លោកឧត្តមសេនីយ៍ឯក ឆាយ គឹមខឿន៖ ជនល្មើសរត់ចូលព្រៃ សមត្ថកិច្ចកំពុងប្រតិបត្តិការ

Kang Tola — Fri, 08 Jan 2021 14:25:50 +0000

លោកឧត្តមសេនីយ៍ឯក ឆាយ គឹមខឿន អ្នកនាំពាក្យអគ្គស្នងការនគរបាលជាតិបានឲ្យដឹងនៅល្ងាចថ្ងៃទី០៨ ខែមករា នេះថា មកដល់ពេលនេះ សមត្ថកិច្ចកំពុងប្រតិបត្តិការ ចំណែកជនល្មើសបានរត់ចូលព្រៃ ហើយសមត្ថកិច្ចកំពុងរកវិធីសាស្ត្រផ្សេងដើម្បីធ្វើការលើរឿងនេះ។

ការលើកឡើងរបស់លោកឧត្តមសេនីយ៍ឯក ឆាយ គឹមខឿន បានធ្វើឡើងខណៈកងកម្លាំងនគរបាលរាជធានីភ្នំពេញ សហការជាមួយកម្លាំងសមត្ថកិច្ចពាក់ព័ន្ធគ្រប់ប្រភេទកំពុងតាមស្វែងរកចាប់ខ្លួនជនសង្ស័យដៃដល់ជាឃាតកនៅខេត្តភាគឦសាន នៃប្រទេសកម្ពុជា។

សូមរំលឹកថា នៅថ្ងៃទី៣០ ខែធ្នូ ឆ្នាំ២០២០ វេលាម៉ោង១២ និង៥នាទីយប់ មានករណីឃាតកម្មផ្តើមចេញពីទំនាស់គ្រោះថ្នាក់ចរាចរណ៍នៅចំណុចមុខផ្ទះសំណាក់ សាំងហ័រទៀន លើមហាវិថីសហព័ន្ធរុស្សី ស្ថិតនៅភូមិក្បាលដំរី២ សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ បង្កឡើងដោយជនសង្ស័យចំនួន០២នាក់ ស្លៀកពាក់ស៊ីវិល ប្រដាប់ដោយអាវុធខ្លី ០១ដើម មិនស្គាល់ម៉ាក បន្សល់ទុកសំបកគ្រាប់នៅកន្លែងកើតហេតុចំនួន០៩គ្រាប់ ក្បាលគ្រាប់ចំនួន០១គ្រាប់ មធ្យោបាយធ្វើសកម្មភាពរថយន្តម៉ាក Lexus RX300 ពណ៌ខ្មៅ ពាក់ស្លាកលេខ សៀមរាប 2A-4546 មានស្នាមកំពិតដំបូលផ្នែកខាងមុខខាងស្តាំ និងរថយន្តជនរងគ្រោះម៉ាក FORD RAPTOR F150 ផលិតឆ្នាំ២០២០ ពណ៌ស ០១គ្រឿង នៅកន្លែងកើតហេតុ។

ប្រភពពីអគ្គស្នងការនគរបាលជាតិបានឲ្យដឹងថា ជនរងគ្រោះឈ្មោះ រ៉េត ស៊ីណែត ភេទប្រុស អាយុ៤១ឆ្នាំ ស្នាក់នៅផ្ទះលេខ១៦៩ ផ្លូវ១៦៩ ភូមិ៤ សង្កាត់វាលវង់ ខណ្ឌ៧មករា រាជធានីភ្នំពេញ ជានាយរងការិយាល័យនគរបាលកំរឹតស្រាលនៃស្នងការដ្ឋាននគរបាលរាជធានីភ្នំពេញ ត្រូវបានជនដៃដល់ បាញ់ពីក្រោយខ្នងចំនួន០៣គ្រាប់ ធ្លាយមកមុខ និងថ្ងាស់០១ គ្រាប់ធ្លាយមកក្រោយ។ បន្ទាប់ពីបង្កហេតុជនសង្ស័យបានបើករថយន្តគេចចេញពីកន្លែងកើតហេតុ។

សមត្ថកិច្ចចុះធ្វើស្រាវជ្រាវស្វែងរកជនសង្ស័យ នៅព្រឹកថ្ងៃដដែលសមត្ថកិច្ចបានរកឃើញរថយន្តជនសង្ស័យដែលដោះស្លាកលេខចេញ យកទៅប្លុងចោលនៅចំណុចផ្ទះគ្មានលេខ ផ្លូវ៤២ ភូមិស្វាយឧត្តម សង្កាត់ពន្សាំង ខណ្ឌព្រែកព្នៅ និងបានសាកសួរម្ចាស់ផ្ទះ ហើយឈានទៅដល់ការស្វែងរកចាប់ខ្លួនជនសង្ស័យម្នាក់ជាបក្ខពួកជនដៃដល់ដែលបានរត់គេចដល់ខេត្តបាត់ដំបង ហើយបានបញ្ជូនជនសង្ស័យរូបនេះមកកាន់ការិយាល័យនគរបាលព្រហ្មទណ្ឌកម្រិតធ្ងន់រាជធានីភ្នំពេញដើម្បីធ្វើការសាកសួរ។

