នយោបាយថៃ Archives - Kampuchea Thmey Daily

នាយករដ្ឋមន្ត្រីថៃថានឹងតាមប្រមាញ់អតីតសមាជិកបក្សភឿថៃដែលសង្ស័យក្នុងបទសម្លាប់រង្គាល

Rann Reuy — Tue, 15 Oct 2024 08:58:16 +0000

នាយករដ្ឋមន្ត្រីថៃ ផែថងថាន ស៊ីណាវ៉ាត្រា (Paetongtarn Shinawatra) បាននិយាយនៅថ្ងៃអង្គារថា រដ្ឋាភិបាលរបស់លោកស្រីនឹងស្វែងរកការចាប់ខ្លួនអតីតសមាជិកសភានៃគណបក្សភឿថៃដែលទើបដាក់លិខិតលាលែង១ថ្ងៃទាំងតួនាទីក្នុងគណបក្សនិងតួនាទីក្នុងរដ្ឋសភា។

នាយករដ្ឋមន្ត្រីថៃ ផែថងថាន ស៊ីណាវ៉ាត្រា។ FB

យោងការចុះផ្សាយរបស់សារព័ត៌មាន Khaosod English រដ្ឋាភិបាលថៃនឹងធ្វើការជាមួយប៉ូលិស Interpol ដើម្បីស្វែងរកចាប់ខ្លួនអតីតសមាជិកសភាគណបក្សភឿថៃ លោកឧត្តមសេនីយ Phisarn Rattanawongkhiri ដែលសង្ស័យថា បានរត់គេចខ្លួនទៅកាន់ប្រទេសអង់គ្លេស ក្រោយមិនបានឡើងសវនាការលើសំណុំរឿងកាលពី២០ឆ្នាំមុនជាប់ព័ន្ធការសម្លាប់រង្គាលក្នុងអំពើហិង្សា។

យោងសារព័ត៌មានថៃដែលចេញផ្សាយមុននេះបន្តិច លោក Phumtham Wechayachai ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ បានលើកឡើងថា លោក Phisarn Rattanawongkhiri ជាសមាជិកសភានៃគណបក្សភឿថៃ បានបញ្ជូនអ្នកតំណាងឱ្យដាក់ឯកសារលាលែងពីតំណែងរបស់លោក ដែលមានសុពលភាព ថ្ងៃទី១៤ខែតុលាតទៅ។

ក្នុងលិខិតលាងលែងនោះ Phisarn បានលើកហេតុផលព្យាបាលជំងឺ ហើយលោកនឹងវិលមកពន្យល់ផ្ទាល់មាត់វិញនៅពេលសុខភាពលោកប្រសើរឡើង។

លោក Phisarn គឺជាជនសង្ស័យក្នុងសំណុំរឿងបំបែកហ្វូងបាតុករជនជាតិមូស្លីម នៅមុខប៉ុស្តិ៍ប៉ូលិស Tak Bai ក្នុងខេត្ត Narathiwat កាលពី២០ឆ្នាំមុន ដែលពេលនោះលោកជាមេបញ្ជាការកងទ័ពភូមិភាគទី៤។ សកម្មភាពរបស់យោធាក្នុងការបង្ក្រាបបាតុករនាពេលនោះបណ្តាលឱ្យអ្នកតវ៉ា៧នាក់ស្លាប់ ហើយការគប់គ្រាប់បែកផ្សែងចូលក្នុងរថយន្តបានបណ្តាលឲ្យមនុស្ស៧៨នាក់ស្លាប់ដោយសារថប់ដង្ហើម។

លោក Phisarn Rattanawongkhiri ជាសមាជិកសភានៃគណបក្សភឿថៃ។ Bangkok Post

លោក គឺជាចុងចម្លើយម្នាក់ក្នុងចំណោម៧នាក់ ដែលដាក់ពាក្យប្តឹងដោយគ្រួសារនានៃជនរងគ្រោះដែលបានស្លាប់ចំនួន៤៨នាក់។ កាលពីសប្តាហ៍មុន តុលាការខេត្ត បានចេញដីការចាប់ខ្លួនលោក Pisarn ដែលបរាជ័យក្នុងការបង្ហាញខ្លួននៅអង្គសវនាការ។ នេះបើយោងតាមការសារព័ត៌មាន The Nation៕

ដោយ រ៉ាន់ រើយ

The post នាយករដ្ឋមន្ត្រីថៃថានឹងតាមប្រមាញ់អតីតសមាជិកបក្សភឿថៃដែលសង្ស័យក្នុងបទសម្លាប់រង្គាល appeared first on Kampuchea Thmey Daily.

ផែថងថានប្រើពេល២ថ្ងៃអានឯកសារគោលនយោបាយរដ្ឋាភិបាលដល់រដ្ឋសភាថៃ

Rann Reuy — Thu, 12 Sep 2024 03:51:27 +0000

នាយករដ្ឋមន្ត្រីក្មេងបំផុតក្នុងប្រវត្តិសាស្ត្រថៃ ផែថងថាន ស៊ីណាវ៉ាត្រា (Paetongtarn Shinawatra) ដែលត្រូវជាកូនស្រីពៅរបស់អតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា បានដឹកនាំគណៈរដ្ឋមន្ត្រីថៃថ្មីដែលទើបបង្កើតកាលថ្ងៃទី៤ខែកញ្ញានេះ ចូលអានឯកសារគោលនយោបាយរបស់រដ្ឋាភិបាលរបស់លោកស្រីនៅក្នុងរដ្ឋសភារយៈពេល២ថ្ងៃ។

ផែថងថាន ថ្លែងក្នុងរដ្ឋសភាថៃនៅព្រឹកថ្ងៃទី១២ខែកញ្ញា។ Snipping/Khaosod

តាមការគ្រោងទុក ការអានឯកសារគោលនយោបាយរបស់រដ្ឋាភិបាលនៅក្នុងរដ្ឋសភានេះនឹងប្រើពេលចំនួន២ថ្ងៃ គឺនៅថ្ងៃទី១២និងទី១៣ខែកញ្ញានេះ។ ឯកសារគោលនយោបាយនោះនឹងបង្ហាញពីផែនការត្រូវធ្វើរបស់រដ្ឋាភិបាលថ្មីដែលនៅសល់ពេលត្រឹមប្រហែល៣ឆ្នាំទៀតប៉ុណ្ណោះ។

