ក្លិបបាល់ទះវិសាខា Archives - Kampuchea Thmey Daily

កីឡាករ សឿន ហេង ប្រកាសទទួលបង្ហាត់សិស្សដែលចង់ហ្វឹកហាត់ជាមួយរូបគេ

Sina Noun — Wed, 08 Apr 2026 03:27:57 +0000

ស្មាត់ស្រគត់ស្រគំរបស់វិសាខា សឿន ហេង បានប្រកាសទទួលបង្ហាត់សិស្សចាប់ពីពេលនេះតទៅសម្រាប់អ្នកដែលស្រឡាញ់ចូលចិត្ត និងចង់ហ្វឹកហាត់ជាមួយរូបគេអាចទំនាក់ទំនងទៅកាន់ខ្លួនបាន។

កីឡាករ សឿន ហេង

កីឡាករឆ្នើមរបស់វិសាខាគឺ សឿន ហេង បានប្រកាសនៅលើហ្វេសបុករបស់ខ្លួនថា ចាប់ទទួលបង្ហាត់សិស្សហើយចាប់ពីពេលនេះតទៅ។ គេឃើញមិត្តរួមអាជីពជាច្រើនសម្ដែងការអបអរសារទរចំពោះដំណឹងមួយនេះ និងលើកទឹកចិត្តឲ្យចូលរួមពង្រីកផ្សព្វផ្សាយកីឡាបាល់ទះនេះ និងជួយបង្កើតធនធានបន្ថែមឲ្យបានកាន់តែច្រើនថែមទៀត។

កីឡាករសេរីចាស់ខាងលើនេះបើទោះជាមិនសូវបានកម្ពស់ ប៉ុន្តែទម្រង់ម៉ាត់ផ្ដាច់ និងការចាប់សេវាគឺល្អថែមទាំងជួយកាងក្រុមបានច្រើនទៀតផងនាពេលកន្លងមក។ ស្មាត់ពីខេត្តព្រៃវែងរូបនេះត្រូវបានអ្នកគាំទ្រសរសើរថាមានសេវាលឿនធ្ងន់ល្អ និងសូម្បីទាំងកីឡាកររួមអាជីពបាល់ផ្លូវការ និងក្រៅផ្លូវការសុទ្ធតែនិយាយដូចគ្នា។

សឿន ហេង និងក្រុមវិសាខា

យ៉ាងណារូបគេមិនសូវលេចធ្លោមួយរយៈពេលចុងក្រោយនេះដោយសារតែញុំញីរបួសស្នាទើបធ្វើឲ្យរូបគេមិនសូវបានលេងពេញ ឬជួយក្រុមបានច្រើននោះឡើយ។

បញ្ជាក់ដែរថា ប្រសិនបើអ្នកចង់ហ្វឹកហាត់ជាមួយ សឿង ហេង ដែលជាកីឡាករជម្រើសជាតិបាល់ទះកម្ពុជា និងជាស្មាត់របស់វិសាខាអាចទំនាក់ទំនងទៅកាន់ហ្វេសបុករបស់គេគឺ Heng Visakha ឬលេខទូរសព្ទ 069 346 394៕

កីឡាករ សឿន ហេង

អត្ថបទដោយ៖ នួន ស៊ីណា

The post កីឡាករ សឿន ហេង ប្រកាសទទួលបង្ហាត់សិស្សដែលចង់ហ្វឹកហាត់ជាមួយរូបគេ appeared first on Kampuchea Thmey Daily.

កីឡាករ ស ពិសី សម្ដែងការខកចិត្តចំពោះខ្លួនឯងដែលមិនអាចជួយក្លឹបក្នុងការប្រកួតពានរង្វាន់ធំៗនៅពេលខាងមុខ

Sina Noun — Sat, 24 Jan 2026 07:51:10 +0000

កីឡាករឆ្នើមរបស់ក្លឹបបាល់ទះវិសាខា ស ពិសី សម្ដែងការខកចិត្តជាខ្លាំងចំពោះខ្លួនឯងដែលមានរបួសនៅពេលនេះមិនអាចចូលរួមជួយលេងឲ្យក្លឹបដើម្បីប្រជែងពានរង្វាន់ធំៗនៅពេលឆាប់ៗខាងមុខនេះ។

