បើមិនអ្វីប្រែប្រួលនោះទេ នៅព្រឹកស្អែកនេះ ពិធីចូលកាន់តំណែងអភិបាលខេត្តថ្មី និង ស្នងការនគរបាលថ្មី នៅខេត្តមណ្ឌលគិរី គឺ លោក គង់ គឹមនី អតីតអភិបាលរងខេត្តក្រចេះ ត្រូវបានតែងតាំងជាអភិបាលខេត្តមណ្ឌលគិរី ជំនួស លោក ថង សាវុន ដែលត្រូវបានតែងតាំងជារដ្ឋលេខាធិការក្រសួងមហាផ្ទៃ។

ដោយឡែកសម្រាប់ លោកវរសេនីយ៍ឯក ជា ចិត្រា នាយការិយាល័យស៊ើបអង្កេត និង អនុវត្តនីតិវិធី នៃស្នងការដ្ឋាននគរបាលរាជធានីភ្នំពេញ ត្រូវបានតែងតាំងជាស្នងការនគរបាលថ្មី ខេត្តមណ្ឌលគិរី ជំនួស លោកឧត្តមសេនីយ៍ទោ ឡោ សុខា៕

អត្ថបទ ៖ រៀម សុខហេង

The post ព្រឹកស្អែកនេះ ប្រកាសតែងតាំង អភិបាលខេត្តថ្មី និង ស្នងការនគរបាលថ្មីខេត្តមណ្ឌលគិរី appeared first on Kampuchea Thmey Daily.

ពិធី​នេះ​ត្រូវបានតែងតាំង​លោក សិញ សេង​ហោ ជា​ប្រធាន​ទីចាត់ការ​ពន្ធដារ​រាជធានី​ភ្នំពេញ និង ប្រកាស​តែងតាំង​លោក ស៊ុន វុទ្ធី ជា​ប្រធាន​សាខា​ពន្ធដារ​ខណ្ឌ​ ៧​ មករា។

លោក ឃួង ស្រេង បាន​មានប្រសាសន៍ថា ការប្រកាស​តែងតាំង​ប្រធាន​ទីចាត់ការ​ពន្ធដារ​រាជធានី​ភ្នំពេញ និង​ប្រធាន​សាខា​ពន្ធដារ​ខណ្ឌ​ ៧​ មករា​ នាពេលនេះ​ ធ្វើឡើង​ជាធម្មតា សម្រាប់​អាជីព​មន្ត្រី​រាជការ ទៅតាម​នីតិវិធី​កំណត់​ដោយ​ច្បាប់។ ជាក់ស្តែង​ចំពោះ​ការប្រកាស​តែងតាំង​អ្នក​ទាំង​ ២ នាពេលនេះ គឺ​ដើម្បី​បន្ត​អនុវត្ត​ការងារ​កាន់តែ​ល្អ​ថែមទៀត​ក្នុង​ការ​រក​ចំណូល​ថវិកា​ពី​អ្នក​ជាប់​ពន្ធ​ចូល​ជា​ថវិកា​រដ្ឋ។

លោក ឃួ​ង ស្រេង សូមឱ្យ​ប្រធាន​ទីចាត់ការ​ពន្ធដារ​រាជធានី​ភ្នំពេញ និង​ប្រធាន​សាខា​ពន្ធដារ​ខណ្ឌ ​៧​ មករា បញ្ចេញ​ឱ្យអស់​ចំណេះដឹង ក្នុងការ​ប្រមូល​ពន្ធ កែទម្រង់​ខាងក្នុង ធានា​អភិបាលកិច្ច​ល្អ​ និង​គ្មាន​កំហុស​ឆ្គង។

លោក ឃួង ស្រេង ក៏បាន​ផ្ដាំផ្ញើ​ផងដែរ​ថា ក្នុងនាម​ជា​មន្ត្រីរាជការ បម្រើ​សេវា អ្នក​ជាប់ពន្ធ ត្រូវ​បំពេញ​ការងារ​នេះ​ឱ្យបាន​ល្អ ឱ្យបាន​លឿន ​និង​មាន​តម្លាភាព។ ត្រូវ​ដឹងខ្លួន​ថា យើង​ជា​មន្ត្រី​បម្រើ​ពលរដ្ឋ មិនមែនជា​ចៅហ្វាយ​របស់​ប្រជាពលរដ្ឋ​នោះទេ​។ បន្ថែម​ពីនេះ​ លោក ឃួ​ង ស្រេង ក៏បាន​ស្នើ​ឱ្យ​ខណ្ឌ​ទាំង​ ១៤ ​ខណ្ឌ គាំទ្រ​ជាមួយនឹង​ការសហការ​ជាមួយ​សាខា​ពន្ធដារ​រាជធានី​ភ្នំពេញ ដើម្បី​ជំរុញ​ឱ្យ​ការប្រមូល​ពន្ធពី​អ្នក​ជាប់ពន្ធបាន​រលូន​ស្របទៅតាម​ផែនការ​ដែល​បានកំណត់។

លោក គង់ វិបុល ក្នុងឱកាស​នោះ​ ក៏បាន​ថ្លែង​នូវ​ការ​អរគុណ​ចំពោះ​ប្រធាន​ទីចាត់ការ​ពន្ធ​ដារ​រាជធានី​ភ្នំពេញ និង​ប្រធាន​សាខា​ពន្ធដារ​ខណ្ឌ​ ៧ ​មករា ចាស់ ​ដែល​បាន​ខិតខំ​ប្រឹងប្រែង​យក​អស់​កម្លាំង​កាយ​ចិត្ត​ក្នុង​ការ​បំពេញ​ការងារ​បាន​យ៉ាង​ល្អជូន​អគ្គនាយកដ្ឋាន​ពន្ធដារ ,​ ក្រសួង​សេដ្ឋកិច្ច​ និង​ហិរញ្ញវត្ថុ និង​រាជរដ្ឋាភិបាល។

