ដាក់វិន័យ Archives - Kampuchea Thmey Daily

ក្រសួងមហាផ្ទៃអនុវត្តវិន័យកងកម្លាំងលើ ពលបាលត្រី ហង្ស ចាន់រដ្ឋា ក្រោមរូបភាពបណ្ដេញចេញពីក្របខ័ណ្ឌនគរបាលជាតិ

Sokhom Khon — Fri, 01 May 2026 02:30:40 +0000

រដ្ឋមន្ត្រីក្រសួងមហាផ្ទៃ លោកឧបនាយករដ្ឋមន្ត្រី ស សុខា បានសម្រេចអនុវត្តវិន័យកងកម្លាំងលើពលបាលត្រី ហង្ស ចាន់រដ្ឋា តាមរូបភាពដកហូតឋានន្តរស័ក្តិ និងបណ្តេញចេញពីក្របខ័ណ្ឌមន្ត្រីនគរបាលជាតិ។ យោងតាមសេចក្ដីប្រកាសស្ដីពីការ អនុវត្តខាងទណ្ឌកម្មខាងវិន័យចំពោះមន្ត្រីនគរបាលជាតិ កាលពីថ្ងៃទី៤ ខែកុម្ភៈ ឆ្នាំ២០២៦ ពលបាលត្រី ហង្ស ចាន់រដ្ឋា អត្តលេខ ៦១៨២១ ជាមន្ត្រីនៃនាយកដ្ឋានសុខាភិបាល ចំណុះអគ្គនាយកដ្ឋានភស្តុភារ និងហិរញ្ញវត្ថុ ត្រូវបានបណ្ដេញពីក្របខ័ណ្ឌមន្ត្រីនគរបាលជាតិដោយមូលហេតុ ល្មើសបទវិន័យនគរបាលជាតិកម្ពុជា។

យោងលើគណនីយហ្វេសប៊ុកឈ្មោះ Sin Soriya បានបង្ហោះសារនៅលើគណនីរបស់ខ្លួនពីការក្លែងឯកសារមួយចំនួនរបស់លោក ហង្ស ចាន់រដ្ឋា ពាក់ព័ន្ធនឹងការធ្វើកាតនគរបាលជាតិក្លែងក្លាយ និងតារាងប្រាក់ខែជូនដល់ខ្លួន។

គួររំលឹកថា ពលបាលត្រី ហង្ស ចាន់រដ្ឋា កាលពីពេលកន្លងទៅក៏ត្រូវបានប្រមុខរាជរដ្ឋាភិបាលសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ចេញអនុក្រឹត្យបន្ថយឋានន្តរស័ក្កិពី វរសេនីយ៍ឯក ឲ្យមកត្រឹមថ្នាក់ពលបាលត្រី ដោយមូលហេតុ ល្មើសបទវិន័យនគរបាលជាតិកម្ពុជាដូចគ្នា៕

The post ក្រសួងមហាផ្ទៃអនុវត្តវិន័យកងកម្លាំងលើ ពលបាលត្រី ហង្ស ចាន់រដ្ឋា ក្រោមរូបភាពបណ្ដេញចេញពីក្របខ័ណ្ឌនគរបាលជាតិ appeared first on Kampuchea Thmey Daily.

ករណីមន្ត្រីនគរបាលគប់កែវស្រាលើអ្នកចាប់ទឹកកកឲ្យរងរបួស ស្នងការខេត្តកំពត ថា មិនលើកលែងដាច់ខាត

Sokhom Khon — Tue, 21 Apr 2026 02:32:22 +0000

ស្នងការនគរបាលខេត្តកំពត លោកឧត្ដមសេនីយ៍ទោ ម៉ៅ ច័ន្ទមធុរិទ្ធ ព្រឹកថ្ងៃទី២១ ខែមេសានេះ បានបង្ហោះសារនៅលើទំព័រហ្វេសប៊ុករបស់ខ្លួនពាក់ព័ន្ធមន្ត្រីនគរបាលម្នាក់ដែលបានប្រើហិង្សាលើស្ត្រីអ្នកចាប់ទឹកកកបណ្ដាលឲ្យរងរបួស។ លោកស្នងការខេត្តសង្កាត់ធ្ងន់ថា «មន្ត្រីជាអ្នកអនុវត្តច្បាប់ និងជាអ្នកបំរើប្រជាពលរដ្ឋដ៏ល្អ តែបើមន្ត្រីធុននេះ គឺមិនមាននៅក្នុងវចនានុក្រមរបស់ខ្ញុំនោះទេ។ មន្ត្រីដែលផឹកស៊ីហើយបានយកកែវគប់មកលើប្រជាពលរដ្ឋ នឹងត្រូវអនុវត្តទោសដោយគ្មានការលើកលែងជាដាច់ខាត»។

