ព្រឹទ្ធាចារ្យចាប៉ីដងវែង Archives - Kampuchea Thmey Daily

ព្រឹទ្ធាចារ្យចាប៉ីដងវែង នេត ប៉េ ទទួលបានអំណោយពីសម្តេចទាំង៣ និងលោកជំទាវបណ្ឌិត ពេជ ចន្ទមុន្នី

Chan Sotheavy — Tue, 27 Jan 2026 04:06:02 +0000

ព្រឹទ្ធាចារ្យចាប៉ីដងវែងលោកតា នេត ប៉េ ទទួលបានអំណោយដ៏ថ្លៃថ្លាពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ។

ដោយទទួលបាននូវការណែនាំពីលោកជំទាវ ហ៊ុន ម៉ាណា អគ្គនាយការវិទ្យុ និងទូរទស្សន៍បាយ័ន នារសៀលថ្ងៃទី ២៥ ខែមករា ឆ្នាំ២០២៦ កន្លងទៅលោក ជិន ប៊ុន ធឿន បាននាំយកនូវអំណោយដ៏ថ្លៃថ្លារបស់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត សម្ដេចធិបតី ហ៊ុន ម៉ាណែត និងលោកជំទាវបណ្ឌិតពេជ ចន្ទមុន្នី ហ៊ុនម៉ាណែត មកផ្ដល់ជូនលោកតា នេត ប៉េ ជាព្រឹទ្ធាចារ្យចាប៉ីដងវែងដែលកំពុងតែរស់នៅឯស្រុកកំណើត។

ព្រឹទ្ធាចារ្យចាប៉ីដងវែងលោកតា នេត ប៉េ គិតមកដល់ពេលនេះគឺមានអាយុ ៧០ឆ្នាំ រស់នៅភូមិស្រះកែវ ឃុំក្រាំងស្វាយ ស្រុកព្រះស្តេច ខេត្តព្រៃវែង ដែលកំពុងមានជំងឺប្រចាំកាយផង។ អំណោយដែលបានផ្តល់ជូនលោកតាព្រឹទ្ធាចារ្យ គឺជាអំណោយប្រចាំឆ្នាំដែលសម្តេចទាំង៣ និងលោកជំទាវបណ្ឌិត ដែលបានផ្តល់ជូនតាំងពីឆ្នាំ២០០៧ រហូតមក។

ជាមួយគ្នានៃការទទួលបានអំណោយដ៏ថ្លៃថ្លារបស់សម្តេចទាំង៣ និងលោកជំទាវបណ្ឌិត ព្រឹទ្ធាចារ្យចាប៉ីដងវែងលោកតា នេត ប៉េ និងក្រុមគ្រួសារ បានបង្ហាញការដឹងគុណដ៏ខ្ពង់ខ្ពស់ចំពោះគុណបំណាច់ដែលមិនអាចកាត់ថ្លៃបានពីសំណាក់សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ៕ ដោយ ៖ ចាន់រ៉ា

The post ព្រឹទ្ធាចារ្យចាប៉ីដងវែង នេត ប៉េ ទទួលបានអំណោយពីសម្តេចទាំង៣ និងលោកជំទាវបណ្ឌិត ពេជ ចន្ទមុន្នី appeared first on Kampuchea Thmey Daily.

សម្ដេចធិបតី ផ្ដល់ក្របខ័ណ្ឌរដ្ឋជូនកូនលោកតា គង់ ណៃ ដើម្បីបន្តវេនសិល្បៈចាប៉ី តាមឳពុក

Ngoeul Narath — Thu, 11 Jul 2024 00:21:02 +0000

សម្ដេចធិបតី ហ៊ុន ម៉ាណែត ឯកភាពផ្ដល់ក្របខ័ណ្ឌជូនកូនលោក គង់ បុរាណ ត្រូវជាកូនប្រុសព្រឹទ្ធាចារ្យកោសល្យវោហារ គង់ ណៃ ដើម្បីបានបន្តសិល្បៈចាប៉ីដងវែង តាមគន្លងលោកឳពុក។ នេះបើតាមសំណេរដែលសម្ដេចធិបតី នាយករដ្ឋមន្ត្រីបង្ហោះលើទំព័រហ្វេសប៊ុកនាព្រឹកថ្ងៃព្រហស្បត្តិ៍ នេះ។