បន្ថែម​ពីនេះ​ លោក គង់ វិបុល បាន​ណែនាំ​ឱ្យ​ប្រធាន​ទីចាត់ការ​ពន្ធដារ​រាជធានី​ភ្នំពេញ និង​ប្រធាន​សាខា​ពន្ធដារ​ខណ្ឌ​ ៧ ​មករា​ ដែល​តែងតាំង​ថ្មី​នេះ បន្ត​កិច្ចការងារ​នេះឱ្យបាន​កាន់តែ​ល្អ ស្របតាម​វិជ្ជាជីវៈ ធ្វើជា​មន្ត្រី​ស្អាតស្អំ​របស់​រាជរដ្ឋាភិបាល មាន​សាមគ្គីភាព​ផ្ទៃ​ក្នុង​ល្អ ដោយ​មិន​ត្រូវ​មើល​រំលង​ពី​កំហុស​ឆ្គង​របស់​ខ្លួន​ឯង។ ក្នុងនាម​ជា​មន្ត្រី​បម្រើ​រាស្ត្រ ត្រូវ​បម្រើ​សេវា​ជូន​អ្នក​ជាប់​ពន្ធ​ឱ្យ​បាន​ល្អ ទាំង​ពាក្យសំដី ទាំង​ការ​ផ្តល់​សេវា​ជាដើម ឱ្យ​សម​ជា​មន្ត្រី​របស់​រាជរដ្ឋាភិបាល​ដែលមាន​ក្រម​សីលធម៌​ខ្ពស់ ក្មេង ឆ្លាត​វៃ និង​ប៉ិនប្រសព្វ៕

អត្ថបទ ៖ ស្រីរ័ត្ន

The post ប្រកាសតែងតាំងប្រធានទីចាត់ការពន្ធដាររាជធានីភ្នំពេញ និងប្រធានសាខាពន្ធដារខណ្ឌ ៧ មករា appeared first on Kampuchea Thmey Daily.

ក្នុងឱកាសនោះ លោក ប៉េង​ ពោធិ៍សា បានសម្តែងនូវការស្វាគមន៍យ៉ាងកក់ក្តៅ ចំពោះវត្តមានរបស់លោករដ្ឋលេខាធិការ ដែលបានចំណាយពេលវេលាដ៏មានតម្លៃ ផ្តល់កិត្តិយស អញ្ជើញជាអធិបតីនៅក្នុងពិធីប្រកាសចូលកាន់មុខតំណែងអភិបាលរង នៃគណៈអភិបាល ខេត្តស្វាយរៀង និងបានថ្លែងនូវការអរគុណយ៉ាងជ្រាលជ្រៅចំពោះ លោក ហែម ពិសិដ្ឋ ដែលត្រូវបានផ្ទេរភារកិច្ច កាលពីពេលថ្មីៗនេះ ក្នុងអាណត្តិការងារជាអភិបាលរងខេត្តស្វាយរៀងកន្លងមក បានខិតខំយក ចិត្តទុកដាក់បំពេញការងារយ៉ាងសកម្ម និងប្រកបដោយការទទួលខុសត្រូវ ស្របតាមការបែងចែក តួនាទីភារកិច្ច របៀបរបបធ្វើការងារក្នុងជួរគណៈអភិបាលខេត្ត និងតាមការប្រគល់ភារកិច្ចពី ថ្នាក់ដឹកនាំខេត្ត ចូលរួមចំណែកធ្វើឱ្យរដ្ឋបាលខេត្តសម្រេចបានលទ្ធផលយ៉ាងល្អប្រសើរទាំងក្នុងកិច្ចការអភិវឌ្ឍន៍ ការកៀរគរការវិនិយោគ និងការដោះស្រាយបញ្ហាប្រឈមនានារបស់ ប្រជាពលរដ្ឋនៅមូលដ្ឋាន។

លោកអភិបាលខេត្ត បានថ្លែងនូវការអបអរសាទរ និងមានសេចក្តីសង្ឃឹម ជឿជាក់យ៉ាងមុតមាំថា លោកអភិបាលរងខេត្តថ្មី ដែលត្រូវប្រកាសចូលកាន់មុខតំណែងនៅថ្ងៃនេះ នឹងអនុវត្តតួនាទីភារកិច្ច និងការទទួលខុសត្រូវរបស់ខ្លួនប្រកបដោយការសហការ សាមគ្គីភាព និងឯកភាពផ្ទៃក្នុង និងចូលរួមចំណែកធ្វើឱ្យការអនុវត្តការងារក្នុងជួរគណៈអភិបាលខេត្ត កាន់តែមានប្រសិទ្ធភាព ដើម្បីជំរុញការអនុវត្តកម្មវិធីកំណែទម្រង់នានារបស់រាជរដ្ឋាភិបាល ជាពិសេស ការលើកកម្ពស់ការផ្តល់សេវាសាធារណៈជូនប្រជាពលរដ្ឋ និងការអភិវឌ្ឍខេត្តឱ្យកាន់តែមាន ការរីកចម្រើនប្រកបដោយបរិយាប័ន្ន និងសមធម៌សង្គម ឆ្លើយតបទៅនឹងសេចក្តីត្រូវការ និងសំណូមពរជាក់ស្តែងពិតប្រាកដរបស់ប្រជាពលរដ្ឋនៅមូលដ្ឋាន ស្របតាមកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា។

ឆ្លៀតក្នុងឱកាសនោះ ប៊ុន ហុន រដ្ឋលេខាធិការក្រសួងមហាផ្ទៃ បានណែនាំដល់ ក្រុមប្រឹក្សា និងគណៈអភិបាលខេត្ត បន្តខិតខំអនុវត្តនូវសិទ្ធិអំណាច តួនាទី និងភារកិច្ចរៀងៗខ្លួន ស្របតាមច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ និងលិខិតបទដ្ឋានគតិយុត្ត ជាធរមាន ប្រកបដោយសាមគ្គីភាពផ្ទៃក្នុង ដើម្បីធានាបាននូវគណនេយ្យភាព ប្រសិទ្ធភាពនៃការគ្រប់គ្រងកិច្ចការរដ្ឋបាល ការងារអភិវឌ្ឍមូលដ្ឋាន និងការដោះស្រាយបញ្ហាប្រឈមនៅក្នុងមូលដ្ឋាន ខេត្តស្វាយរៀង។

