ផលិតកម្មម្រេច Archives - Kampuchea Thmey Daily

កសិដ្ឋាន សុធី ដាំម្រេច កែច្នៃជាកាហ្វេ ស្រា និងតែ

deth leng — Thu, 13 Mar 2025 01:51:43 +0000

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅរសៀលថ្ងៃទី ១២ ខែមីនា ឆ្នាំ ២០២៥ បានចុះទស្សនកិច្ចនៅកសិដ្ឋានប៊េប៊ី-ប៊ើត (Babybird Farm) ស្ថិតនៅភូមិដំណាក់ចង្អើរ សង្កាត់ព្រៃធំ ក្រុងកែប និងចំការម្រេច សុធី ស្ថិតនៅភូមិអន្ទង់ស ឃុំពងទឹក ស្រុកដំណាក់ចង្អើរ ខេត្តកែប។

កសិដ្ឋានប៊េប៊ី-ប៊ើត មានផ្ទៃដីដាំដុះប្រមាណ ៩០ហិកតាផ្តោតលើដំណាំឈើហូបផ្លែក្រូចជាង១០ប្រភេទ ដើមប័រ ដូង ជាពិសេសដំណាំម្រេច និងម្ទេសជាង២០ប្រភេទ ជាប្រភេទ(Caribbean Chili & Carolina Reaper) និងចិញ្ចឹមសត្វគោផងដែរ។

លោករដ្ឋមន្រ្តី ឌិត ទីណា បានផ្តល់អនុសាសន៍ដល់ម្ចាស់កសិដ្ឋានសហការជាមួយមន្ទីរកសិកម្មខេត្ត និងមន្រ្តីជំនាញ ដើម្បីទទួលបានការគាំទ្រផ្នែកបច្ចេកទេស និងយល់ដឹងពីនីតិវិធីនាំចេញ ធ្វើយ៉ាងណាជំរុញការនាំចេញកសិផលដែលមានស្រាប់ ទៅកាន់ទីផ្សារអន្តរជាតិប្រកបដោយគុណភាពល្អ និងមានតម្លៃខ្ពស់។

បន្ទាប់មកលោករដ្ឋមន្ត្រី បានបន្តចុះទស្សនកិច្ចចំការម្រេច សុធី ដែលជាកន្លែងអំណោយផលដល់កសិ-ទេសចរណ៍ ក្នុងការទទួលបានដំណើរទេសចរណ៍បែបបៃតង និងទទួលបានផលិតផលម្រេចដែលមានគុណភាព សម្រាប់ភ្ញៀវបរទេសផងដែរ។

លោករដ្ឋមន្ត្រី បានកោតសរសើរដល់ម្ចាស់កសិដ្ឋានដែលបានខិតខំដាំដុះដំណាំម្រេចបានយ៉ាងល្អ មានគុណភាពខ្ពស់ និងមានផែនការថែទាំត្រឹមត្រូវ សំដៅបំពេញតម្រូវការទីផ្សារអន្តរជាតិ និងបានកែច្នៃបន្ថែមក្នុងការផលិតជា តែម្រេច កាហ្វេម្រេច និងស្រាម្រេច ដើម្បីទទួលបានតម្លៃបន្ថែមកាន់តែខ្ពស់ថែមទៀត។

លោករដ្ឋមន្រ្តី ឌិត ទីណាក៏បានណែនាំឱ្យបន្តការងារនេះបន្ថែមទៀត ដោយម្រេចជាដំណាំសក្តានុពល និងជាដំណាំសម្គាល់ភូមិសាស្រ្ត ដែលទាមទារឱ្យមានការចូលរួមទាំងអស់គ្នា និងមានរបៀបនៃការធ្វើដោយត្រឹមត្រូវ ដើម្បីចូលទៅកាន់ទីផ្សារអន្តរជាតិប្រកបដោយគុណភាពល្អ និងមានតម្លៃខ្ពស់។

នៅក្នុងឆ្នាំ ២០២៤ ផលិតកម្មម្រេចនៅកម្ពុជាសម្រេចបានប្រមាណ ៩ ០០០ តោន ធ្លាក់ចុះពី ៤០-៥០ ភាគរយ បើធៀបនឹងឆ្នាំ ២០២៣ ប៉ុន្តែតម្លៃម្រេចបែរជាមានភាពល្អប្រសើរពោលគឺកើនឡើងទ្វេដងដែលមានតម្លៃ ២ ម៉ឺន ៤ ពាន់រៀលក្នុងមួយគីឡូក្រាម។ នេះបើយោងតាមរបាយការណ៍របស់សមាគមសហព័ន្ធម្រេច និងគ្រឿងទេសកម្ពុជា។