ការសម្រេចផ្ដល់ក្របខ័ណ្ណមួយនេះ ធ្វើឡើងបន្ទាប់ពី លោក គង់ បុរាណ បង្ហោះលើគណនីហ្វេសប៊ុកស្នើសុំក្របខ័ណ្ឌរដ្ឋ ពីសំណាក់ប្រមុខថ្នាក់ដឹកនាំ ដើម្បីបានបម្រើប្រទេសជាតិក្នុងវិស័យសិល្បៈចាប៉ីដងវែង និងដើម្បីទ្រទ្រង់ជីវភាពទៅថ្ងៃខាងមុខបន្តទៀត។

សម្ដេចធិបតី ហ៊ុន ម៉ាណែត បង្ហោះលើគណនីហ្វេសប៊ុក ដូច្នេះ ៖« ខ្ញុំបានឃើញសាររបស់ប្អូនប្រុស គង់ បុរាណ ដែលត្រូវជាកូនប្រុសបង្កើតរបស់លោកតា គង់ ណៃ ដែលប្អូនបានស្នើសុំចូលបម្រើក្នុងក្របខ័ណ្ឌរដ្ឋ ដើម្បីបានដើរតាមគន្លងរបស់លោកឪពុក ហើយជាពិសេសប្អូនមានជំនាញចាប៉ី ដែលអាចបន្តវេនពីលោកឪពុករបស់ប្អូន។ ខ្ញុំឯកភាពតាមសំណើរបស់ប្អូនប្រុស គង់ បុរាណ »។

ដើម្បីឱ្យកិច្ចការបញ្ចូលឈ្មោះ លោក គង់ បុរាណ ទៅក្នុងក្របខ័ណ្ឌរដ្ឋ ដំណើរការរលូន ស្របតាមនីតិវិធី សម្ដេចធិបតីនាយករដ្ឋមន្ត្រី បានប្រគល់ភារកិច្ចជូនឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និង រដ្ឋមន្ត្រីក្រសួងវប្បធម៌ និងវិចិត្រសិល្បៈ រៀបចំកិច្ចការងារនេះ។

ជាចុងក្រោយ សម្ដេចធិបតី បញ្ចប់សំណេរលើគណនីហ្វេសប៊ុកផ្ទាល់ខ្លួន ជាមួយនឹងពាក្យជូនពរ ឱ្យលោក គង់ បុរាណ ជាកូនប្រុសតែមួយរបស់លោកតា គង់ ណៃ ដែលចេះសិល្បៈចាប៉ីដងវែង ទទួលបានជោគជ័យក្នុងការបន្តវេនចាប៉ីពីលោកតា គង់ ណៃ។

លោក គង់ បុរាណ គឺជាកូនទី៩ ក្នុងចំណោមកូនទាំង១០ របស់អតីតព្រឹទ្ធាចារ្យកោសល្យវោហារ គង់ ណៃ និងលោកយាយ តាត់ ឆេន។

សូមរម្លឹកថា ព្រឹទ្ធាចារ្យកោសល្យវោហារ គង់ ណៃ ទទួលអនិច្ចកម្ម កាលថ្ងៃទី២៨ ខែមិថុនា ឆ្នាំ២០២៤ ដោយជរាពាធ ក្នុងជន្មានយុ៨០ ឆ្នាំ នៅគេហដ្ឋាន ក្នុងភូមិដូង ឃុំស្វាយទង ស្រុកកំពង់ត្រាច ខេត្តកំពត៕

ដោយ៖ ង៉ិល ណារ៉ាត់

The post សម្ដេចធិបតី ផ្ដល់ក្របខ័ណ្ឌរដ្ឋជូនកូនលោកតា គង់ ណៃ ដើម្បីបន្តវេនសិល្បៈចាប៉ី តាមឳពុក appeared first on Kampuchea Thmey Daily.