កីឡាករ ស ពិសី

ស ពិសី បានឲ្យដឹងថា ខ្លួនមិនសប្បាយចិត្ត និងខកចិត្តចំពោះខ្លួនឯងដែលមានរបួសមិនអាចចូលជួយក្រុមនៅពេលប្រកួតប្រជែងពានរង្វាន់ធំៗដូចជា ពានសម្ដេច ក្រឡាហោម ពានរង្វាន់តេជោលីគ និងពានរង្វាន់មួយចំនួនទៀត។

ស្មាត់រូបនេះបន្តទៀតថា វ័យកំពុងពេញលេង និងក្លឹបកំពុងត្រូវការកម្លាំងផង ប៉ុន្តែខ្លួនឯងបែរជាជួបរឿងមានរបួសបែបនេះទៅវិញ។ ពិសី សុំទោសចំពោះថ្នាក់ដឹកនាំក្លឹបដែលខ្លួនមិនអាចចូលរួមជួយក្លឹបបានក្នុងការប្រកួតប្រជែងពានរង្វាន់ខាងមុខនេះ។

របួសជើងស្ដាំងរបស់ ពិសី

បញ្ជាក់ដែរថា កីឡាករ ស ពិសី បានរបួសដាច់ ACL អំឡុងការប្រកួតពានរង្វាន់សប្បុរសធម៌ជួយជនភៀសសឹកកាលពីថ្ងៃទី១៧ ខែមករា ឆ្នាំ២០២៦។ រូបគេបានវះកាត់រួចរាល់ផងដែរកាលពីថ្ងៃទី២០ ខែមករា ឆ្នាំ២០២៦ និងត្រូវសម្រាកព្យាបាលប្រហែល ៩ខែទើបអាចវិលត្រឡប់ចូលទីលានវិញបាន៕

អត្ថបទដោយ៖ នួន ស៊ីណា

The post កីឡាករ ស ពិសី សម្ដែងការខកចិត្តចំពោះខ្លួនឯងដែលមិនអាចជួយក្លឹបក្នុងការប្រកួតពានរង្វាន់ធំៗនៅពេលខាងមុខ appeared first on Kampuchea Thmey Daily.

រកឃើញក្រុមខ្លាំងជួប វិសាខា ក្នុងវគ្គពាក់កណ្តាលផ្តាច់ព្រ័ត្រពាន ប៉ូលិសអន្តរជាតិ នៅវៀតណាម

Kosal Sem — Fri, 29 Aug 2025 02:39:54 +0000

ការប្រកួតវគ្គសន្សំពិន្ទុក្នុងពូលពានរង្វាន់ International Police Volleyball Tournament ឆ្នាំ ២០២៥ នៅប្រទេស វៀតណាម បានបញ្ចប់វគ្គសន្សំពិន្ទុក្នុងពូលហើយ ខណៈក្រុមបាល់ទះ វិសាខា ស្ថិតក្នុងចំណោមក្រុមទាំង ៤ ដែលទទួលបានកៅអីឡើងទៅកាន់វគ្គពាក់កណ្តាលព្រ័ត្រ។

ក្រុមបាល់ទះ វិសាខា

ក្រុមបាល់ទះ វិសាខា បានឡើងទៅកាន់វគ្គពាក់កណ្តាលផ្តាច់ព្រ័ត្រ ក្នុងនាមជាក្រុមកំពូលតារាងពូល A ដោយឆ្លងកាត់ ២ ប្រកួតឈ្នះទាំង ២ ប្រកួត។ ក្រុម The Cong-Tan Cang ឈរលេខ ២ ក្នុងពូល ដោយឆ្លងកាត់ ២ ប្រកួតពួកគេឈ្នះ ១ និងចាញ់ ១។

