ដកហូតតំណែង Archives - Kampuchea Thmey Daily

ក្រសួងមហាផ្ទៃ សម្រេចផ្អាកការងារលោកឧត្ដមសេនីយ៍ឯក រុន រ័ត្នវាសនា បណ្ដោះអាសន្ន

Ung Meng — Fri, 24 Jul 2026 04:21:43 +0000

ក្រសួងមហាផ្ទៃបានសម្រេចផ្អាកការងារ និងមុខតំណែងលោកឧត្តមសេនីយ៍ឯក រុន រ័ត្នវាសនា ប្រធាននាយកដ្ឋាននគរបាលទេសចរណ៍ ជាបណ្ដោះអាសន្ន ដើម្បីបន្តនីតិវិធីក្នុងការស្រាវជ្រាវ។ ការសម្រេចផ្អាកមុខតំណែង និងភារកិច្ចបណ្តោះអាសន្ននេះ គឺធ្វើឡើងដើម្បីអនុវត្តតាមនីតិវិធីនៃការស្រាវជ្រាវ និងពិនិត្យមើលភាពមិនប្រក្រតីនានា។

កាលពីថ្ងៃទី១៣ ខែកក្កដា ឆ្នាំ២០២៦ នៅចន្លោះពី ១៧:០០ នាទី ដល់ ១៨:០០ នាទី នៅចំណុចក្រោយក្រុមហ៊ុនទូរស័ព្ទសែលកាត មានក្រុមមនុស្សមួយក្រុមអះអាងថាខ្លួនជា «នគរបាលទេសចរណ៍» ដឹកនាំដោយឈ្មោះ រុន រ័ត្នវាសនា បានមកចាប់បង្ខំជនរងគ្រោះបញ្ចូលឡាន រួចនាំយកទៅបង្ខាំងទុកនៅនាយកដ្ឋាននគរបាលទេសចរណ៍ នៃក្រសួងមហាផ្ទៃ ដោយគ្មានដីកា ឬការដឹងឮពីព្រះរាជអាជ្ញានោះឡើយ។

ក្រោយមក ក្រុម«នគរបាលទេសចរណ៍» ឈ្មោះ លីម កុក ជាំង, ឡាច បុប្ផាភក្ដី, រុន រ័ត្នវាសនា បានព្យាយាមសម្លុត និងបង្ខំឱ្យជនរងគ្រោះបើកលុយពីគណនីធនាគារអេស៊ីលីដារបស់បងស្រីជនរងគ្រោះ (ឈ្មោះ សុខ គីម)។ ពួកគេថែមទាំងបាននាំជនរងគ្រោះទៅបង្ខាំងទុកបន្តនៅអគ្គស្នងការដ្ឋាននគរបាលជាតិ ព្រមទាំងបង្ខំឱ្យបងស្រីជនរងគ្រោះមកផ្តិតមេដៃលើឯកសារមួយចំនួនទៀតផង។

លុះដល់ថ្ងៃទី១៤ ខែកក្កដា ឆ្នាំ២០២៦ ក្រុមជនសង្ស័យបាននាំខ្លួនជនរងគ្រោះទៅកាន់ធនាគារអេស៊ីលីដា ទីស្នាក់ការកណ្តាលដូនពេញ ដើម្បីបង្ខំឱ្យបងស្រីជនរងគ្រោះដកប្រាក់ចំនួន ៥០៥ ០០០ ដុល្លារ (ហាសិបម៉ឺន ប្រាំពាន់ ដុល្លារអាមេរិក) ដោយបានគំរាមថា បើមិនដកប្រាក់ឱ្យទេ ពួកគេនឹងយកជនរងគ្រោះទៅដាក់គុក ២០ ឆ្នាំ។ ក្រោយពីទទួលបានប្រាក់ហើយ ទើបពួកគេព្រមដោះ លែងជនរងគ្រោះឱ្យមានសេរីភាពវិញនៅវេលាម៉ោងប្រហែល ១៦:០០ នាទីរសៀល។

