ធ្មេញ Archives - Kampuchea Thmey Daily

ចិន ផ្ដល់កៅអីធ្មេញ ២ គ្រឿង ដល់មន្ទីរពេទ្យកុមារជាតិ ដើម្បីលើកកម្ពស់សុខុមាលភាពមាត់ធ្មេញកុមារកម្ពុជា

អ៊ិន ពិសី — Mon, 13 Oct 2025 10:30:00 +0000

មជ្ឈមណ្ឌលត្រួតពិនិត្យ និងការពារជំងឺ ហៃណាន , ក្រុងហៃខូវ , ខេត្តហៃណាន នៃសាធារណរដ្ឋប្រជាមានិតចិន និងសម្ព័ន្ធគ្រូពេទ្យសហភាពសហព័ន្ធយុវជនកម្ពុជា បានផ្តល់កៅអីធ្មេញ ចំនួន ២ គ្រឿង ជូនដល់មន្ទីរពេទ្យកុមារជាតិ ដើម្បីលើកកម្ពស់សុខភាពមាត់ធ្មេញកុមារកម្ពុជាកាន់តែប្រសើរឡើងបន្ថែមទៀត។

ពិធីប្រគល់ និងទទួលកៅអីធ្មេញ ចំនួន ២ គ្រឿង នេះ បានធ្វើឡើងកាលពីព្រឹកថ្ងៃទី ១៣ ខែតុលា ឆ្នាំ ២០២៥ ក្រោមអធិបតីភាពលោកបណ្ឌិត ហេង សុខគង់ រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ , អនុប្រធានសមាគមវេជ្ជសាស្ត្រអន្តរជាតិ និងជាប្រធានសម្ព័ន្ធគ្រូពេទ្យសហភាពសហព័ន្ធយុវជនកម្ពុជា លោកវេជ្ជបណ្ឌិត ញឹប អង្គាបុស្ស នាយកមន្ទីរពេទ្យកុមារជាតិ លោក Chen Cong តំណាងស្ថានទូត សាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា និងលោកស្រី Lin Yingzi លេខាគណៈកម្មាធិការបក្ស មជ្ឈមណ្ឌលគ្រប់គ្រង និងបង្ការជំងឺខេត្ត ហៃណាន។

លោកវេជ្ជបណ្ឌិត ញឹប អង្គាបុស្ស នាយកមន្ទីរពេទ្យកុមារជាតិ បានមានប្រសាសន៍ថា នេះជាលើកទី ២ ហើយ ដែលសម្ព័ន្ធគ្រូពេទ្យសហភាពសហព័ន្ធយុវជនកម្ពុជា បានផ្តល់សម្ភារៈកៅអីធ្មេញ ចំនួន ២ គ្រឿង របស់មជ្ឈមណ្ឌលគ្រប់គ្រង និងបង្ការជំងឺខេត្ត ហៃណាន ដល់មន្ទីរពេទ្យកុមារជាតិ ដើម្បីជួយឱ្យមន្ទីរពេទ្យកុមារជាតិ កាន់តែមានសក្ដានុពលក្នុងការរួមចំណែកអភិវឌ្ឍន៍គុណភាពសេវាសុខាភិបាល ដើម្បីសុខុមាលភាពកុមារកាន់តែប្រសើរ ខណៈកាលពីថ្ងៃទី ១ ខែមិថុនា ឆ្នាំ ២០២៣ សម្ព័ន្ធគ្រូពេទ្យ ស.ស.យ.ក បានផ្តល់អំណោយដ៏ថ្លៃថ្លារបស់ ឯ.ឧ ហ៊ុន មានី ប្រធាន ស.ស.យ.ក និងលោកជំទាវ យឹម ឆៃលីន ប្រធានកិត្តិយសសម្ព័ន្ធគ្រូពេទ្យ ស.ស.យ.ក ជាម៉ាស៊ីនអេកូបេះដូងចំនួន ១ ឈុត មានតម្លៃ ២ ម៉ឺនដុល្លារអាមេរិក ប្រគល់ជូនមន្ទីរពេទ្យកុមារជាតិ សម្រាប់ការប្រើប្រាស់ក្នុងការថតឆ្លុះពោះ និងបេះដូង លើកុមារ ដើម្បីជួយសម្រួលដល់ការព្យាបាលឱ្យកាន់តែមានប្រសិទ្ធភាព។

