ជំងឺពងបែកមាត់ Archives - Kampuchea Thmey Daily

ក្រសួងសុខាភិបាល ឱ្យបង្កើនការប្រុងប្រយ័ត្នជំងឺពងបែកដៃ ជើង និងមាត់ ខណៈជំងឺនេះកើនឡើងខ្ពស់នៅលើកុមារ

អ៊ិន ពិសី — Wed, 17 Sep 2025 02:55:00 +0000

ក្រសួងសុខាភិបាល បានណែនាំឱ្យប្រជាពលរដ្ឋយកចិត្តទុកដាក់ និងបង្កើនការប្រុងប្រយ័ត្នចំពោះជំងឺពងបែកដៃ ជើង និងមាត់ ខណៈជំងឺនេះមានការកើនឡើងនៅលើកុមារ ជាពិសេសកុមារមានអាយុក្រោម ៥ ឆ្នាំ ដែលតម្រូវឱ្យមានការពិនិត្យព្យាបាលសមស្របតាមមូលដ្ឋានសុខាភិបាល។

នៅក្នុងសេចក្តីប្រកាសព័ត៌មានស្តីពីការរកឃើញការកើនឡើង នៃជំងឺពងបែក ដៃ ជើង និងមាត់ ចេញផ្សាយកាលពីល្ងាចថ្ងៃទី ១៦ កញ្ញា ក្រសួងសុខាភិបាល បានណែនាំដល់ប្រជាពលរដ្ឋ ត្រូវប្រកាន់ខ្ជាប់នូវការអនុវត្តអនាម័យ លាងសម្អាតដៃឱ្យបានញឹកញាប់ ជាមួយសាប៊ូ និងទឹក លាងដៃកុមារឱ្យបានញឹកញាប់ជាមួយទឹក និងសាប៊ូ ឬជាមួយអាល់កុល ជាពិសេសក្រោយប៉ះពងបែក ឬ ដំបៅ មុនពេលរៀបចំអាហារ មុនពេលបរិភោគ មុនបញ្ចុកចំណីដល់ទារក ឬ កុមារ ក្រោយប្រើប្រាស់បង្គន់អនាម័យ និងក្រោយប្តូរទ្រនាប់គូទទារក ឬជូតសម្អាតរាងកាយកុមារ លាងសំអាតផ្ទៃ និងរបស់ ដែលប្រឡាក់ដោយទឹក និងសាប៊ូ ចៀសវាងការប៉ះពាល់ស្និទ្ធស្នាល (ថើប ឱប ប្រើប្រាស់សម្ភារៈសម្រាប់បរិភោគរួមគ្នា។ល។) ជាមួយ កុមារដែលមានជំងឺពងបែក ដៃ ជើង និងមាត់ ប្រើស្លាបព្រា និងចាន ដាច់ដោយឡែក សម្រាប់កុមារម្នាក់ៗ និងសូមឱ្យកុមារនៅផ្ទះនៅពេលមានជំងឺ កុំទៅសាលារៀន ឬមណ្ឌលទារកដ្ឋាន។

លើសពីនេះ ឪពុកម្តាយ និងអ្នកថែទាំកុមារ ត្រូវរក្សាការប្រុងប្រយ័ត្នចំពោះរោគសញ្ញា នៃជំងឺ ដើម្បីរកឱ្យឃើញទាន់ពេល ស្វែងរកការពិគ្រោះយោបល់ និងការពិនិត្យព្យាបាល នៅមណ្ឌលសុខភាព ឬមន្ទីរពេទ្យ ដែលនៅជិតជាបន្ទាន់ ចៀសវាងការពន្យារពេលធ្វើឱ្យប្រឈមនឹងហានិភ័យខ្ពស់ នៃផលវិបាកជំងឺ ផ្តល់អាហារមានជីវជាតិច្រើន និងទឹកឱ្យបានច្រើនដល់កុមារ និងសូមកុំទៅជួបជុំ ឬទីប្រជុំជនមានមនុស្សច្រើន នៅពេលមានជំងឺពងបែកដៃ ជើង និងមាត់។

បើតាមក្រសួងសុខាភិបាល ជំងឺពងបែកដៃ ជើង និងមាត់ គឺជាជំងឺឆ្លងមួយប្រភេទបង្កដោយពពួកអង់តេរ៉ូវីរុស ជាញឹកញាប់ គឺ ពួកវីរុសកុកសាគី ភាគច្រើនកើតលើ ទារក និងកុមារ ប៉ុន្តែក៏អាចកើតលើមនុស្សពេញវ័យផងដែរ។

ជំងឺពងបែក ដៃ ជើង និងមាត់ អាចឆ្លងពីមនុស្សម្នាក់ទៅមនុស្សម្នាក់ទៀត តាមរយៈការប៉ះពាល់ដោយផ្ទាល់ជាមួយនឹងវត្ថុរាវ នៃផ្លូវដង្ហើម (ទឹកមាត់ កំហាក និងសំបោរ) ទឹករងៃ ដែលចេញពីពងបែក លាមកអ្នកជំងឺ។ អ្នកជំងឺអាចចម្លងខ្លាំងបំផុតក្នុងសប្ដាហ៍ទីមួយ។ ជំងឺពងបែក ដៃ ជើង និងមាត់ មិនឆ្លងពីមនុស្ស ទៅសត្វ ឬពីសត្វមកមនុស្សឡើយ។

