្លុះបញ្ចាំងឆន្ទៈពលរដ្ឋខ្មែរមួយនគរបានទេ ហើយក៏មិនមែនជាការចង់បានរបស់ពលរដ្ឋខ្មែរនៅកូរ៉េដែរ ព្រោះបុគ្គលដែលរៀបចំផែនការបាតុកម្ម គឺជាក្រុមជ្រុលនិយម និងជាដៃ ជើង រចនាសម្ព័ន្ធក្រុមប្រឆាំងខុសច្បាប់ប៉ុណ្ណោះ»។

លោក​បន្ត​ថា ក្រុម​ជ្រុល​និយមទាំងនោះនៅតែប្រឹងប្រែងកៀរគរពលរដ្ឋខ្មែរ​បង្កចលាចលនៅលើទឹកដីបរទេស បង្កការរំខានការបំពេញការងាររបស់ពលករ និង​សិស្សនិស្សិតនៅទីនោះ។ ជា​ពិសេស​ពួក​គេ​កំពុងធ្វើឱ្យខូចកិត្តិយសជាតិខ្មែរនៅលើឆាកអន្តរជាតិ និងធ្វើឱ្យជាតិសាសន៍ដទៃមើលងាយជាតិសាសន៍ខ្មែរដែលមិនចេះរួបរួមសាមគ្គីគ្នា ក៏ដូចជាបាតុកម្មប្រឆាំងនឹងរាជរដ្ឋាភិបាលខ្លួនឯងផងដែរ។

អ្នកឃ្លាំមើលរូបនេះបានសង្កត់ធ្ងន់លើការអំពាវនាវឱ្យពលរដ្ឋនៅក្រៅប្រទេសទៅធ្វើបាតុកម្ម គឺជាការរៀបចំដោយក្រុមជ្រុលនិយមមាននិន្នាការប្រឆាំងជាមួយរាជរដ្ឋាភិបាល ក្រោម​ការ​ញុះញង់​របស់​អ្នក​នយោបាយ​ក្រៅ​ស្រុក គ្រាន់តែជាឆាកល្ខោននយោបាយ ដើម្បីបំផ្លាញសុខសន្តិភាព និងប្រជាជនក្នុងការបង្កើតឱ្យមានភាពវិកវរក្នុងសង្គម ទាញកម្ពុជាឱ្យធ្លាក់ទៅក្នុងសង្គ្រាមប៉ុណ្ណោះ។

លោកបានអំពាវនាវដល់ប្រជាពលរដ្ឋកុំទៅធ្វើបាតុកម្មតាមការញុះញង់ ដើម្បីបំពេញមហិជ្ជតារបស់ក្រុមប្រឆាំងជ្រុលនិយមនៅក្រៅស្រុក និងជំរុញ​ឱ្យ​មាន​ការ​ទប់ស្កាត់ការប៉ុនប៉ងបំផ្លាញសន្តិភាព និង​ការ​អភិវឌ្ឍន៍តាមរូបភាពមិនត្រឹមត្រូវ​មកលើរាជរដ្ឋាភិបាលស្របច្បាប់ដែលកើតចេញពីការបោះឆ្នោតត្រឹមត្រូវ និងយុត្តិធម៌។

លោក​បាន​បញ្ជាក់​ជំហរ​ច្បាស់លាស់សារជាថ្មី​នៅតែបន្តគាំទ្រ​យ៉ាងពេញទំហឹង​ទៅលើរាជរដ្ឋាភិបាលកម្ពុជា​ដែល​កំពុងដឹកនាំ​នៅ​លើគន្លងផ្លូវដ៏ត្រឹមត្រូវ ប្រកបដោយសុខសន្តិភាព និងការអភិវឌ្ឍន៍លើគ្រប់វិស័យដែលមានសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្រ្តីបច្ចុប្បន្ននេះ៕

The post តើបាតុកម្មដែលរៀបចំដោយពលករមួយក្ដាប់តូចនៅកូរ៉េ អាចតំណាងឱ្យពលរដ្ឋខ្មែរនៅកូរ៉េដែរឬទេ? appeared first on Kampuchea Thmey Daily.

