ការចេញមុខទទូចនេះ គឺបន្ទាប់ថ្មីៗនេះ រឿងរ៉ាងក្នុងសង្គមខ្មែរហាក់ផ្ទុះល្បីជាច្រើនរឿង និងសុទ្ធសឹងជាជម្លោះគ្រួសារ ខណៈកាលពីយប់មិញ ក៏កើតមានជម្លោះបងប្អូនអ្នកជំនួញផលិតផលសម្រស់ ២រូប វែកញែកហែកហួរគ្នាទៅមកទាក់ទងនឹងរឿងភាគហ៊ុនដែលបានបញ្ចប់កាលពីឆ្នាំ២០២១ រហូតមានការណាត់គ្នាទៅស្បថស្បែរដូចទង្វើអ្នកជំនួញឡេដទៃទៀតធ្វើដែរ។

សកម្មភាពនេះ ធ្វើឱ្យសាធារណជនខ្មែរភាគច្រើនសម្តែងការមិនពេញចិត្តជាខ្លាំង ព្រោះប្រទេសជាតិកំពុងមានបញ្ហាតាមបណ្តោយព្រំដែននៅឡើយ តែបែរជាសារធារណជនមួយចំនួនទៀត នាំគ្នាខ្វាយខ្វល់រឿងគ្រួសារអ្នកដទៃជាងរឿងសកម្មភាពឈ្លានកម្ពុជាទៅវិញ។ ម៉្យាងវិញទៀត សាធារណជនខ្មែរ ក៏ដូចជាអ្នកផលិតមាតិកា និងបុគ្គលល្បីៗ យល់ថា រឿងប្រើទីសក្ការៈនៃជំនឿដ៏ខ្លាំងក្លារបស់ខ្មែរ ទៅធ្វើសកម្មភាពបែបនេះ គឺអាណាធិបតេយ្យ និងពុំគួរគប្បីឡើយ។

ក្នុងចំណោមនោះ អ្នកផលិតមាតិកានិទានរន្ធត់ដ៏មានប្រជាប្រិយដែលមហាជនតែងហៅថា បងដាវ បានចេញមុខស្នើសុំសាធារណជនទាំងអស់ ដែលកំពុងបង្វែរចំណាប់អារម្មណ៍លើរឿងល្បីផ្សេងៗក្នុងសង្គម ត្រូវផ្អាកសិន ហើយបន្តចាប់អារម្មណ៍លើបញ្ហាព្រំដែន ដែលមានការបំពានដ៏ធ្ងន់ធ្ងរដល់បូរណភាពទឹកដី។

លោកសង្កត់ធ្ងន់ថា រឿងផ្សេងៗដែលកំពុងផ្ទុះល្បី មិនមានគុណតម្លៃទុកជាអទិភាពឡើយ ខណៈកាលពីថ្ងៃទី២១ តុលានេះ យោធាថៃទើបធ្វើទង្វើរំលោភដែនអធិបតេយ្យកម្ពុជាជាថ្មី នៅភូមិព្រៃចាន់ និងមួយទៀត ថៃបានយកកឯកសណ្ឋានវីរកងទ័ពខ្មែរ ទៅជាន់ឈ្លីនឹងជើង។

ទន្ទឹមនេះ លោកក៏សម្តែងអារម្មណ៍ឈឺចាប់ និងកង្វល់ជាខ្លាំង ក្រោយឃើញសាធារណជនខ្មែរ ហាក់ខ្វាយខ្វល់រឿងផ្ទុះល្បីក្នុងបណ្តាញសង្គមជាជាងបញ្ហាព្រំដែន។ ពិសេស ពិតជាអាសូរដល់ពលរដ្ឋខ្មែររស់នៅតាមបណ្តោយព្រំដែនខ្មែរ-ថៃ ដែលកំពុងរងទុក្ខ ខណៈវីរកងទ័ពក៏កំពុងតស៊ូហាលថ្ងៃហាលភ្លៀងអស់ពីកម្លាំងកាយចិត្ត ការពារព្រំដែនដើម្បីប្រជាជាតិទាំងមូល។ ដោយហេតុនេះ លោកស្នើឱ្យសាធារណជនខ្មែរ ងាកមកគិតដល់សុខទុក្ខ និងលើកចិត្តពួកគាត់ជាបន្តទៀត។

