ប្រតិបត្តិការនេះធ្វើឡើងនៅ កាលពីថ្ងៃទី២៣ ខែឧសភា ឆ្នាំ២០២៦ នៅផ្ទះលេខ០៥ ផ្លូវ A០២ ក្នុងបុរីជីបម៉ុង ហ្គ្រេន ភ្នំពេញស៊ីធី ស្ថិតតាមបណ្តោយផ្លូវ១០១៩ ក្នុងភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ។

តាមប្រភពពីសមត្ថកិច្ចបានឱ្យដឹងថា ក្នុងការចុះត្រួតពិនិត្យនេះ កម្លាំងបានប្រទះឃើញជនជាតិចិនសរុបចំនួន ៥នាក់ ជាបុរស ក្នុងនោះមានជនជាតិចិនចំនួន ៣នាក់ ដែលត្រូវបានសង្ស័យថាកាន់កាប់លិខិតឆ្លងដែនក្លែងក្លាយ។

ក្នុងប្រតិបត្តិការនេះ សមត្ថកិច្ចបានដកហូតវត្ថុតាងជាច្រើនរួមមាន៖ កុំព្យូទ័រយួរដៃ ចំនួន ០១គ្រឿងលិខិតឆ្លងដែនជនជាតិចិនក្លែងក្លាយ ចំនួន ៤៨ក្បាលបណ្ណការងារជនបរទេស ចំនួន ៤៥កាត ,ត្រា ចំនួន ០៥ ,ស្ទិកឃ័របញ្ជាក់សុពលភាពទិដ្ឋាការ (Visa) មួយចំនួន , តាំប៉ុងពណ៌ក្រហម ចំនួន ០២ , ទឹកថ្នាំត្រាពណ៌ក្រហម ចំនួន ០៣ដប។

ក្រោយការសាកសួរបឋម សមត្ថកិច្ចបានសន្និដ្ឋានថា ជនសង្ស័យខាងលើមានជាប់ពាក់ព័ន្ធនឹងបទល្មើសក្លែងឯកសារសាធារណៈ ដែលរួមមានការរក្សាទុកលិខិតឆ្លងដែនក្លែងក្លាយ សៀវភៅការងារជនបរទេសក្លែងក្លាយ និងទិដ្ឋាការស្នាក់នៅ (Visa) ក្លែងក្លាយសម្រាប់ជនជាតិចិន។

បន្ទាប់ពីបញ្ចប់ប្រតិបត្តិការ និងដោយមានការអនុញ្ញាតពីលោក លី គីមស៊ាន ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ សមត្ថកិច្ចបានសម្រេចនាំខ្លួនជនជាតិចិនទាំង ៥នាក់ រួមទាំងវត្ថុតាងទាំងអស់ ប្រគល់ទៅអធិការដ្ឋាននគរបាលខណ្ឌសែនសុខ ដើម្បីបន្តកសាងសំណុំរឿង និងអនុវត្តនីតិវិធីតាមផ្លូវច្បាប់៕ អត្ថបទ ៖សំណាង

The post អាជ្ញាធរខណ្ឌសែនសុខ ចុះបង្ក្រាបទីតាំងផលិត និង ចែក ចាយលិខិតឆ្លងដែនចិនក្លែងក្លាយ ឃាត់ជនបរទេស៥នាក់ appeared first on Kampuchea Thmey Daily.

តាមសេចក្តីប្រកាសព័ត៌មាន របស់អ្នកនាំពាក្យនៃស្នងការដ្ឋាននគរបាលរាជធានីភ្នំពេញ បានឲ្យដឹងនៅព្រលប់ថ្ងៃទី៤មិថុនា ថា ការឃាត់ខ្លួនជនសង្ស័យខាងលើ ក្រោយពីសមត្ថកិច្ចទទួលពាក្យបណ្ដឹងពីឈ្មោះ ឡេង វ៉ាន់ឌី និងធ្វើការស្រាវជ្រាវស៊ើបអង្កេត ដោយយោងតាមចម្លើយសារភាព និងប្រមូលបានភស្តុតាង បុគ្គលនេះពិតជាបានប្រព្រឹត្ត សកម្មភាពក្លែងបន្លំឯកសារសារធារណៈប្រាកដមែន។