រដ្ឋាភិបាលចម្រុះថៃដែលមានគណបក្សភឿថៃជាអ្នកកាច់ចង្កូតបានចាយពេលអស់ជិត១ឆ្នាំ ដឹកនាំអតីតនាយករដ្ឋមន្ត្រី លោក សេដ្ឋា ថាវីស៊ីន ដែលត្រូវតុលាការធម្មនុញ្ញដែលមានសមាជិក៩រូបបោះឆ្នោតដោយសំឡេងភាគច្រើនទម្លាក់ពីនាយករដ្ឋមន្ត្រីដោយសារតែការរកឃើញកំហុសក្នុងការតែងតាំងមេធាវីប្រចាំគ្រួសារលោកថាក់ស៊ីន ស៊ីណាវ៉ាត្រា ដែលធ្លាប់ជាប់ពន្ធនាគារពីបទសូកប៉ាន់មន្ត្រីតុលា ជារដ្ឋមន្ត្រីមន្ត្រីនៃទីស្តីការគណៈរដ្ឋមន្ត្រី ដោយតុលាការធម្មនុញ្ញបានយល់ឃើញពីខ្វះសុច្ចរិតភាព។

ក្នុងចំណោមគោលនយោបាយថៃរបស់រដ្ឋាភិបាលចម្រុះដឹកនាំដោយគណបក្សភឿថៃ គឺការដាក់ចេញយុទ្ធសាស្រ្ត ផ្តល់ប្រាក់១០០០០បាត (ប្រហែល៣០០ដុល្លារ) ដល់ប្រជាជនថៃប្រមាណជាង១៤លាននាក់។

ផ្អែកតាមខ្លឹមសារនៃឯកសារគោលនយោបាយដែលផ្សព្វផ្សាយដោយសារព័ត៌មានថៃនិងភ្នាក់ងារសារព័ត៌មានអន្តរជាតិជាច្រើន លក្ខខណ្ឌដែលអាចទទួលលុយ១០០០០បាតនោះបាន គឺប្រជាជនថៃដែលគ្រប់អាយុ១៦ឆ្នាំ គិតត្រឹមថ្ងៃទី៣០ខែកញ្ញានេះ។ អ្នកទទួលបានប្រាក់តាមកាបូបប្រាក់ឌីជីថល (digital wallets) ក៏ជាអ្នកដែលគ្មានប្រាក់លើស៥០ម៉ឺនបាតក្នុងគណនីធនាគាររបស់គេដែរ ហើយ ពួកគេមិនរកចំណូលបានលើស៨៤ម៉ឺនបាតក្នុងឆ្នាំ២០២៣។

ផែថងថាន បួងសួងមុនពេលចូលអានឯកសារគោលនយោបាយនៅក្នុងរដ្ឋសភា។ Khaosod

ទោះបីជារដ្ឋាភិបាលថ្មីនេះចេញជារូបរាងក៏ពិតមែន ប៉ុន្តែរដ្ឋាភិបាលចម្រុះដឹកនាំដោយគណបក្សភឿថៃក៏ប្រឈមបញ្ហាផ្លូវច្បាប់ជាច្រើនដែលប្តឹងដោយអ្នកនយោបាយមកពីគណបក្សជំទាស់ Pralang Pracharath ដែលលោកស្រី ផែថងថាន បានរុញច្រានចេញពីរដ្ឋាភិាលចម្រុះ។

រដ្ឋាភិបាលចម្រុះនេះក៏រងបណ្តឹងរំលាយចោល មិនត្រឹមតែពីគណបក្សជំទាស់ប៉ុណ្ណោះទេ ថែមទាំងពីសកម្មជនក្រៅរដ្ឋាភិបាល និងអ្នកតវ៉ាប្រឆាំងក្រុមគ្រួសារលោកថាក់ស៊ីន ដែលវិលទៅកាន់អំណាចនយោបាយថៃវិញ៕

ដោយ រ៉ាន់ រើយ

The post ផែថងថានប្រើពេល២ថ្ងៃអានឯកសារគោលនយោបាយរដ្ឋាភិបាលដល់រដ្ឋសភាថៃ appeared first on Kampuchea Thmey Daily.

ញត្តិថ្មីប្តឹងទៅគណៈកម្មការបោះឆ្នោតថៃទាមទាររំលាយបក្ស ៦ រួមទំាងបក្សភឿថៃ

Rann Reuy — Mon, 09 Sep 2024 08:10:25 +0000

ញត្តិថ្មីមួយទាមទារឱ្យរំលោយគណបក្ស៦ក្នុងរដ្ឋាភិបាលចម្រុះថៃបច្ចុប្បន្ន ត្រូវបានដាក់ទៅកាន់គណៈកម្មការរៀបចំការបោះឆ្នោត (EC) របស់ថៃនៅថ្ងៃចន្ទនេះ ដោយអតីតអ្នកប្រឆាំងរបបយោធា ដែលបានទម្លាក់រដ្ឋាភិបាលលោកថាក់ស៊ីស៊ីណាវ៉ាត្រាកាលពីឆ្នាំ២០០៦ ។

យោងតាមការចេញផ្សាយព័ត៌មានទាន់ហេតុការណ៍ (Breaking News) នៃសារព័ត៌មាន Khaosod ពាក្យបណ្តឹងដែលប្តឹងដោយលោក Noparut Worachitwuthikul បានទាមទារឱ្យរំលាយគណបក្ស៦ដែលតំណាងរបស់គណបក្សទាំងនោះបានជួបប្រជុំជាមួយអតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា នៅលំនៅឋានរបស់លោក មុនរដ្ឋាភិបាលបានបង្កើតឡើង។

លោក ថាក់ស៊ីន ស៊ីណាវ៉ាត្រា ពេលធ្វើដំណើរទៅប្រជុំក្នុងគណបក្សភឿថៃថ្មីៗនេះ។ Khaosod

ញត្តិទាមទារឱ្យរំលាយគណបក្សទាំងនោះ ដោយការចោទប្រកាន់អំពីការស្ថិតក្រោមឥទ្ធិពលរបស់លោកថាក់ស៊ីនរបស់គណបក្សទាំងនោះ ដោយសារតែតំណាងគណបក្សទាំងនោះបានចូលរួមកិច្ចប្រជុំមួយរៀបចំឡើងនៅល្ងាចថ្ងៃទី១៤ខែសីហា គឺថ្ងៃដែលតុលាការធម្មនុញ្ញាសម្រេចដកតំណាងនាយករដ្ឋមន្ត្រី សេដ្ឋា ថាវីស៊ីន ខណៈពេលដែលលោកស្រី ផែថងថាន ស៊ីណាវ៉ាត្រា ដែលមានអំណាចក្នុងគណបក្សភឿថៃសម្រាប់ការដឹកនាំប្រជុំតាមអំណាចប្រធានគណបក្សចម្រុះស្ថិតនៅក្រៅប្រទេសនៅឡើយ។