លោកក៏បានប្រាប់ដល់រដ្ឋបាលគ្រប់លំដាប់ថ្នាក់នៃខេត្តស្វាយរៀង ឱ្យពង្រឹងការគ្រប់គ្រងវត្តមានក្នុងការបំពេញការងាររបស់មន្ត្រីរាជការ បុគ្គលិក និងត្រូវពង្រឹងការងារតែងតាំង ការដំឡើងថ្នាក់ ឋានន្តរស័ក្តិស្របតាមច្បាប់ គោលការណ៍បែបបទ និងនីតិវិធីដែលបានកំណត់ និងចូលរួមចំណែកក្នុងអនុវត្តឱ្យទទួល បានជោគជ័យនៃវិធានគន្លឹះក្នុងកែទម្រង់រដ្ឋបាលសាធារណៈរបស់រាជរដ្ឋាភិបាល។ លើសពីនេះ រដ្ឋបាលខេត្ត ត្រូវខិតខំធ្វើការបណ្តុះបណ្តាល​កសាងសមត្ថភាពដល់មន្ត្រីរាជការគ្រប់លំដាប់ថ្នាក់ និងជំរុញលើកទឹកចិត្ត​មន្ត្រីឱ្យចូលរួមក្នុងការអភិវឌ្ឍសមត្ថភាព ជាពិសេសសមត្ថភាព ជំនាញព័ត៌មានវិទ្យា និងឌីជីថល ដើម្បីឈោងចាប់យកបច្ចេកវិទ្យាទំនើបៗ ក្នុងការអនុវត្តការងារឱ្យ កាន់តែឆាប់រហ័ស និងមានប្រសិទ្ធភាពខ្ពស់។

សូមជម្រាបជូនថា យោងអនុក្រឹត្យលេខ ៦០៩ អនក្រ.ត.ត ចុះថ្ងៃទី២២ ខែកក្កដា ឆ្នាំ២០២៥ ស្តីពីការផ្ទេរភារកិច្ចមន្ត្រីរាជការត្រូវបានផ្ទេរភារកិច្ចលោក ឌុច គន្ធា ឋានន្តរស័ក្តិឧត្តមមន្ត្រី ថ្នាក់លេខ៣ ពីអភិបាលរងនៃគណៈអភិបាល ខេត្តព្រៃវែង ឱ្យទៅកាន់មុខតំណែងជាអភិបាលរងនៃគណៈអភិបាលខេត្តស្វាយរៀង៕

The post អភិបាលខេត្តស្វាយរៀង សង្ឃឹមថា អភិបាលរងខេត្តថ្មី នឹងរួមចំណែកធ្វើឱ្យការអនុវត្តការងារកាន់តែមានប្រសិទ្ធភាព appeared first on Kampuchea Thmey Daily.

ពិធី​ប្រកាស​ចូល​កាន់​មុខ​តំណែង​អភិបាល​រង នៃ​គណៈ​អភិបាល​រាជធានីភ្នំពេញនេះបានធ្វើឡើង នៅរសៀលថ្ងៃទី២៨ ខែវិច្ឆិកា ឆ្នាំ២០២៤នេះ ក្រោមអធិបតីភាព លោកសន្តិបណ្ឌិត ចាន់ អ៊ាន រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ លោក​អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅសាលារាជធានីភ្នំពេញ។

លោកឃួង ស្រេង អភិបាលរាជធានីភ្នំពេញបានមានប្រសាសន៍លើកឡើង​ថា គណៈ​អភិបាល​រាជធានីបាលរងចំនួន១០រូបជាជំនួយការ។ ក្រុមប្រឹក្សា គណៈអភិបាលរាជធានីភ្នំពេញ មានគណនយ្យភាពទ្វេទិស ក្នុងកិច្ចការបំរើអោយផលប្រយោជន៍ប្រជាពលរដ្ឋ។

លោកឃួង ស្រេងបានបន្តថា នៅរាជធានីភ្នំពេញយើងរក្សាបានសន្តិសុខ សណ្តាប់ធ្នាប់បានយ៉ាងល្អប្រសើរ ជាមួយនឹងការបង្ក្រាប់បទល្មើសបានទាន់ពេលវេលា។ ជាក់ស្តែងនាព្រះរាជពិធីបុណ្យអុំទូកកន្លងមកថ្មីៗនេះ អាជ្ញាធររាជធានីភ្នំពេញបានចូលរួមថែរក្សាសន្តិសុខ សុវត្ថិភាពបានយ៉ាងល្អ បង្កសប្បាយភាពដល់ភ្ញៀវជាតិ អន្តរជាតិ ដោយក្នុងរយៈពេល៣ថ្ងៃនៃព្រះរាជពិធីនេះ មានភ្ញៀវជាតិ អន្តរជាតិចូលរួមរហូតដល់ជាង៦លាន៣សែននាក់ កើនឡើងជាងឆ្នាំមុន។

លោក ឃួង ស្រេងបានបន្តទៀតថា ការប្រកាសចូលកាន់មុខតំណែងរបស់មន្ត្រីរាជការនាពេលនេះ គឺជាដំណើរការជាធម្មតានៃមុខងារសាធារណៈ សម្រាប់អាជីពជាមន្ត្រីរាជការស៊ីវិល ថ្នាក់ក្រោមជាតិ ដែលតែងមានការតែងតាំង ប្រគល់ភារកិច្ច ផ្ទេរភារកិច្ច សម្រួល ភារកិច្ច ចូលនិវត្តន៍ និងការកំណត់អាណត្តិដឹកនាំក្នុងជួរគណៈអភិបាល។ ជាក់ស្តែង ថ្ងៃនេះ ក្រសួងមហាផ្ទៃ និងសាលារាជធានីភ្នំពេញ បានរៀបចំពិធីប្រកាសតែងតាំង លោកស្រី តិមា វិច្ឆិកាល នាយិការងរដ្ឋបាលសាលារាជធានីភ្នំពេញ ជាអភិបាលរង នៃគណៈអភិបាលរាជធានីភ្នំពេញ ជំនួសលោកស្រី កែវ សុខពិសី អភិបាលរងរាជធានីភ្នំពេញដែលត្រូវដល់ អាណត្តិ។

លោកឃួង ស្រេង ក្នុងឱកាសនោះ ក៏បានផ្តាំផ្ញើ​ឱ្យ​លោក​ស្រី តិមា វិច្ឆិកាលដែលត្រូវទទួលភារកិច្ចថ្មី ត្រូវបង្កើនស្មារតី យកចិត្តទុកដាក់ និងការទទួលខុសត្រូវខ្ពស់ក្នុងការបំពេញភារកិច្ច ក៏ដូចជា ត្រូវពង្រឹងកិច្ចសហប្រតិបត្តិការល្អ ជាមួយនឹង បណ្តាក្រសួង-ស្ថាប័ន អង្គភាពរដ្ឋ ទីក្រុងសម្ព័ន្ធមេត្រីភាព មន្ទីរ-អង្គភាពជំនាញ រដ្ឋបាលខណ្ឌទាំង ១៤ និងអង្គការសង្គម ស៊ីវិលទាំងអស់ ជាពិសេស ត្រូវ​ចូល​រួម​សហការ អនុវត្តការងារ ដោយឈរលើស្មារតីសាមគ្គីភាព មិត្តភាព ឯកភាពផ្ទៃក្នុង គណៈអភិបាល ក្រុមប្រឹក្សា និងមន្ត្រីក្រោមឱវាទរដ្ឋបាលរាជធានី ឱ្យកាន់តែល្អប្រសើរ ដើម្បីលើកកម្ពស់កិត្យានុភាពរបស់ រាជធានីភ្នំពេញ ហើយ​យើង​ទាំងអស់​គ្នាត្រូវចាត់ទុកថា សាមគ្គីភាពផ្ទៃក្នុង គឺជាកត្តាជ័យជំនះគ្រប់ភារកិច្ច។

