កីឡាគ្រីឃីត Archives - Kampuchea Thmey Daily

គ្រីឃីតជាកីឡាក្តីសង្ឃឹមកម្ពុជាប៉ះជប៉ុនថ្ងៃនេះក្នុងកីឡាអាស៊ីនៅចិន

chean virakbot — Wed, 27 Sep 2023 00:30:00 +0000

គ្រីឃីតដែលជាកីឡាក្តីសង្ឃឹមមួយរបស់ប្រទេសកម្ពុជាចាប់ផ្តើមប្រកួតវេលាម៉ោង១៤:០០នាទីរសៀល (ម៉ោង១រសៀលនៅកម្ពុជា) ថ្ងៃទី២៧ ខែកញ្ញានេះក្នុងព្រឹត្តិការណ៍កីឡាអាស៊ី លើកទី១៩ ឆ្នាំ២០២២ (លើកឆ្នាំ២០២៣) នៅប្រទេសចិន។

ក្រុមកីឡាគ្រីឃីតជម្រើសជាតិកម្ពុជាស្ថិតនៅពូល B ដែលមានជប៉ុន និងហុងកុង ខណៈពូល A មាន ម៉ាល់ឌីវ ម៉ុងហ្គោលី និងនេប៉ាល់ ហើយពូល C មានម៉ាឡេស៊ី សិង្ហបុរី និងថៃ។ ការប្រកួតវគ្គសន្សំពិន្ទុក្នុងពូលជ្រើសរើសយកតែលេខ១ក្នុងពូលទាំង៣ដើម្បីឡើងទៅកាន់វគ្គ៨ក្រុមចុងក្រោយ ដែលមានឥណ្ឌា បង់ក្លាដែស ប៉ាគីស្ថាន ស្រីលង្កា និងអាហ្វហ្គានីស្ថាន ជាក្រុមខ្លាំងរង់ចាំនៅវគ្គ៨ក្រុមចុងក្រោយស្រាប់។

បើកឆាកប្រកួតសន្សំពិន្ទុក្នុងពូល ក្រុមកម្ពុជាត្រូវប្រកួតជាមួយ ជប៉ុន។ បន្ទាប់មក នៅថ្ងៃទី២៩ ខែកញ្ញា កម្ពុជាប្រកួតជាមួយ ហុងកុង នៅពេលព្រឹក ហើយជប៉ុន នឹងប្រកួតជាមួយ ហុងកុងនៅថ្ងៃទី១ ខែតុលា។

គ្រីឃីតជាកីឡាមិនសូវពេញនិយមនៅប្រទេសកម្ពុជា ប៉ុន្តែសហព័ន្ធកីឡាគ្រីឃីតកម្ពុជាបានរៀបចំកីឡាករចូលសញ្ជាតិច្រើនដែលបានធ្វើឲ្យឈ្នះមេដាយមាស៣គ្រឿង និងប្រាក់១គ្រឿង ឈរលំដាប់ទី១ក្នុងតារាងមេដាយកីឡាគ្រីឃីតក្នុងកីឡាស៊ីហ្គេម លើកទី៣២ ឆ្នាំ២០២៣ នៅប្រទេសកម្ពុជា។

កីឡាគ្រីឃីតមានតែ២វិញ្ញាសាប៉ុណ្ណោះក្នុងកីឡាអាស៊ី លើកទី១៩គឺ ក្រុមបុរស និងក្រុមនារី។ វិញ្ញសាក្រុមនារីបានបញ្ចប់កាលពីថ្ងៃទី២៥ ខែកញ្ញា ដោយ ក្រុមកីឡាការិនីឥណ្ឌាឈ្នះមេដាយមាស ក្រុមកីឡាការិនីស្រីលង្កាឈ្នះមេដាយប្រាក់ និងក្រុមកីឡាការិនីបង់ក្លាដែសឈ្នះមេដាយសំរិទ្ធ។

កម្មវិធីប្រកួត ថ្ងៃទី២៧ ខែកញ្ញា

ពូល A៖ ម៉ុងហ្គោលី vs នេប៉ាល់ វេលាម៉ោង៩:០០នាទីព្រឹក
ពូល B៖ កម្ពុជា vs ជប៉ុន វេលាម៉ោង១៤:០០នាទីរសៀល
ពូល C៖ ម៉ាឡេស៊ី vs សិង្ហបុរី វេលាម៉ោង៩:០០នាទីព្រឹក

អត្ថបទ៖ វីរបុត្រ

The post គ្រីឃីតជាកីឡាក្តីសង្ឃឹមកម្ពុជាប៉ះជប៉ុនថ្ងៃនេះក្នុងកីឡាអាស៊ីនៅចិន appeared first on Kampuchea Thmey Daily.

