កុមា Archives - Kampuchea Thmey Daily

លោក នេត្រ ភក្ត្រា ៖ កុមារា កុមារី ជាទំពាំងស្នងឫស្សីសម្រាប់ជាតិ និងជាអ្នកបន្តវេនដ៏មានសក្ដានុពល

អ៊ិន ពិសី — Sun, 01 Jun 2025 05:31:51 +0000

លោករដ្ឋមន្ត្រីក្រសួងព័ត៌មាន បានថ្លែងថា «កុមារា កុមារី ជាទំពាំងស្នងឫស្សីសម្រាប់ជាតិ កុមារជាអ្នកបន្តវេនដ៏មានសក្ដានុពល ហើយការគាំពារកុមារ និងលើកកម្ពស់សិទ្ធិកុមារ ជាភារកិច្ចរបស់យើងទាំងអស់គ្នា»។

ការថ្លែងបែបនេះ ក្នុងឱកាស លោក នេត្រ ភក្ត្រា រដ្ឋមន្ត្រីក្រសួងព័ត៌មាន និងលោកស្រី ទុយ សិរីរតនៈ នេត្រ ភក្ត្រា ប្រធានកិត្តិយសសមាគមនារីកម្ពុជា ដើម្បីសន្តិភាព និងអភិវឌ្ឍន៍សាខាក្រសួងព័ត៌មាន អញ្ជើញជួបសំណេះសំណាល និងចែកអំណោយជាកាតាប សម្ភារៈសិក្សា នំ និងភេសជ្ជៈ របស់ក្រុមហ៊ុន Midass food ជូនដល់កូនៗ មន្ត្រីរាជការក្រសួងព័ត៌មាន ប្រមាណ ៣០០ នាក់ និងមានការចូលរួមពីអាណាព្យាបាល និងកុមារសរុបប្រមាណ ៥០០ នាក់ កាលពីព្រឹកថ្ងៃទី ៣១ ខែឧសភា ឆ្នាំ ២០២៥ នាទីស្ដីការក្រសួងព័ត៌មាន។

ពិធីចែកសម្ភារៈសិក្សាដល់កូនៗ របស់មន្ត្រី នៃក្រសួងព័ត៌មាន គឺជាលើកទី ២ ហើយ នៅក្នុងអាណត្តិរបស់ លោក នេត្រ ភក្ត្រា ក្នុងតំណែងជារដ្ឋមន្ត្រីក្រសួងព័ត៌មាន , ហើយការជួបជុំគ្នា បង្កភាពសប្បាយរីករាយដល់កុមារ នាឱកាសនេះ ដើម្បីអបអរសាទរខួបលើកទី ៧៦ ទិវាកុមារអន្តរជាតិ ១ មិថុនា ក្រោមប្រធានបទ «បញ្ឈប់អំពើហិង្សាលើកុមារគ្រប់ទម្រង់ គឺជាការអភិវឌ្ឍធនធានមនុស្សប្រកបដោយចីរភាព» និងខួបលើកទី ២៤ ទិវាពិភពលោកប្រឆាំងពលកម្មកុមារ ១២ មិថុនា ក្រោមប្រធានបទ «លើកកម្ពស់ការងារសមរម្យសម្រាប់កម្មករ-និយោជិតវ័យក្មេងនៅគ្រប់ខ្សែច្រវាក់ផលិតកម្ម ដើម្បីធានាកំណើនប្រកបដោយចីរភាព និងភាពធន់»។

នាឱកាសនោះ លោក នេត្រ ភក្ត្រា ថ្លែងបន្តថា «កុមារ ប្រៀបដូចជា ទំពាំងស្នងឫស្សី ដែលយើងទាំងអស់គ្នា ត្រូវយកចិត្តទុកដាក់ ទាំងឪពុកម្តាយ ទាំងថ្នាក់ដឹកនាំ ដើម្បីធ្វើយ៉ាងណាឲ្យកុមារទទួលបានការសិក្សារៀនសូត្រ ទទួលអាហារូបត្ថម្ភត្រឹមត្រូវ , ហើយអ្វីដែលសំខាន់ថែមទៀតនោះគឺការបង្កបរិយាកាសសប្បាយរីករាយដល់កុមារលេងកម្សាន្តដែលធ្វើឲ្យខួរក្បាលរបស់កុមារមានការរីកចម្រើន»។