អ្នកវិភាគភូមិសាស្ត្រនយោបាយនៅកម្ពុជា លោកបណ្ឌិត យង់ ពៅ បានលើកឡើងថា ការធ្វើបាតុកម្មពីក្រៅប្រទេសដើម្បីផ្តួលរំលំរាជរដ្ឋាភិបាលជាការនាំឱ្យប្រទេសជាតិច្របូកច្របល់វិលចូលសង្គ្រាមស៊ីវិលឡើងវិញ បើសិនជាបដិវត្តនោះបានសម្រេច។ មួយវិញទៀត សកម្មភាពផ្តួលរំលំតាមបែបបដិវត្តពណ៌នេះ មានន័យថា ក្រុមប្រឆាំងមានចារិកនយោបាយមិនគាំទ្រការដឹកនាំតាមបែបប្រជាធិបតេយ្យ។ 

លោកសង្កត់ធ្ងន់ថា៖«នេះជាអ្វីដែលនាំឱ្យប្រទេសច្របូកច្របល់ កើតមានកលិយុគឡើងវិញ កើតសង្គ្រាមស៊ីវិលឡើងវិញ ដូចដែលខ្ញុំលើកឡើងខាងដើម ប៉ុន្តែទោះយ៉ាងណារាជរដ្ឋាភិបាលត្រូវតែមានកាតព្វកិច្ចការពារនូវសមិទ្ធផលទាំងឡាយ ការពារនូវលទ្ធិប្រជាធិបតេយ្យ របស់ព្រះរាជាណាចក្រកម្ពុជា ការពារច្បាប់រដ្ឋធម្មនុញ្ញ មិនអាចឱ្យការធ្វើបាតុកម្មហ្នឹងបានជោគជ័យទេ»។

ជាមួយគ្នានេះ ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា លោកបណ្ឌិត គិន ភា លើកឡើងថា សកម្មភាពរបស់ក្រុមឧទ្ទាមជ្រុលនិយម ដែលបំភ្លៃការពិតដើម្បីអូសទាញពលករធ្វើបាតុកម្មក្រៅប្រទេសនោះ មានបំណងធំៗ២ គឺទី១ ដើម្បីប្រមូលលុយសម្រាប់ជាប្រយោជន៍របស់ក្រុមខ្លួន ចំណែកទី២គឺធ្វើបដិវត្តន៍ពណ៌ផ្តួលរំលំរាជរដ្ឋាភិបាលស្របច្បាប់ ដែលកើតចេញពីឆន្ទៈរបស់ពលរដ្ឋដោយការបោះឆ្នោត។

បណ្ឌិត គិន ភា សង្កត់ធ្ងន់យ៉ាងដូច្នេះ៖«ចំណុច២ហ្នឹងគឺគ្រាប់គ្រាន់ ដែលអាចនិយាយថាពួកនេះក្បត់ទាំងប្រយោជន៍ប្រជាជន ក្បត់ទាំងប្រយោជន៍ជាតិ ដែលដើរបញ្ច្រាសចរន្តនៃដំណើរការប្រជាធិបតេយ្យភាវូបនីយកម្ម។ប្រសិនបើគេនិយាយពីការផ្លាស់ប្តូរ នៅក្នុងសង្គមប្រជាធិបតេយ្យ គេអត់អាចប្រើកម្លាំងបះបោរ ឬការបង្កចលាចល ឬក៏ការអំពាវនាវកងកម្លាំងប្រដាប់អាវុធ ឱ្យផ្តួលរំលំរដ្ឋាភិបាលទេ គេត្រូវតែធ្វើការផ្លាស់ប្តូរតាមរយៈសន្លឹកឆ្នោត»។

តាមលោក​ គិន ភា  សម្រាប់ពលរដ្ឋមួយចំនួនដែលជ្រុលខ្លួនលង់ជឿតាមការអូសទាញ របស់ក្រុមជ្រុលនិយមគួរប្រញាប់ដកខ្លួនចេញវិញ ដើម្បីសេចក្តីសុខខ្លួនឯង ក្រុមគ្រួសារ និងសង្គមជាតិទាំងមូល ពីព្រោះថា ក្រុមប្រឆាំងជ្រុលនិយមទាំងនោះគ្មានបំណងនាំមកនូវប្រជាធិបតេយ្យ ការអភិវឌ្ឍ និងសុខសន្តិភាពសម្រាប់ប្រទេសជាតិនោះទេ។