សូមជម្រាបថា កាលពីវេលាម៉ោង១១យប់ ថ្ងៃទី១៩ ខែមេសា ឆ្នាំ២០២៦ ស្ថិតក្នុងភូមិអណ្ដូងខ្មែរ សង្កាត់អណ្ដូងខ្មែរ ក្រុងកំពត ខេត្តកំពត ស្ត្រីម្នាក់ដែលមានឈ្មោះ ថា ទិត្យធូ ជាអ្នកស៊ីឈ្នួលចាប់ទឹកកកឲ្យភ្ញៀវតាមកម្មពិធីផ្សេងៗ ត្រូវបានមន្ត្រីនគរបាលម្នាក់ដែលគេស្គាល់ថា បំរើការងារនៅអធិការដ្ឋាននគរបាលក្រុងកំពត ឈ្មោះ ទេព សុខផេង បានគប់កែវស្រាចំកណ្ដាលមុខ បណ្ដាលឲ្យរងរបួស ត្រូវបានក្រុមកាងារបញ្ជូនទៅសង្រោះបន្ទាន់ភ្លាមៗ។

បើតាមប្រភពប្រជាពលរដ្ឋបានប្រាប់ឲ្យដឹងថា ជនរងគ្រោះបានមកចាប់ទឹកកកស៊ីឈ្នួលក្នុងកម្មពិធីមួយស្ថិតនៅបុរីកុសល្យ ម៉ីរៀល អ៊ីស្ទេត ឯ.ក. ដែលមហាជនស្គាល់ថា ម្ចាស់បុរីជាឪពុកម្ដាយរបស់ជនបង្កតែម្ដង។ នៅពេលជិតចប់កម្មពិធីទៅហើយ ស្រាប់តែជនសង្ស័យខឹងកែវស្រារបស់ខ្លួនអស់ទឹកកក ក៏ហៅជនរងគ្រោះមកចាប់ទឹកកកឲ្យយូរពេក បែរជាយកកែវស្រាគប់ចំកណ្ដាលមុខតែម្ដង បណ្ដាលរបួសហូរឈាមពេញមុខ និងត្រូវក្រោមភ្នែកខាងឆ្វេង សំណាងល្អដែលមិនត្រូវភ្នែក ទើបក្រុមការងារបញ្ជូនទៅកាន់មន្ទីរពេទ្យ។ ប្រភពបន្តទៀតថា ជុំវិញរឿងនេះ ភាគីជនរងគ្រោះត្រូវជនបង្កសម្របសម្រួលឱ្យជនរងគ្រោះទទួលសំណងដើម្បីបញ្ចប់រឿងចំនួន ២លាន ៥០ម៉ឺនរៀលដែរ តែខាងជនរងគ្រោះមិនព្រម។

បើតាមការបញ្ជាក់ពីលោកឧត្ដមសេនីយ៍ទោ ម៉ៅ ច័ន្ទមធុរិទ្ធ ករណីខាងលើជនរងគ្រោះមិនបានមកដាក់ពាក្យបណ្ដឹងនោះទេ ទើបមានការយឺតយ៉ាវក្នុងការទទួលព័ត៍មាន៕

The post ករណីមន្ត្រីនគរបាលគប់កែវស្រាលើអ្នកចាប់ទឹកកកឲ្យរងរបួស ស្នងការខេត្តកំពត ថា មិនលើកលែងដាច់ខាត appeared first on Kampuchea Thmey Daily.

ដាក់វិន័យឲ្យកូនមានផលល្អទៅថ្ងៃក្រោយ ឪពុកម្ដាយមួយចំនួនគួរដឹង

Sonya — Wed, 21 Jul 2021 01:48:01 +0000

គ្មានក្មេងណាដែលចូលចិត្តឲ្យឪពុកម្ដាយតឹងរ៉ឹងដាក់ខ្លួនទេ ប៉ុន្តែជាជម្រើសល្អ ទៅថ្ងៃក្រោយ ព្រោះគេទម្លាប់រស់នៅ ដោយហាត់ពត់លត់ដំ តាំងពីក្មេង ទៅតាមគន្លង ដែលយើងដៅ។ បើម៉ាក់ប៉ាមានវិន័យ និងលក្ខខណ្ឌជាមួយកូនៗ ហើយជាការល្អ ប៉ុន្តែបើមិនទាន់មានវិញ គួរពិចារណាឡើងវិញ ថាតើគួរកំណត់ របៀបបង្ហាត់បង្រៀនកូនដោយវិធីណាទើបជាការល្អ។ អត្ថបទនេះសូមលើកយកចំណុចវិជ្ជមានមួយចំនួន តាមរយៈការដាក់កំហិត ក្នុងការចិញ្ចឹមបីបាច់កូន ដែលយើងគួរពិចារណាដូចខាងក្រោម។

