ប្រទេសឈូងសមុទ្រពែរ្ស Archives - Kampuchea Thmey Daily

ប្រទេសនៅឈូងសមុទ្រទាមទារសំណងពីអ៊ីរ៉ង់ដែលវាយប្រហារក្នុងជម្លោះជាមួយអាមេរិក

Minea Neu — Thu, 26 Mar 2026 03:06:42 +0000

មន្ត្រីនៃប្រទេសក្នុងតំបន់ឈូងសមុទ្រពែរ្ស បានប្រាប់ក្រុមប្រឹក្សាសិទ្ធិមនុស្សនៃអង្គការសហប្រជាជាតិ (UN) ថា ការវាយប្រហាររបស់អ៊ីរ៉ង់ទៅលើប្រទេសរបស់ពួកគេស្មើនឹងការរំលោភបំពានយ៉ាងធ្ងន់ធ្ងរលើអធិបតេយ្យភាពរបស់រដ្ឋទាំងអស់ដែលទទួលរងការប៉ះពាល់ ដោយទាមទារសំណងពេញលេញ ខណៈសង្គ្រាមរវាងសហរដ្ឋអាមេរិក និងអ៊ីស្រាអែលលើអ៊ីរ៉ង់ខិតជិតចូល១ខែទៅហើយ។

យោងតាម Al Jazeera ផ្សាយថ្ងៃទី២៥ខែមីនា ឆ្នាំ២០២៦ លោក Abdulmohsen Majed bin Khothaila តំណាងប្រទេសអារ៉ាប៊ីសាអូឌីតប្រចាំអង្គការសហប្រជាជាតិ បានថ្កោលទោសការវាយប្រហាររបស់អ៊ីរ៉ង់ អំឡុងពេលនៃកិច្ចប្រជុំបន្ទាន់មួយនៅទីក្រុងហ្សឺណែវនៅថ្ងៃពុធ ដោយនិយាយថា៖ «រដ្ឋជាសមាជិកក្រុមប្រឹក្សាសហប្រតិបត្តិការឈូងសមុទ្រ (GCC) កំពុងរងការវាយប្រហារ ទោះបីជាមិនពាក់ព័ន្ធនឹងជម្លោះក៏ដោយ»។

លោក Antonio Guterres gestures ប្រធានអង្គការសហប្រជាជាតិ។ រូបភាព៖ Reuters

លោកបន្តថា៖ «ការវាយប្រហាររបស់អ៊ីរ៉ង់ បានរំលោភលើធម្មនុញ្ញអង្គការសហប្រជាជាតិ និងច្បាប់អន្តរជាតិនានា។ ការកំណត់គោលដៅលើប្រទេសជិតខាងគឺជាការរំលោភលើគោលការណ៍នៃទំនាក់ទំនងល្អជាមួយប្រទេសជិតខាង។ […] ការកំណត់គោលដៅចំពោះរដ្ឋដែលមិនមែនជាភាគីនៃអរិភាពគឺជាការវាយប្រហារដែលមិនអាចទទួលយកបាន និងមិនអាចប្រកែកបាន ហើយមិនត្រូវស្ងៀមស្ងាត់ពីរឿងនេះនោះទេ»។

គួរបញ្ជាក់ថា ក្រុមប្រឹក្សាសិទ្ធិមនុស្សនៃកិច្ចប្រជុំនោះមានសមាជិក ៤៧ រូប បានគាំទ្រសេចក្តីសម្រេចមួយដាក់ចេញដោយ GCC និងហ្ស៊កដានី ដោយថ្កោលទោសចំពោះសកម្មភាពរបស់ទីក្រុងតេហេរ៉ង់ដែលមានគោលបំណងបិទច្រកសមុទ្រ Hormuz ។

សេចក្តីសម្រេចខាងលើមានគោលបំណងទាមទារឱ្យអ៊ីរ៉ង់បញ្ឈប់ការវាយប្រហារដោយចេតនានិងដោយការសងសឹកទាំងអស់ជាបន្ទាន់ ជាពិសេសប្រទេសទាំងអស់នោះបានអំពាវនាវឱ្យមានសំណងពេញលេញ ហើយរហ័សបំផុតតាមដែលអាចធ្វើទៅបាន ដល់ជនរងគ្រោះទាំងអស់នៃការវាយប្រហាររបស់អ៊ីរ៉ង់។

មិនតែប៉ុណ្ណោះសម័យប្រជុំកាលថ្ងៃពុធ នៅទីក្រុងហ្សឺណែវបានកើតឡើង ខណៈការវាយប្រហាររបស់សហរដ្ឋអាមេរិក-អ៊ីស្រាអែលលើអ៊ីរ៉ង់នៅតែបន្ត។

អ៊ីរ៉ង់នៅតែបន្តវាយប្រហារដោយមីស៊ីល និងដ្រូននៅទូទាំងមជ្ឈិមបូព៌ា ចំពេលមានការសម្របសម្រួលដោយអន្តរជាតិកាន់តែខ្លាំងឡើង ដើម្បីបញ្ចប់ជម្លោះដ៏សាហាវនេះ៕

ប្រែសម្រួល៖ ណឺ មិនា

The post ប្រទេសនៅឈូងសមុទ្រទាមទារសំណងពីអ៊ីរ៉ង់ដែលវាយប្រហារក្នុងជម្លោះជាមួយអាមេរិក appeared first on Kampuchea Thmey Daily.