ពាក់ព័ន្ធនឹងបញ្ហានេះ នាយកដ្ឋាននគរបាលទេសចរណ៍ បានចេញសេចក្តីបំភ្លឺ បដិសេធទាំងស្រុងចំពោះការចោទប្រកាន់លើបណ្តាញសង្គមថា សមត្ថកិច្ចបានធ្វើការចាប់ខ្លួន បង្ខាំង និងគំរាមកំហែងជំរិតទារប្រាក់ចំនួន ៥០ម៉ឺនដុល្លារ ដោយបញ្ជាក់ថា នេះជាករណីសម្របសម្រួលដោះស្រាយ ករណីបុគ្គលិកសង្ស័យលួចប្រាក់ក្រុមហ៊ុនជិត ២លានដុល្លារ។

ក្នុងអំឡុងពេលនៃការផ្អាកការងារបណ្តោះអាសន្ននេះ លោកឧត្តមសេនីយ៍ឯក រុន រ័ត្នវាសនា ត្រូវចូលខ្លួនមកបង្ហាញមុខនៅគ្រប់ម៉ោងធ្វើការ ដើម្បីរង់ចាំការកោះហៅ និងចូលរួមសហការក្នុងនីតិវិធីស្រាវជ្រាវរបស់ក្រសួងមហាផ្ទៃ រហូតដល់មានសេចក្តីសម្រេចជាថ្មី៕

The post ក្រសួងមហាផ្ទៃ សម្រេចផ្អាកការងារលោកឧត្ដមសេនីយ៍ឯក រុន រ័ត្នវាសនា បណ្ដោះអាសន្ន appeared first on Kampuchea Thmey Daily.

ឧត្តមសេនីយ៍យោធាជាន់ខ្ពស់ចិន៥រូបទៀត និងយោធាតាមខេត្ត ត្រូវដកតំណែង ក្រោមការចោទ«ពុករលួយ»

Minea Neu — Fri, 27 Feb 2026 02:39:39 +0000

គណៈកម្មាធិការអចិន្ត្រៃយ៍នៃសភាប្រជាជនចិន បានឱ្យដឹងនៅថ្ងៃព្រហស្បតិ៍ថ្ងៃទី២៦ខែកុម្ភៈថា អ្នកតាក់តែងច្បាប់ប្រទេសចិនបានដកហូតតំណែងឧត្តមសេនីយ៍នៃកងទ័ពរំដោះប្រជាជនចំនួន៥រូបពីសមាជិកសភានៃជួររដ្ឋាភិបាលក្រោយស៊ើបអង្កេតថា ប្រព្រឹត្តអំពើពុករលួយ។

លោក Colonel Zhang Xiaogang អគ្គនាយករងនៃការិយាល័យព័ត៌មាន ក្រសួងការពារជាតិ។ រូបភាព៖ MNDC

ការផ្សាយរបស់ CNA ផ្សាយថ្ងៃទី២៦ ខែកុម្ភៈ ឱ្យដឹងថា អ្នកដែលត្រូវបានដកចេញពីតំណែងមាន លោក លី សៅមិញ (Li Qiaoming) ធ្លាប់ជាមេបញ្ជាការកងទ័ពជើងគោកនៃកងកម្លាំងប្រដាប់អាវុធនៃសាធារណរដ្ឋប្រជាមានិតចិន(PLA ) និង លោក សេន ជីនឡុង (Shen Jinlong) អតីតមេបញ្ជាការកងទ័ពជើងទឹកនៃ PLA អតីតអនុប្រធានសភាប្រជាជនជាតិ (NPC)។

លើសពីនេះមានអ្នកទើបតែដកហូតដំណែងចេញថ្មីៗនេះ រួមមាន សមាជិកក្នុងជួររដ្ឋាភិបាលបច្ចុប្បន្ន ឬអតីតស្នងការនយោបាយនៃកងទ័ពជើងទឹក កងទ័ពអាកាស និងកងកម្លាំងគាំទ្រផ្នែកព័ត៌មានរបស់កងកម្លាំងប្រដាប់អាវុធ (PLA ) គឺលោក Qing Shengxiang លោក Yu Zhongfu និង លោក Li Wei។

