ទាហានឈុតខ្មៅថៃចាប់រំលោភស្រ្តីខ្មែរ Archives - Kampuchea Thmey Daily

សមាគមខ្មែរចំនួន ៦ នៅកូរ៉េខាងត្បូង ចេញញត្តិថ្កោលទោសទង្វើអមនុស្សធម៌ដែលទាហានឈុតខ្មៅថៃធ្វើមកលើក្រុមពលករទេសន្តរប្រវេសន៍ខ្មែរ

អ៊ិន ពិសី — Wed, 19 Nov 2025 03:02:50 +0000

សមាគមខ្មែរចំនួន ៦ នៅកូរ៉េខាងត្បូង នៅថ្ងៃទី ១៩ ខែវិច្ឆិកា ឆ្នាំ ២០២៥ នេះ បានចេញញត្តិដាច់ដោយឡែកពីគ្នាប្រកាសថ្កោលទោសយ៉ាងដាច់អហង្ការចំពោះទង្វើអមនុស្សធម៌ដែលក្រុមទាហានឈុតខ្មៅថៃបានធ្វើមកលើក្រុមពលករទេសន្តរប្រវេសន៍ខ្មែរចំនួន ១៣ នាក់ និងអំពើថោកទាបជាករណីរំលោភសេពសន្ថវៈយ៉ាងព្រៃផ្សៃ។

សមាគមទាំង ៦ នោះ រួមមាន ៖ សមាគមខ្មែរជួយខ្មែរ នៅក្រុងហ្វាសុង សាធារណរដ្ឋកូរ៉េ , សមាគមកម្ពុជាសាមគ្គី , សមាគមអភិវឌ្ឍន៍អនាគតកូរ៉េ-កម្ពុជា , សមាគមខ្មែររួមគ្នាដើម្បីខ្មែរ នៅសាធារណរដ្ឋកូរ៉េ , សមាគមបញ្ញវន្ដខ្មែរនៅកូរ៉េ និងសមាគមស្ត្រីខ្មែរប្រចាំសាធារណរដ្ឋកូរ៉េ។

តាមរយៈញត្តិថ្កោលទោសសមាគមខ្មែរទាំង ៦ បានលើកឡើងពីទង្វើរបស់ទាហានឈុតខ្មៅថៃដែលប្រើអំពើហិង្សាយ៉ាងសាហាវយង់ឃ្នងក្នុងរូបភាពជាការវាយដំ ទាត់ធាក់ អុកស្វាយកាំភ្លើង ជំរិតទារប្រាក់ និងអំពើថោកទាបជាទីបំផុតគឺករណីចាប់រំលោភសេពសន្ថវៈ (រំលោភបូក) ដោយទាហានឈុតខ្មៅថៃចំនួន ៧ នាក់ ទៅលើពលករខ្មែរជាស្ត្រី ១ នាក់។

ប្រភពដដែលបញ្ជាក់ថា ករណីនេះបានកើតឡើងនៅក្នុងខេត្តចាន់បុរី នៃប្រទេសថៃ ជាប់ព្រំប្រទល់ស្រុកកំរៀង ខេត្តបាត់ដំបង នៃប្រទេសកម្ពុជា នៅពេលដែលពលករខ្មែរបានធ្វើដំណើរចេញពីប្រទេសថៃត្រឡប់មកប្រទេសកម្ពុជា កាលពីថ្ងៃទី ១៥ ខែវិច្ឆិកា ឆ្នាំ ២០២៥ ខណៈពេលច្រកព្រំដែនគោកកម្ពុជា-ថៃ ត្រូវបានបិទដោយឯកតោភាគីពីភាគីថៃ។

សមាគមខ្មែរនៅកូរ៉េខាងត្បូង បានអំពាវនាវដល់សហគមន៍អន្តរជាតិ ជាពិសេស អង្គការអន្តរជាតិខាងការងារ (ILO) អង្គការអន្តរជាតិទេសន្តរប្រវេសន៍ (IOM) ការិយាល័យឧត្តមស្នងការ អង្គការសហប្រជាជាតិទទួលបន្ទុកសិទ្ធិមនុស្ស (OHCHR) ភ្នាក់ងារសហប្រជាជាតិលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រី (UN Women) និងអង្គការអន្តរជាតិពាក់ព័ន្ធ សូមផ្តោតការយកចិត្តទុកដាក់ ជាពិសេសក្នុងការតាមដាន និងជំរុញរាជរដ្ឋាភិបាល អាជ្ញាធរមានសមត្ថកិច្ចថៃ ឱ្យធ្វើការស៊ើបអង្កេតលើករណីនេះជាបន្ទាន់ ប្រកបដោយតម្លាភាព សំដៅធានាឱ្យបាននូវយុត្តិធម៌ជូនជនរងគ្រោះ ដែលជាពលករទេសន្តរប្រវេសន៍ខ្មែរ និងការការពារសិទ្ធិ៕

The post សមាគមខ្មែរចំនួន ៦ នៅកូរ៉េខាងត្បូង ចេញញត្តិថ្កោលទោសទង្វើអមនុស្សធម៌ដែលទាហានឈុតខ្មៅថៃធ្វើមកលើក្រុមពលករទេសន្តរប្រវេសន៍ខ្មែរ appeared first on Kampuchea Thmey Daily.

