តំបន់វិស្សមកាលឆ្នេរមាសឆ្នេរប្រាក់ Archives - Kampuchea Thmey Daily

ក្រុមហ៊ុនចិនធំៗ បោះទុនវិនិយោគខ្ទង់ពាន់លានដុល្លារ កំពុងមានវត្តមាននៅកម្ពុជា

Dy Bunnara — Wed, 17 Dec 2025 03:24:30 +0000

ប្រទេសចិនជាប្រភពវិនិយោគដ៏ធំក្នុងប្រទេសកម្ពុជា ដែលបានបោះទុនវិនិយោគស្ទើរគ្រប់វិស័យ។ ក្រុមហ៊ុនចិនកាន់តែមានទំនុកចិត្តក្នុងការបោះទុនពង្រីកការវិនិយោគនៅក្នុងប្រទេសកម្ពុជា ស្របពេលដែលរដ្ឋាភិបាលកម្ពុជាបានដាក់ចេញគោលការណ៍លើកទឹកចិត្តដល់វិនិយោគិន ដែលនាំឲ្យមានការបង្កើនទំហំទុនវិនិយោគដល់រាប់រយរាប់ពាន់លានដុល្លារ។

ក្រុមហ៊ុនចិនធំៗចំនួន ៦ នេះ កំពុងវិនិយោគលើវិស័យសំខាន់ៗមានដូចជា ឧស្សាហកម្ម អចលទ្រព្យ ហេដ្ឋារចនាសម្ព័ន្ធ និងបដិសណ្ឋារកិច្ចក្រោមទុនវិនិយោគខ្ទង់ពាន់លានដុល្លារ។

ក្រុមហ៊ុន“សាជីវកម្មថ្នល់ និងស្ពានចិន (CRBC)

ក្រុមហ៊ុន “សាជីវកម្មថ្នល់ និងស្ពានចិន (CRBC) ជាក្រុមហ៊ុនបុត្រសម្ព័ន្ធនៃក្រុមហ៊ុន China Communications Construction Company ដែលមានការិយាល័យកណ្ដាលនៅទីក្រុងបេកាំង ប្រទេសចិន។

ប្រតិបត្ដិការអាជីវកម្មចម្បងរបស់ក្រុមហ៊ុន ផ្តោតលើការសាងសង់ផ្នែកហេដ្ឋារចនាសម្ព័ន្ធផ្លូវនិងស្ពាន។ បច្ចុប្បន្នក្រុមហ៊ុនបានអភិវឌ្ឍផ្លូវល្បឿនលឿនចំនួនពីរខ្សែនៅក្នុងប្រទេសកម្ពុជាក្នុងនោះមាន ផ្លូវល្បឿនលឿនភ្នំពេញ-ក្រុងព្រះសីហនុ ក្រោមទុនវិនិយោគប្រមាណ ២ ប៊ីលានដុល្លារ ដែលបានបញ្ចប់ដាក់ឲ្យដំណើរការកាលពីឆ្នាំ២០២២ និងផ្លូវល្បឿនលឿនទីពីរភ្នំពេញ-បាវិត ក្រោមទុនវិនិយោគប្រមាណ ១,៣៥ ប៊ីលានដុល្លារ ដែលកំពុងដំណើរការសាងសង់តាមផែនការគ្រោងបញ្ចប់នៅក្នុងឆ្នាំ ២០២៧។

បន្ថែមពីនេះ ក្រុមហ៊ុនក៏កំពុងសិក្សាគម្រោងសាងសង់ផ្លូវល្បឿនលឿនទី ៣ ភ្នំពេញ-សៀមរាបផងដែរ។

ក្រុមហ៊ុនអភិវឌ្ឍតំបន់សេដ្ឋកិច្ចពិសេសក្រុងព្រះសីហនុ (SSEZ)

តំបន់សេដ្ឋកិច្ចពិសេសក្រុងព្រះសីហនុ ត្រូវបានប្រសិទ្ធិនាមថាជាគំរូនៃកិច្ចសហប្រតិបត្តិការជាក់ស្ដែងរវាងរដ្ឋាភិបាលកម្ពុជា-ចិន។

