យោងតាមរបាយការណ៍ថ្មីៗនេះ នាយកដ្ឋានប៉ូលិសយុត្តិធម៌ពិសេសនៃការិយាល័យគយក្រុងសេអ៊ូលបានបើកសវនាការជាផ្លូវការលើលោក Baek ពាក់ព័ន្ធនឹងភាពមិនប្រក្រតីនៃការនាំចូលឧបករណ៍ចម្អិនអាហារ ដែល​នាំ​ចូល​ពី​ប្រទេស​ទួរគី។

នៅក្នុងវីដេអូផ្សព្វផ្សាយសម្រាប់ «Yesan Beer Festival in August 2023′, Baek ផ្ទាល់បាននិយាយថា​«ប្រសិនបើឧបករណ៍ទាំងនោះនៅតែមានម៉ូទ័រអេឡិចត្រិច ឬគ្រឿងបន្លាស់ ដំណើរការគយកាន់តែស្មុគស្មាញ ដូច្នេះខ្ញុំបានស្នើឲ្យពួកគេដកផ្នែកទាំងនោះចេញ»។

យ៉ាងណាមិញ លោក Baek និងហាងអាហារ The Born Korea បច្ចុប្បន្នកំពុងស្ថិតក្រោមការស៊ើបអង្កេតរបស់ប៉ូលិស សម្រាប់ការចោទប្រកាន់ជាច្រើនផ្សេងទៀត រួមទាំងការរំលោភលើស្លាកសញ្ញាប្រភពដើម ច្បាប់ស្តីពីស្លាកសញ្ញា និងពាណិជ្ជកម្មអាហារ ច្បាប់គ្រប់គ្រងអនាម័យផលិតផលបសុសត្វ និងច្បាប់ស្តីពីដីស្រែចម្ការ។

គួរកត់សម្គាល់ថា រោងចក្រ Baekseok នៅ Yesan, Chungcheongnam-do ដែលត្រូវបានគេរាយការណ៍ថាបានបំពានច្បាប់ដីស្រែចម្ការត្រូវបានបិទជាផ្លូវការនៅថ្ងៃទី ៣០ ខែមិថុនា។ វាបានបង្កឲ្យមានការសង្ស័យនៃការបំផ្លាញភស្តុតាងដែលអាចកើតមាន។ ជាការឆ្លើយតប The Born Korea បាននិយាយថា ការបិទនេះគឺសម្រាប់គោលបំណងត្រួតពិនិត្យគុណភាព ហើយពួកគេនឹងសហការយ៉ាងពេញលេញជាមួយនឹងការស៊ើបអង្កេតច្បាប់ស្តីពីដីស្រែចម្ការ។

Baek Jong Won ដែលធ្លាប់បានអបអរសាទរចំពោះការប្តេជ្ញាចិត្តរបស់គាត់ចំពោះក្រមសីលធម៌ និងការអនុវត្តអាជីវកម្មប្រកបដោយតម្លាភាព ឥឡូវនេះកំពុងប្រឈមមុខនឹងវិបត្តិកេរ្តិ៍ឈ្មោះយ៉ាងធ្ងន់ធ្ងរ។ កាលពីខែឧសភា គាត់បានបង្ហោះវីដេអូសុំទោសនៅលើ YouTube បានប្រកាសពីកំណែទម្រង់រចនាសម្ព័ន្ធនៅក្នុង The Born Korea ហើយបាននិយាយថា គាត់នឹងផ្អាកសកម្មភាពចាក់ផ្សាយទាំងអស់។ យ៉ាង​ណា​ក៏​ដោយ ភាព​ចម្រូងចម្រាសនេះនៅតែ​បាន​បន្ត​កើត​ឡើងដដែល។

ជាងនេះទៅទៀត លោកត្រូវគេស្គាល់ថាជាអ្នកជំនួញចិត្តល្អនិងមេចុងភៅជោគជ័យ បច្ចុប្បន្ននេះ ការជឿទុកចិត្តជាសាធារណៈរបស់លោក Baek កំពុងត្រូវបានសាកល្បងយ៉ាងធ្ងន់ធ្ងរ។ លទ្ធផលនៃការស៊ើបអង្កេតអាចជះឥទ្ធិពលយ៉ាងខ្លាំងទៅលើរូបភាពម៉ាកយីហោរបស់គាត់ ប្រតិបត្តិការសិទ្ធិផ្តាច់មុខ និងអាជីពផ្សាយនាពេលអនាគត៕

អត្ថបទ៖ សាង ស្រីល័ក្ខ

ចុចអាន៖បុគ្គលិកមហោស្រពភាពយន្ត Busan ជាប់គុកពីបទលួចថតមិត្តរួមការងារពេលរួមភេទ

The post មេចុងភៅល្បីឈ្មោះប្រចាំប្រទេសកូរ៉េ ស្ថិតក្រោមការស៊ើបអង្កេត ក្រោយបំពានច្បាប់គយ appeared first on Kampuchea Thmey Daily.