លោក នេត្រ ភក្ត្រា បានជម្រាបជូនថា អំណោយសម្ភារៈសិក្សាទាំងនេះ ទទួលបានការគាំទ្រពីក្រុមហ៊ុន Midass food ដើម្បីចូលរួមចំណែកចែករំលែកនូវក្តីស្រឡាញ់ និងស្នាមញញឹម ដល់កូនៗ របស់មន្ត្រីរាជការ នៃក្រសួងព័ត៌មាន ពិសេសគឺជាការលើកទឹកចិត្តដល់សិស្សានុសិស្សឲ្យបន្តការខិតខំប្រឹងប្រែងសិក្សារៀនសូត្របានពូកែ និងក្លាយជាធនធានមនុស្សដ៏ល្អ និងជាសសរទ្រូងដ៏រឹងមាំរបស់ប្រទេសជាតិនាថ្ងៃអនាគត។ តាមរយៈនេះ លោករដ្ឋមន្ត្រី បានជំរុញលើកទឹកចិត្តដល់កុមារទាំងអស់ឲ្យខិតខំប្រឹងប្រែងសិក្សារៀនសូត្រក្រេបចំណេះវិជ្ជាពីលោកគ្រូ អ្នកគ្រូ និងធ្វើជាកូនល្អ សិស្សល្អ និងពលរដ្ឋល្អ នៅក្នុងសង្គម។

ទន្ទឹមនោះ លោករដ្ឋមន្ត្រី និងលោកស្រី ក៏បានបង្ហាញនូវការរីករាយដោយបានឃើញស្នាមញញឹមរបស់កុមារា កុមារី ដែលជាស្នាមញញឹមរបស់មាតា បិតា និងថ្នាក់ដឹកនាំគ្រប់លំដាប់ថ្នាក់ នៃក្រសួងព័ត៌មានផងដែរ។

គួររំលឹកដែរថា រាជរដ្ឋាភិបាលនៅអាណត្តិទី ៧ ក្រោមការដឹកនាំប្រកបដោយភាពឈ្លាសវៃរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានបន្តខិតខំយកចិត្តទុកដាក់ខ្ពស់ ដោយបានដាក់ចេញនូវកម្មវិធីនយោបាយនានា សំដៅគាំពារ អភិវឌ្ឍន៍ និងលើកកម្ពស់សុខុមាលភាពកុមារ ចាប់តាំងពីបឋមវ័យ រហូតដល់យុវវ័យ , កុមារ ជាតំណាងឲ្យធនធានមនុស្សដ៏មានសក្ដានុពលរបស់ប្រទេសជាតិ ដែលនឹងត្រូវបន្តវេននាពេលអនាគត។ ដូច្នេះហើយយើងទាំងអស់គ្នា ត្រូវចូលរួមផ្តល់ក្តីស្រឡាញ់ ភាពសប្បាយរីករាយ និងក្តីសង្ឃឹម សម្រាប់កុមារទាំងអស់ ដើម្បីឲ្យកុមារក្លាយខ្លួនជាពលរដ្ឋល្អសម្រាប់សង្គមជាតិ។ កុមារកម្ពុជា ទទួលបានភាពសុខសាន្ត និងការបីបាច់ថែរក្សាដោយក្តីអាណិតស្រលាញ់គ្រប់ៗ គ្នា។

ជាមួយនេះដែរ តំណាងក្រុមហ៊ុន Midass food បានជម្រាបជូនថា សកម្មភាពចែករំលែកក្តីស្រឡាញ់នេះគឺជាលើកទី ៣០ របស់ក្រុមហ៊ុន មីដាសហ្វូដ នៃកម្មវិធីសប្បុរសធម៌ ហើយក្រុមហ៊ុនក៏នៅតែបន្តរាល់សកម្មភាពល្អនេះជានិច្ច យ៉ាងតិចឲ្យបានចំនួន ១ ដង ក្នុង ១ ខែ ដើម្បីចូលរួមជួយសម្រួលដល់ប្រព័ន្ធអប់រំ និងប្រជាពលរដ្ឋដែលមានការខ្វះខាត។ ក្រុមហ៊ុន មីដាសហ្វូដ មានមោទនភាពដែលបានចូលរួមចំណែកជាមួយក្រសួងព័ត៌មាន ដើម្បីឆ្ពោះទៅរកគោលបំណងរួមក្នុងការលើកកម្ពស់សុខុមាលភាព និងអនាគតដ៏ល្អសម្រាប់កុមារ និងសង្គមជាតិបន្តទៅមុខទៀត៕

The post លោក នេត្រ ភក្ត្រា ៖ កុមារា កុមារី ជាទំពាំងស្នងឫស្សីសម្រាប់ជាតិ និងជាអ្នកបន្តវេនដ៏មានសក្ដានុពល appeared first on Kampuchea Thmey Daily.

