ព្រឹកស្អែកនេះ ប្រកាសតែងតាំង អភិបាលខេត្តថ្មី និង ស្នងការនគរបាលថ្មីខេត្តមណ្ឌលគិរី

នៅវេលាម៉ោង ៨ និង ៣០ នាទី ព្រឹក ថ្ងៃទី ២៨ ខែឧសភា ឆ្នាំ ២០២៦ លោក គង់ គឹមនី និង លោកវរសេនីយ៍ឯក ជា ចិត្រា ត្រូវបានប្រកាសតែងតាំងរួមគ្នាជាអភិបាលខេត្តថ្មី និង ស្នងការនគរបាលថ្មីខេត្តមណ្ឌលគិរី ក្រោមអធិបតីភាព លោកឧបនាយករដ្ឋមន្រ្តី ស សុខា រដ្ឋមន្រ្តីក្រសួងមហាផ្ទៃ និង លោក ស ថេត អគ្គស្នងការនគរបាលជាតិ ដែលប្រព្រឹត្តទៅនៅសាលាខេត្តមណ្ឌលគិរី។

បើមិនអ្វីប្រែប្រួលនោះទេ នៅព្រឹកស្អែកនេះ ពិធីចូលកាន់តំណែងអភិបាលខេត្តថ្មី និង ស្នងការនគរបាលថ្មី នៅខេត្តមណ្ឌលគិរី គឺ លោក គង់ គឹមនី អតីតអភិបាលរងខេត្តក្រចេះ ត្រូវបានតែងតាំងជាអភិបាលខេត្តមណ្ឌលគិរី ជំនួស លោក ថង សាវុន ដែលត្រូវបានតែងតាំងជារដ្ឋលេខាធិការក្រសួងមហាផ្ទៃ។

ដោយឡែកសម្រាប់ លោកវរសេនីយ៍ឯក ជា ចិត្រា នាយការិយាល័យស៊ើបអង្កេត និង អនុវត្តនីតិវិធី នៃស្នងការដ្ឋាននគរបាលរាជធានីភ្នំពេញ ត្រូវបានតែងតាំងជាស្នងការនគរបាលថ្មី ខេត្តមណ្ឌលគិរី ជំនួស លោកឧត្តមសេនីយ៍ទោ ឡោ សុខា៕

អត្ថបទ ៖ រៀម សុខហេង