ម្ហូបប្រចាំតំបន់ Archives - Kampuchea Thmey Daily

ផ្លែឈើប៉ុន្មានមុខនេះ មានសក្តានុពលល្បីល្បាញជាអត្តសញ្ញាណតំណាងខេត្តទាំង ៧

Din Thary — Sun, 18 Feb 2024 02:44:45 +0000

នៅតាមរាជធានី-ខេត្ត ទាំង ២៥ ក្នុងប្រទេសកម្ពុជា មានផ្លែឈើតំណាងប្រចាំតំបន់ដោយសារតែភាពអំណោយផលជាមួយសក្តានុពលដាំដុះ ព្រមទាំងគុណភាព និងរសជាតិ។ ជាក់ស្តែងខេត្តចំនួន ៧ មានផ្លែឈើជាអត្តសញ្ញាណប្រចាំតំបន់ដែលមានការទទួលស្គាល់ពីមជ្ឍដ្ឋាននានារួមទាំងពលរដ្ឋក្រៅតំបន់ផងដែរ។

កម្ពុជាថ្មីនឹងបង្ហាញផ្លែឈើសំខាន់ៗប្រចាំនៅខេត្តចំនួន ៧ មានដូចជា កំពត(ទុរេន) ប៉ៃលិន (មៀន ឬតាង៉ែន) បាត់ដំបង (ក្រូចពោធិ៍សាត់) មណ្ឌលគិរី (ប័រ) ក្រចេះ (ក្រូចថ្លុងកោះទ្រង់) ស្ទឹងត្រែង (ម្នាស់ទឹកឃ្មុំ) និងកំពង់ស្ពឺ (ស្វាយកែវរមៀត)។

១. ទុរេនកំពត

ខេត្តកំពត គឺជាខេត្តដែលមានភាពល្បីល្បាញជាងគេពីរសជាតិទុរេន។ មិនថាភ្ញៀវទេសចរ ឬពលរដ្ឋដែលរស់នៅខេត្តផ្សេងទេ តែងចូលចិត្តរសជាតិទុរេនកំពត ព្រោះទុរេនកំពតអាចធានាបានទាំងគុណភាព គ្មានជាតិគីមី និងមានរសជាតិឈ្ងុយឆ្ងាញ់ជាងខេត្តដទៃ។

ជារៀងរាល់ឆ្នាំ នៅពេលរដូវប្រមូលផល ទុរេនកំពតតែងទទួលបានតម្រូវការទីផ្សារខ្លាំងទាំងក្នុងតំបន់ និងតាមបណ្តាខេត្តនានា។ តាមរបាយការណ៍របស់មន្ទីរកសិកម្មខេត្តកំពត នៅឆ្នាំ២០២៣ ខេត្តកំពតមានផ្ទៃដីដាំដុះទុរេនប្រមាណ ២,៣៤៥ហិតា។

២. មៀនប៉ៃលិន

ខេត្តប៉ៃលិន ជាខេត្តមួយដែលស្ថិតនៅជ្រុងខាងជើងនៃជួរភ្នំក្រវាញ និងមានព្រំប្រទល់ជាប់ប្រទេសថៃ។ ខេត្តល្បីល្បាញលើអាជីវកម្មរ៉ែត្បូងនេះ មានអំណោយផលល្អផ្នែកឈើហូបផ្លែ ដូចជា ស្វាយ ចេក សាវម៉ាវ ធុរ៉េន មង្ឃុត ជាពិសេសគឺមៀនប៉ៃលិន ឬតាង៉ែន។

មៀនប៉ៃលិន ឬតាង៉ែន គឺជាផ្លែឈើមួយដែលទទួលបានការយកចិត្តទុកដាក់ខ្ពស់ពីថ្នាក់ដឹកនាំខេត្ត និងប្រជាកសិករ ហើយបានក្លាយទៅជាផ្លែឈើអាទិភាពរបស់ខេត្ត។ ក្រៅពីខេត្តប៉ៃលិន ក៏បណ្តាខេត្តជាច្រើនដែលមានដាំដុះមៀនប៉ៃលិន ឬតាង៉ែនដូចជាបាត់ដំបងនិងខេត្តបន្ទាយមានជ័យ។