១- រៀនពូកែ៖ ការស្រាវជ្រាវបានបង្ហាញថាភាគច្រើនក្មេងដែលរៀនពូកែ និងបន្តការសិក្សាបានខ្ពស់ ជាក្មេងដែលមានម៉ាក់ប៉ាមានវិន័យខ្ជាប់ខ្ជួនក្នុងការអប់រំពួកគេ។ ទម្លាប់ និងការព្រមទទួលយកវិន័យមកគោរពតាំងពីក្មេង ជាចំណែកធំមួយ ធ្វើឲ្យគេខំប្រឹងរៀន រហូតជាសិស្សពូកែ ឬកាន់តែពូកែ។

២- ទំនុកចិត្តលើខ្លួនឯង៖ ការតម្រែតម្រង់កូនចៅ ឲ្យរស់នៅក្រោមទំនួលខុសត្រូវ និងមានហេតុផល រាល់ការសម្រេចចិត្ត ឬបំពេញការងារអ្វីមួយ កូនៗតែងតែមានទំនុកចិត្ត និងជឿជាក់លើខ្លួនឯងខ្ពស់ (ប៉ុន្តែមិនអំនួត)។ រាល់ការខិតខំប្រឹងប្រែង ចេះវាយតម្លៃលើស្ថានភាព មុនសម្រេចចិត្តធ្វើអ្វីមួយ ជាកត្តាសំខាន់ដែលអាចធ្វើឲ្យគេជោគជ័យលើកិច្ចការ មិនថាតូចធំទៅថ្ងៃក្រោយ។ ទោះជាកូន មានទម្លាប់ រៀនផ្ដល់ក្ដីសង្ឃឹម និងទំនុកចិត្តលើខ្លួនឯងក៏ដោយ យើងជាម៉ាក់ប៉ាត្រូវតែនៅក្បែរ ចាំប្រឹក្សា ឲ្យយោបល់ ឬលើកទឹកចិត្តកូន ទើបគេមិនងាយចុះចាញ់ភាពលំបាកទាំងឡាយ។

៣- ចេះគ្រប់គ្រងខ្លួនឯង៖ ក្មេងអាចគ្រប់គ្រងអត្តចរិត និងទង្វើរបស់ខ្លួនបានដោយសារពួកគេធំឡើងជាមួយវិន័យ និងព្រំដែនច្បាស់លាស់។ បែបនេះគេនឹងមិនងាយត្រូវបានមិត្តភក្ត្រអូសទាញ ឬប្រព្រឹត្តរឿងមិនល្អណាមួយឡើយ។ ការបង្រៀនកូនពីវិន័យទាំងពីវ័យក្មេង ពេលធំឡើងគេនឹងចេះគ្រប់គ្រងខ្លួនឯងដោយឯកឯង។

៤- ឯករាជ្យ និងទំនួលខុសត្រូវ៖ ការដែលមានឯករាជ្យលើខ្លួនឯង អាចល្អជាងក្មេងដទៃ ព្រោះរាល់ពេលធ្វើអី ស្រែករកជំនួយគ្រប់ពេល។ គេចេះគិតមុនគូរ ចេះយោគយល់គ្នាជាមួយក្មេងដទៃពេលមានជម្លោះ។ មួយវិញទៀតពេលដែលធំដឹងក្តី គេនឹងអាចរស់ដោយខ្លួនឯង ចេះរកថវិកាផ្គត់ផ្គង់ខ្លួនឯងនិងសន្សំទៅថ្ងៃអនាគត។ ពេលនោះកូនយើងនឹងដឹងពីផលលំបាក មិនខ្ជះខ្ជាយ ហើយយល់ដឹងពីបញ្ហា ឬការប្រើប្រាស់ហិរញ្ញវត្ថុ ដោយវៃឆ្លាតក៏អាចថាបាន។

តើវិន័យបែបណា ដែលម៉ាក់ប៉ាដទៃដាក់ឲ្យកូន? ប្រសិទ្ធភាពយ៉ាងម៉េចដែរ?

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ តិចនិកទាំង៥ បង្រៀនកូនឲ្យចេះកំណត់គោលដៅជីវិត

ចុចអាន៖ ហេតុផល ៥យ៉ាង ឪពុកម្ដាយល្មមឈប់ប្រៀបធៀបកូនជាមួយក្មេងដទៃ

The post ដាក់វិន័យឲ្យកូនមានផលល្អទៅថ្ងៃក្រោយ ឪពុកម្ដាយមួយចំនួនគួរដឹង appeared first on Kampuchea Thmey Daily.

ដាក់វិន័យ Archives - Kampuchea Thmey Daily

ករណីមន្ត្រីនគរបាលគប់កែវស្រាលើអ្នកចាប់ទឹកកកឲ្យរងរបួស ស្នងការខេត្តកំពត ថា មិនលើកលែងដាច់ខាត

ដាក់​វិន័យ​ឲ្យ​កូនមាន​ផល​ល្អ​ទៅ​ថ្ងៃ​ក្រោយ ឪពុក​ម្ដាយ​មួយ​ចំនួន​គួរ​ដឹង

ដាក់វិន័យឲ្យកូនមានផលល្អទៅថ្ងៃក្រោយ ឪពុកម្ដាយមួយចំនួនគួរដឹង