ដ្បិតតែមានក្តីឈឺចាប់ និងកង្វល់ពីបញ្ហាព្រំដែនកម្ពុជាក៏ពិតមែន តែក្នុងនាមជាពលរដ្ឋខ្មែរឥស្លាមមួយរូប ក៏បង្ហាញការជឿជាក់លើប្រមុខរាជរដ្ឋាភិបាលផងដែរ ដែលកំពុងរិះរកដំណោះស្រាយ និងខិតខំដោះស្រាយបញ្ហានេះ។

ដោយមើលឃើញសកម្មភាពផុសផុលរឿងជម្លោះក្នុងសង្គមច្រើន លោក តាំង គីមឡេង ដែលមហាជនស្គាល់លោកតាមរយៈសកម្មភាពមនុស្សធម៌ ដោយការកៀរគរសប្បុរសជនឧបត្ថម្ភគាំទ្រវីរកងទ័ព និងពលរដ្ឋភៀសសឹកកម្ពុជាប្រហែលជាង ២ខែមកនេះ បានលើកឡើងផងដែរថា “បងប្អូនចង់តាមដានអ្វីជាសិទ្ធរបស់បងប្អូន​ តែសុំចិត្តបងប្អូនទាំងអស់គ្នាថាប្រទេសជាតិសំខាន់ណាស់សម្រាប់គ្រប់គ្នា​ ជាពិសេសកុំតាមដានលេីរឿងណាដែលមិនមានផលចំនណញសម្រាប់សង្គមជាតិក្នុងស្ថានការណ៍មិនទាន់ល្អបែបនេះ“។

ដោយឡែក ទីនីន ដែលមហាជនតែងស្គាល់តាមរយៈការផលិតវីដេអូ និងលក់ផលិតផល បានចេញមុខរិះគន់ទៅកាន់អ្នកចេះដឹងរឿងគេហួសហេតុផងដែរ ខណៈដែលជម្លោះត្រកូលអ្នកជំនួញផលិតផលសម្រស់ ២រូប យប់មិញនេះ មានអ្នកទៅតាមដានផ្ទាល់ដល់ទីសក្ការៈដ៏ស័ក្តសិទ្ធិរបស់ខ្មែរ (ព្រះអង្គដងកើ) យ៉ាងច្រើនកុះករ និងមានការស្រែកហ៊ោរខ្ញៀវខ្ញារថែមទៀត ខណៈអ្នកនាងចាត់ទុកទង្វើនេះ ជារឿងមិនគួរគប្បីនោះឡើយ។

ជុំវិញរឿងរ៉ាវនេះ សូម្បីតែតារាចម្រៀង Original Song លោក អួន បឋម ហៅ សាយ ក៏សម្តែងការហួសចិត្តនឹងទង្វើសាធារណជនខ្មែរកាលពីយប់មិញក្នុងជម្លោះបុគ្គលដែលជាអ្នកជំនួញឡេ ២រូបនោះផងដែរ។ លោកថា “ប្រជាជន Thai គេចាប់អារម្មណ៍ការប្រជុំ GBC-JBC ខាងយើងឥលូវចាប់អារម្មណ៍ J-J ជុំគ្នាស្បថ”។

The post សាធារណជន និងអ្នកល្បីឈ្មោះ ៣រូប ទទូចឱ្យរួមគ្នាបន្តផ្សាយទង្វើឈ្លានពានរបស់ថៃ ផ្អាករឿងផ្ទុះក្នុងសង្គមសិន appeared first on Kampuchea Thmey Daily.

