ក្រុមហ៊ុនអេមរុរ៉ាយស៍ Archives - Kampuchea Thmey Daily

ក្រុមហ៊ុនបុត្រសម្ព័ន្ធអេមរុរ៉ាយស៍ ចុះកិច្ចសន្យាកសិកម្មជាមួយសហគមន៍ ៦ លើស្រូវសរីរាង្គ និងសែនក្រអូបជាង ៥ តោន នៅខេត្តមណ្ឌលគិរី

Din Thary — Thu, 21 Aug 2025 07:44:01 +0000

ក្រុមហ៊ុនសាជីវកម្មសហគមន៍កសិកម្មកម្ពុជា (CACC) ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនអេមរុរ៉ាយស៍ បានចុះហត្ថលេខាលើកិច្ចសន្យាកសិកម្មផលិតកម្ម ជាមួយសហគមន៏កសិកម្ម ចំនួន ៦ និងក្រុមផលិតរបស់គម្រោងអេមស៍ចំនួន ១៨ ក្រុម លើស្រូវសរីរាង្គ និងស្រូវសែនក្រអូប (SKO) ក្នុងបរិមាណជាង ៥ តោន (៥.០៧៦ តោន) នៅខេត្តមណ្ឌលគិរី។

នៅក្នុងកិច្ចសន្យានោះ មានកិច្ចសន្យាផលិតស្រូវសរីរាង្គប្រភេទប្រកាន់រដូវសរុបចំនួន ៤ ០៧៦ តោន លើផ្ទៃដីផលិតសរុបចំនួន ៤ ១៩៧ ហិកតា សមាជិក សរុបចំនួន ១ ៣៦៤ គ្រួសារ និងប្រភេទពូជស្រូវសែនក្រអូបសរុបចំនួន ១ ០០០ តោន លើផ្ទៃដីផលិត សរុបចំនួន ៣៩៦,៨៥ ហ.ត ស្មើនឹង ៥៧២ គ្រួសារ ដែលសរុបស្មើនឹង ៥ ០៧៦ តោន និងមានកសិករ ចូលរួមផលិត ២ ១១៦ គ្រួសារ និងមានជនជាតិភាគតិច ប្រមាណ ៧០% នៃអ្នកផលិតសរុប។

ពិធីចុះកិច្ចសន្យានេះ គឺជាឆ្នាំទី៣ នៃដំណើរការអនុវត្តគម្រោង “ធ្វើឱ្យប្រសើរឡើងវិញនូវ កសិកម្មសរីរាង្គសម្រាប់កសិករខ្នាតតូចនៅភាគខាងជើងប្រទេសកម្ពុជា” ដែលបាននឹងកំពុងអនុវត្តរួមគ្នា រវាង CACC និងកម្មវិធីស្បៀងអាហារពិភពលោក (WFP)។ គម្រោងនេះ ទទួលបានថវិកាគាំទ្រពីកម្មវិធី កសិកម្ម និងសន្តិសុខស្បៀងសកល (GAFSP) នៃធនាគារពិភពលោក និងគម្រោង Rice Tech ដែល ទទួលបានការគាំទ្រពីរដ្ឋាភិបាលហូឡង់ ក្នុងគោលបំណងចូលរួមចំណែកលើកកម្ពស់ជីវភាពប្រជាកសិករ នៅភាគខាងជើងប្រទេសកម្ពុជា ជាពិសេសខេត្តមណ្ឌលគិរី និងខេត្តរតនៈគិរី។

ក្នុងនោះ ដើម្បីសម្រេចបាននូវគោលដៅរបស់គម្រោង ការផ្សារភ្ជាប់កិច្ចសន្យាផលិតកម្មកសិកម្ម និងខ្សែសង្វាក់ផ្គត់ផ្គង់ស្រូវ គឺដើរតួនាទីយ៉ាងសំខាន់ ក្នុងការផ្សារភ្ជាប់ផលិតផលស្រូវសរីរាង្គកសិករទៅកាន់ទីផ្សារតាមរយៈគម្រោង ដោយCACC ជាអ្នកប្រមូលទិញ និងក្រុមហ៊ុនអេមរុរ៉ាយស៍ ជាអ្នកនាំចេញផលិតផលសរីរាង្គទាំងនោះទៅកាន់ទីផ្សារអន្តរជាតិ។

