ផល រតនៈ Archives - Kampuchea Thmey Daily

ផល រតនៈ លើកកត្តាសំខាន់៣នាំឲ្យឈ្នះ ក្រសួងមហាផ្ទៃ យប់មិញ

chean virakbot — Mon, 17 Feb 2025 03:53:22 +0000

ក្រុមបាល់ទះវិសាខា បានយកឈ្នះ ក្រុមក្រសួងមហាផ្ទៃ ដោយលទ្ធផល ៣-០ សម្រាប់ការប្រកួតចុងក្រោយ ជុំទី២ ពានរង្វាន់តេជោលីគ កាលពីល្ងាចថ្ងៃអាទិត្យ ទី១៦ ខែកុម្ភៈ ឆ្នាំ២០២៥ នៅវិមានពហុកីឡដ្ឋានជាតិអូឡាំពិក។

អ្នកគាំទ្រភាគច្រើនមានសង្ឃឹមតិចតូចណាស់ដែលវិសាខាដែលអាចយកឈ្នះ ក្រសួងមហាផ្ទៃ បាន បន្ទាប់ពីចាញ់៣ប្រកួតជាប់គ្នាកាលពីសប្តាហ៍មុន ខណៈក្រសួងមហាផ្ទៃជាក្រុមខ្លាំងឈ្នះ៣ប្រកួតជាប់គ្នា ប៉ុន្តែលទ្ធផល ៣-០ បានផ្តល់ឲ្យវិសាខាឡើងទៅកាន់វគ្គ៤ក្រុមចុងក្រោយដែលបានធ្វើឲ្យមានការភ្ញាក់ផ្អើលសម្រាប់អ្នកគាំទ្រ។

ពាក់ព័ន្ធនឹងលទ្ធផលសប្តាហ៍មុន និងសប្តាហ៍នេះ កីឡាករ ផល រតនៈ ដែលជាអ្នកបិទកណ្តាលដ៏ឆ្នើមរបស់វិសាខា បានបង្ហាញចំណុចសំខាន់មួយចំនួននាំឲ្យវិសាខាទទួលបានជ័យជម្នះ។ ទី១ កីឡាករវាយផ្តាច់ឆ្នើម គួន ម៉ុម បានជាសះស្បើយពីបញ្ហារបួសចង្កេះ១០០%។ ទី២ កីឡាករក្រសួងមហាផ្ទៃបានធ្វើឲ្យខូចខ្លួនឯងច្រើន និងទី៣ លេងដោយមិនខ្វល់ពីការធ្លាក់ ឬឡើង ប៉ុន្តែត្រូវលេងឲ្យអស់ពីសមត្ថភាពដើម្បីក្លិប និងអ្នកគាំទ្រ។

ផល រតនៈ បាននិយាយថា ៖«កាលពីសប្តាហ៍មុន ការប្រកួតជាមួយ ក្រុមស្នងការដ្ឋានរាជធានីភ្នំពេញ អត់មានវត្តមាន គួន ម៉ុម ទេ ដោយសារគាត់មានរបួសចង្កេះពេលហ្វឹកហាត់។ ធម្មតា ម៉ុម ជាក្បាលម៉ាស៊ីនសំខាន់ បន្ទាប់ពីអ្នកប៉ះសេ គាត់ជាអ្នករកពិន្ទុបានច្រើនឲ្យក្រុម។ ដូច្នេះពេលគាត់មានបញ្ហា គឺពួកយើងពិបាក»។

«បន្ទាប់មកប៉ះក្រុមបញ្ជាការដ្ឋានអង្គរក្ស និងក្រុមខេត្តស្វាយរៀង ម៉ុម ក៏អត់ទាន់ធូរស្បើយ១០០%ដែរ។ ណាមួយក្រុមទាំងពីរនេះល្អ លេងលឿនៗ អីចឹងធ្វើឲ្យយើងពិបាកលេងដូចគ្នា។ យើងឈ្នះថ្ងៃនេះដោយសារខាងក្រុមក្រសួងមហាផ្ទៃបានខូចបាល់ច្រើនដែរ។ មុននឹងប្រកួតនេះ ពួកយើងក៏មិនសង្ឃឹមច្រើនទេ គឺសង្ឃឹមតិចតូចតែ១%ក្នុងការឡើងវគ្គបន្ត»។