សេចក្តីថ្លែងការណ៍ដដែល បានបង្ហាញថា មន្ត្រីយោធាជាច្រើនរូបទៀត និងមន្ត្រីខេត្តមួយចំនួនដែលពាក់ព័ន្ធក៏ត្រូវបានដកចេញផងដែរ។

គួរបញ្ជាក់ថា ការវិវត្តនេះកើតឡើងបន្ទាប់ពីការស៊ើបអង្កេតកម្រិតខ្ពស់ថ្មីៗនេះពាក់ព័ន្ធនឹងមេដឹកនាំយោធាកំពូលៗ រួមទាំងអនុប្រធានអគ្គបញ្ជាការយោធាក លោក សាង យូសៀ (Zhang Youxia) កំពុងស្ថិតក្រោមការស៊ើបអង្កេតពីបទសង្ស័យថា «រំលោភបំពានធ្ងន់ធ្ងរលើវិន័យ និងច្បាប់» ដែលមានន័យថា បានប្រព្រឹត្តអំពើពុករលួយ។

ក្រសួងការពារជាតិចិនក៏បានប្រកាសកាលពីខែមករាថា ខ្លួនកំពុងស៊ើបអង្កេត លោក Liu Zhenli ប្រធានក្រុមនៃនាយសេនាធិការចម្រុះ នៃគណៈកម្មការយោធាមជ្ឈិមដ៏មានឥទ្ធិពល ដែលត្រួតពិនិត្យផែនការប្រយុទ្ធ។

យោងតាមកាសែត South China Morning Post ក្រៅពីឧត្តមសេនីយ៍ទាំង៥រូប ឧត្តមសេនីយ៍ឯកម្នាក់ និងឧត្តមសេនីយ៍ឯកបីរូបទៀតក៏ត្រូវបានដកចេញពីបញ្ជីអនុប្រធាននៅក្នុងស្ថាប័ននីតិប្បញ្ញត្តិកំពូលរបស់ប្រទេសចិនផងដែរ។

គួរបញ្ជាក់ថាគោលការណ៍នេះ កើតឡើងនៅពេលដែលទីក្រុងប៉េកាំងកំពុងត្រៀមខ្លួនសម្រាប់កិច្ចប្រជុំនយោបាយប្រចាំឆ្នាំដ៏ធំបំផុតរបស់ខ្លួន ចាប់ផ្តើមនៅថ្ងៃទី៤ ខែមីនា។

អំឡុងពេលនៃការប្រជុំខាងមុខជាសម័យប្រជុំលើកទីពីរ ផែនការសម្រាប់គោលនយោបាយរបស់ប្រទេស រួមទាំងគោលនយោបាយពាក់ព័ន្ធនឹងយោធា សេដ្ឋកិច្ច ពាណិជ្ជកម្ម និងការទូត នឹងត្រូវបានលើកបង្ហាញផងដែរ៕

ប្រែសម្រួល៖ ណឺ មិនា

The post ឧត្តមសេនីយ៍យោធាជាន់ខ្ពស់ចិន៥រូបទៀត និងយោធាតាមខេត្ត ត្រូវដកតំណែង ក្រោមការចោទ«ពុករលួយ» appeared first on Kampuchea Thmey Daily.

អភិបាលក្រុង-ស្រុក២រូប ត្រូវសម្ដេចធិបតីដកតំណែង ព្រោះប្រើអំណាចប៉ះពាល់ពលរដ្ឋ និងយកប្រាក់សូកប៉ាន់ ដើម្បីតំណែង

Ngoeul Narath — Wed, 09 Oct 2024 05:08:30 +0000

រយៈពេលជិត៩ខែ រាប់ពីថ្ងៃទី១២ ខែមករា មកដល់ថ្ងៃទី០៨ ខែតុលា ឆ្នាំ២០២៤ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបញ្ចប់តំណែងអភិបាលក្រុងមួយរូប និងអភិបាលស្រុកមួយរូប ព្រោះតែជាប់ពាក់ព័ន្ធ នឹងបទល្មើសរំលោភអំណាច និងសម្អាតប្រាក់ និងជាប់ពាក់ព័ន្ធជាមួយរឿងរ៉ាវយកប្រាក់៣០ម៉ឺនដុល្លារ ទៅសូកប៉ាន់ ដើម្បីទទួលបានតំណែង។

