មឿនលីម សុបញ្ញា Archives - Kampuchea Thmey Daily

ព្រឹកនេះ កីឡាករជឺជីតស៊ូកម្ពុជា ៣ នាក់ប្រកួតកីឡាឆ្នេរខ្សាច់អាស៊ី ខណៈ សុបញ្ញា សង្ឃឹមជាងគេ

chean virakbot — Fri, 24 Apr 2026 00:00:00 +0000

កីឡាករជឺជីតស៊ូជម្រើសជាតិកម្ពុជា ត្រូវប្រកួតក្នុងព្រឹត្តិការណ៍កីឡាឆ្នេរខ្សាច់អាស៊ី លើកទី ៦ ព្រឹកថ្ងៃសុក្រ ទី២៤ ខែមេសា ឆ្នាំ ២០២៦ នៅទីក្រុង Sanya ប្រទេសចិន។

កីឡាករ ហ៊ួរសេងហុង vs Bin Mohammed (ម៉ោង ៩ ព្រឹក)

កីឡាករ ហ៊ួរ សេងហុង ត្រូវប្រឈមនឹងកីឡាករជម្រើសជាតិអារ៉ាប៊ីសាអ៊ូឌីត Bin Mohammed លើវិញ្ញាសាទម្ងន់ -៦៩គីឡូក្រាម វគ្គ ៣២ នាក់ដំបូង។

កីឡាករ ហ៊ួរ សេងហុង មិនសូវមានបទពិសោធច្រើនលើឆាកអន្តរជាតិ។ ចំពោះកីឡាករអារ៉ាប៊ីសាអ៊ូឌីតរូបនេះជាជើងខ្លាំងដែលស្ថិតនៅចំណាត់ថ្នាក់លេខ ១ ពិភពលោក World Championship កាលពី ឆ្នាំ ២០២៥ និងចំណាត់ថ្នាក់លេខ ៧ កាលពីឆ្នាំ ២០២៤ ព្រមទាំងចំណាត់ថ្នាក់លេខ២ ជើងជឺជីតស៊ូអាស៊ីខាងលិច JJAU West Asia Regional Jiu-Jutsu Championship ឆ្នាំ ២០២៥។

កីឡាករ សៅ សុភារ៉ា ប៉ះ Soonthorn Sarin (ម៉ោង ៩:៣០នាទី ព្រឹក)

កីឡាករ សៅ សុភារ៉ា ត្រូវប៉ះសត្រូវដៃគូប្រទេសជិតខាងគឺកីឡាករថៃ Soonthorn Sarin លើវិញ្ញាសាទម្ងន់ -៦៩គីឡូក្រាម វគ្គ ៣២ នាក់ដំបូង។ កីឡាករកម្ពុជាមានបទពិសោធច្រើនលើឆាកអន្តរជាតិទាំងការប្រកួតកីឡាស៊ីហ្គេម ការប្រកួតជឺជីតស៊ូជើងឯកអាស៊ាន និងជើងឯកអាស៊ីថ្នាក់តំបន់។ ចំពោះកីឡាករថៃលេខ ៣ ក្នុងការប្រកួតជឺជីតស៊ូជើងឯកអាស៊ី ឆ្នាំ ២០២៣ និងលេខ១ សម្រាប់ការប្រកួតអន្តរជាតិនៅបាំងកក ឆ្នាំ ២០២៤។

កីឡាករ មឿនលីម សុបញ្ញា ប៉ះ Koo Boncheol (ម៉ោង ៩:៣០នាទី ព្រឹក)

កីឡាករ មឿនលីម សុបញ្ញា ប៉ះកីឡាករកូរ៉េខាងត្បូង Koo Boncheol លើវិញ្ញាសាទម្ងន់ -៧៧គីឡូក្រាម វគ្គ ៣២នាក់ដំបូង។ កីឡាករកម្ពុជារូបនេះជាក្តីសង្ឃឹមខ្ពស់របស់សហព័ន្ធកីឡាជឺជីតស៊ូកម្ពុជា។ មឿនលីម សុបញ្ញា បានឈ្នះមេដាយជាច្រើនទាំងការប្រកួតតំបន់អាស៊ាន អាស៊ី និងអន្តរជាតិ ខណៈកីឡាករកូរ៉េខាងត្បូងក៏មិនធម្មតាដែរគឺធ្លាប់ឈ្នះមេដាយប្រាក់ជើងឯកពិភពលោក ឆ្នាំ ២០២២ និងមេដាយប្រាក់ ជើងឯកអាស៊ី ឆ្នាំ ២០២៣។