ចំណែក អ្នកស្រាវជ្រាវ និងជាអ្នកទស្សនៈវិជ្ជា នៃរាជបណ្ឌិត្យសភាកម្ពុជា លោកបណ្ឌិត ឈត ប៊ុនថង ថ្លែងថា ការធ្វើបាតុកម្មអហិង្សា គឺជាសិទ្ធិពលរដ្ឋដែលមានចែងក្នុងច្បាប់ ប៉ុន្តែបើការធ្វើបាតុកម្ម ឬកូដកម្មនោះប្រែក្លាយពីបាតុកម្មស្របច្បាប់ ទៅបដិវត្តពណ៌ផ្តួលរំលំរដ្ឋាភិបាល បង្កចលាចលធ្វើឱ្យសង្គមវឹកវរនោះ គឺជារឿងខុសច្បាប់ ដែលអាជ្ញាធរមានសិទ្ធិគ្រប់គ្រាន់ក្នុងការបង្ក្រាប។

លោក ឈត ប៊ុន ថង ថ្លែងដូច្នេះ៖«បើអាជ្ញាធរពាក់ព័ន្ធរកឃើញថា កូដកម្មមានបំណងទុច្ចរិត ហើយបំណងនៃបាតុកម្មនោះផ្ទុយពីច្បាប់អនុញ្ញាត អាជ្ញាធរមានសិទ្ធិគ្រប់គ្រាន់នៅក្នុងការបង្ក្រាប មិនអាចធ្វើឱ្យប្រទេសមានចលាចល មានសង្គ្រាមបះបោរ ដូចបណ្តាប្រទេសផ្សេងៗ ដូចជានៅ បង់ក្លាដេស ស៊ីរី លីប៊ីជាដើម»៕

The post អ្នកវិភាគនៅកម្ពុជា មិនគាំទ្រការធ្វើបាតុកម្មនៅកូរ៉េដែលចង់ផ្តួលរំលំរដ្ឋាភិបាលក្រោមលេសCLV appeared first on Kampuchea Thmey Daily.

​គណៈកម្មការ​ប្រយុទ្ធ​នឹង​ជំងឺ​កូ​វីដ​-១៩ ថ្នាក់​រាជធានី​ភ្នំពេញ បានដាក់​ចេញ​ជា​វិធានការ​ជាច្រើន​ដើម្បី​ទប់ស្កាត់​ការឆ្លង​រាលដាល​នៃ​ជំងឺ​កូ​វីដ​-១៩​នេះ ក្នុងនោះ​វិធានការ​ច្បាប់​ដោយ​ផាកពិន័យ​អន្តរការណ៍​ជា​ប្រាក់​ពី ១ ​លាន ដល់ ៥ ​លាន​រៀល ព្រមទាំង​ត្រូវ​ផ្តន្ទាទោស​តាមច្បាប់​ព្រហ្មទណ្ឌ​ជា​ធរមាន​ក៏ត្រូវ​បាន​យកមកអនុវត្ត​ផងដែរ​។​

