ប្រតិបត្តិការនេះធ្វើឡើងស្របតាមអនុក្រឹត្យលេខ ០៣ អនក្រ.បក របស់រាជរដ្ឋាភិបាល ស្តីពីការគ្រប់គ្រងសន្តិសុខ និងសុវត្ថិភាពតាមទីតាំងរស់នៅប្រមូលផ្តុំ ព្រមទាំងការទប់ស្កាត់ និងបោសសម្អាតបទល្មើសឆបោកតាមប្រព័ន្ធបច្ចេកវិទ្យា ដែលកំពុងត្រូវបានអាជ្ញាធរពាក់ព័ន្ធយកចិត្តទុកដាក់អនុវត្តយ៉ាងម៉ឺងម៉ាត់នៅទូទាំងប្រទេស។

ជាក់ស្តែង កម្លាំងគណៈបញ្ជាការឯកភាពរដ្ឋបាលខណ្ឌកំបូល បានចុះត្រួតពិនិត្យ និងបង្ក្រាបទីតាំងមួយកន្លែង ដែលសង្ស័យថាពាក់ព័ន្ធនឹងការរក្សាទុកសម្ភារៈសម្រាប់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams)។ ក្រៅពីនេះ សមត្ថកិច្ចក៏បានរកឃើញសម្ភារៈមួយចំនួនដែលសង្ស័យថាត្រូវបានប្រើប្រាស់សម្រាប់ការធ្វើទារុណកម្ម ជំរិតទារប្រាក់ និងការស្នាក់នៅខុសច្បាប់ផងដែរ

ក្នុងរង្វង់ប្រតិបត្តិការនោះ សមត្ថកិច្ចបានឃាត់ខ្លួនជនសង្ស័យចំនួន ៤នាក់ ដែលសុទ្ធសឹងជាជនជាតិចិន ដើម្បីសាកសួរ និងស៊ើបអង្កេតបន្ថែម។ ជាមួយគ្នានេះ កម្លាំងអនុវត្តច្បាប់បានដកហូតអាវុធខ្លីចំនួន ១ដើម ព្រមទាំងវត្ថុតាងពាក់ព័ន្ធនឹងបទល្មើសជាច្រើនទៀត ដែលត្រូវបានរក្សាទុកនៅក្នុងទីតាំងខាងលើ។

ក្រោយបញ្ចប់ប្រតិបត្តិការ ជនសង្ស័យទាំង ៤នាក់ រួមនិងវត្ថុតាងពាក់ព័ន្ធ ត្រូវបានបញ្ជូនទៅកាន់ស្នងការដ្ឋាននគរបាលរាជធានីភ្នំពេញ ដើម្បីចាត់ការបន្តតាមនីតិវិធីច្បាប់៕ អត្ថបទ សំណាង

The post អាជ្ញាធរខណ្ឌកំបូល ឃាត់ខ្លួនជនជាតិចិន៤នាក់ ដកហូតអាវុធខ្លី១ដើម និងសម្ភារៈមួយចំនួនសង្ស័យពាក់ព័ន្ធ Online Scam appeared first on Kampuchea Thmey Daily.

នៅព្រឹកថ្ងៃទី ១ ខែមិថុនា ឆ្នាំ ២០២៦ នេះ លោក ឃឹម ស៊ុនសូដា អភិបាល នៃគណៈអភិបាលខណ្ឌកំបូល បានដឹកនាំក្រុមការងារ ចុះពិនិត្យទីតាំង និង ដឹកនាំកិច្ចប្រជុំសម្រុះសម្រួលនៅទីតាំងជាក់ស្តែង ដោយមានការចូលរួមពីគូភាគីផងដែរ។

