ក្លិនស្អុយពីគំនរសំរាមនេះបានធ្វើឱ្យប៉ះពាល់យ៉ាងខ្លាំងទៅដល់សុខភាព និងការរស់នៅរបស់ប្រជាពលរដ្ឋទាំងចាស់ទាំងក្មេងដែលកំពុងប្រឈមទៅនឹងការកើតមានជំងឺឆ្លងផ្សេងៗនេះ ស្ថិតនៅលើផ្លូវបេតុង ភូមិគោកចំបក់ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ។

លោក កង វង ចៅសង្កាត់ចោមចៅទី១ បានប្រាប់ កម្ពុជាថ្មី ឲ្យដឹងថា គំនរសំរាមនេះ គឺភាគច្រើនអ្នកលក់ដូរតាមរទេះ តែងតែយកមកចោលនៅចំណុចនេះ ហើយកម្លាំងសណ្ដាប់ធ្នាប់សង្កាត់ក៏ធ្លាប់ចាប់ផាកពិន័យតាមច្បាប់អន្តរកាល ២ទៅ៣ដងរួចហើយដែរ។

លោកចៅសង្កាត់បានបន្តថា លោកតែងអោយកម្លាំងសង្កាត់លួចឆ្មក់ចាប់ជាប្រចាំចំពោះអ្នកចាក់សំរាមអនាធិបតេយ្យ ប៉ុន្តែនៅតែមានប្រជាពលរដ្ឋមួយចំនួនយកមកដាក់ចោលពាសវាលពាសកាល ហើយក៏មានជនខិលខូចបានមកហែកក្រដាសបម្រាមចោលថែមទៀតផង។

លោកចៅសង្កាត់ចោមចៅ១ ក៏បានសំណូមពរទៅអ្នកលក់របស់របរចល័ត និងប្រជាពលរដ្ឋជួយចោលសំរាមតាមពេលវេលាដែលខាងក្រុមហ៊ុនប្រមូលសំរាមកំណត់ ដើម្បីជួយថែរក្សាអនាម័យបរិស្ថានទាំងអស់គ្នា៕

អត្ថបទ៖ ម៉េង

The post ផ្លូវបេតុងជាប់របងរោងចក្រកាណាឌីយ៉ា ក្លាយជាទីតាំងគំនរសំរាមជះក្លិនស្អុយដល់ពលរដ្ឋ appeared first on Kampuchea Thmey Daily.

កញ្ញា រ៉ុន សុភី ត្រូវបានគេស្គាល់ថា ជាអតីតក្មេងស្រីរើសសំរាមទាំងយប់ទាំងថ្ងៃនៅវាលចាក់សំរាមដ៏ធំល្វឹងល្វើយនៅស្ទឹងមានជ័យ។ នៅពេលដែលកញ្ញាមានឱកាសសិក្សានៅប្រទេសអូស្រ្តាលី ហើយពេលនេះបញ្ចប់ការសិក្សាហើយនោះ នាងក៏ផ្តាំដល់មនុស្សជំនាន់ក្រោយឱ្យចេះចាប់យកឱកាស និងមានភាពក្លាហាននៅក្នុងជីវិត។ ទោះបីជាកញ្ញាបានជោគជ័យមួយកម្រិតហើយក្តី ក៏នៅតែមានបញ្ហាមួយចំនួនដែលធ្វើឱ្យកញ្ញាមិនមានភាពក្លាហានគ្រប់គ្រាន់ផងដែរ។