តំបន់សេដ្ឋកិច្ចពិសេសក្រុងព្រះសីហនុ បានសម្ពោធដាក់ឲ្យដំណើរការនៅឆ្នាំ២០០៨ និងនៅឆ្នាំ២០០៩ បានក្លាយជាតំបន់សហប្រតិបត្តិការសេដ្ឋកិច្ចនិងពាណិជ្ជកម្មក្រៅប្រទេសដំបូងគេ ដែលឆ្លងកាត់ការវាយតម្លៃរបស់ក្រសួងពាណិជ្ជកម្មចិន។

តំបន់សេដ្ឋកិច្ចក្រុងព្រះសីហនុជាសួនឧស្សាហកម្មដែលមានបណ្តុំរោងចក្រឧស្សាហកម្មដ៏ធំនៅខេត្តជាប់មាត់សមុទ្រប៉ែកនិរតីនៃប្រទេសកម្ពុជា ដែលបច្ចុប្បន្នមានរោងចក្រចំនួន ២០២ កំពុងដំណើរការ ដែលបង្កើតឱកាសការងារបានប្រមាណ ៣ ម៉ឺន ២ ពាន់កន្លែង។

នៅក្នុងឆ្នាំ ២០២៤ តំបន់សេដ្ឋកិច្ចពិសេសក្រុងព្រះសីហនុសម្រេចបានការនាំចេញនាំចូល គិតជាទំហំទឹកប្រាក់ប្រមាណ ៤,៧៨ ប៊ីលានដុល្លារកើនឡើង ២១,៣% ធៀបឆ្នាំ ២០២៣។

ក្រុមហ៊ុនអភិវឌ្ឍន៍ Peninsula Bay Investment

ក្រុមហ៊ុន ផឹនីនស៊្យូឡឺ បេ អ៊ិនវេសម៉ិន (Peninsula Bay Investment) កំពុងអភិវឌ្ឍសណ្ឋាគារលំដាប់ផ្កាយប្រាំ និងមជ្ឈមណ្ឌលពាណិជ្ជកម្មនៅលើផ្ទៃដីទំហំ ១៦ ហិកតា នៅជិតទីលានតេជោ ភូមិ៤ សង្កាត់លេខ៤ ក្រុងព្រះសីហនុ ដែលចាយទុនប្រមាណ ១ ប៊ីលានដុល្លារ។

Peninsula Bay Investment ជាគម្រោងអភិវឌ្ឍដ៏សំខាន់មួយនៅខេត្តព្រះសីហនុ ដែលជាខេត្តតំបន់ឆ្នេររបស់ប្រទេសកម្ពុជា។ ការអភិវឌ្ឍន៍របស់ក្រុមហ៊ុនបែងចែកជា ២ តំបន់៖

-តំបន់ A: មានសណ្ឋាគារលំដាប់ផ្កាយ ៥ (កម្ពស់ ៣៧ ជាន់), ផ្សារទំនើប និងសួនកម្សាន្តផ្សេងៗដែលគ្រោងបញ្ចប់នៅឆ្នាំ២០២៨
-តំបន់ B: អគារខុនដូរ និងអគារពាណិជ្ជកម្ម ដែលគ្រោងបញ្ចប់នៅដើមឆ្នាំ២០២៦

ចាយទុនជាង ១ ប៊ីលានដុល្លារ គម្រោងអភិវឌ្ឍន៍របស់ក្រុមហ៊ុន Peninsula Bay Investment នឹងចូលរួមចំណែកយ៉ាងសកម្មក្នុងការប្រែក្លាយខេត្តព្រះសីហនុឱ្យទៅជាតំបន់ពាណិជ្ជកម្ម និងទេសចរណ៍លំដាប់អន្តរជាតិ។

ក្រុមហ៊ុនផលិតសំបកកង់ Sailun

ក្រុមហ៊ុន Sailun បានបោះទុនវិនិយោគប្រមាណ ១ ប៊ីលានដុល្លារ ដើម្បីដំណើរការរោងចក្រផលិតសំបកកង់យានយន្តក្នុងប្រទេសកម្ពុជា ដែលមានទីតាំងនៅខេត្ដស្វាយរៀង។