អភិបាលក្រុងទី១ ដែលសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ចេញអនុក្រឹត្យបញ្ចប់តំណែង គឺលោក ខេង យ័ន។ អតីតអភិបាលក្រុងកែបរូបនេះ ត្រូវបានសម្ដេចប្រមុខរាជរដ្ឋាភិបាល បញ្ចប់តំណែងនៅថ្ងៃទី១២ ខែមករា ឆ្នាំ២០២៤ ដោយសារតែប្រើប្រាស់អំណាចនៃតួនាទីរបស់ខ្លួន ប្រព្រឹត្តអំពើប៉ះពាល់ ដល់ផលប្រយោជន៍រដ្ឋ និងផលប្រយោជន៍របស់ប្រជាពលរដ្ឋ។

ក្រោយនាយករដ្ឋមន្ត្រីកម្ពុជា បញ្ចប់តំណែងបាន១ថ្ងៃ ពោលគឺនៅថ្ងៃទី១៣ ខែមករា លោក ខេង យ័ន ត្រូវបានអង្គភាពប្រឆាំងអំពើពុករលួយ ឃាត់ខ្លួនបញ្ជូនទៅកាន់តុលាការ។ តំណាងអយ្យការអមសាលាដំបូងរាជធានីភ្នំពេញ បានសម្រេចចោទប្រកាន់លើអតីតអភិបាលក្រុងកែបរូបនេះ លើ២បទល្មើស គឺបទ រំលោភអំណាច និងបទសម្អាតប្រាក់ តាមមាត្រា ៣៥ នៃច្បាប់ស្តីពីការប្រឆាំងអំពេីពុករលួយ និងមាត្រា ៣ និងមាត្រា ៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម។ បច្ចុប្បន្ន ជនជាប់ចោទ ខេង យ័ន កំពុងត្រូវបានឃុំខ្លួននៅពន្ធនាគារ ដើម្បីបន្តនីតិវិធី។

រូបថត ជនជាប់ចោទ ខេង យ័ន កាលនៅកាន់តំណែងជាអភិបាលក្រុងកែប។

អភិបាលស្រុកទី២ ដែលសម្ដេចធិបតី ហ៊ុន ម៉ាណែត ប្រមុខរាជរដ្ឋាភិបាលកម្ពុជា ចេញអនុក្រឹត្យបញ្ចប់មុខតំណែងគឺជាអភិបាលស្រុកល្វាឯម លោក កន សុខកាយ។ សម្ដេចធិបតី ហ៊ុន ម៉ាណែត បញ្ចប់មុខតំណែងអភិបាលស្រុករូបនេះ នៅថ្ងៃទី០៨ ខែតុលា ឆ្នាំ២០២៤។ការបញ្ចប់តំណែងនេះធ្វើឡើងត្រឹមតែមួយថ្ងៃប៉ុណ្ណោះ បន្ទាប់ពី សម្ដេចតេជោ ហ៊ុន សែន ទម្លាយថាបុគ្គល លី សាម៉េត បានយកឈ្មោះរបស់សម្ដេចទៅបោកប្រាស់ថវិកាអ្នកដទៃ ទាំងសម្ដេចមិនដឹងអ្វីទាល់តែសោះ។

ក្នុងនោះសម្ដេចតេជោ ក៏បានឱ្យដឹងថាលោក កន សុខកាយ អភិបាលស្រុកល្វាឯម បានយកទឹកប្រាក់ចំនួន៣០ម៉ឺនដុល្លារ ទៅសូកនឹងបុគ្គល លី សាម៉េត ដើម្បីប្ដូរតំណែងពីអភិបាលស្រុកល្វាឯមទៅជាអភិបាលក្រុងអរិយក្សត្រ។ ប៉ុន្តែនៅក្នុងអនុក្រឹត្យរបស់សម្ដេចធិបតី បានបញ្ជាក់ថា មូលហេតុដែលនាំឱ្យបញ្ចប់តំណែងលោក កន សុខកាយ អភិបាលស្រុកល្វាឯម គឺព្រោះតែបានប្រព្រឹត្តកំហុសក្រមសីលធម៌ និងវិជ្ជាជីវៈធ្ងន់ធ្ងរ ផ្ទុយនឹងច្បាប់ស្តីពីសហលក្ខន្តិកៈមន្ត្រីរាជការស៊ីវិលនៃព្រះរាជាណាចក្រកម្ពុជា។