អឺរ៉ុបគាំទ្រប្រទេសនានាក្នុងឈូងសមុទ្រឆ្លើយតបការពារខ្លួន ពេលអ៊ីរ៉ង់បាញ់មីស៊ីលដាក់

Minea Neu — Fri, 06 Mar 2026 07:09:08 +0000

បណ្តាមេដឹកនាំសហភាពអឺរ៉ុបសម្តែងការគាំទ្រ ចំពោះប្រទេសក្នុងឈូងសមុទ្រអារ៉ាប់ឱ្យការពារខ្លួន ខណៈអ៊ីរ៉ង់បន្តបាញ់មីស៊ីលនិងយន្តហោះគ្មានមនុស្សបើក (ដ្រូន) ទៅកាន់គោលដៅនានាទូទាំងតំបន់សងសឹកទៅនឹងការវាយប្រហាររបស់សហរដ្ឋអាមេរិក និងអ៊ីស្រាអែល។

មេដឹកនាំអឺរ៉ុប។ រូបភាព៖ Reuters

យោងតាម Al Jazeera ចុះផ្សាយថ្ងៃទី០៥ខែមីនា ឆ្នាំ២០២៦, លោកស្រី Kaja Kallas ប្រធានគោលនយោបាយការបរទេសសហភាពអឺរ៉ុប និងមេដឹកនាំអឺរ៉ុបដទៃទៀត បានជួបពិភាក្សាជាមួយមន្ត្រីក្រុមប្រឹក្សាសហប្រតិបត្តិការឈូងសមុទ្រ (GCC) នៅថ្ងៃព្រហស្បតិ៍ ក្នុងទីក្រុងព្រុចសែល ដោយថ្កោលទោសការវាយប្រហាររបស់អ៊ីរ៉ង់ ប្រឆាំងនឹងប្រទេសនានាក្នុងឈូងសមុទ្រ។

មេដឹកនាំអឺរ៉ុប បានលើកឡើងក្នុងសេចក្តីថ្លែងការណ៍រួមគ្នា EU-GCC ថា៖ «ពួកយើងថ្កោលទោសយ៉ាងខ្លាំងចំពោះការវាយប្រហាររបស់អ៊ីរ៉ង់ដែលមិនសមហេតុផលប្រឆាំងនឹងប្រទេសក្នុងឈូងសមុទ្រ GCC គំរាមកំហែងដល់សន្តិសុខក្នុងតំបន់ និងពិភពលោក។ យើងសូមអំពាវនាវឱ្យអ៊ីរ៉ង់បញ្ឈប់ការវាយប្រហារជាបន្ទាន់»។

សេចក្តីថ្លែងការណ៍នេះបានបញ្ជាក់ជាថ្មីថា៖ «ប្រទេសក្នុងឈូងសមុទ្រមានសិទ្ធិចាត់វិធានការចាំបាច់ទាំងអស់ ដើម្បីការពារសន្តិសុខ និងស្ថិរភាពរបស់ខ្លួន ការពារទឹកដី ប្រជាពលរដ្ឋ និងអ្នកស្រុករបស់ពួកគេ»។

សារព័ត៌មាន Al Jazeera រាយការណ៍ពីរដ្ឋធានីបែលហ្ស៊ិកថា៖ «សារដែលចេញពីកិច្ចពិភាក្សារបស់អឺរ៉ុបគឺត្រៀមខ្លួនជួយសម្ព័ន្ធមិត្តរបស់ខ្លួននៅក្នុងឈូងសមុទ្រ ប៉ុន្តែក៏ចង់បានដំណោះស្រាយអាចសម្របសម្រួលបាន និងជម្រុញការបន្ធូរបន្ថយភាពតានតឹងផងដែរ»។

លោកស្រី Kaja Kallas ប្រធានគោលនយោបាយការបរទេសសហភាពអឺរ៉ុប! រូបភាព៖ Reuters

កិច្ចប្រជុំនេះបានកើតឡើង ចំពេលមានការព្រួយបារម្ភខ្លាំងឡើងពីផលវិបាកកាន់តែធំឡើងនៃការវាយប្រហាររបស់សហរដ្ឋអាមេរិក-អ៊ីស្រាអែលលើអ៊ីរ៉ង់ សម្លាប់មនុស្សយ៉ាងហោចណាស់ ១ ២៣០នាក់ ចាប់តាំងពីថ្ងៃសៅរ៍ នេះបើយោងតាមប្រព័ន្ធផ្សព្វផ្សាយរដ្ឋអ៊ីរ៉ង់។