៣. ក្រូចពោធិ៍សាត់

នៅខេត្តបាត់ដំបង ក្រូចពោធិ៍សាត់មានឈ្មោះល្បីល្បាញតាំងពីយូរណាស់មកហើយរហូតមកដល់ពេលបច្ចុប្បន្ននេះ។ ក្រូចពោធិ៍សាត់បាត់ដំបង តែងទទួលបានការគាំទ្រពីអតិថិជននៅពេលរដូវកាលក្រូចមកដល់ ព្រោះក្រូចពោធិ៍សាត់បាត់ដំបងមានសាច់ពេញល្អជាមួយរសជាតិផ្អែមឆ្ងាញ់។

បើតាមមន្ទីរកសិកម្មខេត្តបាត់ដំបង បច្ចុប្បន្នផ្ទៃដីដាំដុះដំណាំក្រូចពោធិ៍សាត់នៅក្នុងខេត្តបាត់ដំបងមានជាង ១ ពាន់ហិកតា។ ស្រុកដែលមានផ្ទៃដីដាំដុះដំណាំក្រូចពោធិ៍សាត់ច្រើនជាងគេ គឺនៅស្រុកបរវេលមានជាង ៣៩១ ហិតា ស្រុកសង្កែ មានចំនួន ២៥៥ ហិតា និងនៅស្រុកបាណន់ មានប្រមាណ ១១៧ ហិតា។

៤. ប័រមណ្ឌលគិរី

ខេត្តមណ្ឌលគិរី គឺជាខេត្តដែលមានអំណោយផលបំផុតលើវិស័យកសិកម្ម ដោយសារភូមិសាស្រ្តជាតំបន់ដីក្រហមមានជីវជាតិល្អ។

ផ្លែរប័រមណ្ឌលគិរីត្រូវបានទទួលស្គាល់ថា ជាប័រដែលមានរសជាតិឆ្ងាញ់ និងគុណភាពល្អជាងបណ្តាខេត្តដទៃ ដែលធ្វើឲ្យដំណាំប័រក្លាយទៅជាឈើហូបផ្លែដែលមានអាទិភាពជាងគេក្នុងខេត្តភូមិភាគឦសាននេះ។

៥. ក្រូចថ្លុងកោះទ្រង់

ក្រូចថ្លុងកោះទ្រង់ ជាផ្លែឈើសំខាន់មួយមុខនៅក្នុងខេត្តក្រចេះ រហូតត្រូវបានក្រសួងពាណិជ្ជកម្មចុះបញ្ជីជាម៉ាកសម្គាល់ភូមិសាស្ត្រថែមទៀតផង។ ក្រូចថ្លុងកោះទ្រង់ ល្បីដោយសាររសជាតិផ្អែម សាច់ណែនល្អ ហើយដែលមានការដាំដុះច្រើនលើទឹកដីកោះទ្រង់លើផ្ទៃដីរាប់សិបហិតា។

៦. ម្នាស់ទឹកឃ្មុំខេត្តស្ទឹងត្រែង

ម្នាស់ទឹកឃ្មុំនៅស្រុកសៀមបូក ខេត្តស្ទឹងត្រែង មានរសជាតិឆ្ងាញ់ប្លែកខុសពីម្នាស់ក្នុងខេត្តផ្សេងទៀតដែលមានដាំដុះដូចគ្នា។ ដោយសាររសជាតិប្លែក ម្នាស់ទឹកឃ្មុំខេត្តស្ទឹងត្រែងក៏ត្រូវបានផលិតនិងកែច្នៃទៅជាស្រាម្នាស់ទឹកឃ្មុំ និងជាភេសជ្ជៈសម្រាប់នាំចេញទៅកាន់ទីផ្សារប្រទេសចិនផងដែរ។

បច្ចុប្បន្នអាជ្ញាធរក៏បានចងក្រងបង្កើតសហគមន៍ម្នាស់ទឹកឃ្មុំខេត្តស្ទឹងត្រែង សំដៅជួយលើកកម្ពស់ផលិតផល ទាក់ទាញទីផ្សារ និងបង្កើនប្រាក់ចំណូលដល់ពលរដ្ឋ។

