ក្រៅពីបរទេស៤រូប វិសាខា នាំ​យក​ ម៉េងឡាយ, ម៉េងហួង បន្ថែមត្រៀម​ការពារជើង​ឯក​នៅតៃវ៉ាន់

ក្លិបបាល់ទះវិសាខា បាននាំចូលកីឡាករថ្មីដល់ទៅ ៦ នាក់ មានទាំងបរទេស និងខ្មែរ ​ដើម្បី​ត្រៀម​ការពារ​ជើងឯក​​ឆ្នាំ​ចាស់​ Win Streak Volleyball Invitational (WSVI) 2025 នៅតៃវ៉ាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីពេលថ្មីៗនេះ ក្លិបបាល់ទះវិសាខា បានប្រកាសជាផ្លូវការអំពីការនាំចូលកីឡាករបរទេសចំណូលថ្មី ៤ រូប ដែលក្នុងនោះមានកីឡាករសញ្ជាតិ បារាំង ៣ នាក់ ដូចជា Titouan Hall é តួនាទីជាអ្នកវាយផ្តាច់, Fran çois Rebeyrol តួនាទីជាអ្នកវាយផ្តាច់ដូចគ្នា និង Thomas Gill តួនាទីជាអ្នកប៉ះសេ។ ចំណែក ១ រូបគេទៀត គឺជាកីឡាករជនជាតិ អាល្លឺម៉ង់ មានឈ្មោះ Sebastian R ösler តួនាទីជាអ្នកការពារ ឬអ្នកបាំងបាល់។

កីឡាករ បារាំង Fran çois Rebeyrol និង Thomas Gill ធ្លាប់មកចូលរួមជាមួយក្រុមបាល់ទះ វិសាខា កាលពីឆ្នាំ ២០២៤ ម្តងហើយ ដែលកាលនោះលេងក្នុងពាន WSVI នេះដូចគ្នា។ ដោយឡែក Titouan Hall é និង Sebastian R ösler គឺជាកីឡាករថ្មីតែម្តង ដែលទើបមកចូលរួមជាមួយ វិសាខា លើកដំបូង។

ក្រៅពីកីឡាករបរទេសទាំង ៤ ខាងលើ វិសាខា ក៏បានខ្ចីជើងកីឡាករអ្នកវាយផ្តាច់ដ៏មានទេពកោសល្យរបស់ កម្ពុជា ២ រូបទៀតផងដែរ គឺ មឿន ម៉េងឡាយ និង ធី ម៉េងហួង ពីក្រុមបាល់ទះក្រសួងមហាផ្ទៃ។

គួរបញ្ជាក់ថា ក្រុមបាល់ទះ វិសាខា នឹងត្រូវប្រកួតវគ្គ​សន្សំពិន្ទុ​ក្នុង​ពូល​ចំនួន​ ៣ ប្រកួត ដោយប្រកួតទី ១ ជួបជាមួយក្រុម MBSA Pelican របស់ ម៉ាឡេស៊ី នៅថ្ងៃទី ៣០ ខែ មេសា, ប្រកួតទី ២ ត្រូវជួបជាមួយក្រុមតៃវ៉ាន់​ Men’s Volleyball Team for FISU នៅថ្ងៃទី ១ ខែ ឧសភា និងប្រកួតទី ៣ Cheonan Hyundai Capital Sky Walkers របស់ កូរ៉េខាងត្បូង នៅថ្ងៃទី ២ ខែ ឧសភា៕

អត្ថបទ៖ សេម កុសល