ផ្អែកតាមការសម្រុះសម្រួលពីលោក ឃឹម ស៊ុនសូដា គឺ ភាគីទាំងពីរ បានឯកភាពគោរពតាមគោលការណ៍ចំនួន ៥ ចំណុច ៖ ១.ឈ្មោះ ចាន់ សុភា (គ្រូបង្រៀន) ធ្វើការកែសម្រួលចំណតទីតាំងកង់ ម៉ូតូ និង ណែនាំដល់សិស្សដែលមករៀនឱ្យមានសណ្តាប់ធ្នាប់ល្អ។ ២.កែសម្រួលសំឡេងរំខានខាងក្នុងកុំឱ្យមានសំឡេងរំខានទៀត (យកក្រណាត់រុំជើងតុ កៅអី)។ ៣.ណែនាំសិស្សក្នុងពេលរៀនចប់ឱ្យប្រញាប់ត្រឡប់ទៅផ្ទះវិញ។ ៤.ស្នើសុំឱ្យអ្នកជិតខាងមានការយោគយល់គ្នា អធ្យាស្រ័យគ្នា ក្លាយជាអ្នកជិតខាងល្អ។ ៥.អាជ្ញាធរសង្កាត់-ភូមិ ត្រូវធ្វើការតាមដានសកម្មភាពរបស់សិស្សដែលមករៀន។

រដ្ឋបាលខណ្ឌកំបូល ក៏បានបញ្ជាក់ជូនផងដែរថា រដ្ឋបាលខណ្ឌកំបូល តែងយកចិត្តទុកដាក់ក្នុងការសម្រុះសម្រួលដោះស្រាយពាក្យបណ្ដឹង និង សំណើ សំណូមពររបស់ប្រជាពលរដ្ឋដែលស្ថិតក្នុងដែនសមត្ថកិច្ច របស់ខ្លួន ដោយពុំមានការរើសអើង ឬ ប្រកាន់និន្នាការនយោបាយណាមួយឡើយ។

គួរបញ្ជាក់ថា តាមរយៈការចុះពិនិត្យទីតាំងជាក់ស្តែង ឃើញថា ទីតាំងខាងលើជាផ្ទះល្វែង បើកបង្រៀនគួរក្រៅម៉ោង ចាប់ពីម៉ោង ១៧:០០ នាទី ដល់ម៉ោង ២០:០០ នាទី ហើយនៅជាប់ជាមួយនឹងផ្ទះ ឈ្មោះ ឡេង ដារ៉ា។ ផ្អែកតាមការលើកឡើងរបស់ឈ្មោះ លី សុខជា និង ឈ្មោះ ឡេង ដារ៉ា ជាភាគីម្ចាស់បណ្ដឹងពុំមានចេតនាប្តឹងដើម្បីស្នើសុំបិទទីតាំងបង្រៀនគួរក្រៅម៉ោងនោះទេ គ្រាន់តែសំណូមពរឱ្យកែសម្រួលចំណុចមួយចំនួនដែលរំខានដល់ការរស់ប្រចាំថ្ងៃប៉ុណ្ណោះ។ ចំពោះមូលហេតុ កន្លងមក សិស្សដែលមករៀនចតកង់ម៉ូតូគ្មានសណ្តាប់ធ្នាប់ ហើយសិស្សរៀនគួរម៉ោងបន្ទាប់ (ពុំទាន់ដល់ម៉ោងចូលរៀន) តែងលេងបាល់ និង ជិះកង់ម៉ូតូទៅវិញទៅមក អាចបង្កឱ្យមានគ្រោះថ្នាក់ជាយថាហេតុ។ ជាមួយគ្នានេះ ឈ្មោះ ឡេង ដារ៉ា មានជំងឺប្រចាំកាយ និង មានម្តាយចាស់ជរានៅផ្ទះ ហើយការបង្រៀនតែងអូសតុ កៅអី បង្កជាសំឡេងរំខាន។ កន្លងមក ឈ្មោះ ឡេង ដារ៉ា ក៏បានសំណូមពរដល់ឈ្មោះ ចាន់ សុភា ឱ្យធ្វើការណែនាំដល់សិស្សផងដែរ។ ដោយឡែកឈ្មោះ ចាន់ សុភា ជាគ្រូបើកទីតាំងបង្រៀនគួរក្រៅម៉ោងបានលើកឡើងថា កន្លងមក លោកក៏បានណែនាំដល់សិស្សដែលមករៀនគួរតាមសំណូមពររបស់ម្ចាស់បណ្ដឹងផងដែរ ប៉ុន្តែលោកពុំបានត្រួតពិនិត្យឱ្យបានដិតដល់ដោយជាប់រវល់បង្រៀន ហើយសិស្សមួយចំនួនក៏ពុំស្តាប់តាមការណែនាំឡើយ។ លោកមានការគាំទ្រយន្តការដោះស្រាយជម្លោះនៅមូលដ្ឋានក្រៅប្រព័ន្ធតុលាការ៕
អត្ថបទ ៖ ស្រីរ័ត្ន

