កីឡាសិស្សបឋមសិសក្សា៖ ១២ប្រភេទកីឡាចាប់ផ្ដើមប្រកួតតាមកម្មវិធីហើយ ស្របពេលពិធីបើកធ្វើជាផ្លូវកាល្ងាចថ្ងៃទី២ ឧសភា ២០២៦

Sina Noun — Sat, 02 May 2026 06:27:48 +0000

ការប្រកួតកីឡាសិស្សបឋមសិក្សាថ្នាក់ជាតិ ឆ្នាំ២០២៦ បានចាប់ផ្ដើមដំណើរការប្រកួតទៅតាមកម្មវិធី និងពេលវេលាតាមផ្នែកកីឡារៀងៗខ្លួនហើយ ខណៈពិធីបើកការប្រកួតជាផ្លូវការធ្វើឡើងនៅល្ងាចថ្ងៃទី២ ខែឧសភា នេះនៅក្នុងវិមានពហុកីឡដ្ឋានជាតិ។

រូបភាពអគ្គនាយកដ្ឋានកីឡា

នេះបើតាមលើផេកអគ្គនាយកដ្ឋានកីឡាបញ្ជាក់ថា ព្រឹកថ្ងៃទី២ ឧសភា ២០២៦ នេះមានប្រភេទកីឡាមួយចំនួនបានចាប់ផ្ដើមប្រកួតដូចជាបាល់ទាត់ បាល់បោះ បាល់ទះ និងប្រភេទកីឡាមួយចំនួនទៀតក៏បានត្រៀមលក្ខណៈបណ្ដើរៗហើយមុនពិធីបើកធ្វើជាផ្លូវការ។

រូបភាពអគ្គនាយកដ្ឋានកីឡា

ការប្រកួតដំណើរដោយរលូន និងមានភាពអ៊ូអរតាមរយៈការមកគាំទ្រមកទស្សនាកម្សាន្ត និងលើកទឹកចិត្តដល់កុមា កុមារីនៅព្រឹកនេះ។ ដោយឡែកសម្រាប់ពិធីបើកជាផ្លូវនោះនឹងចាប់ផ្ដើមនៅល្ងាចនេះផងដែរក្រោមអធិបតីភាពថ្នាក់ដឹកនាំរបស់ក្រសួងអប់រំ យុវជន និងកីឡា។ ជាមួយគ្នានោះដែរក្នុងពិធីបើកនេះក៏មានជាការសម្ដែងផ្សេងៗពិសេសឈុតឆាកសិល្បៈដើម្បីបង្កើតបរិយាកាសរីករាយដល់អ្នកចូលរួម។

រូបភាពអគ្គនាយកដ្ឋានកីឡា

បញ្ជាក់ដែរថា ការប្រកួតកីឡាសិស្សបឋមសិក្សាថ្នាក់ជាតិ ឆ្នាំ២០២៦ នេះនឹងធ្វើឡើងចាប់ពីថ្ងៃទី១ ដល់ ៩ ខែឧសភា នៅរាជធានីភ្នំពេញ។ ១២ប្រភេទកីឡាដែរត្រូវប្រកួតប្រជែងក្នុងកម្មវិធីនេះរួមមាន បាល់ទាត់ បាល់ទះ បាល់បោះ អត្តពលកម្ម វាយសី វាយកូនឃ្លីលើតុ តេក្វាន់ដូ WT ប៊ូល និងប៉េតង់ គុនល្បក្កតោ ហែលទឹក គុនដាវ ចំបាប់ សរុបវិញ្ញាសាទាំងអស់មាន ៦២វិញ្ញសា៕

រូបភាពអគ្គនាយកដ្ឋានកីឡា

អត្ថបទដោយ៖ នួន ស៊ីណា

The post កីឡាសិស្សបឋមសិសក្សា៖ ១២ប្រភេទកីឡាចាប់ផ្ដើមប្រកួតតាមកម្មវិធីហើយ ស្របពេលពិធីបើកធ្វើជាផ្លូវកាល្ងាចថ្ងៃទី២ ឧសភា ២០២៦ appeared first on Kampuchea Thmey Daily.