៧. ស្វាយកែវរមៀតកំពង់ស្ពឺ

ស្វាយកែវរមៀតខេត្តកំពង់ស្ពឺ បានក្លាយទៅជាដំណាំនាំចេញទៅខាងក្រៅ និងលក់លើទីផ្សារក្នុងស្រុក។ ខេត្តកំពង់ស្ពឺមានផ្ទៃដីដាំដុះផ្លែស្វាយកែវរមៀតច្រើនជាងគេក្នុងចំណោមបណ្តាខេត្តនានា។ ជាក់ស្តែង បច្ចុប្បន្នខេត្តកំពង់ស្ពឺមានផ្ទៃដីដាំដុះស្វាយកែវរមៀតសរុបប្រមាណជា ៦ ម៉ឺនហិតា។

ក្រៅពីស្វាយ ខេត្តនេះក៏មានលក្ខណៈអំណោយផលល្អលើដំណាំផ្សេងៗទៀត ដូចជា ស្រូវ បន្លែ និងដូងជាដើម៕

The post ផ្លែឈើប៉ុន្មានមុខនេះ មានសក្តានុពលល្បីល្បាញជាអត្តសញ្ញាណតំណាងខេត្តទាំង ៧ appeared first on Kampuchea Thmey Daily.

ដូងខ្ទិះបាត់ដំបង មួយផ្លែលក់បានតម្លៃ ៤៥ ០០០ រៀល ដាំដុះ ៥-៦ ឆ្នាំ ទើបប្រមូលផលបាន

Din Thary — Thu, 07 Sep 2023 03:54:02 +0000

ដូងខ្ទិះបាត់ដំបង ជាអត្តសញ្ញាណនិងត្រូវបានទទួលស្គាល់ជាផលិតផលសសមូហភាពទំនិញពីក្រសួងពាណិជ្ជកម្ម។ ខណៈតម្រូវទីផ្សារកាន់តែទូលំទូលាយ ដំណាំសក្តានុពលនេះគេសង្កេតឃើញថាមានតែនៅខេត្តបាត់ដំបងដែលពលរដ្ឋនិយមដាំដុះច្រើន។

លោក ឡា ខេមរា ប្រធានក្រុមអ្នកផលិតនិងអាជីវករដូងខ្ទិះខេត្តបាត់ដំបងបានបញ្ជាក់ថា នៅក្នុងខេត្តបាត់ដំបង មានតែ ៣ តំបន់ដែលកសិករដាំដុះច្រើន មាននៅស្រុក សង្កែ បាណន់ និងឯកភ្នំ ដែលសរុបទាំង ៣ តំបន់នេះ មានដាំដូងខ្ទិះខ្ទង់ ៥០០ ទៅ ៦០០ ដើមប៉ុណ្ណោះ។

លោក ឡា ខេមរា បានឲ្យ «កម្ពុជាថ្មី» ដឹងថា ការប្រមូលផលដូងខ្ទិះ ក្នុង ១ ដើម បានចន្លោះពី ៣-៥ ផ្លែ និងអាចឈានដល់ ១០ ផ្លែ ក្នុងមួយដើមបើដើមល្អ បើនៅពេលខាងមុខដូងខ្ទិះកាន់តែមានអ្នកស្គាល់ និងមានអ្នកបរិភោគច្រើន ហើយទីផ្សារកាន់តែទូលំទូលាយជាងពេលបច្ចុប្បន្ន នឹងពិបាកនៅក្នុងការផ្គត់ផ្គង់ទីផ្សារព្រោះបច្ចុប្បន្នការផ្គត់ផ្គង់នៅមានកម្រិតនៅឡើយ។

លោកលើកឡើងបន្តថា នៅក្នុងខេត្តបាត់ដំបងតាំងពីមានការចងក្រងជាសមាគមឡើង ប្រជាពលរដ្ឋហាក់មានការយល់ដឹងច្រើនពីគុណប្រយោជន៍របស់ដូងខ្ទិះកាន់តែទូលំទូលាយ។

