សកម្មភាពចុះណែនាំនេះ មានការអញ្ជើញចូលរួមសហការពីសំណាក់ មន្ទីរបរិស្ថានខេត្ត កម្លាំងអធិការដ្ឋាននគរបាលក្រុង, កម្លាំងបញ្ជាការដ្ឋានកងរាជអាវុធហត្ថក្រុង រួមទាំងអាជ្ញាធរមូលដ្ឋានពាក់ព័ន្ធជាច្រើនរូបទៀត។ នៅក្នុងការចុះពិនិត្យនេះ លោកអភិបាលរងក្រុង បានដើរជួបសំណេះសំណាលផ្ទាល់ជាមួយអាជីវករលក់ដូរចំណីអាហារ ភេសជ្ជៈ និងអ្នកលក់ផ្លែឈើចល័ត ដោយបានពន្យល់ណែនាំអំពីសារៈសំខាន់នៃបរិស្ថាន និងសោភ័ណភាពទីក្រុង។

លោកអភិបាលរងក្រុង បានសង្កត់ធ្ងន់ថា តំបន់មាត់ទន្លេវ៉ៃគោ គឺជាបេះដូង និងជាកន្លែងលំហែកាយដ៏ទាក់ទាញបំផុតរបស់ប្រជាពលរដ្ឋក្នុងក្រុងស្វាយរៀង ក៏ដូចជាភ្ញៀវទេសចរមកពីក្រៅតំបន់ ដូច្នេះការរក្សាបាននូវភាពស្អាត គ្មានសំរាម គឺជារឿងចាំបាច់ដែលទាមទារឱ្យមានការចូលរួមពីគ្រប់ភាគីទាំងអស់។
 

អាជ្ញាធរក្រុង បានណែនាំយ៉ាងម៉ឺងម៉ាត់ដល់អាជីវករទាំងអស់ ត្រូវប្រមូលសម្អាតអនាម័យនៅជុំវិញទីតាំងលក់ដូររបស់ខ្លួនឱ្យបានស្អាតល្អជាប្រចាំ ក្រោយពេលបញ្ចប់ការលក់ដូរជារៀងរាល់ថ្ងៃ។ ព្រមទាំងវេចខ្ចប់សំណល់ឱ្យបានជិតល្អ និងយកទៅដាក់ក្នុងធុងសំរាមដែលអាជ្ញាធរបានរៀបចំជូន ជៀសវាងការបោះចោលពាសវាលពាសកាល ឬទម្លាក់ចូលទៅក្នុងទឹកទន្លេ និងគុម្ពោតព្រៃ។ លើសពីនេះ ត្រូវរួមគ្នាកសាងទម្លាប់រស់នៅស្អាត ដើម្បីទាក់ទាញអតិថិជនមកគាំទ្រកាន់តែច្រើន ដែលជាការរួមចំណែកលើកកម្ពស់ជីវភាពផង និងលើកមុខមាត់ក្រុងស្វាយរៀងផងដែរ៕

ដោយ៖ ភក្ដី

The post អាជ្ញាធរក្រុងស្វាយរៀង ចុះអប់រំណែនាំអាជីវករលក់ដូរនៅមាត់ទន្លេវ៉ៃគោ ចូលរួមថែរក្សាបរិស្ថាន និងទុកដាក់សំរាមឱ្យបានត្រឹមត្រូវ appeared first on Kampuchea Thmey Daily.

នៅឆ្នាំ២០២៣នេះ រដ្ឋបាលខេត្តបានរៀបចំពិធីប្រណាំងទូក ប្រពៃណីខ្នាតអន្តរជាតិ និងទូកក្ដារបីសន្លឹកនៅ តាម​បណ្ដោយ​មាត់ទន្លេវ៉ៃគោ បន្ទាប់ពីត្រូវបានផ្ដួចផ្ដើមឲ្យមានការរៀបចំឡើងពីសំណាក់នាយឧត្ដមសេនីយ៍ ហុក ឡងឌី អតីតអគ្គ-ស្នងការនគរបាលជាតិ ចាប់តាំងពីឆ្នាំ២០០៨មក ដើម្បីចូលរួមអបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះ ព្រះខែ អកអំបុក ក៏ដូចជាបង្កភាពសប្បាយរីករាយ ជូនដល់បងប្អូន ប្រជាពលរដ្ឋបាន​ទស្សនាកម្សាន្ត។ នេះបើតាមការលើកឡើងរបស់លោក ប៉េង ពោធិ៍សា អភិបាលខេត្តស្វាយរៀង។