លើសពីនេះ CACC ក្រោមកិច្ចសហការជាមួយមន្ទីរពាណិជ្ជកម្មខេត្តមណ្ឌលគិរី ដែលមន្ទីរបាននឹងកំពុង អនុវត្ត “គម្រោងជំរុញទីផ្សារសម្រាប់កសិករខ្នាតតូច” ហៅកាត់ថា អេមស៍ (AIMS) ក៏បានលើកទឹកចិត្ត ផងដែរសម្រាប់ក្រុមផលិតទាំងអស់ទូទាំងខេត្តមណ្ឌលគិរី និងខេត្តរតនៈគិរី ដែលចង់ផ្សារភ្ជាប់កិច្ចសន្យា ទិញ-លក់ជាមួយក្រុមហ៊ុន ជាពិសេសប្រភេទពូជស្រូវប្រណីតមានដូចជា ពូជស្រូវសែនក្រអូប និងពូជស្រូវ ផ្ការំដួលជាដើម៕

ដោយ៖ ឌិន ថារី

The post ក្រុមហ៊ុនបុត្រសម្ព័ន្ធអេមរុរ៉ាយស៍ ចុះកិច្ចសន្យាកសិកម្មជាមួយសហគមន៍ ៦ លើស្រូវសរីរាង្គ និងសែនក្រអូបជាង ៥ តោន នៅខេត្តមណ្ឌលគិរី appeared first on Kampuchea Thmey Daily.

ក្រុមហ៊ុន Amru Rice ពង្រីកការចុះកិច្ចសន្យាកសិកម្មទិញស្រូវពីកសិករ

Din Thary — Fri, 15 Aug 2025 07:50:00 +0000

លោក ឧកញ៉ា សុង សារ៉ន ប្រធានក្រុមហ៊ុន Amru Rice និងជាប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជា បានគូសបញ្ជាក់ឱ្យដឹងថា Amru Rice បានដាក់ផែនការក្នុងរដូវប្រមូលផលស្រូវចាប់ពីខែសីហា ដល់ដំណាច់ឆ្នាំ២០២៥នេះ នឹងបន្តពង្រីកចុះទិញស្រូវនៅក្នុងកិច្ចសន្យា (Contract Farming) ឱ្យបាន ៦ ម៉ឺនតោន ខណៈបច្ចុប្បន្នការងារអនុវត្តកិច្ចសន្យាកសិកម្ម គឺចាប់ផ្តើមទិញនៅក្នុងកិច្ចសន្យា ចំនួន ១៩ ០០០ តោន នៅខេត្តបាត់ដំបង កំពង់ធំ ខេត្តសៀមរាប ក៏ដូចជានៅតាមបណ្តាខេត្តមួយចំនួនផ្សេងទៀត។

ថ្លែងមកកាន់«កម្ពុជាថ្មី» លោកឧកញ៉ា សុង សារ៉ន បានមានប្រសាសន៍ថា ការងារអនុវត្តកិច្ចសន្យាកសិកម្ម យើងចាប់ផ្តើមចុះកិច្ចសន្យាទិញស្រូវកសិកម្មចំនួន ១៩ ០០០ តោន នៅខេត្តបាត់ដំបង កំពង់ធំ និងខេត្តសៀមរាប។ ក្នុងនោះខេត្តបាត់ដំបងអាចមានចំនួន ១៥ ០០០តោន ហើយនៅខេត្តចំនួនពីរផ្សេងទៀតអាចក្នុងរង្វង់ ៤ ០០០ ពាន់ នេះគឺជាការចាប់ផ្តើមលើកទី១ ដែលបានចុះកិច្ចសន្យាជាមួយសហភាពកសិកម្ម។

ដោយឡែក សម្រាប់តម្លៃ គឺគោរពទៅតាមគោលការណ៍របស់រាជរដ្ឋាភិបាល តម្លៃគោលសម្រាប់ស្រូវស្រងែ ល្អលេខ១ ក្នុងតម្លៃ ៨០០៛ ក្នុងមួយគីឡូក្រាម លេខ២ តម្លៃ ៧៨០៛ ក្នុងមួយគីឡូក្រាម ហើយបូកនិងតម្លៃបន្ថែមលើកទឹកចិត្តសម្រាប់ស្រូវសែនក្រអូប លេខ១ តម្លៃ ១ ១០០៛ ក្នុងមួយគីឡូក្រាម និងលេខ២ តម្លៃ ១ ០៦០៛ ក្នុងមួយគីឡូក្រាម បូកនិងតម្លៃលើកទឹកចិត្តស្រូវស្រងែ ៤០ រៀល / គីឡូក្រាម និងស្រូវសែនក្រអូប ៧២រៀល / គីឡូក្រាម។