សាលាបឋមសិក្សាចំនួន ៥០ នឹងត្រូវជ្រើសរើសជំហានដំបូងលើកម្មវិធីក្រៅម៉ោងសិក្សា ផ្តោតលើវិន័យ សីលធម៌ និងចរិយាធម៌

sopheak khoun — Fri, 15 Mar 2024 02:10:44 +0000

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានឲ្យដឹងថា សាលាបឋមសិក្សាចំនួន ៥០ នៅរាជធានី-ខេត្តចំនួន ៩ កំពុងត្រូវបានជ្រើសរើសសម្រាប់ការអនុវត្តជំហានដំបូង ដោយផ្ដោតលើកម្មវិធីក្រៅម៉ោងសិក្សាចំនួន ២ម៉ោងបន្ថែម ដែលរួមមានវិន័យ, សីលធម៌, ចរិយាធម៌ និងការងារស្ម័គ្រចិត្តសហគមន៍ ជាដើម។

ការឲ្យដឹងនេះ គឺនៅក្នុងពេលដែលសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអញ្ជើញដឹកនាំកិច្ចប្រជុំពេញអង្គគណៈរដ្ឋមន្ត្រី នៅព្រឹកថ្ងៃទី ១៥ ខែមីនា ឆ្នាំ ២០២៤នេះ។

នៅក្នុងកិច្ចប្រជុំនេះ សម្ដេចធិបតី ហ៊ុន ម៉ាណែត បានលើកឡើងអំពីវិធានគន្លឹះទីពីររបស់រាជរដ្ឋាភិបាល អាណត្តិទី ៧ ដែលបានដាក់ចេញពាក់ព័ន្ធនឹងការកែទម្រង់វិស័យអប់រំ។ ចំពោះកិច្ចការងារនេះ គឺរាជរដ្ឋាភិបាលបានសម្រេចបង្កើតគណៈកម្មការជាតិ ជំរុញការអភិវឌ្ឍវិធានគន្លឹះក្នុងអប់រំ កំណែទម្រង់វិស័យអប់រំ និងលេខាធិការដ្ឋានគណៈកម្មការកែទម្រង់វិស័យអប់រំ។

ម្យ៉ាងទៀត រាជរដ្ឋាភិបាលក៏បានរៀបចំក្រុមការងារ និងកំពុងអនុវត្តនីតិវិធីជ្រើសរើសសាលារៀនគោលដៅចំនួន ៥០ កម្រិតបឋមសិក្សានៅតាមបណ្ដារាជធានី-ខេត្តចំនួន ៩ សម្រាប់ការអនុវត្តជំហានដំបូងដោយផ្ដោតលើកម្មវិធីក្រៅម៉ោងសិក្សាចំនួន ២ម៉ោងបន្ថែម រួមមាន៖ វិន័យ, សីលធម៌, ចរិយាធម៌, ការងារស្ម័គ្រចិត្តសហគមន៍, ការចូលរួមពីសហគមន៍ និងវត្តអារាម។

សម្ដេចធិបតី ហ៊ុន ម៉ាណែត បានបញ្ជាក់ថា «ខ្ញុំសូមបញ្ជាក់ថា ការជ្រើសរើសមូលដ្ឋានដែលចាប់ផ្ដើមពីបឋមសិក្សានេះ គឺស្ថិតនៅក្នុងគោលដៅ និងក្នុងផែនការនៃការពង្រឹងពីថ្នាក់មត្តេយ្យរហូតដល់ថ្នាក់ទី ១២ ដែលជាមូលដ្ឋាន ប៉ុន្តែយើងដោយសារទំហំធំជាង ១ម៉ឺនសាលា យើងចាប់ផ្ដើមពីកម្រិតដែលជាមូលដ្ឋានគ្រឹះ គឺបឋមសិក្សាតែម្ដង ដែលយើងចាប់ផ្ដើមអនុវត្តគម្រោងជំហានដំបូងចំនួន ៥០បឋមសិក្សា»៕

The post សាលាបឋមសិក្សាចំនួន ៥០ នឹងត្រូវជ្រើសរើសជំហានដំបូងលើកម្មវិធីក្រៅម៉ោងសិក្សា ផ្តោតលើវិន័យ សីលធម៌ និងចរិយាធម៌ appeared first on Kampuchea Thmey Daily.

បឋមសិក្សា Archives - Kampuchea Thmey Daily