ញត្តិដែលទាមទាររំលាយគណបក្សទាំងនោះរួមមាន គណបក្សភឿថៃ គណបក្សរួបរួមជាតិថៃ គណបក្ស Palang Pracharath គណបក្ស Bhumjai Thail។ ញត្តិនោះត្រូវបានផ្តួចផ្តើមដោយ លោក Noparut Worachitwuthikul ជាសមាជិកនៃ ក្រុមព្រាមសនៅឆ្នាំ២០០៦។

យោងគេហទំព័រ teakdoor.com ដែលបានប្រមូលចងក្រងអត្ថបទរបស់សារព័ត៌មាន BangkokPost.com ដែលបានចេញផ្សាយកាលថ្ងៃទី ១៨ខែឧសភា២០០៧ គឺប្រហែល៨ខែក្រោយរដ្ឋាភិបាលលោកថាក់ស៊ីនត្រូវបានផ្តួចរំលំក្រោយរដ្ឋប្រហារយោធាកាលខែកញ្ញាឆ្នាំ២០០៦ លោក Noparut Worachitwuthikul ជាប្រធានអង្គការព្រាបស ( White Dove) ជាអង្គការប្រឆាំងរដ្ឋាភិបាលរដ្ឋប្រហារ។

តាមការចុះផ្សាយនោះ លោក Noparut Worachitwuthikul ក៏ត្រូវបានប៉ូលិសចាប់ខ្លួនកាលពីពេលនោះ ដោយសារលោកបានទៅកាន់សាលាក្រុងឈៀងម៉ៃ ដើម្បីសុំការអនុញ្ញាតប្រើប្រាស់តំបន់ជុំវិញនោះដើម្បីជួបជុំតវ៉ា៕

ដោយ រ៉ាន់ រើយ

The post ញត្តិថ្មីប្តឹងទៅគណៈកម្មការបោះឆ្នោតថៃទាមទាររំលាយបក្ស ៦ រួមទំាងបក្សភឿថៃ appeared first on Kampuchea Thmey Daily.

នយោបាយថៃអាប់អួជាថ្មី ខណៈក្រុមអ្នកតវ៉ាចាប់ផ្តើមប្រមូលផ្តុំ

Rann Reuy — Sat, 07 Sep 2024 12:49:40 +0000

បរិយាកាសនយោបាយថៃចាប់ផ្តើមអាប់អួ ក្រោយរដ្ឋាភិបាលថ្មីបានចាប់ផ្តើមដំណើរការត្រឹមតែ១ថ្ងៃ ដោយក្រុមអ្នកតវ៉ាបានចាប់ផ្តើមដំណើរការតវ៉ាប្រឆាំងក្រុមគ្រួសាររបស់លោកថាក់ស៊ីនផ្ទាល់តែម្តង។ លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីដែលត្រូវទម្លាក់ដោយរដ្ឋាប្រហារយោធាកាលឆ្នាំ២០០៦ ហាក់លេចមុខមាត់ភ្លាមៗក្រោយកូនស្រីពៅរបស់លោកបានទទួលការគាំទ្រពីការបោះឆ្នោតផ្តល់សេចក្តីទុកចិត្តក្នុងរដ្ឋសភាកាលថ្ងៃទី១៦ខែសីហា។

ការតវ៉ាដំបូងប្រឆាំងរដ្ឋាភិបាលថ្មីរបស់ប្រទេសថៃដឹកនាំនាយករដ្ឋមន្ត្រី ផែថងថាន ស៊ីណាវ៉ាត្រា (Paetongtarn Shinawatra) បានចាប់ផ្តើមនៅរសៀលថ្ងៃសៅរ៍ ប៉ុន្មានម៉ោងក្រោយរដ្ឋាភិបាលថ្មីប្រជុំគណៈរដ្ឋមន្ត្រីលើកដំបូង និងធ្វើសន្និសីទសារព័ត៌មានលើកដំបូង។

យោងការផ្សាយរបស់សារព័ត៌មាន Khaosod ក្រុមអ្នកតវ៉ាបានរៀបចំការតវ៉ានៅវិមាន១៤តុលាដោយមានការអំពាវនាវឲ្យប្រជាជនបញ្ឈប់គ្រួសារស៊ីណាវ៉ាត្រាពីការគ្រប់គ្រងប្រទេសថៃ។

ផ្ទាំងបដាធំនៅលើឆាកដែលគេរៀបចំដូចជាឆាកប្រគុំតន្ត្រី ត្រូវបានគេសរសេរថា៖«បញ្ឈប់របបស៊ីណាវ៉ាត្រានិងគណរដ្ឋមន្ត្រីគ្រួសារ (Stop the Shinawatra Regime and Family Cabinet)»។ យោងការផ្សាយនោះ។

គណៈរដ្ឋមន្ត្រីថៃថ្មីដឹកនាំដោយ លោកស្រី ផែថងថាន ស៊ីណាវ៉ាត្រា (Paetongtarn Shinawatra) ដែលជានាយករដ្ឋមន្ត្រីក្មេងបំផុតក្នុងប្រវត្តិសាស្ត្រថៃ និងជាកូនស្រីពៅរបស់លោកថាក់ស៊ីនស៊ីណាវ៉ាត្រា បានស្បថចូលកាន់តំណែងនៅល្ងាចថ្ងៃសុក្រ និងគ្រោងអានអត្ថបទគោលនយោបាយរបស់រដ្ឋាភិបាលថ្មីនៅរដ្ឋសភានៅថ្ងៃទី១២និងទី១៣ខែកញ្ញានេះ។

គណបក្សភឿថៃដឹកនាំរដ្ឋាភិបាលចម្រុះនេះ បានបណ្តឹងមួយចំនួនរួមទាំងបណ្តាំងឲ្យរំលាយគណបក្សនេះពីសមាជិកសភារបស់គណបក្ស Pralang Pracharath ដែលត្រូវបានរុញច្រានចេញពីរដ្ឋាភិបាលចម្រុះរបស់លោកស្រីផែថងថាន។

គណបក្ស Pralang Pracharath ដឹកនាំដោយ លោក Prawit Wongsuwon អតីតឧបនាយករដ្ឋមន្ត្រីក្រសួងមហាផ្ទៃ និងជាអ្នកគាំទ្រឲ្យធ្វើរដ្ឋប្រហារទម្លាក់រដ្ឋាភិបាលយីងឡាក់ ស៊ីណាវ៉ាត្រាកាលពីឆ្នាំ២០១៤។ អ្នកស្រីយីងឡាក់ត្រូវជាមីងរបស់នាយករដ្ឋមន្ត្រីបច្ចុប្បន្ន៕

The post នយោបាយថៃអាប់អួជាថ្មី ខណៈក្រុមអ្នកតវ៉ាចាប់ផ្តើមប្រមូលផ្តុំ appeared first on Kampuchea Thmey Daily.