រូបថត លោក កន សុខកាយ អតីតអភិបាលស្រុកល្វាឯម ខេត្តកណ្ដាល។ រូបថតដោយ រដ្ឋបាលស្រុកល្វាឯម។

សូមរម្លឹកថា លោក កន សុខកាយ ត្រូវបានសម្ដេចតេជោ ហ៊ុន សែន តែងតាំងជាអភិបាលស្រុកល្វាឯម កាលពីថ្ងៃទី០៩ ខែមីនា ឆ្នាំ២០២០។ ចំណែក លោក ខេង យ័ន ត្រូវបានរាជរដ្ឋាភិបាលកម្ពុជា តែងតាំងជាអភិបាលក្រុងកែប កាលពីថ្ងៃ ១៨ ខែសីហា ឆ្នាំ២០២២៕

អត្ថបទ៖ ង៉ិល ណារ៉ាត់

The post អភិបាលក្រុង-ស្រុក២រូប ត្រូវសម្ដេចធិបតីដកតំណែង ព្រោះប្រើអំណាចប៉ះពាល់ពលរដ្ឋ និងយកប្រាក់សូកប៉ាន់ ដើម្បីតំណែង appeared first on Kampuchea Thmey Daily.

រដ្ឋមន្ត្រីមហាផ្ទៃ ដកតំណែងអធិការនគរបាលក្រុងច្បារមន ឱ្យមកជាមន្ត្រី និងបន្ថយស័ក្ដិ១ថ្នាក់

Ngoeul Narath — Wed, 03 Jul 2024 12:08:25 +0000

ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោកអភិសន្តិបណ្ឌិត ស សុខា សម្រេចដកតំណែងលោកវរសេនីយ៍ទោ សំអាង ផានី ពីអធិការនគរបាលក្រុងច្បារមន ឱ្យមកជាមន្ត្រី និងបន្ថយឋានន្តរស័ក្តិចំនួន ១ថ្នាក់។ នេះបើតាមប្រកាសស្ដីពីការដកហូតមុខតំណែង និងបន្ថយឋានន្តរស័ក្ដិមន្ត្រីនគរបាលជាតិកម្ពុជា ចុះថ្ងៃទី០៦ ខែឧសភា ប៉ុន្តែទើបផ្សព្វផ្សាយនាថ្ងៃទី០៣ ខែកក្កដា នេះ។

ក្នុងប្រកាសស្ដីពីការដកហូតមុខតំណែង និងបន្ថយឋានន្តរស័ក្ដិមន្ត្រីនគរបាលជាតិកម្ពុជា បានឱ្យដឹងថា ការសម្រេចដកតំណែងលោកវរសេនីយ៍ទោ សំអាង ផានី ពីអធិការនគរបាលក្រុងច្បារមន ឱ្យមកជាមន្ត្រី និងបន្ថយឋានន្តរស័ក្តិចំនួន ១ថ្នាក់ គឺដោយសារតែ លោក សំអាង ផានី ល្មើសបទវិន័យនគរបាលជាតិកម្ពុជា។

ជាការកត់សម្គាល់ រាជរដ្ឋាភិបាលកម្ពុជា នីតិកាលទី៧ ចាត់វិធានការក្ដៅចំពោះមន្ត្រីដែលល្មើសវិន័យ មន្ត្រីដែលជាប់ពាក់ព័ន្ធនឹងសារធាតុញៀន ក្រោមរូបភាពពិន័យ ដកហូតមុខតំណែង បន្ថយឋានន្តរស័ក្ដិ និងបណ្ដេញចេញពីក្របខណ្ឌជាដើម។

គួរឱ្យដឹងថា ចាប់ពីចាប់ផ្ដើមនីតិកាលទី៧រហូតដល់បច្ចុប្បន្ន យ៉ាងហោចណាស់មានមន្ត្រីលើសពី១០០នាក់ ត្រូវបានក្រសួងមហាផ្ទៃ ដកហូតតំណែង និងបណ្ដេញចេញពីក្របខណ្ឌ៕

ដោយ៖ ង៉ិល ណារ៉ាត់

The post រដ្ឋមន្ត្រីមហាផ្ទៃ ដកតំណែងអធិការនគរបាលក្រុងច្បារមន ឱ្យមកជាមន្ត្រី និងបន្ថយស័ក្ដិ១ថ្នាក់ appeared first on Kampuchea Thmey Daily.

