រដ្ឋមន្ត្រីពាណិជ្ជកម្មឥណ្ឌា និយាយថា កិច្ចព្រមព្រៀងជាមួយសមាគមពាណិជ្ជកម្មសេរីអឺរ៉ុប (EFTA) នឹងនាំឲ្យមានការវិនិយោគនៅប្រទេសឥណ្ឌា ក្នុងទំហំទឹកប្រាក១០០ពាន់លានដុល្លារ ហើយការ​ប្រកាស​នេះទៀតសោត ​ធ្វើ​ឡើង​ស្រប​ពេល​ចក្រភព​អង់គ្លេស​និង​ឥណ្ឌា​ ​កំពុង​ចរចា​លើ​កិច្ចព្រមព្រៀង​ FTA ​រយៈពេល​ពីរ​ឆ្នាំ​ចុង​ក្រោយ​។

លោកនាយករដ្ឋមន្ត្រី Narendra Modi បាននិយាយក្នុងសេចក្តីថ្លែងការណ៍មួយថា “កិច្ចព្រមព្រៀងដ៏សំខាន់នេះ គឺបញ្ជាក់ពីការប្តេជ្ញាចិត្តរបស់យើង ក្នុងការជំរុញវឌ្ឍនភាពសេដ្ឋកិច្ច និងបង្កើតឱកាសសម្រាប់យុវជនរបស់យើង។ ពេលខាងមុខនឹងនាំមកនូវភាពចម្រុងចម្រើន និងការរីកចម្រើនទៅវិញទៅមក ព្រោះយើងពង្រឹងចំណងមិត្តភាពជាមួយប្រទេស EFTA”។

ក្រោយ​ការ​ចរចា​ជិត​១៦​ឆ្នាំកិច្ចព្រមព្រៀងនេះ ក៏លេចចេញជារូបរាង ហើយនៅក្រោមកិច្ចព្រមព្រៀងនេះ ឥណ្ឌានឹងដកពន្ធនាំចូលភាគច្រើនលើទំនិញឧស្សាហកម្មពីប្រទេសទាំងបួន ជាថ្នូរនឹងការវិនិយោគក្នុងរយៈពេល១៥ឆ្នាំ។

ការ​វិនិយោគ​ ត្រូវ​បាន​គេ​រំពឹង​ថា​នឹង​ធ្វើ​ឡើង​នៅ​ក្នុង​វិស័យ​ឧស្សាហកម្ម​មួយ​ចំនួន ដូចជា​ឱសថ គ្រឿងចក្រ និង​ការ​ផលិត ជាដើម។

ស្របពេលជាមួយគ្នានោះដែរ EFTA បាននិយាយក្នុងសេចក្តីថ្លែងការណ៍មួយថា “កិច្ចព្រមព្រៀងនេះ នឹងជួយបង្កើនលទ្ធភាពចូលទៅកាន់ទីផ្សារនិងសម្រួលដល់នីតិវិធីគយ ដោយធ្វើឲ្យកាន់តែមានភាពងាយស្រួលសម្រាប់អាជីវកម្មឥណ្ឌា និង EFTA ដើម្បីពង្រីកប្រតិបត្តិការរបស់ពួកគេនៅក្នុងទីផ្សាររៀងៗខ្លួន”។

ទោះបីជាយ៉ាងណាក៏ដោយ ឥណ្ឌា និងប្រទេស EFTA ទាំង៤ ចាំបាច់ត្រូវផ្តល់សច្ចាប័នលើកិច្ចព្រមព្រៀងនេះសិន មុនពេលវាអាចចូលជាធរមាន ខណៈស្វីសគ្រោងធ្វើដូច្នេះនៅឆ្នាំក្រោយ៕

អត្ថបទ៖ សុខ សុវណ្ណ

ចុចអាន៖ ចិន ត្រៀម​បង្កើតកិច្ចព្រមព្រៀង​ពាណិជ្ជកម្មសេរី​ជាមួយ​ប្រទេស​ជាច្រើនទៀតនៅ​អាស៊ី-ប៉ាស៊ីហ្វិក

The post ឥណ្ឌា ចាប់ដៃ អឺរ៉ុប៤ប្រទេស ចុះកិច្ចព្រមព្រៀងពាណិជ្ជកម្មសេរី ទឹកប្រាក់១០០ពាន់លានដុល្លារ appeared first on Kampuchea Thmey Daily.