លោកស្រីផែថងថានដឹកនាំគណៈរដ្ឋមន្ត្រីថ្មីស្បថចូលកាន់តំណែង

Rann Reuy — Fri, 06 Sep 2024 10:30:43 +0000

គណៈរដ្ឋមន្ត្រីថៃថ្មីដឹកនាំដោយ លោកស្រី ផែថងថាន ស៊ីណាវ៉ាត្រា (Paetongtarn Shinawatra) នាយករដ្ឋមន្ត្រីក្មេងបំផុតក្នុងប្រវត្តិសាស្ត្រថៃ និងជាកូនស្រីពៅរបស់លោកថាក់ស៊ីនស៊ីណាវ៉ាត្រា បានស្បថចូលកាន់តំណែងនៅល្ងាចថ្ងៃសុក្រ ខណៈដែលរដ្ឋាភិបាលថ្មីនេះនឹងត្រូវអានអត្ថបទគោលនយោបាយនៅមុខរដ្ឋសភានៅថ្ងៃទី១២និងទី១៣ខែកញ្ញានេះ។

សមាសភាពគណៈរដ្ឋមន្ត្រីថ្មីរបស់ថៃ។ Khaosod

ព្រះមហាក្សត្រថៃ បានចេញព្រះរាជក្រឹត្យតែងតាំងរដ្ឋាភិបាលដឹកនាំដោយលោកស្រី ផែថងថានជាផ្លូវការនៅថ្ងៃទី៤កញ្ញានេះ បន្ទាប់ពីប្រើពេលជិត៣សប្តាហ៍ដើម្បីសម្របសម្រួលនយោបាយ។

លោកស្រី ផែថងថាន ចោមរោមដោយអ្នកសែត។ Khaosod

ទោះបីជារដ្ឋាភិបាលថ្មីនេះចេញជារូបរាងក៏ពិតមែន ប៉ុន្តែរដ្ឋាភិបាលចម្រុះដឹកនាំដោយគណបក្សភឿថៃក៏ប្រឈមបញ្ហាជាច្រើនផ្នែកផ្លូវច្បាប់ដែលប្តឹងដោយអ្នកនយោបាយមកពីគណបក្ស Pralang Pracharath ដែលលោកស្រី ផែថងថាន បានរុញច្រានចេញពីរដ្ឋាភិាលចម្រុះ៕

ដោយ រ៉ាន់ រើយ

The post លោកស្រីផែថងថានដឹកនាំគណៈរដ្ឋមន្ត្រីថ្មីស្បថចូលកាន់តំណែង appeared first on Kampuchea Thmey Daily.

បុរសម្នាក់ជាប់ទោសជាងកន្លះសតវត្សរ៍ ពាក់ព័ន្ធបង្ហោះសារប្រមាថស្តេចថៃ

Rann Reuy — Thu, 05 Sep 2024 04:10:05 +0000

ចៅក្រមតុលាការក្នុងខេត្តឈៀរ៉ៃ (Chiang Rai) ស្ថិតនៅភាគខាងជើងប្រទេសថៃ កាលថ្ងៃពុធទី៤ខែកញ្ញា បានកាត់ទោសដាក់គុកបុរសម្នាក់រយៈពេល៥៤ឆ្នាំនិង៦ខែ ពីបទប្រមាថព្រះមហាក្សត្រ។

បណ្តាញសង្គមហ្វេសប៊ុកនៃសារព័ត៌មាន Khaosod បានលើកឡើងថា «កំណត់ត្រាថ្មីនៃការផ្តន្ទាទោសដាក់ពន្ធនាគារសម្រាប់ជនល្មើសប្រមាថព្រះមហាក្សត្រ»។

លោក មង្គលវ័យ៣១ឆ្នាំត្រូវផ្តន្ទាទោសប្រមាថព្រះមហាក្សត្រថៃ ដោយជាប់ទោស៥៤ឆ្នាំនៅខេត្តឈៀរ៉ៃ។ Bangkok Post

យោងការលើកឡើងរបស់មេធាវីថៃដើម្បីសិទ្ធិមនុស្សនៅថ្ងៃពុធ សារព័ត៌មានខាងលើ បានផ្សាយថា តុលាការខេត្តឈៀងរ៉ៃសម្រេចផ្តន្ទាទោសដាក់ពន្ធនាគារចំនួន៥៤ឆ្នាំនិង៦ខែសម្រាប់ការបង្ហោះហ្វេសប៊ុក (FB) ចំនួនពីរក្នុងឆ្នាំ ២០២០ដែលបរិហារកេរ្តិ៍ព្រះមហាក្សត្រ និងបំពានច្បាប់ឧក្រិដ្ឋកម្មកុំព្យូទ័រ (និងច្បាប់ពាក់ព័ន្ធផ្សេងៗទៀត)។

ជនជាប់ចោទនោះត្រូវបានគេដឹងឈ្មោះថា មង្គល (Mongkol) ដោយមិនបានបញ្ជាក់ត្រកូល វ័យ៣១ឆ្នាំ មានមុខរបរជាអ្នកលក់សម្លៀកបំពាក់ បាននិយាយថា លោកមិនបានបង្ខូចកេរ្តិ៍ឈ្មោះ«រាជានិយម»ទេ ប៉ុន្តែលោកគ្រាន់តែបង្ហាញការជំទាស់របស់លោកនឹងព្រះមហាក្សត្រទាក់ទងនឹងនយោបាយ។ តុលាការបាននិយាយថា វាជាការបរិហារកេរ្តិ៍ ហើយពាក្យជេរប្រមាថត្រូវបានប្រើ។

ទោះបីយ៉ាងណាក៏ដោយ ទោសដែលបានផ្តន្ទារួច និងបូករួមគ្នាត្រូវបានកាត់បន្ថយមួយភាគបីឬពី៨១ឆ្នាំមកនៅត្រឹម៥៤ឆ្នាំ។

សារព័ត៌មានបាងកកប៉ុស្តិ៍ បានផ្សាយនៅថ្ងៃទី៤ខែកញ្ញា បានឱ្យដឹងថា យោងទិន្នន័យពី TLHR មនុស្សចំនួន១៩៥៤នាក់ត្រូវបានផ្តន្ទាទោសចំពោះការចូលរួមនយោបាយនិងការបញ្ចេញមតិចាប់តាំងពីការចាប់ផ្តើមនៃការតវ៉ាទាមទារសេរីភាពយុវជន ( Free Youth) ក្នុងខែកក្កដាឆ្នាំ២០២០ រហូតដល់ថ្ងៃទី៣១ខែកក្កដាឆ្នាំនេះ។ យ៉ាងហោចណាស់ ២៧២កំពុងប្រឈមការចោទប្រកាន់ប្រមាថព្រះមហាក្សត្រក្រោមមាត្រា១១២ និង ១៥២ ពាក់ព័ន្ធរាជបល្ល័ង្គ។