The post ករណីគ្រូបង្រៀននៅសង្កាត់ស្នោរ ខណ្ឌកំបូល ភាគីទាំងពីរ ឯកភាពគ្នាតាមការសម្របសម្រួលរបស់អភិបាល appeared first on Kampuchea Thmey Daily.

រូបតំណាង

សូមបញ្ជាក់ផងដែរថា លោក ចាន់ សុភា ជាគ្រូនៅអនុវិទ្យាល័យមួយកន្លែង ដោយចប់ម៉ោងបង្រៀននៅសាលារដ្ឋ គាត់បានបើកបង្រៀនគួរដល់ក្មេងនៅក្រៅម៉ោង នៅផ្ទះរបស់ខ្លួនជាប្រភេទផ្ទះល្វែង នៅជាប់គ្នាៗជាមួយអ្នកខាង ដែលមានទីតាំងក្នុងបុរីមួយកន្លែង ក្នុងភូមិពង្រ សង្កាត់ស្នោរ ខណ្ឌកំបូល។ ចំពោះសំឡេងរំខាននេះអាចមកកើត មាននៅពេលលោកគ្រូអ្នកគ្រូស្រែកពន្យល់មេរៀនទៅកាន់ក្មេងៗដែលមករៀន។

បើតាមការបញ្ចាក់ពីអាជ្ញាធរ បានអោយដឹងថា ចំពោះបញ្ហាការប្ដឹងទៅទីតាំងបង្រៀនគួរក្មេងៗមួយកន្លែងនេះ អាជ្ញាធរបានហៅភាគីទាំងសងខាងមកសម្របសម្រួលគ្នា នៅសាលាសង្កាត់រួចម្ដងទៅហើយ ដោយលោកគ្រូជាម្ចាស់ទីតាំងបើកបង្រៀនគួរ បានសុំទោសដើម្បីបញ្ចាប់រឿង។ ក៏ប៉ុន្តែដោយសារភរិយារបស់គ្រូបង្រៀន មិនព្រមទទួលយកដំណោះស្រាយមួយនេះ ទើបធើ្វរឿងរ៉ាវកាន់តែវែងឆ្ងាយ។ ដោយសារតែភរិយាគាត់បាននិយាយថា គាត់មិនបានខុសអ្វីផង ហេតុអីត្រូវសុំទោស។ ទើបធ្វើឲ្យរឿងរ៉ាវមួយនេះ ត្រូវបានបញ្ជូនបន្តទៅសាលាខណ្ឌ ដើម្បីធ្វើការដោះស្រាយគ្នានៅថ្ងៃទី៣ ខែមិថុនា ឆ្នាំ២០២៦ខាងមុខនេះ៕

The post ផ្ទុះការវែកញែក រឿងប្ដឹងទីតាំងបើកបង្រៀនគួរក្មេងៗ បង្កសំឡេងរំខានដល់អ្នកជិតខាង appeared first on Kampuchea Thmey Daily.

អាជ្ញាធរ បានឲ្យដឹងថា ដើម្បីបញ្ចៀសការជន់លិចដោយទឹកភ្លៀងនារដូវវស្សាខាងមុខនេះ ដោយមានការយកចិត្តទុកដាក់ពី លោក ឃឹម ស៊ុនសូដា អភិបាល នៃគណៈអភិបាលខណ្ឌកំបូល លោក ស៊ិន វុទ្ធី ចៅសង្កាត់ភ្លើងឆេះរទេះ បានដឹកនាំក្រុមការងារសង្កាត់ រៀបចំគ្រឿងចក្រកាយដាក់ប្រព័ន្ធលូថ្មីអមសងខាងផ្លូវបេតុង ព្រំប្រទល់ប្រឡាយទទឹងថ្ងៃបុរីពិភពថ្មីសាខាទី ១ ដល់ ព្រំប្រទល់ជាប់ផ្លូវក្រវាត់ក្រុង ៦០ ម៉ែត្រ ស្ថិតនៅភូមិព្រៃកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ដែលមានប្រវែងប្រហែលចម្ងាយ ២៥០ ម៉ែត្រ។

