មួម៉ៅ Archives - Kampuchea Thmey Daily

កូនចូលដល់វ័យជំទង់ ចេះតែខឹងមួម៉ៅច្រើន អាចមកពីមូលហេតុទាំង ៥ នេះ

សាង ស្រីល័ក្ខ — Fri, 30 Sep 2022 02:00:36 +0000

ក្មេងជំទង់ប្រឈមនឹងបញ្ហាផ្លូវចិត្តជាច្រើន អំឡុងពេលនៃការអភិវឌ្ឍ និងលូតលាស់របស់ខ្លួន ហើយទំនាក់ទំនងរវាងប៉ាម៉ាក់ និងកូន ក៏អាចមានការប្រែប្រួលផងដែរ នៅពេលដែលក្មេងកាន់តែមានភាពឯករាជ្យ។ ពិតណាស់ ប៉ាម៉ាក់អាចពិបាកប្រឈមនឹងបញ្ហាមួយនេះ និងនាំឲ្យមានការខកចិត្ត ច្របូកច្របល់ ឬជម្លោះរវាងប៉ាម៉ាក់ ហើយនិងកូនផងក៏មាន។ ហេតុនេះហើយ ការយល់ដឹងពីឫសគល់នៃបញ្ហា មានសារៈសំខាន់ណាស់ ដើម្បីឲ្យយើងស្វែងរកដំណោះស្រាយដ៏សមស្របក្នុងការអប់រំ និងទូន្មានកូនប្រកបដោយប្រសិទ្ធភាព។

មូលហេតុចម្បងទាំង៥ ដែលនាំឲ្យកូនចេះតែខឹងមួម៉ៅច្រើន

១. ការគាបសង្កត់

មានហេតុផលជាច្រើនដែលនាំឲ្យកូនខឹងមួម៉ៅច្រើនជាងក្មេងៗឯទៀត ហើយមូលហេតុមួយក្នុងចំណោមនោះ គឺប៉ាម៉ាក់តែងតែគ្រប់គ្រងកូនក្នុងការធ្វើរឿងរ៉ាវផ្សេងៗ ដែលអាចនាំឲ្យកូនស្រ្តេស និងខឹងក្រេវក្រោធ។ ជាទូទៅ ក្មេងជំទង់ចង់បានភាពឯករាជ្យ និងចង់ពឹងពាក់លើខ្លួនឯង ក្នុងការសម្រេចកិច្ចការផ្សេងៗ។

២. ភាពពេញវ័យ

ទន្ទឹមនឹងនេះដែរ អារម្មណ៍របស់កូននឹងកាន់តែតានតឹងជាងរាល់ដង នៅពេលចាប់ផ្ដើមពេញវ័យ ដោយសារមានការបញ្ចេញអ័រម៉ូនtestosterone និង estrogen ដែលធ្វើឲ្យក្មេងពិបាកក្នុងការគ្រប់គ្រងអារម្មណ៍ ឬប្រែប្រួលអារម្មណ៍ញឹកញាប់។

៣. ស្រ្តេស

ស្រ្តេសដែលកើតចេញពីបញ្ហាសង្គម សម្ពាធនៅសាលា និងសកម្មភាពក្រៅសាលារៀន អាចធ្វើឲ្យក្មេងជំទង់មានអារម្មណ៍មួម៉ៅ និងខឹងសម្បារច្រើន។ លើសពីនេះ ការខឹងសម្បារនេះក៏អាចបណ្ដាលមកពីព្រឹត្តិការណ៍តក់ស្លុតមួយចំនួន ដូចជាការបាត់បង់មនុស្សជាទីស្រលាញ់ ប៉ាម៉ាក់លែងលះគ្នា ឬគ្រោះថ្នាក់ផ្សេងៗ។

៤. បញ្ហាសុខភាព

បញ្ហាសុខភាពមួយចំនួន ដូចជាជំងឺBipolar disorders ជំងឺបាក់ទឹកចិត្ត ក៏អាចផ្សារភ្ជាប់ទៅនឹងការខឹងមួម៉ៅរបស់កូនដែរ។ ប្រសិនបើកូនមិនអាចដោះស្រាយបញ្ហានេះបានទេនោះ ក្មេងនឹងអាចបន្ទោស និងមើលងាយខ្លួនឯង ព្រមទាំងបាត់បង់ទំនុកចិត្តលើខ្លួនឯង ក៏ដូចជាព្យាយាមធ្វើបាបខ្លួនឯងតាមគ្រប់វិធី។