វិញ្ញាសានីមួយៗពិតជាពិបាកស្វែងរកមេដាយណាស់ ដោយសារមានបេក្ខភាពរហូតដល់ ៣២នាក់។ កីឡាករណាឈ្នះឡើងទៅកាន់វគ្គបន្ត ហើយកីឡាករណាចាញ់អស់ឱកាស ដូច្នេះមុនឈានដល់វគ្គដណ្តើមមេដាយត្រូវឆ្លងកាត់ច្រើនប្រកួតក្នុងថៃតែមួយ។

សូមបញ្ជាក់ថា កីឡាករជឺជីតស៊ូកម្ពុជា កៃមុន្នី រីឆាវ៉ាត់ បានប្រកួតឈ្នះកីឡាករអ៊ីរ៉ង់ Nazemi Ali លើវិញ្ញាសាទម្ងន់ -៦២គីឡូក្រាម នៅវគ្គ ៣២ នាក់ដំបូង និងបានឡើងទៅវគ្គ ១៦នាក់ចុងក្រោយ ប៉ុន្តែបានចាញ់កីឡាករអារ៉ាប់រួម Alsuwaid Omar កាលពីព្រឹកថ្ងៃទី២៣ ខែមេសា ឆ្នាំ ២០២៦៕

អត្ថបទ៖ វិរបុត្រ

The post ព្រឹកនេះ កីឡាករជឺជីតស៊ូកម្ពុជា ៣ នាក់ប្រកួតកីឡាឆ្នេរខ្សាច់អាស៊ី ខណៈ សុបញ្ញា សង្ឃឹមជាងគេ appeared first on Kampuchea Thmey Daily.

អតីតយុវជនបឹងកេត មឿនលីម សុបញ្ញា ក្លាយជាកីឡាករជឺជីតស៊ូដ៏ឆ្នើម

chean virakbot — Thu, 04 Sep 2025 01:45:44 +0000

កីឡាករ មឿនលីម សុបញ្ញា មានបំណងក្លាយជាកីឡាករបាល់ទាត់អាជីព ប៉ុន្តែចុងក្រោយបានក្លាយជាកីឡាករជឺជីតស៊ូតជម្រើសជាតិកម្ពុជាដ៏ជោគជ័យលើឆាកអន្តរជាតិ។

ពីក្មេងស្រឡាញ់បាល់ទាត់ ដល់ធំក្លាយជាកីឡាករជឺជីតស៊ូ

សុបញ្ញា បានរៀបរាបថា ខ្លួនមានកំណើតនៅរាជធានីភ្នំពេញ ប៉ុន្តែឪពុកម្តាយជាអ្នកខេត្តកំពង់ចាម។ កាលពីតូច រូបគេចូលចិត្តបាល់ទាត់ទាំងមើលតាមទូរទស្សន៍ ទៅមើលផ្ទាល់នៅពហុកីឡដ្ឋានជាតិអូឡាំពិក និងលេងបាល់ទាត់។ ចំណង់ចំណូលចិត្តលើបាល់ទាត់បានបើកផ្លូវឲ្យខ្លួនទទួលបានឱកាសហ្វឹកហាត់ត្រឹមត្រូវនៅក្នុងក្រុមយុវជនអាយុ១៥ឆ្នាំរបស់ក្លិបបឹងកេត។

កីឡាករបានប្រាប់ថា ៖«កាលពីក្មេង ខ្ញុំហាត់បាល់ទាត់ រហូតបានជាប់ក្រុមយុវជនបឹងកេត អាយុ ១៥ឆ្នាំ។ នៅពេលនោះ ប៉ារបស់ខ្លួនមិនសូវពេញចិត្តកីឡាបាល់ទាត់ទេ ដោយសារកីឡានេះហានិភ័យខ្ពស់ គាត់ឲ្យខ្ញុំឈប់ពីបាល់ទាត់។ ខ្ញុំស្រឡាញ់បាល់ទាត់ណាស់។ ខ្ញុំចូលចិត្តលេង ហើយមើលតាមទូរទស្សន៍រហូត។ ពេលខ្ញុំបានចូលហ្វឹកហាត់នៅក្រុមយុវជនបឹងកេត គេសរសើរខ្ញុំថា មានបច្ចេកទេសល្អ ធ្វើឲ្យខ្ញុំកាន់តែមានទឹកចិត្តប្រឹងប្រែង តែប៉ារបស់ខ្ញុំអត់ចង់ឲ្យចាប់អាជីពបាល់ទាត់។ គាត់ឲ្យខ្ញុំបោះបង់ចោលបាល់ទាត់ ធ្វើឲ្យខ្ញុំពិបាកចិត្ត សោកស្តាយយ៉ាងខ្លាំង»។