លោកអះអាងថា នាពេលខាងមុខទីផ្សារដូងខ្ទិះកាន់តែមានការផ្សព្វផ្សាយ និងមានការបរិភោគច្រើនជាងនេះ នោះតម្រូវការដូងខ្ទិះនៅក្នុងខេត្តបាត់ដំបងនឹងមិនអាចផ្គត់ផ្គង់បានគ្រប់គ្រាន់ឡើយ ព្រោះការដាំដូងខ្ទិះត្រូវការថែទាំបានត្រឹមត្រូវ ហើយត្រូវចំណាយពេលប្រមាណជា ៥-៦ ឆ្នាំទើបអាចប្រមូលផលបាន។

ប្រធានក្រុមអ្នកផលិត និងអាជីវករដូងខ្ទិះរូបនេះបញ្ជាក់ថា បច្ចុប្បន្ននេះតម្រូវការនៅក្នុងខេត្តបាត់ដំបងផ្ទាល់ ទិន្នផលដូងខ្ទិះអាចផ្គត់ផ្គង់បានគ្រប់គ្រាន់ ព្រោះក្នុងខែនេះមិនសូវមានការកម្មងទិញដូចនៅក្នុងកំឡុងខែឧសភា និង មិថុនា នោះទេ។

លោកថា ដូងខ្ទិះនៅក្នុងខេត្តបាត់ដំបងពេលនាំចេញទៅកាន់ទីផ្សារខាងក្រៅ ក៏មានការបិទបញ្ជាក់ជាឡូហ្គោដែលបញ្ជាក់ច្បាស់ពីគុណភាព ថាជាដូងខ្ទិះប្រភពពីខេត្តបាត់ដំបង។

លោក ឡា ខេមរា បានលើកពីគុណប្រយោជន៍នៃដូងខ្ទិះ គឺមានច្រើន ដោយអាចយកញាំធម្មតា ច្នៃចេញជាបង្អែម ឬទឹកក្រឡុកក៏បាន និងធ្វើជាអ្វីផ្សេងទៀតតាមចំណូលចិត្ត និងតាមតម្រូវការ គ្រាន់តែថាដូងនេះមានតម្លៃបន្តិចប៉ុណ្ណោះ ដោយដូងមានបែងចែកជា ២ប្រភេទ មានលេខ ១ និងលេខ២ ហើយលេខ១ មានតម្លៃ ៤៥ ០០០រៀល និងលេខ២ មានតម្លៃ ៣៥ ០០០រៀល ទៅតាមទំហំ»។

គួរជម្រាបថា ដូងខ្ទិះខេត្តបាត់ដំបង ត្រូវបានក្រសួងពាណិជ្ជកម្មទទួលស្គាល់ជាម៉ាកសមូហភាពកាលពីឆ្នាំ២០២២ កន្លងទៅនេះ៕

The post ដូងខ្ទិះបាត់ដំបង មួយផ្លែលក់បានតម្លៃ ៤៥ ០០០ រៀល ដាំដុះ ៥-៦ ឆ្នាំ ទើបប្រមូលផលបាន appeared first on Kampuchea Thmey Daily.

ម្ហូបពីរមុខល្បីប្រចាំតំបន់ ក្លាយជាអត្តសញ្ញាណអ្នកខេត្តស្វាយរៀង

Din Thary — Fri, 28 Apr 2023 07:37:01 +0000

ចំពោះរាជធានី-ខេត្ត ទាំង ២៥ ទូទាំងប្រទេស តែងតែមាននូវអ្វីដែលពិសេសប្រចាំតំបន់។ ទន្ទឹមនេះនៅក្នុងខេត្តស្វាយរៀងក៏មាននូវអត្តសញ្ញាណជាវប្បធម៌ និងមុខម្ហូបពិសេសប្រចាំតំបន់មិនខុសពីខេត្តដទៃទៀតដែរ។