អាជ្ញាធរ ក៏បានអំពាវនាវដល់ប្រជាពលរដ្ឋទាំងអស់ សូមមេត្តាជួយថែរក្សា អនាម័យ បរិស្ថាន ឲ្យបានល្អ ចៀសវាងចោលសំរាមគ្មានសណ្តាប់ធ្នាប់ដែលជាហេតុបង្កឲ្យស្ទះប្រព័ន្ធលូ និង ចរន្តទឹកហូរ៕
អត្ថបទ ៖ សុខា

The post រដ្ឋបាលសង្កាត់ភ្លើងឆេះរទេះ រៀបចំដាក់ប្រព័ន្ធលូថ្មីជូនប្រជាពលរដ្ឋក្នុងមូលដ្ឋាន appeared first on Kampuchea Thmey Daily.

សកម្មភាពស្តារប្រឡាយនេះ ត្រូវបានអនុវត្តឡើងក្នុងគោលបំណង បង្កើនសមត្ថភាពប្រព័ន្ធរំដោះទឹក ដើម្បីធានាឲ្យទឹកភ្លៀងអាចហូរបានល្អ ជៀសវាងការកកស្ទះ និង កាត់បន្ថយការលិចលង់ក្នុងតំបន់ប្រជាពលរដ្ឋរស់នៅ។

ប្រឡាយដែលកំពុងធ្វើការស្តារនេះ កាលពីថ្ងៃទី ១៩ ខែឧសភា ឆ្នាំ ២០២៦ ដែលមានទីតាំងចាប់ពីវត្តពោធិ៍វ័ន្ត រហូតដល់សាលាបឋមសិក្សាទួលស្នោរ ស្ថិតក្នុងភូមិពង្ររ ភូមិផ្លាំង និង ភូមិស្នោរកើត សង្កាត់ស្នោរ ខណ្ឌកំបូល រាជធានីភ្នំពេញ។ ក្នុងដំណើរការអនុវត្ត ក្រុមការងារ បានប្រើប្រាស់គ្រឿងចក្រ និង កម្លាំងមន្ត្រីពាក់ព័ន្ធ ដើម្បីកាយដី ភក់ និង កម្ចាត់ស្មៅដែលដុះរាំងស្ទះក្នុងប្រឡាយ។

លោក ទ្រី ណារ៉េត បានឲ្យដឹងថា ការស្តារប្រឡាយ និង ថែទាំប្រព័ន្ធរំដោះទឹកជាប្រចាំ គឺជាកិច្ចការសំខាន់មួយ ដើម្បីធានាឲ្យការរស់នៅរបស់ប្រជាពលរដ្ឋមានភាពងាយស្រួល និង កាត់បន្ថយផលប៉ះពាល់ដែលបង្កឡើងដោយជំនន់ទឹកភ្លៀងក្នុងរដូវវស្សា។

ជាមួយគ្នានេះ អាជ្ញាធរ ក៏បានអំពាវនាវដល់ប្រជាពលរដ្ឋចូលរួមថែរក្សាបរិស្ថាន និង សណ្តាប់ធ្នាប់សាធារណៈ ដោយមិនត្រូវបោះចោលសំរាម ឬ កាកសំណល់ផ្សេងៗ ចូលក្នុងប្រឡាយ ព្រោះអាចបង្កឲ្យមានការកកស្ទះ និង រាំងស្ទះដល់ប្រព័ន្ធហូរទឹក អាចនាំឲ្យកើតមានការលិចលង់ក្នុងតំបន់៕
អត្ថបទ ៖ សំណាង

The post រដ្ឋបាលខណ្ឌកំបូល បន្តចុះស្តារប្រឡាយ ដើម្បីបង្កើនប្រសិទ្ធភាពរំដោះទឹកភ្លៀងនារដូវវស្សា appeared first on Kampuchea Thmey Daily.