តារាងចំណាត់ថ្នាក់ពូល A

ដោយឡែកពូល B ក្រុមខ្លាំងមកពី ឥណ្ឌូណេស៊ី Jakarta Bhayangkara ស្ថិតនៅកំពូលតារាង ដោយឆ្លងកាត់ ២ ប្រកួត ពួកគេឈ្នះទាំង ២ ប្រកួត។ ចំណែកក្រុម Vietnam People’s Police ស្ថិតនៅលេខ ២ ដោយឆ្លងកាត់ ២ ប្រកួត ពួកគេឈ្នះ ១ និងចាញ់ ១។

តារាងចំណាត់ថ្នាក់ពូល B

យ៉ាងណាមិញ សម្រាប់គូប្រកួតក្នុងវគ្គពាក់កណ្តាលផ្តាច់ព្រ័ត្រក៏បានរកឃើញជាផ្លូវការហើយដែរ ក្នុងនោះក្រុម វិសាខា នឹងត្រូវជួបជាមួយក្រុម Vietnam People’s Police។ រីឯក្រុម Jakarta Bhayangkara នឹងត្រូវជួបក្រុម The Cong-Tan Cang។

គួរបញ្ជាក់ថា ការប្រកួតវគ្គពាក់កណ្តាលផ្តាច់ព្រ័ត្រពាន ប៉ូលិសអន្តរជាតិ នឹងធ្វើឡើងនៅថ្ងៃទី ២៩ ខែ សីហា នេះ ដោយក្រុម វិសាខា ត្រូវជួបជាមួយក្រុម Vietnam People’s Police ម៉ោង ៤ ល្ងាច។ ចំណែក ១ គូទៀត ក្រុម Jakarta Bhayangkara ត្រូវជួបក្រុម The Cong-Tan Cang នៅម៉ោង ៦ ល្ងាច៕

ទិដ្ឋភាពប្រកួត

អត្ថបទ៖ សេម កុសល

The post រកឃើញក្រុមខ្លាំងជួប វិសាខា ក្នុងវគ្គពាក់កណ្តាលផ្តាច់ព្រ័ត្រពាន ប៉ូលិសអន្តរជាតិ នៅវៀតណាម appeared first on Kampuchea Thmey Daily.

ក្រុម ឥណ្ឌូណេស៊ី Jakarta Bhayangkara ជាឧសគ្គធំរបស់ វិសាខា ពានប៉ូលិសអន្តរជាតិ នៅវៀតណាម

Kosal Sem — Thu, 28 Aug 2025 09:05:27 +0000

ក្រុមបាល់ទះមកពី ឥណ្ឌូណេស៊ី Jakarta Bhayangkara ត្រូវបានគេចាត់ទុកជាឧបសគ្គធំបំផុតរបស់ក្រុមបាល់ទះ វិសាខា ក្នុងពានរង្វាន់ International Police Volleyball Tournament ឆ្នាំ ២០២៥ នៅប្រទេស វៀតណាម។

ក្រុមបាល់ទះវិសាខា

ក្រុមបាល់ទះ វិសាខា បានកក់កៅអីឡើងទៅកាន់វគ្គពាក់កណ្តាលផ្តាច់ព្រ័ត្រពានរង្វាន់ ប៉ូលិសអន្តរជាតិ ជាមួយក្រុម The Cong-Tan Cang ជាផ្លូវការហើយ បន្ទាប់ពីឆ្លងកាត់ ២ ប្រកួត ឈរលេខ ១ ក្នុងពូល A ដោយបានយកឈ្នះលើក្រុម The Cong-Tan Cang ៣ សិតទល់នឹង ១ និងប្រកួតចុងក្រោយកាលពីថ្ងៃ ពុធ ទី ២៧ ខែ សីហា ឆ្នាំ ២០២៥ ម្សិលមិញ បានយកឈ្នះលើក្រុម Lao Ministry of Public Security ក្នុងលទ្ធផល ៣ សិតទល់នឹង ០។