និន្នាការប្រឆាំងអំណាចព្រះមហាក្សត្រថៃបានកើនឡើងក្នុងចំណោមយុវជនជំនាន់ក្រោយរបស់ថៃ ហើយកាលពីឆ្នាំ២០២៣ គណបក្សនយោបាយថៃចលនាឆ្ពោះទៅមុខ (MFP) ដែលប្រមូលផ្តុំដោយអ្នកនយោបាយវ័យក្មេង បានកំណត់គោលនយោបាយក្នុងការឃោសនារកសម្លេងឆ្នោត ដោយសន្យាធ្វើវិសោធនកម្មច្បាប់រដ្ឋធម្មនុញ្ញតពាក់ព័ន្ធព្រះរាជបល្ល័ង្គ ដោយបន្ថយអំណាចព្រះមហាក្សត្រ។

ការដាក់ចេញគោលនយោបាយនោះ បានធ្វើឱ្យគណបក្សនេះឈ្នះការបោះឆ្នោតកាលខែឧសភាឆ្នាំ២០២៣ ប៉ុន្តែបរាជ័យក្នុងការបង្កើតរដ្ឋាភិបាលចម្រុះ ហើយក៏ត្រូវប្រឈមការរំលាយបក្សវិញ ហើយថ្នាក់ដឹកនាំនៃបក្សនេះមួយចំនួន មានលោក ភិថា លឹមចារើនរ៉ាតជាដើមត្រូវជាប់បម្រាមធ្វើនយោបាយ១០ឆ្នាំ ដោយសារតែបំណងប៉ងបន្ថយអំណាចព្រះមហាក្សត្រ៕

ដោយ រ៉ាន់ រើយ

The post បុរសម្នាក់ជាប់ទោសជាងកន្លះសតវត្សរ៍ ពាក់ព័ន្ធបង្ហោះសារប្រមាថស្តេចថៃ appeared first on Kampuchea Thmey Daily.

រដ្ឋាភិបាលចម្រុះថ្មីថៃត្រៀមចេញដំណើរ ខណៈបក្សភឿថៃប្រឈមបណ្តឹងរំលាយ

Rann Reuy — Wed, 04 Sep 2024 09:20:09 +0000

គណៈរដ្ឋមន្ត្រីថៃថ្មីដឹកនាំដោយ លោកស្រី ផែថងថាន ស៊ីណាវ៉ាត្រា (Paetongtarn Shinawatra) ជានាយករដ្ឋមន្ត្រីក្មេងបំផុតនិងជាកូនស្រីពៅរបស់លោកថាក់ស៊ីនស៊ីណាវ៉ាត្រាត្រូវបានព្រះមហាក្សត្រតែងតាំងជាផ្លូវការនៅថ្ងៃទី៤កញ្ញានេះ បន្ទាប់ពីប្រើពេលជិត៣សប្តាហ៍ដើម្បីសម្របសម្រួលនយោបាយ។

តាមការចុះផ្សាយរបស់សារព័ត៌មានថៃ គណរដ្ឋមន្ត្រីថៃថ្មីនឹងចូលស្បថចៅកាន់ដំណែងនៅមុខព្រះភក្ត្រព្រះមហាក្សត្រនៅថ្ងៃសុក្រទី៦ខែកញ្ញានេះ នៅវេលាម៉ោង៥ល្ងាច។

បើទោះបីជារដ្ឋសភាបានបោះឆ្នោតគាំទ្រនាយករដ្ឋមន្ត្រីថ្មីត្រឹមតែ២ថ្ងៃក្រោយការបណ្តេញចេញអតីតនាយករដ្ឋមន្ត្រី សេដ្ឋា ថាវីស៊ីន ដែលបានកាន់តំណែងនេះមិនដល់១ឆ្នាំនោះ ការប្រើពេលដ៏យូរដើម្បីរៀបចំគណៈរដ្ឋមន្ត្រីថ្មីគឺដោយសារតែការមិនចុះសម្រុងគ្នាក្នុងចំណោមគណបក្សនៅក្នុងរដ្ឋាភិបាលចម្រុះ។

នាយករដ្ឋមន្ត្រីថៃ ផែថងថាន ស៊ីណាវ៉ាត្រា ក្នុងការិយាយបក្សភឿថៃ។ Facebook/Ing Shinawatra

គណៈបក្សភឿថៃដឹកនាំដោយលោកស្រី ផែថងថាន បានច្រានចោលគណបក្ស Pralang Pracharath ដែលមានសមាជិកសភាចំនួន៤០រូប ចេញពីរដ្ឋាភិបាលចម្រុះ ដោយចោទប្រកាន់ថា ប្រមុខគណបក្សនេះ Prawit Wongsuwon មិនបានបោះឆ្នោតគាំទ្រ លោកស្រី ផែថងថាន នៅក្នុងរដ្ឋសភានោះទេ។

ដោយសារមូលហេតុនោះ គណបក្សភឿថៃដែលដឹកនាំរដ្ឋាភិបាលចម្រុះបានងាកទៅរកគណបក្សប្រជាធិបតេយ្យ (Democrat Party) ដែលមានសមាជិកសភា២៥ មកចូលរួមជាមួយរដ្ឋាភិបាលចម្រុះវិញ ដើម្បីបង្គ្រប់កូរ៉ុមនៅរដ្ឋសភា។

គណៈរដ្ឋមន្ត្រីថ្មីថៃដែលដឹកនាំដោយនាយករដ្ឋមន្ត្រីផែថងថាននៃគណបក្សភឿថៃ កំពុងរៀបចំចេញដំណើរទៅមុខ ប៉ុន្តែគណបក្សភឿថៃដែលទទួលឥទ្ធិពលយ៉ាងសម្បើមពីក្រុមគ្រួសារលោកថាក់ស៊ីនស៊ីណាវ៉ាត្រា អតីតនាយករដ្ឋមន្ត្រីដែលត្រូវបណ្តេញចេញពីអំណាចដោយរដ្ឋប្រហារយោធាកាលខែកញ្ញាឆ្នាំ២០០៦ ក៏ទទួលនូវពាក្យបណ្តឹងឱ្យរំលាយគណបក្សដែលមិនទាន់ត្រូវបានដោះស្រាយផងដែរ។