គួរបញ្ជាក់ថា បណ្តាប្រទេសនៅអឺរ៉ុបត្រូវបានទាញចូលក្នុងជម្លោះកំពុងរីករាលដាលកាន់តែខ្លាំងឡើង ដោយប្រទេសបារាំង និងចក្រភពអង់គ្លេសកាលពីថ្ងៃពុធបានប្រកាសពីផែនការបញ្ជូននាវាចម្បាំង និងសម្ភារៈយោធាផ្នែកការពារដែនអាកាសទៅកាន់ប្រទេសស៊ីប៕

ប្រែសម្រួល៖ ណឺ មិនា

The post អឺរ៉ុបគាំទ្រប្រទេសនានាក្នុងឈូងសមុទ្រឆ្លើយតបការពារខ្លួន ពេលអ៊ីរ៉ង់បាញ់មីស៊ីលដាក់ appeared first on Kampuchea Thmey Daily.

ថៃសម្លឹងកិច្ចព្រមព្រៀងពាណិជ្ជកម្មសេរីជាមួយប្រទេសឈូងសមុទ្រពែរ្ស

Huon Dina — Fri, 21 Feb 2025 03:12:59 +0000

ថៃកំពុងសម្លឹងមើលលើកិច្ចព្រមព្រៀងពាណិជ្ជកម្មសេរី (FTA) ជាមួយបណ្ដាប្រទេសនៅឈូងសមុទ្រពែរ្ស ដើម្បីជំរុញពាណិជ្ជកម្ម ទេសចរណ៍ និងការវិនិយោគ។ នេះបើតាមការចុះផ្សាយរបស់កាសែតបាងកកប៉ុស្តិ៍។

ប្រធានតំណាងពាណិជ្ជកម្មថៃ លោកស្រី Nalinee Taveesin បានលើកឡើងថា បណ្តាប្រទេសឈូងសមុទ្រពែរ្សគឺជាទីផ្សារដ៏សំខាន់បំផុតរបស់ថៃនៅតំបន់មជ្ឈិមបូព៌ា។

កាលពីឆ្នាំមុន ពាណិជ្ជកម្មរវាងភាគីទាំង២ មានទំហំសរុបប្រហែល ៣៦ ប៊ីលានដុល្លារ។ លោកស្រី Nalinee បាននិយាយថា ពាណិជ្ជកម្មក្រៅប្រេង និងឧស្ម័នធម្មជាតិ បានកើនឡើងជិត ១០ ភាគរយ ហើយវានៅតែបន្តបង្ហាញពីនិន្នាការវិជ្ជមាន។

បើតាមបាងកកប៉ុស្តិ៍ លោកស្រី Nalinee បានជួបជាមួយអគ្គលេខាធិការនៃក្រុមប្រឹក្សាសហប្រតិបត្តិការឈូងសមុទ្រពែរ្ស (GCC) លោក Jasem Mohamed Albudaiwi កាលពីថ្ងៃពុធ ហើយភាគីទាំង ២ បានព្រមព្រៀងគ្នាថា ថៃ និង GCC គួរតែចែករំលែកទំនាក់ទំនងជិតស្និទ្ធលើគ្រប់ទិដ្ឋភាព និងផ្លាស់ប្តូរជំនាញគ្នា។

លោកស្រី Nalinee បានស្នើឱ្យប្រទេសថៃ និង GCC ផ្តោតលើកិច្ចសហប្រតិបត្តិការក្នុងវិស័យទេសចរណ៍ ជាពិសេសទេសចរណ៍សុខភាព សន្តិសុខស្បៀង និងថាមពលទន់ ដែលជាវិស័យជំនាញរបស់ថៃ។ ភាគីទាំង ២ បានពិភាក្សាអំពីកាលានុវត្តភាព និងដំណើរការចរចា FTA ជាពិសេសការបង្កើតអនុស្សរណៈយោគយល់គ្នា៕

The post ថៃសម្លឹងកិច្ចព្រមព្រៀងពាណិជ្ជកម្មសេរីជាមួយប្រទេសឈូងសមុទ្រពែរ្ស appeared first on Kampuchea Thmey Daily.

ប្រទេស​ឈូងសមុទ្រពែរ្ស Archives - Kampuchea Thmey Daily

ប្រទេស​នៅ​ឈូង​សមុទ្រ​ទាម​ទារ​សំណង​ពី​អ៊ីរ៉ង់​ដែល​វាយប្រហារ​​​ក្នុងជម្លោះជាមួយអាមេរិក​​

ថៃ​សម្លឹង​កិច្ចព្រមព្រៀងពាណិជ្ជកម្មសេរីជាមួយ​ប្រទេស​ឈូងសមុទ្រពែរ្ស

ប្រទេសឈូងសមុទ្រពែរ្ស Archives - Kampuchea Thmey Daily

ប្រទេសនៅឈូងសមុទ្រទាមទារសំណងពីអ៊ីរ៉ង់ដែលវាយប្រហារក្នុងជម្លោះជាមួយអាមេរិក

ថៃសម្លឹងកិច្ចព្រមព្រៀងពាណិជ្ជកម្មសេរីជាមួយប្រទេសឈូងសមុទ្រពែរ្ស