មន្ទីរធម្មការរាជធានីភ្នំពេញ Archives - Kampuchea Thmey Daily

ជាថ្មីម្ដងទៀត គ្រូបារមីស្នងរូប ៧ ភាសា ចុះកិច្ចសន្យាបញ្ឈប់សកម្មភាពប៉ះពាល់ តម្លៃព្រះពុទ្ធសាសនា និងសង្គម

អ៊ិន ពិសី — Mon, 02 Jun 2025 09:31:24 +0000

កាលពីព្រឹកថ្ងៃទី ២ ខែមិថុនា ឆ្នាំ ២០២៥ នេះ លោក ទេព គង្គា ប្រធានមន្ទីរធម្មការ និងសាសនារាជធានីភ្នំពេញ សហការជាមួយអាជ្ញាធរមូលដ្ឋានខណ្ឌពោធិ៍សែនជ័យ បានអញ្ជើញ លោក វ៉ាត វុធ ហៅ លោកតាឥសីសំរឹទ្ធ ដែលតាំងខ្លួនជាគ្រូបារមីស្នងរូប ៧ ភាសា មានអាសយដ្ឋាននៅភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ មកធ្វើកិច្ចសន្យាបញ្ឈប់សកម្មភាពប៉ះពាល់តម្លៃព្រះពុទ្ធសាសនា និងសង្គម។

មន្ទីរធម្មការ និងសាសនារាជធានី បានធ្វើកិច្ចសន្យាណែនាំគ្រូបារមីស្នងរូប ៧ ភាសា ខាងលើ ឲ្យបញ្ឈប់ និងលុបវីដេអូ រូបថតសកម្មភាពពាក់ព័ន្ធនឹងការ ទស្សន៍ទាយ ប្រោះព្រំ លើករាសី ជាដើម តាមប្រព័ន្ធបណ្ដាញសង្គម ដែលនាំឲ្យប៉ះពាល់ដល់សន្តិសុខ សណ្ដាប់ធ្នាប់សាធារណៈ តថភាពសង្គម និងសាសនា ទាំងចាស់ទាំងថ្មី ចេញទាំងអស់។

ជាមួយនេះ លោក វ៉ាត វុធ ហៅ លោកតាឥសីសំរឹទ្ធ ដែលតាំងខ្លួនជាគ្រូបារមីស្នងរូប ៧ ភាសា ក៏បានធ្វើកិច្ចសន្យាយល់ព្រមលុបវីដេអូ និង រូបថតសកម្មភាពប៉ះពាល់ដល់ប្រពៃណី ទំនៀមទម្លាប់ ព្រះពុទ្ធសាសនា និងតថភាពសង្គម នៅលើប្រព័ន្ធបណ្ដាញសង្គមទាំងអស់។ បន្ថែមនោះ លោកសន្យាមិនបង្ហោះរាល់រូបភាព ឬ វីដេអូសកម្មភាពទាំងអស់ នៅលើប្រព័ន្ធបណ្ដាញសង្គម នានា នោះទេ។

លោក វ៉ាត វុធ ហៅ លោកតាឥសីសំរឹទ្ធ ក៏បានអំពាវនាវដល់សិស្សគណ អ្នកគាំទ្រ និងអ្នកលេងបណ្ដាញសង្គម គ្រប់ប្រភេទទាំងអស់ សូមកុំថតចម្លង ចែកចាយបន្តនូវរូបភាព និងវីដេអូចាស់ៗ របស់លោក និង ស្នើឲ្យជួយលុបវីដេអូ រូបថតសកម្មភាព ចាស់ថ្មី ទាំងអស់របស់លោក ចេញពីបណ្ដាញសង្គម។ លោកក៏បានបន្ថែមថា បើនៅតែមានអ្នកបន្តចែកចាយបង្ហោះរូបភាព សកម្មភាពរបស់ក្រុមលោកនៅលើបណ្ដាញសង្គមតទៅទៀតនោះ គឺមិនទទួលខុសត្រូវឡើយ។

សូមបញ្ជាក់ថា កាលពីថ្ងៃទី ៣០ ខែមករា ឆ្នាំ ២០២៤ កន្លងទៅ លោក វ៉ាត វុធ ហៅ លោកតាឥសីសំរឹទ្ធ ដែលតាំងខ្លួនជាគ្រូបារមីស្នងរូប ៧ ភាសា បានធ្វើកិច្ចសន្យាជាមួយមន្ទីរធម្មការ និងសាសនារាជធានីភ្នំពេញ ម្តងរួចមកហើយ។