លោកសន្តិបណ្ឌិត ចាន់ អ៊ាន រដ្ឋលេខាធិការក្រសួងមហាផ្ទៃ ក្នុង​ឱកាស​នោះបានមានប្រសាសន៍ កោតសរសើរចំពោះរដ្ឋបាលរាជធានីភ្នំពេញនិងកងកម្លាំងប្រដាប់អាវុធទាំងអស់ចំណុះអោយគណៈបញ្ជាការឯកភាពរដ្ឋបាលរាជធានីភ្នំពេញ ដែល​បានខិតខំអស់កម្លាំងកាយចិត្ត ស្មារតីក្នុងការរក្សាបានសន្តិសុខ សណ្តាប់ធ្នាប់ ពិសេសក្នុងព្រះរាជពិធីបុណ្យអុំទូកកន្លងមកថ្មីៗនេះ រដ្ឋបាលរាជធានីភ្នំពេញបានចូលរួមថែរក្សាសន្តិសុខ សុវត្ថិភាពបានយ៉ាងល្អរហូតទទួលបានភ្ញៀវជាតិ អន្តរជាតិ ចូលរួមសប្បាយរីករាយ ច្រើនជាងឆ្នាំមុនៗ។

ជាមួយគ្នានេះលោកសន្តិបណ្ឌិត ចាន់ អ៊ាន ក៏បានចូលរួមអបអរសាទរ ចំពោះលោកស្រី តិមា វិច្ឆិកាល ដែលត្រូវបានតែងតាំង ជាអភិបាលរង នៃគណៈអភិបាលរាជធានីភ្នំពេញ ជំនួសលោកស្រី កែវ សុខពិសី ដែលត្រូវដល់ អាណត្តិនិងផ្ទេរទៅកាន់អង្គភាពដើមវិញ។ លោកសូមអោយលោកស្រី តិមា វិច្ឆិកាល យកចិត្តទុកដាក់បំពេញភារកិច្ច ពង្រឹងកិច្ចសហប្រតិបត្តិការល្អ ដើម្បីលើកកម្ពស់កិត្យានុភាពរបស់ រាជធានីភ្នំពេញអោយមានការអភិវឌ្ឍរីកចំរើនបន្ថែមទៀត។

ក្នុង​ឱកាស​នោះ​ដែរ លោកស្រី តិមា វិច្ឆិកាល បាន​បញ្ជាក់​ថា លោក​ស្រី​បំពេញការងារនៅរដ្ឋបាលរាជធានីភ្នំពេញអស់រយៈពេល២០ឆ្នាំ រហូត​ទទួល​បាន​ការជឿទុកចិត្តពីថ្នាក់ដឹកនាំ តែងតាំងលោកស្រីជាអភិបាលរងរាជធានីភ្នំពេញ។

ជាមួយគ្នានេះលោកស្រីបានធ្វើការប្តេជ្ញាចិត្តថា នឹងខិតខំបំពេញការងារទ្វេដង អនុវត្តយ៉ាងម៉ឺងម៉ាត់ ក្នុងការធ្វើ​ឱ្យភូមិសង្កាត់មានសុវត្ថិភាព ប្រកាន់នៅគុណសម្បត្តិ ៤យ៉ាង គឺឆន្ទៈម្ចាស់ការ ភក្តីភាព មនសិការវិជ្ជាជីវៈ និងវប្បធម៌សាធារណៈ។ ប្តេជ្ញាលើកកំពស់សាមគ្គីភាពផ្ទៃក្នុង​ឱ្យបានល្អប្រសើរ ពង្រឹងសមត្ថភាព ដោយបន្តសិក្សារៀនសូត្រមួយជីវិត និងពង្រឹងការផ្តល់សេវាជូនប្រជាពលរដ្ឋ ឱ្យកាន់តែល្អថែមទៀត៕

ដោយ ៖ ស្រីរ័ត្ន

The post ប្រកាស​តែង​តាំង​អភិបាល​រងរាជធានី ជាស្ត្រីម្នាក់ ក្រោយ​ពី​បំពេញ​ការងារក្នុងរដ្ឋបាលរាជធានីបាន២០ឆ្នាំ appeared first on Kampuchea Thmey Daily.

នៅក្នុងអនុក្រឹត្យមាត្រា១ សម្រេចដូច្នេះ៖«ត្រូវបានតែងតាំងលោក លីវ វណ្ណថេង ឋានន្តរស័ក្ដិវរមន្ត្រីថ្នាក់លេខ១  ឱ្យកាន់មុខតំណែងជាអភិបាល នៃគណៈអភិបាលស្រុកល្វាឯម ខេត្តកណ្ដាល។»។

លោក លីវ វណ្ណថេង ធ្លាប់បំពេញការងារជាចៅសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ក្នុងរយៈពេលជិត៤អាណត្តិ។ កាលណោះ លោក លីវ វណ្ណថេង ទទួលបានតំណែងជាចៅសង្កាត់ព្រែកថ្មី តាមរយៈការបោះឆ្នោតពីសំណាក់ប្រជាពលរដ្ឋ។ ក្រោយបំពេញការងារជាច្រើនឆ្នាំ  នៅខែវិច្ឆិកា ឆ្នាំ២០២២ លោក លីវ វណ្ណថេង ត្រូវបានតែងតាំងជាអភិបាលរងស្រុកកៀនស្វាយខេត្តកណ្ដាល។

តំណែងជាអភិបាលស្រុកល្វាឯម របស់លោក លីវ វណ្ណថេង នាពេលនេះ គឺជំនួសលោក កន សុខកាយ ដែលរបូតតំណែងព្រោះសូកលុយ៣០ម៉ឺនដុល្លារ ទៅបុគ្គល លី សាម៉េត។

