ធនាគារ ជីប ម៉ុង ដែលជាធនាគារក្នុងស្រុកដ៏ធំមួយ បានសហការជាមួយក្រុមនាំចេញអង្ករដ៏ធំជាងគេរបស់កម្ពុជា ក្រុមហ៊ុន អេមរុរ៉ាស៍(Amru Rice Cambodia) ក្នុងភាពជាដៃគូយុទ្ធសាស្រ្តហិរញ្ញប្បទានដើម្បីជម្រុញកសិកម្មស្រូវអង្ករក្នុងការបង្កើនការនាំចេញទៅកាន់ទីផ្សារអន្តរជាតិឱ្យកាន់តែច្រើនថែមទៀត។

ការសម្រេចបាននូវភាពជាដៃគូយុទ្ធសាស្រ្តហិរញ្ញប្បទាននេះត្រូវបានធ្វើឡើងរវាងអ្នកឧកញ៉ា លាង ម៉េង សហស្ថាបនិក និងប្រធានក្រុមអគ្គនាយក ជីប ម៉ុង និងលោកឧកញ៉ា សុង សារ៉ន ប្រធានអគ្គនាយកក្រុមហ៊ុនអេមរុរ៉ាស៍ កាលពីថ្ងៃតី២៤ ខែមិថុនាម្សិលមិញនេះ។

លោកឧកញ៉ា សុង​ សារ៉ន បានថ្លែងមកកាន់កម្ពុជាថ្មីនៅព្រឹកថ្ងៃទី២៥ ខែមិថុនានេះថា តាមរយៈការសម្រេចបាននូវ MoU នេះ កសិករដែលមានបំណងផ្គត់ផ្គង់មក្រុមហ៊ុនលោកនឹងទទួលបានហិរញប្បទានពីធនាគារ ជីប ម៉ុង ក្នុងអត្រាការប្រាក់ទាប បែបបទងាយស្រួល និងរហ័ស។

លោកឧកញ៉ាថ្លែងថា៖«កាលពីម្សិលមិញនេះយើងបានចុះអនុស្សរណៈនៃការយោគយល់គ្នាជាមួយធនាគារ Chip Mong ដើម្បីទទួលបានហិរញ្ញប្បទានយុទ្ធសាស្រ្តដល់កសិករដែលដាំដុះស្រូវផ្គត់ផ្គង់ដល់ក្រុមហ៊ុន Amru Rice។ ក្រោមកិច្ចសហការនេះ ប្រជាកសិករដែលផលិតស្រូវដើម្បីផ្គត់ផ្គង់ដល់ក្រុមហ៊ុនយើងនឹងទទួលបានហិរញ្ញប្បទានដែលមានអត្រាការប្រាក់ទាប ការផ្តល់ឥណទានមានភាពងាយស្រួល និងរហ័ស។

លោកឧកញ៉ា សុង សារ៉បានថ្លែងបញ្ជាក់ទៀតថា សម្រាប់ជំហានបន្ទាប់ខាងធនាគារនឹងចុះទៅជួបជាមួយប្រជាកសិករតាមបណ្តាខេត្តនានា ដោយផ្ទាល់តែម្តងដើម្បីប្រមូលព័ត៌មាន ដឹងអំពីតម្រូវការផ្សេងដើម្បីរៀបចំឥណទានជូនពួកគាត់។

ក្រុមហ៊ុន Amru Rice (Cambodia) ជាមួយក្រុមហ៊ុន Stabil Nutrition, LLC នៅថ្ងៃទី ២៣ ខែកញ្ញា ឆ្នាំ ២០២៤ បានចុះអនុស្សារណៈនៃការយោគយល់ លើការវិនិយាគរោងចក្រកែច្នៃកន្ទក់សរីរាង្គ។

​បើយោងតាមសហព័ន្ធស្រូវអង្ករកម្ពុជា (CRF) ​ ក្នុងរយៈពេល៥ខែនៃឆ្នាំ២០២៥ កម្ពុជាបាននាំចេញអង្ករបានចំនួន ៣៤៤ ១៩៩តោន​ ដែលគិតជាទឹកប្រាក់ជាង២៥២លានដុល្លារអាមេរិកទៅកាន់ទីផ្សារចំនួន៦៣នៅជុំវិពិភពលោកក្នុងរយៈពេល៥ខែឆ្នាំនេះ។​