លើកឡើងនៅក្នុងសន្និសីទដែលរៀបចំដោយអ្នកនាំពាក្យកាលពីម្សិលមិញនេះ តបតាមសំណួររបស់«កម្ពុជាថ្មី» លោក ម៉ែន អេង អភិបាលរងខេត្តស្វាយរៀងមានប្រសាសន៍ថា បើនិយាយដល់ម្ហូបប្រចាំខេត្តស្វាយរៀងច្បាស់ជានឹកមុនគេគឺសម្លកកូរកណ្ដៀង ព្រោះវាត្រូវបានចាត់ទុកជាម្ហូបដ៏ល្បីប្រចាំខេត្ត។

ប៉ុន្តែក្រៅពីសម្លកកូរកណ្ដៀង នៅមានជ្រក់សណ្ដែកសាច់ជ្រូកបីជាន់រំលីង គួបផ្សំស្រាសបិតផ្ទាល់ដៃរបស់អ្នកខេត្តស្វាយរៀងផងដែរ។

លោកអភិបាលរងបានគូសបញ្ជាក់ថា ពលរដ្ឋអ្នកខេត្តស្វាយរៀងមានអត្តសញ្ញាញមួយពិសេសដាច់ដោយឡែក ហើយម្ហូបអាហារខ្លះក៏មានលក្ខណៈខុសប្លែកពីតំបន់ដទៃ។

គួបផ្សំការអភិវឌ្ឍនិងជីវភាពរស់នៅរបស់ពលរដ្ឋមានភាពល្អប្រសើរ បច្ចុប្បន្នខេត្តស្វាយរៀងមានអាហារក៏ដូចជាភោជនីយដ្ឋានល្អៗ ដែលសឹងតែអាចប្រៀបធៀបជាមួយរាជធានីភ្នំពេញដែលជាបេះដូងរបស់កម្ពុជាបាន។

លោក ម៉ែន អេង អះអាងថា នៅក្នុងក្រុងស្វាយរៀង និងនៅក្រុងបាវិត មានភោជនីយដ្ឋានធំៗជាច្រើនកន្លែងក៏ដូចជាមុខម្ហូបក្នុងកម្រិតថ្លៃៗ មិនចាញ់នៅរាជធានីភ្នំពេញនោះទេ។ លោកបន្តដោយផ្តែផ្តាំសម្រាប់អ្នកដែលទៅលេងនៅខេត្តស្វាយរៀងបន្ទាប់ពីបានភ្លក់រសជាតិម្ហូបប្រចាំតំបន់ហើយនោះ ក៏អាចឆៀងចូលទៅសាករសជាតិមុខម្ហូបបែបអាស៊ី អឺរ៉ុប បែបចិនក៏មានដូចគ្នាដែរ៕

The post ម្ហូបពីរមុខល្បីប្រចាំតំបន់ ក្លាយជាអត្តសញ្ញាណអ្នកខេត្តស្វាយរៀង appeared first on Kampuchea Thmey Daily.

ម្ហូបប្រចាំតំបន់ Archives - Kampuchea Thmey Daily

ផ្លែឈើប៉ុន្មានមុខនេះ​ មានសក្តានុពលល្បីល្បាញជា​អត្តសញ្ញាណ​តំណាង​ខេត្តទាំង ៧

ដូងខ្ទិះបាត់​ដំបង​ មួ​យ​ផ្លែ​លក់បាន​តម្លៃ ៤៥ ០០០ រៀល ដាំ​ដុះ​​ ៥-៦ ឆ្នាំ ទើប​ប្រមូល​ផល​បាន​

ម្ហូប​ពីរ​មុខ​ល្បី​ប្រចាំ​តំបន់ ក្លាយ​ជា​អត្តសញ្ញាណអ្នក​ខេត្ត​ស្វាយរៀង

ផ្លែឈើប៉ុន្មានមុខនេះ មានសក្តានុពលល្បីល្បាញជាអត្តសញ្ញាណតំណាងខេត្តទាំង ៧

ដូងខ្ទិះបាត់ដំបង មួយផ្លែលក់បានតម្លៃ ៤៥ ០០០ រៀល ដាំដុះ ៥-៦ ឆ្នាំ ទើបប្រមូលផលបាន

ម្ហូបពីរមុខល្បីប្រចាំតំបន់ ក្លាយជាអត្តសញ្ញាណអ្នកខេត្តស្វាយរៀង