ចំណាត់ថ្នាក់ពូល A

បើងាកមកមើលពូល B វិញ ក៏បានរកឃើញ ២ ក្រុមរួចរាល់ហើយដែរ ដែលបានកក់កៅអីឡើងទៅកាន់វគ្គពាក់កណ្តាលផ្តាច់ព្រ័ត្រ ដ្បិតនៅសល់ ១ ប្រកួតទៀតក៏ដោយ រួមមានក្រុម Jakarta Bhayangkara និង Ha-Noi។ ប៉ុន្តែក្រុមទាំង ២ នៅមិនទាន់ដឹង ថាតើក្រុមណាមួយ ដែលនឹងត្រូវជួបក្រុម វិសាខា ក្នុងវគ្គពាក់កណ្តាលផ្តាច់ព្រ័ត្រនៅឡើយទេ ដោយត្រូវរង់ចាំពួកគេប្រកួតគ្នា ក្នុងការប្រកួតចុងក្រោយប្រចាំពូល B នាល្ងាចម៉ោង ៤ ថ្ងៃទី ២៨ ខែ សីហា ។

សម្រាប់ វិសាខា អាចនឹងមានឱកាសជួបក្រុម Jakarta Bhayangkara របស់ ឥណ្ឌូណេស៊ី នៅវគ្គពាក់កណ្តាលផ្តាច់ព្រ័ត្រ ឬនៅវគ្គផ្តាច់ព្រ័ត្រ ប្រសិនបើក្រុមទាំង ២ ធ្វើបានល្អដូចគ្នា។ ដ្បិតក្រុមទាំង ២ មិនទាន់ដឹង ថាអាចបានជួបគ្នា ឬក៏អត់ក៏ដោយ ប៉ុន្តែក្រុម Jakarta Bhayangkara ត្រូវបានគេមើលឃើញជាក្រុមខ្លាំងមួយប្រចាំពានរង្វាន់នេះ មិនខុសពី វិសាខា ឡើយ។

កីឡាករក្រុម Jakarta Bhayangkara

Jakarta Bhayangkara ជាក្រុមបាល់ទះដ៏ខ្លាំងមួយនៅក្នុងប្រទេស ឥណ្ឌូណេស៊ី បច្ចុប្បន្ន។ ក្លិបនេះទើបបង្កើតឡើងនៅឆ្នាំ ២០២២ ប៉ុណ្ណោះ ប៉ុន្តែពួកគេបានបង្ហាញសក្តានុពលយ៉ាងខ្លាំងក្លា ដោយនៅរដូវកាល ២០២៣-២០២៤, ២០២៤-២០២៥ ពួកគេបានឈ្នះជើងឯកលីគ ឥណ្ឌូណេស៊ី Indonesia Proliga ២ រដូវកាលជាប់គ្នា។ កាលពីពេលថ្មីៗនេះ ពួកគេទើបតែបានឈ្នះមេដាយមាសព្រឹត្តិការណ៍ World Police and Fire Games 2025 នៅ សហរដ្ឋអាមេរិក ទៀតផង។

បើក្រឡេកទៅមើលសមាសភាពកីឡាករវិញ ពួកគេមានកីឡាករល្អៗជាច្រើន ប៉ុន្តែមានសមាជិកក្រុមជម្រើសជាតិ ឥណ្ឌូណេស៊ី ២ នាក់ ដែលគួរឱ្យចាប់អារម្មណ៍បំផុត ដូចជាអ្នកវាយផ្តាច់ Agil Angga Anggara និង អ្នកលើកបាល់ Alfin Daniel Pratama។

កីឡាករក្រុម Jakarta Bhayangkara

គួរឱ្យដឹងថា ការប្រកួតវគ្គពាក់កណ្តាលផ្តាច់ព្រ័ត្រពាន ប៉ូលិសអន្តរជាតិ នេះ នឹងធ្វើឡើងនៅថ្ងៃទី ២៩ ខែ សីហា ឆ្នាំ ២០២៥ ស្អែកនេះ៕

អត្ថបទ៖ សេម កុសល

The post ក្រុម ឥណ្ឌូណេស៊ី Jakarta Bhayangkara ជាឧសគ្គធំរបស់ វិសាខា ពានប៉ូលិសអន្តរជាតិ នៅវៀតណាម appeared first on Kampuchea Thmey Daily.