ទោះបីជាដើរចេញពីកីឡាបាល់ទាត់ ក៏យុវជនរូបនេះមិនឃ្លាតទៅណាឆ្ងាយពីកីឡាឡើយ។ នៅដើមឆ្នាំ ២០២២ មឿនលីម សុបញ្ញា បានចាប់អារម្មណ៍នឹងកីឡាជឺជីតស៊ូ។ កីឡាករបានប្រាប់ថា ពេលខ្លួនមើលការប្រកួតកីឡាគុនចម្រុះ រូបគេបានចាប់អារម្មណ៍ពីក្បាច់ប្លែកៗដូចជាក្បាច់ឃ្លេ ចំបាប់ និងជឺជីតស៊ូជាដើម។ ពេលនោះ រូបគេស្គាល់ក្លិបជឺជីតស៊ូមួយឈ្មោះ «គិរី» ហើយក៏បានទៅសុំហ្វឹកហាត់។

សុបញ្ញា បានបន្តរៀបរាប់ថា ៖«ពេលខ្ញុំហាត់កីឡាជឺជីតស៊ូដំបូង គឺពិបាកដែរ ពីព្រោះកីឡានេះមានក្បាច់ បច្ចេកទេសច្រើន ខុសប្លែកពីកីឡាបាល់ទាត់។ បញ្ហាលំបាកជាងគេគឺខ្ញុំបានហាត់កីឡាបាល់ទាត់តាំងពីតូច ដល់មកហាត់កីឡាជឺជីតស៊ូគឺប្លែក»។ ការហ្វឹកហាត់កីឡាជឺជីតស៊ូពីដំបូងៗមិនបានប្រាប់ឪពុកម្តាយឲ្យដឹងឡើយ ដោយសារពួកគាត់មិនចង់ឲ្យចាប់អាជីពកីឡា។ ទាល់តែរូបគេចូលរួមប្រកួតកីឡាជឺជីតស៊ូថ្នាក់ជាតិ ចុងឆ្នាំ ២០២២ ទើបទទួលបានការគាំទ្រលើកទឹកចិត្តពីឪពុក បន្ទាប់ពីរូបគេបានឈ្នះមេដាយប្រាក់ថ្នាក់ជាតិ។

កីឡាករបាននិយាយថា ៖«ប៉ារបស់ខ្ញុំឲ្យរៀន គណនេយ្យ និងហិរញ្ញវត្ថុ ពីព្រោះគាត់ធ្វើការងារផ្នែកនេះ។ គាត់ចង់ឲ្យខ្ញុំធ្វើការផ្នែកនេះដែរ។ គាត់អត់ចង់ឲ្យចាប់អាជីពកីឡាទេ»។

ការប្រកួតលើឆាកអន្តរជាតិ

កីឡាករ មឿនលីម សុបញ្ញា ត្រូវបានកោះហៅចូលជម្រើសជាតិជឺជីតស៊ូកម្ពុជា និងទទួលបានឱកាសចេញទៅប្រកួតនៅក្រៅប្រទេសជាច្រើនលើក ក្រោយហ្វឹកហាត់ និងបានចូលរួមប្រកួតថ្នាក់ជាតិ។ រូបគេមិនបានចូលរួមប្រកួតកីឡាស៊ីហ្គេម ឆ្នាំ ២០២៣ ដែលប្រទេសកម្ពុជា ធ្វើជាម្ចាស់ផ្ទះលើកដំបូងទេ។ ទោះបីជាយ៉ាងណា ចាប់ពីឆ្នាំ ២០២៣ រហូតដល់ឆ្នាំ ២០២៥ រូបគេបានចេញទៅប្រកួតក្នុងព្រឹត្តិការណ៍អន្តរជាតិជាច្រើនទាំងកម្រិតអាស៊ាន អាស៊ី និងតំបន់។ ជាក់ស្តែង កីឡាទ្វីបអាស៊ី Asian Games ឆ្នាំ ២០២៣ នៅប្រទេសចិន។ ការប្រកួតកីឡាជឺជីតស៊ូជើងឯកអាស៊ាន ការប្រកួតកីឡាជឺជីតស៊ូជើងឯកអាស៊ីថ្នាក់តំបន់ ឆ្នាំ ២០២៤ និង ២០២៥។

កាលពីដើម ឆ្នាំ ២០២៥ មឿនលីម សុបញ្ញា បានចេញទៅហ្វឹកហាត់នៅសហរដ្ឋអាមេរិករយៈពេល ៣ ខែ។ នៅទីនោះ រូបគេក៏បានចូលរួមប្រកួតក្នុងកម្មវិធីមួយចំនួនដោយបានឈ្នះមេដាយមាស ២គ្រឿង ថែមទៀតផង។