សូមរម្លឹកថា រាប់ចាប់ពីថ្ងៃទី០៩ ខែមីនា ឆ្នាំ២០២០ រហូតដល់ថ្ងៃទី០៨ ខែតុលា ឆ្នាំ២០២៤ តំណែងជាអភិបាលស្រុកល្វាឯម  ស្ថិតក្រោមដែនសមត្ថកិច្ចរបស់លោក កន សុខកាយ។ ប៉ុន្តែក្រោយ សម្ដេចតេជោ ហ៊ុន សែន ទម្លាយថា លោក កន សុខកាយ ចាញ់បោកលោក លី សាម៉េត អស់ទឹកប្រាក់៣០ម៉ឺនដុល្លារ ជាថ្នូររត់ការផ្ទេរតំណេងពីអភិបាលស្រុកល្វាឯម ទៅជាអភិបាលក្រុងអរិយក្សត្រ ពោលគឺនៅថ្ងៃទី០៨ ខែតុលា លោក កន សុខកាយ ត្រូវបានសម្ដេចធិបតី ហ៊ុន ម៉ាណែត​ នាយករដ្ឋមន្ត្រីកម្ពុជា ចេញអនុក្រឹត្យបញ្ចប់មុខតំណែងពីអភិបាលស្រុកល្វាឯម៕

ដោយ៖ង៉ិល ណារ៉ាត់

The post លោក លីវ វណ្ណថេង ក្លាយជាអភិបាលស្រុកល្វាឯម ជំនួសលោក កន សុខកាយ ដែលរបូតតំណែងព្រោះសូកលុយ លោក លី សាម៉េត ៣០ម៉ឺនដុល្លារ appeared first on Kampuchea Thmey Daily.

ពិធី​នេះ​ធ្វើឡើង​ក្រោម​អធិបតីភាព លោក​សន្តិ​បណ្ឌិត ម៉ៅ ច័ន្ទ​តារា រដ្ឋលេខាធិការ​ប្រចាំការ ក្រសួង​មហាផ្ទៃ តំណាង លោក​អភិ​សន្តិ​បណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ និង​លោក ឃួង ស្រេង អភិបាល នៃ​គណៈ​អភិបាល​រាជធានី​ភ្នំពេញ នៅ​សាលា​រាជធានី​ភ្នំពេញ។

លោក ឃួង ស្រេង មាន​ប្រសាសន៍​ថា គិត​ត្រឹម​ឆមាស​ទី ១ ឆ្នាំ ២០២៤ នេះ រចនាសម្ព័ន្ធ​អង្គការ​លេខ នៃ​សាលា​រាជធានី​ភ្នំពេញ គឺ​មាន​ទីចាត់ការ​-​អង្គភាព និង​ថ្នាក់​ប្រហាក់ប្រហែល​ចំនួន ១៣, ការិយាល័យ​ប្រជាពលរដ្ឋ​ចំនួន ១ និង​មាន​ការិយាល័យ​ចំណុះ​ចំនួន ២៣ ការិយាល័យ ដែល​មាន​មន្ត្រី​-​បុគ្គលិក​កំពុង​បម្រើ​ការងារ​សរុប​ចំនួន ១.៣៣១ នាក់ (​នារី ៣៥១ នាក់​) ក្នុង​នោះ មន្ត្រី​ក្របខ័ណ្ឌ “​ក​” ចំនួន ១៧៦ នាក់​, ក្របខ័ណ្ឌ “​ខ​” ចំនួន ៥៧ នាក់​, ក្របខ័ណ្ឌ “​គ​” ចំនួន ៤៤ នាក់ និង​បុគ្គលិក​ជាប់​កិច្ចសន្យា ចំនួន ១.០៥៤ នាក់។

លោក ឃួង ស្រេង បាន​បន្ត​ថា ក្នុង​រយៈពេល ៦ ខែ ឆ្នាំ ២០២៤ នេះ គណៈ​បញ្ជាការ​ឯកភាព​រដ្ឋបាល​រាជធានី​ភ្នំពេញ បាន​ម្ចាស់ការ​បង្ក្រាប​បទល្មើស ព្រហ្មទណ្ឌ​សរុប​បាន​ចំនួន ២៣១ ករណី ស្មើនឹង ៩២,៧៧% នៃ​ចំនួន​បទល្មើស​រួម ក្នុង​នោះ បង្ក្រាប​ជាក់ស្ដែង ២១២ ករណី ឃាត់ខ្លួន ៣០៣ នាក់ និង​បង្ក្រាប​ដោយ​ស៊ើបអង្កេត ១៩ ករណី ឃាត់ខ្លួន ៤៩ នាក់ ព្រមទាំង​បាន​បង្ក្រាប​បទល្មើស​ល្បែង​ស៊ីសង​ចំនួន ៣៣ ករណី ឃាត់ខ្លួន ១៨៨ នាក់ និង​បើក​ប្រតិបត្តិការ​បង្ក្រាប​ក្មេង​ទំនើង​-​ជន​ទំនើង ចំនួន ៤១១ ករណី ឃាត់ខ្លួន ៩១៧ នាក់។

លោក​បន្តថា រដ្ឋបាល​រាជធានី​ភ្នំពេញ បាន​និង​កំពុង​ខិតខំ​ស្ដារ កសាង និង​អភិវឌ្ឍន៍​ហេដ្ឋា​រចនា​សម្ព័ន្ធ​រូបវន្ត ដូចជា ផ្លូវថ្នល់ ប្រព័ន្ធ​ប្រឡាយ​-​លូ បណ្ដាញ​ទឹក​ស្អាត បណ្ដាញ​អគ្គិសនី​សាធារណៈ បណ្ដាញ​ទូរគមនាគមន៍ កាមេរ៉ា​សុវត្ថិភាព ការ​កែ​លម្អ​សួនច្បារ​សាធារណៈ ស្ថាបនា​ផ្លូវ​ក្រោម​ដី ស្ពាន​ឆ្លងទន្លេ និង​ស្ពាន​អាកាស ជាដើម។ តាមរយៈ​កិច្ច​ខិតខំ​ប្រឹងប្រែង​អភិវឌ្ឍន៍​ផ្នែក​ហេដ្ឋា​រចនា​សម្ព័ន្ធ​រូបវន្ត​ទាំងនេះ រាជធានី​ភ្នំពេញ បាន​និង​កំពុង​ប្រែប្រួល​មុខមាត់​ថ្មី ប្រកប​ដោយ​ភាព​ទាក់ទាញ និង​មាន​ការ​រីកចម្រើន​យ៉ាង​ខ្លាំង ដែល​បង្ហាញ​ឱ្យ​ឃើញ​តាមរយៈ​វត្តមាន​របស់ ទីក្រុង​រណប អគារ​ពាណិជ្ជកម្ម អគារ​ស្នាក់នៅ​រួម សណ្ឋាគារ និង​ខុន​ដូ​ប្រណីតៗ ត្រូវបាន​សាងសង់​ឡើងជា​បន្តបន្ទាប់ ហើយ​រាជធានី​ភ្នំពេញ បាន​ក្លាយជា​គោលដៅ​ទេសចរណ៍​ដ៏​រស់រវើក និង​ជា​គោលដៅ​វិនិយោគ​ដ៏​គាប់​ប្រសើរ​បំផុត។