UNICEF៖ កុមារច្រើនជាងពាក់កណ្តាលនៅមីយ៉ាន់ម៉ារស់នៅក្នុងភាពក្រីក្រ

Bun sopheap — Wed, 12 Feb 2025 06:57:17 +0000

អង្គការយូនីសេហ្វ មីយ៉ានម៉ា (UNICEF Myanmar) បានប្រកាសថា អសន្តិសុខស្បៀង និងកង្វះអាហារូបត្ថម្ភ ស្ថិតក្នុងកម្រិតគួរឱ្យព្រួយបារម្ភ នៅក្នុងប្រទេសមីយ៉ាន់ម៉ា ខណៈមានកុមារចំនួន៥៥ភាគរយរស់នៅក្នុងភាពក្រីក្រ។ យោងរបាយការណ៍អង្គការ UNICEF និងការចេញផ្សាយរបស់បណ្តាញសារព័ត៌មានមួយចំនួន។

(រូបភាព៖ ANN)

យូនីសេហ្វ មីយ៉ាន់ម៉ា បាននិយាយថា ប្រទេសមីយ៉ាន់ម៉ាបាននឹងកំពុងប្រឈមមុខនឹងជម្លោះអស់រយៈពេល៤ឆ្នាំមក ដោយស្ថានភាពនេះបានធ្វើឱ្យកុមារស្លាប់ច្រើនជាងគេបំផុត ជាមួយនឹងអំពើហិង្សា ការផ្លាស់ទីលំនៅ និងការរំខានដល់សេវាសំខាន់ៗ ដូចជា សុខភាព និងការអប់រំ ដែលគំរាមកំហែងយ៉ាងធ្ងន់ធ្ងរដល់ការរស់រានមានជីវិត និងសុខុមាលភាពរបស់កុមារ។ ប្រហែលមួយភាគបីនៃអ្នកផ្លាស់ទីលំនៅទាំងនោះគឺជាកុមារ ដែលត្រូវបានបង្ខំឱ្យចេញពីផ្ទះ និងសហគមន៍របស់ពួកគេ ហើយឥឡូវនេះកំពុងប្រឈមមុខនឹងអនាគតមិនច្បាស់លាស់។

សារព័ត៌មាន Viet Nam News នៅថ្ងៃទី១២ខែកុម្ភៈ បានលើកឡើងថា អសន្តិសុខស្បៀង និងកង្វះអាហារូបត្ថម្ភស្ថិតក្នុងកម្រិតគួរឱ្យព្រួយបារម្ភ ដោយ៥៥ភាគរយនៃកុមារក្នុងប្រទេសមីយ៉ាន់ម៉ារស់នៅក្នុងភាពក្រីក្រ គ្រួសារផ្លាស់ទីលំនៅជាច្រើនកំពុងជួបការលំបាកក្នុងការបំពេញតម្រូវការមូលដ្ឋាន ហើយកុមារពិការ និងគ្រួសាររបស់ពួកគេងាយរងគ្រោះបំផុត។

លើសពីនេះ ប្រព័ន្ធថែទាំសុខភាពសាធារណៈ ដែលត្រូវបានចុះខ្សោយដោយជំងឺរាតត្បាតកូវីដ១៩ ពេលនេះកំពុងរងការខូចខាតយ៉ាងធ្ងន់ធ្ងរដោយជម្លោះ អសន្តិសុខ និងការជម្លៀសបុគ្គលិកសុខាភិបាលយ៉ាងច្រើន ធ្វើឱ្យកុមារជាច្រើនមិនអាចទទួលបានការថែទាំសុខភាពសំខាន់ៗ។ កុមារជាងមួយលាននាក់ពុំបានទទួលថ្នាំបង្ការសំខាន់ៗ ធ្វើឱ្យប្រទេសមីយ៉ាន់ម៉ាក្លាយជាប្រទេសមួយដែលមានចំនួនកុមារមិនបានចាក់វ៉ាក់សាំងច្រើនជាងគេនៅលើពិភពលោក។