លោកឧកញ៉ា បានបញ្ជាក់ដែរថា «ចំនួននេះមិនច្រើននោះទេ ប្រសិនបើធៀបទៅនិងចំនួនស្រូវដែលកសិករបានប្រមូលផលគឺមានចំនួនច្រើនខ្លាំង ប៉ុន្តែនេះជាការចូលរួមមួយជាមួយប្រជាកសិករដែលបានបង្កបង្កើនផលជុំវិញរោងម៉ាស៊ីនកិនស្រូវនៅស្រុកសង្កែ ខេត្តបាត់ដំបង។ ព្រោះទិន្នផលនៅស្រូវនៅស្រុកសង្កែ មានចំនួនច្រើន ដូច្នេះការងារនេះក៏បានចូលរួមមួយចំណែកទិញស្រូវពីប្រជាកសិករ ក៏ដូចជាការបណ្ដុះបណ្ដាល ជួយកាត់បន្ថយចំណាយរបស់ពលរដ្ឋ និងបង្កើនទិន្នផលដល់ពលរដ្ឋ»។

ទន្ទឹមនេះ បន្ទាប់ពីចុះហត្ថលេខានៅខេត្តបាត់ដំបង លោកឧកញ៉ា ក៏នឹងបន្តទៅចុះហត្ថលេខាជាមួយសហគមន៍នៅខេត្តមណ្ឌលគិរី ដែលនិងបន្តការទិញនៅក្នុងរដូវកាលនេះ អាចចំនួន ៥ ទៅ ៦ ពាន់តោន កន្លងមកធ្លាប់តែជាខេត្តមួយមិនមានស្រូវ ក្លាយទៅជាខេត្តមួយមានស្រូវវិលជុំ ដូចជាផ្ការំដួល និងសែនក្រអូប និងស្រូវស្រងែ ជាដើម។

បន្ថែមពីនេះ លោកឧកញ៉ា ក៏នឹងបន្តការងារចុះហត្ថលេខាកិច្ចសន្យាកសិកម្មនេះនៅខេត្តព្រះវិហារបន្តទៀត ព្រោះកន្លងមកដោយសារតែមានជម្លោះព្រំដែនទើបធ្វើឱ្យការងារនេះមានភាពយឺតយ៉ាវបន្តិច ប៉ុន្តែនឹងចាប់ផ្តើមឡើងវិញនៅក្នុងខែកញ្ញា នៅពេលដែលសភាពការមានភាពធូរស្រាលឡើងវិញ។

លោកឧកញ៉ា បានបញ្ជាក់ថា «ក្នុងនោះខេត្តព្រះវិហារ គឺគ្រោងចុះកិច្ចសន្យាទិញប្រមាណជាង ២ ម៉ឺនតោនជាប្រភេទស្រូវសរីរាង្គ ដែលគ្រោងនឹងចុះហត្ថលេខានៅដើមខែកញ្ញា ឆ្នាំ២០២៥ នេះ។ ហេតុដូចនេះហើយ សរុបទៅចំនួនដែលចុះហត្ថលេខានៅទូទាំងតំបន់ដែលមានរោងម៉ាស៊ីនកិនស្រូវនៅក្បែរនោះ គឺមានចំនួនជាង ៦ ម៉ឺនតោន រាប់ចាប់ពីពេលច្រូតកាត់ ក្នុងខែសីហា រហូតដល់ខែធ្នូ ឆ្នាំ២០២៥»។

សូមជម្រាបថា នៅថ្ងៃទី១៤ ខែសីហា ឆ្នាំ២០២៥ តំណាងឱ្យក្រុមហ៊ុនអេមរុរាយស៍ លោកឧកញ៉ាបានអញ្ជើញចុះកិច្ចសន្យាកសិកម្មទិញស្រូវជាមួយសភាពសហគមន៍ កសិកម្មបាត់ដំបង់ ចំនួន ១៩,០០០ តោន នៅទីស្នាក់ការសហគមន៍កសិកម្មរាំងកេសី។ ក្នុងកិច្ចសន្យាទិញនោះ តម្លៃស្រូវគោលលេខ ១ នៅស្រែ ស្រូវស្រងៃ ៨០០ រៀល / គីឡូក្រាម, ស្រូវសែនក្រអូប ១១០០ រៀល / គីឡូក្រាម តម្លៃស្រូវលេខ ២ នៅស្រែ ស្រូវស្រងៃលេខ២ តម្លៃ ៧៤០ រៀល / គីឡូក្រាម ស្រូវសែនកនរអូបលេខ ២ តម្លៃ១០៦០ រៀល/គីឡូក្រាម ដោយបូកនូវប្រាក់លើកទឹកបន្ថែមដល់កសិករ និងសហគមន៍កសិកម្ម ស្រូវស្រងៃ ៤០ រៀល / គីឡូក្រាម ស្រូវសែនក្រអូប ៧២រៀល / គីឡូក្រាម។