សហជីពនៅកម្ពុជា ថ្កោលទោសយ៉ាងដាច់អហង្ការចំពោះអំពើចាប់រំលោភបូកលើពលករស្ត្រីកម្ពុជាដោយកងទ័ពឈុតខ្មៅថៃ

អ៊ិន ពិសី — Tue, 18 Nov 2025 10:10:35 +0000

សហជីពនៅកម្ពុជាតំណាងឱ្យកម្មករ-និយោជិត រាប់ម៉ឺននាក់ នៅថ្ងៃទី ១៨ ខែវិច្ឆិកា ឆ្នាំ ២០២៥ នេះ បានប្រកាសថ្កោលទោសយ៉ាងដាច់អហង្ការចំពោះអំពើយ៉ាងសាហាវព្រៃផ្សៃយង់ឃ្នងតិរច្ឆានគ្មានមនុស្សធម៌របស់យោធាឈុតខ្មៅថៃ ដែលបានចាប់រំលោភបូកលើពលករជានារីខ្មែរម្នាក់ និងធ្វើទារុណកម្មដល់ពលករផ្សេងទៀតដែលវិលត្រឡប់មកមាតុប្រទេសវិញពេលជិតដល់ព្រំដែន កាលពីថ្ងៃទី ១៥ ខែវិច្ឆិកា ឆ្នាំ ២០២៥។

លោក សំ សឿន ប្រធានសហភាពពលកម្មជាតិកម្ពុជា បានលើកឡើងថា អំពើហិង្សា និងការរំលោភបំពានផ្លូវភេទយ៉ាងសាហាវព្រៃផ្សៃយង់ឃ្នងរបស់យោធាឈុតខ្មៅថៃមកលើ ពលការិនីចំណាកស្រុកកម្ពុជា គឺជាការរំលោភបំពានយ៉ាងធ្ងន់ធ្ងរលើសិទ្ធិមនុស្ស សិទ្ធិស្ត្រី និងសិទ្ធិជាតិ នៃពលករចំណាកស្រុក ដែលត្រូវបានការពារយ៉ាងខ្ជាប់ខ្ជួនដោយច្បាប់រដ្ឋធម្មនុញ្ញកម្ពុជា លិខិតតុបករណ៍អាស៊ាន ច្បាប់អន្តរជាតិ និងអនុសញ្ញា CEDAW។

លោកថ្លែងថា «ខ្ញុំសូមថ្កោលទោសយ៉ាងដាច់អហង្ការចំពោះទាហានឈុតខ្មៅថៃ ៧ នាក់ ដែលបានរំលោភសេពសន្ថវៈលើរាងកាយ និងវាយដំប្រជាពលរដ្ឋខ្មែរដែលធ្វើការនៅប្រទេសថៃមានបំណងត្រឡប់ប្រទេសកំណើតវិញ។ ទង្វើរបស់យោធាថៃនេះ បានបង្ហាញពីអត្តចរិតដ៏សាហាវឃោរឃៅព្រៃផ្សៃរបស់ក្រុមយោធាថៃដែលតែងប្រព្រឹត្តមកលើពលរដ្ឋកម្ពុជា»។

ស្រដៀងគ្នានេះ លោក ហង្ស រ៉ាវី ប្រធានសហភាពសហជីពរក្សាសិទ្ធិកម្មករកម្ពុជា លើកឡើងថា ករណីរំលោភបំពានដ៏ឃោរឃៅមិនអាចទទួលយកបាននេះ មិនត្រឹមតែជាអំពើអមនុស្សធម៌ទៅលើជនរងគ្រោះប៉ុណ្ណោះទេ ប៉ុន្តែថែមទាំងជាការបំពានលើគោលការណ៍មនុស្សធម៌របស់សមាគមប្រជាជាតិអាស៊ីអាគ្នេយ៍ (ASEAN) ដែលមានបំណងលើកកម្ពស់ និងធានាសិទ្ធិមនុស្សនៅក្នុងតំបន់។