កញ្ញាបានលើកឡើងថា៖ “ខ្ញុំ​សោកស្ដាយ​ដែល​មិន​បាន​ស្វែង​យល់​ឲ្យ​បាន​គ្រប់​គ្រាន់ មិន​សកម្ម​គ្រប់គ្រាន់ និង​មិន​ក្លាហាន​គ្រប់គ្រាន់។ នេះ​គ្រាន់តែមាន​ន័យ​ថា ខ្ញុំ​មិន​បាន​ចាប់​យក​រាល់​ឱកាស​ដែល​មាន​នោះ​ទេ”។ អតីតនិស្សិតរូបនេះបន្តថា៖ “ឱកាសមិនតែងតែមករកយើងទេ ដូច្នេះ នៅពេលដែលអ្នកទទួលបានហើយ សូមចាប់យកវាមកប្រើប្រាស់។ កុំខ្លាចការវិនិច្ឆ័យ ព្រោះអ្នកម្នាក់ឯង មិនអាចផ្គាប់ចិត្តមនុស្សគ្រប់រូបបានទេ​ ជាពិសេសត្រូវយល់ថាអ្នករស់នៅដើម្បីខ្លួនឯង មិនមែនអ្នកដ៏ទៃឡើយ។ អ្នកនឹងភ្លឺស្វាង ប្រសិនបើអ្នកអាចលូតលាស់ដោយខ្លួនឯង”។

កញ្ញា រ៉ុន សុភី មានបងប្អូន ៧នាក់ នាងមិនបានចូលសាលារៀនរហូតដល់នាងអាយុ១១ឆ្នាំ។ នាងមិនស្គាល់ឡើយថាថ្នាក់រៀនមានរូបរាងបែបណាខ្លះនោះទេ រហូតត្រូវបានលោក Scott Neeson ស្ថាបនិក និងនាយកប្រតិបត្តិនៃអង្គការមូលនិធិកុមារកម្ពុជា (CCF) ដែលជាអង្គការមួយមានបេសសកម្មជួយប្រែក្លាយកុមារក្រីក្របំផុតនៅកម្ពុជា ផ្តល់ឱកាសបានសិក្សារៀនសូត្រ និងប្រែក្លាយខ្លួនជាអ្នកដឹកនាំម្នាក់។ លោក Scott Neeson ជួយ និងផ្តល់ឱកាសឱ្យនាងបានសិក្សានៅអង្គការនោះ បានប្រែក្លាយខ្លួនពីក្មេងស្រីម្នាក់ផ្សេងទៀត។

នៅពេលដែលកញ្ញា រ៉ុន សុភី មានឱកាសបានលោក Scott Neeson ជួយសង្រ្គោះ និងបានសិក្សាដូចក្មេងដទៃ នាងក៏ទទួលបានអាហារូបករណ៍១០០% ពីមហាវិទ្យាល័យ Trinity ក្នុងប្រទេសអូស្ត្រាលី។ អាហារូបករណ៍១០០% គ្របដណ្តប់លើថ្លៃសិក្សា ចំណាយលើការស្នាក់នៅ អាហារហូបចុក និងប្រាក់ឧបត្ថម្ភមួយចំនួន។ អាហារូបករណ៍មានរយៈពេល ៤ឆ្នាំកន្លះ ក្នុងនោះកម្មវិធីសិក្សាបន្ថែមរយៈពេលកន្លះឆ្នាំ សិក្សានៅមហាវិទ្យាល័យ ១ឆ្នាំ និងនៅសាកលវិទ្យាល័យរយៈពេល៣ឆ្នាំ។ រយៈពេលជិត៥ឆ្នាំនេះ កញ្ញាសិក្សាជំនាញ ទំនាក់ទំនងប្រព័ន្ធផ្សព្វផ្សាយ និងទំនាក់ទំនងអន្តរជាតិ នៅសាកលវិទ្យាល័យ Melbourne។

អតីតនិស្សិតនៅសាកលវិទ្យាល័យ Melbourne រូបនេះ បានបញ្ចប់ការសិក្សានៅសាកលវិទ្យាល័យ Melbourne ក្នុងឆ្នាំ២០២២។ សព្វថ្ងៃនេះកញ្ញាបានបំពេញការងារនៅសាលាឯកជនមួយក្នុងប្រទេសអូស្ត្រាលីជាបុគ្គលិកពេញម៉ោង។ ចំពោះការសិក្សាបន្តទៀត គឺនៅមិនទាន់មានគម្រោងឡើយ៕

The post កញ្ញា រ៉ុន សុភី ផ្តាំយុវជនគ្រប់រូបឱ្យចេះចាប់យកឱកាស និងប្រើឱកាស ដើម្បីអភិវឌ្ឍន៍ខ្លួន appeared first on Kampuchea Thmey Daily.