នារសៀលថ្ងៃទី១៨ ខែវិច្ឆិកា ឆ្នាំ២០២៣ សម្តេច ម៉ែន សំអន ឧត្តមក្រុមប្រឹក្សាផ្ទាល់ព្រះមហាក្សត្រ នៃព្រះរាជា​ណាចក្រកម្ពុជា បានអញ្ជើញចូលរួមក្នុងពិធីបើក ការប្រណាំងទូកខ្នាតអន្តរជាតិ និងទូកក្តារបីសន្លឹក នៅទន្លេវ៉ៃគោ ក្រុងស្វាយរៀង។

សម្តេច ម៉ែន សំអន មានប្រសាសន៍ថា ពិធីប្រណាំងទូកខ្នាតអន្តរជាតិ និងទូកក្តារបីសន្លឹក នៅខេត្តស្វាយរៀង ត្រូវបានរៀបចំឡើងជាបន្តបន្ទាប់រៀងរាល់ឆ្នាំ ដោយមានការផ្តួចផ្តើម និងការឧបត្ថម្ភពីនាយឧត្ដមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថ លើផ្ទៃប្រទេស រួមជាមួយលោក ម៉ែន វិបុល អភិបាលប្រធានគណបក្សខេត្ត លោក ប៉េង ពោធិ៍សា អភិបាល នៃគណៈអភិបាលខេត្ត។

សម្តេច​ ម៉ែន សំអន ក៏បានណែនាំដល់គ្រប់អនុគណៈកម្មការទាំងអស់ ត្រូវអនុវត្តតាមតួនាទីភារកិច្ចប្រកប​ដោយការ​ទទួល​ខុសត្រូវខ្ពស់។ ជាពិសេសកងកម្លាំងទាំងបីប្រភេទ ត្រូវយកចិត្តទុកដាក់ឲ្យបានខ្ពស់ ហើយប្រចាំការជាប្រចាំ ដើម្បីធ្វើយ៉ាងណាឲ្យពិធីប្រណាំងទូកដំណើរការបានទៅដោយរលូន រក្សាបាននូវសន្តិសុខ សណ្ដាប់ធ្នាប់ និងរបៀបរៀប​រយជូនដល់បងប្អូនប្រជាពលរដ្ឋ ដែលមកលេងកម្សាន្តក្នុងពិធីប្រណាំងទូកនេះ ។

សម្តេច ម៉ែន សំអន បានអំពាវនាវដល់ប្រជាពលរដ្ឋ អញ្ជើញចូលរួមកម្សាន្ដសប្បាយ នៅថ្ងៃទី ១៨-១៩ ខែវិច្ឆិកា ឆ្នាំ២០២៣ ឲ្យបានច្រើនកុះករ ក្នុងនោះក៏មានស្តង់ពិព័រណ៍តន្ត្រីកំសាន្ត បាញ់កាំជ្រួច បង្ហោះគោម និងការលក់ម្ហូប​អាហារជាច្រើនផងដែរ។

សូមជម្រាបថា ពិធីប្រណាំងទូកឆ្នាំនេះ មានទូកចូលរួមប្រណាំងមកពីបណ្តារាជធានី-ខេត្ត និងទូកក្នុងខេត្ត សរុបចំនួន ៦៧គ្រឿង រួមមាន៖ ប្រភេទទូកប្រពៃណីខ្នាតអន្តរជាតិ ចំណុះ ២២នាក់ មានចំនួន ៥៧គ្រឿង និងប្រភេទទូកក្ដារ​បីសន្លឹក ចំណុះ ៣នាក់ មានចំនួន ១០គ្រឿង និងមានកីឡាករ-កីឡាការិនី សរុប ១.៦៣៩នាក់ (នារី ១១នាក់)៕

អត្ថបទ ៖ ភក្ដី

The post ប្រណាំងទូកខ្នាតអន្តរជាតិ នៅទន្លេវ៉ៃគោ ទាក់ទាញបានពលរដ្ឋ​ចូលរួមទស្សនាច្រើនកុះករ appeared first on Kampuchea Thmey Daily.

កម្មវិធី “អំណានមាត់ទន្លេ” ប្រារព្ធឡើងនៅថ្ងៃទី១៥ និងទី១៦ ខែតុលាឆ្នាំ២០២២ វេលាម៉ោង៤ ដល់ ម៉ោង៧ល្ងាច នៅតាមដងទន្លេវ៉ៃគោ ខេត្តស្វាយរៀង។ កម្មវិធីនេះមានគោលបំណងបញ្ជៀប និងបង្កើតនូវទម្លាប់អានសៀវភៅតាមទី​សាធារណៈដល់ប្រជាជន ក៏ដូចជាវប្បធម៌ចែករំលែកសៀវភៅគ្នាទៅវិញទៅមករបស់សាធារណជនកម្ពុជាផងដែរ។