លោក ហ៊ិន សុខខេង ស្នងការរងទទួលផែនព្រហ្មទណ្ឌ នៃ​ស្នងការដ្ឋាន​នគរបាល​ខេត្ត​តា​កែវ ត្រូវ​បាន​មន្ត្រី​នគរបាល​ថ្នាក់ក្រោម និង​ប្រជាពលរដ្ឋ​ក្នុងក្រុងដូនកែវ ដែលសុំមិនបញ្ចេញឈ្មោះ​សរសេ​រ​ពាក្យ​បណ្ដឹង​ប្ដឹង​រូប​លោក​ទៅ​សម្ដេច​ក្រឡាហោម ស ខេង រដ្ឋមន្ត្រី​ក្រសួងមហាផ្ទៃ ឱ្យ​ចាត់​វិធានការ​ពាក់​ព័ន្ធ​និងភាពមិនស្របច្បាប់មួយចំនួន ​។
 
តាមពាក្យបណ្តឹងសុំអន្តរាគមន៍ចុះថ្ងៃទី៣១ ខែកក្កដា ឆ្នាំ២០២០កន្លងទៅបានឱ្យដឹងថា លោក​ឧត្ដម​សេនីយ៍​ត្រី​ ហ៊ិន សុខខេង អត្តលេខ ៣០២៦៨ ស្នងការរងទទួលផែនព្រហ្មទណ្ឌ នៃស្នងការដ្ឋាន​នគរ​បាល​ខេត្តតាកែវ ​បានធ្វើឲ្យពលរដ្ឋពុំមានទំនុកចិត្ត ភ័យខ្លាច និងបាន​ប្រព្រឹត្ត​បទល្មើស​មួយចំនួន​ដោយ​ផ្ទាល់​ខ្លួន។
 
ខ្លឹមសារ នៃ​ពាក្យបណ្ដឹង​បាន​បញ្ជាក់​ថា ​​នៅ​ចុង​ឆ្នាំ​២០១៩ លោក​ឧត្ដមសេនីយ៍ត្រី​ ហ៊ិន សុខខេង និង​បក្ខ​ពួក​បាន​ចាប់​បង្ខាំង​ជនរងគ្រោះ​ជំរិត​យក​ប្រាក់ចំនួន២០០,០០០ដុល្លារ​អាមេរិក(ពីររយពាន់ដុល្លារ​សហ​រដ្ឋអាមេរិក)និងនៅថ្ងៃទី៣១ ខែធ្នូ ឆ្នាំ២០១៩ លោក និងលោក​វរសេនីយ៍ទោ​ សាក់ ទូច រួមទាំង​បក្ខ​ពួក​បានធ្វើសកម្មភាពចាប់បង្ខាំងជនរងគ្រោះជាជនបរទេស​ ចំនួន៣នាក់ និងជនជាតិខ្មែរ ២នាក់   ជំរិត​យក​ប្រាក់​ចំនួន១០០,០០០ដុល្លារអាមេរិក(មួយ​រយពាន់ដុល្លារអាមេរិក)និងដកហូតយក​ខ្សែដៃ​ ខ្សែក ​ចិញ្ចៀន​ពេជ្រ ពីជនរងគ្រោះ ដោយមានលោក​វរសេនីយ៍ទោ​ រស់ សេន នាយរងការិយាល័យ​បុគ្គលិក​ជាអ្នកបក​ប្រែ។

លុះដល់ថ្ងៃទី១ ខែមករា ឆ្នាំ២០២០ តំណាង​ជនរងគ្រោះ​២នាក់ បានមក​ប្ដឹងតវ៉ា​ដល់​ស្នងការដ្ឋាន ក្នុង​គោលបំណង​ទាមទារ​ឲ្យ​អនុវត្ត​ច្បាប់​ចំពោះ​មន្ត្រី​នគរបាល​ខាងលើ និងទាមទា​យក​សម្ភារៈ​ដែល​ដកហូត​ពី​ជនរងគ្រោះជាអ្នកវិនិយោគិន (ជនបរទេស) ត្រឡប់មកវិញ។