លោក Chen Cong តំណាងស្ថានទូតសាធារណរដ្ឋប្រជាមានិតចិន ប្រចាំកម្ពុជា សង្ឃឹមថា តាមរយៈកៅអីធ្មេញ ចំនួន ២ គ្រឿង នេះ នឹងចូលរួមចំណែកលើកកម្ពស់សុខភាពកុមារកម្ពុជាកាន់តែប្រសើរ ព្រោះថារដ្ឋាភិបាលចិនតែងតែចូលរួមចំណែកអភិវឌ្ឍន៍ហេដ្ឋារចនាសម្ព័ន្ធផ្សេងៗ ដល់ប្រទេសកម្ពុជា ពិសេសវិស័យសុខាភិបាល។

លោកបណ្ឌិត ហេង សុខគង់ បានថ្លែងអំណរគុណចំពោះមជ្ឈមណ្ឌលគ្រប់គ្រង និងបង្ការជំងឺខេត្ត ហៃណាន ដែលបានផ្តល់កៅអីធ្មេញ ចំនួន ២ គ្រឿង ជូនដល់មន្ទីរពេទ្យកុមារជាតិ ខណៈកាលពីឆ្នាំមុន បានផ្តល់កៅអីធ្មេញចំនួន ២ គ្រឿង ដូចគ្នា ជូនដល់មន្ទីរពេទ្យបង្អែកស្រុកសូត្រនិគម ខេត្តសៀមរាប ផងដែរ។ នេះគឺជាទឹកចិត្តដ៏ថ្លៃថ្លាបំផុតដែលខេត្តហៃណាន បានជួយដល់កម្ពុជា៕

អត្ថបទ ៖ សំអឿន

The post ចិន ផ្ដល់កៅអីធ្មេញ ២ គ្រឿង ដល់មន្ទីរពេទ្យកុមារជាតិ ដើម្បីលើកកម្ពស់សុខុមាលភាពមាត់ធ្មេញកុមារកម្ពុជា appeared first on Kampuchea Thmey Daily.

ក្រុមអ្នកវិទ្យាសាស្រ្តជប៉ុន កំពុងធ្វើតេស្ត ថ្នាំបណ្តុះធ្មេញ

Sok Sovann — Fri, 13 Dec 2024 09:10:15 +0000

ជាដំណឹងល្អមួយសម្រាប់អ្នកគ្មានធ្មេញ ព្រោះថាបច្ចុប្បន្ន ក្រុមអ្នកវិទ្យាសាស្រ្តជប៉ុន កំពុងធ្វើតេស្តលើថ្នាំមួយប្រភេទ ដែលអាចបណ្តុះធ្មេញបាន ដោយលែងភ័យទៅដាក់ឬដាំធ្មេញទៀតហើយ។

(រូបថត៖ AP)

តាមធម្មតា មនុស្សយើងដុះធ្មេញតែ២ដងប៉ុណ្ណោះ មួយគេហៅថា ធ្មេញស្រុក និងម្តងទៀតគេហៅថាធ្មេញព្រៃ ប៉ុន្តែថ្នាំដែលកំពុងធ្វើតេស្តនៅវិទ្យាស្ថានស្រាវជ្រាវវេជ្ជសាស្រ្ត Kitano Hospital ក្នុងទីក្រុងអូសាកា ត្រូវគេជឿថា អាចបណ្តុះធ្មេញបានថ្មីទៀត ឬគេហៅ «ធ្មេញទី៣»។

ក្នុងសេចក្តីរាយការណ៍របស់ CNA នៅថ្ងៃសុក្រទី១៣ខែធ្នូឆ្នាំ២០២៤, ក្រុមអ្នកវិទ្យាសស្រ្តបានធ្វើការសាកល្បងថ្នាំនេះលើសត្វកណ្តុររួចទៅហើយ ដោយបង្ហាញលទ្ធផលគាប់ប្រសើរ ហើយពេលនេះ គេកំពុងធ្វើតេស្តបន្ត លើមនុស្សពេញវ័យ។

លោក Katsu Takahashi (រូបថត៖ Kyoto-Unicap)