លោក ហ៊ឹ​ល រ៉ា​យ៉ា អភិបាលក្រុង​សិរីសោភ័ណ​បាន​ឲ្យ​ដឹងថា​ នៅ​ព្រឹក​ថ្ងៃ​ទី​៣​នោះ​ លោក​និង​ក្រុមការងារ​ក្រុង​ជាច្រើន​នាក់​ បាន​ចុះ​ធ្វើការ​ណែនាំ​ដល់​ម្ចាស់​ផ្សារ អ្នក​ម៉ៅ​ភាស៊ី ត្រូវ​ចូលរួម​សហការ​រៀបចំ​ទីតាំង​ផ្សារ​ឲ្យ​មាន​សណ្តាប់ធ្នាប់ ទុកដាក់​សំរាម​ឲ្យ​បាន​ត្រឹមត្រូវ ពិសេស​ត្រូវ​ប្រមូល​សំរាម ឲ្យ​បាន​ទៀងទាត់ មួយវិញទៀត​មិន​ត្រូវ​ឲ្យ​យានជំនិះ​ចត​នៅ​លើ​ចិញ្ចើមផ្លូវ​ជាដាច់ខាត ដែល​វា​អាច​បង្ក​ជា​គ្រោះថ្នាក់​ផ្សេងៗ​។​ លោក ហ៊ឹ​ល រ៉ា​យ៉ា បាន​បញ្ជាក់​ឲ្យ​ដឹង​បន្តទៀតថា ​ពាក់ព័ន្ធ​ទៅ​នឹង​ការ​សំយាប​ផ្សេងៗ​លោក ក៏បាន​ណែនាំ​ដល់​អាជ្ញាធរ សង្កាត់ ម្ចាស់​ផ្សារ អ្នក​ម៉ៅ​ភាស៊ី ត្រូវ​ណែនាំ​ដល់​អាជីវករ​លក់ដូរ​ជា​ម្ចាស់​តូប មុននឹង​សាងសង់​ឬ​ត​សំយាប ត្រូវ​ដាក់​ពាក្យ​ស្នើ​សុំ​មក​អាជ្ញាធរ​ចៀសវាង​ធ្វើ​ទៅ​ប៉ះពាល់​ដល់​ចំណី​ផ្លូវ​សាធារណៈ​។ ជាមួយគ្នា​នោះ​លោក​ក៏បាន​ជំរុញ​ដល់​សង្កាត់​ទាំង​៤ ដែល​បាន​ចូលរួម ត្រូវ​ធ្វើ​ការ​ផ្សព្វផ្សាយ​ចាប់ពីពេលនេះ​ តទៅ​ដល់​បណ្តារ​អាជីវក​រ​ឲ្យ​បាន​ដឹង និង​ចូលរួម​ជាមួយ​អាជ្ញាធរ​។​

ជាមួយគ្នា​នោះ ​លោក​ឧត្ដមសេនីយ៍ត្រី ង៉ាន់ ចិន្តា ស្នងការ​រង​ទទួល​ផែ​ក​ការងារ​សណ្តាប់ធ្នាប់ ក៏បាន​ធ្វើការ​សំណូម​ឲ្យ​មានការ​សហការ​ជាមួយ​សមត្ថកិច្ច ក្នុង​ការ​រៀបចំ​សណ្តាប់ធ្នាប់​ដោយ​ មិនត្រូវ​អនុញ្ញាត​ឲ្យ​អាជីវករ​លក់ដូរ​លើ​ចិញ្ចើមផ្លូវ ធ្វើ​ឲ្យ​បាត់បង់​សោភ័ណភាព​ផ្សារ និង​អាច​បង្ក​គ្រោះជា​យថាហេតុ​ណាមួយ​កើតឡើង​។ លោក​ក៏បាន​ជំរុញ​បន្ថែម​ដល់​សង្កាត់​ពាក់ព័ន្ធ សូម​ចូលរួម​សកម្មភាព​ទាំងនេះ​ឲ្យ​បាន​ញឹកញាប់ ពិសេស​ត្រូវ​ចុះ​ពិនិត្យ​ឲ្យ​បានជា​ប្រចាំ​ផងដែរ​៕