លោកបានបង្ហាញក្តីព្រួយបារម្ភយ៉ាងខ្លាំងចំពោះវប្បធម៌និទណ្ឌភាព និងការមិនគោរពសិទ្ធិនារីពាក់ព័ន្ធនឹងកងកម្លាំងយោធាឈុតខ្មៅរបស់ថៃ ដែលបង្កហានិភ័យធ្ងន់ធ្ងរដល់សុវត្ថិភាព និងសិទ្ធិរបស់ពលការិនីកម្ពុជា ព្រមទាំងក្រុមអ្នកចំណាកស្រុកដទៃទៀត។

លោកថ្លែងថា «ខ្ញុំសូមថ្កោលទោសចំពោះទង្វើព្រៃផ្សៃអមនុស្សធម៌របស់យោធាឈុតខ្មៅថៃ ដែលធ្វើឱ្យប៉ះពាល់ដល់សតិអារម្មណ៍ស្ត្រីជាពលការិនីចំណាកស្រុកកម្ពុជា។ ទង្វើនេះ យើងមិនអាចទទួលយកបាន ព្រោះជាទង្វើព្រៃផ្សៃ អាក្រក់ក្រៃលែង ដែលជាតិសាសន៍យើងមិនដែលមានសមត្ថកិច្ចណាធ្វើបែបនេះនោះទេលើជាតិសាសន៍ដទៃ»។

ទន្ទឹមនេះ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ និងជាប្រធានសហភាពចលនាកម្មករកម្ពុជា បានបង្ហាញក្តីរន្ធត់ចិត្តចំពោះទង្វើអមនុស្សធម៌ដែលប្រព្រឹត្តដោយទាហានឈុតខ្មៅថៃ ដែលបានរំលោភស្ត្រីជាពលករខ្មែរ និងប្រើប្រាស់អំពើហិង្សាលើពលរដ្ឋកម្ពុជា។

លោកថ្លែងថា «នេះជាទង្វើឧក្រិដ្ឋដែលមិនអាចអត់ឱនឱ្យបាន ហើយខ្ញុំគិតថាទង្វើនេះអាចកើតមានឡើងតែចំពោះទាហានថៃទេ ដែលជាប្រភេទពួកមនុស្សគ្មានបេះដូងជាមនុស្ស ក្នុងការធ្វើទង្វើដែលយើងស្ទើរតែមិនដែលឮទាល់តែសោះចំពោះទាហានបណ្តាប្រទេសផ្សេងៗ»។

ជាមួយគ្នានេះ សហជីពនៅកម្ពុជា បានអំពាវនាវដល់សហគមន៍អន្តរជាតិទាំងអស់ចាត់វិធានការច្បាស់លាស់ និងបន្ទាន់ ដើម្បីធានាការបញ្ឈប់អំពើហិង្សា និងការរំលោភសិទ្ធិស្ត្រីទាំងអស់ជាបន្ទាន់ និងធានាឱ្យមានយុត្តិធម៌ពេញលេញសម្រាប់ជនរងគ្រោះ។ សូមសហគមន៍អន្តរជាតិមេត្តាចេញសេចក្ដីថ្លែងការណ៍ថ្កោលទោសយ៉ាងម៉ឺងម៉ាត់លើកងទ័ពឈុតខ្មៅថៃ ចំពោះអំពើជាឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិនេះ៕

The post សហជីពនៅកម្ពុជា ថ្កោលទោសយ៉ាងដាច់អហង្ការចំពោះអំពើចាប់រំលោភបូកលើពលករស្ត្រីកម្ពុជាដោយកងទ័ពឈុតខ្មៅថៃ appeared first on Kampuchea Thmey Daily.

មន្ត្រីជាន់ខ្ពស់ក្រសួងការងារ ជួបសួរសុខទុក្ខពលការិនីខ្មែរដែលត្រូវក្រុមទាហានឈុតខ្មៅថៃចាប់រំលោភយ៉ាងព្រៃផ្សៃ

អ៊ិន ពិសី — Tue, 18 Nov 2025 08:00:05 +0000

កាលពីព្រឹកថ្ងៃទី ១៨ ខែវិច្ឆិកា ឆ្នាំ ២០២៥ នៅមន្ទីរពេទ្យបង្អែកខេត្តបាត់ដំបង លោក សេង សក្តា រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ តំណាងដ៏ខ្ពង់ខ្ពស់ លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ព្រមទាំងមានការចូលរួមពីតំណាងសមាគមទីភ្នាក់ងារជ្រើសរើសពលករកម្ពុជា (ACRA) , មណ្ឌលធនធានពលករទេសន្តរប្រវេសន៍ (MRC) របស់គម្រោង ILO-PROTECT និងតំណាងក្រុមការងារយុវជន ESEA បានអញ្ជើញជួបសួរសុខទុក្ខពលការិនីខ្មែរម្នាក់ ដែលត្រូវក្រុមទាហានឈុតខ្មៅថៃចាប់រំលោភបូកយ៉ាងសាហាវព្រៃផ្សៃ យង់ឃ្នង គ្មានមនុស្សធម៌ កាលពីថ្ងៃទី ១៥ ខែវិច្ឆិកា ឆ្នាំ ២០២៥ ខណៈពេលពលការិនីរងគ្រោះ និងពលរដ្ឋកម្ពុជា ១២ នាក់ ផ្សេងទៀត ធ្វើដំណើរឆ្លងដែនពីប្រទេសថៃចូលមកទឹកដីកម្ពុជា។