ជាមួយបរិមាណនៃការនាំចេញនេះ ត្រូវបានធ្វើឡើងតាមរយៈក្រុមហ៊ុននាំចេញអង្ករចំនួន ៤៨ ក្រុមហ៊ុន ទៅកាន់គោលដៅចំនួន ៦៣ ដែលក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន ​២៦ ​បានបរិមាណអង្ករចំនួន ១៦០ ៧៣២ តោន គិតជាទឹកប្រាក់ចំនួន ១២៦.៧៥​ លានដុល្លារសហរដ្ឋអាមេរិក។

ជាមួយគ្នានោះដែរ កម្ពុជាក៏បាននាំចេញ ទៅកាន់ប្រទេសចិន ​និងហុងកុង ចំនួន ៩០ ៦៦៥ តោន គិតជាទឹកប្រាក់ចំនួន ៥៣.២៥ លានដុល្លារសហរដ្ឋអាមេរិក ទៅកាន់ប្រទេសក្នុងអាស៊ាន ចំនួន ៥ ប្រទេសបានបរិមាណចំនួន  ៤៩ ៧០០ តោន​ គិតជាទឹកប្រាក់ចំនួន ៣៤.៥៦ លានដុល្លារសហរដ្ឋអាមេរិក និងទៅកាន់គោលដៅ ៣០ ប្រទេសផ្សេងទៀតមាន អាហ្វ្រិក   មជ្ឈឹម បូព៌ា អាមេរិក  កាណាដា  អូស្ត្រាលី  ញ៉ូហ្សេឡេន ។ល។ បានចំនួន   ៤៣ ០៩៩ តោន គិតជាទឹកប្រាក់ចំនួន  ៣៧.៨០ លានដុល្លារសហរដ្ឋអាមេរិក។

​ចំពោះប្រភេទអង្ករ បាននាំចេញអង្ករក្រអូបចំនួន ៧៥.៥៦% ប្រភេទអង្ករសគ្រាប់វែង ១៩.៣៣% អង្ករចំហ៊ុយ ២.៤៣% អង្ករសរីរាង្គចំនួន ២.០៣%  និងអង្ករផ្សេងៗចំនួន ០.៦៥% ។

បើតាម CRF ប្រទេសកម្ពុជាក៏បាននាំចេញស្រូវចំនួន ៣ ១០២ ៩៧៣ តោនស្រូវសើម ដែលគិតជាទឹកប្រាក់បានប្រមាណ ៧៤០.៩៤ លានដុល្លារសហរដ្ឋអាមេរិក៕

The post ធនាគារ​ ជីប ម៉ុង និង ក្រុមហ៊ុន អេមរុរ៉ាស៍ចាប់ដៃគ្នាជំរុញហិរញ្ញប្បទានក្នុងវិស័យស្រូវអង្ករដើម្បីបង្កើន​ការនាំចេញ appeared first on Kampuchea Thmey Daily.

លោក លាង ឃុន ជាសហស្ថាបនិក និងភាគទុនិកនៃធនាគារ ជីប ម៉ុង បានថ្លែងថា ធនាគារនេះ ទទួលបានសមិទ្ធផលជាទីគាប់ចិត្តជាច្រើន តាមរយៈការផ្តោតលើសេវាកម្ម ធនាគារទូទៅ ឥណទាន អាជីវកម្មខ្នាតតូច និងមធ្យមជាដើម។ ក្រោយពីការបង្កើតឲ្យមានធនាគារនេះឡើងមកកំណើននៃការប្រើប្រាស់របស់ប្រជាជនមានការកើនឡើងជាបន្តបន្ទាប់។

នៅក្នុងឆ្នាំ២០២២នេះ ធនាគារ ជីប ម៉ុង ក៏បានសម្ពោធ និងដំណើរការសាខាថ្មីចំនួន៤ រួមមាន ធនាគារ ជីប ម៉ុង ខមមើសល ប៊ែង ម.ក សាខាសែនសុខ សាខា៥៩៨ សាខាវេងស្រេង និងសាខា២៧១ មេហ្គា ម៉ល។

លោក លាង ឃុន មានប្រសាសន៍ថា៖ “អតិថិជនប្រប្រាស់សេវាកម្មទូទៅបានកើនឡើង ២៤%។ ហើយសម្រាប់ឥណទានអាជីវកម្មខ្នាតតូច និងមធ្យមបានកើនឡើងរហូតដល់ ១៣៩% បើធៀបនិងឆ្នាំ២០២១”។