៥. ការប្រើសារធាតុញៀន

ការផឹកគ្រឿងស្រវឹង ថ្នាំញៀន និងជក់បារីក៏អាចកាត់បន្ថយសមត្ថភាពក្នុងការគិតរបស់ក្មេង។ លើសពីនេះ សារធាតុទាំងនេះ អាចឲ្យកូនពិបាកផ្ដោតអារម្មណ៍ កោងកាច ហើយប្រហែលជា៦០% អាចប្រព្រឹត្តអំពើហិង្សា និងឧក្រិដ្ឋកម្មថែមទៀតផង៕

អត្ថបទផ្ដល់ដោយ៖Hello Krupet

ចុចអាន៖ឧស្សាហ៍ខឹង ឬមួម៉ៅ នេះវិធីងាយៗជួយឱ្យអារម្មណ៍ល្អឡើងវិញ

ចុចអាន៖ខ្លាចកូនលង់ខ្លួនរត់ចេញពីផ្ទះ ឪពុកម្ដាយត្រូវដឹងតិចនិកដោះស្រាយទាំងនេះ

The post កូនចូលដល់វ័យជំទង់ ចេះតែខឹងមួម៉ៅច្រើន អាចមកពីមូលហេតុទាំង ៥ នេះ appeared first on Kampuchea Thmey Daily.

ឧស្សាហ៍ខឹង ឬមួម៉ៅ នេះវិធីងាយៗជួយឱ្យអារម្មណ៍ល្អឡើងវិញ

Sonya — Thu, 09 Dec 2021 07:46:00 +0000

និយាយរឿងខឹង មួម៉ៅ ឬអារម្មណ៍មិនល្អ នរណាក៏មានដែរ គ្រាន់តែខ្លះកើតញឹកញាប់ ខ្លះទៀត អាចគ្រប់គ្រងអារម្មណ៍ និងបញ្ហាបាន ទើបមិនសូវកើតញឹកញាប់។ ទោះយ៉ាងណា មានវិធីមួយចំនួន ដែលគ្នាយើងអាចយកអនុវត្តបាន ដើម្បីជួយឲ្យអារម្មណ៍ល្អ។

១. សម្អាតចិត្ត

យើងអាចធ្វើសមាធិរយៈពេលខ្លី ដើម្បីឲ្យចិត្តស្ងប់។ វាជារឿងសាមញ្ញទេ ដោយយើងអង្គុយស្ងៀមស្ងាត់ បិទភ្នែក និងផ្ដោតលើការដកដង្ហើមចេញ-ចូល។ វីធីនេះ ជួយអារម្មណ៍កាន់តែល្អ មានការអត់ធ្មត់ខ្លាំង និងប្រឆាំងបញ្ហាស្ត្រេសបានទៀត។

២. ចេញទៅខាងក្រៅ

យើងអាចចេញទៅបរិយាកាសខាងក្រៅ ដើម្បីស្រូបក្លិនផ្កា ខ្យល់បរិសុទ្ធ ឬអង្គុយលេងពេលព្រះអាទិត្យរះឡើង។ តាមការសិក្សា ការចេញទៅខាងក្រៅដូច្នេះ ជួយឲ្យយើងមានថាមពល ការចងចាំល្អ និងថប់បារម្ភតិច។ បើយើងនៅទីក្រុង ការអង្គុយលេងនៅតាមសួនច្បារ ជាជម្រើសល្អមួយ។

៣. សើច

យើងមិនអាចនៅសុខៗ ចង់សើច សើចចេញបាននោះទេ ប៉ុន្ដែយើងអាចអានរឿង ឬមើលវីដេអូកំប្លែងបាន។ ការសើច ជួយឲ្យអារម្មណ៍ធូរស្រាល និងរំញោចដល់បេះដូង សួត និងសាច់ដុំនានា។ វាក៏ជួយឲ្យខួរក្បាលបញ្ចេញ Endophins ដែលជាអ័រម៉ូនជួយឲ្យអារម្មណ៍ល្អ។

៤. ស្ដាប់ចម្រៀងដែលយើងចូលចិត្ត

ការស្ដាប់ចម្រៀងដែលយើងចូលចិត្ត អាចជួយសម្រួលអារម្មណ៍របស់យើងបាន។ អ្នកស្រាវជ្រាវ ពន្យល់ថា ចម្រៀងជួយកាត់បន្ថយបញ្ហាថប់បារម្ភ និងការឈឺចាប់ ហើយវារឹតតែប្រសើរទៀត បើយើងរាំបាន។