ក្រោយមាន​បណ្ដឹង​តវ៉ា ក៏មានស្នងការរង នៃស្នងការដ្ឋាននគរបាលខេត្តតាកែវ មួយរូប(មិនស្គាល់ឈ្មោះ) បានយក​សម្ភារៈ​ទៅប្រគល់ឲ្យជនរងគ្រោះវិញដល់រាជធានីភ្នំពេញ។ ករណីនេះតំណាង​អយ្យការ​អម​សាលាដំបូង​ខេត្តតាកែវ ធ្លាប់បានកោះហៅ លោក​ឧត្ដមសេនីយ៍​ត្រី ហ៊ិង សុខខេង សាកសួរ​ដំណើររឿង​នេះ ម្ដង​រួចមកហើយ​៕ 

អត្ថបទ៖ វីរៈ

 
​

The post ក្រសួងមហាផ្ទៃ បង្គាប់ការ​ឱ្យ​ស៊ើបអង្កេត​ស្នងការ​រង​ខេត្ត​តាកែវ ជំរិត​យក​ប្រាក់​រាប់ម៉ឺន​ដុល្លារ appeared first on Kampuchea Thmey Daily.

នៅក្នុងសេចក្តីថ្លែងការណ៍មួយលោក Pascrell បាននិយាយថា ក្រុមឃ្លាំមើលសហព័ន្ធបានឆ្លើយតបកាលពីថ្ងៃព្រហស្បតិ៍ចំពោះការស្នើរបស់លោកឲ្យស៊ើបអង្កេតបញ្ហានេះដោយប្រាប់លោកថា អង្គភាពពិសេសបានបើកការស៊ើបអង្កេតលើការចោទប្រកាន់ទាំងនេះដើម្បីកំណត់ថាតើលោក Trump បានរំលោភបំពានលើច្បាប់ Hatch Act ដែរឬក៏យ៉ាងណា ។

លោក Pascrell បានស្នើសុំឲ្យមេធាវីរបស់ក្រុមប្រឹក្សាយោបល់ពិសេសគឺលោក Henry Kerner ធ្វើការស៊ើបអង្កេតលើរបាយការណ៍ដែលបង្ហាញថាលោក Trump បានប្រើប្រាស់បន្ទប់សង្រ្គាមនៃការិយាល័យប្រតិបត្តិ Eisenhower Executive នៃសេតវិមានសម្រាប់យុទ្ធនាការ និងការតាមដានលទ្ធផលនៅថ្ងៃបោះឆ្នោត ។

ទន្ទឹមនោះមិនមានការអត្ថាធិប្បាយណាមួយភ្លាមៗត្រូវបានធ្វើឡើងពីការិយាល័យប្រឹក្សាយោបល់ពិសេសនោះទេ ។

គួរបញ្ជាក់ថា ច្បាប់ Hatch Act ត្រូវបានបង្កើតឡើងនៅឆ្នាំ ១៩៣៩ ហើយច្បាប់មានតួនាទីកំណត់សកម្មភាពនយោបាយរបស់មន្ត្រីរដ្ឋាភិបាលសហព័ន្ធលើកលែងតែប្រធានាធិបតី និងអនុប្រធានាធិបតីប៉ុណ្ណោះ ៕

ប្រែសម្រួលដោយ ៖ ជីវ័ន្ត

ប្រភព ៖ REUTERS

ចុចអាន ៖ មន្ត្រីជាន់ខ្ពស់គណបក្សសាធារណរដ្ឋ ថា លោក Trump ធ្វើឲ្យខូចដំណើរការលទ្ធិប្រជាធិបតេយ្យ

ចុចអាន ៖ ពាក្យបណ្តឹងរបស់លោក Trump គ្រាន់តែជាវិធីពន្យារពេល មិនចង់ឲ្យខ្លួនចាញ់លឿនពេកប៉ុណ្ណោះ

The post ក្រុមលោក Trump កំពុងត្រូវបានគេស៊ើបអង្កេតករណីយកសេតវិមានធ្វើជាទីបញ្ជាការនៅថ្ងៃបោះឆ្នោត បំពានច្បាប់ appeared first on Kampuchea Thmey Daily.