ផុល រតនៈ ក្រុមទាំងមូលកំពុងពុះកញ្ជ្រោលរង់ចាំការប្រកួតស្អែកនេះប៉ះម្ចាស់ផ្ទះវៀតណាម

Sina Noun — Mon, 25 Aug 2025 03:24:51 +0000

កីឡាករ ផុល រតនៈ ថាក្រុមទាំងមូលបានត្រៀមខ្លួនរួចរាល់ហើយ និងរង់ចាំយ៉ាងពុះកញ្ជ្រោលចំពោះការប្រកួតស្អែកនេះជាមួយក្រុមម្ចាស់ផ្ទះវៀតណាម នៃពានរង្វាន់ International Police Volleyball Tournament 2025។

កីឡាករ ផល រតនៈ

ផុល រតនៈ បានឲ្យដឹងថា ការស្នាក់នៅហូបចុកនៅឯវៀតណាមនេះគឺល្អ និងមិនមានចោទជាបញ្ហាអ្វីនោះទេ ស្របពេលក្រុមទាំងមូលបានហ្វឹកហាត់មួយពេលមកហើយ។ និយាយពីការហ្វឹកហាត់គឺក្រុមទាំងមូលបានហ្វឹកហាត់ខ្លាំង លំបាក ជាយូរហើយមក ដូច្នេះមិនមានអ្វីប្លែក ឬជាការត្រៀមខ្លួនឲ្យហួសនេះនោះទេ។

ដោយសារលទ្ធផលមិនល្អរបស់ក្រុមជម្រើសជាតិកម្ពុជានៅ SEA V League កន្លងទៅនេះបានធ្វើឲ្យក្រុមមានចិត្តចង់ស្ដារមុខមាត់ឡើងវិញ។ ដូច្នេះម្នាក់ៗកំពុងពុះកញ្ជ្រោលចង់ឲ្យឆាប់ដល់ការប្រកួតនៅថ្ងៃស្អែកនេះណាស់។

រូបភាពផេកសហព័ន្ធបាល់ទះ

អ្នកលេងបាល់ដេញរបស់ក្រុមវិសាខារូបនេះបន្ថែមទៀតថា ចំពោះសមត្ថភាពក៏ក្រុមវៀតណាមស្អែកនេះមិនទាន់ដឹងច្បាស់ថាល្អដល់កម្រិតណាដែរ។ ប៉ុន្តែបានត្រឹមដឹងថាមានកីឡាករមួយរូបជាអតីតជម្រើសជាតិ។

ក្រុមទាំងពីរពូល

លទ្ធផលនៅថ្ងៃស្អែកយ៉ាងណានោះ រតនៈ មិនទាន់ហ៊ានអះអាងនោះឡើយទេបានត្រឹមដឹងថាក្រុមទាំងមូលបានត្រៀមខ្លួនរួចរាល់សម្រាប់ការប្រកួតពានរង្វាន់ International Police Volleyball Tournament នេះហើយ និងចង់ឈ្នះជូនអ្នកគាំទ្រកម្ពុជាឡើងវិញ។

កីឡាករ ផល រតនៈ

បញ្ជាក់ដែរថា ក្រុមវិសាខារបស់កម្ពុជា នឹងធ្វើការប្រកួតដំបូងជាមួយក្រុមវៀតណាម The Cong Tan Cang នៅថ្ងៃទី២៦ ខែសីហា ស្របពេលប្រកួតទី២ នឹងប៉ះក្រុមឡាវ Lao Ministry Of Public Security ថ្ងៃទី២៧ ខែសីហា ឆ្នាំ២០២៥ នៅទីក្រុងហូជីមិញ។ វិសាខា របស់កម្ពុជាគឺស្ថិតនៅពូល A ជាមួយក្រុម Cong Tan Cang ក្រុម Lao Ministry Of Public Security ចំណែកពូល B មានក្រុម Vietnam People’s Police ក្រុម Ha-NOI ក្រុម Jakarta Phayangkara Presisi Club។ ពានរង្វាន់នេះលេងចាប់ពីថ្ងៃទី២៦ ដល់ ៣០ ខែសីហា ឆ្នាំ២០២៥ នៅឯទីក្រុងហូជីមិញ ប្រទេសវៀតណាម៕

អត្ថបទដោយ៖ នួន ស៊ីណា

The post ផុល រតនៈ ក្រុមទាំងមូលកំពុងពុះកញ្ជ្រោលរង់ចាំការប្រកួតស្អែកនេះប៉ះម្ចាស់ផ្ទះវៀតណាម appeared first on Kampuchea Thmey Daily.