លោក ស៊ាង ថៃរដ្ឋលេខាធិការក្រសួងពាណិជ្ជកម្មជាធ្វើជាអធិបតីក្នុងកិច្ចប្រជុំស្តីពីការរៀបចំយុទ្ធសាស្រ្តពាណិជ្ជកម្មដើម្បីទាញយកប្រយោជន៍ជាអតិបរមាពីកិច្ចព្រមព្រៀងពាណិជ្ជកម្មសេរី (FTA) មានប្រសាសន៍ថា ដោយអនុវត្តតាមការចង្អុលបង្ហាញដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានណែនាំឱ្យក្រុមការងាររៀបចំយុទ្ធសាស្ត្រទាញយកផលប្រយោជន៍ជាអតិបរមាពីការអនុវត្តកិច្ចព្រមព្រៀងពាណិជ្ជកម្មសេរីដែលកម្ពុជាជាហត្ថលេខី។

ហេតុនេះក្រុមការងារសិក្សាស្រាវជ្រាវត្រូវបានបង្កើតឡើងដើម្បីសិក្សាស្រាវជ្រាវនិងរៀបចំយុទ្ធសាស្រ្តជំរុញការនាំចេញតាមសេចក្តីប្រកាស លេខ ២៩១ព.ណ.អប.ប្រក ស្តីពីការកែសម្រួលក្រុមការងាររៀបចំគោលនយោបាយ
និងយុទ្ធសាស្រ្តចរចាបង្កើតកិច្ចព្រមព្រៀងពាណិជ្ជកម្មសេរី។
ក្រុមការងារបានបង្ហាញលទ្ធផលនៃការសិក្សាស្រាវជ្រាវកន្លងមក លើទំនិញចំនួន ៩មុខ មានដូចជា៖ វិស័យសម្លៀកបំពាក់ វិស័យស្បែកជើង តំបន់សេដ្ឋកិច្ចពិសេស វិស័យដំឡើងកម្មន្តសាលធុនស្រាល វិស័យចំណីអាហារកែច្នៃ វិស័យជលផល វិស័យអង្ករ វិស័យដំឡូងមី និងកៅស៊ូធម្មជាតិដើម្បីជំរុញការនាំចេញទៅកាន់ប្រទេសចិន និងលក្ខខណ្ឌច្រកចូលទីផ្សារប្រទេសចិន ហើយបានធ្វើការសិក្សាអំពីទំហំពាណិជ្ជកម្មក្នុងពិភពលោក។

ការនាំចេញរបស់កម្ពុជាទៅកាន់ទីផ្សារពិភពលោកនិងទៅកាន់ទីផ្សារប្រទេសនាំចូលធំៗ ដែលជាដៃគូពាណិជ្ជកម្ម ជាពិសេសគឺការសិក្សានិងវិភាគអំពីចំណុចខ្លាំង ចំណុចខ្សោយ ឱកាស ការគំរាមកំហែង (SWOT Analysis)
ដើម្បីកំណត់ថាទំនិញណាជាផលិតផលថ្មី ផលិតផលកំពុងលូតលាស់ ផលិតផលមានភាពចាស់ទុំ ដើម្បីមានភាពងាយស្រួយធ្វើការជំរុញការនាំចេញបន្ថែមទៀត។

លើសពីនេះ ក្រុមការងារ ក៏បានសិក្សាអំពីរបបពន្ធ (ពន្ធគយនាំចូល) ទៅតាមប្រភេទនៃកិច្ចព្រមព្រៀងពាណិជ្ជកម្មពហុភាគី (MFN) តាមកិច្ចព្រមព្រៀងពាណិជ្ជកម្មសេរីអាស៊ានចិន (ACFTA) តាមភាពអនុគ្រោះពិសេសម្រាប់កម្ពុជា Preferential tariff for Cambodia (China’s Special preferential duty) និងតាមឋានៈប្រទេស ដែលមានការអភិវឌ្ឍន៍តិចតួច (LDC) ដើម្បីពិនិត្យមើលការនាំចេញតាមកិច្ចព្រមព្រៀងមួយណាដើម្បីទទួលភាពអនុគ្រោះបំផុតនិងបានសិក្សាផងដែរចំពោះរបាំងបច្ចេកទេសរបស់ប្រទេសចិនក្នុងការនាំចូលចំពោះទំនិញនីមួយៗ។