អត្ថបទ​៖ វ៉ាន់ ណា​ង

សូមចុចអាន៖ ​ដឹងច្បាស់អត្តសញ្ញាណឧក្រិដ្ឋជនទាំង ៤ ប្លន់ជំរិត​លុយ១​ លានដុល្លារមិនសម្រេច

The post អាជ្ញាធរ​ក្រុង​សិរីសោភ័ណ ណែនាំ​ម្ចាស់​ផ្សារ និង​អ្នក​ម៉ៅ​ភាស៊ី​ ត្រូវ​រៀបចំ​ឲ្យ​មាន​សណ្តាប់ធ្នាប់ ជាពិសេស​ផ្សារ​នៅជាប់​ផ្លូវជាតិ​ appeared first on Kampuchea Thmey Daily.

បើ​និយាយ​ពី​សំរាម​ច្បាស់​ជា​មនុស្ស​ម្នាក់ៗ​មានការ​ខ្ពើមរអើម​ខ្លាំង​ណាស់ ដោយ​ពួកគេ យល់ថា សំរាម​មាន​ក្លិនស្អុយ ឆ្អេះឆ្អាប ថែមទាំង​មាន​រុយ​រោម​និង​មាន​ដង្កូវ​ទៀតផង ប៉ុន្តែ​សម្រាប់​បងប្អូន​ប្រជាពលរដ្ឋ ចំនួន​ប្រមាណ​ជាង​៦០ គ្រូ​សារ ដែល​គិត​ជាស​មា​ជិត មាន​ក្មេង មាន​ចាស់​សរុប​មិន​តិច​ជាង​៣០០​នាក់​នោះ បែរជា​ពួកគាត់​និយាយ​ថា​ ថ្វី​ត្បិត​សំរាម​វា​មាន​ក្លិនស្អុយ ​ក៏​ពិតមែន​តែ​វា​ជា​ជីវិត​របស់​ពួកគាត់​ពីព្រោះ​ពួកគាត់​រាល់ថ្ងៃ​រស់ នៅ​ជា​មួយ​និង គំនរ​សំរាម អាស្រ័យ​ជីវិត រស់​ជាប្រចាំ​ដោយសារ រើស​សំរាម (​អេតចាយ​)​លក់​ប្តូរ យក​ប្រាក់ មក ទិញ​អង្គរ និង​សម្ភារៈ​ផ្សេងៗ​ប្រើប្រាស់ និង សម្រាប់ ផ្គត់ផ្គង់​ដល់​កូនៗ​របស់​ពួកគាត់​ទៅ​សាលារៀន ផង​ដែរ។

​បងស្រី ឈ្មោះ ហ៊ុល សំ​អូន អាយុ​៥៥​ឆ្នាំ​ជា​ប្រជាពលរដ្ឋ​ម្នាក់​ក្នុងចំណោម ប្រជាពលរដ្ឋ ជាច្រើន រស់ នៅ​លើ​គំនរ​សំរាម បាន​និយាយ​រៀប​ប្រាប់​ឲ្យ​ដឹង​ថា រូប​គាត់​ក៏​ដូច​បងប្អូន​ផ្សេងទៀត ម្នាក់ៗ​បានមក​រស់នៅរើស​សំរាម (​អេតចាយ​)​ក្នុង​តំបន់​វាល​ចាក់សំរាម ស្ថិត​ក្នុង ឃុំ​អូរ​ឧកញ៉ា​ហេង ស្រុក​ព្រៃនប់​នេះ មិនតិចជាង​១០​ឆ្នាំ​នោះ​ឡើយ​។