ការពារជើងឯកនៅតៃវ៉ាន់ វិសាខា ប៉ះ ក្រុមខ្លាំងកូរ៉េខាងត្បូង ជាជើងឯកលីគ៥សម័យ

Kosal Sem — Mon, 28 Apr 2025 01:35:44 +0000

ក្រុមបាល់ទះ Cheonan Hyundai Capital Skywalkers មកពីប្រទេស កូរ៉េខាងត្បូង ត្រូវបានចាត់ទុកជាគូប្រជែងដ៏ខ្លាំងបំផុតរបស់ក្រុមបាល់ទះ វិសាខា នៅក្នុងពានរង្វាន់ Win Streak Volleyball Invitational (WSVI) 2025 នៅតៃវ៉ាន់។

ក្រុមបាល់ទះវិសាខា

ការរៀបចំពានរង្វាន់ WSVI ឆ្នាំ ២០២៥ នេះហាក់មានការប្រែប្រួលច្រើន ដោយសារមានការចូលរួមសុទ្ធតែក្រុមខ្លាំងៗនៅក្នុងតំបន់អាស៊ី។ ជាក់ស្តែងក្រុមស្ថិតនៅពូល A ជាមួយ វិសាខា មាន Hyundai Capital Skywalkers (កូរ៉េខាងត្បូង), MBSA Pelican (ម៉ាឡេស៊ី) និង Men’s Volleyball Team for FISU (តៃវ៉ាន់)។ ចំណែកពូល B វិញមាន Win Streak (តៃវ៉ាន់), Jarkata (ឥណ្ឌូណេស៊ី), Nakhornatchasima (ថៃ) និង Korea Armed Force (កូរ៉េខាងត្បូង)។

ក្នុងចំណោមគូប្រជែងទាំង ៣ នៅក្នុងពូល A របស់ក្រុមការពារតំណែងជើងឯក វិសាខា គឺក្រុម Skywalkers ត្រូវបានគេចាត់ទុកជាគូប្រជែងដ៏ខ្លាំងក្លាបំផុត ខណៈពួកគេទើបតែបានឈ្នះជើងឯកលីគកំពូលកូរ៉េខាងត្បូង (V-League) កាលពីពេលថ្មីៗនេះ។

កីឡាករក្រុម Skywalkers

ក្រុម Skywalker នេះ គឺធ្លាប់លើកពានលីគ និងខាប់ របស់ប្រទេស កូរ៉េខាងត្បូងសឹងតែរាប់ភ្លេចហើយ។ ពួកគេធ្លាប់ឈ្នះពាន V-League ៥ លើក រដូវកាល ២០០៥-២០០៦, ២០០៦-២០០៧, ២០១៦-២០១៧, ២០១៨-២០១៩ និង ២០២៤-២០២៥។ មិនត្រឹមតែប៉ុណ្ណោះពួកគេធ្លាប់ឈ្នះពាន Korea Volleyball Super League ៥ លើក និងពាន Kovo Cup ៥ លើក ក្នុងឆ្នាំ ២០០៦, ២០០៨, ២០១០, ២០១៣ និង ២០២៤។

អ្វីដែលចាប់អារម្មណ៍មួយទៀត គឺពួកគេមានគ្រូបង្វឹកជាសញ្ជាតិ បារាំង លោក Philippe Blain ដែលជាអតីតគ្រូជម្រើសជាតិ បារាំង និងជប៉ុន។ ចំណែកកីឡាកររបស់ពួកគេទាំង ២០ នាក់វិញ មានបរទេស ២ នាក់ គឺកីឡាករសញ្ជាតិ ចិន Xinpeng Deng និងអ្នកវាយផ្តាច់ដ៏ឆ្នើមសញ្ជាតិ គុយបា Leonardo Martinez និងក្រៅពីនោះសុទ្ធតែជាកីឡាករសញ្ជាតិ កូរ៉េខាងត្បូង។