កិច្ចការនេះ ក្រុមការងារ បានធ្វើការសម្របសម្រួល និង ណែនាំដល់ប្រជាពលរដ្ឋ ក៏ដូចជាអាជីវករ ឲ្យចូលរួមរក្សាសណ្ដាប់ធ្នាប់សាធារណៈ ដោយមិនតាំងលក់ទំនិញលើចិញ្ចើមផ្លូវ ឬ ទ្រូងផ្លូវ ដែលអាចបង្កការកកស្ទះចរាចរណ៍ និង ប៉ះពាល់ដល់សោភ័ណភាព។ ជាមួយគ្នានេះ អាជ្ញាធរ ក៏បានអំពាវនាវដល់ប្រជាពលរដ្ឋ សូមចូលរួមថែរក្សាអនាម័យ បរិស្ថាន និង ទុកដាក់សំរាមឲ្យបានត្រឹមត្រូវ ដើម្បីរួមចំណែកកសាងសហគមន៍មានភាពស្អាត និង របៀបរៀបរយល្អ។

អភិបាលរងខណ្ឌកំបូល បញ្ជាក់ថា ការចុះរៀបចំសណ្ដាប់ធ្នាប់នេះ គឺជាការអនុវត្តជាប្រចាំរបស់អាជ្ញាធរខណ្ឌកំបូល ក្នុងគោលបំណងលើកកម្ពស់សោភ័ណភាពទីក្រុង សុវត្ថិភាព និង ភាពងាយស្រួលក្នុងការធ្វើដំណើររបស់ប្រជាពលរដ្ឋ។ លោកក៏បានស្នើឲ្យប្រជាពលរដ្ឋ និង អាជីវករ បន្តសហការជាមួយអាជ្ញាធរ ដើម្បីធានាបាននូវសណ្ដាប់ធ្នាប់ល្អ និង បរិស្ថានរស់នៅប្រកបដោយភាពស្អាត និង អនាម័យ៕
អត្ថបទ ៖ សំណាង

The post អាជ្ញាធរខណ្ឌកំបូល បន្តចុះរៀបចំសណ្ដាប់ធ្នាប់សាធារណៈ និង ណែនាំប្រជាពលរដ្ឋចូលរួមថែរក្សាបរិស្ថានតាមដងផ្លូវ appeared first on Kampuchea Thmey Daily.

អាជ្ញាធរបានឱ្យដឹងថា​ ដោយអនុវត្តតាមគោលការណ៍ដឹកនាំដ៏ខ្ពង់ខ្ពស់របស់លោកអភិបាល នៃគណៈអភិបាលរាជធានីភ្នំពេញ​ នៅថ្ងៃព្រហស្បតិ៍ ថ្ងៃទី២៣ ខែមេសា ឆ្នាំ២០២៦ លោក ឃឹម ស៊ុនសូដា អភិបាល នៃគណៈអភិបាលខណ្ឌកំបូល បានដឹកនាំមន្រ្តីរាជការរដ្ឋបាលខណ្ឌ និងក្រុមប្រឹក្សាសង្កាត់ ចុះស្តារប្រឡាយអមខាងជេីងផ្លូវជាតិលេខ៤​ និងប្រឡាយនានានៅក្នុងមូលដ្ឋានខណ្ឌកំបូល គោលបំណងឱ្យចរន្តទឹកហូរបានលឿន​ បញ្ជៀសទឹកជំនន់​  នារដូវវស្សា​ ។ 

អាជ្ញាធរបានបន្តថា​ ចំពោះកាកសំណល់​ ស្មៅ​ ត្រូវបានដឹកយកទៅចាក់ចោលកន្លែងទីលានចាក់សំរាម​ និងបានបាញ់ទឹកសម្អាត​ លេីដងផ្លូវដេីម្បីសោភ័ណភាព​ ក៏ដូចជាបង្ការគ្រោះថ្នាក់ផ្សេងៗ។ 

