សង្ឃសៅលិញ ១៦ អង្គ និងអ្នកគុនល្បុក្កតោ ៤៥ នាក់សម្តែងមហោស្រពក្បាច់គុន នៅប្រាសាទបាយ័ន

chean virakbot — Tue, 28 Apr 2026 02:45:38 +0000

កីឡាករ កីឡាការិនីគុនល្បុក្កតោកម្ពុជាប្រមាណ ៤៥ នាក់ និងព្រះសង្ឃសៅលិញរបស់ចិន ១៦ អង្គ នឹងសម្តែងក្នុង«មហោស្រពក្បាច់បុរាណចម្រុះ»រវាងកម្ពុជា និងចិន ដើម្បីលើកកម្ពស់ក្បាច់គុនបុរាណនៃប្រទេសទាំងពីរ ក៏ដូចជាជំរុញផ្សព្វផ្សាយវិស័យទេសចរណ៍។

ព្រះសង្ឃសៅលិញ និងប្រតិភូនៃប្រទេសចិនបាននិមន្ត-ធ្វើដំណើរមកដល់ប្រទេសកម្ពុជាហើយ។ អ្វីដែលគួរឲ្យចាប់អារម្មណ៍ គ្រាន់តែមកដល់ប្រទេសកម្ពុជាភ្លាម អ្នកគុននិយមសៅលិញចិនបានបង្ហាញក្បាច់គុននៅអាកាសយានដ្ឋានអន្តរជាតិតេជោតែម្តង។

លោក អ៊ូ តារា

តាមការឲ្យដឹងពី លោក អ៊ូ តារា អគ្គលេខាធិការនៃសហព័ន្ធគុនល្បុក្កតោកម្ពុជា ថា ព្រះសង្ឃសៅលិញចិន មានចំនួន ១៦ អង្គ នឹងសម្តែងក្បាច់គុនបុរាណរបស់ចិនមានដូចជា ក្បាច់គុនកុងហ្វូ ថៃជី និងក្បាច់គុនផ្សេងៗទៀត។ ចំណែកភាគីកម្ពុជា មានកីឡាករ កីឡាការិនីចំនួន ៤៥ ដែលត្រូវសម្តែងក្បាច់គុនបុរាណខ្មែររួមគ្នាដូចជា គុនល្បុក្កតោ ក្រពើហា ខ្លាក្រាប ស្រង៉ប៉ែន គុនផ្គាក គុនខែល គុនដាវ គុនកងយោធពលខេមរភូមិន្ទ គុនខ្មែរ និងយុទ្ធក្រមខម។

នេះជាកិច្ចសហប្រតិបត្តិការគ្នារវាងស្ថានទូតចិនប្រចាំព្រះរាជាណាចក្រកម្ពុជា និងក្រសួងទេសចរណ៍កម្ពុជា ដើម្បីលើកកម្ពស់ ផ្សព្វផ្សាយក្បាច់គុនបុរាណ ក៏ដូចជាជំរុញវិស័យទេសចរណ៍នៅកម្ពុជា។ ជាពិសេសជំរុញលើការផ្សព្វផ្សាយវិស័យទេសចរណ៍កម្ពុជាទៅកាន់ប្រជាជនចិនដែលកម្ពុជា បានលើកលែងទិដ្ឋាការពីថ្ងៃទី១៥ ខែមិថុនា ដល់ទី១៥ ខែតុលា ឆ្នាំ ២០២៦។

នេះមិនមែនជាលើកទី១ទេដែល ព្រះសង្ឃសៅលិញចិននិមន្តមកសម្តែងក្បាច់គុនបុរាណនៅប្រទេសកម្ពុជា។ កាលពីឆ្នាំ ២០២៤ សង្ឃសៅលិញក៏បានមកសម្តែងក្បាច់គុនជាមួយកីឡាករ កីឡាការិនីល្បុក្កតោកម្ពុជានៅប្រាសាទបាយ័នដែលទទួលបានការចាប់អារម្មណ៍យ៉ាងខ្លាំង។

សូមបញ្ជាក់ ការសម្តែងមហោស្រពក្បាច់គុនចចម្រុះកម្ពុជា-ចិន រវាងព្រះសង្ឃសៅលិញ និងកីឡាករ កីឡាការិនីល្បុក្កតោ នឹងធ្វើនៅវេលាម៉ោង ៨ ព្រឹក ថ្ងៃទី៣០ ខែមេសា ឆ្នាំ ២០២៦ នៅបរិវេណ ប្រាសាទបាយ័ន ខេត្តសៀមរាប៕

អត្ថបទ៖ វិរបុត្រ

The post សង្ឃសៅលិញ ១៦ អង្គ និងអ្នកគុនល្បុក្កតោ ៤៥ នាក់សម្តែងមហោស្រពក្បាច់គុន នៅប្រាសាទបាយ័ន appeared first on Kampuchea Thmey Daily.