កីឡាករក្រុម Skywalkers

សូមបញ្ជាក់ជាថ្មីថា ក្រុមបាល់ទះ វិសាខា នឹងត្រូវប្រកួតវគ្គសន្សំពិន្ទុក្នុងពូលចំនួន ៣ ប្រកួត ដោយប្រកួតទី ១ ជួបជាមួយក្រុម MBSA Pelican នៅថ្ងៃទី ៣០ ខែ មេសា, ប្រកួតទី ២ ត្រូវជួបជាមួយក្រុមតៃវ៉ាន់ Men’s Volleyball Team for FISU នៅថ្ងៃទី ១ ខែ ឧសភា និងប្រកួតទី ៣ ជួប Sky Walkers នៅថ្ងៃទី ២ ខែ ឧសភា៕

Poster ប្រកួត

អត្ថបទ៖ សេម កុសល

The post ការពារជើងឯកនៅតៃវ៉ាន់ វិសាខា ប៉ះ ក្រុមខ្លាំងកូរ៉េខាងត្បូង ជាជើងឯកលីគ៥សម័យ appeared first on Kampuchea Thmey Daily.

ក្រៅពីបរទេស៤រូប វិសាខា នាំយក ម៉េងឡាយ, ម៉េងហួង បន្ថែមត្រៀមការពារជើងឯកនៅតៃវ៉ាន់

Kosal Sem — Tue, 22 Apr 2025 02:47:14 +0000

ក្លិបបាល់ទះវិសាខា បាននាំចូលកីឡាករថ្មីដល់ទៅ ៦ នាក់ មានទាំងបរទេស និងខ្មែរ ដើម្បីត្រៀមការពារជើងឯកឆ្នាំចាស់ Win Streak Volleyball Invitational (WSVI) 2025 នៅតៃវ៉ាន់។

ក្រុមបាល់ទះវិសាខា

កាលពីពេលថ្មីៗនេះ ក្លិបបាល់ទះវិសាខា បានប្រកាសជាផ្លូវការអំពីការនាំចូលកីឡាករបរទេសចំណូលថ្មី ៤ រូប ដែលក្នុងនោះមានកីឡាករសញ្ជាតិ បារាំង ៣ នាក់ ដូចជា Titouan Hall é តួនាទីជាអ្នកវាយផ្តាច់, Fran çois Rebeyrol តួនាទីជាអ្នកវាយផ្តាច់ដូចគ្នា និង Thomas Gill តួនាទីជាអ្នកប៉ះសេ។ ចំណែក ១ រូបគេទៀត គឺជាកីឡាករជនជាតិ អាល្លឺម៉ង់ មានឈ្មោះ Sebastian R ösler តួនាទីជាអ្នកការពារ ឬអ្នកបាំងបាល់។

ក្រុមបាល់ទះវិសាខា

កីឡាករ បារាំង Fran çois Rebeyrol និង Thomas Gill ធ្លាប់មកចូលរួមជាមួយក្រុមបាល់ទះ វិសាខា កាលពីឆ្នាំ ២០២៤ ម្តងហើយ ដែលកាលនោះលេងក្នុងពាន WSVI នេះដូចគ្នា។ ដោយឡែក Titouan Hall é និង Sebastian R ösler គឺជាកីឡាករថ្មីតែម្តង ដែលទើបមកចូលរួមជាមួយ វិសាខា លើកដំបូង។

កីឡាករបរទេសចំណូលថ្មីរបស់ វិសាខា

ក្រៅពីកីឡាករបរទេសទាំង ៤ ខាងលើ វិសាខា ក៏បានខ្ចីជើងកីឡាករអ្នកវាយផ្តាច់ដ៏មានទេពកោសល្យរបស់ កម្ពុជា ២ រូបទៀតផងដែរ គឺ មឿន ម៉េងឡាយ និង ធី ម៉េងហួង ពីក្រុមបាល់ទះក្រសួងមហាផ្ទៃ។