លោក សេង សក្តា បានពាំនាំការផ្ដាំផ្ញើសួរសុខទុក្ខពីសំណាក់ លោករដ្ឋមន្ត្រី ដោយបានតាមដានយ៉ាងយកចិត្តទុកដាក់ចំពោះសុខទុក្ខរបស់ពលការិនីខ្មែរ បន្ទាប់ពីមានការរំលោភបំពានសិទ្ធិមនុស្ស សិទ្ធិស្ត្រី និងសិទ្ធិពលករទេសន្តរប្រវេសន៍យ៉ាងធ្ងន់ធ្ងរ។

លោករដ្ឋលេខាធិការ ក៏បានបញ្ជាក់ជូនថា លោករដ្ឋមន្ត្រី បានសម្តែងនូវការសោកស្ដាយ និងថ្កោលទោសយ៉ាងដាច់អហង្ការចំពោះទង្វើអមនុស្សធម៌ ដែលក្រុមទាហានឈុតខ្មៅថៃបានធ្វើមកលើក្រុមពលករទេសន្តរប្រវេសន៍ខ្មែរចំនួន ១៣ នាក់ ដោយបានប្រើអំពើហិង្សាយ៉ាងសាហាវយង់ឃ្នង និងអំពើថោកទាបរំលោភសេពសន្ថវៈ (រំលោភបូក) ដោយក្រុមទាហានឈុតខ្មៅថៃទៅលើពលករខ្មែរជាស្ត្រី ១ រូប។

ក្រសួង នឹងបន្តយកចិត្តទុកដាក់ខ្ពស់ក្នុងការតាមដានការវិវត្តន៍លើករណីនេះ និងករណីពាក់ព័ន្ធផ្សេងទៀត ដើម្បីធានាការការពារ និងលើកកម្ពស់សិទ្ធិ និងសេចក្ដីថ្លៃថ្នូររបស់ពលករទេសន្តរប្រវេសន៍ខ្មែរ ដោយអនុលោមតាមលិខិតបទដ្ឋានអន្តរជាតិ។

ឆ្លៀតក្នុងឱកាសនេះ ក្រសួង បានណែនាំ និងក្រើនរំលឹកសាជាថ្មីដល់ពលករខ្មែរដែលកំពុងធ្វើការ និងស្នាក់នៅប្រទេសថៃ សូមបង្កើនការប្រុងប្រយ័ត្នខ្ពស់ចំពោះសុខសុវត្ថិភាពផ្ទាល់ខ្លួនក្នុងការប្រឈមនឹងការរងនូវអំពើហិង្សា និងការរើសអើងនានា និងសូមជ្រើសរើសការទាក់ទងមកស្ថាប័នមានសមត្ថកិច្ចរបស់កម្ពុជា និងអង្គការអន្តរជាតិជាដៃគូរបស់កម្ពុជាក្នុងការធ្វើមាតុភូមិនិវត្តន៍ប្រកបដោយសុវត្ថិភាព៕

The post មន្ត្រីជាន់ខ្ពស់ក្រសួងការងារ ជួបសួរសុខទុក្ខពលការិនីខ្មែរដែលត្រូវក្រុមទាហានឈុតខ្មៅថៃចាប់រំលោភយ៉ាងព្រៃផ្សៃ appeared first on Kampuchea Thmey Daily.

ទាហានឈុតខ្មៅថៃចាប់រំលោភស្រ្តីខ្មែរ Archives - Kampuchea Thmey Daily

សហជីពនៅកម្ពុជា ថ្កោលទោសយ៉ាងដាច់អហង្ការចំពោះអំពើចាប់រំលោភបូក​លើពលករស្ត្រីកម្ពុជាដោយកងទ័ពឈុតខ្មៅថៃ

សហជីពនៅកម្ពុជា ថ្កោលទោសយ៉ាងដាច់អហង្ការចំពោះអំពើចាប់រំលោភបូកលើពលករស្ត្រីកម្ពុជាដោយកងទ័ពឈុតខ្មៅថៃ