លោក​បន្ត​ទៀត​ថា ការ​ប្រកាស​ចូលកាន់​មុខតំណែង​របស់​មន្ត្រីរាជការ​នេះ គឺជា​ដំណើរការ​ជា​ធម្មតា នៃ​មុខងារ​សាធារណៈ សម្រាប់​អាជីព​ជា​មន្ត្រីរាជការ​ស៊ីវិល ថ្នាក់ក្រោម​ជាតិ ដែល​តែង​មាន​ការ​តែង​តាំង ប្រគល់​ភារកិច្ច ផ្ទេរ​ភារកិច្ច សម្រួល ភារកិច្ច ចូលនិវត្តន៍ និង​ការកំណត់​អាណត្តិ​ដឹកនាំ​ក្នុង​ជួរ​គណៈ​អភិបាល។ ជាក់ស្ដែង ម្សិលមិញ​នេះ ក្រសួងមហាផ្ទៃ និង​សាលា​រាជធានី​ភ្នំពេញ បាន​រៀបចំ​ពិធី​ប្រកាស​តែងតាំង លោក សេង វណ្ណៈ នាយក​រដ្ឋបាល និង​លោក ឆាយ វីរៈ នាយករង​រដ្ឋបាល ឱ្យ​កាន់​មុខតំណែង​ជា អភិបាលរង នៃ​គណៈ​អភិបាល​រាជធានី​ភ្នំពេញ ជំនួស លោក មាន ចាន់​យ៉ា​ដា និង​លោក នួន ផារ័ត្ន ដែល​ត្រូវបាន​តែងតាំង​មុខតំណែង​ថ្មី ជា​អភិបាល ខេត្ត​ឧត្តរមានជ័យ និង​ខេត្ត​កំពង់ធំ។

ក្នុង​ឱកាស​នោះ លោក ឃួង ស្រេង ក៏បាន​ផ្ដាំផ្ញើ​ឱ្យ លោក សេង វណ្ណៈ និង​លោក ឆាយ វីរៈ ដែល​នឹង​ត្រូវ​ទទួល​ភារកិច្ច​ថ្មី ត្រូវ​បង្កើន​ស្មារតី យកចិត្តទុកដាក់ និង​ការ​ទទួលខុសត្រូវ​ខ្ពស់​ក្នុង​ការ​បំពេញ​ភារកិច្ច ក៏ដូចជា​ត្រូវ​ពង្រឹង​កិច្ច​សហ​ប្រតិបត្តិការ​ល្អ ជាមួយ​នឹង​បណ្តា​ក្រសួង​-​ស្ថាប័ន អង្គភាព​រដ្ឋ ទីក្រុង​សម្ព័ន្ធ​មេត្រីភាព មន្ទីរ​-​អង្គភាព​ជំនាញ រដ្ឋបាល​ខណ្ឌ​ទាំង ១៤ និង​អង្គការ​សង្គម​ស៊ីវិល​ទាំង​អស់ ជាពិសេស​ត្រូវ​ចូលរួម​សហការ​អនុវត្ត​ការងារ ដោយ​ឈរ​លើ​ស្មារតី​សាមគ្គីភាព មិត្តភាព ឯកភាព​ផ្ទៃក្នុង គណៈ​អភិបាល ក្រុមប្រឹក្សា និង​មន្ត្រី​ក្រោមឱវាទ​រដ្ឋបាល​រាជធានី ឱ្យ​កាន់តែ​ល្អ​ប្រសើរ ដើម្បី​លើកកម្ពស់​កិត្យានុភាព​របស់ រាជធានី​ភ្នំពេញ ហើយ​យើងទាំងអស់គ្នា​ត្រូវ​ចាត់ទុកថា សាមគ្គីភាព​ផ្ទៃក្នុង គឺជា​កត្តា​ជ័យជំនះ​គ្រប់​ភារកិច្ច។

លោក​សន្តិ​បណ្ឌិត ម៉ៅ ច័ន្ទ​តារា ក្នុងឱកាស​នោះ ក៏បាន​ធ្វើការ​ផ្ដាំផ្ញើ​ឱ្យ លោក សេង វណ្ណៈ និង​លោក ឆាយ វីរៈ ដែល​ត្រូវ​តែងតាំង​ជា​អភិបាលរង​រាជធានី ក៏ដូចជា រដ្ឋបាល​រាជធានី ខណ្ឌ សង្កាត់ បន្ត​យកចិត្តទុកដាក់​ក្នុង​ការ​បំពេញការងារ ដើម្បី​អភិវឌ្ឍន៍​រាជធានី​ភ្នំពេញ​ឱ្យ​រីកចម្រើន​បន្ថែម​ទៀត បន្ត​រក្សា​សន្តិសុខ សណ្ដាប់ធ្នាប់ កាត់បន្ថយ​ភាព​ក្រីក្រ​របស់​ប្រជាពលរដ្ឋ បន្ត​ការ​ផ្តល់​សេវា និង​ដោះស្រាយ​បញ្ហា​ប្រឈម​ជូន​ប្រជាពលរដ្ឋ​ឱ្យ​កាន់តែ​ល្អ​ប្រសើរ។ ដាក់ចេញ​ជា​វិធានការ​លុបបំបាត់ ចំពោះ​ការ​ប៉ុនប៉ង​ធ្វើឱ្យ​អសន្តិសុខ​នៅ​ក្នុង​សង្គម លុបបំបាត់​គ្រឿងញៀន ទប់ស្កាត់​ឱ្យ​បាន​ការ​ជួញដូរ​មនុស្ស​គ្រប់​ទម្រង់ បង្ក្រាប​ល្បែងស៊ីសង​គ្រប់​ប្រភេទ ជាមួយ​នឹង​ការ​ចូលរួម​ពង្រឹង​ការ​អនុវត្ត​ច្បាប់​ចរាចរណ៍​ផ្លូវគោក ដើម្បី​កាត់បន្ថយ​ឱ្យ​បាន​​គ្រោះថ្នាក់​ចរាចរណ៍។