ក្រោយពីមានការបង្កើតនូវកម្មវិធីនេះឡើងមក ខាងសម្ព័ន្ធនិស្សិតស.ស.រ (SRUS Union) បានប្រាប់មកកាន់ “កម្ពុជាថ្មី”ថា កម្មវិធីមួយនេះ មានអ្នកចូលរួមច្រើនដែលហួសទៅនឹងអ្វីដែលបានរំពឹងទុក។ ក្នុងនោះ អ្ន​កដែលបានចូលរួមភាគច្រើន គឺជានិស្សិតដែលបានសិក្សានៅសាកលវិទ្យាល័យស្វាយរៀង និងជាប្រជាជនដែលបានទៅលំហែកាយនៅតាមដងទន្លេនាពេលល្ងាច។ សមិទ្ធផលមួយនេះ គឺជារឿងគួរឲ្យសោមនស្សមួយសម្រាប់អ្នករៀបចំកម្មវិធី អ្នកបរិច្ចាគសៀវភៅ និងប្រជាជនដែលរស់នៅក្បែរតំបន់នោះ។

ដោយឡែក “អំណានមាត់ទន្លេ” គឺជាការខ្ចីសៀវភៅអានដោយឥតគិតថ្លៃ ព្រមទាំងមានការចែកជូននូវសៀវភៅមួយចំនួនដោយឥតបង់ប្រាក់ដល់អ្នកអានផងដែរ ប៉ុន្តែស្ថិតនៅក្រោមលក្ខខណ្ឌផ្សេងៗ។ សៀវភៅដែលមានជិត១០០ក្បាល សម្រាប់អានដោយសេរីនេះ គឺបានមកពីការបរិច្ចាគពីសំណាក់លោកគ្រូ អ្នកគ្រូ និស្សិត និងអតីតនិស្សិត នៅសាកលវិទ្យាល័យស្វាយរៀង និងប្រជាជនដែលរស់នៅតំបន់ជិតនោះ។

ក្រោយពីទទួលបាននូវភាពជោគជ័យលើការបង្កើតកម្មវិធីនេះ២ដងរួចមក “អំណានមាត់ទន្លេ” នឹងធ្វើជាលើកទី៣ នៅខែវិច្ឆិកា ខាងមុខនេះ។ ជាមួយគ្នានេះដែរ ក្រុមសម្ព័ននិស្សិតស.ស.រ (SRUS Union) សង្ឃឹមតាមរយៈការបង្កើតកម្មវិធីនេះ អាចនាំឲ្យប្រជាជនកម្ពុជា ជាពិសេស អ្នកនៅខេត្តស្វាយរៀងតែម្តង មានទម្លាប់អានសៀវភៅ និងមានការចែករំលែកកាន់តែទូលំទូលាយជាងមុន ដែលជាផ្នែកមួយក្នុងការចូលរួមអភិវឌ្ឍន៍សង្គមជាតិ។

បន្ថែមពីនោះ សម្ព័ននិស្សិតស.ស.រ (SRUS Union) ក៏បានលើកទឹកចិត្តដល់យុវជនដែលជាទំពាំងស្នងឫស្សីជំនាន់ក្រោយគ្រប់រូប គួរបន្តពង្រឹង និងលើកស្ទួយវិស័យអានសៀវភៅបន្ថែមទៀត ដើម្បីចូលរួមចំណែកក្នុងក្នុងការកសាងសមត្ថភាពរបស់ខ្លួន និងអភិវឌ្ឍន៍សង្គមខ្មែរឲ្យកាន់តែមានភាពប្រសើរឡើង៕

ដោយ៖ អុន ស្រីមាន

The post «អំណានមាត់ទន្លេ» ទទួលបានការគាំទ្រលើសពីការរំពឹងទុកពីសំណាក់យុវជននៅខេត្តស្វាយរៀង appeared first on Kampuchea Thmey Daily.

លោក ម៉ែន វិបុល ថ្លែងនៅក្នុងកិច្ចប្រជុំស្តីពីការអនុវត្តវិធានការរដ្ឋបាលជំរុញការអនុវត្តគម្រោងអភិវឌ្ឍន៍វ៉ៃគោជំហានទី២ នាព្រឹកថ្ងៃទី២៣ ខែសីហាថា កន្លងមក ក្រុមការងារអន្តរក្រសួងដោះស្រាយផលប៉ះពាល់សហការ​ជាមួយអនុគណៈ​កម្មការខេត្ត និងអាជ្ញាធរពាក់ព័ន្ធបានធ្វើការសម្របសម្រួលទូទាត់សំណងផលប៉ះពាល់តាមគោលនយោបាយ​របស់រាជរដ្ឋាភិបាលបានចំនួន ៤៦៣គ្រួសាររួចហើយ។ ដោយឡែកមានប្រជាពលរដ្ឋចំនួន ៤គ្រួសារ ដែលបានអាស្រ័យ​ផលលើដីសាធារណៈរបស់រដ្ឋក្នុងអាងទឹកកំពង់ជ្រៃមិនព្រមទទួលយកការដោះស្រាយតាមគោលនយោបាយរបស់រាជរដ្ឋាភិបាល ដែលបង្កឱ្យមានការរាំងស្ទះដល់ការអនុវត្តគម្រោង។