កីឡាកម្ពុជា៧ប្រភេទបានបង្កើតកំណត់ត្រាឈ្នះមេដាយមាសស៊ីហ្គេមលើកដំបូង

Chan Sotheavy — Mon, 15 May 2023 07:07:38 +0000

កីឡាកម្ពុជា៧ប្រភេទគឺបាល់បោះ សូហ្វតិន្នីស គ្រីឃីត ទ្រីយ៉ាត្លុង អត្តពលកម្ម ហែលទឹក និងអេឡិចត្រូនិក សុទ្ធតែបានបង្កើតកំណត់ត្រាជាប្រវត្តិសាស្ត្រក្នុងការឈ្នះមេដាយមាសជាលើកដំបូងគិតចាប់តាំងពីក្រោយសម័យសង្គ្រាមឆ្នាំ១៩៧៩ ក្នុងកីឡាស៊ីហ្គេម លើកទី៣២ ឆ្នាំ២០២៣។

បន្ទាប់ពីបានចូលរួមប្រកួតស៊ីហ្គេមជាច្រើនលើក កីឡាបាល់បោះ ទ្រីយ៉ាត្លុង និងអេឡិចត្រូនិក មិនធ្លាប់ឈ្នះមេដាយណាមួយឡើយ សូម្បីតែមេដាយសំរឹទ្ធនោះ ប៉ុន្តែដណ្តើមបានមេដាយមាសសម្រាប់ស៊ីហ្គេមឆ្នាំ២០២៣។ ជាមួយគ្នានេះ ក្រុមសូហ្វតិន្នីស ដែលធ្លាប់តែដណ្តើមបានត្រឹមមេដាយសំរឹទ្ធនោះ ក៏អាចរកបានមេដាយមាសជូនប្រទេសជាតិដែរ។

ឯការដណ្តើមមេដាយមាសជូនជាតិជាដំបូង សម្រាប់កីឡាអត្តពលកម្ម លើវិញ្ញាសារត់ចម្ងាយ ៨០០ម៉ែត្រ ផ្នែកបុរស ធ្វើបានដោយកីឡាករ ឈុន ប៊ុនថន គឺជាសមិទ្ធផលមេដាយដំបូង ដែលកម្ពុជាទទួលបាន ចាប់តាំងពីប្រទេសកម្ពុជាបានចូលរួម ក្នុងព្រឹត្តិការណ៍កីឡាស៊ីហ្គេម រាប់ចាប់តាំងពីក្រោយថ្ងៃរំដោះ ក្នុងឆ្នាំ១៩៧៩មក។

ចំណែកមេដាយមាសជាដំបូងមួយទៀត គឺជ័យជម្នះបានពីការប្រកួតលើវិញ្ញាសាហែលទឹកពាក់ជើងទា ៤០០ម៉ែត្រ ធ្វើបានសម្រេចដោយកីឡាការិនី កាំង មុយនីន។

សម្រាប់មេដាយមាសក្នុងប្រភេទកីឡាទ្រីយ៉ាត្លុងវិញ យកបានមេដាយមាស ១គ្រឿង ដោយកីឡាការិនីកម្ពុជា ម៉ហ្គត មរកតហ្គារ៉ាប៊ីឌៀន លើវិញ្ញាសា អាគ័រត្លុង Aquathlon នារី (ហែលទឹក៥០០ម៉ែត្រ និងរត់២.៥គីឡូម៉ែត្រ) និងមេដាយមាស ១គ្រឿងទៀត លើវិញ្ញាសា ទ្រីយ៉ាត្លុង (ហែលទឹក៧៥០ម៉ែត្រ ជិះកង់២០គីឡូម៉ែត្រ និងរត់៥គីឡូម៉ែត្រ)។ ចំពោះសមិទ្ធផលនេះ តាមការអះអាងរបស់អគ្គលេខាធិការសហព័ន្ធកីឡាទ្រីយ៉ាត្លុងកម្ពុជា គឺជាការបំបែកកំណត់ត្រា ប្រវត្តិសាស្ត្ររបស់កម្ពុជា។ ការឈ្នះបានមេដាយមាសនេះ មិនមែនជារឿងចៃដន្យទេ គឺជាការខិតខំប្រឹងប្រែងខ្លាំងរបស់ក្រុមអត្តពលិក។