ដំណើរការខ្សែសង្វាក់ផលិតកម្មរបស់ក្រុមហ៊ុន ក្នុងមួយថ្ងៃប្រើប្រាស់ជ័រកៅស៊ូអស់ជាង ៥០០ តោន ជាមួយសមត្ថភាពផលិតបានប្រមាណ ៣០ លានគ្រាប់ក្នុងមួយឆ្នាំ។

ក្នុងឱកាសជំនួបពិភាក្សាការងារជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នាឱកាសចូលរួមកិច្ចប្រជុំកំពូលមហាអនុតំបន់មេគង្គ (GMS) លើកទី ៨ នាថ្ងៃទី៦ ខែវិច្ឆិកា ឆ្នាំ២០២៤ នៅទីក្រុងគុនមិញ ខេត្តយូណាន ប្រទេសចិន លោក Yuan Zhongxue ប្រធានកិត្តិយសក្រុមហ៊ុន Sailun Group បានលើកអំពីគោលបំណងរបស់ក្រុមហ៊ុនក្នុងការពង្រីកការវិនិយោគរបស់ខ្លួននៅកម្ពុជា ដោយផ្ដោតលើការកែច្នៃផលិតផលកៅស៊ូ ដើម្បីផលិតចេញជាផលិតផលផ្សេងៗ រួមទាំងការបង្កើតសួនឧស្សាហកម្មសម្រាប់ខ្សែច្រវាក់ផលិតកម្មនៃឧស្សាហកម្មកែច្នៃកៅស៊ូ ក៏ដូចជាសមត្ថភាពផលិតរបស់ក្រុមហ៊ុននៅក្នុងតំបន់។

ក្រុមហ៊ុនអភិវឌ្ឍន៍តំបន់វិស្សមកាលឆ្នេរមាស ឆ្នេរប្រាក់

លោក ហ្វូ ហាង អគ្គនាយកក្រុមហ៊ុន យិះ ចៀ ដែលវិនិយោគនៅតំបន់ឆ្នេរមាសឆ្នេរប្រាក់ក្នុងខេត្តព្រះសីហនុបានឲ្យដឹងថា ក្នុងរយៈពេលជិត ១០ ឆ្នាំ ក្រុមហ៊ុនបានចាយទុនវិនិយោគអស់ប្រមាណ ៦០០ លានដុល្លារ ក្នុងទុនបម្រុងគ្រោងចំណាយសរុបប្រមាណ ៥ ០០០ លានដុល្លារ ខណៈការវិនិយោគទាំងមូលខ្ទង់ប្រើប្រាស់ពេលប្រហែល ២០ ឆ្នាំ។

លោកថា គម្រោងអភិវឌ្ឍន៍ឆ្នេរមាស ឆ្នេរប្រាក់ជាគម្រោងខ្នាតយក្សនៅខេត្តព្រះសីហនុ ដែលត្រូវបានអភិវឌ្ឍតាមដំណាក់កាលផ្ដោតលើវិស័យទេសចរណ៍។

នៅតំបន់វិស្សមកាលឆ្នេរមាសឆ្នេរប្រាក់ ក្រុមហ៊ុនកំពុងអភិវឌ្ឍនៅលើផ្ទៃដីទំហំជាង ៣ ០០០ ហិកតា។ ក្រៅពីការសាងសង់ហេដ្ឋារចនាសម្ពន្ធនានាដែលមានខ្សែផ្លូវប្រវែងជាង ១០០ គីឡូម៉ែត្រ ប្រព័ន្ធភ្លើងអគ្គិសនី ទឹកស្អាត ក្រុមហ៊ុនបានសាងសង់សណ្ឋាគារជាច្រើនកន្លែង រៀបចំតំបន់ទេសចរនៅកោះសំពោច (កោះរាជបុត្រ) បង្កើតសួនផ្កា បូករួមទីលានបាញ់ព្រួយ ហើយទៅថ្ងៃមុខនឹងរៀបចំឲ្យមានតំបន់ទេសចរណ៍ជាច្រើនថែមទៀត។