មឿន ម៉េងឡាយ និងធី ម៉េងហួង

គួរបញ្ជាក់ថា ក្រុមបាល់ទះ វិសាខា នឹងត្រូវប្រកួតវគ្គសន្សំពិន្ទុក្នុងពូលចំនួន ៣ ប្រកួត ដោយប្រកួតទី ១ ជួបជាមួយក្រុម MBSA Pelican របស់ ម៉ាឡេស៊ី នៅថ្ងៃទី ៣០ ខែ មេសា, ប្រកួតទី ២ ត្រូវជួបជាមួយក្រុមតៃវ៉ាន់ Men’s Volleyball Team for FISU នៅថ្ងៃទី ១ ខែ ឧសភា និងប្រកួតទី ៣ Cheonan Hyundai Capital Sky Walkers របស់ កូរ៉េខាងត្បូង នៅថ្ងៃទី ២ ខែ ឧសភា៕

កាលវិភាគប្រកួត

អត្ថបទ៖ សេម កុសល

The post ក្រៅពីបរទេស៤រូប វិសាខា នាំយក ម៉េងឡាយ, ម៉េងហួង បន្ថែមត្រៀមការពារជើងឯកនៅតៃវ៉ាន់ appeared first on Kampuchea Thmey Daily.

ក្លិបបាល់ទះវិសាខា Archives - Kampuchea Thmey Daily

កីឡាករ​ សឿន​ ហេង​ ប្រកាស​ទទួល​បង្ហាត់​សិស្ស​ដែល​ចង់​ហ្វឹកហាត់​ជា​មួយ​រូប​គេ​

រកឃើញក្រុមខ្លាំងជួប វិសាខា ក្នុងវគ្គពាក់កណ្តាលផ្តាច់ព្រ័ត្រពាន ប៉ូលិសអន្តរជាតិ នៅវៀតណាម

ក្រុម ឥណ្ឌូណេស៊ី Jakarta Bhayangkara ជាឧសគ្គធំរបស់ វិសាខា ពានប៉ូលិស​អន្តរជាតិ នៅ​វៀតណាម

ផុល​ រតនៈ​ ក្រុម​ទាំង​មូល​កំពុង​ពុះកញ្ជ្រោល​​រង់ចាំ​ការ​ប្រកួត​ស្អែក​នេះ​ប៉ះ​ម្ចាស់ផ្ទះ​វៀតណាម​

ការពារ​ជើង​ឯក​នៅ​តៃវ៉ាន់ វិសាខា ប៉ះ ក្រុមខ្លាំងកូរ៉េខាងត្បូង ជា​ជើង​ឯក​លីគ​៥សម័យ

ក្រៅពីបរទេស៤រូប វិសាខា នាំ​យក​ ម៉េងឡាយ, ម៉េងហួង បន្ថែមត្រៀម​ការពារជើង​ឯក​នៅតៃវ៉ាន់

កីឡាករ សឿន ហេង ប្រកាសទទួលបង្ហាត់សិស្សដែលចង់ហ្វឹកហាត់ជាមួយរូបគេ

ក្រុម ឥណ្ឌូណេស៊ី Jakarta Bhayangkara ជាឧសគ្គធំរបស់ វិសាខា ពានប៉ូលិសអន្តរជាតិ នៅវៀតណាម

ផុល រតនៈ ក្រុមទាំងមូលកំពុងពុះកញ្ជ្រោលរង់ចាំការប្រកួតស្អែកនេះប៉ះម្ចាស់ផ្ទះវៀតណាម

ការពារជើងឯកនៅតៃវ៉ាន់ វិសាខា ប៉ះ ក្រុមខ្លាំងកូរ៉េខាងត្បូង ជាជើងឯកលីគ៥សម័យ

ក្រៅពីបរទេស៤រូប វិសាខា នាំយក ម៉េងឡាយ, ម៉េងហួង បន្ថែមត្រៀមការពារជើងឯកនៅតៃវ៉ាន់