ក្នុងកិច្ចសន្យាជាមួយ មន្ទីរធម្មការ គ្រូបារមីស្នងរូប ៧ ភាសា បានសន្យាឈប់ធ្វើសកម្មភាពដែលប៉ះពាល់ដល់សន្តិសុខសណ្ដាប់ធ្នាប់សង្គម មិនថតបង្ហោះសកម្មភាពអួតអាងផ្ទុយពីការពិតតាមបណ្ដាញសង្គម ឈប់ផ្ដល់បទសម្ភាសន៍ជាមួយសារព័ត៌មាន ឬអ្នកលេងបណ្ដាញសង្គម ឈប់យកស្បង់ចីវរព្រះសង្ឃមកស្លៀកពាក់ និងឈប់ធ្វើសកម្មភាពមិនសមរម្យប៉ះពាល់ដល់សេចក្ដីថ្លៃថ្នូររបស់ព្រះពុទ្ធសាសនា។ ករណីមិនគោរពតាមកិច្ចសន្យា នឹងត្រូវទទួលទោសចំពោះមុខច្បាប់ជាធរមាន៕

អត្ថបទ ៖ សំណាង

អត្ថបទពាក់ព័ន្ធ ៖ គ្រូ ៧ ភាសា និងគ្រូបារមី ៥ នាក់ ចុះកិច្ចសន្យាឈប់បំពុលសង្គម

The post ជាថ្មីម្ដងទៀត គ្រូបារមីស្នងរូប ៧ ភាសា ចុះកិច្ចសន្យាបញ្ឈប់សកម្មភាពប៉ះពាល់ តម្លៃព្រះពុទ្ធសាសនា និងសង្គម appeared first on Kampuchea Thmey Daily.

មន្ទីរធម្មការរាជធានីភ្នំពេញ ចុះធ្វើកិច្ចសន្យាអ្នកតាំងខ្លួនជាតាបសភ្នំគូលេន ឲ្យបញ្ឈប់សកម្មភាពចែកចាយវីដេអូធ្វើឲ្យប៉ះពាល់សង្គម

Sokhom Khon — Mon, 26 May 2025 00:38:46 +0000

កាលពីរសៀលថ្ងៃអាទិត្យ ថ្ងៃទី២៥ ខែឧសភា ឆ្នាំ២០២៥ លោក ទេព គង្គា ប្រធានមន្ទីរធម្មការនិងសាសនារាជធានីភ្នំពេញ បានសហការជាមួយស្ថាប័នពាក់ព័ន្ធ និងអាជ្ញាធរមូលដ្ឋានខណ្ឌសែនសុខ ចុះធ្វើការណែនាំលោក ថោង សុខុម ហៅលោកគ្រូភ្នំគូលេន ជុំវិញការបង្ហោះវីដេអូ និងរូបភាពនៅលើបណ្ដាញសង្គមធ្វើឱ្យប៉ះពាល់ដល់សង្គម។

ក្រុមការងារមន្ទីរធម្មការ ក៏បានធ្វើកិច្ចសន្យាបញ្ឈប់ការបង្ហោះ និងលុបវីដេអូ រូបថតសកម្មភាពផ្សេងៗ ដែលមានការប្រោះព្រំ ស្រោចទឹក ព្យាបាលជំងឺ ប្រសិទ្ធីមន្តគាថា ការដើរបិណ្ឌបាត្រដោយស្លៀកដណ្ដប់គ្រងសំពត់បែបអ្នកបួសព្រះពុទ្ធសាសនា ជាដើម ទាំងចាស់ ទាំងថ្មីចេញពីប្រព័ន្ធបណ្ដាញសង្គមទាំងអស់។

លោក ថោង សុខុម បានទទួលស្គាល់ និងប្តេជ្ញាថា នឹងពិចារណាឱ្យម៉ត់ចត់ជាងមុនចំពោះការបង្ហោះមាតិកាណាមួយនាពេលក្រោយ ហើយនឹងសហការជាមួយអាជ្ញាធរដើម្បីលើកកម្ពស់ស្មារតីសង្គម រាល់សកម្មភាព និងរូបភាពធ្វើឱ្យប៉ះពាល់ដល់សង្គម តាមបណ្ដាញសង្គម។