នេះ​បើ​យោងតាម​សេចក្ដីណែនាំ ស្តីពី​ការចាត់វិធានការ​បន្ទា​ន់​ចំពោះ​ការរកឃើញ​ករ​ណី​វិជ្ជមាន​ជំងឺ​កូ​វីដ​-១៩ មេរោគ​បំប្លែង​ខ្លួន​ថ្មី ប្រភេទ​អូ​មី​ក្នុង ជា​បន្តបន្ទាប់​ក្នុងចំណោម​ក្រុមបាតុករ​អតីត​បុគ្គលិក​ក្រុមហ៊ុន​ណាហ្គា​វើ​ល​ដ៏ ដែល​ក្នុង​សេចក្ដីណែនាំ​នេះ​មានន័យថា​៖ យោង៖ -​សេចក្តីប្រកាស​ព័ត៌មាន​លេខ ០៥៤ សខល ចុះ​ថ្ងៃទី​៤ ខែកុម្ភៈ ឆ្នាំ​២០២២ របស់​ក្រសួងសុខាភិបាល -​សេចក្តីប្រកាស​ព័ត៌មាន​ចុះ​ថ្ងៃទី​៤ ខែកុម្ភៈ ឆ្នាំ​២០២២ របស់​គណៈកម្មការ​ប្រយុទ្ធ​នឹង​ជំងឺ​កូ​វីដ​-១៩ ថ្នាក់​រាជធានី​ភ្នំពេញ​។ ​ក្នុង​រយៈពេល​ប៉ុន្មាន​ថ្ងៃ​ចុង​ក្រោយនេះ បន្ទាប់ពី​ក្រុមគ្រូពេទ្យ​បាន​ចុះ​យក​សំណាក​ក្នុងចំណោម​ក្រុមបាតុករ​អតីត​បុគ្គលិក​ក្រុមហ៊ុន​ណាហ្គា​វើ​ល​ដ៏ ដែល​កំពុង​ប្រមូលផ្តុំ​តវ៉ា សម្ដែង​មតិ​ដោយ​ខុសច្បាប់ នៅលើ​សួនច្បារ សាធារណៈ និង​នៅតាម​ដងផ្លូវ​សាធារណៈ មន្ទីរ​សុខាភិបាល​នៃ​រដ្ឋបាល​រាជធានី​ភ្នំពេញ សហការ​ជាមួយ​ក្រុមគ្រូពេទ្យ និង​ក្រសួងសុខាភិបាល បាន​រកឃើញ​ករណី​វិជ្ជមាន​ជំងឺ​កូ​វីដ​-១៩ មេរោគ​បំប្លែង​ខ្លួន​ថ្មី ប្រភេទ​អូ​មី​ក្រុង ជា​បន្តបន្ទាប់ ដែល​គ្រាន់តែ​ក្នុង​ថ្ងៃទី​៦ ខែ​កុ​ម្ភៈ ឆ្នាំ​២០២២ ៖ មាន​ករ​ណី​វិជ្ជមាន​ថ្មី​រហូតដល់​ទៅ ២៩ នាក់ ជា​ចំនួន​ដ៏​ច្រើន គួរឱ្យ​ព្រួយបារម្ភ​យ៉ាងខ្លាំង​។

​ចំពោះមុខ ដើម្បី​ថែរក្សា​អាយុជីវិត​ក្រុមបាតុករ និង​ក្រុមគ្រួសារ​សាច់ញាតិ ក៏ដូចជា​ដើម្បី​ចៀសវាង​សោកនាដកម្ម​នៃ​ការឆ្លង​រាលដាល​ធ្ងន់ធ្ងរ​ទៅក្នុង​សហគមន៍​ជា​ទ្រង់ទ្រាយ​ធំ ជាពិសេស​ធានាបាន​នូវ​ការរស់នៅ​តាម គន្លង​ប្រក្រតីភាព​ថ្មី គណៈកម្មការ​ប្រយុទ្ធ​នឹង​ជំងឺ​កូ​វីដ​-១៩ ថ្នាក់​រាជធានី​ភ្នំពេញ សូម​ធ្វើ​ការណែនាំ​ដូចខាងក្រោម​៖

១-​មន្ទីរ​សុខាភិបាល​នៃ​រដ្ឋបាល​រាជធានី​ភ្នំពេញ ត្រូវ​ចាត់ចែង​បាញ់ថ្នាំ​សម្លាប់​មេរោគ​ចំពោះ​មធ្យោបាយ ធ្វើដំណើរ និង​ទីតាំង​សាធារណៈ ដែល​ក្រុមបាតុករ​ធ្លាប់បាន​ប្រើប្រាស់ ដូចជា រថយន្តក្រុង​ដែល ក្រុមបាតុករ​ធ្លាប់បាន​ធ្វើដំណើរ​ទៅយក​សំណាក ទីតាំង​ផ្ញើ​ទុកដាក់​យានជំនិះ​រប​ស់​ក្រុមបាតុករ ទីតាំង​ហូប​អាហារ និង​បន្ទប់ទឹក ជាដើម​។​