សមិទ្ធផល

គិតត្រឹមខែកក្កដា ឆ្នាំ ២០២៥ កីឡាករ មឿនលីម សុបញ្ញា បានឈ្នះមេដាយអន្តរជាតិមិនក្រោម ២០ គ្រឿងឡើយ ទាំងការប្រកួតតំណាងឲ្យក្លិប និងតំណាងជាតិ។ នៅឆ្នាំ ២០២៥ រូបគេបានឈ្នះមេដាយមាស ៤ និងប្រាក់ ២ ពីព្រឹត្តិការណ៍អន្តរជាតិផ្សេងដូចជា SEA Ju-Jitsu Championship, Asian Ju-Jitsu Championship និងការប្រកួតនៅសហរដ្ឋអាមេរិក Nationals Jiu-Jitsu Open។

ឆ្នាំ ២០២៤ រូបគេបានឈ្នះមេដាយមាស ៨ ប្រាក់ ១ និងសំរិទ្ធ ១ ពីព្រឹត្តិការណ៍អន្តរជាតិនានាដូចជា ASIAN Regional Championship Southeast Asia, AFG OPEN International និង Ju-Jitsu Thailand Championship ព្រមទាំងព្រឹត្តិការណ៍អន្តរជាតិមួយចំនួនទៀតដែលរូបគេចាំមិនអស់។

កីឡាករបានលើកឡើងថា ៖«គោលដៅសំខាន់របស់ខ្ញុំគឺចង់ឈ្នះមេដាយមាសក្នុងព្រឹត្តិការណ៍ធំផ្លូវការគឺកីឡាស៊ីហ្គេម កីឡាទ្វីបអាស៊ី និងមេដាយមាសពិភពលោកជូនជាតិ»។

កីឡាផ្តល់ឲ្យស្មារតីរឹងមាំ

កាលពីកុមារភាព មឿនលីម សុបញ្ញា មិនសូវមែនចេះនិយាយច្រើន ឬប្រាស្រ័យទំនាក់ល្អជាមួយអ្នកដទៃឡើយ ប៉ុន្តែការចាប់អាជីពកីឡាបានផ្តល់ឲ្យរូបគេមានសុខភាពល្អ ស្មារតីល្អ និងទំនាក់ទំនងល្អជាមួយអ្នកដទៃ។

កីឡាករបានលើកឡើងថា ៖«បច្ចុប្បន្ន ខ្ញុំជឿជាក់លើខ្លួនឯង និងចេះគោរពមនុស្សជុំវិញខ្លួនល្អ។ កាលពីមុន ខ្ញុំអៀនច្រើន មិនចង់និយាយ ខ្លាច ខ្មាសអៀនពេលនិយាយជាមួយដទៃ»។

សព្វថ្ងៃ កីឡាករ មឿនលីម សុបញ្ញា ជានិស្សិតជំនាញ«គណនេយ្យ និងហិរញ្ញវត្ថុ»នៅសាលា CamEd ក្នុងរាជធានីភ្នំពេញ។ កីឡាករសូមអរគុណដល់អ្នកមានគុណ និងក្រុមគ្រួសារដែលជួយទំនុកបម្រុង គាំទ្រ និងលើកទឹកចិត្តរូបគេ។ ជាមួយគ្នានេះ រូបគេក៏សូមអរគុណដល់លោកគ្រូ Jasper Paas និងគ្រូនៅសាលាដែលបានឧបត្ថម្ភលើកទឹកចិត្ត ព្រមទាំងថវិកាសម្រាប់ការហ្វឹកហាត់រហូតមក៕

អត្ថបទ៖ វីរបុត្រ
រូបភាពរបស់សហព័ន្ធកីឡាជឺជីតស៊ូកម្ពុជា

The post អតីតយុវជនបឹងកេត មឿនលីម សុបញ្ញា ក្លាយជាកីឡាករជឺជីតស៊ូដ៏ឆ្នើម appeared first on Kampuchea Thmey Daily.

មឿនលីម សុបញ្ញា Archives - Kampuchea Thmey Daily

ព្រឹក​នេះ កីឡាករ​ជឺជីតស៊ូកម្ពុជា​ ៣ នាក់​ប្រកួត​កីឡា​ឆ្នេរខ្សាច់​អាស៊ី ខណៈ សុបញ្ញា សង្ឃឹមជាង​គេ

អតីត​យុវជន​បឹងកេត មឿនលីម​ សុបញ្ញា ក្លាយ​ជា​កីឡាករ​ជឺជីតស៊ូ​ដ៏​ឆ្នើម

ព្រឹកនេះ កីឡាករជឺជីតស៊ូកម្ពុជា ៣ នាក់ប្រកួតកីឡាឆ្នេរខ្សាច់អាស៊ី ខណៈ សុបញ្ញា សង្ឃឹមជាងគេ

អតីតយុវជនបឹងកេត មឿនលីម សុបញ្ញា ក្លាយជាកីឡាករជឺជីតស៊ូដ៏ឆ្នើម