លោកអភិបាលខេត្ត បានប្រាប់ឱ្យអាជ្ញាធរ និងអ្នកពាក់ព័ន្ធត្រូវចុះណែនាំដល់ប្រជាពលរដ្ឋទាំង៤គ្រួសារឱ្យបានយល់ និងទទួលយកតាមការដោះស្រាយរបស់គណៈកម្មការអន្តរក្រសួង។

ទន្ទឹមនឹងនេះ លោក ម៉ែន វិបុល បានដាក់បទបញ្ជាដល់សមត្ថកិច្ច និងអាជ្ញាធរពាក់ព័ន្ធត្រូវសហការបង្កលក្ខណៈគ្រប់​បែបយ៉ាង ដើម្បីដោះស្រាយដល់ប្រជាពលរដ្ឋទាំង៤គ្រួសារខាងលើ មុននឹងឈានដល់ការអនុវត្តវិធានការរដ្ឋបាល ដើម្បីក្រុមហ៊ុនអនុវត្តលើការងារសាងសង់តាមផែនការ និងធានាគុណភាព៕ ដោយ:ភក្ដី

The post រាជរដ្ឋាភិបាល មានគម្រោងអភិវឌ្ឍន៍​ប្រព័ន្ធធារាសាស្រ្តស្តុកទឹកវ៉ៃគោជំហានទី២ appeared first on Kampuchea Thmey Daily.

ថ្លែងក្នុងចុះពិនិត្យមើលពីវឌ្ឍនភាព នៃដំណើរការស្ថាបនាច្រាំង ទន្លេវ៉ៃគោផ្នែកខាងលិច (ទំនប់តាណេង) ក្រុងស្វាយរៀងនៅថ្ងៃទី ៣ធ្នូ លោក ម៉ែន វិបុល អភិបាលខេត្តស្វាយរៀង បានមានប្រសាសន៍ថា ច្រាំងទន្លេវ៉ៃគោដែលកំពុងស្ថាបនានេះ មានបណ្តោយប្រវែង ៨១៥ម៉ែត្រ និងទទឹង ១៣ម៉ែត្រ មានរៀបចំក្រាលម៉ាប រៀបចំប្រព័ន្ធទឹក បំពាក់ខ្សែបណ្តាញ និងបង្គោលភ្លើងបំភ្លឺពេលរាត្រី សួនច្បារ ព្រមទាំងកន្លែងបំពាក់សម្ភារៈហាត់ប្រាណ ដែលបច្ចុប្បន្នស្ថាបនាសម្រេចបានប្រមាណជា ៧៥%។

លោកអភិបាលខេត្ត បានណែនាំឲ្យក្រុមការងារសាងសង់ ធ្វើការកែសម្រួលនូវទំហំផ្ទៃសួន ឲ្យបានតូចបន្តិច ដើម្បីទុកផ្លូវថ្មើរជើងឲ្យធំសមល្មម សម្រាប់បង្កលក្ខណៈងាយស្រួល ដល់ប្រជាពលរដ្ឋដើរហាត់ប្រាណ និងលេងកម្សាន្ត។

សូមជម្រាបថា ច្រាំងទន្លេវ៉ៃគោនេះ បានចូលរួមលើកកម្ពស់សោភណ្ឌភាព ក្នុងក្រុង​ឲ្យកាន់តែមានភាពស្រស់បំព្រង និងបានចូលរួមចំណែក ក្នុងការលើកកម្ពស់ សុខុមាលភាពសង្គម ក៏ដូចជាផ្ដល់នូវទីតាំងសមស្រប សម្រាប់ការទស្សនាការប្រណាំងទូក ជាទីកម្សាន្ត លំហែអារម្មណ៍ និងហាត់កីឡារបស់ប្រជាពលរដ្ឋ យុវជន យុវនារី ប្រកបដោយមោទនភាព៕

អត្ថបទ៖ សំអឿន

The post ការស្ថាបនាច្រាំងទន្លេវ៉ៃគោ នៅក្រុងស្វាយរៀង សម្រេចបាន ៧៥ភាគរយហើយ appeared first on Kampuchea Thmey Daily.