២-​ចំពោះ​ក្រុមបាតុករ​ដែល​មិនទាន់​ទៅយក​សំណាក ត្រូវ​រួសរាន់​ទៅយក​សំណាក​ដោយ​អនុវត្តតាម ការណែនាំ​របស់​ក្រុមគ្រូពេទ្យ និង​ត្រូវ​ណែនាំ​ដល់​ក្រុមគ្រួសារ​សាច់ញាតិ​-​មិត្តភក្ដិ ដែល​សង្ស័យ​មាន ជាប់​ពាក់ព័ន្ធ​ដោយផ្ទាល់ ឬ ដោយ​ប្រយោល ត្រូវ​អញ្ជើញ​ទៅយក​សំណាក​តេស្ដ​រក​ជំងឺ​កូ​វីដ​-១៩ ជាដាច់ខាត​។​

៣-​ក្រោយពេល​យក​សំណាក​រួច ក្រុមបាតុករ និង​អ្នក​ជាប់​ពាក់ព័ន្ធ​ដោយផ្ទាល់ ឬ ដោយ​ប្រយោល ត្រូវធ្វើ​ច​ត្តា​ឡី​ស័ក​រយៈពេល ៧ ថ្ងៃ និង​ត្រូវ​បញ្ឈប់​នូវ​រាល់​ការប្រមូលផ្តុំ ឬ ការជួបជុំ​ក្រុមគ្រួសារ សាច់ញាតិ​-​មិត្តភក្តិ ដោយ​ត្រូវអនុវត្ត​ឱ្យបាន​ត្រឹមត្រូវ​តាម​វិធាន​សុខាភិបាល​។ ក្នុងករណី​មិន​អនុវត្តតាម​វិធាន​សុខាភិបាល អាជ្ញា​ធរមាន​សមត្ថកិច្ច​នឹង​ចាត់វិធានការ​រដ្ឋបាល ចាត់​បញ្ជូន​បុគ្គល​រឹងរូស ឱ្យទៅ​ធ្វើ​ច​ត្តា​ឡី​ស័ក​នៅ​មណ្ឌល​ច​ត្តា​ឡី​ស័ក​រាជធានី​ភ្នំពេញ (​ព្រែក​ព្នៅ​) ក្នុងនោះ អនុលោម​តាម អនុក្រឹត្យ​លេខ ២៧ អនក្រ​.​បក ចុះ​ថ្ងៃទី​១៨ ខែកុម្ភៈ ឆ្នាំ​២០២១ ស្ដីពី​វិធានការ​ច​ត្តា​ឡី​ស័ក​ដើម្បី ទប់ស្កាត់​ការឆ្លង​រាលដាល​នៃ​ជំងឺ​កូ​វីដ​-១៩ បាន​កំណត់ថា “​បុគ្គល​ដែល​គេច​វេរ​ពី​ការធ្វើ​ច​ត្តា​ឡី​ស័ក ឬ បុគ្គល​ដែល​គេច​ចេញពី​ទីកន្លែង​ធ្វើ​ច​ត្តា​ឡី​ស័ក នឹងត្រូវ​ទទួលពិន័យ​អន្ត​រការ​ណ៍​ជា​ប្រាក់​ពី ១​លាន ដល់ ៥​លាន​រៀល ព្រមទាំង​ត្រូវ​ផ្តន្ទាទោស​តាមច្បាប់​ព្រហ្មទណ្ឌ​ជា​ធរមាន​” ។​

៤– មន្ទីរ​ការងារ និង​បណ្តុះបណ្តាល​វិជ្ជាជីវៈ​រាជធានី​ភ្នំពេញ ត្រូវ​សហការ​ជាមួយ​រដ្ឋបាល​ខណ្ឌ​ទាំង ១៤ ដើម្បី​តាមដាន ឃ្លាំមើល និង​ចាត់វិធានការ​នៅតាម​ទីតាំង​ស្នាក់នៅ​របស់​ក្រុមបាតុករ​អតីត​បុគ្គលិក ក្រុមហ៊ុន​ណាហ្គា​វើ​ល​ដ៏ ក្នុង​មូលដ្ឋាន​នីមួយៗ សំដៅ​ណែនាំ​ដាស់តឿន​ឱ្យ​ពួកគេ និង​អ្នកពាក់ព័ន្ធ ត្រូវ​មក​យក​សំណាក​ឱ្យបាន​ទាន់ពេលវេលា និង​ធ្វើ​ច​ត្តា​ឡី​ស័ក​ឱ្យបាន​ត្រឹមត្រូវ​។​