យូនីសេហ្វ មីយ៉ាន់ម៉ា បាននិយាយថា កុមារជិត ៥ លាននាក់កំពុងបាត់បង់ការអប់រំ បាត់បង់ឱកាសសិក្សា និងប្រឈមមុខនឹងហានិភ័យធ្ងន់ធ្ងរ រួមទាំងការប្រើប្រាស់ជាពលកម្មកុមារ ការបង្ខំឱ្យរៀបការនៅវ័យក្មេង និងការកេងប្រវ័ញ្ច។ នៅឆ្នាំ ២០២៤ កុមារចំនួន៧៥០នាក់បានស្លាប់ ឬរងរបួសនៅក្នុងជម្លោះ ហើយចំនួននៅតែបន្តកើនឡើង។

(រូបភាព៖ WFP)

បញ្ហាគួបផ្សំដូចជា ព្យុះស៊ីក្លូន Ragi ក្នុងឆ្នាំ២០២៤ បានប៉ះពាល់ដល់កុមារជាង៣០ម៉ឺននាក់ និងបានបំផ្លាញសាលារៀនជាច្រើន។ ជំរំជនភៀសខ្លួនដ៏ចង្អៀត និងសហគមន៍ដែលងាយរងគ្រោះកំពុងប្រឈមមុខនឹងជំងឺអាសន្នរោគឆ្លងពីទឹកធ្ងន់ធ្ងរ និងជីវភាពរស់នៅខ្វះខាតដ៏ធ្ងន់ធ្ងរ ជាមួយនឹងផលប៉ះពាល់ដែលរំពឹងថានឹងបន្តដល់ឆ្នាំ២០២៥។

មានតែ២៥ភាគរយនៃទឹកប្រាក់ដែលត្រូវការចំនួន២០៨លានដុល្លារអាមេរិកនៅឆ្នាំ២០២៤ប៉ុណ្ណោះ ដែលទទួលបាន ដែលធ្វើឱ្យកុមារជាច្រើនមិនអាចទទួលបានជំនួយសំខាន់ៗ។

នៅឆ្នាំ២០២៥នេះ យូនីសេហ្វត្រូវការប្រាក់ចំនួន២៨៦លានដុល្លារ ដើម្បីផ្តល់សេវាសង្គ្រោះជីវិត និងសង្គ្រោះបន្ទាន់ដល់កុមារ និងគ្រួសារដែលងាយរងគ្រោះបំផុតចំនួន ៤.១លាននាក់នៅទូទាំងប្រទេសមីយ៉ាន់ម៉ា។ បើគ្មានមូលនិធិនេះទេ កុមារអាចប្រឈមមុខនឹងកង្វះអាហារូបត្ថម្ភ ការផ្ទុះឡើងនៃជំងឺ កង្វះទឹកស្អាត និងការបាត់បង់ការអប់រំបន្ថែមទៀត៕

(រូបភាព៖ WFP)

(រូបភាព៖ UNICEF)

អត្ថបទ៖ ប៊ុន សុភាព

The post UNICEF៖ កុមារច្រើនជាងពាក់កណ្តាលនៅមីយ៉ាន់ម៉ារស់នៅក្នុងភាពក្រីក្រ appeared first on Kampuchea Thmey Daily.

កុមារជាង ២ម៉ឺននាក់ បាត់ខ្លួនក្នុងសង្គ្រាមហ្គាហ្សា

Bun sopheap — Tue, 25 Jun 2024 06:57:25 +0000

យោងតាមអង្គការជំនួយអង់គ្លេស Save the Children បានឲ្យដឹងថា កុមារជាង ២០ ០០០នាក់កំពុងបាត់ខ្លួននៅក្នុងតំបន់ហ្គាហ្សា ដោយសារសង្គ្រាមអ៊ីស្រាអែលនិងក្រុមហាម៉ាស។ នេះបើយោងតាមការចេញផ្សាយរបស់ទីភ្នាក់ងារពត៌មាន Al Jazeera នៅថ្ងៃទី ២៥ ខែ មិថុនា។