ចលនាប្រឆាំងគណបក្សភឿថៃបានផ្ទុះឡើងក្រោយវត្តមានរបស់លោកថាក់ស៊ីនលេចអណ្តែតជាថ្មីលើវិថីនយោបាយថៃដែលរងការធ្វើរដ្ឋប្រហារដោយយោធាទម្លាក់រដ្ឋាភិបាលរបស់លោកក្នុងឆ្នាំ២០០៦ និងម្តងទៀតក្រុមយោធាបានទម្លាក់រដ្ឋាភិបាលរបស់ប្អូនស្រីរបស់លោក គឺ លោកស្រី យីងឡាក់ ស៊ីណាវ៉ាត្រាក្នុងឆ្នាំ២០១៤។

នៅថ្ងៃទី១៩ខែសីហា ញត្តិដំបូងដែលប្តឹងរំលាយគណបក្សភឿថៃបានដាក់ទៅគណៈកម្មការបោះឆ្នោត (EC) ដោយចោទប្រកាន់គណបក្សនេះបានអនុញ្ញាតឱ្យលោកថាក់ស៊ីន ស៊ីណាវ៉ាត្រា ដែលជាអ្នកនៅខាងក្រៅ ទៅគ្រប់គ្រងគណបក្ស។

ការចេញមុខមាត់របស់លោកថាក់ស៊ីន នៅប៉ុន្មានថ្ងៃក្រោយកូនស្រីរបស់លោកជាប់ឆ្នោតសភាដើម្បីដឹកនាំរដ្ឋាភិបាលថ្មី ដោយ លោក ថាក់ស៊ីននាពេលនោះ បានថ្លែងការណ៍យ៉ាងលម្អិតជុំវិញការដាក់ចេញនូវគោលនយោបាយអភិវឌ្ឍន៍សេដ្ឋកិច្ច រួមមានការផ្តល់ប្រាក់ដល់ប្រជាពលរដ្ឋថៃចំនួន១០០០០បាតក្នុងមួយខែ ដើម្បីជំរុញកម្លាំងចំណាយក្នុងចរន្តសេដ្ឋកិច្ចជាដើម បានជំរុញឲ្យមានការប្រឆាំងដោយចោទប្រកាន់ពីការជ្រៀតជ្រែកកិច្ចការរដ្ឋពីអ្នកខាងក្រៅ។

លោក ថាក់ស៊ីន ស៊ីណាវ៉ាត្រា ពេលឡើងថ្លែងសាធារណៈដំបូងក្រោយកូនស្រីជាប់ឆ្នោតនៅសភា។ Khaosod

ការថ្លែងរបស់លោកដោយលម្អិតទៅលើសកម្មភាពគោលនយោបាយរបស់រដ្ឋាភិបាល បានធ្វើឱ្យចន្លោះប្រហោងសម្រាប់ក្រុមនយោបាយផ្សេង ដែលចាត់ទុកថា គណបក្សភឿថៃស្ថិតក្រោមការចាត់ចែងរបស់លោកថាក់ស៊ីនដែលនិរទេសខ្លួនជាង១៥ឆ្នាំ និងវិលចូលប្រទេសវិញកាលពីថ្ងៃទី២២ខែសីហាឆ្នាំ២០២៣ និងត្រូវទទួលរងនូវការកាត់ទោសឱ្យជាប់ពន្ធនាគារថែមទៀតពីបទធ្វើឱ្យប៉ះពាល់ដល់ព្រះមហាក្សត្រថៃ។

ការប្តឹងស្នើរំលាយគណបក្សភឿថៃនេះក៏យោងទៅលើសេចក្តីសម្រេចរបស់តុលាការធម្មនុញ្ញនៅថ្ងៃទី១៤ខែសីហាដែលរកឃើញនូវកំហុសរបស់លោក អតីតនាយករដ្ឋមន្ត្រី សេដ្ឋា ថាវីស៊ីន ដែលខ្វះនូវសុច្ចរិតភាពក្នុងការតែងតាំងលោក Phichit Chuenban ដែលជាមេធាវីប្រចាំគ្រួសារលោកថាក់ស៊ីនជាយូរមកហើយនោះ ជារដ្ឋមន្ត្រីនៃទីស្តីការគណៈរដ្ឋមន្ត្រីដោយសារតែលោកធ្លាប់មានប្រវត្តិជាប់ពន្ធនាគារ។

គណបក្សភឿថៃក៏ទំនងប្រឈមការរំលាយក្រោមតុលាការធម្មនុញ្ញថៃដែលធ្លាប់បញ្ចប់តំណែងលោក ប្រាយុធ ចាន់អូចា នៅមុនការបោះឆ្នោតសកលឆ្នាំ២០២៣ ការំលាយគណបក្ស ចលនាឆ្ពោះទៅមុខ (MFP) ការផ្អាកសកម្មភាពធ្វើនយោបាយរបស់អ្នកនយោបាយល្បីៗជាច្រើនទៀត និងចុងក្រោយគឺការដកតំណែងនាយករដ្ឋមន្ត្រី សេដ្ឋា ថាវីស៊ីននៃគណបក្សភឿថៃ ដោយគ្មានលទ្ធភាពតវ៉ា៕

The post រដ្ឋាភិបាលចម្រុះថ្មីថៃត្រៀមចេញដំណើរ ខណៈបក្សភឿថៃប្រឈមបណ្តឹងរំលាយ appeared first on Kampuchea Thmey Daily.

[វិភាគនយោបាយថៃ] រដ្ឋាភិបាលថ្មីលំបាកកើតនិងរស់ ក្រោមកណ្តាប់ដៃតុលាការធម្មនុញ្ញ

Rann Reuy — Fri, 30 Aug 2024 10:23:36 +0000

នយោបាយថៃហាក់កាន់តែកើនកម្តៅខ្លាំងឡើងៗនិងលំបាករកច្រកចេញឈានទៅបង្កើតរដ្ឋាភិបាលថ្មី ខណៈការប្រជែងសកម្មភាពនយោបាយក្នុងប្រទេសថៃកាន់តែក្តៅគគុក រួមទាំងចលនាដាក់ញត្តិឲ្យរំលាយគណបក្សភឿថៃក្រោយលោកថាក់ស៊ីនចេញធ្វើសកម្មភាពក្នុងសង្គមថៃដោយសេរីប្រកបដោយឥទ្ធិពលវិញ។