៥. ជួបពួកម៉ាក

យើងអាចជួយពួកម៉ាក ជជែកគ្នានៅតាមហាងកាហ្វេ ឬជួបជុំគ្រួសារ ញ៉ាំបាយ ជជែកគ្នាលេង។ ការទំនាក់ទំនងជាមួយមនុស្សផ្សេងទៀត គឺជាការបង្កើនទំនាក់ទំនងសង្គម ហើយវាជួយគាំទ្រដល់យើង។ បើតាមការសិក្សា ទំនាក់ទំនងល្អ ជាមធ្យោបាយមួយ ជួយឲ្យយើងកាន់តែសប្បាយជាងមុន។

៦. ពត់ខ្លួន

ប្រសិននៅកន្លែងធ្វើការ យើងអាចសម្រាកបន្ដិច ហើយពត់ខ្លួន ស្មា ត្រគៀក និងក។ ពេលយើងពត់ខ្លួនដូច្នេះ វាជួយបន្ថយបញ្ហាស្ត្រេស និងបញ្ជូនឈាមបន្ថែមទៀត ទៅកាន់សាច់ដុំ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ដឹងវិធីនេះ អាចជួយរំសាយអារម្មណ៍ខឹងបានខ្លះ

ចុចអាន៖ អារម្មណ៍ប្រែប្រួល អាចបង្កការរំខានដល់សរីរាង្គខ្លាំង មិនចាញ់ជំងឺឆ្លង

The post ឧស្សាហ៍ខឹង ឬមួម៉ៅ នេះវិធីងាយៗជួយឱ្យអារម្មណ៍ល្អឡើងវិញ appeared first on Kampuchea Thmey Daily.

ម៉េចបានយើងឆាប់មួម៉ៅ ពេលឃ្លានម្ដងៗ?

Sonya — Sat, 09 Oct 2021 04:06:00 +0000

ចាប់អារម្មណ៍អត់ថា ពេលយើងឃ្លានខ្លាំង តែងមានអារម្មណ៍ថា ឆាប់ខឹងមួម៉ៅជាងពេលធម្មតា? តាមបែបវិទ្យាសាស្ត្រ មកពីរាងកាយត្រូវការអាហារ ហើយខួរក្បាលត្រូវការជាតិស្ករ។

១- ម៉េចបានអារម្មណ៍ឆាប់មួម៉ៅពេលឃ្លាន?

កម្រិតជាតិស្ករគ្រប់គ្រាន់ក្នុងខួរក្បាល ជួយឲ្យចេះគ្រប់គ្រងចរន្តដែលបង្កជាឥរិយាបថហិង្សា។ ពេលញ៉ាំឆ្អែត មានជាតិស្ករគ្រប់គ្រាន់ ធ្វើឲ្យអារម្មណ៍ស្ងប់ល្អ។ ពេលរាងកាយមានជាតិស្ករមិនគ្រប់ អ័រម៉ូនផ្សេងៗត្រូវបញ្ចេញពីរាងកាយ ដូចជា អ័រម៉ូន adrenaline ដែលធ្វើឲ្យមនុស្សមានអាការៈឆេវឆាវប្រើហិង្សា ជាដើម។

ឯហ្សែនរបស់យើងក៏ដើរតួនាទីមួយផ្នែកផងដែរ ដោយបង្កើតសារធាតុម៉្យាងបញ្ចេញទៅក្នុងខួរក្បាល ពេលឃ្លានអាហារ។

២- ដំណោះស្រាយ

ទូទៅ យើងរវល់ ទើបកើតអាការៈឃ្លានខ្លាំង ហើយបានរត់រកអីញ៉ាំ។ អ៊ីចឹង ចន្លោះពេលឃ្លានខ្លាំង អាចត្រៀមអាហារសម្រន់ ឬរបស់កំប៉ិកកំប៉ុកដាក់មាត់ខ្លះ មុនដល់បានអាហារសំខាន់។

បើគ្នាយើងកំពុងសម្រកគីឡូ គួររើសអាហារមានប្រូតេអ៊ីនខ្ពស់ ហើយផ្លែឈើជាជម្រើសមួយដ៏ល្អ ពេលយើងមានអារម្មណ៍ឃ្លានខ្លាំង មុនពេលញ៉ាំអាហារពីរបីម៉ោងក្រោយមក៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ចេះតែមិនឃ្លានបាយ? វិធីនេះអាចជួយបាន

ចុចអាន៖ មូលហេតុ ៤ យ៉ាង ធ្វើឲ្យយើងបាត់បង់ចំណង់អាហារពេលព្រឹកលែងសូវឃ្លានដូចមុន

The post ម៉េចបានយើងឆាប់មួម៉ៅ ពេលឃ្លានម្ដងៗ? appeared first on Kampuchea Thmey Daily.