នៅក្នុងរបាយការណ៍របស់ខ្លួន អង្គការនេះបង្ហាញថា កុមារទាំងនោះទំនងជាត្រូវជាប់នៅក្រោមគំនរបាក់បែក អាចកប់ក្នុងផ្នូរដែលគ្មានដាក់សញ្ញាសម្គាល់ អាចស្លាប់ដោយផ្ទុះគ្រាប់បែក អាចត្រូវកងកម្លាំងអ៊ីស្រាអែលឃាត់ខ្លួន ឬបាត់ខ្លួននៅក្នុងភាពវឹកវរនៃជម្លោះ។

ស្របពេលជាមួយគ្នានោះ អង្គការនេះបញ្ជាក់ថា ខ្លួនពិតជាពិបាកបំផុតក្នុងការប្រមូលទិន្នន័យ និងផ្ទៀងផ្ទាត់ព័ត៌មានព្រោះតែស្ថានភាពសង្គ្រាមនៅហ្គាហ្សា ហាក់មិនថមថយឡើយ។

ចំណែកអង្គការមូលនិធិកុមាររបស់អង្គការសហប្រជាជាតិ (UNICEF) ក៏បានឲ្យដឹងនៅក្នុងរបាយការណ៍មួយកាលពីដើមឆ្នាំនេះដែរថា អ៊ីស្រាអែលបានសម្លាប់កុមារជាង ១៤ ០០០នាក់នៅតំបន់ហ្គាហ្សា ចាប់តាំងពីថ្ងៃទី ៧ខែតុលាមក ខណៈអ្នកផ្សេងទៀតកំពុងទទួលរងកង្វះអាហារូបត្ថម្ភធ្ងន់ធ្ងរ ដល់ថ្នាក់កុមារខ្វះសូម្បីយំក៏គ្មានកម្លាំងយំដែរ។

ទន្ទឹមនោះ កុមារប៉ាឡេស្ទីនប្រហែល ២៥០ នាក់ក៏កំពុងបាត់ខ្លួនផងដែរនៅក្នុងតំបន់ West Bank គិតត្រឹមថ្ងៃទី ៩ ខែមិថុនា ហើយលោក Jeremy Stoner នាយកអង្គការ Save the Children ប្រចាំតំបន់មជ្ឈិមបូព៌ា កំពុងអំពាវនាវឱ្យមានការស៊ើបអង្កេតឯករាជ្យលើស្ថានភាពជុំវិញកុមារដែលបាត់ខ្លួននៅហ្គាហ្សា និងរកការទទួលខុសត្រូវ៕

អត្ថបទ៖ ប៊ុន សុភាព

The post កុមារជាង ២ម៉ឺននាក់ បាត់ខ្លួនក្នុងសង្គ្រាមហ្គាហ្សា appeared first on Kampuchea Thmey Daily.

ថែកូនក្មេងផង ទារក និងកុមារជាង៤០ នាក់ឆ្លងកូវីដ១៩

deth leng — Thu, 25 Mar 2021 08:16:05 +0000

គិតត្រឹមថ្ងៃទី ២៥ ខែមីនានេះ មានទារក កុមារីកុមារា ប្រមាណជាង ៤០ នាក់បានឆ្លងជំងឺកូវីដ១៩ បន្ទាប់ពីរកឃើញករណីឆ្លងថ្មីទៅលើទារក និងកុមារចំនួន ១១ នាក់បន្ថែមទៀតត្រឹមតែមួយថ្ងៃចុងក្រោយនេះ ដែលភាគច្រើនស្ថិតនៅក្នុងរាជធានីភ្នំពេញ។ នេះបើតាមសេចក្តីជូនព័ត៌មានរបស់ក្រសួងសុខាភិបាលកម្ពុជាចេញផ្សាយរៀងរាល់ថ្ងៃ។

លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានឱ្យដឹងផងដែរថា វីរុសកូវីដ ១៩ កំពុងតែវាយលុកហើយ សូម្បីតែកុមារអាយុ ៦ ឆ្នាំ ក៏វាមិនលើកលែងឱ្យដែរ។