លោក សេង វណ្ណៈ និង​លោក ឆាយ វីរៈ ក្នុង​ឱកាស​នោះដែរ បាន​ប្ដេជ្ញា​ចិត្ត​ថា នឹង​ខិតខំ​បំពេញ​ការងារ​ទ្វេដង អនុវត្ត​យ៉ាង​ម៉ឺងម៉ាត់​ក្នុង​ការ​ធ្វើ​ឱ្យ​ភូមិ-សង្កាត់​មាន​សុវត្ថិភាព ប្រកាន់​គុណសម្បត្តិ ៤ យ៉ាង គឺ ឆន្ទៈ​ម្ចាស់ការ ភក្ដីភាព មនសិការ​វិជ្ជាជីវៈ និង​វប្បធម៌​សាធារណៈ។ ប្ដេជ្ញា​សាមគ្គីភាព​ផ្ទៃក្នុង​ឱ្យ​បាន​ល្អ​ប្រសើរ និង​ការ​ពង្រឹង​ការ​ផ្តល់​សេវា​ជូន​ប្រជាពលរដ្ឋ​កាន់តែ​ល្អ​ថែមទៀត៕

អត្ថបទ ៖ ស្រីរ័ត្ន

The post ប្រកាសតែងតាំង អភិបាលរងរាជធានីភ្នំពេញ ២ រូប ជាផ្លូវការ appeared first on Kampuchea Thmey Daily.

ការប្រកាសតែងតាំងនេះ បានធ្វើឡើង នាព្រឹកថ្ងៃទី០៦ ខែកក្កដាឆ្នាំ២០២៤ ក្រោមអធិបតីភាព លោកឃួង ស្រេង សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជារាជធានីភ្នំពេញ និងលោកបណ្ឌិត អូស្មាន ហាស្សាន់ សមាជិកគណៈអចិន្ត្រៃយ៍គណៈ កម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារគណបក្ស ចុះជួយមូលដ្ឋាន ខណ្ឌប្ញស្សីកែវ នៅមជ្ឈមណ្ឌលម៉ូឌែន៥ សង្កាត់ឬស្សីកែវ ខណ្ឌឬស្សីកែវ។

ថ្លែងនាឱកាសនោះ លោក ឃួង ស្រេង បានអរគុណចំពោះសមាជិក សមាជិកា គណបក្សប្រជាជនកម្ពុជាទាំងអស់ដែលបានលះបង់អស់ កម្លាំងកាយចិត្ត ដើម្បីគណបក្សប្រជាជនកម្ពុជា និងបានបោះឆ្នោតជូនគណបក្សប្រជាជនកម្ពុជា ដែលធ្វើឱ្យគណបក្សប្រជាជនកម្ពុជា ទទួលបានជ័យជំនះ ក្នុងការដឹកនាំប្រទេសជាតិ រហូតមកដល់ពេលនេះ។ ទន្ទឹមនោះ លោកបានស្នើឱ្យ ប្រធានគណៈកម្មការគណបក្សប្រជាជនកម្ពុជា ខណ្ឌប្ញស្សីកែវ ក្នុងនាមជាប្រធានគណៈបញ្ជាការឯកភាពខណ្ឌ ត្រូវបន្តយកចិត្តទុកដាក់ ថែរក្សាសន្តិសុខ សណ្តាប់ធ្នាប់សាធារណៈ ពិសេសធ្វើយ៉ាងណាឱ្យភូមិ សង្កាត់ មានសុវត្ថិភាព។ បន្តរឹតបន្តឹងច្បាប់ចរាចរណ៍ បង្រ្កាបគ្រឿងញៀន និងល្បែងស៊ីសងខុសច្បាប់គ្រប់ប្រភេទ ទៅតាមអនុសាសន៍ណែនាំរបស់សម្ដេចបវរធិបតីហ៊ុន ម៉ាណែត នាយករដ្ឋមន្ត្រី។

បន្ថែមពីនេះ លោកក៏បានជំរុញឱ្យគណបក្សខណ្ឌ សង្កាត់ត្រូវផ្ដល់សេវាជូនប្រជាពលរដ្ឋឱ្យបានលឿន និងមានតម្លាភាព ដើម្បីឱ្យប្រជាពលរដ្ឋ គោរពស្រលាញ់ ហើយបោះឆ្នោតជូនគណបក្សប្រជាជនកម្ពុជា ដើម្បីឱ្យគណបក្សប្រជាជនកម្ពុជា មានឱកាសអភិវឌ្ឍន៍ប្រទេស សម្រេចបាននូវចក្ខុវិយ ក្លាយជាប្រទេស ដែលមានចំណូលមធ្យមកម្រិតខ្ពស់នៅឆ្នាំ២០៣០ និងក្លាយជាប្រទេសមានចំណូលខ្ពស់នៅឆ្នាំ២០៥០។ ជាមួយគ្នានោះ លោកសូមឱ្យគាំទ្រយ៉ាងពេញទំហឹងចំពោះគម្រោងព្រែកជីកហ្វូណនតេជោ ដើម្បីក្លាយជាចលនាឯកភាពជាតិតែមួយ ដោយគម្រោង “ព្រែកជីកហ្វូណនតេជោ” មិនមែនជាទ្រព្យសម្បត្តិរបស់នរណាម្នាក់នោះទេ តែជាទ្រព្យរបស់ជាតិ និងប្រជាពលរដ្ឋកម្ពុជាទាំងអស់គ្នា។ លោកថា ព្រែកជីកហ្វូណនតេជោ ជាទ្រសម្បត្តិមហាសាលសម្រាប់កម្ពុជា ដែលគ្រោងនឹងបើកការដ្ឋាននៅថ្ងៃទី០៥ សីហា ឆ្នាំ២០២៤ ខាងមុខនេះ។