ប៉ូលិសផ្កាយ៣ម្នាក់ និងផ្កាយ២ម្នាក់ របូតផ្កាយពីលើស្មាគ្មានសល់

Ngoeul Narath — Thu, 14 Mar 2024 06:53:53 +0000

មន្ត្រីនគរបាលជាតិពាក់ផ្កាយ៣ម្នាក់ និងពាក់ផ្កាយ២ម្នាក់ ត្រូវបានសម្ដេចប្រមុខរដ្ឋស្តីទី ចេញព្រះរាជក្រឹត្យត្រាស់ បង្គាប់បន្ថយឋានន្តរស័ក្តិថ្នាក់ ឱ្យមកត្រឹមពលបាលត្រី។ នេះបើតាមព្រះរាជក្រឹត្យចុះថ្ងៃទី១៣ ខែមីនា ឆ្នាំ២០២៤។

តាមព្រះរាជក្រឹត្យ មន្ត្រីនគរបាលជាតិទាំងពីររូបដែលត្រួវសម្ដេច សាយ ឈុំ ប្រមុខរដ្ឋស្ដីទី បន្ថយឋានន្តរស័ក្ដិ គឺមានដូចជា លោកឧត្តមសេនីយ៍ឯក យិន គារ អគ្គនាយករងអន្តោប្រវេសន៍ និងលោកឧត្តមសេនីយ៍ទោ សុខ បូរ៕

The post ប៉ូលិសផ្កាយ៣ម្នាក់ និងផ្កាយ២ម្នាក់ របូតផ្កាយពីលើស្មាគ្មានសល់ appeared first on Kampuchea Thmey Daily.

លោក ស សុខា ដកតំណែងស្នងការរងខេត្តព្រះសីហនុម្នាក់ ព្រោះល្មើសវិន័យនគរបាលជាតិ

អុន ស្រីមាន — Mon, 08 Jan 2024 07:03:12 +0000

លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានដកហូតមុខតំណែងលោក ហម សុវណ្ណរិទ្ធ ពីស្នងការរងនៃស្នងការដ្ឋាននគរបាលខេត្តព្រះសីហនុ ឱ្យមកជាមន្ត្រី និងបន្ថយឋានន្តរស័ក្តិ១ថ្នាក់ ឱ្យមកនៅត្រឹមថ្នាក់ វរសេនីយ៍ត្រី ដោយសារល្មើសវិន័យរបស់កងកម្លាំងនគរបាលជាតិ។ នេះបើតាមសេចក្តីប្រកាសរបស់ក្រសួងមហាផ្ទៃកាលពីសប្តាហ៍មុន។

សេចក្តីប្រកាសនេះ បញ្ជាក់ថា ត្រូវផ្ទេរភារកិច្ចដោយបង្ខំចំពោះវរសេនីយ៍ត្រី ហម សុវណ្ណរិទ្ធ មន្ត្រីនៃស្នងការដ្ឋាននគរបាលខេត្តព្រះសីហនុ ឱ្យទៅបម្រើការងារនោអង្គភាពអន្តរាគមន៍ នៃស្នងការដ្ឋាននគរបាលជាតិ។ សេចក្តីប្រកាសនេះត្រូវធ្វើឡើងចាប់ពីថ្ងៃចុះហត្ថលេខាតទៅ។