កីឡាករបិទកណ្តាលបានបន្តថា ៖«ម្យ៉ាងទៀត ក្រុមយើងទទួលបានការណែនាំពីគ្រូថា ធ្លាក់ឬឡើងមិនសំខាន់ទេ។ ទោះសង្ឃឹម១%ក៏ដោយ ក៏យើងត្រូវតែបន្តប្រយុទ្ធដើម្បីក្លិបដែរ និងអ្នកគាំទ្ររបស់យើងដែលខ្វាយខ្វល់ពីយើងខ្លាំង»។

ការប្រកួតសប្តាហ៍ចុងក្រោយ វិសាខា បានយកឈ្នះ កងពលធំអន្តរាគមន៍លេខ៣ ដោយលទ្ធផល ៣-០ និងចុងក្រោយ បានយកឈ្នះ ក្រសួងមហាផ្ទៃ ដោយលទ្ធផល ៣-០ ដើម្បីស្ថិតនៅចំណាត់ថ្នាក់លេខ៤ បានឡើងទៅកាន់វគ្គពាក់កណ្តាលផ្តាច់ព្រ័ត្រជាមួយក្រុមលេខ១ ខេត្តស្វាយរៀង លេខ២ ក្រសួងមហាផ្ទៃ និងលេខ៣ បញ្ជាការដ្ឋានអង្គរក្ស។ ក្រុមពីរដែលធ្លាក់ក្នុងជុំទី២គឺ ស្នងការដ្ឋានរាជធានីភ្នំពេញ និងកងពលធំអន្តរាគមន៍លេខ៣។

គូប្រកួតវគ្គពាក់កកណ្តាលផ្តាច់ព្រ័ត្រ គឺក្រុមលេខ១ ជួប ក្រុមលេខ៤ និងក្រុមលេខ២ជួបក្រុមលេខ៣។

ក្រុមខេត្តស្វាយរៀង vs វិសាខា
ក្រសួងមហាផ្ទៃ vs បញ្ជាការដ្ឋានអង្គរក្ស

អត្ថបទ៖ វីរបុត្រ

The post ផល រតនៈ លើកកត្តាសំខាន់៣នាំឲ្យឈ្នះ ក្រសួងមហាផ្ទៃ យប់មិញ appeared first on Kampuchea Thmey Daily.

អ្នកប៉ះសេ៣រូបអាចជំនួស សួន ចាន់ណារ៉ូ នៅក្រុមជម្រើសជាតិ

chean virakbot — Mon, 11 Nov 2024 04:26:28 +0000

បន្ទាប់ពីកីឡាករប៉ះសេដ៏ឆ្នើម សួន ចាន់ណារ៉ូ បានប្រកាសចូលនិវត្តន៍ទៅ ទាំងនៅក្លិប និងជម្រើសជាតិត្រូវការអ្នកជំនួសជាចាំបាច់បំផុតសម្រាប់ព្រឹត្តិការណ៍ប្រកួតលើឆាកអន្តរជាតិ។

កីឡាករលេងក្នុងតំណែងជាអ្នកបញ្ជូនបាល់ដែលភាសាសាមញ្ញហៅថា អ្នកប៉ះសេសគឺមិនសូវសំបូរច្រើនទេនៅក្នុងប្រទេសកម្ពុជា ដូច្នេះត្រូវការស្វែងរកអ្នកមានទេពកោសល្យដើម្បីបណ្តុះបណ្តាលឲ្យដិតដល់។