បងស្រី បាន​បន្ត​ទៀត​ថា ចំពោះ​សំរាម អ្នក​ផ្សេង​គេ​ថា​សំរាម​គួរ​ឲ្យ​ខ្ពើមរអើម ប៉ុន្តែ​សម្រាប់​ពួកគាត់​គ្មាន​ជម្រើស​ទេ ដោយសារ​តែ​ជីវា​ភាព​ក្រីក្រ បាន​ប្រ​មួល​កូនចៅ​មក​រស់​នៅ​លើ​គំនរ សំរាម រើស​សំរាម​(​អេតចាយ​) លក់​ប្តូរ​យក​ប្រាក់​ចិញ្ចឹម​ជីវិត​ប្រចាំថ្ងៃ ដោយ​ក្នុង​មួយថ្ងៃ អាច រក​ប្រាក់​ពី​ការ​លក់​អេតចាយ​បាន ២​ទៅ​៣​ម៉ឺនរៀល​គ្រាន់​រស់​ដែរ សរុប​សេចក្តី​មក ពូក​គាត់ មាន​ក្មេង មាន​ចាស់ ចំនួន​ប្រមាណ ជាង​៦០ គ្រូ​សារ សរុប​ជាស​មាជិ​ក​មិនតិចជាង​៣០០​នាក់​នោះ ​សុទ្ធ​សឹង​រស់នៅ​អាស្រ័យ លើ​គំនរ​សំរាម​ទាំងអស់ មិន​មាន​មុខរបរ​ផ្សេង​នោះ​ទេ​។​

ចំពោះ​បញ្ហា​រើស​សំរាម​វិញ​បងស្រី ហ៊ុល​ សំ​អូន ​ក៏​បាន​ឲ្យ​ដឹង​ផង​ដែរ ក្នុង​មួយថ្ងៃ​បែង ចែកចេញជា​៣ វេន​គឺ​ពេលព្រឹក ពេល​ថ្ងៃ​និង​ពេល​រសៀល ឬ​យប់ ហើយ​សំរាម (​អេតចាយ​)​ដែល​រើស​បាន គឺ​ច្រក​បាវ​ទុក រយៈ​ពេល​៤​ទៅ​៥​ថ្ងៃ​ទើប​លក់​ម្តង ដោយ​ថៅកែ​អេតចាយ គេ​មក​ទិញ​ដល់​កន្លែង គឺ​ម្នាក់ៗ​អាច​លក់​បាន​ខ្លះ​បាន ២០​ម៉ឺនរៀល ខ្លះ​លក់​បាន រហូត​ទៅដល់ ៣០​ម៉ឺន ក៏មានដែរ គឺ​អាស្រ័យ​លើ​គ្រូ​សារ មាន​សមាជិក​តិច​ឬ​ច្រើន​ពោល គឺ គ្រូ​សារ​ណា​មាន​សមាជិក ច្រើន​គេ​រើស​បាន​ច្រើន​លក់​បាន​លុយ​ច្រើន។ ហើយ​ប្រាក់​ដែល​រក​បាន​នេះ ថ្វី​ត្បិត មិន​តិច​ទូច​ក៏​ពិតមែន តែ​សម្រាប់​ពួកគាត់​អាច​ទប់ទល់ ជីវភាព​ប្រចាំថ្ងៃបាន និង មួយ​ភាគ​សម្រាប់​ផ្គត់ផ្គង់ កូនចៅ​ទៅ​សាលា​រៀន​សូត្រ ហើយ​កូនចៅ​ទៅ​សាលា ​គឺ​មិន​ធ្វើដំណើរ​ថ្មើរជើង ដូច​ពេល​ប៉ុន្មាន​ឆ្នាំ​នោះទេ គឺ​មាន​ម៉ូតូ កង់​បី ដែល​ឧបត្ថម្ភ​ដោយ លោក យន្ត មីន​ អតីត​អភិបាលខេត្ត​ព្រះសីហនុ​សម្រាប់​ជិះ​ទៅមក ហើយ​ម៉ូតូ​កង​បី​នេះ ក៏​ជា​មធ្យោបាយ​សម្រាប់​ដឹក​បងប្អូន រស់នៅ​តំបន់​គំនរ​សំរាម​នេះ​ពេល​មាន​ជំងឺ​ឈឺ​ស្កាត់​យប់​ព្រលប់​ទៅ​មន្ទីរពេទ្យ ផងដែរ​។​