តាមការបញ្ជាក់របស់អ្នកពាក្យ ការឃាត់ខ្លួនជនសង្ស័យ គឺសមត្ថកិច្ចអនុវត្តទៅតាមអង្គហេតុ និងអង្គច្បាប់នៃការប្រព្រឹត្តបទល្មើសដែលមានចែងក្នុងក្រមព្រហ្មទណ្ឌដោយមិនជាប់ពាក់ព័ន្ធនឹងរឿងនយោបាយ ឬការគាបសង្កត់ បំភិតបំភ័យ និងការធ្វើទុក្ខបុកម្នេញផ្នែកនយោបាយដល់សមាជិកគណបក្សនយោបាយណាមួយឡើយ។

ទន្ទឹមនេះ អ្នកនាំពាក្យនៃស្នងការដ្ឋាននគរបាលរាជធានីភ្នំពេញ ក៏បានបដិសេធ និងច្រានចោលទាំងស្រុងការចោទប្រកាន់ទាំងបំពានដោយគ្មានមូលដ្ឋានច្បាស់លាស់របស់គណបក្សភ្លើងទៀន ដែលចុះផ្សាយនៅថ្ងៃទី០៤ ខែមិថុនា ឆ្នាំ២០២៥៕

The post នគរបាលរាជធានីភ្នំពេញ ឃាត់ខ្លួនចៅសង្កាត់​រងទី២ នៃសង្កាត់ស្ទឹងមានជ័យទី១ ពាក់ព័ន្ធករណីក្លែងបន្លំឯកសារសារធារណៈ appeared first on Kampuchea Thmey Daily.

សេចក្ដីប្រកាសព័ត៌មាន ឲ្យដឹងថា នៅថ្ងៃទី២៣ ខែមិថុនា ឆ្នាំ២០២៤ អយ្យការអមសាលាដំបូងខេត្តសៀមរាប បានចាត់ការលើ សំណុំរឿងព្រហ្មទណ្ឌលេខ៨៨០ ចុះថ្ងៃទី២៣ ខែមិថុនា ឆ្នាំ២០២៤ ទាក់ទងនឹងជនជាតិវៀតណាម ១នាក់ និងជនជាតិខ្មែរ ៥នាក់ មានគ្នាសរុបចំនួន ៦នាក់ ក្នុងនោះសមត្ថកិច្ចបានឃាត់ខ្លួនចំនួន ៤នាក់ និងបក្សពួក ២នាក់បានគេចខ្លួន។

ក្រោយពីបានសួរចម្លើយជនសង្ស័យ និងពិនិត្យភស្តុតាងនានា ក្នុងសំណុំរឿង តំណាងអយ្យការបានចោទប្រកាន់លើជនសង្ស័យជនជាតិវៀតណាម១នាក់ ពីបទកាន់កាប់ និងប្រើប្រាស់អត្តសញ្ញាណប័ណ្ណសញ្ជាតិខ្មែរ ដោយខុសច្បាប់ និងប្រើប្រាស់ឯកសារសាធារណៈក្លែង ប្រព្រឹត្តនៅចំណុចសង្កាត់សំបួរ ក្រុងសៀមរាប ខេត្តសៀមរាប កាលពីអំឡុងខែតុលា ឆ្នាំ២០២៣ និងថ្ងៃទី១៤ ខែមិថុនា ឆ្នាំ២០២៤ បទល្មើសព្រហ្មទណ្ឌ ដែលមានចែងឲ្យផ្តន្ទាទោសតាមបញ្ញត្តិមាត្រា ៣០ នៃច្បាប់ស្តីពីសញ្ជាតិ និងមាត្រា ៦៣០ នៃក្រមព្រហ្មទណ្ឌ។