លោក ឈួរ សុបញ្ញា ៖ យុទ្ធនាការ«ដឹងគុណព្រឹទ្ធាចារ្យចាប៉ីដងវែង ដើម្បីអភិរក្សមរតកចាប៉ី» ផ្ដោតលើបេសកកម្ម ៣ យ៉ាង

អ៊ិន ពិសី — Mon, 12 Feb 2024 02:34:02 +0000

លោក ឈួរ សុបញ្ញា ប្រធានក្រុមកាយរឹទ្ធិរៀមច្បងរាជធានីភ្នំពេញ និងជាប្រធានក្រុមប្រឹក្សាភិបាល នៃសមាគមចាប៉ីដងវែងខ្មែរអមតៈ លើកឡើងថា បេសកកម្ម នៃយុទ្ធនាការ«ដឹងគុណព្រឹទ្ធាចារ្យចាប៉ីដងវែង ដើម្បីអភិរក្សមរតកចាប៉ី» នេះ ធ្វើឡើងក្នុងគោលបំណងជួបព្រឹទ្ធាចារ្យចាប៉ីទាំង ២៥ រាជធានី-ខេត្ត លើបេសកកម្ម ៣ យ៉ាង។

ការលើកឡើងនេះ ខណៈ លោក ឈួរ សុបញ្ញា បានចុះសួរសុខទុក្ខព្រឹទ្ធាចារ្យចាប៉ីដងវែង ចំនួន ៣ រូប ដោយនាំយកនូវអំណោយជាគ្រឿងឧបភោគបរិភោគ និងថវិកាមួយចំនួនជូនដល់ពួកគាត់ កាលពីថ្ងៃទី ១១ ខែកុម្ភៈ ឆ្នាំ ២០២៤ ម្សិលមិញ។

លោក ឈួរ សុបញ្ញា បានមានប្រសាសន៍ថា នៅថ្ងៃទី ១១ ខែកុម្ភៈ ឆ្នាំ ២០២៤ ដើម្បីសម្ដែងការគោរពដឹងគុណ ការសួរសុខទុក្ខ និងចូលរួមចែករំលែក និងជួយសម្រួលក្នុងការរស់នៅប្រចាំថ្ងៃរបស់ព្រឹទ្ធាចារ្យចាប៉ីដងវែង ក្រោមយុទ្ធនាការ«ដឹងគុណព្រឹទ្ធាចារ្យចាប៉ីដងវែង ដើម្បីអភិរក្សមរតកចាប៉ី» ក្រុមកាយរឹទ្ធិរៀមច្បងរាជធានីភ្នំពេញ សហការជាមួយសហគមន៍ចាប៉ីអមតៈ និងសហភាពសហព័ន្ធយុវជនកម្ពុជារាជធានីភ្នំពេញ ដឹកនាំដោយលោកផ្ទាល់ បានចុះសួរសុខទុក្ខព្រឹទ្ធាចារ្យចាប៉ីដងវែង និងនាំយកនូវអំណោយជាគ្រឿងឧបភោគបរិភោគ និងថវិកា ក្នុងម្នាក់ៗ ចំនួន ៨១៦,០០០ រៀល ជូនដល់ពួកគាត់។

ជាមួយគ្នានេះ លោក ឈួរ សុបញ្ញា លើកឡើងថា បេសកកម្ម នៃយុទ្ធនាការ«ដឹងគុណព្រឹទ្ធាចារ្យចាប៉ីដងវែង ដើម្បីអភិរក្សមរតកចាប៉ី» នេះ ធ្វើឡើងក្នុងគោលបំណងជួបព្រឹទ្ធាចារ្យចាប៉ីទាំង ២៥ រាជធានី-ខេត្ត លើបេសកកម្ម ៣ យ៉ាង គឺ ៖ ១.ការជួបសម្ដែងការដឹងគុណ និងសួរសុខទុក្ខព្រឹទ្ធាចារ្យចាស់ៗ។ ២-ដឹកនាំសិស្សចាប៉ីថ្មីៗ បានសិក្សាពីបទពិសោធរបស់ព្រឹទ្ធាចារ្យចាស់ៗ និងបង្ហាញជូនព្រឹទ្ធាចារ្យទាំងអស់ពីការគង់វង្សមរតកចាប៉ី។ ៣-ការនាំយកអំណោយគាំទ្រដល់ជីវភាពរបស់ព្រឹទ្ធាចារ្យ។