ការចុះជួបនេះមានគោលបំណងផ្តល់ការណែនាំ បំភ្លឺ និងលើកទឹកចិត្តឱ្យបុគ្គលសាធារណៈបម្រើប្រព្រឹត្តនៅលើបណ្តាញសង្គមមានទំនួលខុសត្រូវ និងគោរពច្បាប់។ អាជ្ញាធរបានបញ្ជាក់ថា មាតិកាខ្លះៗក្នុងវីដេអូរបស់លោកថោង សុខុម ដែលបានបង្ហោះជាសាធារណៈ អាចនាំឱ្យមានការយល់ច្រឡំ ការបកស្រាយខុស និងបង្កការមិនល្អប្រសើរដល់សុវត្ថិភាពសង្គម៕

The post មន្ទីរធម្មការរាជធានីភ្នំពេញ ចុះធ្វើកិច្ចសន្យាអ្នកតាំងខ្លួនជាតាបសភ្នំគូលេន ឲ្យបញ្ឈប់សកម្មភាពចែកចាយវីដេអូធ្វើឲ្យប៉ះពាល់សង្គម appeared first on Kampuchea Thmey Daily.

មន្ទីរធម្មការ ចុះណែនាំ និងធ្វើកិច្ចសន្យាដល់ផ្ទះក្មេងស្រីល្បីមើលឃើញភពទាំងបី

Sokhom Khon — Fri, 22 Mar 2024 04:39:53 +0000

កាលពីរសៀលថ្ងៃទី២១ ខែមីនា ឆ្នាំ២០២៤ លោក ទេព គង្គា ប្រធានមន្ទីរធម្មការ និងសាសនារាជធានីភ្នំពេញ សហការជាមួយអាជ្ញាធរមូលដ្ឋាន បានចុះសម្របសម្រួលអប់រំណែនាំ និងធ្វើកិច្ចសន្យាដល់អាណាព្យាបាល និងក្មេងស្រីដែលល្បីមើលឃើញភពទាំងបី ឲ្យបញ្ឈប់ធ្វើសកម្មភាពបង្ហោះវីដេអូការទស្សន៍ទាយ សម្ដែងអភិនីហារ ដោះអំពើជាដើម ដែលធ្វើឱ្យប៉ះពាល់ដល់សណ្ដាប់ធ្នាប់សង្គម។

ការចុះធ្វើកិច្ចសន្យានេះបានធ្វើឡើងនៅចំណុចផ្ទះរបស់លោក សុត កុសល្យ (គ្រូចាប់សរសៃ) និងកូនស្រី កុសល្យ សុខមីល (គ្រូក្មេងមើលឃើញបីភព) ស្ថិតក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ បន្ទាប់ពីមន្ទីរធម្មការបានឃើញនូវការបង្ហោះវីដេអូចែកចាយនៅលើបណ្ដាញសង្គមពាក់ព័ន្ធពីការទស្សន៍ទាយ សម្ដែងអភិនីហារ ដោះអំពើ ដែលនាំឱ្យប៉ះពាល់ដល់សណ្ដាប់ធ្នាប់ សេចក្ដីថ្លៃថ្នូរសង្គម តាមរយៈបណ្ដាញសង្គមនានា។

ជាមួយគ្នានេះ លោក សុត កុសល្យ និងកូនស្រី ក៏បានអំពាវនាវដល់មហាជនដែលប្រើប្រាស់បណ្តាញសង្គមទាំងអស់ សូមបញ្ឈប់ការយកវីដេអូទាំងចាស់ ទាំងថ្មីរបស់លោក និងកូនស្រីកន្លងមកទៅបង្ហោះចែកចាយនៅលើបណ្ដាញសង្គមបន្តទៀត ប្រសិនបើមិនបញ្ឈប់ទេ នឹងត្រូវទទួលខុសត្រូវចំពោះមុខច្បាប់ជាធរមាន៕

អត្ថបទ៖ សុខុម

The post មន្ទីរធម្មការ ចុះណែនាំ និងធ្វើកិច្ចសន្យាដល់ផ្ទះក្មេងស្រីល្បីមើលឃើញភពទាំងបី appeared first on Kampuchea Thmey Daily.