សម្រេចចោទប្រកាន់ជនជាតិខ្មែរ៥នាក់ ក្នុងនោះមានមុខរបរជា មន្ត្រីនគរបាលជាតិ២នាក់ សមាជិកក្រុមប្រឹក្សា សង្កាត់១នាក់ និង២នាក់ជាប្រជាពលរដ្ឋបានគេចខ្លួន ពីបទ ធ្វើអត្តសញ្ញាណប័ណ្ណសញ្ជាតិខ្មែរឱ្យជនដែល មិនមានសញ្ជាតិខ្មែរ និងក្លែងបន្លំឯកសារសាធារណៈ ប្រព្រឹត្តនៅចំណុចសង្កាត់សំបូរ ក្រុងសៀមរាប ខេត្តសៀមរាប កាលពីអំឡុងខែតុលា ឆ្នាំ២០២៣ បទល្មើសព្រហ្មទណ្ឌដែលមានចែងឱ្យផ្តន្ទាទោសតាម បញ្ញត្តិមាត្រា ៣០ នៃច្បាប់ស្តីពីសញ្ជាតិ និងមាត្រា ៦២៩ នៃក្រមព្រហ្មទណ្ឌ តាមដីកាសន្និដ្ឋានបញ្ជូនរឿង ឱ្យស៊ើបសួរលេខ ១៣៣៨ អយធ ចុះថ្ងៃទី២៣ ខែមិថុនា ឆ្នាំ២០២៤ បញ្ជូនទៅចៅក្រមស៊ើបសួរនៃសាលាដំបូងខេត្តសៀមរាប ដើម្បីចាត់ការបន្តតាមច្បាប់។

គួរឱ្យដឹងថា ក្នុងសេចក្ដីប្រកាសព័ត៌មានដដែល មិនបានបង្ហាញពីអត្តសញ្ញាណច្បាស់លាស់របស់ជនល្មើសឡើយ៕

ដោយ៖ជុន កុសល

The post តុលាការបញ្ជាឃុំខ្លួននគរបាល២រូប និងបក្សពួក ក្រោយលួចធ្វើអត្តសញ្ញាណប័ណ្ណឱ្យជនជាតិវៀតណាម appeared first on Kampuchea Thmey Daily.

នៅរសៀលថ្ងៃទី១៩ ខែមករា ឆ្នាំ២០២៤ នេះ លោកស្រីវរសេនីយ៍ឯក មូន មល្លិកា នាយការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តកំពង់ស្ពឺ បានប្រាប់កម្ពុជាថ្មីឲ្យដឹងថា «លោកស្នងការរងនគរបាលម្នាក់ ដែលបានលួចរៀបការប្រពន្ធថ្មី ត្រូវសមត្ថកិច្ចនគរបាលជំនាញប្រឆាំងការជួញដូរមនុស្សឃាត់ខ្លួននោះ បានបញ្ជូនទៅកាន់តុលាការ ដើម្បីចាត់ការតាមនិតិវិធច្បាប់»។

លោកស្រីនាយការិយាល័យ បានបញ្ចាក់ថា «ខណៈពេលនេះជនសង្ស័យត្រូវបានតំណាងអយ្យការកំពុងធ្វើការសាកសួរពាក់ព័ន្ធអំពើផិតក្បត់។ ចំណែកករណីផ្សេងទៀត គឺខាងជំនាញរបស់គេធ្វើផ្សេងទៀត»។

មន្ត្រីនគរបាលជាន់ខ្ពស់ នៃស្នងការដ្ឋាននគរបាលខេត្តកំពង់ស្ពឺ បានបង្ហើបប្រាប់ឲ្យដឹងថា នៅយប់ថ្ងៃទី១៨ ខែមករា ឆ្នាំ២០២៤ នេះថា លោកឧត្តមសេនីយ៍ ង៉ាម រី ស្នងការរងខេត្តកំពង់ស្ពឺម្នាក់ ត្រូវបានឃាត់ខ្លួនដើម្បីសាកសួរពាក់ព័ន្ធករណីក្លែងបន្លំឯកសារសាធារណៈ រៀបការប្រពន្ធថ្មី តាមបណ្តឹងរបស់ប្រពន្ធដើមដែលមិនទាន់លែងលះគ្នាដាច់ស្រឡះ។