គម្រោង Bay Of Light

Bay of Lights ជាគម្រោងអភិវឌ្ឍទីក្រុងជាមួយទំហំទឹកប្រាក់វិនិយោគប្រមាណ ១៦ ពាន់លានដុល្លាអាមេរិក ដើម្បីកែប្រែមុខមាត់ឆ្នេរសមុទ្រកម្ពុជា តាមរយៈការបង្កើតទីក្រុងអនាគតមួយដែលលាតសន្ធឹងលើផ្ទៃដី ៩៣៤ ហិកតាតាមបណ្តោយឆ្នេរសមុទ្ររាម។

ចក្ខុវិស័យរបស់គម្រោង Bay of Lights គឺប្រែក្លាយខេត្តព្រះសីហនុក្លាយទៅជាមជ្ឈមណ្ឌលពាណិជ្ជកម្ម វប្បធម៌ និងកិច្ចសហប្រតិបត្តិការអន្តរជាតិ ដោយទីក្រុងនេះនឹងមិនត្រឹមតែជាកន្លែងរស់នៅ និងធ្វើការ ប៉ុន្តែនឹងក្លាយទៅជាចំណុចចាប់ផ្ដើមថ្មីមួយ ដែលបង្ហាញពីអនាគត ការច្នៃប្រឌិត និងសក្តានុពលរបស់តំបន់ឆ្នេរសមុទ្រកម្ពុជា៕

The post ក្រុមហ៊ុនចិនធំៗ បោះទុនវិនិយោគខ្ទង់ពាន់លានដុល្លារ កំពុងមានវត្តមាននៅកម្ពុជា appeared first on Kampuchea Thmey Daily.

ដើមចំបក់អាយុកាលជាង ២ ០០០ ឆ្នាំ ប្រទះឃើញនៅតំបន់វិស្សមកាលឆ្នេរមាសឆ្នេរប្រាក់

Dy Bunnara — Fri, 20 Dec 2024 08:40:06 +0000

នៅតំបន់វិស្សមកាលឆ្នេរមាសឆ្នេរប្រាក់ ដែលកំពុងវិនិយោគជាគោលដៅទេសចរណ៍មាត់ឆ្នេរនៃខេត្តព្រះសីហនុ ត្រូវបានក្រុមអ្នករុករកប្រទះឃើញដើមឈើចំណាស់មួយ ដែលមានអាយុកាលជាង ២ ០០០ ឆ្នាំ លាក់ខ្លួនកណ្ដាលព្រៃ។

ដើមឈើអាយុកាលរាប់សតវត្សនេះ ត្រូវបានមន្ត្រីក្រុមហ៊ុនអភិវឌ្ឍនៅតំបន់វិស្សមកាលឆ្នេរមាសឆ្នេរប្រាក់អះអាងថា ជាប្រភេទដើមចំបក់ ដែលត្រូវបានរកឃើញនៅពេលក្រុមហ៊ុនទទួលបានសិទ្ធិអភិវឌ្ឍនៅតំបន់នោះកាលពីអំឡុងឆ្នាំ ២០១០។

បើតាមអ្នកមើលការខុសត្រូវក្រុមហ៊ុនអភិវឌ្ឍតំបន់វិស្សមកាលឆ្នេរមាសឆ្នេរប្រាក់ លោក រ៉ា ប៊ីត ប្រាប់ក្រុមអ្នកសារព័ត៌មានក្នុងដំណើរទស្សនកិច្ចក្នុងខេត្តព្រះសីហនុយ៉ាងដូច្នេះថា «ដើមឈើនេះគឺមានអាយុកាល ២០០០ ឆ្នាំ»។ នៅពេលសួរបញ្ជាក់តើអាចវាយតម្លៃអាយុកាលដើមឈើនេះយ៉ាងម៉េចទៅ? អ្នកមើលការខុសត្រូវក្រុមហ៊ុនបានលើកសំអាងដោយការពិសោធន៍ដែលបញ្ជាក់ពីអាយុកាលដើមឈើដ៏ចំណាស់នេះ។