ក្នុងនោះដែរ ទិន្នផលជាមធ្យមស្រូវស្រងែបាន ៧ តោន/ហិតា ប្រើជីគីមី ២០០ គីឡូ បូកជីធម្មជាតិ ១៥០ គីឡូ ឬ ដើមចក្រស្នា។ ដោយឡែក ជាមធ្យម ស្រូវសែនក្រអូបបាន ៦ តោន / ហិតា ប្រើជីគីមី ១៥០ គីឡូ បូកជីធម្មជាតិ ១៥០ គីឡូក្រាម ឬ ចក្រង់ស្វា៕

ដោយ៖ ឌិន ថារី

The post ក្រុមហ៊ុន Amru Rice ពង្រីកការចុះកិច្ចសន្យាកសិកម្មទិញស្រូវពីកសិករ appeared first on Kampuchea Thmey Daily.

ក្រុមហ៊ុនអេមរុរ៉ាយស៍ ទិញស្រូវស្ដង់ដារប្រមាណជាង ២០០ តោន ពីកសិករក្នុងមួយថ្ងៃ

deth leng — Wed, 15 Jan 2025 08:20:22 +0000

ចាប់ពីដើមខែមករា ឆ្នាំ២០២៥នេះ រដូវកាលប្រមូលផលស្រូវបាននិងកំពុងបន្តនៅទូទាំងប្រទេស ហើយស្របពេលគ្នានេះ ក្រុមហ៊ុនអេមរុរ៉ាយស៍សាខាខេត្តបាត់ដំបង ក៏បាននិងកំពុងបន្តប្រមូលទិញស្រូវស្ដង់ដារផលិតកម្មស្រូវប្រកបដោយនិរន្ដរភាព (SPR) ប្រភេទក្រអូបពូជខ្មែរ ក្នុងបរិមាណប្រមាណ២០០ ទៅ២៥០តោន ក្នុងមួយថ្ងៃ ពីសហភាពសហគមន៍កសិកម្មបាត់ដំបង (BUAC) ជាមួយនឹងការផ្តល់ជូនតម្លៃបុព្វលាភ។

សូមបញ្ជាក់ផងដែរថា សហភាពសហគមន៍កសិកម្មបាត់ដំបង គឺជាដៃគូសហការយ៉ាងសកម្មមួយរបស់អេមរុរ៉ាយស៍ តាមរយៈកិច្ចសន្យាកសិកម្មតាំងពីឆ្នាំ២០១៧មកម្ល៉េះ និងបានទទួលនូវការគាំទ្រផ្នែកបច្ចេកទេសលើការកសាង និងពង្រីកសមត្ថភាពលើការដាំដុះស្រូវឱ្យស្របតាមស្តង់ដារ និងទីផ្សារ តាមរយៈវគ្គបណ្តុះបណ្តាលនានា ក្នុងគោលដៅកសាងនូវការអភិវឌ្ឍន៍ប្រកបដោយភាពធន់រយៈពេលវែងដល់សហភាព និងសមាជិកដែលជាកសិករខ្នាតតូច។

នៅថ្ងៃទី១៣ ខែមករា ឆ្នាំ២០២៥ តំណាង AFD នៃកម្មវិធីវ៉ត់ហ្វ័រខេម បានចុះមកទស្សនកិច្ចទៅលើការប្រមូលទិញស្រូវស្ដង់ដារផលិតកម្មស្រូវប្រកបដោយនិរន្ដរភាព (SRP) រវាងក្រុមហ៊ុនអេមរុរ៉ាយស៍សាខាខេត្តបាត់ដំបង និងសហភាពសហគមន៍កសិកម្មបាត់ដំបង។

កម្មវិធីវ៉តហ្វ័រខេម បានគាំទ្រនិងសម្របសម្រួលជាមួយសហភាពសហគមន៍កសិកម្មបាត់ដំបងទៅ លើផលិតផលកសិកម្មដូចជា ផលិតកម្មស្រូវប្រកបដោយនិរន្ដរភាព បូករួមទាំងផលិតកម្មដំណាំគម្របដី និងការផ្សព្វផ្សាយដំណាំគម្របដីផងដែរ៕

The post ក្រុមហ៊ុនអេមរុរ៉ាយស៍ ទិញស្រូវស្ដង់ដារប្រមាណជាង ២០០ តោន ពីកសិករក្នុងមួយថ្ងៃ appeared first on Kampuchea Thmey Daily.

