ព័ត៌មានជាតិ

អ្នកនាំពាក្យ ៖ ពលករខ្មែរ ៦២ នាក់ទៀតដែលនៅសល់កំពុងស្នាក់នៅ អារ៉ាប៊ីសាអូឌីត នឹងមកដល់កម្ពុជា ឆាប់ៗ នេះ

បានផុស

២ years មុន

នៅ

ថ្ងៃពុធ ៨ ឧសភា ២០២៤

ដោយ

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅព្រឹកថ្ងៃទី ០៨ ឧសភា នេះថា ពលករខ្មែរ ៦២ នាក់ទៀត ដែលនៅសល់ កំពុងស្នាក់នៅប្រទេសអារ៉ាប៊ីសាអូឌីត នឹងមកដល់ប្រទេសកម្ពុជាវិញនាពេលឆាប់ៗ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា «ពលករខ្មែរដែលនៅសល់ ៦២ នាក់ទៀត ក្រសួង និងភាគីពាក់ព័ន្ធ កំពុងសម្របសម្រួលបែបបទដើម្បីឱ្យពួកគាត់បានចាកចេញពីអារ៉ាប៊ីសាអូឌីតមកដល់កម្ពុជាវិញនាពេលឆាប់ៗ នេះ»។

លោក កត្តា អ៊ន បានបញ្ជាក់ថា ពលករទាំងនោះ កំពុងរស់នៅជុំគ្នានៅទីកន្លែងស្ថិតក្រោមការមើលថែ និងផ្គត់ផ្គង់ចំណីអាហារយ៉ាងយកចិត្តទុកដាក់ពីស្ថានទូតខ្មែរ និងភាគីពាក់ព័ន្ធ និងអាជ្ញាធរអារ៉ាប៊ីសាអូឌីត។

លោកបានបន្តទៀតថា បច្ចុប្បន្នពលករខ្មែរធ្វើការនៅអារ៉ាប៊ីសាអូឌីតមានចំនួន ១៣៣ នាក់ ក្នុងនោះ បានស្នើសុំវិលត្រឡប់មកស្រុកខ្មែរវិញចំនួន ៩០ នាក់។ ក្នុងនោះមានពលករចំនួន ២៨ នាក់ បានមកដល់ស្រុកខ្មែររួចហើយ។

លោកបានបន្តថា ពលករ ២៨ នាក់ ក្រសួងបានផ្តល់ឱកាសឱ្យពួកគេបានចូលរៀនជំនាញ និងបច្ចេកទេស តាមការស្ម័គ្រចិត្ត និង ផ្តល់ឱកាសការងារតាមរយៈទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ៕

អត្ថបទ ៖ សំអឿន