ព័ត៌មានជាតិ

ដូងខ្ទិះបាត់ដំបង មួយផ្លែលក់បានតម្លៃ ៤៥ ០០០ រៀល ដាំដុះ ៥-៦ ឆ្នាំ ទើបប្រមូលផលបាន

បានផុស

៧ ខែ មុន

នៅ

ថ្ងៃព្រហស្បតិ៍ ៧ កញ្ញា ២០២៣

ដោយ

ដូងខ្ទិះបាត់ដំបង ជាអត្តសញ្ញាណនិងត្រូវបានទទួលស្គាល់ជាផលិតផលសសមូហភាពទំនិញពីក្រសួងពាណិជ្ជកម្ម។ ខណៈតម្រូវទីផ្សារកាន់តែទូលំទូលាយ ដំណាំសក្តានុពលនេះគេសង្កេតឃើញថាមានតែនៅខេត្តបាត់ដំបងដែលពលរដ្ឋនិយមដាំដុះច្រើន។

លោក ឡា ខេមរា ប្រធានក្រុមអ្នកផលិតនិងអាជីវករដូងខ្ទិះខេត្តបាត់ដំបងបានបញ្ជាក់ថា នៅក្នុងខេត្តបាត់ដំបង មានតែ ៣ តំបន់ដែលកសិករដាំដុះច្រើន មាននៅស្រុក សង្កែ បាណន់ និងឯកភ្នំ ដែលសរុបទាំង ៣ តំបន់នេះ មានដាំដូងខ្ទិះខ្ទង់ ៥០០ ទៅ ៦០០ ដើមប៉ុណ្ណោះ។

លោក ឡា ខេមរា បានឲ្យ «កម្ពុជាថ្មី» ដឹងថា ការប្រមូលផលដូងខ្ទិះ ក្នុង ១ ដើម បានចន្លោះពី ៣-៥ ផ្លែ និងអាចឈានដល់ ១០ ផ្លែ ក្នុងមួយដើមបើដើមល្អ បើនៅពេលខាងមុខដូងខ្ទិះកាន់តែមានអ្នកស្គាល់ និងមានអ្នកបរិភោគច្រើន ហើយទីផ្សារកាន់តែទូលំទូលាយជាងពេលបច្ចុប្បន្ន នឹងពិបាកនៅក្នុងការផ្គត់ផ្គង់ទីផ្សារព្រោះបច្ចុប្បន្នការផ្គត់ផ្គង់នៅមានកម្រិតនៅឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកលើកឡើងបន្តថា នៅក្នុងខេត្តបាត់ដំបងតាំងពីមានការចងក្រងជាសមាគមឡើង ប្រជាពលរដ្ឋហាក់មានការយល់ដឹងច្រើនពីគុណប្រយោជន៍របស់ដូងខ្ទិះកាន់តែទូលំទូលាយ។

លោកអះអាងថា នាពេលខាងមុខទីផ្សារដូងខ្ទិះកាន់តែមានការផ្សព្វផ្សាយ និងមានការបរិភោគច្រើនជាងនេះ នោះតម្រូវការដូងខ្ទិះនៅក្នុងខេត្តបាត់ដំបងនឹងមិនអាចផ្គត់ផ្គង់បានគ្រប់គ្រាន់ឡើយ ព្រោះការដាំដូងខ្ទិះត្រូវការថែទាំបានត្រឹមត្រូវ ហើយត្រូវចំណាយពេលប្រមាណជា ៥-៦ ឆ្នាំទើបអាចប្រមូលផលបាន។

ប្រធានក្រុមអ្នកផលិត និងអាជីវករដូងខ្ទិះរូបនេះបញ្ជាក់ថា បច្ចុប្បន្ននេះតម្រូវការនៅក្នុងខេត្តបាត់ដំបងផ្ទាល់ ទិន្នផលដូងខ្ទិះអាចផ្គត់ផ្គង់បានគ្រប់គ្រាន់ ព្រោះក្នុងខែនេះមិនសូវមានការកម្មងទិញដូចនៅក្នុងកំឡុងខែឧសភា និង មិថុនា នោះទេ។

លោកថា ដូងខ្ទិះនៅក្នុងខេត្តបាត់ដំបងពេលនាំចេញទៅកាន់ទីផ្សារខាងក្រៅ ក៏មានការបិទបញ្ជាក់ជាឡូហ្គោដែលបញ្ជាក់ច្បាស់ពីគុណភាព ថាជាដូងខ្ទិះប្រភពពីខេត្តបាត់ដំបង។

លោក ឡា ខេមរា បានលើកពីគុណប្រយោជន៍នៃដូងខ្ទិះ គឺមានច្រើន ដោយអាចយកញាំធម្មតា ច្នៃចេញជាបង្អែម ឬទឹកក្រឡុកក៏បាន និងធ្វើជាអ្វីផ្សេងទៀតតាមចំណូលចិត្ត និងតាមតម្រូវការ គ្រាន់តែថាដូងនេះមានតម្លៃបន្តិចប៉ុណ្ណោះ ដោយដូងមានបែងចែកជា ២ប្រភេទ មានលេខ ១ និងលេខ២ ហើយលេខ១ មានតម្លៃ ៤៥ ០០០រៀល និងលេខ២ មានតម្លៃ ៣៥ ០០០រៀល ទៅតាមទំហំ»។

គួរជម្រាបថា ដូងខ្ទិះខេត្តបាត់ដំបង ត្រូវបានក្រសួងពាណិជ្ជកម្មទទួលស្គាល់ជាម៉ាកសមូហភាពកាលពីឆ្នាំ២០២២ កន្លងទៅនេះ៕