តាមការលើកឡើងរបស់កីឡាករ និងអ្នកគាំទ្របានឃើញកីឡាករ៣រូបដែលអាចបន្តវេន សួន ចាន់ណារ៉ូ នៅក្នុងក្រុមបាល់ទាត់ជម្រើសជាតិកម្ពុជា។ សួន ចាន់ណារ៉ូ ដែលបានចូលនិវត្តន៍ហើយបានលើកឡើងថា កែវ ស្រេងលីហ៊ួរ អាចជំនួសខ្លួនបាន ប៉ុន្តែកីឡាកររូបនេះនៅក្មេងខ្ចីផ្នែកស្មារតី ដូច្នេះត្រូវការបទពិសោធលើឆាកអន្តរជាតិ រៀនសូត្រពីរបៀបទប់អារម្មណ៍ និងអត់ធន់បានឲ្យបានខ្ពស់។

កីឡាករ កែវ ស្រេងលីហ៊ួរ

ជាមួយគ្នានេះ គួន ម៉ុម ដែលជាកីឡាករវ៉ៃផ្តាច់ដ៏ឆ្នើមម្នាក់បានលើកឡើងថា នៅក្លិបវិសាខានៅមិនទាន់មានអ្នកដែលអាចជំនួស សួន ចាន់ណារ៉ូ បានទេ ប៉ុន្តែបើនៅក្នុងក្រុមបាល់ទះជម្រើសជាតិវិញគឺអាចមាន កែវ ស្រេងលីហ៊ួរ និង យ៉ុន ខេមរៈ ដែលអាចជំនួសបាន។

កីឡាករ យុន ខេមរៈ

គួន ម៉ុម បានប្រាប់សារព័ត៌មាន«កម្ពុជាថ្មី»ដា ៖«នៅក្នុងក្រុមជម្រើសសជាតិ ខ្ញុំគិតថា យើងមានកីឡាករ កែវ ស្រេងលីហ៊ួរ និងកីឡាករ យ៉ុន ខេមរៈ នៅក្រុមស្នងការគឺអាចបាន៧០%បន្តពី ចាន់ណារ៉ូ។ យើងអាចលេងបាន ពីព្រោះកាយសម្បទាធំៗដូចគ្នា យើងអាចសង្គ្រោះគ្នាបាន ពីព្រោះពួកគាត់អាចកែបាល់បានច្បាស់»។

បន្ថែមលើកីឡាករទាំងពីរខាងលើ អ្នកគាំទ្របានលើកឡើងថា កីឡាករ ឡាង រាសីកែវ ក៏ជាអ្នកប៉ះសេដ៏ល្អម្នាក់ដែលអាចបន្តវេន សួន ចាន់ណារ៉ូ បានដែរ។ អ្នកប៉ះសេរូបនេះក៏ជាកីឡាករដ៏សំខាន់នៅក្នុងក្រុមស្នងការដ្ឋានរាជធានីភ្នំពេញជាមួយ យ៉ុន ខេមរៈ ដែរ។

កីឡាករ ឡាង រាសីកែវ

ជុំវិញកង្វះអ្នកប៉ះសេនេះដែរ ផល រតនៈ អ្នកបិទកណ្តាលដ៏ឆ្នើមនៅក្លិបវិសាខា និងជម្រើសជាតិកម្ពុជា ធ្លាប់បានលើកឡើងនៅថ្ងៃដែល សួន ចាន់ណារ៉ូ ប្រកាសចូលនិវត្តន៍ជាផ្លូវការថា ឥឡូវនេះមានកីឡាករពីរបីនាក់ដែលអាចជំនួស សួន ចាន់ណារ៉ូ បាន ប៉ុន្តែក្នុងក្រុមជម្រើសជាតិកម្ពុជាត្រូវការពេលវេលាយូរបន្តិចទើបអាចយល់ចិត្តគ្នា។

ផល រតនៈ បានលើកឡើងថា ការលេងជាមួយ សួន ចាន់ណារ៉ូ គឺអត់ពិបាកស្រែកប្រាប់ថាតើត្រូវលើកបាល់ទៅខាងណា ខ្ពស់ ឬទាបទេ ពីព្រោះក្នុងក្រុមជម្រើសជាតិយល់ចិត្តគ្នាច្រើនឆ្នាំហើយ ប៉ុន្តែបើលេងជាមួយអ្នកប៉ះសេថ្មីគឺត្រូវស្រែកប្រាប់មុនពីការលើកបាល់ទៅឆ្វេង ទៅស្តាំ ឬកណ្តាល ដូច្នេះត្រូវការពេលហោចណាស់១ឆ្នាំទៀតទើបអាចយល់ចិត្តគ្នា។