ជំងឺនេះមានរោគសញ្ញាដូចជាមានគ្រុនក្តៅ មានដំបៅឈឺក្នុងមាត់ និង មានពងកន្ទួលលើបាតដៃ បាតជើង និង កំប៉េះគូទ ជំងឺពងបែក ដៃជើង និងមាត់ ភាគច្រើនមានស្ថានភាពស្រាល អ្នកជំងឺស្ទើរតែទាំងអស់ជាសះស្បើយ ក្នុងរយៈពេលពី ៧ ថ្ងៃ ទៅ ១០ ថ្ងៃ ហើយកម្រមានផលវិបាកណាស់។ ប៉ុន្តែអ្នកជំងឺអាចត្រូវការថ្នាំបញ្ចុះកម្ដៅ ថ្នាំបំបាត់ការឈឺចាប់ ដែលបណ្តាលមកពីពងបែកក្នុងមាត់ តែមិនត្រូវប្រើថ្នាំ អាស្ពីរីន (aspirin) ដើម្បីបញ្ចុះកម្ដៅឡើយ។

ក្រសួងសុខាភិបាល បានបញ្ជាក់ថា ជាកម្រ ជំងឺពងបែក ដៃ ជើង និងមាត់ អាចបង្កឱ្យមានផលវិបាកធ្ងន់ធ្ងរមួយចំនួន រួមមាន រោគសញ្ញា ប្រព័ន្ធប្រសាទ (សន្លឹម ប្រកាច់ ឬ កន្ត្រាក់ដៃជើង) និងរោគសញ្ញាផ្លូវដង្ហើម (ពិបាកដកដង្ហើម ហត់) សូមបញ្ជាក់ ៖ អ្នកជំងឺដែលមានផលវិបាកធ្ងន់ធ្ងរខាងលើនេះ ត្រូវប្រញាប់បញ្ជូនជាបន្ទាន់ទៅមណ្ឌលសុខភាព ឬមន្ទីរពេទ្យ ដែលនៅជិតបំផុត ចៀសវាងការពន្យារពេល ធ្វើឱ្យប្រឈមនឹងហានិភ័យខ្ពស់ នៃជំងឺ៕

អត្ថបទ ៖ សំអឿន

The post ក្រសួងសុខាភិបាល ឱ្យបង្កើនការប្រុងប្រយ័ត្នជំងឺពងបែកដៃ ជើង និងមាត់ ខណៈជំងឺនេះកើនឡើងខ្ពស់នៅលើកុមារ appeared first on Kampuchea Thmey Daily.

ហេតុអ្វីបានជាកើតជំងឺពងបែកមាត់?

Sorn Phanith — Sat, 24 Jul 2021 02:01:26 +0000

នៅក្នុងមាត់របស់យើងតែងកើតជំងឺជាច្រើនប្រភេទដូចជា រលាកឡើងពងទឹក ដំបៅឡើងជាបន្ទះពណ៌សពណ៌ក្រហម ដុំគីស ផ្សិត សាច់ដុះ និងប្រភេទជំងឺមហារីកមាត់មាត់ធ្មេញ ក្នុងនោះជំងឺពងបែកមាត់ក៏ជាជំងឺការឡើងញឹកញាប់ជាងគេ។

ក) លក្ខណៈទូទៅនៃជំងឺពងបែកមាត់៖

– កើតឡើងជារឿយៗក្នុងវ័យកុមារ និងកាន់តែញឹកញាប់ក្នុងវ័យជំទង់ និងយុវវ័យ ហើយភាគតិចលើមនុស្សចាស់

– អ្នកជំងឺភាគច្រើនមានសុខភាពល្អនិងមិនជក់បារី

– ដំណាក់ការមុនឡើងជាពងបែក រយៈពេល ២ ទៅ ៣ម៉ោង ឬមួយថ្ងៃមុនដោយឡើងក្រហមអ្នកជំងឺមានអារម្មណ៍ចាក់តិចៗឬឈឺតិចតួចដូចជារមាស់

– ពេលឡើងពងបែក មានការឈឺចាប់ខ្លាំង ជាពិសេសពិបាកហូបចំណីអាហារ ហើយពងបែកមានសភាពខូងផតកណ្ដាលនិងគែមជុំវិញក្រហម

– ទីតាំងឡើងពងបែកក្នុងមាត់ លើជាលិកាទន់ដូចជា អណ្ដាត បបូរមាត់ខាងក្នុង ក្រអូមទន់ សាច់ផ្ទាល់ ។ល។