ក្រោយការសាកសួរជនសង្ស័យឈ្មោះ កែ ចាន់មាន បានសារភាពថា ក្រុមខ្លួនពិតជាបានចូលរួមក្នុងសកម្មភាពបាញ់សម្លាប់ជនរងគ្រោះពិតប្រាកដមែន ដោយឈ្មោះ អ៊ា ណារ៉េន ហៅ រ៉េន ជាអ្នកបាញ់សម្លាប់ជនរងគ្រោះ។ ចំណែករូបគេជាអ្នកបើករថយន្តរត់គេចទៅលាក់ទុកនៅផ្ទះប្រជាពលរដ្ឋក្បែរភ្នំបាសិត ហើយឈ្មោះ រ៉េន ក៏បានតេទូរសព្ទបក្ខពួកម្នាក់ទៀតយកម៉ូតូមកឌុបពួកខ្លួនឆ្លងស្ពានព្រែក្តាមទៅផ្ទះសំណាក់មិនចាំយីហោដេកចំនួន០២យប់។

បន្ទាប់មកពួកគេក៏បែកគ្នារៀងៗខ្លួន ហើយរូបគេ(កែ ចាន់មាន )មកលាក់ខ្លួននៅក្នុងវត្តមួយនៃខណ្ឌព្រែកព្នៅ ០១យប់។ លុះដល់ថ្ងៃទី០២ ខែមករា ឆ្នាំ២០២១ ខ្លួនក៏បានបន្តដំណើរទៅខេត្តបាត់ដំបង ដោយស្នាក់នៅបន្ទប់ជួលម្តុំវត្តទួលតាឯក ខេត្តបាត់ដំបង ទើបនៅថ្ងៃទី ០៣ ខែមករា ឆ្នាំ២០២១ ពេលខ្លួនកំពុងដេកនៅផ្ទះជួលក៏ត្រូវបានសមត្ថកិច្ចធ្វើការឃាត់ខ្លួនតែម្តង។

សេចក្តីរាយការណ៍ឲ្យដឹងថា ជនដៃដល់បាញ់សម្លាប់នាយរងការិយាល័យព្រហ្មទណ្ឌកម្រិតស្រាលរាជធានីភ្នំពេញបានរត់គេចខ្លួនដល់ខេត្តមណ្ឌលគិរីជាមួយភរិយា ប្អូនថ្លៃនិងកូនម្នាក់។ ជនសង្ស័យបានព្យាយាមបើករថយន្តបំបុករបាំងហាមឃាត់របស់សមត្ថកិច្ចនៅក្នុងស្រុកកោះញ៉ែក កាលពីយប់ថ្ងៃទី០៤ ខែមករា ដើម្បីការទម្លាយចេញពីការឡោមព័ទ្ធ។

ឈ្មោះ រ៉េន ត្រូវគេបញ្ជាក់ថា គឺជាមន្ត្រីយោធាដែលមានអាវុធជាប់ខ្លួន និងជាមនុស្សធ្លាប់ធ្វើសកម្មភាពអំពើប្លន់បាញ់សម្លាប់ជនរងគ្រោះម្នាក់នៅក្នុងរាជធានីភ្នំពេញ និងទើបចេញពីពន្ធនាគារបាន២ឆ្នាំ។

ជុំវិញនៃអំពើឃាតកម្មបាញ់សម្លាប់នាយរងការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញនៅខណ្ឌពោធិ៍សែនជ័យ រឿងទំនាក់គ្រោះថ្នាក់ចរាចរណ៍នោះ លោកឧត្តមសនីយ៍ឯក ស ថេត អគ្គស្នងការរងនគរបាលជាតិ និង ជាស្នងការនគរបាលរាជធានីភ្នំពេញក៏បានប្រាប់គ្រួសារសពនៅក្នុងពិធីគោរពវិញ្ញាណក្ខន្ធសពលោកវរសេនីយ៍ទោ រ៉េត ស៊ីណែត ហៅញ៉ក់ កាលពីកន្លងទៅថ្មីៗនេះ នឹងប្តេជ្ញាតាមស្វែងរកចាប់ខ្លួនជាឃាតកដើម្បីយកមកផ្តន្ទាទោសតាមផ្លូវច្បាប់ឱ្យខាងតែបាន។

ចំណែកនៅព្រឹកថ្ងៃទី០៧ ខែមករា ឆ្នាំ២០២១ ជនសង្ស័យជាអ្នកបើកបររថយន្តជាប់ពាក់ព័ន្ធ នឹងអំពើឃាតកម្មបាញ់សម្លាប់នាយរងការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញនោះ ត្រូវបានការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ បញ្ជូនខ្លួនទៅតុលាការចាត់ការតាមផ្លូវច្បាប់ ហើយត្រូវបានតុលាការសម្រេចចោទប្រកាន់ពីបទសមគំនិតក្នុងអំពើឃាតកម្ម និងបទជួញដូរសារធាតុញៀន៕

ដោយ ៖ កោះកែវ

The post លោកឧត្តមសេនីយ៍ឯក ឆាយ គឹមខឿន៖ ជនល្មើសរត់ចូលព្រៃ សមត្ថកិច្ចកំពុងប្រតិបត្តិការ appeared first on Kampuchea Thmey Daily.