ជាមួយគ្នានោះផងដែរ​ អាជ្ញាធរបានអំពាវវនាវដល់បងប្អូនប្រជាពលរដ្ឋទាំងអស់មេត្តាវិចខ្ចប់ទុកដាក់សំរាមឱ្យបានត្រឹមត្រូវ៕

ដោយ ៖ សុខា

The post អាជ្ញាធរខណ្ឌកំបូល ដាក់គ្រឿងចក្រកាយស្តារប្រឡាយអមសងខាងផ្លូវជាតិលេខ៤ ដើម្បីត្រៀមរំដោះទឹកភ្លៀងនារដូវវស្សា appeared first on Kampuchea Thmey Daily.

កាលពីថ្ងៃទី ២២ ខែមេសា ឆ្នាំ២០២៦ អាជ្ញាធរ​ខណ្ឌកំបូល ដឹកនាំដោយលោក ទ្រី ណារ៉េត អភិបាលរងខណ្ឌទទួលការងារសាធារណៈការ បានដឹកនាំមន្ត្រីការិយាល័យសាធារណការ ដឹកជញ្ជូន អនាម័យ បរិស្ថាន និងសណ្ដាប់ធ្នាប់សាធារណៈ ព្រមទាំងអាជ្ញាធរសង្កាត់ ចុះពិនិត្យជាក់ស្តែងលើគម្រោងជួសជុល និងស្ថាបនាផ្លូវបេតុងឆ្អឹងដែកមួយខ្សែ នៅខាងក្រោយបុរីសែនមនោរម្យ រហូតដល់ភូមិកន្ទោកត្បូង ស្ថិតនៅភូមិកន្ទោកជើង និងភូមិកន្ទោកត្បូង សង្កាត់កន្ទោក ខណ្ឌកំបូល រាជធានីភ្នំពេញ ដែលជាតំបន់មានប្រជាពលរដ្ឋរស់នៅច្រើន និងមានតម្រូវការក្នុងការអភិវឌ្ឍហេដ្ឋារចនាសម្ព័ន្ធយ៉ាងចាំបាច់។

លោក ទ្រី ណារ៉េត បានបញ្ជាក់ថា គម្រោងផ្លូវនេះមានប្រវែងសរុប ៨១៤ ម៉ែត្រ ទទឹង ៥ ម៉ែត្រ និងកម្រាស់ ០,១៥ ម៉ែត្រ ដែលត្រូវបានសាងសង់ឡើងដោយគោលបំណងធ្វើឲ្យប្រសើរឡើងនូវការធ្វើដំណើររបស់ប្រជាពលរដ្ឋ កាត់បន្ថយការលំបាកក្នុងរដូវវស្សា និងជួយសម្រួលដល់ការដឹកជញ្ជូនទំនិញប្រចាំថ្ងៃ។

លោកបានបន្តថា គម្រោងស្ថាបនាផ្លូវបេតុងឆ្អឹងដែកនេះ គឺជាគម្រោងមូលនិធិអភិវឌ្ឍន៍របស់រដ្ឋបាលខណ្ឌកំបូល ដែលបង្ហាញពីការយកចិត្តទុកដាក់របស់អាជ្ញាធរមូលដ្ឋានក្នុងការកែលម្អហេដ្ឋារចនាសម្ព័ន្ធ និងបម្រើប្រជាពលរដ្ឋឲ្យកាន់តែប្រសើរឡើង។

អាជ្ញាធរខណ្ឌបានបញ្ជាក់ថា ការចុះពិនិត្យនេះមានគោលបំណងធានាឲ្យគម្រោងអនុវត្តតាមស្តង់ដារបច្ចេកទេស និងកាលវិភាគដែលបានកំណត់ ដើម្បីឲ្យគម្រោងបញ្ចប់បានដោយគុណភាព និងប្រសិទ្ធភាពខ្ពស់៕ អត្ថបទ៖សំណាង

The post អាជ្ញាធរខណ្ឌកំបូល ស្ថាបនាផ្លូវបេតុងឆ្អឹងដែកប្រវែងជាង៨០០ម៉ែត្រក្នុងសង្កាត់កន្ទោក appeared first on Kampuchea Thmey Daily.