ក្រុមហ៊ុនអាមេរិកចាប់ដៃជាមួយក្រុមហ៊ុនក្នុងស្រុកបង្កើតរោងចក្រកែច្នៃកន្ទក់នៅកម្ពុជា

May Kunmakara — Tue, 10 Dec 2024 02:19:40 +0000

ក្រុមហ៊ុន Stabil Nutrition LLC របស់អាមេរិក និងក្រុមហ៊ុនក្នុងស្រុក Amru Rice (Cambodia) បានបោះទុនវិនិយោគរួមគ្នាក្នុងការសាងសង់រោងចក្រកែច្នៃកន្ទក់ដើម្បីធ្វើការនាំចេញទៅកាន់ទីផ្សារសហរដ្ឋអាមេរិក។

ការលើកឡើងអំពីផែនការវិនិយោគរួមគ្នានេះធ្វើឡើងក្នុងជំនួបរវាងលោកឧបនាយករដ្ឋមន្រ្តី ស៊ុន ចាន់ថុល ដែលជា អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) ជាមួយលោក សុង សារ៉ន ប្រធានក្រុមហ៊ុន Amru Rice (Cambodia) និង លោក Michael A. Tarrasch ប្រធានក្រុមហ៊ុន Stabil Nutrition LLC នៅទីស្តីការរបស់ CDC កាលពីថ្ងៃទី៩ ខែធ្នូ។

បើយោងតាម CDC ក្រុមហ៊ុន Amru Rice និងក្រុមហ៊ុន Stabil Nutrition LLC បានចុះអនុស្សារណៈនៃការយោគយល់គ្នាកាលពីខែកញ្ញា ឆ្នាំ២០២៤ ក្រោមអធិបតីភាពលោកឧបនាយករដ្ឋមន្ត្រី ពោលគឺអំឡុងដំណើរទស្សនកិច្ចទាក់ទាញ និងជំរុញវិនិយោគរបស់សហរដ្ឋអាម៉េរិកកាលពីខែកញ្ញា ឆ្នាំ២០២៤កន្លងទៅ។

«ដំណើរទស្សនកិច្ចរបស់ក្រុមហ៊ុនឯកជនរបស់សហរដ្ឋអាម៉េរិកមកកម្ពុជានាឱកាសនេះ បានបង្ហាញអំពីការបោះជំហានថ្មីយ៉ាងមោះមុតលើការផលិត និងកែច្នៃផលិតផលកន្ទក់សរីរាង្គរបស់ប្រទេសកម្ពុជាឱ្យស្របតាមស្តង់ដារគុណភាព និងលក្ខណៈបច្ចេកទេស ព្រមទាំងបទប្បញ្ញត្តិនានា ដើម្បីនាំចូលទៅកាន់ទីផ្សារសហរដ្ឋអាម៉េរិក»។ នេះបើតាម CDC។

លោក ស៊ុន ចាន់ថុល បានលើកឡើងអំពីកិច្ចសម្រួលវិនិយោគរបស់ក្រុមប្រឹក្សាអភិវឌ្ឍន៍កម្ពុជា និងចក្ខុវិស័យរបស់រាជរដ្ឋាភិបាលកម្ពុជាក្នុងការគាំទ្រធុរកិច្ច តាមរយៈការលើកទឹកចិត្ត និងការលើកលែងពន្ធនានាចំពោះកិច្ចវិនិយោគ។ លោកបានលើកទឹកចិត្តឱ្យក្រុមហ៊ុនទាំង២ ទទួលបានភាគជោគជ័យក្នុងកិច្ចការវិនិយោគរបស់ខ្លួនលើការកែច្នៃនិងនាំចេញកន្ទក់ពីកម្ពុជា៕

The post ក្រុមហ៊ុនអាមេរិកចាប់ដៃជាមួយក្រុមហ៊ុនក្នុងស្រុកបង្កើតរោងចក្រកែច្នៃកន្ទក់នៅកម្ពុជា appeared first on Kampuchea Thmey Daily.

ក្រុមហ៊ុន Amru Rice ចាប់ដៃជាមួយក្រុមហ៊ុនអាមេរិក លើការវិនិយាគរោងចក្រកែច្នៃកន្ទក់សរីរាង្គ

deth leng — Wed, 25 Sep 2024 04:19:31 +0000

ក្រុមហ៊ុន Amru Rice (Cambodia) ជាមួយក្រុមហ៊ុន Stabil Nutrition, LLC នៅថ្ងៃទី ២៣ ខែកញ្ញា ឆ្នាំ ២០២៤ បានចុះអនុស្សារណៈនៃការយោគយល់ លើការវិនិយាគរោងចក្រកែច្នៃកន្ទក់សរីរាង្គ។

លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានអញ្ជើញជាអធិបតីក្នុងពិធីចុះហត្ថលេខាលើអនុស្សារណៈនៃការយោគយល់គ្នា រវាងក្រុមហ៊ុន Amru Rice (Cambodia) តំណាងដោយ ឧកញ៉ា សុង សារ៉ន អគ្គនាយកក្រុមហ៊ុន ជាមួយនឹង ក្រុមហ៊ុន Stabil Nutrition, LLC តំណាងដោយ លោក Michael Tarrasch ជាម្ចាស់ក្រុមហ៊ុន។

អនុស្សារណៈដែលបានចុះហត្ថលេខានាឱកាសនេះ នឹងដើរតួនាទីជាមូលដ្ឋានសម្រាប់កិច្ចសហការនាពេលអនាគត លើការវិនិយោគបង្កើតរោងចក្រកែច្នៃកន្ទក់សរីរាង្គនៅកម្ពុជា ដោយប្រើប្រាស់គ្រឿងចក្រ និងបច្ចេកទេសរបស់សហរដ្ឋអាម៉េរិក។

យោងតាមសហព័ន្ធស្រូវអង្ករកម្ពុជា(CRF) នៅក្នុងរយៈពេល៨ខែដើមឆ្នាំនេះ កម្ពុជាបាននាំចេញអង្ករបានចំនួនសរុប ៤១២ ០២៣ តោន គិតជាទឹកប្រាក់ជាង៣០៥,១៥ លានដុល្លារទៅកាន់ទីផ្សារគោលដៅចំនួន ៦៥ប្រទេស ទាំងនៅក្នុងតំបន់ និងលើសកលលោក៕

The post ក្រុមហ៊ុន Amru Rice ចាប់ដៃជាមួយក្រុមហ៊ុនអាមេរិក លើការវិនិយាគរោងចក្រកែច្នៃកន្ទក់សរីរាង្គ appeared first on Kampuchea Thmey Daily.

ក្រុមហ៊ុននាំចេញអង្ករ ចុះកិច្ចសន្យាទិញស្រូវផ្ការំដួល និងសែនក្រអូប០១ ពីកសិករជាង ៨០០ តោន

deth leng — Fri, 20 Sep 2024 10:13:15 +0000

ក្រុមហ៊ុនអេមរុរ៉ាយស៍ និងក្រុមហ៊ុនសាជីវកម្មសហគមន៍កសិកម្មកម្ពុជា(CACC) នៅថ្ងៃទី ១៨ ខែកញ្ញា ឆ្នាំ ២០២៤ បានចុះកិច្ចសន្យាលើការផលិត និងផ្គត់ផ្គង់ស្រូវសរីរាង្គប្រភេទផ្ការំដួល និងសែនក្រអូប០១ ប្រមាណ ៨១៦តោន ជាមួយសហគមន៍កសិកម្មចំនួន៤ និងពូជគ្រឹះ ១៥ តោន ជាមួយសហគមន៍កសិកម្មចំនួន១ នៃខេត្តកំពង់ឆ្នាំង ដែលសរុបទាំង៥សហគមន៍ ស្មើនឹងចំនួនអ្នកផលិតប្រមាណ២៧៣ គ្រួសារ មានផ្ទៃដីសរុប ៥៥៥ហិកតា។

ពិធីចុះកិច្ចសន្យាផលិតកម្មកសិកម្មនេះ ត្រូវបានរៀបចំឡើងក្រោមវត្តមាន លោក ប្រាក់ លាងហួរ អនុប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំង តំណាង ងិន ហ៊ុន ប្រធានមន្ទីរ, និងមានការចូលរួមពីលោកស្រី យឹម សុខា ប្រធានការិយាល័យកសិឧស្សាហកម្ម នៃមន្ទីរកសិកម្មខេត្តកំពង់ឆ្នាំង, លោក ឆុង សុផល ប្រធានគម្រោង FNN, លោក កង ឃឿង ប្រធានគម្រោងអេមរុរ៉ាយស៍ និងCACC រួមជាមួយនឹងវត្តមានរបស់ប្រធាន និងតំណាងសហគមន៍កសិកម្ម និងដៃគូពាក់ព័ន្ធនានាសរុបប្រមាណ២០រូប។

ពិធីចុះហត្ថលេខានេះ ត្រូវបានរៀបចំឡើងក្នុងគោលបំណងផ្សារភ្ជាប់ខ្សែច្រវ៉ាក់ផ្គត់ផ្គង់ស្រូវសរីរាង្គ និងការផលិតពូជគ្រឹះ ប្រភេទនាងអុក នាងអំ ម្លិះក្រហម និងស្រង៉ែ ក្នុងខេត្តកំពង់ឆ្នាំង រវាងសហគមន៍កសិកម្ម និងក្រុមហ៊ុនអេមរុរ៉ាយស៍ និង CACC និងដើម្បីធានាបាននូវទីផ្សារដែលមានស្ថិរភាព តម្លៃប្រកួតប្រជែង និងតម្លៃបុព្វលាភជូនដល់កសិករដែលផលិតអនុលោមតាមស្តង់ដារបទដ្ឋានសរីរាង្គ ដើម្បីលើកកម្ពស់ជីវភាពរបស់ប្រជាកសិករក្នុងតំបន់៕