សូមបញ្ជាក់ថា នៅក្នុងអាណត្តិទី៧ ដឹកនាំដោយរាជរដ្ឋាភិបាលថ្មីនេះ ជាពិសេសមួយរយៈចុងក្រោយ មានការបណ្តេញចេញ និងដកហូតតំណែងចំពោះមន្ត្រីជាច្រើនរូបដែលធ្វើខុសនឹងវិន័យកងកម្លាំងនគរបាលជាតិ។ ជាក់ស្តែង កាលពីថ្ងៃទី១ ខែមករា ដើមឆ្នាំ២០២៤ មន្ត្រីនគរបាលក្រោមឱវាទអគ្គស្នងការដ្ឋាននគរបាលជាតិចំនួន១០រូបបន្ថែមទៀត ត្រូវបានលោក ស សុខា បណ្ដេញចេញពីក្របខ័ណ្ឌ ក្រោយរកឃើញមានសារធាតុញៀន៕

The post លោក ស សុខា ដកតំណែងស្នងការរងខេត្តព្រះសីហនុម្នាក់ ព្រោះល្មើសវិន័យនគរបាលជាតិ appeared first on Kampuchea Thmey Daily.

ល្មើសវិន័យកងកម្លាំង! មន្ត្រីនគរបាលម្នាក់ ត្រូវបានដកហូតមុខតំណែង ពីអធិការរងក្រុងតាខ្មៅ

sopheak khoun — Wed, 03 Nov 2021 09:08:36 +0000

សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចេញប្រកាស ស្ដីពី ការអនុវត្តវិន័យមន្ត្រីនគរបាលជាតិ ដោយបានសម្រេចដកហូតមុខតំណែង មន្ត្រីនគរបាលម្នាក់ ពីអធិការរង នៃអធិការដ្ឋានក្រុងតាខ្មៅ។

យោងតាមប្រកាស របស់សម្ដេចក្រឡាហោម ស ខេង ចុះនៅថ្ងៃទី២០ ខែតុលា ឆ្នាំ២០២១ តែទើបត្រូវបានផ្សព្វផ្សាយនៅថ្ងៃទី៣ ខែវិច្ឆិកានេះ បានសម្រេចថា ត្រូវអនុវត្តវិន័យក្រោមរូបភាពដកហូតមុខតំណែង ចំពោះវរសេនីយ៍ឯក ដន សុខរិទ្ធ អត្តលេខ ៧៨១៩៣ ពីអធិការរង អធិការដ្ឋាននគរបាលក្រុងតាខ្មៅ នៃស្នងការដ្ឋាននគរបាលខេត្តកណ្ដាល។ ក្នុងប្រកាសដដែល បានបញ្ជាក់ថា ការដកហូតមុខតំណែង មន្ត្រីនគរបាលរូបនេះ ដោយសារមូលហេតុ ល្មើសវិន័យរបស់កងកម្លាំងនគរបាលជាតិ។

យ៉ាងណាក៏ដោយ បើតាមប្រភពព័ត៌មានមួយចំនួន បានផ្សព្វផ្សាយថា ការដកហូតមុខតំណែងនេះ ក៏ប្រហែលអាចមកពីមន្ត្រីនគរបាលរូបនេះ ទើបទទួលបានតំណែងថ្មី ជាអធិការរង បានបបួលមិត្តភ័ក្តិ និងក្រុមការងាររបស់ខ្លួន រៀបចំពិធីជួប ជុំផឹកស៊ី ល្មើសនឹងវិធានការរដ្ឋបាលខេត្តកណ្ដាល ដើម្បីស្កាត់ការរាលដាលជំងឺកូវីដ-១៩ ក៏ដូចជាច្បាប់ស្ដីពី វិធានការទប់ស្កាត់ការឆ្លងរាលដាល នៃជំងឺកូវីដ-១៩ កាលពីអំឡុងខែកក្កដាកន្លងទៅនេះ៕

The post ល្មើសវិន័យកងកម្លាំង! មន្ត្រីនគរបាលម្នាក់ ត្រូវបានដកហូតមុខតំណែង ពីអធិការរងក្រុងតាខ្មៅ appeared first on Kampuchea Thmey Daily.