៥- គណៈបញ្ជាការ​ដឹកនាំ​ការអនុវត្ត​ច្បាប់​នៅ​ថ្នាក់​រាជធានី​ភ្នំពេញ ស្នងការដ្ឋាន​នគរបាល​រាជធានី​ភ្នំពេញ បញ្ជាការដ្ឋាន​កងរាជអាវុធហត្ថ​រាជធានី​ភ្នំពេញ រដ្ឋបាល​ខណ្ឌចំការមន រដ្ឋបាល​ខណ្ឌដូនពេញ និង មន្ទីរ​សុខាភិបាល​នៃ​រដ្ឋបាល​រាជធានី​ភ្នំពេញ ត្រូវ​ចាត់វិធានការ​រដ្ឋបាល និង​វិធានការ​ច្បាប់ ចំពោះ បុគ្គល​ទាំងឡាយណា​ដែល​បន្ត​ការប្រមូលផ្តុំ ឬ ការជួបជុំ​ដោយ​មិន​អនុវត្តតាម​វិធានការ​សុខាភិបាល បង្ក​ការរាំងស្ទះ​ដល់​ការបំពេញ​ការងារ​រប​ស់​ក្រុមគ្រូពេទ្យ និង​អាជ្ញា​ធរមាន​សមត្ថកិច្ច ស្របតាម ច្បាប់​ស្តីពី​វិធានការ​ទប់ស្កាត់​ការឆ្លង​រាលដាល​នៃ​ជំងឺ​កូ​វីដ​-១៩ និង​ជំងឺឆ្លង​កាច​សាហាវ និង​បក​ប ដោយ​គ្រោះថ្នាក់​ធ្ងន់ធ្ងរ​ផ្សេងទៀត និង លិខិតបទដ្ឋាន​គតិយុត្ត​ពាក់ព័ន្ធ​ជា​ធរមាន ក្នុងនោះ មាន ការផាកពិន័យ និង​ទោស​ដាក់ពន្ធនាគារ ដោយ​គ្មាន​ការលើកលែង​ឡើយ​។​

ទ​ទូល​បាន​សេចក្ដីណែនាំ​នេះ នាយក​រដ្ឋបាល​សាលា​រាជធានី​ភ្នំពេញ ស្នងការ​នគរបាល​រាជធានី​ភ្នំពេញ មេបញ្ជាការ​កងរាជអាវុធហត្ថ​រាជធានី​ភ្នំពេញ អភិបាល នៃ​គណៈ​អភិបាលខណ្ឌ​ទាំង​១៤ បធាន​មន្ទីរ​-​អង្គភាព ជំនាញ​ជុំវិញ​រដ្ឋបាល​រាជធានី​ភ្នំពេញ និង​គ្រប់ភាគី​ពាក់ព័ន្ធ ជាពិសេស​ក្រុមបាតុករ​អតីត​បុគ្គលិក​ក្រុមហ៊ុន​ណាហ្គា វើ​ល​ដ៏​ទាំងអស់ ត្រូវ​ចូលរួម​អនុវត្តតាម​ខ្លឹមសារ​នៃ​សេចក្ដីណែនាំ​នេះ ឱ្យមាន​ប្រសិទ្ធភាព និង​ប្រកបដោយ​ស្មារតី ទទួលខុសត្រូវ​ខ្ពស់​៕​

អត្ថបទ៖ ស្រីរ័ត្ន​

The post អាជ្ញាធរនឹងចាត់វិធានការ ចំពោះបាតុករណាហ្គាវើលដ៏ ដែលប្រមូលផ្តុំតវ៉ា ដើម្បីចៀសវាងឆ្លងកូវីដទ្រង់ទ្រាយធំ ក្នុងសហគមន៍ appeared first on Kampuchea Thmey Daily.