The post ក្រុមហ៊ុននាំចេញអង្ករ ចុះកិច្ចសន្យាទិញស្រូវផ្ការំដួល និងសែនក្រអូប០១ ពីកសិករជាង ៨០០ តោន appeared first on Kampuchea Thmey Daily.

ក្រុមហ៊ុន Amru Rice ជោគជ័យក្នុងការនាំចេញអង្ករប្រភេទថ្មី ២៥០ តោន ទៅអាល្លឺម៉ង់

deth leng — Mon, 08 Jul 2024 09:37:10 +0000

ក្រុមហ៊ុននាំចេញអង្ករ អេមរុ រ៉ាយ (Amru Rice) ទទួលបានជោគជ័យក្នុងការនាំចេញអង្ករសែនក្រអូបកម្ពុជាស្តង់ដារប្រកបដោយនិរន្តភាព(SRP) ជើងដំបូងទៅកាន់ប្រទេសអាល្លឺម៉ង់ចំនួន ១០ កុងទីនន័រ ដែលមានទម្ងន់ប្រមាណ ២៥០ តោន។

លោក កាន់ គន្ធី អគ្គនាយករងក្រុមហ៊ុន អេមរុរ៉ាយស៍ ថ្លែងប្រាប់កម្ពុជាថ្មីនៅថ្ងៃទី ០៨ ខែកក្កដា ឆ្នាំ ២០២៤ នេះថា អង្ករសែនក្រអូបកម្ពុជាស្តង់ដារប្រកបដោយនិរន្តភាព មានតម្លៃខ្ពស់ជាងអង្ករធម្មតា ដែលដាំដុះកាត់បន្ថយការបំភាយឧស្ម័នពុលទៅក្នុងបរិយាកាស។

លោកបញ្ជាក់ថា នៅឆ្នាំនេះ ក្រុមហ៊ុន Amru Rice មានផែនការនាំចេញប្រមាណ ២ ពាន់ ទៅ ៣ ពាន់តោន និងគ្រោងបង្កើនការនាំចេញនៅឆ្នាំខាងមុខ។

កម្ពុជាទទួលបានចំណូលប្រមាណ ២៨៧ លានដុល្លារ ពីការនាំចេញអង្ករនៅឆមាសទី០១ ឆ្នាំ ២០២៤ កើនឡើង ២,៧៤% បើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមរបាយការណ៍របស់អគ្គនាយកដ្ឋានកសិកម្ម។

សម្រាប់ការនាំចេញអង្ករគឺទៅកាន់ប្រទេស និងតំបន់ចំនួន ៦០ ក្នុងនោះប្រទេសចិននៅតែជាអ្នកទិញដ៏សំខាន់ជាងគេ បន្ទាប់មកគឺនាំទីផ្សារអឺរ៉ុប និងទីផ្សារ៧ក្នុងតំបន់អាស៊ាន៕

អត្ថបទ៖ ឡេង ដេត

The post ក្រុមហ៊ុន Amru Rice ជោគជ័យក្នុងការនាំចេញអង្ករប្រភេទថ្មី ២៥០ តោន ទៅអាល្លឺម៉ង់ appeared first on Kampuchea Thmey Daily.

បន្សុទ្ធពូជស្រូវបុរាណនាងអុក នាងអំ និងដំណើបខ្មៅ ដើម្បីរក្សាកេរ្តិ៍ឈ្មោះ និងទាញយកទីផ្សារសម្រាប់កសិករខ្មែរ

Sophal Tuon — Sat, 16 Sep 2023 10:02:31 +0000

ក្រុមហ៊ុនអេមរុរ៉ាយស៍ បានរៀបចំកម្មវិធីបន្សុទ្ធគ្រាប់ពូជស្រូវ ដែលមានភាពធន់នឹងអាកាសធាតុ ជាមួយកសិករនៅខេត្តព្រះវិហារ។