លោកបន្ថែមថា វត្តមានរបស់ក្រុមកាយរឹទ្ធិរៀមច្បងរាជធានីភ្នំពេញ សហគមន៍ចាប៉ីអមតៈ និងសហភាពសហព័ន្ធយុវជនកម្ពុជារាជធានីភ្នំពេញ ដែលដឹកនាំដោយលោកផ្ទាល់ បានធ្វើឲ្យព្រឹទ្ធាចារ្យទាំងអស់ មានសេចក្ដីត្រេកអរជាខ្លាំង ជាពន្លឹក និងថ្លែងអំណរគុណចំពោះ សម្ដេចប្រមុខរាជរដ្ឋាភិបាល សប្បុរសជន និងសិស្សគណ តែងតែយកចិត្តទុកដាក់លោកតាគ្រប់ពេល ហើយលោកក៏មានក្តីសង្ឃឹមចំពោះការបន្តថែរក្សាមរតកចាប៉ីបុរាណ ក្រោមម្លប់ នៃសន្តិភាពរបស់កម្ពុជា ផងដែរ។

គួរជម្រាបថា ព្រឹទ្ធាចារ្យចាប៉ីដងវែង ដែល លោក ឈួរ សុបញ្ញា បានចុះសួរសុខទុក្ខ និងនាំយកអំណោយជូនរួមមាន ៖

១-ព្រឹទ្ធាចារ្យ អ៊ិន សារុន អាយុ ៨០ ឆ្នាំ មានជំងឺប្រចាំកាយ និងពិការភ្នែក កំពុងស្នាក់នៅភូមិត្រពាំងរុន ២ ឃុំចន្ត្រី ស្រុករមាសហែក ខេត្តស្វាយរៀង។

២-ព្រឹទ្ធាចារ្យ នេន ប៉េ អាយុ ៦៨ ឆ្នាំ មានជំងឺប្រចាំកាយ និងពិការភ្នែក រស់នៅភូមិស្រះកែវ ឃុំក្រាំងស្វាយ ស្រុកព្រះស្តេច ខេត្តព្រៃវែង។

៣-ព្រឹទ្ធាចារ្យ ស៊ិន សយ អាយុ ៦៦ ឆ្នាំ មានជំងឺប្រចាំកាយ កំពុងរស់នៅភូមិព្រៃកណ្តៀង ឃុំព្រៃកណ្តែង ស្រុកពាមរ ខេត្តព្រៃវែង។

សូមបញ្ជាក់ថា ការចុះសួរសុខទុក្ខ និងនាំយកអំណោយជូនដល់ ព្រឹទ្ធាចារ្យចាប៉ីដងវែង នេះ គឺជាលើកទី ២ ហើយ បន្ទាប់ពីការចុះជួបសួរសុខទុក្ខព្រឹទ្ធាចារ្យកោសល្យវោហារ គង់ ណៃ នៅខេត្តកំពត កាលពីថ្ងៃទី ២៣ ខែធ្នូ ឆ្នាំ ២០២៣ កន្លងទៅ៕

អត្ថបទ ៖ ពិសី

The post លោក ឈួរ សុបញ្ញា ៖ យុទ្ធនាការ«ដឹងគុណព្រឹទ្ធាចារ្យចាប៉ីដងវែង ដើម្បីអភិរក្សមរតកចាប៉ី» ផ្ដោតលើបេសកកម្ម ៣ យ៉ាង appeared first on Kampuchea Thmey Daily.