ក្រឡានក្រចេះ កំពុងពេញនិយមនាអំឡុងថ្ងៃបុណ្យ ស្របពេលកំណាត់ផ្លូវក្រវាត់ក្រុងបើកឱ្យធ្វើចរាចរណ៍

Din Thary — Wed, 17 Sep 2025 09:00:14 +0000

អាជីវករលក់ដូរនៅចំណុចរង្វង់មូលខ្លាស្ទុះ ឋិតក្នុងភូមិកាប៉ូ សង្កាត់អូរឫស្សី ក្រុងក្រចេះ ហាក់មានការកើនឡើងយ៉ាងច្រើននៃចំនួនអាជីវករលក់ដូរនៅក្នុងរយៈពេលប៉ុន្មានឆ្នាំចុងក្រោយ ស្របពេលដែលកំណាត់ផ្លូវក្រវ៉ាត់ក្រុងមួយខ្សែ តភ្ជាប់ពីចំណុចគល់ស្ពានឆ្លងទន្លេមេគង្គ ដល់រង្វង់មូលខ្លាស្ទុះ បើកឱ្យធ្វើចរាចរណ៍។

ជាមួយគ្នានោះ ផលិតផលក្រឡាន ដែលជាផលិតផលក្នុងសហគមន៍ថ្មគ្រែ និងជាអត្តសញ្ញាណអ្នកខេត្តក្រចេះ មានការដាក់តាំងបង្ហាញលក់ជាហូរហែ និងច្រើនបំផុតនៅតាមតូបនីមួយៗ ហើយក៏ជាផលិតផលដ៏ពេញនិយមសម្រាប់ពលរដ្ឋ ក៏ដូចជាភ្ញៀវដែលធ្វើដំណើរឆ្លងកាត់ទីនោះផងដែរ។

អ្នកស្រី ជាម្ចាស់តូប ចាន់ត្រា និងអាជីវករផ្សេងទៀត បានឱ្យដឹងដូចគ្នាថា ការលក់ក្រឡានសព្វថ្ងៃនេះ គឺមានទីផ្សារល្អសមរម្យ ដោយ ក្នុង ១ថ្ងៃ អាចលក់ក្រឡានបានរហូតដល់ជាង ១០០គីឡូក្រាម ឯណោះ។ ក្រឡានលក់រាល់ថ្ងៃនេះ មាន ២ ប្រភេទ មានក្រឡានសណ្តែកតិច និងសណ្តែកច្រើន ហើយលក់ក្នុងមួយគីឡូ តម្លៃ ៧ ពាន់រៀល ទៅ ៨ ពាន់រៀល ទៅតាមប្រភេទក្រឡាននីមួយៗ។

អ្នកស្រី បន្តថា ក្រឡានទាំងនេះ គឺយកមកពីឃុំថ្មគ្រែ ជាផលិតផលក្នុងស្រុក ផលិតដោយដៃផ្ទាល់របស់អ្នកភូមិ គ្មានប្រើប្រាស់ជាតិគីមី និងមានឱជារសឈ្ងុយឆ្ងាញ់ទិញយកទៅបរិគោភគឺមិនខកបំណង់ឡើយ។

ម្យ៉ាងវិញទៀត រដូវនេះជារដូវពិធីបុណ្យភ្ជុំបិណ្ឌ មានប្រជាជាពលរដ្ឋធ្វើដំណើរទៅមកយ៉ាងច្រើនជាងពេលសព្វមួយដង ហើយការលក់ដូរក៏លក់ដាច់ទៅតាមហ្នឹងដូចគ្នា។

អ្នកស្រី បន្តថា កាលពីពិធីបុណ្យចូលឆ្នាំប្រពៃណីជាតិខ្មែរ អ្នកស្រីអាចលក់ក្រឡានបានជាង ៣០០គីឡូក្រាម ក្នុង ១ថ្ងៃ ហើយថ្ងៃខ្លះរកតែក្រឡានលក់ឱ្យភ្ញៀវសឹងមិនទាំងបានផង។

ជាមួយគ្នានោះ ក្រៅពីផលិតផល ក្រឡានថ្មគ្រែ ក៏នៅមានផលិតផល ណែម សាច់ត្រីសុទ្ធ និងណែមសាច់ត្រីលាយស្បែកជ្រូកខេត្តក្រចេះផងដែរ ដែលជាទីពេញនិយមសម្រាប់ភ្ញៀវអ្នកធ្វើដំណើរ។

សព្វថ្ងៃនេះ ចំណុចរង្វង់មូលខ្លាស្ទុះ ឋិតក្នុងសង្កាត់អូរឫស្សី ក្រុងក្រចេះ ស្ទើរតែក្លាយទៅជាចំណត់រថយន្តថ្មីទៅហើយ ក្រោយពេលកំណាត់ផ្លូវក្រវ៉ាត់ក្រុងមួយខ្សែនេះបើកឱ្យរថយន្តគ្រប់ប្រភេទធ្វើចរាចរណ៍ជាធម្មតា ហើយរថយន្តឈ្នួលដឹកអ្នកដំណើរជាច្រើនគ្រឿងបានចត់ឈប់នៅចំណុចនោះ ដើម្បីឱ្យអ្នកដំណើរចុះសម្រាក និងចូលបន្ទុប់ទឹកជាដើម ហើយអ្នកខ្លះទៀតក៏បានទិញក្រឡានយកទុកបរិភោគតាមរថយន្ត និងទុកផ្ញើសាច់ញាតិនៅឯស្រុកផងដែរ៕