អតីតបវរកញ្ញា២រូប របូតតំណែងដូចគ្នា នៅក្នុងឆ្នាំ ២០២១នេះ

Sorn Phanith — Thu, 09 Sep 2021 10:23:16 +0000

គេកត់សម្គាល់ថា សម្រាប់ឆ្នាំ២០២១នេះ កើតមានរឿងរ៉ាវដ៏ភ្ញាក់ផ្អើល និងចាប់អារម្មណ៍ចំនួនពីរករណីស្រដៀងគ្នាលើវិស័យដើរម៉ូដ ក្រោយពេលកើតរឿងដកហូតតំណែងអតីតបវរកញ្ញាដល់ទៅ២រូប ក្នុងកម្មវិធីផ្សេងគ្នា។

ចំពោះអតីតបវរកញ្ញាស្រស់សោភា២រូប ដែលរបួតតំណែងដូចគ្នា នៅក្នុងឆ្នាំ២០២១នេះគឺ

១.កញ្ញា សេង រដ្ឋា ខណៈជិតដល់ពេលត្រូវទៅប្រកួតប្រជែងលក្ខណៈអន្តរជាតិ Miss Grand Inte rnational2020 នៅទីក្រុងបាងកកប្រទេសថៃនាចុងខែមីនា ឆ្នាំ២០២១ ស្រាប់តែមានរឿងផ្ទុះឡើងនូវមតិខ្វែងគ្នារវាងបេក្ខនារីកញ្ញាឯកដ៏អស្ចារ្យនៃកម្ពុជាឆ្នាំ ២០២០(Miss Grand Cambodia202 0) សេង រដ្ឋា និងក្រុមហ៊ុនរៀបចំការប្រកួតដែលតំណាងឱ្យប្រទេសកម្ពុជា។

កាលនោះអ្នករៀបចំកម្មវិធី Miss Grand Cam bodia លោក អ៊ិន សុភិន បានប្រកាសដកហូតតំ ណែងម្ចាស់មកុដ MGC2020កញ្ញា សេង រដ្ឋា ដោយផ្ទេរទៅឲ្យបវរកញ្ញាជយលាភីលេខ៣ កញ្ញា លីវ ជីវលី វិញ។ អ្នករៀបកម្មវិធីក៏បញ្ជូនបវរកញ្ញា លីវ ជីវលី ចេញទៅប្រកួតMiss Grand Internati onal នៅក្នុងប្រទេសថៃបានយ៉ាងរលូនផងដែរ។

២.កញ្ញា នេត រក្សា ដែលជាបវរកញ្ញាលំដាប់រងទី៣ ត្រូវបានស្ថាប័នMCUប្រកាសដកតំណែងយ៉ាងអាថ៌កំបាំងផងដែរ។ ដំណឹងភ្ញាក់ផ្អើលនេះប ន្ទាប់ពីលោក ម៉ែន និមលរ័ត្ន នាយកប្រតិបត្តិកម្មវិធីប្រកួតបវរកញ្ញាចក្រវាលកម្ពុជា បានធ្វើការប្រកាសនៅលើបណ្តាញសង្គមហ្វេសប៊ុកផ្ទាល់ខ្លួនថា មានការផ្ទេរតំណែងដោយបំពាក់ឆៀងបវរកញ្ញាលំដាប់រងទី៣ ទៅឲ្យកញ្ញា សួន ពិសី ដែលជាបវរកញ្ញាលំដាប់រងទី៤វិញ។

តាមការកត់សម្គាល់ ថ្វីត្បិតតែអតីតបវរកញ្ញាទាំង២រូបនេះ ត្រូវបានរបួតតំណែងដូចគ្នានៅក្នុងឆ្នាំ២ ០២១នេះក៏ពិតមែន ប៉ុន្តែសម្រាប់ប្រជាប្រិយភាព និងការគាំទ្រ នៅតែមានសន្ទុះ ខណៈការងារសិល្បៈទទួលបានបន្តបន្ទាប់មិនចាញ់អ្នកសិល្បៈឯទៀតឡើយ៕

អត្ថបទ៖ ចាន់រ៉ា

The post អតីតបវរកញ្ញា២រូប របូតតំណែងដូចគ្នា នៅក្នុងឆ្នាំ ២០២១នេះ appeared first on Kampuchea Thmey Daily.