បើងាកមកមើលពីក្រុមជម្រើសជាតិបាល់បោះបុរសកម្ពុជា ដែលតែងតែធ្លាក់ត្រឹមវគ្គជម្រុះតាមពូល ក្នុងស៊ីហ្គេមកន្លងមក ស្ទើររាប់ភ្លេចនោះ បែរជាបានឈ្នះមេដាយមាសសម្រាប់ស៊ីហ្គេមលើកទី៣២ ក្នុងទឹកដីខ្លួនឯង បន្ទាប់ពីយកឈ្នះក្រុមខ្លាំងហ្វីលីពីន ដោយលទ្ធផល ២០-១៥ ក្នុងការប្រកួតនៅវគ្គផ្តាច់ព្រ័ត្រវិញ្ញាសាបុរស៣ទល់៣។

កីឡា E-Sport កម្ពុជា ដែលធ្លាប់តែបានត្រឹមវគ្គជម្រុះសម្រាប់ការចូលរួមប្រកួតស៊ីហ្គេម ២លើកកន្លងមក ខណៈការប្រកួតក្នុងនាមជាម្ចាស់ផ្ទះនៅលើកនេះ បានឈ្នះបានមេដាយចំនួន២គ្រឿង។ ១គ្រឿងដោយកីឡាករ សៅ រិទ្ធចេស្តា លើវិញ្ញាសា AK2 ឯកត្តជន និង១គ្រឿងទៀតរកបានដោយក្រុមបុរសលើប្រភេទកីឡា AK2 វិញ្ញាសាជាក្រុម ។

ចំពោះកីឡាសូហ្វតិន្នីសកម្ពុជាវិញ ពីមុនធ្លាប់តែដណ្តើមបានត្រឹមមេដាយសំរឹទ្ធទាំងលំបាក ប៉ុន្តែនៅលើកនេះ បែរជាបង្កើតបានកំណត់ត្រាពិសេសមិនធ្លាប់មាន ក្នុងការប្រកួតវាយគូចម្រុះដោយទទួលបាន មេដាយមាស។ ឯសហព័ន្ធកីឡាគ្រីឃីតកម្ពុជា ដែលទើបនឹងបង្កើតឡើងដែរនោះ ក៏បានចូលរួមបង្កើតប្រវត្តិសាស្ត្រថ្មី ជូនជាតិផងដែរ ដោយយកបានមេដាយមាសលើវិញ្ញាសា 50 Over៕

អត្ថបទ៖ សុធាវី

The post កីឡាកម្ពុជា៧ប្រភេទបានបង្កើតកំណត់ត្រាឈ្នះមេដាយមាសស៊ីហ្គេមលើកដំបូង appeared first on Kampuchea Thmey Daily.

កីឡាគ្រីឃីតកម្ពុជាដាក់គោលដៅឈ្នះមេដាយមាស៣គ្រឿងពីស៊ីហ្គេម២០២៣

chean virakbot — Tue, 14 Feb 2023 01:36:39 +0000

សហព័ន្ធកីឡាគ្រីឃីតកម្ពុជាបានដាក់គោលដៅឈ្នះមេដាយមាសយ៉ាងហោចណាស់ចំនួន៣គ្រឿងពីព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលប្រទេសកម្ពុជាធ្វើជាម្ចាស់ផ្ទះលើកដំបូងក្នុងប្រវត្តិសាស្ត្រ។