អ្នកស្រី ម៉ៃ ម៉ូលីតា បញ្ជាក់ថា មិនខុសទេបើគ្រាន់តែទទួលទានស្រា តែអ្វីដែលមិនគួរ គឺផឹកស្រានៅតាមទីសាធារណៈ ដែលជាន្លែងមានក្មេងចាស់ និងយុវវ័យ ទៅកម្សាន្តច្រើន។ អ្នកនាងបន្ថែមថា មនុស្សធំ ត្រូវពិចារណាចំណុចនេះ ព្រោះវា ពិតជាជះឥទ្ធិពលដល់ក្មេងជំនាន់ អាចធ្វើឱ្យពួកគេយល់ថា ការទទួលទានស្រា ជាវប្បធម៌នៃការការជួបជុំ។ មិនតែប៉ុណ្ណោះ ការទទួលទានស្រាបៀរតាមទីសាធារណៈ អាចប៉ះពាល់តម្លៃសីលធម៌ខ្មែរ និងមុខមាត់ប្រទេសជាតិ មិនគួរបន្តសកម្មភាពទាំងនេះទៀតឡើយ។

លោក សៀង បញ្ហា បុគ្គលិកបម្រើការងារនៅស្ថាប័នឯកជនមួយកន្លែង បង្ហាញការយល់ឃើញដែរថា ការជួបជុំគ្នាផឹក ស្រាបៀរតាមទីសាធារណៈ វាអាចផ្តល់ជាផលរំខានដល់អ្នកនៅជុំវិញ។ លោកបន្ត អ្នកខ្លះ ផឹកស៊ីរួចហើយ ពង្រាយសំរាម គ្មានសណ្តាប់ធ្នាប់ ហើយករណីដែលអាចកើតមានមួយទៀតនោះ គឺអាចបង្កជាជម្លោះកើតឡើងផងដែរ។

ជុំវិញរឿងរ៉ាវនេះ លោក គី សេរីវឌ្ឍន៍ អ្នកជំនាញសេដ្ឋកិច្ច លើកឡើងដែរថា ការផ្សព្វផ្សាយស្រាបៀរ ដែលអ្នកទទួលទានស្រាបៀរ ចូលចិត្ត បង្អួតក្មេងជារៀងរាល់ថ្ងៃនោះ គឺជាទម្លាប់ដ៏អាក្រក់ដល់ក្មេង ព្រោះក្មេងនឹងយល់ថា ការទទួលស្រាបៀរ ជារឿងសប្បាយ និងជារឿងល្អ។ ត្រង់ចំណុចនេះ លោកថា វានឹងធ្វើឱ្យប៉ះពាល់ដល់ធនធានមនុស្ស និងកម្លាំងពលកម្ម នាពេលអនាគត ដូចនេះ ត្រូវរៀបចំប្រព័ន្ធអប់រំឱ្យបានល្អ បណ្តុះការគិតរបស់ក្មេង។

ជាមួយគ្នានេះ អ្នកស្រី ចាន់ តុលា ដែលជាអាជីវករ នៅផ្សារទួលទំពូង បង្ហាញក្តីព្រួយបារម្ភដែរថា ការផ្សព្វផ្សាយពីគ្រឿង ស្រវឹង មានគ្រប់រូបភាព ហើយការហូបស្រានេះ ដូចជាប្រពៃណីមួយទៅហើយសម្រាប់ប្រជាពលរដ្ឋខ្មែរ ក្នុងការជួបជុំ។ អ្នកស្រីថា “វាពិបាកណាស់ក្នុងការហាមឃាត់ក្មេង ទាល់តែមានការចូលរួមពីគ្រប់ផ្នែកពាក់ព័ន្ធ ពិសេសគឺគ្រួសារតែម្តង ព្រោះគ្រួសារ ជាអ្នកនៅកៀកក្មេងបំផុត ហើយគ្រួសារខ្លះជាអ្នកបង្កើតគំរូហ្នឹងតែម្តង”៕

អត្ថបទ៖ សុធាវី

The post សាធារណជន សំណូមពរអ្នកចូលចិត្តជួបជុំផឹកស្រាតាមទីសាធារណៈ បញ្ឈប់សកម្មភាពនេះ ព្រោះនាំគំរូអាក្រក់ appeared first on Kampuchea Thmey Daily.