ជាជំហានដំបូងនៃការចាប់ផ្តើមគម្រោងស្រាវជ្រាវ និងអភិវឌ្ឍរបស់អេមរុរ៉ាយស៍ ពោលគឺ “កម្មវិធីបន្សុទ្ធគ្រាប់ពូជស្រូវ ដែលមានភាពធន់នឹងអាកាសធាតុ” ដែលរួមមានពូជស្រូវនាងអុក នាងអំ និងដំណើបខ្មៅ ជាពូជស្រូវបុរាណខ្មែរ និងមានភាពធន់ទៅនឹងអាកាសធាតុ នាថ្ងៃទី១៥ ខែកញ្ញា ឆ្នាំ២០២៣ បានរៀបចំនូវកិច្ចប្រជុំផ្សព្វផ្សាយជូនដល់សហគមន៍រមទមសាមគ្គី ដែលមានទីតាំងនៅឃុំរមទម ស្រុករវៀង ខេត្តព្រះវិហារ ក្រោមវត្តមានរបស់លោក ឈៀង ប៊ុនទត មន្រ្តីជំនាញលើគម្រោងស្រាវជ្រាវ និងអភិវឌ្ឍពូជស្រូវ។

តាមរយៈកិច្ចប្រជុំផ្សព្វផ្សាយនេះ ក្រុមការងារអេមរុរ៉ាយស៍ បានកំណត់តំបន់បន្សុទ្ធពូជនាងអុកជាមួយកសិករស្ម័គ្រចិត្តចូលរួម ចំនួន៣ភូមិ គឺភូមិស្វាយដំណាក់ចាស់ ភូមិស្វាយដំណាក់ថ្មី និងភូមិបង្កើនផល ដែលកំណត់យកផ្ទៃដីចំនួនពី១០ទៅ១៥ហិកតា។ ចំពោះពូជនាងអំ ក្រុមហ៊ុន បានកំណត់តំបន់បន្សុទ្ធ នៅភូមិត្រពាំងទន្ទឹម ភូមិទួលរវៀង ភូមិអូរទ្រលោក លើផ្ទៃដីរបស់កសិករចំនួន១៥ហិកតា។

ជាមួយគ្នានេះ ក្រុមហ៊ុនអេមរុរ៉ាយស៍បានបន្តលើកទឹកចិត្តប្រធានសហគមន៍ឱ្យចូលរួមផ្សព្វផ្សាយពីកម្មវិធីបន្សុទ្ធពូជនេះ និងបន្តប្រមូលកសិករស្ម័គ្រចិត្តចុះឈ្មោះចូលរួមបន្ថែម ដើម្បីសម្រេចឱ្យបានតាមគោលដៅ ដែលគ្រោងទុកក្នុងឆ្នាំ២០២៣ គឺការបន្សុទ្ធពូជនាងអំ លើស្រែកសិករឱ្យបានចំនួន៥០តោន ពូជស្រូវនាងអុក លើស្រែកសិករឱ្យបានចំនួន១០តោន និងពូជស្រូវ ដំណើបខ្មៅ លើស្រែកសិករឱ្យបានចំនួន១០តោន។ មិនតែប៉ុណ្ណោះ ក្រោយពីទទួលបានផលពីការបន្សុទ្ធគ្រាប់ពូជទាំង៣ប្រភេទនេះ អេមរុរ៉ាយស៍ នឹងយកទៅដាំដុះលើស្រែបង្ហាញ ដែលជាកូនស្រែស៊ីម៉ង់នៅឯរោងចក្រអេមរុរ៉ាយស៍ខេត្តកំពង់ធំផងដែរ។

សូមបញ្ជាក់ថា កម្មវិធីបន្សុទ្ធគ្រាប់ពូជស្រូវរបស់អេមរុរ៉ាយស៍នេះ នឹងចាប់ផ្តើមពីខែកញ្ញា ឆ្នាំ២០២៣ រហូតដល់ដំណាច់ឆ្នាំ២០២៣ ជាការសាកល្បង រួចនឹងបន្តទៅឆ្នាំបន្តបន្ទាប់ទៀត ដើម្បីសម្រេចឱ្យបាននូវពូជស្រូវដែលមានប្រភព និងគុណភាពច្បាស់លាស់ និងជាពិសេស អេមរុរ៉ាយស៍ប្តេជ្ញាចូលរួមចំណែកនូវការនាំយកនូវពូជបុរាណនេះឡើងមកវិញ ដើម្បីរក្សានូវកេរ្តិ៍ឈ្មោះ និងទាញយកទីផ្សារសម្រាប់ពូជទាំងនេះដល់កសិករខ្មែរ៕

The post បន្សុទ្ធពូជស្រូវបុរាណនាងអុក នាងអំ និងដំណើបខ្មៅ ដើម្បីរក្សាកេរ្តិ៍ឈ្មោះ និងទាញយកទីផ្សារសម្រាប់កសិករខ្មែរ appeared first on Kampuchea Thmey Daily.