អត្ថបទ៖ ប្រុញ វិធិន

The post ក្រឡានក្រចេះ កំពុងពេញនិយមនាអំឡុងថ្ងៃបុណ្យ ស្របពេលកំណាត់ផ្លូវក្រវាត់ក្រុងបើកឱ្យធ្វើចរាចរណ៍ appeared first on Kampuchea Thmey Daily.

កុំភ្លេចចូលភ្លក្សក្រឡានសំរោងក្នុង បើបានឆ្លងកាត់ខេត្តបាត់ដំបង

អ៊ិន ពិសី — Sat, 18 Mar 2023 01:30:39 +0000

ក្រឡាន គឺជាឈ្មោះអាហារម្យ៉ាង ភាគច្រើនគេបានស្គាល់នៅពេលមកដល់ទឹកដីខេត្តបាត់ដំបង ពិសេសក្នុងឃុំសំរោងក្នុង ស្រុកឯកភ្នំ ដែលតំបន់នោះ ចាស់ៗ ធ្វើលក់តាំងពីសម័យដើមរៀងមក រហូតមកទល់សព្វថ្ងៃនេះ។

ស្ត្រីម្នាក់ឈ្មោះ រុំ ផារី អាយុ ៥៤ ឆ្នាំ រស់នៅភូមិសំរោងក្នុង ឃុំសំរោងក្នុង ស្រុកឯកភ្នំ ដែលជាអ្នកប្រកបមុខរបរដុតក្រឡាននេះដែរ បានរៀបរាប់ថា គាត់បានប្រកបមុខរបរនេះជាង ២០ ឆ្នាំមកហើយ ចំណេះនេះគឺខ្មោចម្ដាយគាត់បានបន្សល់ទុកឲ្យ។ កាលពីគាត់នៅក្មេង ម្ដាយគាត់ជាអ្នកដុតក្រឡាននៅក្នុងតំបន់នេះ ហើយគាត់ជាអ្នកទូលទៅលក់នៅសាលាតាអន។

លុះចូលមកដល់សម័យបច្ចុប្បន្ន គាត់ក៏បានបន្តវេននូវមុខរបរនេះតទៅទៀត ដែលសព្វថ្ងៃគឺលក់ដាច់ខ្លាំងនៅថ្ងៃបុណ្យផ្សេងៗ។ ហើយម្យ៉ាងសព្វថ្ងៃក៏មានភ្ញៀវទេសចរបរទេសទៅកម្សាន្ត និងភ្លក្សក្រឡានសំរោងដែរ ដោយសារតែវាគឺជាអាហារម្យ៉ាងដែលគេច្រកអង្ករដំណើបលាយផ្សំគ្រឿង ជាមួយខ្ទិះដូង ច្រកក្នុងបំពង់ឫស្សី ហើយដុតវាទាល់តែឆ្អិន ទើបច្រៀកសំបកឫស្សីចេញឲ្យស្ដើង ងាយស្រួលដល់អ្នកបរិភោគ។

ស្ត្រីរូបនេះបានបន្តថា ការប្រើប្រាស់ដើមឫស្សី គឺមានលក្ខណៈខុសគ្នាដើម្បីចម្អិនវា ប៉ុន្តែបើគាត់យកដើមឫស្សីព្រៃមកដុតក្រឡាន វាមានឱជារសឆ្ងាញ់ជាងដើមឫស្សីស្រុក បើទោះបីជាដើមឫស្សីស្រុកមានប្រភេទក្រដាសច្រើនជាងក៏ដោយ។ ស្ត្រីរូបនេះបន្ថែមថា ប៉ុន្តែមួយរយៈនេះ ការលក់ក្រឡានហាក់មានសភាពចុះខ្សោយ មិនសូវដាច់ដូចពីមុន ដោយសារបច្ចុប្បន្នអ្នកលក់ច្រើនពេក៕

អត្ថបទ ៖ សោ និយមរ័ត្ន

The post កុំភ្លេចចូលភ្លក្សក្រឡានសំរោងក្នុង បើបានឆ្លងកាត់ខេត្តបាត់ដំបង appeared first on Kampuchea Thmey Daily.

ក្រឡាន Archives - Kampuchea Thmey Daily

ក្រឡានក្រចេះ កំពុងពេញនិយមនាអំឡុងថ្ងៃបុណ្យ ស្របពេលកំណាត់ផ្លូវក្រវាត់ក្រុងបើកឱ្យធ្វើចរាចរណ៍

កុំភ្លេចចូលភ្លក្សក្រឡានសំរោងក្នុង បើបានឆ្លងកាត់ខេត្តបាត់ដំបង