រហូតដល់ពេលនេះ កីឡាករ កែវ ស្រេងលីហ៊ួរ, យ៉ុន ខេមរៈ និង ឡាវ រាសីកែវ មិនសូវបានលេងឲ្យក្រុមជម្រើសជាតិកម្ពុជាក្នុងព្រឹត្តិការណ៍ធំៗទេ។ ពួកគាត់ភាគច្រើនលេងក្លិបនៅក្នុងព្រឹត្តិការណ៍ប្រកួតក្នុងស្រុកប៉ុណ្ណោះ៕

អត្ថបទ៖ វីរបុត្រ

The post អ្នកប៉ះសេ៣រូបអាចជំនួស សួន ចាន់ណារ៉ូ នៅក្រុមជម្រើសជាតិ appeared first on Kampuchea Thmey Daily.

ផល រតនៈ ថា អត់ពី សួន ចាន់ណារ៉ូ ក្រុមកម្ពុជានឹងពិបាកនៅឆ្នាំក្រោយ

chean virakbot — Fri, 25 Oct 2024 03:06:53 +0000

អ្នកប៉ះសេឆ្នើម សួន ចាន់ណារ៉ូ បានចូលនិវត្តន៍ពីក្រុមបាល់ទះជម្រើសជាតិកម្ពុជាកាលពីថ្ងៃទី២១ ខែតុលា ឆ្នាំ២០២៤ ដោយសារសុខភាពរាងកាយមិនអំណោយផលល្អ។ ប្រការនេះបានជំរុញឲ្យថ្នាក់ដឹកនាំសហព័ន្ធកីឡាបាល់ទះកម្ពុជា និងមិត្តរួមអាជីពមានការសោកស្តាយយ៉ាងខ្លាំង។

កីឡាករ ផល រតនៈ តួនាទីជាអ្នកការពារកណ្តាល បានបង្ហាញពីអារម្មណ៍ថា រូបគេពិតជាមានការសោកស្តាយយ៉ាងខ្លាំងដែលមិត្តរួមជម្រើសជាតិ សួន ចាន់ណារ៉ូ បានចូលនិវត្តន៍ពីអាជីពបាល់ទះ។ ការចូលនិវត្តន៍នេះគឺជាការបាត់បង់ធន់ធានមនុស្សដ៏សំខាន់នៅក្នុងក្រុមបាល់ទះជម្រើសជាតិកម្ពុជា។

ផល រតនៈ បានបន្តថា ៖«យើងមានកីឡាករប៉ះសេ ដែលអាចបន្តវេនរៀមច្បង សួន ចាន់ណារ៉ូ តែយើងត្រូវការពេលវេលាយូរបន្តិច។ មិនមែនមានន័យថា អត់មានអ្នកជំនួសទេ តែគ្រាន់តែថា យើងត្រូវការពេលវេលាយូរបន្តិចទើបអាចយល់ចិត្តគ្នា»។

«ជាមួយបង សួន ចាន់ណារ៉ូ គឺយើងយល់ចិត្តគ្នាច្រើនឆ្នាំហើយ។ ការលើកបាល់មិនចាំបាច់ប្រាប់ឲ្យលើកទាប ឬខ្ពស់ ឆ្វេង ស្តាំ ឬកណ្តាលទេ គឺយើងដឹងចិត្តគ្នាតែម្តង។ ដូច្នេះអត់ពីគាត់ទៅក្នុងរយៈពេលឆ្នាំថ្មីខាងមុខ ក្រុមជម្រើសជាតិយើងនឹងពិបាក។ យើងមានអ្នកថ្មី តែយើងត្រូវការប្រើពេលវេលាយូរបន្តិចទើបអាចយល់ចិត្តគ្នា»។ ផល រតនៈ បានរៀបរាប់។

