លោក​បាន​បន្ត​ថា «ពលករ​ខ្មែរ​ដែល​នៅសល់ ៦២ នាក់​ទៀត ក្រសួង និង​ភាគី​ពាក់ព័ន្ធ កំពុង​សម្រប​សម្រួល​បែបបទ​ដើម្បី​ឱ្យ​ពួកគាត់​បាន​ចាកចេញ​ពី​អារ៉ាប៊ីសាអូឌីត​មក​ដល់​កម្ពុជា​វិញ​នា​ពេល​ឆាប់ៗ នេះ​»។

លោក កត្តា អ៊ន បាន​បញ្ជាក់​ថា ពលករ​ទាំងនោះ កំពុង​រស់នៅ​ជុំ​គ្នា​នៅ​ទីកន្លែង​ស្ថិត​ក្រោម​ការ​មើល​ថែ និង​ផ្គត់ផ្គង់​ចំណីអាហារ​យ៉ាង​យកចិត្តទុកដាក់​ពី​ស្ថានទូត​ខ្មែរ និង​ភាគី​ពាក់ព័ន្ធ និង​អាជ្ញាធរ​អារ៉ាប៊ី​សា​អូឌីត។

លោក​បាន​បន្ត​ទៀត​ថា បច្ចុប្បន្ន​ពលករ​ខ្មែរ​ធ្វើការ​នៅ​អារ៉ាប៊ី​សា​អូឌីត​មាន​ចំនួន ១៣៣ នាក់ ក្នុង​នោះ បាន​ស្នើសុំ​វិល​ត្រឡប់​មក​ស្រុក​ខ្មែរ​វិញ​ចំនួន ៩០ នាក់។ ក្នុង​នោះ​មាន​ពលករ​ចំនួន ២៨ នាក់ បាន​មក​ដល់​ស្រុក​ខ្មែរ​រួចហើយ។

លោក​បាន​បន្ត​ថា ពលករ ២៨ នាក់ ក្រសួង​បាន​ផ្តល់​ឱកាស​ឱ្យ​ពួកគេ​បាន​ចូលរៀន​ជំនាញ និង​បច្ចេកទេស តាម​ការ​ស្ម័គ្រ​ចិត្ត និង ផ្តល់​ឱកាស​ការងារ​តាមរយៈ​ទីភ្នាក់ងារ​ជាតិ​មុខរបរ និង​ការងារ (NEA) នៃ​ក្រសួង​ការងារ និង​បណ្ដុះបណ្ដាល​វិជ្ជាជីវៈ៕

អត្ថបទ ៖ សំអឿន

The post អ្នកនាំពាក្យ ៖ ពលករខ្មែរ ៦២ នាក់ទៀតដែលនៅសល់កំពុងស្នាក់នៅ អារ៉ាប៊ីសាអូឌីត នឹងមកដល់កម្ពុជា ឆាប់ៗ នេះ appeared first on Kampuchea Thmey Daily.

តាមសំណេរនៅលើគណនីហ្វេសប៊ុករបស់លោក ហេង សួរ រដ្ឋមន្ត្រីក្រសួងការងារ ដែលបង្ហោះនៅម៉ោង១២ អធ្រាត្រ ថ្ងៃទី១៩ ខែមេសា បានឲ្យដឹងថា រដ្ឋាភិបាលបានរៀបចំសំបុត្រយន្តហោះសម្រាប់ពលករខ្មែរដែលកំពុងស្នាក់នៅទីក្រុង Jeddah រួចរាល់ ដោយនៅវេលាម៉ោង ១០យប់ ម៉ោងនៅអារ៉ាប់ប៊ីសាអូឌីត (ត្រូវនឹងម៉ោង២ រសៀល ម៉ោងនៅកម្ពុជា) ពលករនឹងឡើងយន្តហោះត្រឡប់មកប្រទេសកម្ពុជាវិញ។ ចំណែកពលករដែលនៅតំបន់ផ្សេង នឹងរៀបចំចេញដំណើរជាបន្តបន្ទាប់ ពោលគឺនៅថ្ងៃទី២០ ខែមេសា ចំនួន ២៧នាក់, និងថ្ងៃចុងក្រោយគឺថ្ងៃទី២១ ខែមេសា ឆ្នាំ២០២៤នេះចំនួន២២នាក់។