លោកស្រីថ្លែងថា៖ «ពេលនេះជាស្ថានភាពអាសន្នមួយ យើងគ្រប់ៗគ្នាត្រូវតែអនុវត្តវិធានការការពារជាចាំបាច់ ដើម្បីកាត់បន្ថយហានិភ័យនៃការឆ្លងជំងឺកូវីដ ១៩ និងដើម្បីកាត់ផ្តាច់ខ្សែចម្លងជំងឺនេះឱ្យបានកាន់តែឆាប់រហ័ស តាមដែលអាចធ្វើទៅបាន»។ លោកស្រីបញ្ជាក់ថា ជោគជ័យ ឬបរាជ័យក្នុងការប្រយុទ្ធជាមួយនឹងជំងឺកូវីដ ១៩ អាស្រ័យលើទាំងអស់គ្នា។

គិតរហូតមកដល់ពេលនេះ ករណីឆ្លងក្នុងព្រឹត្តិការណ៍សហគមន៍ ២០ កុម្ភៈ មានកើនឡើងដល់ ១៣៤៨ នាក់ ខណៈអ្នកឆ្លងសរុបមានចំនួន ១៨៧២ និងជាសះស្បើយចំនួន ១០៥៦។

នៅថ្ងៃនេះ អ្នកឆ្លងថ្មីត្រឹមរយៈពេល ២៤ ម៉ោង ក្នុងព្រឹត្តិការណ៍សហគមន៍ ២០ កុម្ភៈមានចំនួន ៥៥ នាក់ ភាគច្រើននៅរាជធានីភ្នំពេញ និងជាសះស្បើយចំនួន ២៣ នាក់។

ករណីរកឃើញវិជ្ជមានកូវីដ១៩ថ្មីថ្ងៃទី ២៥ នេះ លើទារកនិងកុមារួមមាន៖

-ទារកជនជាតិខ្មែរ អាយុ ៩ខែ នៅឃុំទ្រាល ស្រុកតាំងគោក ខេត្តកំពង់ធំ

-កុមារាជនជជាតិខ្មែរអាយុ១១ ឆ្នាំ នៅសង្កាត់គីឡូម៉ែត្រលេខ ៦ ខណ្ឌឬស្សីកែវ រាជធានីភ្នំពេញ

-កុមារីជនជាតិខ្មែរ អាយុ ៨ ឆ្នាំ នៅសង្កាត់គីឡូម៉ែត្រលេខ ៦ ខណ្ឌឬស្សីកែវ រាជធានីភ្នំពេញ

-ទារកជនជាតិខ្មែរអាយុ ១១ ខែ នៅសង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ

-កុមារាជនជាតិខ្មែរអាយុ២ឆ្នាំ នៅសង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ

-កុមារាជនជាតិខ្មែរអាយុ ១៥ ឆ្នាំ នៅសង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ

-កុមារាជនជាតិខ្មែរ អាយុ ២ ឆ្នាំ នៅសង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ

-កុមារាជនជាតិខ្មែរ អាយុ ១១ ឆ្នាំ នៅសង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ

-កុមារាជនជាតិខ្មែរអាយុ១២ ឆ្នាំ មានអាស័យដ្ឋានស្នាក់នៅសង្កាត់ស្ទឹងមានជ័យ ខណ្ឌមានជ័យ -រាជធានីភ្នំពេញ

-កុមារាជនជាតិខ្មែរអាយុ១៤ ឆ្នាំ នៅសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ

-កុមារីជនជាតិខ្មែរអាយុ ១០ ឆ្នាំ នៅសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ៕

អត្ថបទ៖ ឡេង ដេត

The post ថែកូនក្មេងផង ទារក និងកុមារជាង៤០ នាក់ឆ្លងកូវីដ១៩ appeared first on Kampuchea Thmey Daily.

កុមា Archives - Kampuchea Thmey Daily

លោក នេត្រ ភក្ត្រា ៖ កុមារា កុមារី ជាទំពាំងស្នងឫស្សីសម្រាប់ជាតិ និងជាអ្នកបន្តវេនដ៏មានសក្ដានុពល

UNICEF៖ កុមារ​ច្រើន​ជាងពាក់​កណ្តាល​នៅ​មីយ៉ាន់ម៉ា​រស់នៅក្នុ​ងភាពក្រីក្រ

កុមារជាង ២ម៉ឺននាក់ បាត់ខ្លួនក្នុងសង្គ្រាមហ្គាហ្សា

ថែកូនក្មេងផង ទារក និងកុមារជាង៤០ នាក់ឆ្លងកូវីដ១៩

UNICEF៖ កុមារច្រើនជាងពាក់កណ្តាលនៅមីយ៉ាន់ម៉ារស់នៅក្នុងភាពក្រីក្រ