ភាពមិនចុះសម្រុងគ្នានាំទៅដល់ការបង្កើតរដ្ឋាភិបាលថ្មី ក្រោយគណបក្សភឿថៃច្រានចោលគណបក្សនយោបាយដ៏សំខាន់មួយក្នុងរដ្ឋាភិបាលចម្រុះអាណត្តិលោកសេដ្ឋា ថាវីស៊ីន គឺគណបក្ស Pralang Pacharat ចេញពីគណរដ្ឋមន្ត្រីថ្មីដែលប្រុងបង្កើតនាពេលខាងមុខដ៏ត្រដាបត្រដួសនាពេលនេះ។

បើទោះបីសមាជិកសភាកាលថ្ងៃទី១៦ខែសីហាបានបោះឆ្នោតគាំទ្រលោកស្រី ផែថងថា ស៊ីណាវ៉ាត្រា (Paetongtarn Shinawatra) ជានាយករដ្ឋមន្ត្រីបន្តពីលោក សេដ្ឋា ថាវីស៊ីន ដែលត្រូវតុលាការធម្មនុញ្ញសម្រេចដកចេញពីតំណែងកាលពីថ្ងៃទី១៤ខែសីហាក៏ដោយ ប៉ុន្តែរយៈពេល២សប្តាហ៍កន្លងមកនេះរដ្ឋាភិបាលថៃនៅតែដំណើរការក្រោមរដ្ឋាភិបាលបណ្តោះអាសន្នដឹកនាំដោយ លោក Phumtham Wechayachai ជានាយករដ្ឋមន្ត្រីស្តីទី។

លោកស្រី ផែថងថាន ពេលចុះជួយប្រជាជននៅភាគខាងជើងប្រទេស។ snipping from Khaosod

ភាពប្រទាំងប្រទើសកាន់តែខ្លាំងនៅក្នុងនយោបាយថៃនាពេលនេះ គឺបន្ទាប់ពីការចេញមុខចេញមាត់ខ្លាំងជាសាធារណៈរបស់ លោក ថាក់ ស៊ីន ស៊ីណាវ៉ាត្រា អតីតនាយករដ្ឋមន្ត្រីដែលរងការបណ្តេញចេញពីអំណាចដោយរដ្ឋប្រហារកាលខែកញ្ញាឆ្នាំ២០០៦ពេលដែលលោកដឹកនាំគណៈប្រតិភូថៃទៅប្រជុំនៅអង្គការសហប្រជាជាតិ។

ការចេញមុខមាត់របស់លោកថាក់ស៊ីន គឺបានធ្វើឡើងតែប៉ុន្មានថ្ងៃក្រោយកូនស្រីរបស់លោកជាប់ឆ្នោតក្នុងសភាដើម្បីដឹកនាំរដ្ឋាភិបាលថ្មី ដោយ លោក ថាក់ស៊ីននាពេលនោះ បានថ្លែងការណ៍យ៉ាងច្រើនជុំវិញការដាក់ចេញនូវគោលនយោបាយអភិវឌ្ឍន៍សេដ្ឋកិច្ច រួមមានការចេញប្រាក់ដល់ប្រជាពលរដ្ឋថៃចំនួន១០០០០បាតក្នុងមួយខែ ដើម្បីជំរុញកម្លាំងចំណាយក្នុងចរន្តសេដ្ឋកិច្ចជាដើម។

ការថ្លែងរបស់លោកដោយលម្អិតទៅលើសកម្មភាពគោលនយោបាយរបស់រដ្ឋាភិបាល បានធ្វើឱ្យចន្លោះប្រហោងសម្រាប់ក្រុមនយោបាយផ្ទុយគ្នា ដែលចាត់ទុកថា គណបក្សភឿថៃស្ថិតក្រោមការចាត់ចែងរបស់លោកថាក់ស៊ីនដែលនិរទេសខ្លួនជាង១៥ឆ្នាំ និងវិលចូលប្រទេសវិញកាលពីថ្ងៃទី២២ខែសីហាឆ្នាំ២០២៣ និងត្រូវទទួលរងនូវការកាត់ទោសឱ្យជាប់ពន្ធនាគារថែមទៀតពីបទធ្វើឱ្យប៉ះពាល់ដល់ព្រះមហាក្សត្រថៃ។

ការប្តឹងស្នើរំលាយគណបក្សភឿថៃនេះក៏យោងទៅលើសេចក្តីសម្រេចរបស់តុលាការធម្មនុញ្ញនៅថ្ងៃទី១៤ខែសីហាដែលរកឃើញនូវកំហុសរបស់លោក នាយករដ្ឋមន្ត្រី សេដ្ឋា ថាវីស៊ីន ដែលខ្វះនូវសុច្ចរិតភាពក្នុងការតែងតាំងលោក Phichit Chuenban ដែលជាមេធាវីប្រចាំគ្រួសារលោកថាក់ស៊ីនជាយូរមកហើយនោះ ជារដ្ឋមន្ត្រីនៃទីស្តីការគណៈរដ្ឋមន្ត្រីដោយសារតែលោកធ្លាប់មានប្រវត្តិជាប់ពន្ធនាគារ។

លោកថាក់ស៊ីន និងកូនស្រី ផែថងថាន។

ជម្លោះធំចុងក្រោយក្នុងនយោបាយថៃ គឺ លោកស្រីផែថងថាន បានច្រានចោលគណបក្ស Palang Pracharath សម្រាប់ការចូលរួមក្នុងរដ្ឋាភិបាលចម្រុះដឹកនាំដោយគណបក្សភឿថៃ ដោយសារមេដឹកនាំគណបក្ស Palang Pracharath មិនបានបោះឆ្នោតគាំទ្រលោកស្រី ផែថងថាន ធ្វើជានាយករដ្ឋមន្ត្រី។ កត្តានេះ បានធ្វើឲ្យគណបក្សភឿថៃងាកទៅរកគណបក្ស ប្រជាធិបតេយ្យ (Democrat Party) ដែលមានសមាជិកសភា២៥ មកចូលរួមជាមួយរដ្ឋាភិបាលចម្រុះវិញ។

ដោយសារការបដិសេធនេះ សមាជិកសភារបស់គណបក្ស Palang Pracharath លោក Ruengkrai Leekitwattana បានដាក់ញត្តិកាលពីថ្ងៃពុធទៅកាន់គណៈកម្មការបោះឆ្នោតដើម្បីបញ្ជាក់ពីភាពមិនគ្រប់លក្ខណៈសម្បត្តិរបស់លោកស្រីផែថងថាន ដែលកាន់កាប់ភាគហ៊ុននៅក្រុមហ៊ុនឯកជន និងទើបបានលាលែងពីក្រុមហ៊ុននៅថ្ងៃទី១៩ខែសីហាប៉ុណ្ណោះ ពោលគឺរយៈពេល៣ថ្ងៃក្រោយសមាជិកសភាបោះឆ្នោតគាំទ្រលោកស្រីធ្វើជានាយករដ្ឋមន្ត្រី។