តាមសំណេរដដែល លោក ហេង សួរ បានអះអាងថាកាលពីវេលាម៉ោង ១១៖៣៨នាទីយប់ថ្ងៃទី១៨ ខែមេសា ឆ្នាំ២០២៤នេះ លោកបានទាក់ទងទៅពលករខ្មែរចំនួន២៩នាក់  ដែលកំពុងស្នាក់នៅផ្ទះបណ្តោះអាសន្ត ក្នុងទីក្រុង Jeddah នៃប្រទេសអារ៉ាប៊ីសាអូឌីត តាមវីដេអូ។ 

តាមលោករដ្ឋមន្ត្រីក្រសួងការងារ ការទាក់ទងទៅពលករទាំង២៩នាក់នេះ គឺដើម្បីជម្រាបព័ត៌មានដល់ជនរងគ្រោះដោយផ្ទាល់ថា សម្តេចធិបតីហ៊ុន ម៉ាណែត លោកបានជ្រាបហើយនូវសារអំពាវនាវរបស់ក្រុមពលករ ហើយក៏បានណែពាំនាំដល់ក្រសួងការងារ និងបណ្តុះបណ្តាលវិជ្ជាជីវៈ និងក្រសួងការបរទេស និងសហប្រតិបត្តិការអន្តរជាតិឱ្យចាត់គ្រប់វិធានការភ្លាមៗ ដើម្បីធានាសុវត្ថិភាព និងនាំត្រឡប់មកស្រុកកំណើតវិញ។

លោក ហេង សួរ ក៏បានបន្ថែមថា  ឯកអគ្គរាជទូតកម្ពុជាប្រចាំប្រទេសអារ៉ាប់ប៊ីសាអូឌីត ដែលមាននិវេសនដ្ឋាននៅទីក្រុងគែរ ប្រទេសអេហ្សីប បាននឹងកំពុងធ្វើដំណើរទៅប្រទេសអារ៉ាប់ប៊ីសាអូឌីត ដើម្បីជួបជាមួយពលករខ្មែររងគ្រោះដែលនៅតំបន់ផ្សេងទៀតផងដែរ។ 

លោក ហេង សួរ ក៏បានជូនពរឱ្យពលករខ្មែរដែលចាញ់បោកមេខ្យល់ទៅធ្វើការនៅប្រទេសអារ៉ាប៊ីសាអ៊ូឌីត ឱ្យធ្វើដំណើរប្រកបដោយសុវត្ថិភាព និងឆាប់បានវិលត្រឡប់មកជួបជុំគ្រួសារវិញ។

សូម​ជម្រាប​ថា ​មានពលករខ្មែរចំនួន​៧៨​នាក់​ បានចាញ់បោកមេខ្យល់នាំទៅធ្វើការនៅប្រទេសអារ៉ាប៊ីសាអ៊ូឌីត ក្នុងនោះមាន​ចំនួន ៥១​នាក់ កំពុង​ស្ថិតនៅ​ទីក្រុង Jeddah ចំនួន ១៥​នាក់ កំពុង​ស្ថិតនៅ​រាជធានី Riyadh និង​ចំនួន ១២​នាក់ កំពុង​ស្ថិតនៅ​ទីក្រុង Dammam៕

The post ពលករខ្មែរ ២៩នាក់ចាញ់បោកមេខ្យល់នាំទៅធ្វើការនៅអារ៉ាប៊ីសាអ៊ូឌីត នឹងឡើងយន្តហោះវិលមកកម្ពុជាវិញនៅថ្ងៃនេះ appeared first on Kampuchea Thmey Daily.