លោក កៅ ឡេង មេឃុំ​អូរ​ឧកញ៉ា​ហេង បាន​បញ្ជាក់​ថា ​បងប្អូន​ប្រជាពលរដ្ឋ រស់​នៅ​លើ​គំនរ​សំរាម​នេះ មាន​ចំនួន​ប្រមាណ ៦០ ជា​គ្រូ​សារ​ដោយ​ភាគច្រើន​ជា​ប្រជាពលរដ្ឋ ក្នុង​មូលដ្ឋាន និង​មាន​ប័ណ្ណ​បោះឆ្នោត​នៅ ឃុំ​អូរ​ឧកញ៉ា​ហេង​នេះ តែម្តង និង​មួយ​ចំនួន មកពី​បណ្តាល​ខេត្ត​ផ្សេងៗ បាន​មក​រស់នៅ​ប្រកបមុខរបរ​រើស​សំរាម​ ផង​ដែរ។​ ចំពោះ​បញ្ហា​សុខភាព​វិញ តាម​កត់សម្គាល់ ឃើញ​ថា បងប្អូន​ប្រជាពលរដ្ឋ​ហាក់​មិន​សូវ​មាន​នរណា​ម្នាក់​ឈឺ​ស្កាត់​អ្វី​ទេ ពោល​គឺ​ពួកគាត់ ហាក់​បី​ដូច​ស៊ាំ​ទៅ​ និង​អាកាសធាតុ​តំបន់​នោះ​យ៉ាងដូច​ច្នេះ​ដែរ ប៉ុន្តែ​បើសិនជា​ពួកគាត់​មាន​ជំងឺ​យប់​ព្រលប់​ក៏​មិន​ពិបាក​ដែរ ពីព្រោះ​មណ្ឌល​សុខភាព​នៅ​ជិត​មិន​ឆ្ងាយ​ពី​តំបន់​ពួកគាត់​រស់នៅ​នោះទេ និង​មាន​រថយន្ត សង្គ្រោះ របស់ មណ្ឌល​សុខភាព​នៅ​ប្រចាំ​ជានិច្ច។​ ដោយឡែក​សម្រាប់​ក្មេង​តូច ៗ​ដែល​ក៏​មាន​ម៉ូតូ​កង់​បី សម្រាប់​ដឹក​ទៅ​សាលា​ទាំង​ទៅ​ទាំង​មក​ ផង​ដែរ ដោយ​ម៉ូតូ​កង​បី​នោះ ជា​ម៉ូតូ​ឧបត្ថម្ភ​ដោយ​លោក​យន្ត​មីន អតីត​អភិបាលខេត្ត​ព្រះសីហនុ ចំណែក​សេវា​ជួល​អ្នក​បើក​ម៉ូតូ​កង់​បីដឹកក្មេង​ទៅមក​សាលា គឺ លោក​ជា​អ្នក​រាប់​រង់​ចំណាយ​ដោយ​ផ្ទាល់​ គឺ​ក្នុង​១​ខែ ប្រមាណ​៧០ ទៅ​៨០​ម៉ឺន​រៀល​ ផង​ដែរ​។​

គួរ​បញ្ជាក់​ផង​ដែរ​ថា សំរាម​ទូទាំង​ក្រុងព្រះសីហនុ​មាន​ក្នុង​មួយថ្ងៃ​មាន​ចំនួន​ប្រមាណ​មិន​តិច ជាង ៣០០​តោន​នោះ​ឡើយ នេះ​បើ​តាម​ការ​បញ្ជាក់​ប្រាប់​ឲ្យ​ដឹង​ពី​សំណាក់ លោក ហេង ប៉េង ហាក់ ប្រធាន​សាខា ក្រុមហ៊ុន​KSWM ​ដែល​ជា​ក្រុមហ៊ុន​ទទួលបន្ទុក លើ​សេវា​ដឹកជញ្ជូន​សំរាម ក្នុង​ខេត្ត​ព្រះសីហនុ​៕

អត្ថបទ៖ កោះពស់

​

The post ថ្វី​ត្បិត​សំរាម​វា​មាន​ក្លិនស្អុយ ​ក៏​ពិតមែន​ តែ​វា​ជា​ជីវិត​របស់​ពួកខ្ញុំ appeared first on Kampuchea Thmey Daily.