ចិនបង្ហាញមនុស្សយន្តចេះក្បាច់គុនកុងហ្វូ

Huon Dina — Mon, 26 May 2025 08:45:19 +0000

ក្រុមហ៊ុនមនុស្សយន្តចិន AgiBot បានបញ្ចេញវិដេអូ ដែលបង្ហាញពីមនុស្សយន្តដើរដោយបញ្ញាសិប្បនិម្មិត (AI) ឈ្មោះថា «Lingxi X2» សម្តែងក្បាច់គុនកុងហ្វូ បំបែកក្តារ និងងើបពីដួលវិញ បានល្បឿន និងមានភាពច្បាស់លាស់។ នេះបើការចុះផ្សាយរបស់កាសែត VnExpress ដោយផ្អែកលើវិដេអូបង្ហោះនៅលើយូធូប។

មនុស្សយន្ត X2 ដែលមានកម្ពស់ ១,៣ ម៉ែត្រ និងទម្ងន់ ៣៣,៨ គីឡូក្រាម អាចបន់បែនបានច្បាស់លាស់ និងអាចទប់លំនឹងរបស់វា។ វាអាចសម្តែងក្បាច់គុន និងក្រោកពីផ្កាប់មុខដោយខ្លួនឯង ដោយមិនត្រូវការជំនួយនោះទេ។

ដោយទទួលបានងារថា «មនុស្សយន្តថាមវន្ត» X2 អាចឆ្លើយតបទៅនឹងទំនាក់ទំនងរបស់មនុស្សក្នុងរយៈពេលត្រឹមប៉ុន្មានមីលីវិនាទីប៉ុណ្ណោះ ពោលគឺវារហ័សក្នុងការឆ្លើយតប ដោយប្រើប្រាស់បច្ចេកវិទ្យាទាក់ទងពហុម៉ូដ (Multimodal Engagement)។

វាអាចវិភាគការបញ្ចេញទឹកមុខ និងសម្លេង ដើម្បីចាប់យកសញ្ញាអារម្មណ៍ និងឆ្លើយតបទៅវិញ ជាមួយនឹងកាយវិការ និងចលនាដូចមនុស្ស។ ការរចនារបស់វារួមមានដំណកដង្ហើម ការយល់ដឹងពីបរិយាកាស និងភាសាកាយវិការរស់រវើក ដើម្បីកែលម្អទំនាក់ទំនង ជាដើម។

មែនទែនទៅ AgiBot ប្រើប្រាស់ AI ឈ្មោះ Genie Operator-1 (GO-1) ដើម្បីឱ្យ X2 ដំណើរការដោយមិនចាំបាច់បង្រៀនជាមុន។ ម៉ូឌែល AI ដដែល អនុញ្ញាតឱ្យ X2 សម្របខ្លួនទៅនឹងការកំណត់ដែលមិនធ្លាប់ស្គាល់ ដោះស្រាយកិច្ចការផ្សេងៗ និងដំណើរការលើវេទិកាមនុស្សយន្តជាច្រើន។

គួរគូសបញ្ជាក់ថា X2 ដែលមានចលនាដ៏ស្វាហាប់ និងការយល់ដឹងអំពីអារម្មណ៍ ត្រូវបានដាក់ដំណើរការក្នុងខែមីនា ឆ្នាំ ២០២៥ សម្រាប់ការប្រើប្រាស់ក្នុងគោលបំណងទូទៅក្នុងវិស័យដូចជា ការថែទាំសុខភាព និងការអប់រំ ជាកន្លែងដែលវាអាចបម្រើជាមេផ្ទះ អ្នកមើលការខុសត្រូវ ឬជំនួយការសន្តិសុខជាដើម៕

The post ចិនបង្ហាញមនុស្សយន្តចេះក្បាច់គុនកុងហ្វូ appeared first on Kampuchea Thmey Daily.

ក្បាច់គុនកុងហ្វូ Archives - Kampuchea Thmey Daily

សង្ឃ​សៅលិញ ១៦ អង្គ និង​អ្នក​គុន​ល្បុក្កតោ ៤៥ នាក់​សម្តែងមហោ​ស្រព​ក្បាច់​គុន​ នៅ​ប្រាសាទ​បាយ័ន

ចិនបង្ហាញមនុស្សយន្តចេះក្បាច់គុនកុងហ្វូ

សង្ឃសៅលិញ ១៦ អង្គ និងអ្នកគុនល្បុក្កតោ ៤៥ នាក់សម្តែងមហោស្រពក្បាច់គុន នៅប្រាសាទបាយ័ន