បើតាមលោក ម៉ាក់ នី ការនាំចេញម្រេចកម្ពុជាជាផ្លូវការសម្រេចបានប្រមាណ ៦ ពាន់តោន នៅក្នុងឆ្នាំ ២០២៤ ខណៈនៅមានការនាំចេញក្រៅផ្លូវការមួយចំនួនទៀត។

យោងតាមក្រសួងពាណិជ្ជកម្ម គិតត្រឹមរយៈពេល ១១ ខែ ឆ្នាំ ២០២៤ កម្ពុជារកចំណូលបានជាង ៣៤ លានដុល្លារ ពីការនាំចេញម្រេច កើនឡើងជិត ១៥០% បើធៀបនឹងរយៈពេលដូចគ្នាក្នុងឆ្នាំ ២០២៣៕

default

The post កសិដ្ឋាន សុធី ដាំម្រេច កែច្នៃជាកាហ្វេ ស្រា និងតែ appeared first on Kampuchea Thmey Daily.

ផលិតកម្មម្រេចកម្ពុជាធ្លាក់ចុះ ៥០% តែតម្លៃកើនឡើងទ្វេដង

deth leng — Thu, 06 Feb 2025 09:13:04 +0000

លោក ម៉ាក់ នី ប្រធានសមាគមសហព័ន្ធម្រេច និងគ្រឿងទេសកម្ពុជា (CPSF) ប្រាប់កម្ពុជាថ្មីនៅថ្ងៃទី ០៦ ខែកុម្ភៈ ឆ្នាំ ២០២៥នេះថា អនុវិស័យម្រេចបានជួបប្រទះនឹងបញ្ហាប្រឈមមួយចំនួននៅក្នុងរយៈពេល ២ ឆ្នាំកន្លងមកនេះ ដូចជាបញ្ហាអាកាសធាតុក្តៅ និងមានរយៈពេលវែង, តម្លៃជីថ្នាំថ្លៃ ការបន្លំគុណភាពជីថ្នាំ និងបច្ចេកទេសដាំដុះថែទាំរបស់កសិករភាគច្រើននៅមានកំរិត ខណៈទីផ្សារនាំចេញភាគច្រើនពឹងលើវៀតណាម មានក្រុមហ៊ុនប្រមូលទិញតិចតួច។

លោក ម៉ាក់ នី សង្ឃឹមថា នៅឆ្នាំ ២០២៥ ទិន្នផលម្រេចនឹងមានការកើនឡើង ប៉ុន្តែមានម្រេចមួយចំនួនបានងាប់ដោយសារអាកាសធាតុក្ដៅ។

លោក ម៉ាក់ នី សង្ឃឹមថា ក្រុមហ៊ុននាំចេញអាចនាំចេញទៅចិនបានច្រើនជាងឆ្នាំមុនហើយទីផ្សារផ្សេងៗក្រៅពីវៀតណាមនឹងមានការកើនឡើងផងដែរតាមរយៈការស្វែងរកអ្នកទិញក្រៅប្រទេសរបស់ក្រុមហ៊ុននាំចេញ។

យោងតាមក្រសួងពាណិជ្ជកម្ម គិតត្រឹមរយៈពេល ១១ ខែ ឆ្នាំ ២០២៤ កម្ពុជារកចំណូលបានជាង ៣៤ លានដុល្លារ ពីការនាំចេញម្រេច កើនឡើងជិត ១៥០% បើធៀបនឹងរយៈពេលដូចគ្នាក្នុងឆ្នាំ ២០២៣។

តម្លៃម្រេចធម្មតានៅកម្ពុជាបានហក់ឡើងទ្វេដងរហូតដល់ជិត ៣ ម៉ឺនរៀលក្នុងមួយគីឡូក្រាម បើធៀបនឹងតម្លៃក្នុងឆ្នាំ ២០២៣ ដែលលក់បានត្រឹមជាង ១ ម៉ឺនរៀលក្នុងមួយគីឡូក្រាម។ ជាទូរទៅនៅក្នុងមួយឆ្នាំកម្ពុជាប្រមូលផលម្រេចបានក្នុងរង្វង់ ១,៧-២ ម៉ឺនតោនលើផ្ទៃដីជាង ៦ ពាន់ហិកតា។

ទីផ្សារម្រេចកម្ពុជា ត្រូវបាននាំទៅកាន់ប្រទេសវៀតណាមប្រមាណ ៨០ ភាគរយ និងប្រទេសបន្ទាប់បន្សំដូចជា ចិន តៃវ៉ាន់ ថៃ ជប៉ុន កូរ៉េ និងសហគមនអឺរ៉ុបជាដើម៕

អត្ថបទ៖ ឡេង ដេត

The post ផលិតកម្មម្រេចកម្ពុជាធ្លាក់ចុះ ៥០% តែតម្លៃកើនឡើងទ្វេដង appeared first on Kampuchea Thmey Daily.