សូមជម្រាបថា លោកឧត្តមសេនីយ៍ត្រី ង៉ាម រី ស្នងការរងទទួលជួយដឹកនាំការងារកងអន្តរាគមន៍ត្រូវបានកម្លាំងជំនាញការិយាល័យប្រឆាំងការជួញដូរមនុស្ស និងការពារអនីតិជន ឃាត់ខ្លួនតាមបញ្ជារបស់លោកព្រះរាជអាជ្ញាអមសាលាដំបូងខេត្តកំពង់ស្ពឺ ពាក់ព័ន្ធលួចការប្រពន្ធថ្មី ដោយក្លែងបន្លំឯកសារសាធារណៈ។

តាមប្រភពបានបញ្ជាក់ថា លោកស្នងការរង ង៉ាម រី បានរត់ឯកសារបញ្ជាក់ភាពពោះម៉ាយ និងស្នើសុំច្បាប់រៀបអាពារពិពាហ៍ដោយដាក់ឈ្មោះ  ឃុត វឌ្ឍនា អាយុ៥២ឆ្នាំ ទីកន្លែងកំណើត នៅភូមិខ្នរ ឃុំព្រែលាប ស្រុកមុខកំពូល ខេត្តកណ្តាល បច្ចុប្បន្ននៅផ្ទះលេខ ៣១៦E2 ផ្លូវម៉ៅស៊ីទុង ភូមិ១២ សង្កាត់បឹងសាឡាង ខណ្ឌទួលគោក រាជធានីភ្នំពេញ។

ប្រភពបន្តទៀតថា លោកឧត្តសេនីយ៍ត្រី ង៉ាម រី ត្រូវរៀបអាពារពិពាហ៍ជាមួយនារីម្នាក់ឈ្មោះ ឃ.ស. មុខរបរលក់ដូរនៅភូមិស្រែថ្នល់ ឃុំកាហែង ស្រុកសំរោងទង ដែលនឹងប្រព្រឹត្តទៅនៅថ្ងៃទី១៩ ខែមករា ឆ្នាំ២០២៤ ដោយសង់រោងការរួចរាល់ត្រៀមទទួលភ្ញៀវចូលរួមអបអរសាទរ និងរង់ចាំរាត្រីក្រេបទឹកឃ្មុំប៉ុណ្ណោះ ប៉ុន្តែសភាពការត្រូវបានផ្លាស់ប្តូរ ៣៦០ដឺគ្រេ ព្រោះបែកការដល់ប្រពន្ធដើមដែលមិនទាន់លែងលះដាច់ស្រឡះ រហូតដល់មានការឃាត់ខ្លួនតែម្តង។

ពាក់ព័ន្ធរឿងរ៉ាវខាងលើនេះ លោកឧត្តមសេនីយ៍ត្រី ង៉ាម រី ត្រូវប្រឈមមុខនឹងច្បាប់ស្តីពី ឯកពន្ធភាពបទល្មើស «ផិតប្តី-ផិតប្រពន្ធ» បទល្មើស «ស្មន់» បទល្មើស «ទ្វេពន្ធភាព» និងទោសត្រូវអនុវត្ដក្នុងច្បាប់ស្តីពី ឯកពន្ធភាព និងករណីក្លែងបន្លំឯកសារសាធារណៈក៏ត្រូវផ្តន្ទាទោសតាមច្បាប់ផងដែរ។ ចំណែករោងការរបស់លោកឧត្តមសេនីយ៍ត្រី ង៉ាម រី ស្នងការរងនគរបាលខេត្តកំពង់ស្ពឺ ដែលត្រូវទទួលភ្ញៀវនៅថ្ងៃនេះ បានរុះរើជាផ្លូវការ។

មហាជនរង់ចាំមើលថា ជោគវាសនាលោកផ្កាយ១ ស្នងការរងរូបនេះ តុលាការនឹងមានចំណាត់ការបែបណា? សូមរង់ចាំលទ្ធផលបន្តទៀត៕

អត្ថបទ៖ ភួង រដ្ឋា

The post តំណាងអយ្យការកំពុងសាកសួរលោកផ្កាយ១ ស្នងការរងខេត្តកំពង់ស្ពឺ ដែលក្លែងឯកសាររៀបការប្រពន្ធថ្មី appeared first on Kampuchea Thmey Daily.