គួរបញ្ជាក់ថាជាលទ្ធផល អង្គប្រជុំបានទទួលយកធាតុចូលសំខាន់ៗនិងបានសម្រេចធ្វើការបញ្ចូលលទ្ធផលនៃការសិក្សាស្រាវជ្រាវទៅជារបាយការណ៍តែមួយ ដោយត្រូវកំណត់មាតិកានៃរបាយការណ៍នោះ និងកំណត់ធ្វើ Factsheet
ទំនិញគំរូសម្រាប់ជារបៀបវារៈនៃកិច្ចប្រជុំលើកក្រោយទៀត៕

អត្ថបទ៖ សំអឿន

ចុចអាន៖ មិនដល់ ១២ ម៉ោងផង! យានយន្តល្មើស ៩២៧ គ្រឿង ត្រូវបានពិនិត្យ និងពិន័យ

ចុចអាន៖ ពលករណារត់ចេញ ឬគេចវេសពីការធ្វើចត្តាឡីស័កនឹងត្រូវផាកពិន័យចាប់ពី ២០ម៉ឺនរៀលទៅ១លានរៀល

The post កម្ពុជារៀបចំយុទ្ធសាស្រ្តពាណិជ្ជកម្មដើម្បីទាញយកប្រយោជន៍ពីកិច្ចព្រមព្រៀងពាណិជ្ជកម្មសេរី appeared first on Kampuchea Thmey Daily.

ថ្លែងក្នុង​ជំនួប​ថ្នាក់ CEO នៅ​ឯវេទិការបស់កិច្ច​សហប្រតិបត្តិការសេដ្ឋកិច្ចតំបន់អាស៊ីប៉ាស៊ីហ្វិក ហៅ​កាត់ Apec លោកស៊ី បាននិយាយថា រដ្ឋាភិបាល​ចិន នឹងពិភាក្សា ក៏ដូចជាចុះហត្ថលេខាលើ​កិច្ច​ព្រម​ព្រៀង​ពាណិជ្ជកម្មសេរី ជាមួយប្រទេស​មួយចំនួន ប៉ុន្តែ​មិនមែន​ក្នុងចេតនា​ធ្វើ​ការ​បង្រួប​បង្រួម​សម្ព័ន្ធមិត្តរបស់​ខ្លួន ដើម្បី​ប្រឆាំង​សហរដ្ឋអាមេរិកនោះ​ឡើយ។

ក្នុង​កិច្ច​ប្រជុំ​តាម​រយៈ​អន​ឡាញ ដែល​ប្រទេស​ម៉ាឡេស៊ី ធ្វើ​ជាម្ចាស់​ផ្ទះ លោក ស៊ី បញ្ជាក់​ទៀត​ថា “ប្រទេសចិន បានធ្វើសមាហរណកម្មជាមួយសេដ្ឋកិច្ចពិភពលោក និងប្រព័ន្ធអន្តរជាតិ អស់រយៈពេលជាយូរមកហើយ។ យើងមិនត្រលប់ទៅរកប្រវត្តិសាស្ត្រកាល​ពីអតីតកាលនោះ​ទេ ហើយក៏​មិនស្វែងរកការបង្រួបបង្រួមនិងបង្កើតជាសម្ព័ន្ធតូចៗ ដើម្បី​កាត់​ផ្តាច់​ប្រទេស​ផ្សេង​នោះ​ដែរ។”

លោកថា ប្រទេស​ចិន នៅ​តែ​បើក​ចំហរ​សម្រាប់​វិនិយោគិន​បរទេស ចូលរួម​ធ្វើ​ពាណិជ្ជកម្មពហុភាគី៕

ប្រែសម្រួល៖ សុភា
ប្រភព៖ SCMP

The post ចិន ត្រៀម​បង្កើតកិច្ចព្រមព្រៀង​ពាណិជ្ជកម្មសេរី​ជាមួយ​ប្រទេស​ជាច្រើនទៀតនៅ​អាស៊ី-ប៉ាស៊ីហ្វិក appeared first on Kampuchea Thmey Daily.