កម្លាំងចម្រុះរាជធានីខេត្ត កំពុងឡោមព័ទ្ធរុករកខ្មាំងកាំភ្លើងដែលបាញ់សម្លាប់នាយរងការិយាល័យព្រហ្មទណ្ឌ

Kang Tola — Wed, 06 Jan 2021 12:48:12 +0000

ស្ទឹងត្រែង ៖ នៅព្រឹកថ្ងៃទី៦ ខែមករា ឆ្នាំ២០២១ កម្លាំងសមត្ថកិច្ចចម្រុះរាជធានីខេត្តបាននឹងកំពុងឡោមព័ទ្ធរុករក ទីតាំងលាក់ខ្លួនខ្មាំងកាំភ្លើងបាញ់សម្លាប់នាយរងការិយាល័យព្រហ្មទណ្ឌកម្រិតស្រាលរាជធានីភ្នំពេញ ដែលបានគេចខ្លួនមកដល់ខេត្តស្ទឹងត្រែង។

សមត្ថកិច្ចបានឲ្យដឹងថា ខ្មាំងកាំភ្លើងក្រោយបាញ់សម្លាប់នាយរងការិយាល័យព្រហ្មទណ្ឌកម្រិតស្រាលរាជធានីភ្នំពេញ រួចបានរត់គេចខ្លួនឆ្លងកាត់ខេត្តមណ្ឌលគិរី រតនគិរី ពេលនេះបានចូលមកដល់ទឹកដីស្រុកសេសានខេត្តស្ទឹងត្រែងហើយ ព្រឹកនេះកម្លាំងសមត្ថកិច្ចចម្រុះទាំងរាជធានី និងកម្លាំងអាវុធហត្ថខេត្តស្ទឹងត្រែង កម្លាំងស្នងការដ្ឋាននគរបាលខេត្តស្ទឹងត្រែង កំពុងតែសហការគ្នាចុះឡោមព័ទ្ធដើម្បីចាប់ខ្លួនខ្មាំងកាំភ្លើង។

សមត្ថកិច្ចបន្តថា បើតាមប្រភពពីប្រជាពលរដ្ឋនៅព្រឹកថ្ងៃទី៦នេះ គេបានប្រទះឃើញជនសង្ស័យលាក់ខ្លួននៅក្នុងចម្ការមួយកន្លែងក្នុង ឃុំក្បាលរមាសមានទាំងម៉ូតូ បន្ទាប់ពីឃើញពួកគាត់ខ្មាំងកាំភ្លើងបានគេចខ្លួនរត់ចូលព្រៃបាត់។

បច្ចុប្បន្នសមត្ថកិច្ចចម្រុះកំពុងឡោមព័ទ្ធទីតាំងដែលប្រជាពលរដ្ឋប្រទះឃើញជនសង្ស័យ ដើម្បីរុករកចាប់ខ្លួនយកទៅផ្តន្ទាទោសតាមផ្លូវច្បាប់៕

ដោយ ៖ ងិនលីម

សូមចុចអាន ៖ បន្ទាន់! ខណៈពេលនេះសមត្ថកិច្ចកំពុងឡោមព័ទ្ធ ដេញប្រមាញ់ជនសង្ស័យដែលបាញ់សម្លាប់នាយរងការិយាល័យព្រហ្មទណ្ឌស្រាល

សូមចុចអាន ៖ សមត្ថកិច្ចកំពុងតាមប្រមាញ់ឃាតកបាញ់សម្លាប់នាយរងការិយាល័យព្រហ្មទណ្ឌកម្រិតស្រាល

The post កម្លាំងចម្រុះរាជធានីខេត្ត កំពុងឡោមព័ទ្ធរុករកខ្មាំងកាំភ្លើងដែលបាញ់សម្លាប់នាយរងការិយាល័យព្រហ្មទណ្ឌ appeared first on Kampuchea Thmey Daily.

នាយរង Archives - Kampuchea Thmey Daily

លោក​ឧ​ត្ត​ម​សេនីយ៍​ឯក ឆាយ គឹម​ខឿន​៖ ជនល្មើស​រត់​ចូល​ព្រៃ សមត្ថកិច្ច​កំពុង​ប្រតិបត្តិការ​

លោកឧត្តមសេនីយ៍ឯក ឆាយ គឹមខឿន៖ ជនល្មើសរត់ចូលព្រៃ សមត្ថកិច្ចកំពុងប្រតិបត្តិការ