សូម​ជម្រាប​ថា ជន​ដែល​ក្លែង​ព្រះរាជសារ​ព្រះមហាក្សត្រ នៃ​ព្រះរាជាណាចក្រ​កម្ពុជា ត្រូវ​បាន​កម្លាំង​សម​ត្ថ​កិច្ច​នគរបាល នៃ​អគ្គស្នងការ​នគរបាល​ជាតិ ស្រាវជ្រាវ និង​ឃាត់ខ្លួន​កាលពី​ថ្ងៃទី ២៩ ខែតុលា ឆ្នាំ​២០២៣ ស្ថិតនៅ​ផ្ទះសំណាក់​មួយ​កន្លែង​ទាល់​មុខ​មន្ទីរពេទ្យ​មិត្តភាព​កម្ពុជា​ចិន ហៅ មន្ទីរពេទ្យ​លោកសង្ឃ​ក្នុងភូមិបុរីកម្មករ សង្កាត់​ទឹកថ្លា ខណ្ឌ​សែន​សុខ រាជធានី​ភ្នំពេញ។

បើតាម​សម​ត្ថ​កិច្ច​ឲ្យ​ដឹងថា កាល​ថ្ងៃទី​២៦ ខែតុលា ឆ្នាំ​២០២៣ បន្ទាប់ពី​មាន​សេចក្តីប្រកាស​ព័ត៌មាន របស់​ក្រសួង​ព្រះ​បរម​រាជ វាំង បដិសេធ​ចំពោះ​លិខិត​ក្លែងបន្លំ​ជា​ព្រះរាជសារ​ចុះ​ថ្ងៃទី​២៤ ខែតុលា ឆ្នាំ​២០២៣ ដែល​ត្រូវបាន​បង្ហោះ​ចែកចាយ​ក្នុង​បណ្តាញ​សង្គម និង​ដោយមាន​បទបញ្ជា​ពី​ប្រមុខ​រាជរដ្ឋាភិបាល អគ្គ​ស្នង ការដ្ឋាន​នគរបាលជាតិ បាន​សហការ​ជាមួយ​អាជ្ញាធរ​ពាក់​ពន្ធ បើក​ប្រតិបត្តិការ​ស្រាវជ្រាវ​រហូត​ឈាន​ដល់​ការឃាត់ខ្លួន​ជន សង្ស័យ​ម្នាក់​ឈ្មោះ ហាក់ ឧ​ត្ត​ម ភេទ​ប្រុស នៅ​ថ្ងៃទី​២៩ ខែតុលា ឆ្នាំ ២០២៣។

ក្រោយពេល​ឃាត់ខ្លួន​ជនសង្ស័យ​បាន​សារភាព ថា ខ្លួន​ពិតជា​បានរៀបចំ​បង្កើត​លិខិត​ក្លែងបន្លំ​ជា​ព្រះរាជសារ ប្រាកដ​មែន ដោយ​បន្លំ​ខ្លួន​ធ្វើជា​ខ្សែ​ព្រះ​ញាតិវង្ស ទៅ​ជួល​សេវា វាយ​អត្ថបទ​តាម​កុំព្យូទ័រ​មួយកន្លែង នៅ​ម្តុំ​វិទ្យាល័យ​សម្តេច ជាស៊ីម សន្ធរម៉ុក ដោយ​ខ្លួន​ជា​អ្នកផ្តល់ នូវ​ខ្លឹមសារ និង​ឯកសារ គំរូ រួច ផ្ញើ​លិខិត​នោះ ទៅ​ឲ្យ​កូនសិស្សលោក​នៅ​វត្ត ចន្ទ​ប្ប​ជោ​ត្ត​នា​រាម ដើម្បី​និមន្ត​ព្រះ​ធម្ម វនវាសី ចន្ទ​មុនី ទៅ​សម្តែងធម៌​ទេសនា ក្នុង​ព្រះរាជ​ពិធីបុណ្យ​កឋិន​ទាន នៅ​វត្ត ទេពវិមាន ហៅ វត្ត កាន់​ទ្រង់ ស្ថិតនៅ​ឃុំ តានី ស្រុក​អង្គ​ជ័យ ខេត្តកំពត ដើម្បី​ទទួលបាន​ផល​ប្រយោជន៍​ពី​ការរៀបចំ​កម្មវិធី​បុណ្យកឋិនទាន។