ចំណែក លោក ជិន ប៊ុនធឿន បានប្តេជ្ញាចិត្ត អនុវត្តដាច់ខាត តាមសេចក្តីសម្រេចរបស់សន្និបាតគណៈកម្មាធិការកណ្តាល នៃគណបក្សប្រជាជនកម្ពុជា។ ខិតខំស្វែងយល់ក្តាប់ជាប់នូវលក្ខន្តិកៈ កម្មវិធីនយោបាយរបស់គណបក្ស គោលការណ៍សេចក្តីសម្រេច សេចក្តីណែនាំនានារបស់គណៈកម្មាធិការកណ្តាលគណបក្ស និងគណៈកម្មាធិការគណបក្សរាជធានីភ្នំពេញ ដើម្បីកំណត់ទិសដៅ ភារកិច្ច គោលការណ៍ និងវិធានការចាត់តាំងអនុវត្តឱ្យបានសមស្របតាមសភាពការណ៍។ ការពារដាច់ខាតនូវសន្តិភាព ស្ថិរភាពនយោបាយ និងទប់ស្កាត់រាល់ការប៉ុងប៉ងបង្កនូវ ភាពចលាចលក្នុងសង្គមពីសំណាក់ក្រុមជ្រុលនិយម និងមជ្ឈដ្ឋានអគតិនានា។

ព្រមទាំងប្តេជ្ញាថែរក្សាការពារនូវមរតក និងសមិទ្ធផលនានាជាប្រវត្តិសាស្ត្រដែលគណបក្ស សម្រេចបាននាពេលកន្លងមក ចូលរួមកសាងនូវសមិទ្ធផលថ្មីៗបន្ថែមទៀត ដើម្បីបម្រើដល់ផលប្រយោជន៍របស់គណបក្ស និងប្រជាជន។ យកចិត្តទុកដាក់ចុះជាប់ចលនាមហាជន សំដៅប្រមូលផ្តុំបាននូវកម្លាំងដ៏ធំទូលាយ និងចូលរួមរាល់សកម្មភាពរបស់គណបក្ស ខិតខំដឹកនាំពង្រឹងដល់គណៈកម្មាធិការគណបក្ស ដែលត្រូវបានប្រគល់ភារកិច្ចឱ្យទទួលបន្ទុកការងារនៅតាមមូលដ្ឋាន។ បង្កើនការកសាង និងពង្រឹងការងារគណបក្សអំពីនយោបាយ សតិអារម្មណ៍ ចាត់តាំង លើកកម្ពស់សមត្ថភាព គុណភាពការងារ រក្សាសាមគ្គីភាព ឯកភាពផ្ទៃក្នុង និងពង្រីកអំពើល្អ៕

អត្ថបទ៖ ស្រីរ័ត្ន

The post លោក ជិន ប៊ុនធឿន ត្រូវបានប្រកាសតែងតាំង ជាប្រធានគណៈកម្មាធិការគណបក្សប្រជាជនកម្ពុជា ខណ្ឌប្ញស្សីកែវ appeared first on Kampuchea Thmey Daily.

អ្នកឧកញ៉ា គិត ម៉េង ដែលជាអ្នកដឹកនាំប្រកបដោយចក្ខុវិស័យនៅពីក្រោយក្រុមហ៊ុន រ៉ូយាល់ គ្រុប បានថ្លែងថា៖ “ជាងបីទសវត្សរ៍មកនេះ ខ្ញុំបានកសាងក្រុមហ៊ុនរ៉ូយ៉ាល់គ្រុបឲ្យក្លាយជាក្រុមហ៊ុនពហុផលិតផលឈានមុខគេ ដែលមានម៉ាកយីហោត្រូវបានទទួលស្គាល់បំផុតនៅក្នុងប្រទេស។ ថ្ងៃនេះ ខ្ញុំមានមោទនភាពក្នុងការប្រកាសថា គិត ស៊ូឡា នឹងចូលរួមជាមួយ ក្រុមហ៊ុន រ៉ូយ៉ាល់គ្រុប”។

ក្នុងរយៈពេលប៉ុន្មានឆ្នាំកន្លងមកនេះ លោក គិត ស៊ូឡា ដែលពេលនេះមានវ័យ១៩ឆ្នាំ បានយល់ដឹងពីមុខជំនួញរបស់ក្រុមហ៊ុន និងមានសមត្ថភាពគ្រប់គ្រាន់ក្នុងឧស្សាហកម្មនេះ។ ដោយទទួលបានការអប់រំនៅសាលាអន្តរជាតិន័រប្រ៊ីដ ក្នុងប្រទេសកម្ពុជា និងបច្ចុប្បន្នកំពុងសិក្សា នៅសាលាអន្តរជាតិ Hwa Chong ដែលជាសាលាដ៏ល្បីល្បាញ មួយក្នុង ប្រទេស សិង្ហបុរី លោក ស៊ូឡា ត្រៀមខ្លួនរួចជាស្រេចក្នុងការខិតខំឲ្យអស់ពីសមត្ថភាព។ ក្នុងតួនាទីថ្មី របស់លោកជានាយកគ្រប់គ្រងផ្នែកប្រតិបត្តិការ លោកនឹងកាន់តំណែងសំខាន់នេះ ក្នុងការបង្កើតឲ្យកាន់តែមានភាពចម្រុះ និងធ្វើឲ្យចំណូលក្រុមហ៊ុនប្រសើរទ្បើងនៅក្នុងពិភពឌីជីថល។

ក្រុមហ៊ុន រ៉ូយ៉ាល់គ្រុប បង្កើតឡើងក្នុងឆ្នាំ ១៩៩១ គឺជាក្រុមហ៊ុនគ្រប់គ្រងការវិនិយោគ ជាយុទ្ធសាស្រ្តរបស់ប្រទេសកម្ពុជាហើយត្រូវបានទទួលស្គាល់ថាជាក្រុមហ៊ុនអាជីវកម្មដែលមានថាមពល និងភាពចម្រុះបំផុតរបស់ប្រទេស។ ក្រុមហ៊ុន រ៉ូយ៉ាល់គ្រុប មានបុត្រសម្ព័ន្ធអាជីវកម្ម ជាច្រើន រួមមាន ធនាគារ និងហិរញ្ញវត្ថុ ធានារ៉ាប់រង ការវិនិយោគ ទូរគមនាគមន៍ ថាមពល ការដឹកជញ្ជូន ប្រព័ន្ធផ្សព្វផ្សាយ និងការកម្សាន្ត សណ្ឋាគារ និងរមណីយដ្ឋាន ការអប់រំ ការអភិវឌ្ឍអចលនទ្រព្យ ពាណិជ្ជកម្ម និងតំបន់សេដ្ឋកិច្ចពិសេស៕

The post ឧកញ៉ា គិត ស៊ូឡា ជាកូនប្រុសអ្នកឧកញ៉ា គិត ម៉េង ត្រូវបានតែងតាំងជានាយកគ្រប់គ្រងផ្នែកប្រតិបត្តិការក្រុមហ៊ុន រ៉ូយ៉ាល់គ្រុប អន្តរជាតិ appeared first on Kampuchea Thmey Daily.