គណបក្ស Palang Pracharath ដឹកនាំដោយឧត្តមសេនីយ៍អតីតរដ្ឋមន្ត្រីក្រសួងមហាផ្ទៃ លោក Prawit Wongsuwan ដែលជាអ្នកគាំទ្រលោកឧត្តមសេនីយ៍ ប្រាយុធ ចាន់អូចា ក្នុងការធ្វើរដ្ឋប្រហារទម្លាក់រដ្ឋាភិបាលភិបាលរបស់លោកស្រី យីងឡាក់ ស៊ីណាវ៉ាត្រាកាលឆ្នាំ២០១៤។ ដោយបង្ហាញការមិនពេញចិត្តចំពោះការដកគណបក្សនេះចេញពីរដ្ឋាភិបាលចម្រុះ លោក Samart Jaenchaijiwanich ជំនួយការលោក Prawit Wongsuwan បាននិយាយថា សមាជិកសភាមកពីគណបក្សនេះ៣៩រូបបានបោះឆ្នោតគំាទ្រលោកស្រី ផែថងថាន នៅក្នុងសភាលើកលែកតែប្រធានគណបក្សដែលមានភារកិច្ចផ្សេង ហើយគណបក្សនេះនឹងធ្វើសកម្មភាពជំទាស់គណបក្សភឿថៃ។

ក្នុងស្ថានភាពទឹកជំនន់វាយប្រហារប្រទេសថៃភាគខាងជើង ទាំងលោក ថាក់ស៊ីន ស៊ីណាវ៉ាត្រា និង លោកស្រី ផែថងថាន ស៊ីណាវ៉ាត្រា ធ្វើសកម្មភាពប្រមូលផ្តុំការជួយសង្គ្រោះនៅតំបន់រងគ្រោះ ត្រឹមនាមគណបក្សភឿថៃប៉ុណ្ណោះ មិនមែនក្នុងនាំដឹកនាំរដ្ឋាភិបាលថៃឡើយ។

គណបក្សភឿថៃក៏ទំនងប្រឈមការរំលាយក្រោមតុលាការធម្មនុញ្ញថៃដែលធ្លាប់បញ្ចប់តំណែងលោក ប្រាយុធ ចាន់អូចា នៅមុនការបោះឆ្នោតសកលឆ្នាំ២០២៣ ការំលាយគណបក្សឈ្នះឆ្នោត ចលនាឆ្ពោះទៅមុខ (MFP) ការផ្អាកសកម្មភាពធ្វើនយោបាយរបស់អ្នកនយោបាយល្បីៗជាច្រើនទៀត៕

ដោយ រ៉ាន់ រើយ

The post [វិភាគនយោបាយថៃ] រដ្ឋាភិបាលថ្មីលំបាកកើតនិងរស់ ក្រោមកណ្តាប់ដៃតុលាការធម្មនុញ្ញ appeared first on Kampuchea Thmey Daily.

នយោបាយ​ថៃ Archives - Kampuchea Thmey Daily

​នាយករដ្ឋមន្ត្រីថៃ​​ថា​នឹង​​តាម​ប្រមាញ់​​​អតីតសមាជិក​​បក្សភឿថៃ​ដែល​​សង្ស័យ​ក្នុងបទសម្លាប់​រង្គាល​

ផែថង​ថាន​ប្រើពេល​២ថ្ងៃ​​អាន​ឯកសារ​គោល​នយោបាយរដ្ឋា​​ភិបាលដល់​រដ្ឋសភាថៃ​​

ញត្តិថ្មី​ប្តឹងទៅ​​គណៈកម្មការ​​បោះឆ្នោត​ថៃ​ទាមទារ​​រំលាយ​បក្ស​ ៦ រួម​ទំាងបក្ស​ភឿថៃ​​​

នយោបាយ​ថៃ​អាប់អួ​ជាថ្មី ខណៈ​ក្រុម​អ្នក​តវ៉ា​ចាប់​ផ្តើម​​​ប្រមូលផ្តុំ​

លោកស្រីផែថងថាន​ដឹកនាំ​គណៈរដ្ឋមន្ត្រីថ្មីស្បថចូល​កាន់​តំណែង​​​

បុរសម្នាក់​ជាប់​​ទោស​ជាង​កន្លះសតវត្សរ៍​​ ពាក់ព័ន្ធ​បង្ហោះសារ​ប្រមាថ​ស្តេច​ថៃ​​

​រដ្ឋាភិបាលចម្រុះ​ថ្មី​ថៃ​ត្រៀម​ចេញដំណើរ ខណៈបក្ស​​ភឿថៃ​​ប្រឈមបណ្តឹង​រំលាយ​

​[វិភាគ​នយោបាយថៃ] រដ្ឋាភិបាលថ្មី​លំបាក​​កើត​និង​រស់ ​​ក្រោម​កណ្តាប់ដៃ​​តុលាការ​ធម្មនុញ្ញ​

នយោបាយថៃ Archives - Kampuchea Thmey Daily

នាយករដ្ឋមន្ត្រីថៃថានឹងតាមប្រមាញ់អតីតសមាជិកបក្សភឿថៃដែលសង្ស័យក្នុងបទសម្លាប់រង្គាល

ផែថងថានប្រើពេល២ថ្ងៃអានឯកសារគោលនយោបាយរដ្ឋាភិបាលដល់រដ្ឋសភាថៃ

ញត្តិថ្មីប្តឹងទៅគណៈកម្មការបោះឆ្នោតថៃទាមទាររំលាយបក្ស ៦ រួមទំាងបក្សភឿថៃ

នយោបាយថៃអាប់អួជាថ្មី ខណៈក្រុមអ្នកតវ៉ាចាប់ផ្តើមប្រមូលផ្តុំ

លោកស្រីផែថងថានដឹកនាំគណៈរដ្ឋមន្ត្រីថ្មីស្បថចូលកាន់តំណែង

បុរសម្នាក់ជាប់ទោសជាងកន្លះសតវត្សរ៍ ពាក់ព័ន្ធបង្ហោះសារប្រមាថស្តេចថៃ

រដ្ឋាភិបាលចម្រុះថ្មីថៃត្រៀមចេញដំណើរ ខណៈបក្សភឿថៃប្រឈមបណ្តឹងរំលាយ

[វិភាគនយោបាយថៃ] រដ្ឋាភិបាលថ្មីលំបាកកើតនិងរស់ ក្រោមកណ្តាប់ដៃតុលាការធម្មនុញ្ញ