ថ្លែងក្រោយចប់ពិធីចុះអនុស្សរណៈនៃការយោគយល់គ្នាជាមួយក្រុមហ៊ុន AZ Group លោក Manish Sharma ប្រតិបត្តិករ (CEO) របស់សហព័ន្ធកីឡាគ្រីឃីតកម្ពុជាកាលពីថ្ងៃទី៣ ខែកុម្ភៈនេះថា សម្រាប់ស៊ីហ្គេម លើកទី៣២ នេះកីឡាគ្រីឃីតមានមាន៤វិញ្ញាសា (៤មេដាយមាស) គឺ២វិញ្ញាសាសម្រាប់បុរស និង២វិញ្ញាសាសម្រាប់នារី។

លោក Manish Sharma

«ពិតណាស់ យើងចង់ឈ្នះមេដាយមាសទាំង៤គ្រឿង ប៉ុន្តែគ្មាននរណាដឹងមុនឡើយ។ យ៉ាងណា យើងមានការជឿជាក់ខ្លាំង ដែលយ៉ាងហោចណាស់ក៏អាចឈ្នះមេដាយមាស៣គ្រឿងដែរពីស៊ីហ្គេមនៅកម្ពុជានេះ។ យើងនឹងប្រឹងប្រែងឲ្យអស់ពីលទ្ធភាពតាមដែលអាចទៅរួចក្នុងការឈ្នះមេដាយមាសហោចណាស់៣គ្រឿងតាមគោលដៅរបស់យើង»។ លោកបានប្រាប់ពីគោលដៅ។

លោកបានបញ្ជាក់ថា ក្រុមកីឡាគ្រីឃីតកម្ពុជាបាននិងហ្វឹកហាត់ខ្លាំងណាស់។ ក្រៅពីការហ្វឹកហាត់ខ្លាំង ក្រុមគ្រីឃីតកម្ពុជាបានប្រកួតមិត្តភាពជាបន្តបន្ទាប់ ហើយក៏ទទួលបានលទ្ធផលគួរឲ្យកត់សំគាល់។

នេះជាលើកទី២ដែលកីឡាគ្រីឃីតត្រូវបានដាក់បញ្ចូលក្នុងព្រឹត្តិការណ៍កីឡាស៊ីហ្គេម បន្ទាប់ពីលើកទី១កាលស៊ីហ្គេម ឆ្នាំ២០១៧ នៅប្រទេសម៉ាឡេស៊ី ដោយមានត្រឹមតែ៣វិញ្ញាសាប៉ុណ្ណោះ។ ទាំង៣វិញ្ញាសានោះ បុរសអាយុក្រោម២០ឆ្នាំ ប្រទេសសិង្ហបុរីជាម្ចាស់មេដាយមាស, បុរសលើអាយុ៥០ឆ្នាំ ម៉ាឡេស៊ីជាម្ចាស់មេដាយមាស និងនារីអាយុក្រោម២០ឆ្នាំ ថៃជាម្ចាស់មេដាយមាស៕

អត្ថបទ៖ វីរបុត្រ

The post កីឡាគ្រីឃីតកម្ពុជាដាក់គោលដៅឈ្នះមេដាយមាស៣គ្រឿងពីស៊ីហ្គេម២០២៣ appeared first on Kampuchea Thmey Daily.

កីឡាគ្រីឃីត Archives - Kampuchea Thmey Daily

គ្រីឃីតជាកីឡាក្តីសង្ឃឹមកម្ពុជាប៉ះជប៉ុនថ្ងៃនេះក្នុងកីឡាអាស៊ីនៅចិន

កីឡាកម្ពុជា​៧ប្រភេទបានបង្កើត​កំណត់ត្រា​ឈ្នះមេដាយមាសស៊ីហ្គេមលើកដំបូង

កីឡា​គ្រីឃីត​កម្ពុជា​ដាក់​គោល​ដៅ​ឈ្នះ​មេដាយ​មាស​​៣​​​គ្រឿង​​ពី​​ស៊ីហ្គេម​២០២៣​​

កីឡាកម្ពុជា៧ប្រភេទបានបង្កើតកំណត់ត្រាឈ្នះមេដាយមាសស៊ីហ្គេមលើកដំបូង

កីឡាគ្រីឃីតកម្ពុជាដាក់គោលដៅឈ្នះមេដាយមាស៣គ្រឿងពីស៊ីហ្គេម២០២៣