ក្នុងការធ្វើតេស្តលើសត្វកណ្តុរ, ថ្នាំនេះអាចទប់ស្កាត់ប្រូតេអ៊ី USAG-1 ហើយអាចភ្ញោចដាស់ឲ្យមានការលូតលាស់ធ្មេញទី៣បាន។

យ៉ាងណាក្តី តាមការបញ្ជាក់ពីលោក Katsu Takahashi នាយកផ្នែកសុខភាពមាត់ធ្មេញនៅវិទ្យាស្ថាន Kitano Hospital បានឲ្យដឹងថា ថ្នាំនេះនឹងត្រូវផលិតជាពិសេសសម្រាប់ក្មេងៗ ហើយនឹងព្យាយាមដាក់លក់លើទីផ្សារឲ្យបានត្រឹមឆ្នាំ២០៣០។

ចំពោះតម្លៃវិញ គេនៅមិនទាន់បញ្ជាក់ច្បាស់នៅឡើយទេ ប៉ុន្តែមានការសន្និដ្ឋានថា វាប្រហែលមិនថោកឡើយ៕

អត្ថបទ៖ សុខ សុវណ្ណ

ចុចអាន៖ ស្ត្រីឥណ្ឌាម្នាក់មានធ្មេញសរុបចំនួន ៣៨ ជាប់កំណត់ត្រាពិភពលោកហ្គីណេស

The post ក្រុមអ្នកវិទ្យាសាស្រ្តជប៉ុន កំពុងធ្វើតេស្ត ថ្នាំបណ្តុះធ្មេញ appeared first on Kampuchea Thmey Daily.

ស្ត្រីឥណ្ឌាម្នាក់មានធ្មេញសរុបចំនួន ៣៨ ជាប់កំណត់ត្រាពិភពលោកហ្គីណេស

Boa Sokunveary — Tue, 21 Nov 2023 08:35:01 +0000

ស្ត្រីជនជាតិឥណ្ឌាអាយុ ២៦ ឆ្នាំម្នាក់ជាប់កំណត់ត្រាពិភពលោកហ្គីណេស ដោយសារតែមានធ្មេញសរុបទាំងអស់ចំនួន ៣៨ នៅក្នុងមាត់របស់គាត់ ។

ជាទូទៅ មនុស្សស្រីពេញវ័យមានធ្មេញពី ២៨ ទៅ ៣២ ប៉ុណ្ណោះ ប៉ុន្តែអ្នកស្រី Kalpana Balan ដែលជាប់កំណត់ត្រាហ្គីណេស មានធ្មេញរហូតដល់ ៣៨ ធ្មេញឯណោះ ។

Balan មានធ្មេញថ្គាមក្រោមលើសចំនួន ៤ និងធ្មេញនៅថ្គាមលើលើស ២ បន្ថែមទៀត ។ ធ្មេញដែលលើសរបស់ Balan ចាប់ផ្ដើមដុះតាំងពីអ្នកស្រីនៅវ័យជំទង់មកម្ល៉េះ ហើយអ្នកស្រីក៏ចង់ដកវាដែរ ប៉ុន្តែពេទ្យធ្មេញណែនាំឲ្យទុករហូតដល់ដុះផុតសិន ។

ក្រោយមកស្ត្រីរូបនេះសម្រេចចិត្តមិនដកធ្មេញនោះចេញទេ ព្រោះវាមិនបង្កការឈឺចាប់ណាមួយដល់នាងឡើយ ។ មិនយូរទៀតនោះទេ Balan នឹងបំបែកកំណត់ត្រាជាលើកទី ២ ជាក់ជាមិនខាន ដោយសារនាងនៅមានធ្មេញ ២ ទៀតដែលមិនទាន់ដុះចេញនេះឯង ៕

ប្រែសម្រួល៖ វារី

ប្រភព៖ UPI

ចុចអាន៖ បុរសនៅរដ្ឋមួយរបស់ អាមេរិក ប្រមូលខ្មៅដៃទុកជិត ៧០,០០០ ដើម រហូតជាប់កំណត់ត្រា Guinness

The post ស្ត្រីឥណ្ឌាម្នាក់មានធ្មេញសរុបចំនួន ៣៨ ជាប់កំណត់ត្រាពិភពលោកហ្គីណេស appeared first on Kampuchea Thmey Daily.