ទាំងលោក អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា និងកីឡាករ សួន ចាន់ណារ៉ូ បានសម្លឹងឃើញកីឡាករវ័យក្មេង កែវ ស្រេងលីហ៊ួរ ដែលអាចលេងតួនាទីអ្នកប៉ះសេបាន។ ទោះបីជាយ៉ាងណា រូបគេនៅវ័យក្មេង បទពិសោធលើឆាកអន្តរជាតិតិច ហើយស្មារតីក៏មិនទាន់ចាស់ទុំ។

នៅឆ្នាំ២០២៥ខាងមុខនេះ ក្រុមបាល់ទះជម្រើសជាតិកម្ពុជាមានកម្មវិធីអន្តរជាតិសំខាន់២គឺការប្រកួតកីឡាស៊ីហ្គេម នៅប្រទេសថៃ និងការប្រកួតពានរង្វាន់ SEA V. League ដែលមានក្រុមឥណ្ឌូណេស៊ី ថៃ ហ្វីលីពីន និងកម្ពុជា។

សួន ចាន់ណារ៉ូ ធ្លាប់បានប្រកាសចូលនិវត្តន៍ម្តងហើយ បន្ទាប់ពីបានជួយកម្ពុជាឈ្នះមេដាយសំរិទ្ធកីឡាស៊ីហ្គេម ឆ្នាំ២០២១ ប៉ុន្តែដោយសារកម្ពុជាខ្វះកីឡាករតួនាទីនេះ នៅពេលកម្ពុជាធ្វើជាម្ចាស់ផ្ទះរៀបចំការប្រកួតកីឡាស៊ីហ្គេម ឆ្នាំ២០២៣ ទើបសហព័ន្ធកីឡាបាល់ទះកម្ពុជាបញ្ចុះបញ្ចូលឲ្យរូបគេវិលត្រឡប់មកជួយក្រុមកម្ពុជាជាថ្មី។ លេងបានរយៈពេល២ឆ្នាំគឺឆ្នាំ២០២៣-២៤ រូបគេក៏សម្រេចចូលនិវត្តន៍ជាលើកទី២។ សហព័ន្ធកីឡាបាល់ទះកម្ពុជាបានរៀបចំពិធីចូលនិវត្តន៍យ៉ាងឱឡារិកដោយមានវត្តមានលោក អាំង សិរីពិសិដ្ឋ អ្នកឧកញ៉ា លាង ម៉េង ជាអ្នកឧបត្ថម្ភ កីឡាករជាមិត្តរួមក្រុម និងអ្នកគាំទ្រយ៉ាងច្រើន។ នេះជាលើកដំបូងហើយក្នុងប្រវត្តិសាស្ត្របាល់ទះកម្ពុជាដែលរៀបចំពិធីចូលនិវត្តន៍បែបនេះ៕

អត្ថបទ៖ វីរបុត្រ

The post ផល រតនៈ ថា អត់ពី សួន ចាន់ណារ៉ូ ក្រុមកម្ពុជានឹងពិបាកនៅឆ្នាំក្រោយ appeared first on Kampuchea Thmey Daily.

ផល រតនៈ Archives - Kampuchea Thmey Daily

ផល រតនៈ លើក​​កត្តា​សំខាន់​៣នាំ​ឲ្យ​ឈ្នះ ក្រសួង​មហាផ្ទៃ យប់មិញ

អ្នក​ប៉ះសេ​៣​រូប​អាច​​​ជំនួស សួន ចាន់ណារ៉ូ នៅក្រុម​ជម្រើស​ជាតិ

ផល រតនៈ ថា អត់ពី សួន ចាន់ណារ៉ូ ក្រុមកម្ពុជា​នឹងពិបាកនៅឆ្នាំក្រោយ

ផល រតនៈ លើកកត្តាសំខាន់៣នាំឲ្យឈ្នះ ក្រសួងមហាផ្ទៃ យប់មិញ

អ្នកប៉ះសេ៣រូបអាចជំនួស សួន ចាន់ណារ៉ូ នៅក្រុមជម្រើសជាតិ

ផល រតនៈ ថា អត់ពី សួន ចាន់ណារ៉ូ ក្រុមកម្ពុជានឹងពិបាកនៅឆ្នាំក្រោយ