ព័ត៌មានអន្ដរជាតិ

អឺរ៉ុបគាំទ្រប្រទេសនានាក្នុងឈូងសមុទ្រឆ្លើយតបការពារខ្លួន ពេលអ៊ីរ៉ង់បាញ់មីស៊ីលដាក់

បានផុស

៣ ខែ មុន

នៅ

ថ្ងៃសុក្រ ៦ មីនា ២០២៦

ដោយ

បណ្តាមេដឹកនាំសហភាពអឺរ៉ុបសម្តែងការគាំទ្រ ចំពោះប្រទេសក្នុងឈូងសមុទ្រអារ៉ាប់ឱ្យការពារខ្លួន ខណៈអ៊ីរ៉ង់បន្តបាញ់មីស៊ីលនិងយន្តហោះគ្មានមនុស្សបើក (ដ្រូន) ទៅកាន់គោលដៅនានាទូទាំងតំបន់សងសឹកទៅនឹងការវាយប្រហាររបស់សហរដ្ឋអាមេរិក និងអ៊ីស្រាអែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម Al Jazeera ចុះផ្សាយថ្ងៃទី០៥ខែមីនា ឆ្នាំ២០២៦, លោកស្រី Kaja Kallas ប្រធានគោលនយោបាយការបរទេសសហភាពអឺរ៉ុប និងមេដឹកនាំអឺរ៉ុបដទៃទៀត បានជួបពិភាក្សាជាមួយមន្ត្រីក្រុមប្រឹក្សាសហប្រតិបត្តិការឈូងសមុទ្រ (GCC) នៅថ្ងៃព្រហស្បតិ៍ ក្នុងទីក្រុងព្រុចសែល ដោយថ្កោលទោសការវាយប្រហាររបស់អ៊ីរ៉ង់ ប្រឆាំងនឹងប្រទេសនានាក្នុងឈូងសមុទ្រ។

មេដឹកនាំអឺរ៉ុប បានលើកឡើងក្នុងសេចក្តីថ្លែងការណ៍រួមគ្នា EU-GCC ថា៖ «ពួកយើងថ្កោលទោសយ៉ាងខ្លាំងចំពោះការវាយប្រហាររបស់អ៊ីរ៉ង់ដែលមិនសមហេតុផលប្រឆាំងនឹងប្រទេសក្នុងឈូងសមុទ្រ GCC គំរាមកំហែងដល់សន្តិសុខក្នុងតំបន់ និងពិភពលោក។ យើងសូមអំពាវនាវឱ្យអ៊ីរ៉ង់បញ្ឈប់ការវាយប្រហារជាបន្ទាន់»។

សេចក្តីថ្លែងការណ៍នេះបានបញ្ជាក់ជាថ្មីថា៖ «ប្រទេសក្នុងឈូងសមុទ្រមានសិទ្ធិចាត់វិធានការចាំបាច់ទាំងអស់ ដើម្បីការពារសន្តិសុខ និងស្ថិរភាពរបស់ខ្លួន ការពារទឹកដី ប្រជាពលរដ្ឋ និងអ្នកស្រុករបស់ពួកគេ»។

សារព័ត៌មាន Al Jazeera រាយការណ៍ពីរដ្ឋធានីបែលហ្ស៊ិកថា៖ «សារដែលចេញពីកិច្ចពិភាក្សារបស់អឺរ៉ុបគឺត្រៀមខ្លួនជួយសម្ព័ន្ធមិត្តរបស់ខ្លួននៅក្នុងឈូងសមុទ្រ ប៉ុន្តែក៏ចង់បានដំណោះស្រាយអាចសម្របសម្រួលបាន និងជម្រុញការបន្ធូរបន្ថយភាពតានតឹងផងដែរ»។

លោកស្រី Kaja Kallas ប្រធានគោលនយោបាយការបរទេសសហភាពអឺរ៉ុប! រូបភាព៖ Reuters

កិច្ចប្រជុំនេះបានកើតឡើង ចំពេលមានការព្រួយបារម្ភខ្លាំងឡើងពីផលវិបាកកាន់តែធំឡើងនៃការវាយប្រហាររបស់សហរដ្ឋអាមេរិក-អ៊ីស្រាអែលលើអ៊ីរ៉ង់ សម្លាប់មនុស្សយ៉ាងហោចណាស់ ១ ២៣០នាក់ ចាប់តាំងពីថ្ងៃសៅរ៍ នេះបើយោងតាមប្រព័ន្ធផ្សព្វផ្សាយរដ្ឋអ៊ីរ៉ង់។

គួរបញ្ជាក់ថា បណ្តាប្រទេសនៅអឺរ៉ុបត្រូវបានទាញចូលក្នុងជម្លោះកំពុងរីករាលដាលកាន់តែខ្លាំងឡើង ដោយប្រទេសបារាំង និងចក្រភពអង់គ្លេសកាលពីថ្ងៃពុធបានប្រកាសពីផែនការបញ្ជូននាវាចម្បាំង និងសម្ភារៈយោធាផ្នែកការពារដែនអាកាសទៅកាន់ប្រទេសស៊ីប៕

ប្រែសម្រួល៖ ណឺ មិនា