បើតាមមន្រ្តីក្រុមហ៊ុន ដើមឈើយក្សនេះទាល់តែត្រូវការមនុស្ស ១៧ នាក់កាន់ដៃទើបព័ទ្ធជុំបាន។ មានកម្ពស់ប្រហែល ៥០ ម៉ែត្រ មានវល្លិរុំព័ទ្ធជុំវិញ មានឫសជ្រៅ និងស្លឹកឈើច្រើន លោក រ៉ា ប៊ីត បានប្រៀបធៀបដើមឈើអាយុរាប់ពាន់ឆ្នាំនេះហាក់ដូចជាម្ចាស់ពិតប្រាកដនៃតំបន់ឆ្នេរមាសឆ្នេរប្រាក់ ដែលសត្វនិងរុក្ខជាតិទាំងអស់ក្នុងបរិវេណ ៣៣ គីឡូម៉ែត្រការ៉េសុទ្ធតែគោរពដើមឈើនេះ៕

The post ដើមចំបក់អាយុកាលជាង ២ ០០០ ឆ្នាំ ប្រទះឃើញនៅតំបន់វិស្សមកាលឆ្នេរមាសឆ្នេរប្រាក់ appeared first on Kampuchea Thmey Daily.

ជិត ១០ ឆ្នាំ ក្រុមហ៊ុនអភិវឌ្ឍឆ្នេរមាសឆ្នេរប្រាក់ ចាយទុនវិនិយោគអស់ជាង ៦០០ លានដុល្លារ

Dy Bunnara — Fri, 20 Dec 2024 02:22:10 +0000

ក្រោយទទួលបានសិទ្ធិវិនិយោគកែប្រែតំបន់ដ៏ស្ងប់ស្ងាត់ក្លាយជាគោលដៅទេសចរដ៏ទាក់ទាញនៃតំបន់មាត់ឆ្នេរ ជាមួយការសាងសង់ហេដ្ឋារចនាសម្ព័ន្ធនានា មានផ្លូវទឹកភ្លើង នោះ ក្រុមហ៊ុនអភិវឌ្ឍតំបន់វិស្សមកាលឆ្នេរមាសឆ្នេរប្រាក់ បានចំណាយទុនវិនិយោគអស់ជាង ៦០០ លានដុល្លារក្នុងរយៈពេលជិត ១០ ឆ្នាំនេះ។

លោក ហ្វូ ហាង (Fu hang) អគ្គនាយកក្រុមហ៊ុន យិះ ចៀ ដែលទទួលបានសិទ្ធិវិនិយោគនៅតំបន់ឆ្នេរមាសឆ្នេរប្រាក់ក្នុងខេត្តព្រះសីហនុបានឲ្យដឹងថា ការវិនិយោគទាំងមូលរបស់ក្រុមហ៊ុនខ្ទង់ប្រើប្រាស់ពេលប្រហែល ២០ ឆ្នាំ។ ក្នុងរយៈពេលជិត ១០ ឆ្នាំនេះ ក្រោយក្រុមហ៊ុនទទួលបានសិទ្ធិវិនិយោគពីរដ្ឋាភិបាលនៅឆ្នាំ ២០១០ និងចាប់ផ្ដើមដំណើរការគម្រោងអភិវឌ្ឍពីឆ្នាំ ២០១៦ រហូតមកដល់ពេលនេះក្រុមហ៊ុនបានប្រើប្រាស់ទុនវិនិយោគអស់ប្រមាណ ៦០០ លានដុល្លារ ក្នុងទុនបម្រុងគ្រោងចំណាយសរុបប្រមាណ ៥ ០០០ លានដុល្លារ។