ករណី​នេះ​ផង​ដែរ អគ្គស្នងការដ្ឋាន​នគ​របាល​ជាតិ សូម​អំពាវនាវ​ដល់​សា​ធារណ​ជន ឲ្យ​មានការ​ប្រុងប្រយ័ត្ន​ចំពោះ​ការចែករំលែក នូវ​ព័ត៌មាន​គ្មាន​ប្រភព​ច្បាស់លាស់ ដែល​បណ្តាល​ឲ្យ​ខ្លួន​ក្លាយជា ឈ្នាន់​បម្រើ​ដល់​ឧបាយកល​របស់ ក្រុម​ជន​ឆបោក ព្រមទាំង​ត្រូវ​ទទួល ខុសត្រូវ ចំពោះ​ច្បាប់​ថែម​ទៀតផង៕

ដោយ ៖ មករា

The post ឃុំខ្លួន​ជន​ក្លែង​ព្រះរាជសារ​ព្រះមហាក្សត្រ ពី​បទ​ឆបោក បទ​ក្លែងបន្លំ​ឯកសារ​សាធារណៈ និង​បទ​.​ប្រើប្រាស់​ឯកសារ​សាធារណៈ​ក្លែង appeared first on Kampuchea Thmey Daily.

យោងតាមរបាយការណ៍របស់អធិការដ្ឋាននគរបាលស្រុកត្រាំកក់ បានឲ្យដឹងថា នៅថ្ងៃទី១៤ ខែកុម្ភៈ ឆ្នាំ២០២៣ ប៉ុស្តិ៍នគរបាលរដ្ឋបាលត្រពាំងធំខាងជើង បានទទួលពាក្យបណ្ដឹង១ច្បាប់ពីឈ្មោះ សោម បុល ភេទស្រី អាយុ ៥១ឆ្នាំ រស់នៅភូមិសំរ៉ង ឃុំត្រពាំងធំខាងជើង ស្រុកត្រាំកក់ ខេត្តតាកែវ បានប្ដឹងទៅលើឈ្មោះ ជិន សុខជា ហៅសុផលភេទប្រុស អាយុ៣១ឆ្នាំ មានទីលំនៅនៅភូមិហង់ហេង ឃុំបឹងត្រាញ់ខាងត្បូង ស្រុកសំរោង ខេត្តតាកែវ ពីបទប្រើល្បិចក្លែងខ្លួនជាមន្ត្រីឥណទានធានាគារឆបោកប្រាក់របស់គាត់អស់ចំនួន៤១៤០ ដុល្លារអាមេរិក កាលពីកំឡុងខែវិច្ឆិកា និងខែធ្នូ ឆ្នាំ២០២២ ។

ក្រោយពីទទួលបានពាក្យបណ្ដឹងរបស់ជនរងគ្រោះ នៅវេលាម៉ោង១៦និង០០នាទី ថ្ងៃទី១៤ ខែកុម្ភៈ ឆ្នាំ២០២៣ កម្លាំងសមត្ថកិច្ចបានធ្វើការឃាត់ខ្លួនជនសង្ស័យយកមកអធិការដ្ឋាននគរបាលស្រុកត្រាំកក់ ដើម្បីធ្វើការសាកសួរ និងកសាងសំណុំរឿងតាមនីតិវិធីដើម្បីបញ្ជូនទៅស្នងការដ្ឋាននគរបាលខេត្តតាកែវចាត់ការបន្ត៕

អត្ថបទ៖ សុខុម

The post ក្លែងខ្លួនជាមន្ត្រីធនាគារ បោកលុយពលរដ្ឋជាង​៤០០០ដុល្លារ appeared first on Kampuchea Thmey Daily.