– ពេលជាមួយកន្លែងអាចកើតឡើង កន្លែងផ្សេងៗបន្តបន្ទាប់និងញឹកញាប់។

ខ) ពងបែកមាត់មាន៣ ប្រភេទធំៗ គឺ៖

១) ពងបែកមាត់ទំហំតូច(Minor Aphthous Stomatitis)៖

– ជាប្រភេទកើតញឹកញាប់

– កើតឡើងលើជាលិកាទន់ក្នុងមាត់

– ពងបែកមានសភាពខូងកណ្តាល មានរាងជារង្វង់មូល នឹងទំហំ ៣-៧មីលីម៉ែត្រ ហើយគែមជុំវិញពណ៌ក្រហម

– ពងបែកមានចំនួន១ ឬច្រើនកន្លែង

– មានការឈឺចាប់ពេលញ៉ាំចំណីអាហារ

២) ពងបែកមាត់ទំហំធំ (Major Aphthous Stomatitis)

– មិនសូវជួបប្រទះ

– មានទំហំធំច្រើនសង់ទីម៉ែត្រ

– ការឈឺចាប់ខ្លាំង អាចមានជាក្តៅខ្លួន

– មានការជាសះរយៈពេលយូរច្រើនខែ

– ពេលជាទៅវិញអាចមានស្លាកស្នាម

៣) ពងបែកតូចៗច្រើនរាប់រយ (Herpetiform Aphthous Stomatitis)

– មិនសូវជួបប្រទះ

– មានទំហំ១ទៅ២មីលីម៉ែត្រ

– មានចំនួនច្រើនរហូតដល់រាប់រយ

– ឡើងក្រហមខ្លាំង

គ) មូលហេតុ៖

– មិនទាន់មានការរកឃើញច្បាស់លាស់ពីមូលហេតុពិតប្រាកដនូវឡើយ ប៉ុន្តែភាគច្រើនគឺបណ្តាលមកពី៖

• កត្តាតំណពូជ

• ការប៉ះទង្គិចញឹកញាប់

• ការរលាកបង្ករោគ

• ភាពមិនប្រក្រតីនៃប្រព័ន្ធភាពស៊ាំ (HIV)

• ភាពមិនប្រក្រតីនៃក្រពះ ពោះវៀន

• កង្វះគ្រាប់ឈាម និងវីតាមីន

• ការប្រែប្រួលអ័រម៉ូន

• ការគិតច្រើន ស្ត្រេស

• ការប្រើប្រាស់ថ្នាំមួយចំនួន

ឃ) ជំងឺដែលមានលក្ខណៈស្រដៀងនិងជំងឺពងបែកមាត់

– Erythème multiforme

– Récurrent herpes

– Pemphigiod

– Pemphigus

– Chronic Infection (Syphilis, TB, Fungal)

– Hand food and mouth disease

– Néoplasme Tumor

ង) ការព្យាបាល៖

– ការព្យាបាល អាស្រ័យលើការពិនិត្យរកមូលហេតុ ដែលបង្កឡើងដូចរៀបរាប់ខាងលើ

– ពងបែកមាត់ទំហំតូច អាចជាសះត្រឡប់ទៅវិញ ដោយខ្លួនឯងក្នុងរយៈពេល ១០ទៅ១៤ ថ្ងៃ

– អាចប្រើប្រាស់ថ្នាំបំបាត់ការឈឺចាប់ក្នុងរយៈពេលខ្លី(៣ទៅ៤ថ្ងៃ)

– សូមកុំប្រើប្រាស់ថ្នាំសះដោយខ្លួនឯង បើមិនមានការពិនិត្យពីគ្រូពេទ្យ ឬទន្តបណ្ឌិត

– សូមធ្វើអនាម័យមាត់ធ្មេញឲ្យល្អ

– ណាត់ជួបទន្តបណ្ឌិត ដើម្បីធ្វើរោគវិនិច្ឆ័យ ដោយការផ្គូផ្គងជាមួយលក្ខណៈជំងឺក្នុងមាត់ផ្សេងៗទៀត ដែលមានលក្ខណៈស្រដៀងគ្នា។

ប្រសិនបើលោកអ្នកមានការរលាក ឬដំបៅក្នុងមាត់ មិនលើសពី២សប្តាហ៍ សូមណាត់ជួបជាមួយទន្តបណ្ឌិតឯកទេសនៃមន្ទីរពេទ្យកាល់ម៉ែត ដើម្បីពិនិត្យ ធ្វើរោគវិនិច្ឆ័យ និងព្យាបាលប្រកបដោយជំនាញនិងបទពិសោធន៍៕

អត្ថបទ៖ រស្មី

The post ហេតុអ្វីបានជាកើតជំងឺពងបែកមាត់? appeared first on Kampuchea Thmey Daily.

ជំងឺពងបែកមាត់ Archives - Kampuchea Thmey Daily

ក្រសួងសុខាភិបាល ឱ្យបង្កើនការប្រុងប្រយ័ត្នជំងឺពងបែកដៃ ជើង និងមាត់ ខណៈជំងឺនេះកើនឡើងខ្ពស់នៅលើកុមារ

ហេតុអ្វី​បានជា​កើត​ជំងឺ​ពងបែក​មាត់?​

ហេតុអ្វីបានជាកើតជំងឺពងបែកមាត់?