លោកលើកឡើងថា នៅតំបន់វិស្សមកាលឆ្នេរមាសឆ្នេរប្រាក់ ក្រុមហ៊ុនទទួលបានសិទ្ធិអភិវឌ្ឍនៅលើផ្ទៃដីទំហំជាង ៣ ០០០ ហិតា។ នៅលើផ្ទៃដីអភិវឌ្ឍ ក្រៅពីការសាងសង់ហេដ្ឋារចនាសម្ពន្ធនានាដែលមានខ្សែផ្លូវប្រវែងជាង ១០០ គីឡូម៉ែត្រ ប្រព័ន្ធភ្លើងអគ្គិសនី ទឹកស្អាត ក្រុមហ៊ុនបានសាងសង់សណ្ឋាគារជាច្រើនកន្លែង រៀបចំតំបន់ទេសចរនៅកោះសំពោច (កោះរាជបុត្រ) បង្កើតសួនផ្កា បូករួមទីលានបាញ់ព្រួយ ហើយទៅថ្ងៃមុខនឹងរៀបចំឲ្យមានតំបន់ទេសចរណ៍ជាច្រើនថែមទៀត។

លោក ហ្វូ ហាង ក៏មើលឃើញកំណើនភ្ញៀវទេសចរដែលមកលេងកម្សាន្តនៅឆ្នេរមាសឆ្នេរប្រាក់ ក្រោយក្រុមហ៊ុនបានអភិវឌ្ឍជាគោលដៅទេសចរដ៏ទាក់ទាញថ្មីក្នុងខេត្តព្រះសីហនុ ដោយមួយថ្ងៃអាចទទួលទេសចរមកកម្សាន្តពី ៣ ០០០ នាក់ ទៅ ៤ ០០០ នាក់។

លោក ហ្វូ ហាង បានបន្ថែមថា តាមរយៈរៀបចំកែច្នៃកន្លែងកម្សាន្តថ្មីបន្ថែមនេះ បានផ្តល់កន្លែងសម្រាកលំហែកាយតាមបែបធម្មជាតិដល់អ្នកទេសចរ ខណៈដែលបច្ចុប្បន្នក្រុមហ៊ុនក៏កំពុងទំនាក់ទំនងទៅភ្នាក់ងារទេសចរណ៍នៅប្រទេសចិន ដើម្បីបង្កើតកញ្ចប់ដល់ភ្ញៀវទេសចរមកកម្សាន្តនៅតំបន់វិស្សមកាលដែលក្រុមហ៊ុនកំពុងអភិវឌ្ឍ៕

The post ជិត ១០ ឆ្នាំ ក្រុមហ៊ុនអភិវឌ្ឍឆ្នេរមាសឆ្នេរប្រាក់ ចាយទុនវិនិយោគអស់ជាង ៦០០ លានដុល្លារ appeared first on Kampuchea Thmey Daily.

តំបន់វិស្សមកាលឆ្នេរមាសឆ្នេរប្រាក់ Archives - Kampuchea Thmey Daily

ក្រុមហ៊ុនចិនធំៗ បោះទុន​វិនិយោគ​ខ្ទង់ពាន់​លាន​ដុល្លារ​ កំពុងមានវត្តមាននៅកម្ពុជា

ដើម​ចំបក់​អាយុកាល​ជាង ២ ០០០ ឆ្នាំ ប្រទះ​ឃើញ​នៅ​តំបន់​វិស្សមកាល​ឆ្នេរ​មាស​ឆ្នេរ​ប្រាក់

​ជិត ១០ ឆ្នាំ ក្រុមហ៊ុន​អភិវឌ្ឍ​ឆ្នេរ​មាស​ឆ្នេរ​ប្រាក់ ចាយទុន​វិនិយោគ​អស់​ជាង ៦០០ លាន​ដុល្លារ

ក្រុមហ៊ុនចិនធំៗ បោះទុនវិនិយោគខ្ទង់ពាន់លានដុល្លារ កំពុងមានវត្តមាននៅកម្ពុជា

ដើមចំបក់អាយុកាលជាង ២ ០០០ ឆ្នាំ ប្រទះឃើញនៅតំបន់វិស្សមកាលឆ្នេរមាសឆ្នេរប្រាក់

ជិត ១០ ឆ្នាំ ក្រុមហ៊ុនអភិវឌ្ឍឆ្នេរមាសឆ្នេរប្រាក់ ចាយទុនវិនិយោគអស់ជាង ៦០០ លានដុល្លារ