មនុស្សប្រមាណ ២០០ នាក់បានប្រមូលផ្តុំគ្នានៅមុខសាកលវិទ្យាល័យអង្គការសហប្រជាជាតិនៅទីក្រុងតូក្យូកាលពីថ្ងៃអាទិត្យ ។ ការជួបជុំនេះត្រូវបានរៀបចំឡើងដោយប្រជាជនកាឈិន (Kachin) ដែលរស់នៅក្នុងប្រទេសជប៉ុន ខណៈជនមូស្លីមរ៉ូហ៊ីងយ៉ាប្រមាណ ៣០ នាក់មកពីប្រទេសមីយ៉ាន់ម៉ាក៏បានចូលរួមផងដែរ ។

ប្រទេសមីយ៉ាន់ម៉ាគឺជាប្រទេសពហុជាតិសាសន៍ដែលមានជាង ១៣០ ក្រុម ។ ប្រជាជនមូស្លីមរ៉ូហ៊ីងយ៉ាជាច្រើនបានភៀសខ្លួនពីការគៀបសង្កត់ដោយយោធាមីយ៉ាន់ម៉ាក្នុងប៉ុន្មានឆ្នាំថ្មីៗនេះ ។

កងកម្លាំងសន្តិសុខ និងប៉ូលិសបានបើកការបាញ់ប្រហារម្តងហើយម្តងទៀតទៅលើក្រុមអ្នកតវ៉ាប្រឆាំងរដ្ឋប្រហារនៅទូទាំងប្រទេសមីយ៉ាន់ម៉ា ។ ប្រព័ន្ធផ្សព្វផ្សាយក្នុងស្រុករាយការណ៍ថាយ៉ាងហោចណាស់មនុស្ស ១០ នាក់ត្រូវបានសម្លាប់នៅថ្ងៃសៅរ៍ ខណៈកាលពីថ្ងៃអាទិត្យមានអ្នកស្លាប់រហូតដល់ ៣៨ នាក់ ។

ចំនួននេះបានបណ្តាលឲ្យមានអ្នកស្លាប់ពីអំពើហិង្សារបស់យោធាឡើងដល់ជាង ៨០ នាក់ដោយផ្អែកលើតួលេខដែលប្រកាសដោយអង្គការសហប្រជាជាតិកាលពីថ្ងៃព្រហស្បតិ៍សប្តាហ៍មុន ។

អ្នកចូលរួមក្នុងការតវ៉ាថ្ងៃអាទិត្យនៅទីក្រុងតូក្យូបានអំពាវនាវឲ្យសហគមន៍អន្តរជាតិគាំទ្រក្រុមអ្នកតវ៉ានៅមីយ៉ាន់ម៉ា ។ ពួកគេបានលើកបដាដោយសួរថា “តើមានសាកសពប៉ុន្មាននាក់ទៀត” និង “អង្គការសហប្រជាជាតិចាំបាច់ត្រូវចាត់វិធានការ” ។

អនុប្រធានសមាគមជនជាតិរ៉ូហ៊ីងយ៉ាភូមានៅប្រទេសជប៉ុនលោក Aung Tin បានប្រាប់សារព័ត៌មាន NHK ថា លោកបានចូលរួមក្នុងការតវ៉ាក្នុងនាមជាពលរដ្ឋមីយ៉ាន់ម៉ាដោយជំនះភាពខុសគ្នាខាងសាសនា និងជនជាតិក្នុងការខិតខំប្រឹងប្រែងដើម្បីស្តារលទ្ធិប្រជាធិបតេយ្យនៅក្នុងប្រទេស ហើយលោកបានជំរុញឲ្យប្រទេសជប៉ុនគាំទ្រការតវ៉ានៅក្នុងប្រទេសមីយ៉ាន់ម៉ា ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មនុស្សច្រើនបំផុតស្លាប់ក្នុងការប្រយុទ្ធគ្នារវាងយោធានិងបាតុករមីយ៉ាន់ម៉ា ម្សិលមិញ

ចុចអាន ៖ ប៉ូលិសមីយ៉ាន់ម៉ាបន្តសម្រុកទៅប្រទេសឥណ្ឌាច្រើនឡើងៗ

The post ក្រុមជនជាតិភាគតិចមីយ៉ាន់ម៉ាចេញធ្វើបាតុកម្មនៅទីក្រុងតូក្យូ appeared first on Kampuchea Thmey Daily.