ធនាគារ ជីប ម៉ុង បានបង្កើតនូវកម្មវិធីសេវាកម្មតាមរយៈប្រព័ន្ធឌីជីថលជាច្រើនរួចមកហើយ ព្រមទាំងពង្រឹងសមត្ថភាពបន្ថែមទៀត ដើម្បីផ្តល់ភាពងាយស្រួល និងឆាប់រហ័សចំពោះការប្រើប្រាស់របស់អតិថិជន។

ធនាគារ ជីប ម៉ុង ក៏នឹងមានគម្រោងបញ្ចេញផលិតផលកាតថ្មីមួយទៀតលើទីផ្សារ ដែលនាំមកនូវអត្ថប្រយោជន៍ និងប្រណិតភាពដល់អ្នកប្រើប្រាស់ក្នុងពេលឆាប់ៗខាងមុខនេះ។

យ៉ាងណាមិញ ភាពជោគជ័យរបស់ធនាគារ ជីប ម៉ុង គឺបានមកពីកំណត់នូវយុទ្ធសាស្ត្រច្បាស់លាស់ មានការពិនិត្យគ្រប់ជ្រុងជ្រោយពីអ្នកជំនាញជាតិ និងអន្តរជាតិ ដើម្បីធានាបាននូវសុវត្ថិភាព និងផ្តល់ទំនុកចិត្តខ្ពស់ដល់អតិថិជន។

លោក ជា ចាន់តូ អគ្គទេសាភិបាល នៃធនាគារជាតិកម្ពុជា ក៏បានធ្វើការកោតសរសើរចំពោះក្រុមហ៊ុន ជីប ម៉ុង ដែលមានសេវាកម្មជាច្រើនប្រកបដោយភាពជោគជ័យ ព្រមទាំងបានចូលរួមអភិវឌ្ឍន៍សេដ្ឋកិច្ច និងសង្គមជាតិកម្ពុជាផងដែរ។

មិនតែប៉ុណ្ណោះការបើកសម្ពោធធនាគារក្នុងផ្សារទំនើប ជីប ម៉ុង មេហ្គា ម៉លនេះនឹងជួយបង្កើនភាពងាយស្រួលដល់ប្រជាជន និងការប្រើប្រាស់ សេវាកម្មកាន់តែប្រសើរឡើង។

ទន្ទឹមនោះ លោកបានកោតសរសើរចំពោះគ្រឹះស្ថានធនាគារនានា ដែលបានជួយស្តារសេដ្ឋកិច្ចជាតិកន្លងមក និងបានសំណូមពរដល់គ្រប់គ្រឹះស្ថានទាំងអស់បន្តខិតខំប្រឹងប្រែង នឹងបង្កើនសមត្ថភាពបន្ថែមទៀត ដើម្បីទប់ស្កាត់នូវបញ្ហានានារបស់ខ្លួន ដើម្បីកុំឲ្យមានបញ្ហាកើតឡើងជាយថាហេតុណាមួយ ក៏ដូចជាបន្តពង្រឹងកិច្ចសហការជាមួយធនាគារជាតិឲ្យកាន់តែរឹងមាំថែមទៀត។

សូមរំឭកថា ធានាគារ ជីប ម៉ុង់ ត្រូវបានបង្កើតឡើងនៅដើមឆ្នាំ២០១៩ ដែលមានដើមទុនសរុបជាទឹកប្រាក់ចំនួន ១៣៥លានដុល្លារ។ ក្រោមការបង្កើតរយៈពេលជិត៤ឆ្នាំមកនេះ ធនាគារមានទ្រព្យសកម្ម ចំនួន ១,២០០លានដុល្លារ។ លើសពីនេះទៀត ធនាគារមាន ១៤សាខា និងមានភ្នាក់ងារជិត ៣,០០០ទីតាំងក្នុងប្រទេសកម្ពុជា៕

The post ធនាគារ​ ជីប ម៉ុង បើកសម្ពោធ​ដាក់ឲ្យដំណើរ​ការសាខា ២៧១ ថ្មីមួយ​ទៀត​បំពេញតម្រូវការអតិថិជន appeared first on Kampuchea Thmey Daily.